الشاحنات تلزم المسار الأيمن 00 يعني ممنوع دخول العجائز

للرشيقين والرشيقات
وأصاحب الذوق العالي والنكهة المميزة
وبما أننا أصبحنا أهل وأخوة وأحباء
لهذا أحببت أن تشركوني
تشركوني في هدية للمراة التي أحبها حد الجنون
فقط أريد أن أحمل لها بإسمكم
هدية تعوضها عن سنوات الحرمان والألم
اعرف أن أكبر هدية هي عودتي اليها
والى مداراتها
وإلى أنفاسها وحنيها وشوقها
ولكن الهدية بالطبع معبرة
فماذا أهديها ياترى ؟؟
وعشان ماواحد يقوم يقول لي ارسل ليها طيارة
فالمبلغ محدود 00 ولكم ثلاثة خيارات
حينها سأقول لها
أنها هدية سودانيز أون لاين اليك !!!

طبعا انا لاكاتلني الشمار ولا شي..
لكن لازم نعرف علاقتك بيها عشان اكوردنجليها هنقدر نحدد نوع الهدية

ابو حراز شيل ليها جوال يشغلها شوية
اوجهاز كمبيوتر عشان تعمل ليها اشتراك نت وتكون معاك اون لاين طوالي
لكن كان ما بتعرف تستخدم دخلها معهد كمبيوتر
وشيل ليها نظارات امكن تشوفك كويس وتعرف هي صابرة علي شنو لاسع

أساسي
قال نضارات قال
الجوال عندها
وهلكتني بيهو هلاك عدووك
والكمبيوتر عندها
وبتدخل كل يوم
وكل يوم بتقرا
لكن عارفة كلامي حدو لساني بس
ياخي زولتي دي مسكينة جداً وطيبة وأهل العوض يابانية مية بالمية
انت مفتكرها من ناس ياي وهاي وللا شنو ؟؟
بعدين عاوز أقول ليك إنها هي من دلتني على هذا البورد
ويمكن دي حقيقة الناس ماعارفاها
لأنو قرأت واحد من بوستاتي في نفس المنبر
عشان كدا دخلنا واتعرفنا عليكم

قال ابوحراز أستهلك قال ؟؟
انت مفتكرني صابونة حمام وللا شنو ؟؟
صاحبك الجعلي أخبارو شنو
اسألوا اشترى ليهو صابونة وللا لسه

ميادة
دا شمار وبصل توم وشطة خضراء
والله دي ملجة عديل مش شمار ساكت
لكن هي إمراة
إمراة لها مساحة كبيرة في حياتي
ولها ومضة وإشراقة خاصة ورحيق خاص
وطعم مميز
انا سوف اترك ليك الباب مفتوح على مصراعيه
فو كانت هناك خطيبة فما نوع الهدية المناسبة
ولو كانت زوجة فماذا نهديها
أهو 00 الواحد يكون جاهز في كل الحالات

ليلة امس وأنا اقود سيارتي في شارع مزحم
تذكر سطوة البورد وهيمنته علينا
وتاثيره اللامحدود
فجأة توقفت عند بوست للزولة الرشيقة 123
ضحكت وأنا اقود سيارتي
عندما قرأت تعليق أحدهم وهو يقول
اها تقوم عليك مرتك نص الليل
وتنهرك كدة
وتقول ليك 00 هوووووووووي ياراجل بلعت الحبة وللا لسه ؟؟؟
وقلت في نفسي
هل ياترى سأسمع مثل هذه النهرة { إن جاز التعبير }

لتكن مداخلتي هذه خم رماد: ولآنني من الممنوعي الدخول: اقترح عليك أن تبلع ليها حبة..أي حبة..ويا حبذا حبة محبة!

بناديها
يكفي دخولك على هذا البوست المتواضع
فهو يعتبر أكبر هدية لي ولها
قال حبة قال
جيبي مليان حبوب ماتخاف
اشتريتها قبل ما أشتري الريحة

لكن بصراحة مفروض نعمل ليك قسيمة مخالفة
الجابك تتحاوم بي هنا شنو

أهديك ثلاثة خيارات (جمع خيارة) :

أن تفك ارتباطك بها – عشان تشوف ليها ود حلال .
أن ترشح لها ود حلال بمعرفتك ..
أن تiهديها نص كيلو دهب مطعم بالألماس

أهل العوض
انت تقصد كيلو ماس وللا كيلو خيار ؟؟
اي شيء ولا الذهب دا
أنا حا أدق سيد الدهب
لكن ما حا أدق ليها دهب

بعدين دي واقعة البحر بابوحراز
مفتكرة القبة تحتها فكي
غايتو الله يصبرها علينا

الاخ ابو حراز

المهم الاحساس يا عمنا ، يعني اشتري ليها حاجة بسيطة ورقيقة من غير مبالغة واكيد حتعجبها طالما مشتريها باحساس عالي وذوق

مايا
عمنا عديل
هوووووووي انا لسه صغير وعاوز أكمل قرايتي
أعجبني ردك
إحساسنا كان مرهف
لكنه أصبح اكثر شفافية عندما دخلت الى هذا البورد
في الحقيقة أذواق جميلة وعالية
أخذت منها الخلاصة
وضخيتها في دجمائي وانفاسي
لتخلق إحساساً مميزاً
سأحمل هذا الإحساس الذي يعود اليكم
وسيكون شمعتي ونبراسي لإختيار الهدية

الاخ ابوحراز

عمنا دي جات عرضا يا ابو الشباب

قصدت اقول حتى لو كانت الهدية بسيييييطة جدا ومليانة بذوقك واحساسك صدقني زولتك دي حتنبسط للغاية وبعدين هي بتكون مستنية شوفتك بالدنيا

تسلم يا عم عموم البورداب

أتاريك مكسر ...كفارة والله يا إبن عمي
الهدية: أدها الكلام الحلو وكنت بقول ليك سبل ليها عيونك لكن خايفها تطفش

أبا
إنت لسه راكب في التقالة وللا شنو
قال مكسر قال
عاوز تلحقني جدي
دا شالوهفي الخرج بتاع الحمار
قال شنو
قال عاوز يتزوج قال
الراجل كسيحة ومدة صلاحيتو منتهية
لكن قال عاوز يعرس
أها ختوه في عين الخرج
والخروف في العين التانية
والمشكلة مشى لكم واحدة وقالن ليهو
كان انت العريس
العرس دا ذاتو خليناهو
ورغم كدا يجي راجع البيت وياكل ويشرب عادي
عجايز باردين
بالله دا لو نحن
الواحد الحلة كلها ماياكل فيها

أبو حراز

شيل ليها لفتين قمردين

لفه ليها ولفه ليك

كفاية إنت بس، مشيتك ساى بالدنيا

المطر
سأحمل لها القمر
وسأحمل لها الدين
وساحمل اليها مشاعري تجاهكم
سأحمل صرخاتكم
ورذاذكم
ورحيقكم
وابتساماتكم
وحتى مشاكساتكم
سأحملها اليها
ساهديها عطر كلماتكم
وسأمنحها كثيراً من الحب الذي منحتموني له
لأنها إمراة متفردة
ولأنني قادم اليها من أناس متفردين
في كل زيارة لي للسودان لم أكن أحمل مثل هذا الحلم
الا في هذه الزيارة
فانا أحمل الكثير من الطاقة
والكثير من القوة
القوة التي استمديتها منكم وأنا أقرأ اليكم
فقد كنت أحمل في السابق مجموعة من الهدايا
وأوراق الضرائب
وترعة كنانة والرهد
وأوراقي الشخصية
لكنني الآن أحمل حبكم
وكلماتكم
وكتبكم
وثقافتكم
وزادكم الذي منحتموني له
ويكفيني فخراً انني أحمل هذا الرحيق المتفرد
احمله ليهطل
لا ليروي ظمأ حبيبتي
بل ليرو كل أهل العوض في عقر دارهم

أبو حراز

لك التحية

أولا: أنا معجب بكتاباتك، وأقول هذا لوجه الله، لا أريد عليه جزاء ولا شكورا.. ويشهد الله أنني لا أريد به أن أتملقك أو أستميلك إلى أي جهة كما قد يتبادر إلى بعض الأذهان.. وكتاباتك تذكرني بكتابات الكسمبر وطاحونته في بورد سودان نيت عندما كنت أزوره كثيرا هناك وانقطعت بسبب الوقت وضيقه وشكل البورد الجديد وعيوني..

وتحياتي لك ولكل أهل العوض فأنا أحبهم، مع أني لست من أهل العوض، وإنما من كردفان عروس الرمال.. وضحكت وأنا شاب من كلمات الشاعر محمد المكي إبراهيم يصفهم في رائعته "قطار الغرب" بقوله: "لهم أصوات في لين القطن وآذان تسمع رنّة قرش في المريخ"، وأنهم موجودون في كل السودان..

ودحين داير رايي، في الهدية مع أني من الشاحنات التي يجب أن تمتنع؟؟
إذن فاسمع:
أهدي ليها إقامة معاك، أو قول ليها خلاص أنا حأجي السودان، كفاية بعاد!!.. أقول قولي هذا وأنا عارف أنو البورد حيفقد كثافة نشاطك إذا مشيت السودان..
بس أوعى تكون إنت ما زلت في العراق؟؟ ما أفتكر.. لا زلت أذكر قصة العراقي الذي وضع الأرز في رأس السوداني الجنوبي، وقصة العلقة التي أكلها...

ولك مني السلام

ياسر

يعني قريت كلامي يا البروة وعملت نايم
اها غايتو كان ما بكرة رمضان كان قلبت الدواس معاك بي بوست كارب في الموضوع دا لكن حلاك رمضان
اها العيد غايتو الا تسجل ست النفر تدافع ليك لكن يحلك مني الحل بلة

الله يجازيك
دايماً تضحكني
تعرف والله ناوي ليك نية بطالة جداً
بس أول ما اقابلك أجضمك
تصدق يا اساسي والله ومن داخل قلبي
انا محروووووووووق جداً من كضومك المنفخات ديل
والله العظيم فيهن حلات تجضمة

هذا كلام كبير علي ياياسر الشريف
فأنا مازلت قزماً
وسوف أظل طالما هناك أناس متفردين بهذا البورد
واشكرك على كلماتك الرقيقة
وأتمنى أن أكون إضافة متواضعة لهذا البورد
بل أتمنى أن لا أكون ضيفاً ثقيلاً عليكم
وثق بأن عطائي سيستمر بإذن الله
سأمنحكم كل ماعندي
بالقدر الذي استطيع
لك تحياتي
وتحيات ست النفر المغلوبة على أمرها
قالت لي أن لها مفاجأة بالمطار
قلت ليها أهم شيء بس عفشي يطلع بسرعة
والأهم منه يطلع ملح

لأول مرة أرد عليك رغم متابعتى لكل ما تكتب تقريبـا .. و اضحك لها من قلبى
هناك استاذة فاضلة من أسرة أبو حراز فى كردفان .. علمتنــا قيمة معنى أن تحب .. تزاملت مع ابناءها وما زلنـا اصدقاء أوفياء حتى اليوم.. يمكن عشان كدا حبيتك و أحب متابعة مواضيعك !؟
عند زواجى جاءتنى مجموعة هدايا .. لكن أروعهـا أن أتانى أحدهم ينوب عن مجموعة من الأصدقاء جمعوا مبلغ خرافى علشانى و ما عارفين يشتروا لينـا شنو .. قام الراجل دا سألنى ياخى نشترى ليك هدية شنو .. ؟ المرأة كانت جديدة لنج .. إتلفتت و إستهجنت بس بعدين فهمت حدود العلاقة التى تجعلهم يأتون ليسألوا ...
أتمنى أن تهديهــا و هى داخلك .. و أنت تشترى الهدية .. أى هدية .. شريطة أن تكون لها هى يعنى ما تمشى و توصل و تبدأ فى توزيع الهدايا من المطار وصالة السوق الحـر ...
أمشى لى سوق حراء جدة .. أو سوق المحمل .. و سمىّ بالله .. حتلقى اشياء رائعة جدا ..
و لا اشك ابـدا فى ذوقــك .. و عليك الله بعدين قول لى هديتك كانت شنو .. عشان اسوى زيــك
تحياتى مرة أخرى , و تمنياتى لك بإجازة سعيدة و هدية مقبولة ..

مرة أخرى لك الشكر على هذه البسمات التى تزرعها فى شفاهنا.. و دمت ...

ابو حراز انت جادي ولا بتهظر
يعني عشان نعرف نرد على اساس المدام ولا على اساس ست النفر
كل سنه وانت طيب يا حبيب

Quote: للرشيقين والرشيقات وأصاحب الذوق العالي والنكهة المميزة وبما أننا أصبحنا أهل وأخوة وأحباء لهذا أحببت أن تشركوني تشركوني في هدية للمراة التي أحبها حد الجنون فقط أريد أن أحمل لها بإسمكم هدية تعوضها عن سنوات الحرمان والألم اعرف أن أكبر هدية هي عودتي اليها والى مداراتها وإلى أنفاسها وحنيها وشوقها ولكن الهدية بالطبع معبرة فماذا أهديها ياترى ؟؟ وعشان ماواحد يقوم يقول لي ارسل ليها طيارة فالمبلغ محدود 00 ولكم ثلاثة خيارات حينها سأقول لها أنها هدية سودانيز أون لاين اليك !!!

انا لست منهم سوف التلزم الايمن

Quote: المطر سأحمل لها القمر وسأحمل لها الدين وساحمل اليها مشاعري تجاهكم سأحمل صرخاتكم ورذاذكم ورحيقكم وابتساماتكم وحتى مشاكساتكم سأحملها اليها ساهديها عطر كلماتكم وسأمنحها كثيراً من الحب الذي منحتموني له لأنها إمراة متفردة ولأنني قادم اليها من أناس متفردين في كل زيارة لي للسودان لم أكن أحمل مثل هذا الحلم الا في هذه الزيارة فانا أحمل الكثير من الطاقة والكثير من القوة القوة التي استمديتها منكم وأنا أقرأ اليكم فقد كنت أحمل في السابق مجموعة من الهدايا وأوراق الضرائب وترعة كنانة والرهد وأوراقي الشخصية لكنني الآن أحمل حبكم وكلماتكم وكتبكم وثقافتكم وزادكم الذي منحتموني له ويكفيني فخراً انني أحمل هذا الرحيق المتفرد احمله ليهطل لا ليروي ظمأ حبيبتي بل ليرو كل أهل العوض في عقر دارهم

أخوانا أبو حراز
مشاء لله عليك
فى هذه اللغة الشاعرية
بس كافها من جنس دى

المهندس
هذا دلالة على ذوقك الشاعري
فكلماتي بسيطة جداً
لك التحية وأنت ترفع من معنوياتي التي أهلكتها الهدايا في الأيام الأخيرة
انشاء الله سأزورك في الخرطوم
جهز العرديب والشعير والكركدي
تصدق أمس كنت في القنصلية السودانية بجدة
دخلت الكافتيرياولقيت ليك حلة بس كأنها جايبنها هسي من السوق الشعبي
طبعاً فيها عصير كركدي
والراجل بتاع الكافتيريا بيقول ليك اقعدج وبجيب ليك العصير في التربيزة
وعشان شالوا مني الضرائب والزكاة والفضائية وحاجات تانية
عشان كدا جيت عطشان جداً
وفتحت ليك الحلة الكبيرة وسط دهشة صاحب الكافتيريا
وكرطعت كبايتين في الأول
وبعد كدا مشيت التربيزة وجابوا لي العصير زي الناس مابتعمل

الأخ أبو حراز
خالص تحياتي لشخصك الكريم
أخي لأنك تلزم المسار الأيمن كان لازم أخرم ليك حيث أنني فور ويل درايف وفي رواية أخرى راف فور أو باث فايندر ، وأحسب أن هناك مناطق محرمة عليك وعلى أمثالك من دخولها بإعتبار أنك تريلا وقاطره قندراني ، كما أن هناك أوقات معينة من اليوم في كثير من دول العالم تفرض فيها القوانين وقوفك ومن في حكمك تأدباُ للبرينسات والركشات والأمجاد وما في حكمها وعلى جانب الطريق.
حكاية أن وصولك للبلد أجمل هدية ده كان زمان أخي أب حراز فلم تعد الناس مغبشة يبهرها منظر المغترب فور قدومه ، فهناك الكثير من الأسر المرطبة ترطيبا بفضل الكدنشة والكريمات فالعولمه والفلهمة غيرت الكثير من ملامحنا ومفاهيمنا وغناوينا وحتى أحلامنا ، فأصبح حضورك زي عدمه إذا جيت يد ورا ويد قدام وكل ما زاد عدد الشنط كلما علت مكانتك في الحله ، وبالضرورة لن ترضى عنك الجكاسية ولا أهلها حتى تغدق عليهم من هداياك ، وإياك إياك من الحاجات الرخيصة فالناس هناك بقت تفتيحه وما بتمشي عليها مثل هذه الأمور ، وأكبر دليل على ذلك الناس كرهوا حتى أغنية أهدى لي تفاحه أو بس برتكانه لأنو البرتكان أصبح زيو وزي أى بطيخ الدسته بي ألف جنيه وبعد تفوت الجيلي بتبقي بي ثمانمائة جنيه أما في كسلا فبنصف القيمة والبيع بالقفه ، والتفاح يا صاحبي راقد وعلى قفا من يدفع وبعدين يشيل والتفاح بقي شايلنو وحايمين بيهو في الحلة والتفاحه بي خمسة آلاف جنيه سوداني ، ويا حليل حلتنا التي إستبدلت بتاع الترمس بي بتاع التفاح وطلعنا تفتيحه أكتر من بني إسرائيل.

صباحاتك سعيدة ايها الملا عمر
فعلاً كلامك ظريف جداً
وكما قلت فالغترب أصبح لاشيء
ويقاس بعدد الشنط
أذكر أول مرة رجعت فيها السودان
إجتمع كل أهل العوض في منزلنا قبل يوم من حضوري
رغم أنني لم أتصل عليهم
وبالفعل عندما وصل البوكسي المحمل بالشنط رأيت العجب
فكلما قام الكمساري بإنزال شنطة
اسمعهم يزغردون
يووووووووووووووووووي
وهذه تتم على حسب ومقاس الشنطة
يعني الحقائب 00 يووووي صغيرة
والشنط المنفوخة ينفخوها بزغرودة كبيرة
وبعد أن قمت بتوزيع الخطابات
كالعادة أهل العوض ماعندهم صبر
جو الجماعة لأخذ شنطهم
أها كل مرة أخواني الصغار يدخلوا تحت السرير ويتناولوا شنطة
ويدوها لصاحبها
والجماعة كلهم الزغردوا كانوا بعاينوا ومستغربين جدا
بعد شوية الوالدة قالت لي
وإنت ياسجم الرماد شنطك وووووووين ؟؟
والناس الزغردوا ليك ديل حانديهم شنو
المهم يازول بعد اسبوع مشيت ليك سوق ابوعشر والمدينة عرب
واشتريت ليهم بعض الهدايا

لكن المشكلة لمن رجعت المرة الجاية
ولا واحدة مازغردت

أخي أبو حراز
إذا كانت الزغروده تحية فالموضوع ساهل يعني يا تديهم هديه يا ترجعوا ليهم زغرودتهم وأظن التانيه دي ساهله خالص ولا شنو

ابو مهجة
لك التحية
والتحية للمعلمة الفاضلة من اسرة ابوحراز
وجميل جداً أن يعلمنا الآخرين كيف نحب
الحب ياسيدي يجب أن يكون جزءاً من فصيلة دمنا
واشكرك على الهدية
وصدقاً اتيت قبل يومين في مركز المحمل التجاري
به اشياء رايعة
ولكنني لم اشتر الهدية
لأنني اندهشت بتصميم المبنى وروعته
وفوق هذا وذاك فأنت تعرف أهل العوض عندما يصطدمون بالحضارة
فقد رأيت نساء من جميع الأجناس هناك
أحمر واصفر واخضر وابيض واسمر واشياء بلا لون من شرق آسيا
ووسط هذه الزحمة نسيت شراء كل شيء
والأدهى إن جوالي سرق هنا
وبقت علي حكاية الزول العربي المشى الخرطوم لأول مرة
أكثر شيء عجبو طبعاً اشارات المرور
وقعد تحت عمود الإشارة
وبقى يقول
أمك ولعت
أمك ماتت
أمك ولعت
أمك ماتت
أمك سرقوني
طبعاً عاين للحقيبة مالقاها
أها انا برضو حصل معاي نفس الموقف
أمك هندية
أمك أندونوسية
أمك سعودية
أمك فلبينية
أمك سووووووووودانية
أمك لبنانية
أمك 00 جوالي مالقيتو

ايهاب
بس عاوزين تلحسوا العسل دا براكم
انا قررت بعد كدا اكون إنسان مسئول
والله الواحد يباريكم
لا يلم في الجنة ولا يلم في الحور العين
والمشكلة لايلم في النوبة
ولا يلم في الذكر

ابوحراز ولدنا

والله انا بثني اقتراح اهل العوض وبقول ليك فكها لي جاي لو ماقادر عليها حنك بحنكه ليك وثانيا انت من ذمن الجكس البيهدو ليه هديه اسي الواحده بقت تجيب ليك الهديه

الملا عمر
يعني على طريقة لكم دينكم ولي دين
لو إرجاع الزغرودة يكفي فإننا سنزغرد لهم شهر بحاله
صدقني لقد أبتليت بشخص سأكون عديله في يوم ما
يعني بالعربي هو متزوج من الجماعة
والراجل دا شغال عادي
لكنه يحب البهرجة والتفاصيل
تصدق أنا دائماً أحمل لحماة المستقبل وصديقاتها هداياعادية من باب شريف
وصاحبنا هداياه كلها ذهب
حتى للجيران والأقارب
المشكلة أنا لمن أجيب الهدايا وأقول ليها وزعيها
تقول لي لا
شيل هتشك دا وزعوا براك
لكن الجن الأحمر دا لمن يجي
تاخد الهدايا براها وتوزعها على صاحباتها

عباس
يابوي لو الشغلانية حنك زولتي شبعانة شوف ليك حاجة تانية
قال ودرعية قال
بفتن فيك نسيبك لو قابلته في مكة

الزول الخطييييييييييييير بجد عثمان،،
ما حأقول ليك تهديها عطر، ولا فستان، ولا حذاء،، ولا حتى شنطة كبيرة من النوع البيزغرتو ليهو زغروتة طويييلة،،
كل ما هناك بس اتونس معاها،، وبجد دي أجمل وأحلى هدية،،
ياخي بختها دي الأنت محتار تهاديها شنو..
حكاية واحدة من حكاويك الظريفة دي تخليهاتنسى هي عايزة شنو..!!
والله يخليك ليها،،

يا اب حراز

اهدي لها كتاب الله

اها دي بتسوي فيها شنو

ورمضان كريم يا صاحبي

هسي عليك الله في زول بفتش ليه علي هدية في رمضان جنس جلاحة هي

أبو حراز
عشان كلماتك الرقيقة اللي وصفتها بيها في أول البوست، أهديها روحك!
لك ولها الود
إيمان

العزيزة رجاء
لك كل التقدير وأنتي بكلماتك الرقيقة تعطين البوست نكهة مميزة
نكهة أخالها أنها ستقود كل العجائز الى تلمس الطريق وتجاوز الشاحنات على غرار مافعل الملا عمر والدخول لهذا البوست
كلماتك مزيج من العطر ومزيج من الألق
سأمنحها كلماتي وكل الحكاوي
وسأقول اليها أنهم أحبوك
لأنهم يحبون من أحبك
وهذا يكفي

نزار حسين
بالطبع كتاب الله هدية تحمل في داخلها كل هدايا الكون
صدقني
هذه توقظني للصلاة عندما أكون في بيتهم
قلت ليها ماتكوني زي صاحبنا الإتزوج ليهو أنصارية سنة
طبعاً دا معانا بالسعودية
ولاخمنا ليك زمان بدور جات بدور طلعت بدور اتصلت
يعني كان عطس بيعطس بدور
والله الجماعة قالوا ابوحراز مكسر
لكن صاحبنا دا هزمنا ليك 8 صفر
بعدين اتزوجها وجابها ليك
ياكافي البلاء الجامع دا ماكان بيعرفوا وين
بقى يجي قبل المؤذن ويحجز في الصف الأول
بعد فترة زولك جانا وقال والله عاوز يسفر المدام السودان
قلنا ليهو ليه يامان ؟؟
قال والله دي صلاة الصبح تصحيني الساعة 2 صباحاً
والمشكلة شنو 00 الحمام
في البرد الشديد داك لو ما استحم ماتخليهو ينومك
والعجب لو جاء رمضان
قال بس لو عاوز أي شيء منها
أمشي طوالي للمصلاية
لأنها 24 ساعة قاعدة فيها

ايمان أحمد
شكراً على المشاركة
المراة أياً كانت
تحمل في داخلها قدراً كبيراً من السماحة والتسامح
تحمل زخماً هائلاً من الطيبة والأمومة والحنين
فما بالك لو كانت حبيبة
اذا كانت هي تهدينا أنفاسها
وتهدينا أطفالاً للحياة
وتمنحنا الإبتسامة
وتتألم من أجلنا
وتبكي من أجلنا
وتتنفسنا عشقاً وأملاً وحباً
إذا لماذا لانهديها أرواحنا
فعطاء المراة لايقاس بأي عطاء

لم شفنا عنوان البوست إفتكرنا كاتبوا واحـد من ناس أمن الطـرق .


و عايز الجـد و بدون زعل يا خوي أحسن هدية تشوف ليها عريس

يا خي لكن قروشك كلها ماشة في جضومك الكبار ديل أكيد حق الهدية ما عندك

و عارفك ما بتقصر بتكون أكلت راسها نقة ساكت و نسيتها الهدية .

سلام مربع
ابو حراز
وصحبة الورد

ابدا يمرق رمضان علينا ليدثرنا بكرمه ،
ويمنحنا الطمانينه وكثيرا من المغفرة
نسأله تعالي ان يبلغنا رمضان اعواما عديده
وتصوموا وتفطروا علي الف خير يارب

أبوحسين
قال أمن الطرق قال
ياخوي والله في ناس في البورد إلا يشيلوا ليهم عكاكيز مضببة عشان مايدخلوا
وبعد دا كلوا جونا كاسحين سااااااكت
بالله ماعندك دواء يعمل لينا تخسيس للجضوم ديل
والله في ناس في البورد دا لو شفت جضومهم تشفق على حالهم

البت الظريفة شيري
لووووووووول الليلة بشاكلوني الجماعة عشان الظريفة دي
إنتو لووووووول دي معناها شنو
كلما اقرأ عبارتك كرطع الشاي وشتت اقف عندها كثيرا
بل واستخدمتها قبل فترة
واحد جاء عاوز ليهو قروش ويرجعها قال بعد فترة
قلت ليهو ياخوي ماعندي هسي
قال لي : خلاص يا ابوحراز دي آخر مرة أجيك
وقلت ليهواها وكمان بالمرة كرطع الشاي دا وتاكي الباب وراك وشتت
وماتنسى باب الحوش
قال قروش قال
والله بعديها نمت نوووووووم تقيل جداً
لك التحية والتهنئة بالشهر الفضيل

ابو حراز بمناسبة سؤالك عن لووول
دا التفسير بتاعها بس حصص بلاش ما عندنا تاني
اللووووول لوووول يا لووولية

شكراً أساسي على المعلومة الجميلة
لأول مرة أعرف المعنى
يعني الواحد ممكن بعد كدا لو عاوز يتأوه عشان المحبوبة
يمكن يقول آآآآآآآآآآآآه ياست النفر
طبعاً شترا جداً لكن نسوي شنو
ما كلو تولول
قال كاثوليكي قال
قلت قعد يبكي بس

أخي الحبيب الرايع أبوحراز ـ في شوق والله.. ، كل سنة وانت طيب والجميع بخير .

بمناسبة الهدية :
كنت في مكالمة تلفونية ذات مرة مع البيت ـ سألت ولدي عبدالله كان في سن الرابعة وقتها ـ السؤال التقليدي ، أجيب ليك شنو معاي ؟ فقال لي عجلة وموتر وعربية ) فسمعت صوت أخي الساخر عبدالمنعم بجانبه يرتفع قائلا : ـ ( خلي يجيب ليك معاهم شارع بالمرة .. )

يا أبو حراز يا خي ما تقطع عننا لطفك ـ خليك قريب من البورد خاصة في نهاريات رمضان دي لأنه حرة النفس واردة .. تحياتي وكل سنه وانت طيب .
كتيابي

أستاذي الأكثر روعة الكتيابي
لا أستطيع أن أكتب من الضحك
فقد أعجبتني نكتة عبد الله ودفء الساخر عبد المنعم
جميلة هذه الحياة عندما تقرأ فيها هذه الشياء البسيطة والرائعة
والأجمل من ذلك أن أكون من المحظوظين بدخول أصحاب الشاحنات على بوستي
وأنا قصدت أن اجرهم إلى الخط الوسط
فنصائحهم هي البلسم الشافي الذي يقودنا إلى بر الأمان
لك التحية بقدر ماقدمت لنا من كلمات رائعة
وسأظل أذكر هذا الكلام الجميل

أخي أبوحراز

دخلت بوستك هذا وقرأت فقط مداخلتك للعزيز المطر ذ رين .. قرأتها من زاوية واحدة ... فقلت في نفسي يا ربي أنا بقيت أساسي ولا شنو؟

انت يا اهل العوض خليهو يروي ارضكم واطعن في الظل المسكين اساسي
هاهاهاهاها

أهل العوض
مفروض تشتري لي الشنطة بتاعت العرس
لأني في كل مرة بذكر اسمك دا
وفي أي بوست
شوف الجماعة بورداب الشرقية
وأتلحلحوا لينا شوية
يعني البورد دا بدل مايكون قراية سااااااكت
فالقراية شبعانين فيها لي حلقنا
نحن عاوزين حاجة نجيضة
يعني كل مرة نشتري شنطة عرس لواحد من ناس البورد
وانا عاوز الصرفة الأولى

اهل العوض
ماقلت رايك في الموضوع
عملت فيها نايم

أبوحراز

الجماعة كلمناهم وفعلا عملو الصندوق ... بس أنا اقترحت عليهم يعملوهو خمستالاف ... والصرفة الأولى لي ... وحا يدوني ليها يوم تلاتة وعشرين رمضان ... البعدا طوالي بدوك ليها إت .

السلام عليكم يا أشخاص
والله يا حروزة المدام دي يا بختها بيك .. طالما بتفكر فيها بالعمق ده وبالبعد ده... هنيالكم بي بعض .. وامسكوا الخشب يا جماعة

اما بعد...... فبي النسبة لي موضوع الهدية... أهم حاجة في الهدية تكون حاجة بتدوم لي ابد الابدين .. يعني تقعد تذكار بينكم .. وبعد العرس كل ما تعاين ليها تقول الله يجازي الكان السبب ... فاهمين بعض في الحتة دي

تاني حاجة تكون من الممكن ان توضع في مكان أول ماتقع عليه العين، عشان تفضل دائما" في خيالها وفي بالها ... وطبعا" يا حروزة ده كله قبل العرس

ثالث حاجة تكون الهدية من ما خف حمله وغلا ثمنه

وانشاء الله أكون ساعدت في الاختيار وبس

لكن يا أساسي حااااااااااااقد .. قال نضارات نظر قال .. على العموم هي بتكون بتشوف احسن مني ومنك ... وما بفسر اكتر من كده

خلاص باي
الله يجازي محنك يا شيري عاديتينا بالهترشة

يا بت الهنا ... رمضان كريم ... لاكين أنا شايف إنك ما ساعدتي الزول دا ... النوع دا إلا تقولي ليه شيل معاك المبلغ الفلاني وامشي الدكان الفلاني وفي الرف الفلاني بتلقى غويشة كبيرة معمولة على شكل خاتم مرسومة فيها دبيبة ...

بعدين يا أب حراز ... قلت لي شنو ... أكلم الناس واسوي الخروج والعودة ؟