أمنياتي التي تحقـقت 00 وامنياتي التي لم تـتحقق بالبورد

قال ثقافة قال
كانت الأمنية الأولى أن أحظى بإمراة مبدعة أتكيء عليها وأنثر همومي عبر أنفاسها 00 اقرأ لها وتقرأ لي 00 اعاندها 00 أشاكسها 00 واتربص بلحظات طيفٍ معها 00أحكي لها عن طفولتي 00 وعن الأحلام التي تراودني وعن الأزقة التي تسكعت فيها 00 ونخرج بقصة حب عنيفة نحكيها لكم على جرعات 00 على دفعات 00 على زخات 00 فهل تحققت الأمنية ؟؟؟؟ بالتأكيد كان هذا أول اخفاق 00 ربما تحقق بعضاً منها لكن ماتحقق يمثل حفنة من الحلم !!!!
**********************
أن التقي بكل الذين قرأت اليهم 00 بكل الذين عاندوني واضحكوني واعادوا لي ذكريات كنت أخالها قد كتبت عليها الشواهد 00 وجدت والتقيت بعضهم 00 كانوا في غاية الدفء واللطافة 00 وفي غاية الأريحية والشفافية 00 بعضهم في غاية الوسامة والآخر شين لدرجة أنني نصحته بأن لاينزل صورته بالبورد 00 قابلت بورادبيات توقعت في اللحظة الأولى أنهن قد تم اسرهن من الجنة !!! واتمنى أن اقابل البقية 0
*********************
أن استفيد من علاقات البورد في اقامة حفل فرح خاص بي يحييه الموصلي وسيف الجامعة وحمزة سليمان وعبد العزيز خطاب 00 طبعاً ملح ساكت 00 وأن ارقص في ذلك اليوم حتى الصباح 00 مش الحفلة حقتي ؟؟؟ لكن لم يتحقق ذلك لأن الفنانين بعضهم في رأس الرجاء الصالح والآخر في كاب الجداد 00 وقبل هذا وذاك أين هي العروس التي سيقام من أجلها الفرح ؟؟؟؟؟؟
*********************
كم كنت أتمنى ان نلتقي جميعاً بالوطن الأم 00 السودان الكبير في سماحته ومساحته 00 أن نلتقي هناك في قاعة الصداقة وأن نحتفل ونغني بطريقتنا الخاصة 00 ونلقي كلماتنا المشبعة برائحة سودانيز أونلاين لتصطدم بأنفاس الوطن وتومض في سودان السلام ولنقول للرئيس الذي بالطبع سيحضر احتفالاتنا أننا في هذا المنتدى نمثل نموذجاً كبيراً للتعايش رغم اختلافاتنا التي تحدث بين الحين والآخر 0 والشيء الذي مازال يحيرني فيكم أنكم تختلفون بالبورد لدرجة انني أعود لجاهليتي والبس السكين والعكاز المضبب تحسباً لأي ظروف ولكنكم كالسحرة ما إن تلتقون حتى تذوب كل هذه الخلافات وتنصهر في عناق لم أر مثله في حياتي !!!! نموذج على ذلك رأيت هشام يازول يهرش أساسي ويقول له قوم ياولد غسل للجماعة ديل 00 طوالي يقوم يشيل الابريق ونمد ايادينا انا وعمو قرشو وعمو قرجة ويدينا الصابون وهاك ياغسيل وياونسة !!
*********************
أمنية لم تتحقق وهي أنني كنت أتمنى تحديد يوم واحد من كل شهر بالبورد لمناقشة قضية تخص السودان على أن تذهب بوستات الأعراس والمديدة حرقتني وباركوا لينا الزواج والله أكبر القديمة 00 على أن يتم تعليب كل هذه البوستات وترك المساحة لمناقشة قضية تخص الوطن وكان هذا الموضوع يؤرقني جداً 00 مثلاً : سوء التخطيط في السودان رغم وجود عمالقة التخطيط واباطرته به 00 انهيار بعض المشاريع في مهدها 00 التخبط في قرارات الخدمة المدنية 00 احتياجنا جميعاً مشاة وعسكر وسائقين الى توعية مرورية 00 قطوعات الكهرباء المستمرة وعدم ايصال الكهرباء لكل أنحاء السودن 00 الأغنية السودانية هل ارتقت أم هبطت الى الحضيض 00 التعليم الجامعي وضعف الكفاءة العلمية 00 عزوف المغترب عن استثمار أمواله البسيطة بالسودان 00 جامعات ابناء المغتربين 00التغيير الذي حدث في نمط حياة الأسرة السودانية 00 حتى العادات والتقاليد التي تحتاج لصياغة خاصة وغيرها من المواضيع الاجتماعية والثقافية والرياضية والدينية
*********************
أمنيه اخرى بالجد أتمنى أن تتحقق وهي أن أعضي بدر الدين شنا رغم أنني لا اعتقد أن فيه شيء يستاهل العض وبت الجزيرة والملا عمر وكبسيبة 00 طبعا كنت أتمنى أن أعضي المهندس في السودان لكن وجدته أطول مني 00 وأن أجضم تماضر شيخ الدين ودينق وأن آكل جاتوه من يد الزولة 123 وكمونية من شيري 00 هسي حاتقولوا النسوان مالك كترتهن أها هل لديكم أحلام تحققت بالبورد ؟؟؟؟؟؟؟؟؟

ابحراز ..كم انت جميل وذو قلب وعقل..يحمل كل هذه الامنيات العظام
امنية لم تتحقق لى هى....
ان اقابل واحد من بورداب الرياض..فى شارع غبيرا العام بس من غير ان يعرفنى انا احمد ابقوتة..
دا طبعا الحلم الذى بقى لى ...بعد ان فشلت فشلا كبيرا..فى ان احضر لهم حفلة من حفلاتهم التى لا تحصى..والسبب هو الدوام الليلى......امس لاقيت واحد بشبه ابوجهينة طالع من مطعم الملتقى الذى لم اتى اليه الا نادرا..قلت له ابوجهينة لم يلتفت على....برضو واحد وقف جنبى فى الاشارة ...قلت ليه ياخال ودقاسم لم يلتفت الى...

لكن امنتى التى تحققت قابلت فى سوق البطحاء جنب سوق الفلبينين ..تعرف قابلت منو....الساحر
ومعاه فردته السنجك....لانى بعرفهم من زمان...
ذكرتنى ايام كنا فى الابتدائى..كلما نمر على درس يقلو لينا حتمر على التفاصيل فى السنين القادمة
ولما مشينا العالى ...بقو يقولو لينا كما درست سابقا..بس دى زى اما نيك يابحراز...
بس انا فضل لى امنية واحدة لو تحققت كل الامانى دى بسيطة....
ان اعمل مقهى انترنت فى ابقوتة..جنب شجرة النيمة التى تجلس فيها ست التسالى...المقهى دا ويييييييير ليس..wire less.يعنى
لما تقوم يادوبك ..
وتلفح توبك...
تجيب لا توبك....
جنب الكنار..
تضربك هبوبك...
وتفتح الانترنت..
وتشوف ابحراز
امانيه تحققت..ام لا...
ولك ودى

قلت لي جوار شجرة النيم وعلى مقربة من ست التسالي تشوف اب حراز حايم في النت
والله ايام يا زمن
ناس ركبتي زاغت بيقوا يكلموا اليابان وبيفرلي هيلز
أحلام ما كنا نتوقع أن تتحقق
انا لم أمسك سماعة تلفون الا في نهاية عام 1989
طبعاً رفعتها وكنت بتراجف
الو 00 طبعاً الراجل كان عاوز سيد الدكان الذي ذهب لاحضار الشاي
قلت ليهو انتظر شوية بجيك
واها لت قفلت السماعة
كم نتمنى أن تتحقق أمانينا

عندنا واحد عوير جداً في الحلة
أها يوم العيد النسوان جن وباركن ليهو العيد
وانت طبعاً عارف بساطة أهل القرى
المرة قالت ليهو بحنية شديدة
العيد الجايي انشاء الله عريس
قام قال ليها : هسي انا يوم جيت قلت ليك أديني بنتك ؟؟
قال عريس قال

الاخ أبوحراز ..
أنا دفعة 2003 عشان كدة احتمال تكون ما بتعرفنى ...
لكن بقول اهلا وسهلا ..... ولك معزة خاصة منذ ايام ان كنت متصفحة لسودانيز اون لاين ...

Quote: كانت الأمنية الأولى أن أحظى بإمراة مبدعة أتكيء عليها وأنثر همومي عبر أنفاسها 00 اقرأ لها وتقرأ لي 00 اعاندها 00 أشاكسها 00 واتربص بلحظات طيفٍ معها 00أحكي لها عن طفولتي 00 وعن الأحلام التي تراودني وعن الأزقة التي تسكعت فيها 00 ونخرج بقصة حب عنيفة نحكيها لكم على جرعات 00 على دفعات 00 على زخات 00 فهل تحققت الأمنية ؟؟؟؟ بالتأكيد كان هذا أول اخفاق 00 ربما تحقق بعضاً منها لكن ماتحقق يمثل حفنة من الحلم !!!!

وكيف لهذه الامنية ان تتحقق مع وجود ست النفر ؟؟؟؟؟

أبو حراز
يا خوي اتمنى ساكت ما قلنا حاجة ,,, لكن تتمنى وتتشرط كمان
هاك القصيدة دي مني مساهمة في الأماني وربنا يحقق امانيك كلها,, لكن عضعيض ما فينا

لاني قادر امشي منك
لاني قادر امشي ليك
لا العيون زعلانة منك في الحقيقة
ولا بقت فرحانة بيك
وانا من زمان شايفك تغالط في الزمن
والليلة شايفك يا وطن
زي النجوم
مرات يلالن في السما
ومرات يدوبن واختفن
وعليّ كم تاه الطريق
خطواتي خالفِن الزمن
وانا في هواك
لا ارتحت يوم
لا مرة سابتني المحن
القاك كيف أنا كان خطاي
مدفونة بي رمل الشجن
كايس زمن
لحظة أضاري همومي بيك
والقاك زي ما كنت في جواي وطن
وانسى الهموم القاسية فيك
وا فرحة الناس الهمومن بتحكن

قال أضاري همي بيك قال

اسرع بس طلع كرعيك من الرملة وسكها بت اللذين دي لحدت ما تلحقها
مشكلتك كبيرة لكن لو بقيت جراااااااااي حاتصطاد الفرسة وتمتطي عليها لحظات الدهشة الجميلة
القصيدة رائعة 00 فيها رائحة الأنوثة ورائحة الوطن
وهاتان الرائحتان عندما تمتزجان يشعلان الوطن
لك التحية
البت ليه لمن يعضوها بتكورك ؟؟ سمعت بالبت العضاها خطيبها ؟؟؟

Outcast

لك التحية على المشاركة
متين اشتركتي معانا
واشكرك على اهتمامك بمواضيعي والتي أحياناً من فرط مساختها تحتاج لقفة ليمون لكي تطعمها

قال ست النفر قال
انت من زمن ست النفر
هذه كالطيف تعود وتأتي وتختفي
ثم تتسربل في دمي
وأحياناً تغادرني دون رجعة
لكني أجدها تختلط بأنفاسي
تشرق حيناً وتغرب حيناً 00 تزأر حينا وتهدأ حيناً
تعطيني مرة من رحيقها 00 وحيناً آخر تاتي لي بخلاصة من الجنة

فهمتي حاجة بالله ؟؟؟ انا عندما قرأت ماكتبت لم افهمه
الظاهر دي زوغة

حمدا لله علي السلامة يا ابو حراز يا دوب لقيتك والله

كنت وين انت

ياخي والله مشتاق ليك ولي جضومك الزي لقيمات الصدقة ديل

قلنا ليك راحت لكن لقيتها ..طلعت حريف

تعرف تعرف الامنية الوحيدة الما اتحققت لي شنو ... اني ما كنت

الامريكي المع يازول هاهاهاهاهاها ياخي والله انتو حلوين برة

أبو حراز
تحياتي

حقق الله أمنياتك فأنت رجل تستحق كل خير ..
تسلم

ويحقق امانيك يا ابوجهينة وأماني الجميع
واشكرك على أنك تتحفنا كل يوم بكلامك الرائع المصحوب بشعار متجدد وحيوي ومليء بالنشاط والابتسامة

أساسي
قال جضومك قال 00 والله انت في الجضوم دي بتهزمني 10 صفر
بس ما تخلينا نتكلم

بعدين الشكلات بتاعت البورد دي كلام فاضي ساكت
شكل بالكيبورد والماوس والقيقابايت
ياجماعة دا كلام شنو دا
بالله ماشفتو الناس بتتشاكل كيف في السودان
افلقك اضربك اضبحك
وعكاكيز وسواطير وسيخ
يعني الشكلة ذاتها ليها نكهة

ذكرتونا أولاد المغتربين لمن يشاكلوا
المرة قالت للمرة انشاء الله يبقى ليك بخروج نهائي
والشافع قال للشافع انشاء الله تمشي السوبر ماركت ماتلقى ايسكريم جامبو
والشافعة قالت للشافعة انشاء الله يايمة البلي استيسشن بتاعك مايشتغل وما تشوفي ميكي ماوس
شكل بتاع عولمة ساااااااكت

ابو حراز يا بتاع الاماني أنت
أخبارك والله مشتاقين
بعد قراءتي لأمانيك العذاب قررت الإتصال بك ولكن لسوء حظك معليش لسوء حظي موبايلك لا يمكن الاتصال به الآن أعد المحاولة فيما بعد
شفت المعوكسة كيف؟
أها أمنياتك دي والله وجيهة والمفروض تتحقق كلها إلا حكاية العض الانت شابكنا بيها في كل بوستاتك
أنت الظاهر عليك حامل لفيروس (السعر) أمش أفحص لعابك وأتاكد كويس
أنا أمنيتي حاجة واحدة ... ارمي عصا الترحال وأمشي هناك في بلدي أشيل لي طورية ومنجل وأربي لي بقرة وغنيمات وكم نعجة وأقيل تحت نخلة والعصير أقعد أتأمل في النيل (البحر) والبهايم ترعى جنبي وبالليل أقعد في الرملة نص الحلة وآخد لي عشرة ونسة مع عجايز الحلة وأرجع انوم في عنقريب بلا لحاف
الفطور بي عصيدة والغدا بي قراصة حارة وملاح مفروك ولو مافي لحمة إنشاء الله بي شرموط وفي عدمه حتى لو بي فطر (ود الواطة) والعشاء آكل لي تمرات مع كورة حليب عليها طرقة فطيرة
بالله دي مش أمنيات بسيطة ومعقولة يا أبوحراز؟؟

الحبيب 00 البحب بلدو
أمنياتك رائعة جداً وكلنا نتمناها
لكن صراحة ما بحب القراصة
خاصة لمن تكون بي لبن بتسبب لي حساسية
بعدين الموبايل للأسف كنت قافلو العصر
لأنو في واحد مزعج دائماً يصحيني من النوم
طبعاً مش سوداني
عشان كدا جبت أجلو
كم أتمنى أن اسمع صوتك عبر الهاتف
بعدين انت برضو بتتحاوم هنا في الخليج
انا افتكرتك في السودان

قال عنقريب بدون لحاف قال
الشيء عاوز يغربلوك وللا شنو

تصدق لدي مشكلة كبيرة في النوم
كالعادة بقع من السرير
يمكن اقل شيء 3 مرات بالليل
لأني بحلم دائماً وأنا طائر
وأحياناً أكون مطارد فرسة أو حورية
وعندما اوشك القبض عليها يكون فص ملح وذاب
عشان كدا بتحصل الوقعة
لكن يبدو لي بعد العرس مافي ليك اي طريقة تقع

اهلين ابو حراز
مشتتتتتاقين كيف اخبار
الواحد يغيب ويجي يلقاك زي ما انته
الله يديك العافية لي حسة كما لقيت وتحتويك
بطل الحركات دي واركز عشان راسك ما يلف

بنت الأحفاد 2001
انتي بعد كدا مفروض تكوني 2004
ليك مدة طويلة مسجلة غياب عن البورد
اشكرك على المشاركة ولو عارفين البوست دا بجيبك كان الأماني دي من زمانا فتيناها ليكم

انا راكز
لكن الراس ما أظنو يركز
بورداب الامارات كيف أخباركم
أها أمنياتك شنو الإتحققت عبر البورد

ابو حراز
من الخرطوم سلام
امس كانت فى جلسة استاذنا
فضيلي جماع قال ليك رسال
العيال المقرن يجبو ليهو
موية عشان اقرطع منها
وقال ليك كان يتمنى ان
يلتقيك فى الخرطوم
ممكن على الهواء
0918052475
جوال
والكرامه يوم الجمعة
رسل معونك نديك
جميع انواع لحم
قال يعضى المهندس
المهندس ناقصك
ممعضوض خليها فى سرك

المهندس
ما أحلاكم وأجملكم وأنتم تلتقون بالمخضرم فضيلي جماع
تحياتي ليك وله وللملكة ودريم ومنوت والأستاذ هاشم صديق والحزين وتوماس وابويسرا والعجمي والحبيب وكل الناس الرايعين
مفروض استاذ فضيلي على الأقل يشرب ليها 17 صفيحة موية من النيل بعد غياب سبعة عشر عاماً
دائماً تقلبوا علينا المواجع وتذكرونا بالوطن الجميل
النيل 00 التراب 00 الأرض 00 البساطة 00 الرجال الذين لايصدأوون والنساء القادمات من الفردوس
اشياء رائعة وطاعمة بالوطن 00 كم نتمنى أن نلتقي
طبعاً عملتوها فينا المرة دي يعني فيها ضبيحة
مفروض تودي كراع الخروف لي ناس بكري ابوبكر
انا بس عاوز شوية لحمة وكمونية
يعني اي واحد جايي يمكن ترسلوها معاه
بس ما يكون عن طريق جدة
لأنو لو شافوها بورداب جدة الرماد كال حماد

الحل يكمن فى إرجاع المسنجر بالبورد يا ابو حراز
والله مشتاقين...
أنور

ابو حراز يا طاعم

ياربي ست النفر دي عندها عمى ألوان وللا شنو
يعني أقصد عمى أذواق
دائماً بتقول لي والله انت مرات مسيخ
اها عمر الماحي انتقم لي منها اليوم 00 تستاهل
أحييك ياشفيف
ولك تحياتي
وطعمنا المتواضع هذا مستمد منكم

ونحن مشتاقين كتير يا انور يا كنج
صراحة المسنجر هو بهارات البورد وتوابله
يعني البورد بيكون طاعم جداً وذو نكهة لمن يكون فيه المسنجر
يعني على الأقل الواحد تجيهو رسالة طاعمة من الصباح وتفتح شهيتو للبورد
بصراحة الأكل على الريق مش كويس والقراية على الريق مش كويسة

قايتو يا ابو حراز بتمنى انك تجينا فى كاليفورنيا وح نفسحك تمام فى سان فرانسيسكو المدينة الرائعة والجميلة وأكيد سوف تقول الدرر,ويا ريت لو تستعين بخيال ود الرضى وجراءت أبو صلأح وفصاحة سيد عبدالعزيز فى وصف ما لم تراه عيناك من قبل.

سيف الدين محمد جبريل

اها يا سيف الدين جبريل جبتها براك
تعرف اتمنى أن ازور امريكا منذ زمن طويل
حاولت باللوتري لكن حظي زي حظ ست النفر
كان خاطبها واحد من ناس ابوظبي مروق وهاي هاي
جيت انا زي الشوكة وخطفتها منو
هسي كل يوم بتندب في حظها
وكلما تشوفني بتتذكر الله وبتستغفر
اها ماعندي اي مانع
لو بقروش لو ملح ساكت
بس شوف لي طريقة أصلكم هناك
كلمت الموصلي قبل كدا قلنا ليهو عاوزين نجيكم في مركز الفنون انشاء الله الواحد بس ينقل ليكم الآلات الموسيقية ويجهز ليكم النوتة
لكن الراجل عمل فيها نايم
وبقة مما يشوفني في البورد نهائي مابتحاوم هنا
اها ارسل ليك الصور
قال مونيكا لوينسكي قال
نحن هسي كدا بنوصف لحد ما الجماعة يسكروا من وصفنا
اها لو شفنا البقر الفريزيان دا أمانة امريكا ما وقعت

انا جادي في كلامي وريني الاجراءات كيف

العزيز عثمان..

تحية وسلام..

اعجبتني كلماتك عن امنياتك التي لم تتحقق في هذا البورد.. واتمنى الا تنتهي السنة (الأرشيفية) القادمة قبل ان تتحقق كل أمنياتك..





ساعود لك بامنيتي التي تحققت..

العزيزة الرجاء
الشكر والتقدير على اعجابك
كثيرة هي الأماني التي تحققت لكن لم أتطرق اليها
ومنها أنني التقيت بك وبكلماتك ومواضيعك الثرة والرائعة
ولولا هذا البورد لما استمتعنا بروائعك

عارف يا أبوحراز لو ما عندك مانع أنا عندى ليك عروس لقطة سودانية مولودة فى أمريكا,غاية فى الظرف وذات جمال ساحر وآثر,فقط لأتجيد فن الطبخ ولها متطلبات عالية.تريد خادمة للطبخ وغسل الأوانى من ما يكلفك الكثير,فوق ذلك ليست لها كثير أهتمام بالجانب الدينى وفى كثير من الأحيان لها بعض الأراء الفلسفية التى تتعارض مع العلم وخاصة فى مسألة الغيبيات.ومن هواياتها السباحة والرقص والسفر ولها ثروة لأبأس بها من ما يجعلها من أصحاب المال ولكنها فقط تريد رجل يكون رجل بيت بمعنى أن يقوم بواجبات المنزل من رعاية أطفال وتدبير شئون المنزل اليومية يعنى بالواضح (فحل) .

سيف الدين الظريف
يعني هنا الواجبات المنزلية مافي
عليك امان الله امريكا أحسن مليون مرة من البنشوف فيهو هنا دا
هنا طبيخ
وغسيل عدة
وملايات
وكنس البيت
والمشكلة تغير حفائظ الأطفال
وتكسير الطلح
ومرات كمان تمد ليك راسها تقول ليك سرح لي شعري
والشعيرات كلهن اربعة أو خمسة
انا جاهز
قال رجل بيت قال
طالما القروش منها ماعندي مشكلة

الحبيب ابوحراز

ياخوى اول حاجة انا بدعو الاخ المايسترو الموصلى ينزل ليك اغنية "الأمانى السندسية" فهى تناسب المقام

ثانيا ياخوى احلم واحلم فالحلم مجانا وليس عليه جمارك ..

ثالثا : الكثيرين يقولون ان الزواج امنية ولكن بعد الزواج لست ادرى كيف يكون رأيهم حقيقة ...

بعدين انا عملت والله بى نصيحتك

Quote: شين لدرجة أنني نصحته بأن لاينزل صورته بالبورد 00

وبعد ده كله ياخوى وينها قطعة الارض الموعودة ؟؟؟

ولا كلام البورد ممسوح بى فرصة ( بتعرف الفرصة )

لك التحية اخى الحبيب

حقا اشتقت لاساليبك الجميلة الساخرة تلك والتى تروح عن النفس وكلامى الفوق ده كله ما تاخده ماخذ الجد ده هترشة ساكت عاوز اسخنك بيها وبصراحة انت كده كويس لو اتزوجت حا نحرم من روائعك كما حرمنا من روائع فلان الفلانى ..

لك تحياتى ولك حبى

أخي قرشو
اول شيء بعتذر جداً عن التأخير في الرد
فالرسالة وصلتني
ولكن الايميل الخاص بابوحراز زي المشلعيب عندنا في السودان
تعلق فيهو الحاجة بتاعتك 00 روب او لبن
تجي تلقى الكديسة نطت وكرطعت كل شيء
اها الايميل دا مرات رسائل تتلقي وبعضها غير موجودة
مرات ناس يقولوا ليك ارسلت لينا رسائل وأنا ماكتبت اي شيء
الغريبة كلهن رجال بس 00 يعني ايميل مذكر وفحل بكل معنى الكلمة
عشان كدا ما بتشجع افتحو
طبعاً قلت لي الواحد بعد ما يتزوج بيكون هناك مقص الرقيب
ووزارة الداخلية تقوم بكل شيء
من غسيل الصحون والملابس
لحدت تصحيح البوستات
ودا عاوزاه ودا ماعاوزاه
لكن رايك شنو في الناس المعرسين اتنين في البورد
وبعد دا كلو بيكتبوا
يازول والله نحن البتحرمنا من الترويح على اصدقاءنا حا نحرمها من حاجات كتييييييييييييييييييييييييييييييييييييييييييرة

الأرض الله يخلف عليك
مشيت السودان
وكالعادة الفلس بعد 15 يوم
قمت جبت خبرها
لكن زعلة بس 00 بعد 15 سنة جابت ليها 3 مليون
قمت قلت لي ناس الحي 00 عليكم الله أعملوها جامع
قلنا ساكت نكسب لينا أجر في الدنيا دي
وخلاف ذلك الواحد لو جاء السودان وما حصل شغل
حا أمشي اشتغل مؤذن وإمام
وكان قالوا كدا وللا كدا وللا يزكوك وما يزكوك
بشيل ارضي طوالي

ابوحراز سلام واحترام

امنياتك الاتحققت اتحققت اماالتي لم تتحقق
اريتها ماتتحقق قال يعضينا قال

Quote: لكن زعلة بس 00 بعد 15 سنة جابت ليها 3 مليون قمت قلت لي ناس الحي 00 عليكم الله أعملوها جامع قلنا ساكت نكسب لينا أجر في الدنيا دي

بس ماتعمل زي ماعمل الحلفاوي بني الجامع ولما فلس
قال للجماعه
انا عايز اقطع راس الجامع دا واعملو
سوبرماركت

لكم تحياتي

سلالالالالالالالالامات بت الجزيرة
خفتي من العض وللا شنو
خلاص بنعضي بدر الدين في مكانك

برضو في واحد مات وبعدين ترك ثروة هائلة لأبناؤه
لما وزعوها واحد كان من نصيبه جامع صغير كدا
الراجل شاف انو الجامع في حي راقي وبيمر بي شوارع متقاطعة كتيرة
طوالي قام كسر الجامع
طبعاً ماعاوز يجدده
قلبو مطعم
قدر ما الناس مسكت في الراجل دا عشان يخلي الموضوع دا
لكن لاحياة لمن تنادي
اغرب شيء الجماعة قالوا والله المطعم دا أكلو طاعم جداً
وبدل أن يتسلق صوت المؤذن عنان الفضاء ليتماس مع السماء في قبلة ايمانية حارة جداً
الآن وعبر مدخنة ضخمة
يتسلق دخان الشواء السماء في اريحية غريبة جدا

أخي أب حراز
معقول البوست ده ليهو أكتر من خمسه شهور وما إطلعت عليهو ، العتب على الماوس والكيبورد يا أخي وجميل ن تتحق حتى بعض الأمنيات وجميل جداً أن يكون لنا أمنيات والأجمل أن نعمل على تحقيقها بس ما تشطحوا تقولو دايرين بيت في ...... وعربيه ..... يعني على الأقل خلوها أحلام على قدرنا ولا أقول ليكم على قدر إستطاعتنا بتحقيقها.
وأنا راجع عشان أقول ليك وليكمم كلكم أمنياتي شنو الإتحققت من البورد والتي لم تتحقق. وبرضو يا ريت جميع الأعضاء هنا ينورونا ويورونا رأيهم.
أب حراز والله برغم إنك قاب قوسيت أو أدنى من مرحلة العنوسة لكين والله إنت رجل جميل ومبدع ولو كان عندي بت غير فاطمه كان إتسترت معاك لكين البنيه محجوزه وفي رواية أخري محدوقه وعندها ود عم وإنت يا شوف ليك قدح عشان تغطيهو يا عرس ست النفر وأكيد لو كانت لنا ثانية لزوجناك لكنها فاطمه

أبو حراز يا رايع

براك الدار خلا,

قلت كيف (((((قابلت بورادبيات توقعت في اللحظة الأولى أنهن قد تم اسرهن من الجنة !!! واتمنى أن اقابل البقية 0))))))

البقية ولا الباقيات الصالحات,

وبعدين لو سمحت أمنيات الكمونية والجاتوه دي أدينا معاك منها.


تحياتي

وربنا يحقق باقي الاماني

العزيز اب حراز
ياخ لكن امنياتك ما شرط
كنت اتمنيتك تكون معاها وانتو الاتنين تكونوا معانا
مسألة تعضى بدر الدين شنا دى واردة وكمان تجضم تماضر برضو ... لكن اعتقد
الاتنين ديل كان لموا فيك يعضوك عضة لو عيّط حمار الوادى فى الخلا ما يفكوك
الا تقول الروب وبرواية الحناكيش ( زبادى ) ... اتخيل العضعضة فى حضرتكم
بتكون ليها نكهة ليمونية وتخلينا نحن نتفرج فى عياطكم اجمعين وما اجمل انكم
تلتقون فى عضة واحدة ويا حليل زمن العض والجضيم والقضيم واشريرى واهل العوض

تسلم يا اب حراز ...

قفزة بالزانة ..
الملا عمر انى اطلب يد ابنتكم المحجوزة على الهواء مباشرة وذلك للمكايدة بتاعة
ود عمها عشان كلمة ود عمها دى بتعمل لى كاروشة ..وتسلم عزيزى لرفع هذا الابداع
عاليا خفاقا .

Beautiful as usual, it seems I will be one of your regular visitors,
Muna Khugali

عزيزي أبوحراز
تحياتي الحارة
و عودا حميدا ..
حقق الله كل أمنياتك .. كلها مجتمعة و كما تحب ..

على وزن قفظ بالزانه هو دي كمان ضربة حرة غير مباشرة

يعني لو ولد أخوي ما غطي قداحو يا الفاتح يا أخوي أنا أكون أبو القدح كيف ، وأنا غير كاروشتك داير شنو ، يعني أقعد أتكرش أنا براي ، إنت ما سمعت وليد توفيق بيقول
تجي نقسم القمر أنا نص وإنتي نص
تجي نرسم عالشجر حرفين يا جميله وبس

وأنا بالضرورة داير أشاركك في الكاروشة دي ، بس ما على طريقة يا حاجه ما تقولي كاروشه

الإخوة المشاركين في الأمنيات
اشكركم كثيراً 00 فجأة وجدت هذا البوست رغم أنني أكتب البوست وانساه
لكم التحية
ساعود للرد عليكم
قال فاطنة قال

أحلامي التي تحققت أو قل ما تعلمته من البورد إن جاز التعبير –
· أنني أعترف امام الله الواحد الأحد بأنني أحببتكم جميعاً ولا أحمل أى ضغينة أو حقد أو حسد تجاه أى فرد منكم بعيداً عن لونه أو جنسه أو عرقه أو مذهبه الفكري أو دينه.
· ما لم يتحقق من أمنيات أننا ما زلنا في كثير من خلافاتنا وإختلافنا نمارس شتي أنواع الحوار الإستعلائي الإقصائي التسفيهي العدمي وصولاً إلى الإنتصار للذات ، نختلف على الفكرة نعم لكن أن يتعدي ذلك الإساءة والتسفيه والإحتقار والشتم بأقذع الألفاظ فهذا ما يؤسف له .
· وما لم يتحقق أيضاً أن مأساة مثل ما يحدث في دارفور لم تلقي الحظ الذي تستحق من الطرح ووقف الكثيرين منا منها موقف المتفرج وكأن بنا رغبة لتجزئة السودان فيبكي أبناء دافور مأساتهم وحدهم وأبناء أعالي النيل مشكلتهم وأبناء الشمال والشرق إلخ ...
· تمنيت أن أضع صورتي بل صورة أسرتي أحمد وفاطمه ومحمد وحرمنا المصون أم أحمد في البروفايل لتظهر في كل مداخلاتي ومقالاتي ، ولم أكن أخشى قبيلة بني كلاب أو حرب أو قبيلة أم أحمد لهذا التصرف ، إنما كنت ولا زلت أخشي على نفسي ومن بعدي هذه الذرية الضعفية من عسس السلطان وسلطة القوة لا قوة السلطة.
· تمنيت أن أتناول طعام الغداء مع أخي أهل العوض بشطر أن يكون ملاح ويكه بيضاء من نوع ريالة الديك أى تلك الويكة التي كلما إجتهدت لخمها بالكسره تخرج لك الكسره ناشفه من غير سوء ولا ويكه ، وتمنيت أن آكل فول مع الأخ حميده ، هكذا أخاله رجل يعرف ويعشف الفول الجيد نمره واحد وما زالت أمنتيتي أن آكل فسيخ مظبوط مع الأخ ملاسي ليس بسبب لونه إنما لظني أنه يفهم في الفسيخ وسوف لن تناول أى شئ مع المبدع أباجهينه خوفاً من التركين أوالملوحه تلك الأكله العظيمة عند قوم وغير ذلك عند أقوام أخر جهلاً بقيمتها الغذائية ، تمنيت أيضاً أن يأخذني الأخ حامد حجر برفقة فيصل دوسه في سياحة بجميع قري وأدوية وبطون دارفور وتمنيت أن أتعرف أكثر على دينق وودقاسم وأن نسافر سويا إلى جوبا ونغني لجوبا ، تمنيت أن أزور هاشم نوريت في شرقنا الحبيب وجميع أبناء الشمال والوسط والغرب ، والأمنيات قطعاً لا حدود لها ، وتمنيت أن أرى بت قضيم جهارا نهارا وأن تجمعني وبدر الدين شنا ركشه وأن نكون أنا وأب قوته على شاطئ النيل الأبيض أو الأزرق لا فرق نصطاد السمك ونفشل في كل مرة ... تمنيت أن أحضر مسرحية بايخه يكون دور البطولة فيها لتماضر شيخ الدين بشرط أن تدعوني على العشاء حتى أنكد عليها بسبب تلك المسرحية. تمنيت أن يغني لنا الموصلي وعلى الهواء مباشرة في الساحة الخضراء – وهي بالمناسبة لا خضرة فيه ولا ماء يعني جرداء زيها وزي أى فسحه في العاصمة المثلثة أيام أن كانت للعاصمة فسحات تتنفس من خلالها وبحضور جميع أعضاء المنبر كما لم يغني من قبل ... وما تمشوا بعيدن لسه ما وصلت ناس سجيمان وشيري والجندرية وتوما والأستاذه سعاد وروضه وديك الجن ورومانسي البقي أساسي ويا زول يا زول والدكتور أبكر آدم إسماعيل وصديقنا المتدثر من صقيع كندا محمد النور كبر وعيييييييك القائمة تطول وأكيد برجع بس أتمنى أن يتحقق جزء من تلك الأحلام ولو ما إتحققت برضو راجع ليكم

ما أجملها أمنياتك ياملا يا عمر
اتمنى ان تتحقق
سأعود اليها لاحقاً
مالك ما دخلت ركشات البورد
في الأمنيات

الاخ ابو حراز ...

زماااااااان .. من مداخلاتك وبوستاتك العجيبة اياها ديك ...

قال رضاعـــة قال...

لحظة .. صمــت .. سكــون ... انتباه .. دعني احلم .. دعني اسرد امنياتي التي تحققت

والتي لم تتحقق .. أنها كثيرة يا صديقي وخصوصا التي لم تتحقق خليني افصلها ليك زي جلابية

العيد..

بالمناسبة الخروف داخل معانا في الامنيات ,, ولا لآ ؟؟؟؟؟؟؟؟؟؟؟؟

جاييك تاني يا ابو حراز لانو لسه ما قلنا حاجة بس خليني هسع امشي اعمل جرد كامل واجيك صاد

قال أمنيــــــــة قال ..

Quote: تمنيت أن أحضر مسرحية بايخه يكون دور البطولة فيها لتماضر شيخ الدين بشرط أن تدعوني على العشاء حتى أنكد عليها بسبب تلك المسرحية.

iهههههههههههههههه يا ملاعمر وابوحراز

اول مره اكتشف انكم من الحاقدين....

ده داير يجضمنى وده داير يعوسنى كسرة فى الدوكة...

وانا لى روحى دى "شفيفة" ...وحديقة.....هاهاهاهاهاها

والله الليلة دى كنت بتكلم مع صديق عن البورد زمان لما كان منتزه للادب والفن والطرافة والنفوس الصافية وندية,,,,زمنا الكنا لاندرى بما كان الزمن فااااااااااعيييييييييل ...او كما يقول المغنى..

المهم سعيدة بشوفتكم هنا وامانيك المجهضة يا بو حراز كان تكلمنى بيها من بدرى ...كان ولدوها فى الدايات ..زاتو...

لانى فاعل خير من الطراز الاول...واجيب ليك المبدعه دى من اضنينا....واخليك تشرب القارىء حبكم جرعه جرعه ....لا بل اغرغر القارىء غرغرة...من كاسات حبكم ديل...

بس ما شاورتنا... لو ساى شاورت بدرالدين شناة الشيييييين ده كان حقق ليك حبة من احلامك ...مع انه احلامو هو فى روحو كوابيس...

اما الوطن ده ....يحبو الكلعلع...ويحلم ليه العدو الماصليح...وطن عامل زى الدومة كده ...ما يفلح الا فى الفلقة....هههههه

اخخخخخخخخخخخ من ده بلد ده..

كل سنه وانت طيب...يا ابوحراز والملا عمر وبت الجزيره وبدالدين وكل الناس الحلوه...

وانا بلاقيكم سنة 2006 ...ودى ما غلطة مطباعية ولا طباعية ...حاغيب سنه "اقول يومين..." لانو بعد ما شاب دخلوه الكتاب...لو نجحت بجى...

تماضر
كل العام وأنتي بخير وعام سعيد إن شاء الله عليك وعلى أسرتك الكريمة وجميع الزملاء
طبعاً طلتك هنا تماثل فرحتي برأس السنة أيام أن كان للسنة رأس يحتفل بها حتى ساعات الصباح الأولى ، لكن ده برضو ما بيمنع أن نطمع أكتر وتورينا ما تحقق من أمنيات وما لم يتحقق بإنضمامك لمنبر سودانيز أون لاين ، وبالتأكيد إنتي كريمة وأظن نحن نستاهل.

تحتاجون جميعاً لرد ضافي وجميل
ولكن سأذهب عاجلاً للغداء
فالدنيا برد
والعزابة مشكلة كبيرة
لو أكلوا قدامك
والله الرماد كال حماد
الواحد يقول نفسو مقفولة
وياكل 3 عيشات

الاخ الكريم ابو حراز

كل سنة وانت وست النفر طيبين،واتمنى ان تتحقق كل امانيك فى العام الجديد،حتى ان شاء

الله ارضك الفى مدنى تبنيها عمارة 10 طوابق فيها اسانسيرين-قول آمين- وبالعدم يطلع ليك

فيها بترول( زى حق كاب الجداد)بس ارضك دى اوع تفرط فيها قالوا الجزيرة عايمة على

بحيرة بترول.

تحياتى