Post: #1
Title: سجمنا 00 النسوان قادمات بقوة
Author: ابوحراز
Date: 03-12-2005, 03:27 AM
Parent: #0
انتهى زمن الرجل الذي يكسر العنقريب كما يقولون
وانتهت سلطة الرجل وسطوته
آلاف الرجال أصبحوا بلا كلمة
واصبح القرار عند الجنس الناعم
كما اصبح الرجال قوامون 00 لكن على من ؟؟
رئيس العمل قوام على موظفيه
والجنرالات يعطون مزيداً من الأوامر والتعليمات للمدنيين ولجنودهم
ولكن بمجرد ان يرجع أحدهم للبيت تصبح البزة العسكرية عند زوجته
اغلب حكومات الدول العربية تدار من غرف النوم وليس من القصور الرئاسية
أعرف أحدهم موظف كبير يعمل بمجلس الوزراء بالسودان
تصدقوا دا زوجته اعطاها الله نصف قباحة العالم
انا والله لامن اشوفها بخاف منها
لكن هذا المغلوب على أمره اول مايدخل البيت وقبل أن يخلع البدلة يجد طشت الغسيل في انتظاره
أذهب اليهم بحكم جيرتهم لنا واسلم عليه واستحي حينما أراه على هذا المنظر
ابن اللذين دا ماتحلى ليهو الونسة الا لمن يكون يدعك في الملابس
كمان قال شنو 00 قال جاهم توني بلير قال !!!
يا رجال 00 ما لكم انفزرتو في آخر الزمن
|
Post: #2
Title: Re: سجمنا 00 النسوان قادمات بقوة
Author: محمد الامين احمد
Date: 03-12-2005, 03:35 AM
Parent: #1
| Quote: اغلب حكومات الدول العربية تدار من غرف النوم وليس من القصور الرئاسية |
حقيقة واقعية لكل دول العالم، اما بسب الخوف او اشياء آخرى .
= = تخريمة = =
الموظف وصل الشغل متأخر الصباح،،،
المدير: انت وين يا افندى من الصباح ؟
الموظف : معليش سيادتك ... بس ظروف كده .
المدير: ظروف شنو يا استاذ، ده دوام رسمى ما قعدة نادى
الموظف (متلعثما) : اصلو المدام منعتنى اطلع قبل ما اغسل العدة
المدير: ده تسيب و كلام فاضى...
و بعدين يا افندى انت ، فى عدة بخلوها لحدى الصباح !!
|
Post: #3
Title: Re: سجمنا 00 النسوان قادمات بقوة
Author: ابوحراز
Date: 03-12-2005, 03:42 AM
شكراً محمد الأمين
ويسعدني ان التقي بك بعد غيابي عن المشاركة بالبورد لفترة طويلة
سعدت كثيراً بهذا الموظف المغلوب على أمره
وكذلك المدير الملتزم بغسيل العدة
ربنا يكون في عونه
طبعاً تلقاه يصب كل جام غضبه على موظفيه الصغار
|
Post: #4
Title: Re: سجمنا 00 النسوان قادمات بقوة
Author: peace builder
Date: 03-12-2005, 03:45 AM
ابو حراز يا تفاحة البورد سلامات
مالك انقطعت يا زول.. والله يا ابو حراز انت من الناس الاتكيفت خالص خالص من كتاباتهم وخفة دمهم وتلطيف اجواء المنبر من المغالين في الرأي
نحن كلنا سودانيين نسعى للبلمنا من اشياء،،وانت بكتاباتك الرائعة دي من ضمن الاشياء البتلمنا وتوحدنا
لك التحايا والود
جمال
|
Post: #7
Title: Re: سجمنا 00 النسوان قادمات بقوة
Author: ابوحراز
Date: 03-12-2005, 04:00 AM
Parent: #4
peace builder
لك التحيات النواضر ايها الجميل
وكم يسعدني ان أكون أحد الذين يلطفون جو المنبر
هذا المنبر نريده دائماً أن يقف على قدميه
لهذا نحاول أن نبث فيه شيئاً متواضعا من الفكاهة والمرح
صدقني نعاني الكثير بالغربة
لهذا نحتاج لأن نتنفس
أن نهتف
أن نطرب
وأن نكورك أحياناً
|
Post: #5
Title: Re: سجمنا 00 النسوان قادمات بقوة
Author: محمد الامين احمد
Date: 03-12-2005, 03:46 AM
Parent: #1
العزيز / ابو حراز
لك التحايا النواضر ...
هل نحلم بان تقوم جمعية او رابطة تهتم بشؤون الرجل ؟
مجرد آمل !
|
Post: #6
Title: Re: سجمنا 00 النسوان قادمات بقوة
Author: ابو جهينة
Date: 03-12-2005, 03:57 AM
Parent: #5
أبوحراز
تحية كبيرة و عودا حميدا
مشتاقووون ..
مش قالوا : الما بيخاف من مرتو ما راجل ؟
|
Post: #9
Title: Re: سجمنا 00 النسوان قادمات بقوة
Author: ابوحراز
Date: 03-12-2005, 04:08 AM
Parent: #6
ابوجهينة
دائماً مشتاقون اليكم كاشتياق أودية الجفاف للماء من شفاه الخريف
قلت لازم يعني الواحد يخاف منها ؟؟
حتى اللحظة لا استطيع ان استوعب تلك المراة السودانية بالرياض
عندما اتت بالليموزين لأن زوجها كان بيلعب في الكوتشينة من الصباح ولم يات
دخلت وهي ترتعد فرائسها ودخلت توووووووووووووش لبيت العزابة
واخذت منه باقي الورق
ومسكته من الجلابية
ودفرتو ليك جوة باب الليموزين
وكمان في المقعد الخلفي
لقد تألمت لحاله
لكن برضو اتكيفت منها
لأنو عمك دا جنو غلاط في الكوتشينة
|
Post: #8
Title: Re: سجمنا 00 النسوان قادمات بقوة
Author: ابوحراز
Date: 03-12-2005, 04:03 AM
Parent: #5
محمد الأمين
كما تعلم قامت مظاهرة قبل فترة بالهند
وهي لأكثر من مليون رجل يحملون فيها لافتات تندد بضرب زوجاتهم لهم
النسوان كان بيجلدن هؤلاء الرجال داخل البيوت
أظرف شيء إنو بعض النسوان كن متعاطفات مع هؤلاء الرجال
وخرجن معهن في المظاهرة
دائماً اقول 00 اللهم ارحم غاندي
فقد قاد مسيرة الملح وهو عارٍ من اجل تحرير الهند
واليوم الرجال بكامل شواربهم يبحثون عن تحرير انفسهم من ضرب المرأة
|
|