Post: #1
Title: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-29-2005, 03:13 AM
Parent: #0
أحبكم من الوريد الى الوريد
ومن الأعماق الى الأعماق
سافرت عنكم
ولكن تركت لكم مساحة كبيرة في قلبي
مساحة بحجم الوطن !!!
كنتم دائماً معي 00
أتذكر ضحكاتكم وقفشاتكم وعنادكم وحتى آهاتكم
نقلتكم الى جدودي وحبوباتي
تحدثت عنكم كثيراً
وكانوا يستمعون الي وكأنني أتحدث عن كوكب آخر
وكعادتي وجدت آلاف المعجبين بكتابات ابوحراز في السودان
ولكن للأسف كانوا كلهم رجال
مما اصابني باليأس والاحباط !!!!
صدقوني 00 عندما وصلت الوطن
خلعت نعلي وتوضأت من سماحته وتركته ليؤمني
صليت خلفه وأنا حافي القدمين
واستأذنته لأن هناك وطناً آخر ينتظرني
وطن مليء بالأنوثة والجمال
انها ست النفر الرائعة
فقد كانت وطناً بحجم جمال الوطن
سأكتب لكم عن كل شيء
عن النساء الجميلات اللائي ينتظرن أزواجهن بلهفة
وعن شوقي اليكم الذي يشبه اشتياق أودية الجفاف للماء من شفاه الخريف
عن السودان الأخضر 00 حيث تغازل السماء الأرض في كل يوم عبر أوتار المطر لتعزف سمفونية خضراء رائعة أشبه بالأسطورة
سأحكي لكم عن بورداب الخرطوم الجميلين حقاً
قابلت معهم بوردابية جميلة جداً أقسمت أن المهندس قد سرقها من الجنة !!!
وكان فتحي البحيري للأسف يجلس بجواري
فعندما أنظر لوجه هذه البوردابية المشرق وأنظر لفتحي البحيري
أكبر الله ثلاث مرات على طريقة الجماعة
وأقول سبحان الله 00 هذا ملح أجاج وذاك عذب فرات !!!!
|
Post: #2
Title: Re: أعود اليكم بعد غياب طويل 00 فهل تقبلوني ؟؟؟
Author: abuguta
Date: 08-29-2005, 03:20 AM
Parent: #1
اب حراز
اهلا حبابك
ومتنامن غيابك
سالنا منك
وقالو
مشيت السودان
وبقيت من المستثمرين
رقشتين وحافلة
وموقف الناس صفين
ومالك والغتراب تانى
ابحراز بقى مت الغنيانين
الشوق بحر
تعال قاطع ساى
فى انتظارك
ابقوتة فى نصف الدوام
|
Post: #3
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-29-2005, 03:29 AM
Parent: #2
قال رقشتين قال
والله يا ابوقوته 00 القروش كلها كملناها بامبي وبامية مفروكة
يا خي دي حملت 00 ودي ولدت 00 ودي طهروها
واي قروش تديها ليهم عشان يشتروا بيها ما يرجعوا ليك الباقي
|
Post: #4
Title: Re: أعود اليكم بعد غياب طويل 00 فهل تقبلوني ؟؟؟
Author: قرشـــو
Date: 08-29-2005, 03:33 AM
Parent: #1
الحبيب ابوحراز
الف حمدا لله على سلامة عودتك من الوطن
افتقدناك كثيرا ايام الكعة وما قبلها
وحمدنا الله انه سلمك من الكعة الان
يا ربى سعيت ليك مسدس ولا كلاش ؟؟؟
انت لسع مبارى الصيدى ياخوى ؟؟؟
اها كلنا آذان صاغية لسماع حكاوى السودان
وقالوا سمح القول فى خشم سيدو
لك وحشة يا سيدى
والعود أحمد
|
Post: #5
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-29-2005, 03:40 AM
Parent: #4
أخي الحبيب قرشو
لك التحيات النواضر أنت وبورداب جدة
سمعنا لينا اشاعة حارة جدا زي اشاعة موت فاولينو
قالوا اساسي عرّس
الكلام دا صحي ؟؟؟؟
غايتو بشبعها لينا ميتافيزيقية
والله قريبي عرس ليهو واحدة انصارية سنة
بس حدث ولا حرج
الصلاة يتوروهو ليها نص الليل
الكعة يازول وفرت لينا 500 الف
ست النفر قالت الا تمشي الخرطوم تنزل في شقة مفروشة
اها الجماعة قالوا الخرطوم صعبة جداً
غيرنا مشينا كاب الجداد
قال كعه قال
|
Post: #6
Title: Re: أعود اليكم بعد غياب طويل 00 فهل تقبلوني ؟؟؟
Author: keiga2000
Date: 08-29-2005, 03:40 AM
Parent: #4
حمدلله على السلامة اخونا ابوحراز
ابومصطفى
|
Post: #7
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-29-2005, 03:45 AM
Parent: #6
keiga2000
مرحب بيك والشكر الجزيل على الاهتمام
سمعت بنكتة السوداني واللبناني
طبعاً قالوا في سوداني ولبناني نسوانهم راحن في مكة
أها السوداني سأل اللبناني وقاال ليهو مرتك لابسة شنو ؟؟
قام اللبناني قال ليهو
لابسة شورت قصير
ولابسة بلوزة قصيرة جداً
اها السوداني قال ليهو
ياخي خلاص ارح نفتش على مرتك
قام اللبناني قال ليهو وانت مرتك لابسة شنو
قام السوداني قال ليهو 00 مرتي خلك منها 00 تطير في السماء !!!
|
Post: #9
Title: Re: أعود اليكم بعد غياب طويل 00 فهل تقبلوني ؟؟؟
Author: abuguta
Date: 08-29-2005, 03:54 AM
Parent: #7
الله يقطع شيطانك يابحراز
لكن باقى ليك كيجا دا بفهم النكتة دى
احكى ليه نكتة لاعب المريخ السجلوه للهلال
ودكوه فى كنبة الاحتياطى..الى الموسم الجاى
زعل من دورى العاصمة مشى سجل فى فريف ام صفقا عراض
بالله عليك كان كيف يوم الزرد
حين ماج وهاج وزار اسود افريقا
وعصرو عرب الجزيرة.يومها جرى من جرى..خوف على الرويحة
ياخوى لو كنت فى الخرطوم ..كان اسى ارتحت من ست النفر
والما رايح تكوس ليها دى
ولقدام
|
Post: #10
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-29-2005, 04:01 AM
Parent: #9
ابوقوته
ست النفر روحها طويلة جداً
بيني وبينك انتظرت الكعة بعد انتهت
ونزلنا في شقة في المهندسين
اغرب شيء نزلت السوق عشان اشتري اللحمة والخضار
القى ليك الناس البشتروا كلهم نسوان
الا انا اتلفت يمين وشمال
الجزار يعاين فيني
وبتاع البقالةوبتاع الخضار
وبتاع الطاعمية
مستغربين في الشنب الحايم دا
تحسرت على جدي الذي كنت أحمل من ورائه قفة الخضار
ويبدو لي أن التهميش قادم لامحالة
وأن النساء قادمات
بالله زمان جدي يشيل المال في جيب الساعة ويمشي لأهل العروس
هسي المال يختوه في صينية ويزخرفوها ويغلفوها ببلاستيك
وتشيله واحدة عليك أمان الله والرجال يبروها سااااااااااااااااااي
قال عولمة قال
|
Post: #18
Title: Re: أعود اليكم بعد غياب طويل 00 فهل تقبلوني ؟؟؟
Author: معتصم دفع الله
Date: 08-29-2005, 04:44 AM
Parent: #10
العزيز أبوحراز
ألف حمداً لله على السلامة ..
ومرحباً بعودتك الميمونة ..
محبتي ..
|
Post: #19
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-29-2005, 05:03 AM
Parent: #18
معتصم
لك التحية وانشاء الله نكون عند حسن الظن
طبعاً معانا واحد وسيم زيك كدا
دا عامل لينا غلبة شديدة جداً
يعني لو مشينا معاه الرماد كال حماد
يحظى بكل الصيد الثمين
ونحن عليك أمان الله الواحدة ولاتعاين فينا
وكمان على التسودها علينا
قالوا كلما كبر الشخص كلما ضاقت خياراته
ونحن قبل ما نكبر كويس خياراتنا ضايقة
|
Post: #8
Title: Re: أعود اليكم بعد غياب طويل 00 فهل تقبلوني ؟؟؟
Author: almohndis
Date: 08-29-2005, 03:51 AM
Parent: #1
Quote: سأحكي لكم عن بورداب الخرطوم الجميلين حقاً
قابلت معهم بوردابية جميلة جداً أقسمت أن المهندس قد سرقها من الجنة !!!
وكان فتحي البحيري للأسف يجلس بجواري
فعندما أنظر لوجه هذه البوردابية المشرق وأنظر لفتحي البحيري
أكبر الله ثلاث مرات على طريقة الجماعة
وأقول سبحان الله 00 هذا ملح أجاج وذاك عذب فرات !!!! |
العزيز على قلوبنا
عثمان ابوحراز
هذه المرة لم تنصفنا
أكلتنا عديل
حتي ورقة المحبة التي
منحك أيها،لم تحضر لتسلمها
رغم أن الذي في القلوب
اكبر من كل
أوراق الدنيا. يا أخ الابري
لي ناس جدة ما شلتو معك
|
Post: #12
Title: Re: أعود اليكم بعد غياب طويل 00 فهل تقبلوني ؟؟؟
Author: Sawsan Ahmed
Date: 08-29-2005, 04:11 AM
Parent: #8
ناس تريدهم يجننو وتبعد تسيبهم احننو انا عقلي طار اعمل شنو!
يا مراحـــب!
|
Post: #21
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-29-2005, 05:12 AM
Parent: #12
قال أبوقوته قال
قال قرشوقال
المهندس
معتصم
السر
زول ساكت
الموصلي
المحارب
وأخيراً أخيراً سوسن أحمد
يعني بوست زي صيوان العزاء
والحمد لله ظهر الجنس اللطيف في نهاية المطاف
كدا يادووووووووووووووب الواحد يكون عندو نفس يرد ليكم
قاال كيجا قال !!!!
مرحب ياسوسن
|
Post: #13
Title: Re: أعود اليكم بعد غياب طويل 00 فهل تقبلوني ؟؟؟
Author: ebrahim_ali
Date: 08-29-2005, 04:16 AM
Parent: #8
الحبيب الغالي أبوحراز تحياتي وخالص أشواقي وحمداً لله على سلامة الوصول وتحياتي لأم العيال ست النفر
ومبروك علي الرقشات والدفارات وقالوا بقيت من المستثمرين الكبار واصحاب الحظوة عند ناس السلطة وكمان جاءنا خبر تحت تحت انك مثلت ناس الطائف في مؤتمر الجاليات
|
Post: #22
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-29-2005, 05:17 AM
Parent: #13
ابراهيم علي
كيف ياناس كوستي
يا مغتربين هووووووووووووي لموا نسوانكم عليكم
طلع عندنا شيخ حيوان في الحصاحيصا
دا تعرف متخصص نسوان مغتربين
يكتب للواحدة انو زوجها لو جاء اجازة يفكر طوالي في الرجوع
سالتو مرة قلت ليهو ليه ياشيخ النسوان ديل ماعايزاتننا
قام قال شنو ؟؟ بيقولن مدة صلاحيتكم منتهية
قال منتهية قال !!!
|
Post: #20
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-29-2005, 05:08 AM
Parent: #8
عزيزي المهندس
تعرف السنة دي ما حا نعمل آآآآآآآآآآآآآبري نهائي
صاحبك من يوم قال ماشي
اها أهل العوض جابوا الآبري
هاك ودي دا لي ولدي
هاك الآبري دا لي بتي
أها كل الأكياس اديتها لي ست النفر
وقلت ليها خليها معاك
ومن السعودية اتصلت عليهم قلت ليهم الآبري صادروه
شهادتي تديني ليها
لازم ترسلها لينا عبر البريد
السعودية 00 الخرمة 00 بلدية الخرمة صب 155
عثمان ابراهيم محمد
طبعاً ماجيت الخرطوم
خرطومكم دي تاني الواحد الا يجيها بعجلة دبل زي ما قال سلفاكير
تخاف تجيها بطيارة تتحرق
تجيها بي عربية يحرقوها ليك
الزول الكان بيجمع في القروش يوم الاحتفال ما رجّع لي الباقي !!!
قال دجاج مكرفس قال !!!
|
Post: #11
Title: Re: أعود اليكم بعد غياب طويل 00 فهل تقبلوني ؟؟؟
Author: قرشـــو
Date: 08-29-2005, 04:11 AM
Parent: #1
المهندس
الحكاية فيها ابرى كمان ؟؟؟؟
الللللللللللللللللللللله يا ابوحراز
امانه ما حكايتك بقت حكاية معانا
|
Post: #26
Title: Re: أعود اليكم بعد غياب طويل 00 فهل تقبلوني ؟؟؟
Author: waleedi399
Date: 08-29-2005, 09:49 AM
Parent: #11
ابو حــراز،،
| Quote: أعود اليكم بعد غياب طويل |
جـاي لـيـه؟؟؟ لــع 
|
Post: #40
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-30-2005, 01:17 AM
Parent: #26
وليد 399
والله انت من يوم اتزوجت تاني ما قامت ليك قايمة
قال زواج قال
قلنا ليكم أنتظروا شوية ما سمعتوا كلامنا
الليلة المدام لو دخلت البورد التكرفسة راجياك
هن ليه الواحدة لمن تزعل بتتكرفس وتقبل على الحيطة
طبعاً لو عملتها معاك والله تاني ناس المطافيء ما يفكوها ليك
|
Post: #39
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-30-2005, 01:15 AM
Parent: #11
الأخ قرشو
هذا العام ربما يصوم الناس بدون الآبري
يا أخي شوال العيش تجاوز ال 125 الف جنيه
وهذا السعر الفاحش في بلد مليء بالجمال والخضرة والمطر والأنهار
صدقني يشعر الانسان بالاحباط وهو يرى اسعار اللحوم والذرة بهذه الطريقة
يعني شوال العيش يساوي ثلاثة جوالات أرز هنا في السعودية
وهناك غلاء في أشياء كثيرة
جوال السكر وصل الى 110 الف في بلد مليء بمصانع السكر
وجشع غير عادي للتجار
وارتفاع شديد في العقارات والايجارات بصورة عامة
تصور بيت مكون من غرفتين ومطبخ وصالة بمبلغ 500 الف جنيه
هذا طبعاً ليس في المنشية ولا في العمارات بل في الحصاحيصا
ومايحيرني أن هذا المبلغ يؤجر افخم شقة في حي العليا الراقي بالرياض !!!
هل ياترى يوجد غسيل أموال بالسودان ؟؟
أم أن هناك كروش مترهلة استحوذت على أموال الشعب ؟؟؟
|
Post: #14
Title: Re: أعود اليكم بعد غياب طويل 00 فهل تقبلوني ؟؟؟
Author: محمد السر
Date: 08-29-2005, 04:21 AM
Parent: #1
| Quote: مرتي خلك منها 00 تطير في السماء !!! |
أب حراز حمد لله على السلامة
|
Post: #41
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-30-2005, 01:18 AM
Parent: #14
محمد السر
انشاء الله تكون أعجبتك نكتة اللبناني دي
خليها المرة اللبنانية 00 عليك أمان الله معانا لبناني هنا لامن تعاين فيهو تحرد نفسك
|
Post: #15
Title: Re: أعود اليكم بعد غياب طويل 00 فهل تقبلوني ؟؟؟
Author: محارب
Date: 08-29-2005, 04:28 AM
Parent: #1
ابو حراز
يا نكهة البورد
عودا حميدا انشاء الله
وفي انتظار اخبار وشمار السودان
|
Post: #42
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-30-2005, 01:20 AM
Parent: #15
محارب
تحياتي 00 الشمارات كتييييييييييرة
خاصة بعد الموبايلات
تصدق أي واحد معاه موبايل
والشحدة بقت اسكراتش يا محسنين
|
Post: #16
Title: Re: أعود اليكم بعد غياب طويل 00 فهل تقبلوني ؟؟؟
Author: Elmosley
Date: 08-29-2005, 04:28 AM
Parent: #1
شرفت الديار
|
Post: #17
Title: Re: أعود اليكم بعد غياب طويل 00 فهل تقبلوني ؟؟؟
Author: زول ساكت
Date: 08-29-2005, 04:42 AM
Parent: #16
قبلناك
بس جيب رسوم التسجيل
وغرامة الغياب
اي حاجه مقبوله ان شاء نبق ولاّ فول حاجات
ناس الخرتوم خليهم اهلي كيف
مايكون اجازتك كلها كملتها بنادر
واكل سندوشتات وشراب بستي كولا
|
Post: #44
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-30-2005, 01:25 AM
Parent: #17
زول ساكت
عاد عاوزني أباري أهل العوض
مشينا عفراء 00 كباية العصير خمسة ىلاف
وأكلنا ليك ايسكريم لسه حارقني في سنوني
مشيت طبعاً مدني لمحلات هنا لندن الشهيرة
والله نفسي في فسيخ
قمت لقيت آخر صحن
بس آآآآآكل كدة جات داخلة واحدة بتتوحم
أها قالت عاوزة بس فسيخ
قالوا ليها انتهى
قالت عاوزة تلحس باقي الحلة
قالوا ليها غسلناها
أها جات شافتني آكل في الفسيخ
قالت لي أنا بتوحم عليك الله أديني ليهو
بالله لحست الصحن كلو
وراجلها قاعد متمحن زي الضاربوه صاعقة
المشكلة أنا برضو دفعت القروش
ناس تحمل من الفندق وناس تدفع !!!!
|
Post: #63
Title: Re: أعود اليكم بعد غياب طويل 00 فهل تقبلوني ؟؟؟
Author: زول ساكت
Date: 08-30-2005, 05:51 AM
Parent: #44
والله خربت تب ياود اهلي
بعد كدا الا نعملك عمره
وفرمطه من جديد
شكيتك على الخلقك وصلت درجت اللسكريم
كدي شوف كور دا
بنات تالته (هديه لأبوحراز بمناسبة العوده)
|
Post: #43
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-30-2005, 01:23 AM
Parent: #16
استاذنا الموصلي الظريف
والله مشتاقين كتير جداً
متابعين أخبارك وأغانيك الرائعة
طبعاً عاوزين لينا حفلة ملح
صاحبك عامل فيها عاوز يستثمر
قمت اشتريت ساوند 00
عليك امان الله أول ماركبو فيهو الأورغ قام اتفرطق حته حته
قال تايوان قال
|
Post: #23
Title: Re: أعود اليكم بعد غياب طويل 00 فهل تقبلوني ؟؟؟
Author: abas
Date: 08-29-2005, 05:18 AM
Parent: #1
بركه الجيت
سمح انت وبسكويت
حمدا لله علي سلامتك
كل الاجازه تارينك قضيتها في ضهر الترعه الكبيره القدام حلتكم
لسه كوارو المويه بيجن يملن منها
لسه باصات المناقل بتجي بي هناك
وبص البوسته بتاع الدويم
لسه بيجي مليان بي عندكم
والرواعيه الصباح بطقطقو في سيطانم ماشي السرحه بيجو بي عندكم
والطابونه الفي طرف الحله قاعده ولا سوها مخبز الي
وبكاسي المدينة عرب لسه بيشيلو الناس لي سوق الاتنين
وشوال العيش بقي بي كم
وملوة الويكه
ورينا ده كلو
ويا ولدي واحده واحده
وعمك احمد الفادني كيفينو
وخالتك الشول طمني عليها
وفي النهاية بنقول ليك مرحب بيك يا رايع انت
|
Post: #24
Title: Re: أعود اليكم بعد غياب طويل 00 فهل تقبلوني ؟؟؟
Author: بت العرب
Date: 08-29-2005, 07:48 AM
Parent: #23
مرحبتين بأبو حراز
والله غيابك مسخ علينا البورد
وهو ما لو بوستك دا كلو عزابة
نجيب معانا طوبة ونحن داخلين
ولا ندق الباب ونقيف برا
غايتوا جنس عزاب
مرحباً بك وألف مرحب
|
Post: #48
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-30-2005, 03:13 AM
Parent: #24
بت العرب تحياتي
لك الشكر والتقدير على المداخلة الجميلة
لكن بعض العزابة راسهم قوي جداً لازم الطوبة تكون قوية
اتمنى أن ينتعش البورد
وأن تسري فيه الروح والحياة دائماً
بالمناسبة حصل مرة وأنا صغير فلقت أختي بالطوبة
لكن أهل العوض دائماً أناس مليئون بالسماحة والبساطة
هسي أختي لحد الآن كلما تعاين في المرايا وتشوف اثر الفلقة
تقوم تقول 00 اللهم أحفظ اب حراز وغطيه وأنجيه من شر المحن والمصائب
|
Post: #45
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-30-2005, 01:27 AM
Parent: #23
عباس
والله اتاريك أنت زول قديم خلاص
بالله انت من زمن بوستة المناقل
تعرف الأيام ديك أمي ما عرسوها
قال ويكة قال
نحن هسي ناس بطاطس
تصدق آخر واحد ودعته كان أحمد الفادني
ولأنو كلام كتيييييييييييييير اتخارجت منه بسرعة
وعمتك الشول عرسو فيها
هسي أي كيس واي قزازة واي شوال تلقاها بتلم فيهو من الطريق
|
Post: #46
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-30-2005, 01:27 AM
Parent: #23
عفواً 00 مكرر
قال الشول قال
والله حكايتك بايظة
يا ابوي طلعوا ناس سحر ورزان وسوزان وجاكلين
ناس الشول ديل ناس شواهد ساكت 00 كل من عليها فااااااااااان
ناس سوزان ديل بيسلموا عليك في الكتف طوالي
وكمان شنو 00 بيعمتووك لامن تقول الرووووووووووووب
واحدة ولابعرفها 00 قامت جضمتني !!!!
|
Post: #25
Title: Re: أعود اليكم بعد غياب طويل 00 فهل تقبلوني ؟؟؟
Author: محمد الامين احمد
Date: 08-29-2005, 07:53 AM
Parent: #1
مرحب حبابك الف
والله مشتاقين كتير
و حمدالله على السلامة ، و منتظرين كتاباتك
|
Post: #49
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-30-2005, 03:16 AM
Parent: #25
أخي محمد الأمين
ونحن مشتاقين بالأكثر
سوف تكون كتاباتي البسيطة والمتواضعة معكم دائماً
وأتمنى أن تتحفونا بروائعكم
|
Post: #27
Title: Re: أعود اليكم بعد غياب طويل 00 فهل تقبلوني ؟؟؟
Author: 3mk-Tango
Date: 08-29-2005, 10:39 AM
Parent: #1
قال تقبلوني قال ..
والله نقبلك قبول يدخلك جامعة هارفارد ..
شنو ليك ..
ابوحراز مرحب بيك ( البيك دا مطعم مش يا انس جدة )
مكانك خالي فعلا ..
انعشنا بوجودك ..
تنقو
|
Post: #29
Title: Re: أعود اليكم بعد غياب طويل 00 فهل تقبلوني ؟؟؟
Author: فضيلي جماع
Date: 08-29-2005, 11:55 AM
Parent: #27
أبو حراز أيها الأصيل..إفتقدناك والله! صحيح نحن من الجنس الخشن لكن ليك وحشة..وقلنا لازم نتحمدل السلامة على طلتك. أمثالك -ودون رياء- يمنح هذا المنبر ترياق العافية. الجنس اللطيف بيكونوا افتقدوك لكن منتظرين الصيوان يخف من زحمة المهنئين !! أتقل شوية، المصريين بيقولوا"التقل صنعة"!!
مرة تانية سعيد بعودتك..فالمرح المعافى يعود إلينا بعودة أمثالك.
|
Post: #51
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-30-2005, 03:27 AM
Parent: #29
استاذنا وشاعرنا المخضرم فضيلي جماع
برضو في نسوان جنس خشن
لكن بس الله يصبرنا
لك التحية أيها الرائع وأنت تحيل الكلمات الى أنهار
والى عذوبة
والى ألق
افتقدناك
وافتقدك بورداب الخرطوم
وافتقدتك الأمواج التي تتحول في لحظة ما الى عاشقة وهي تسمع همساتك
وجدت النيل يتلوى ويترنح من العشق
وكأنكم قد رميتم بدواوينكم في مياهه
سؤال كثيراً ما يحيرني
لماذا تعشق الأنهار كما يعشق البشر ؟؟
لو رأيت القاش في هذه اليام لأيقنت أنه يعيش حالة حب
وعندما ترتشف من ضفافه تشعر بان أنفاس كسلا تتعمق في كل رشفة
يحاول احيانا أن يتمرد ويدخل عليها في منتصف الليل
لكنه يؤجل ذلك الى حين ويتلصص عليها
|
Post: #54
Title: Re: أعود اليكم بعد غياب طويل 00 فهل تقبلوني ؟؟؟
Author: فضيلي جماع
Date: 08-30-2005, 04:31 AM
Parent: #51
أخي الإنسان الجميل/أبوحراز..
(عندك شك في "جميل" دي؟؟ شايفك بتقول لمعتصم دفع الله في واحد قيافة كلما تروحوا معاه حفلة يفوز بالصيد الثمين ويخلي خشومكم ملح ملح"!!)
شكراً على الكلمات التي أخجلت تواضعي. وعلى الرغم من أسلوب الدعابة الذي تميزت به كتاباتك وكتابات سجيمان (الدكتور عادل) إلا إنني ألمح بين السطور كم تطفح كتاباتكما بالأدب الرصين. سؤآلك عن الأنهار وما إذا كانت تجيد فن العشق ، وحديثك عن القاش وكيف أن أنفاس كسلا تتعمق في كل رشفة هو حديث إنسان يحب بلاده حتى الثمالة. إن حب الأوطان هو في الأصل عشق يجمع في ذراته فسيفساء من كل لون: حب إنسانه‘ وحب التاريخ الذي هو صنيعة الإنسان والتباهي به..وأيضاً حب الطبيعة. وبمناسبة القاش ‘ فإن هذا النهر الفتي ما زرته إلا واحتلب من وجداني قصيدة تستعصي علي الكتابة حتى الآن. ولعل لحظة الغروب في "ود شريفي" منظر خلاب لا يمكنني نسيانه أبداً.
وعلى الرغم من التزامي الحاد بانتمائي إلى المليون ميل مربع دون تمييز ، وعلى الرغم من جهل إخوة لنا في الشمال الجغرافي أن بعض غرب السودان يقع في حضن النيل في مسيرته من فيكتوريا قبل توغله في الشمال إلا إن ذكر النهر كونه عاشقاً (وهذا تعبير راق من لدنك) يجعل طفولتي التي قضيت ردحا منها في بحر العرب أو نهر كير River Kiir كمااسمه التاريخي لمن لا يعرفون، يجعل حنيني إلى طفولتي في ربوعه بعضا من عشب أخضر يحتل مساحة واسعة من الذاكرة.
أرحب بعودتك مرة أخرى أيها الصديق..وتحياتي عبرك لبورداب الخرطوم الذين ما فتئوا شامة على خد هذا المنبر.
|
Post: #50
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-30-2005, 03:20 AM
Parent: #27
عمك تنقو
أخبارك شنو
طبعاً كلمة عمك دي بتجيب أخلاقي هنا
الجماعة في السودان يحاولوا يكبروك ويقولوا ليك تعال ياعم 00 جيب يا عم
بعدين لاحظت ملاحظة غريبة جداً في زيارتي للسودان
أي واحدة تقول ليها عمري فوق للأربعين
تقوم جارية منك صوووووووووووووووووف
لمن استفسرت من الموضوع
ذكروا انو أغلب السودانيين بيراهقوا بعد سن الأربعين
الغريبة كل واحد عمره اربعين سنة داخل خدمة الزامية
|
Post: #28
Title: Re: أعود اليكم بعد غياب طويل 00 فهل تقبلوني ؟؟؟
Author: ود المايقوما
Date: 08-29-2005, 11:42 AM
Parent: #1
|
Post: #30
Title: Re: أعود اليكم بعد غياب طويل 00 فهل تقبلوني ؟؟؟
Author: manubia
Date: 08-29-2005, 12:34 PM
Parent: #28
الحبيب ابوحراز والله افتدناك بشدة .تعرف ان للبورد طعم خاص .نشكرك علي اهدء الابتسامة لنا عند عتبة باب البورد
قال كاب الجداد قال
عاطر التحايا
|
Post: #31
Title: Re: أعود اليكم بعد غياب طويل 00 فهل تقبلوني ؟؟؟
Author: filan
Date: 08-29-2005, 01:03 PM
Parent: #30
|
Post: #32
Title: Re: أعود اليكم بعد غياب طويل 00 فهل تقبلوني ؟؟؟
Author: عاطف عمر
Date: 08-29-2005, 02:19 PM
Parent: #31
أيرحب بالمرؤ في داره ؟؟
نحن ضيوفكم و أنتم أصحاب الدار
سلامات أبوحراز
|
Post: #57
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-30-2005, 05:01 AM
Parent: #32
أستاذنا عاطف عمر
ومرحب بك في دارك
فعلاً هذا المنتدى الرائع والجميل منزل يسعنا جميعاً
وهو العيون الجميلة الرائعة التي نتكيء على سواحلهافي ساعات الهجير
أجمل ما يعجبني في هذا المنتدى هو الإلفة التي بيننا
وأجمل ما يعجبني في المراة سواحل عينيها
وهذا المنتدى عيون وسواحل وضفاف وأهداب
كنت أجلس ذات مرة بجوار إمراة رائعة
وكانت خصلة من شعرها تتمرد لتلامس أهدابها
كانت تبعدها بين الحين والآخر
وكنت على وشك أن اهتف في ركاب الحافلة لأقول لها أتركيها لتتمرد
ولكن الكمساري المتغرطس
حال بيني وبين إكمال هذا التمرد
صحيح ان العيون التي في طرفها حور قتلننا ثم لم يحيينا قتلانا
|
Post: #55
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-30-2005, 04:52 AM
Parent: #31
فلان
شكرا على اللوحة الجميلة والرائعة
ونتمنى أن تكون العودة جميلة
قال باك تو اسكول قال
|
Post: #53
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-30-2005, 03:41 AM
Parent: #30
manubia
لك التحية وأنت تدخل الى هذا البوست لتزيد من روعته ان كان رائعاً
ولك كل المحبة والود
صدقني أتمنى ان ازور كاب الجداد
لأنني معجب باسمها أولاً
ويقال أن بها من الطيبة ما يجعل كل العالم يحبها
لكن طبعاً ما حا أمشي ليها في الخريف
ماتت لينا واحدة في الخريف
والله عذبتنا عذاب الويل
العربية شايلة الجنازة وقامت وحلت لينا
والله كلنا بدينا نجر في العربية رجال على نسوان
مافضل لينا الا نقول للميت دا تعال جر معانا العربية دي
|
Post: #52
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-30-2005, 03:33 AM
Parent: #28
ود المايقوما
الف سلامة ولك التحية والتقدير
مشتاقين بحرارة
أها كيف أخباركم بعد الأحداث الأخيرة
واتمنى أن لاتكون هذه الأحداث سبباً في خلق فجوة بين الجنوب والشمال
واعرف كثيراً من اخواني الجنوبيين أنهم ليس لهم علاقة بهذا الموضوع
كما أن أعضاء الحركة صراحة لديهم فهم عال جداً
وأعمال التخريب هذه لم يقم بها الا مجموعة من الخونة واللصوص
سيظل الجنوب هو سحر أهل الشمال
وأتمنى دائماً من كل قلبي أن يكون السودان للسودانيين جميعا
|
Post: #33
Title: Re: أعود اليكم بعد غياب طويل 00 فهل تقبلوني ؟؟؟
Author: أبوذر بابكر
Date: 08-29-2005, 02:25 PM
Parent: #1
العزيز
أبوحراز
بالجد والله إفتقدنا حضورك الباهى
إنت يا ابوحراز
إنسان نقى وجميل
ومعنى أجمل للإنسان
والله العظيم يا ابوحراز، وما طالبنى حليفه
أنا بتفاءل بيك
|
Post: #59
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-30-2005, 05:14 AM
Parent: #33
ابوذر بابكر
هذا النقاء الجميل لا يتأتى الا بكم ومعكم
جميل أن نكون أنقياء
أن نكون أتقياء
أن نكون أغنياء 00 لكن هذه الأخيرة ما أظنها تأتي
أتيت يا سيدي وأنا أحمل الكثير من الأحلام
تبخرت جميعها الآن
أصبح لي حلم واحد
وهو أن أعشق الوطن متى ما حييت
أشكرك كثيراً على هذا التفاؤل المفرط
وأنصحك بتناوله على جرعات
الغريبة أن خالي يتشاءم بي دائماً
ويقول لي بالله هذه خلقة يغيروا عليها
والسبب أن ست النفر تغير علي بجنون
وكأنني دي كابريو بطل فيلم التايتاتنك
قال يتفاءل قال
التفاؤل لو من حيث الكلمات فإنني سوف أمنحك كل ما عندي
أما لو متفائل تجيك قروشك بقول ليك واطاتك أصبحت
|
Post: #34
Title: Re: أعود اليكم بعد غياب طويل 00 فهل تقبلوني ؟؟؟
Author: singawi
Date: 08-29-2005, 03:20 PM
Parent: #1
حبابك عشرة بلا كشرة
حمد الله على السلامة
أها طمني على صلاحيتك
باقي عمرنا الافتراضي الحيطة بالحيطة
وأبشرك الزيتون بقينا نجكسو بالجبنة عشان يكون خاطف لونين
بس انت تعال
تحياتي
|
Post: #35
Title: Re: أعود اليكم بعد غياب طويل 00 فهل تقبلوني ؟؟؟
Author: المسافر
Date: 08-29-2005, 11:44 PM
Parent: #34
لا لا لا يا أبو حراز
أنا (ظعلان) تف مافي كلام
إنت (لاظم) تظبح ديك مال أنا مشان نقبلوك
بس بحيري عامل ليك زي الحدود الطبيعية الفارقة ما بين الصين وجزر الهنولولو يعني زي ما تقول جبال الألب كده كده هو؟؟
ياوردي..........؟
ينصر دينك يا وردي.......؟
|
Post: #36
Title: Re: أعود اليكم بعد غياب طويل 00 فهل تقبلوني ؟؟؟
Author: Habib_bldo
Date: 08-30-2005, 00:01 AM
Parent: #35
أولا عودتك وحدها مدعاة لسعادة الجميع وأنت فاكهة هذا المنبر
|
Post: #66
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-30-2005, 08:54 AM
Parent: #36
حبيبنا00 حبيب بلدو
قال فاكهة البورد قال
طبعاً ارخص شيء الموز 00 الكيلو 1500 جنيه
البرتكان السجم دا الدستة 8 الف جنيه والله
أما التفاح فالدستة 12 الف جنيه
والله في الفترة الأخيرة دي بقينا ناس دووووووم ساااااااااي
وكمان قصب سكر قال
يا الهي
هذا البلد الذي تتساقط فيه المانجو في الجنوب عندما يحين قطافها
تجد فيه دستة المانجو بمبلغ خرافي جداً
أما العنب فلا يمكن الاقتراب منه
وخشيت في اي لحظة أن تتوحم إحدى قريباتي عليه
قال البرتكان نهدك مدردم قال
|
Post: #65
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-30-2005, 08:43 AM
Parent: #35
ايها المسافر في حدقات العيون
طبعاً ما تفرح اقصد العيون الخشنة جدا
سعدت بلقائك ومداخلتك ومشاكستك
فعلاً فتحي البحيري كان عبارة عن بارجة سدت علي كل المنافذ
الغريب أنني كلما أحاول أن اتطلع لرؤية البوردابية
كان يسألني هل قرات أخبار اليوم ؟؟
يا أخي دا وقتو ؟؟ قال أخبار اليوم قال
وأخيرا أخيراً وجدت الحل في زجاجة ميرندا
فقد أعطوني لها لأشربها
وكان لابد ان أعطيها له
وبدأ الراجل يكرطع غير مأسوف عليه
ومن ثم بدأت أتلصص
وكنت أحس أنه يبتلعني في كل رشفة ورشفة
|
Post: #60
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-30-2005, 05:19 AM
Parent: #34
سنجاوي
حرام عليك يا أخ
قال الحيطة بالحيطة
انت مفتكرني زي الدافات والفيتات بتاعت بورداب جدة ديل
يعني معقول أنا أكون زي الكوامر ديل قرشو ويازول وأساسي وقرجة
نحن لسه ماشفنا شيء على قول النسوان
والله جاهل وصغير ما شاف حاجة لسه
طبعا كلما اسأل واحدة من معنىالعبارة دي تقوم تتلفت وما بتجاوب
ياساااااااااااااااااااااتر !!!!
|
Post: #37
Title: Re: أعود اليكم بعد غياب طويل 00 فهل تقبلوني ؟؟؟
Author: نادر
Date: 08-30-2005, 00:11 AM
Parent: #1
يا زول واحشنا وحشة شديدة ...
مرحب بيك يا أبوحراز يا ملك القفشات والبوستات الجميلة ...
كنت غائباً لكن ذكرياتك كانت باقية بيننا ...
عوداً حميداً
ونجم الفرحة يا عائد
|
Post: #70
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-31-2005, 03:04 AM
Parent: #37
شكراً أخي نادر على هذا الاطراء
وجميل جداً أن تكون ذكرياتنا باقية معكم
وكم يسعد المرء عندما يشعر بأنه قد ترك ذكرى خالدة من ورائه
طبعاً الزمن دا لو حبيت ليك واحدة وسافرت
طوالي بتشتـت منك
يعني تشوف ليها أي واحد في فترة غيابك
لقد انتهت الكثير من المباديء والقيم
وهناك القليل جدا الذي يحافظ على الذكريات الجميلة والحب الأسطوري
|
Post: #38
Title: أعود اليكم بعد غياب طويل 00 فهل تقبلوني ؟؟؟
Author: Ahmed Daoud
Date: 08-30-2005, 00:16 AM
Parent: #1
العزيز ابوحراز
حمدا لله على السلامة
كلنا فى شوق اليك
كيف لا نقبلك وانت
جوة القلب وجوة العين
عطرت هذا البورد حينا من الزمن
بظرفك وروائع كلماتك الندية
مرحبا بك وبمساهماتك بعد ان
استقر بك الحال فى وطن القمارى .
لك التحايا والود
أحمد داود NZ
|
Post: #71
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-31-2005, 03:06 AM
Parent: #38
أحمد داوود
شكراً على هذا الكلام الجميل
وشكراً على العبارات الرائعة التي أخجلت تواضعي
لكن طبعاً لم يستقر بي الحال في السودان حتى اللحظة
وإن كنت أتمنى ذلك في أي ثانية
السودان رائع وجميل
طبعا أنا لا اعني السودان السياسي والحزبي
ولا أعني سودان السلطة
اعني السودان البسيط
سودان السماحة والطيبة
أمضيت فترة إجازة رائعة جداً
قضيتها متنقلاً بين الأهل 00 يا اخي سمايات بس احتمال نكون أكلنا لينا 30 سماية
أما العوازيم والأعراس فهي بالجملة
أول يوم جيت داخل السعودية الجماعة لقيتم في الغداء عاملين فاصوليا
وكمان شنو بدون لحمة
|
Post: #47
Title: Re: أعود اليكم بعد غياب طويل 00 فهل تقبلوني ؟؟؟
Author: محمد السر
Date: 08-30-2005, 02:02 AM
Parent: #1
Quote: انشاء الله تكون أعجبتك نكتة اللبناني دي
خليها المرة اللبنانية |
عجبنِّي اللتنين !!!
|
Post: #56
Title: Re: أعود اليكم بعد غياب طويل 00 فهل تقبلوني ؟؟؟
Author: حمزاوي
Date: 08-30-2005, 04:58 AM
Parent: #1
اخوي ابوحراز
مسكاقمي
جيتنا
فينا وفيك ملامحنا
والله ليك وحشة
بس المنبر مضلم اكتر
|
Post: #58
Title: Re: أعود اليكم بعد غياب طويل 00 فهل تقبلوني ؟؟؟
Author: فضيلي جماع
Date: 08-30-2005, 05:10 AM
Parent: #56
(عفواً..مكرر)
أخي الإنسان الجميل/أبوحراز..
(عندك شك في "جميل" دي؟؟ شايفك بتقول لمعتصم دفع الله في واحد قيافة كلما تروحوا معاه حفلة يفوز بالصيد الثمين ويخلي خشومكم ملح ملح"!!)
شكراً على الكلمات التي أخجلت تواضعي. وعلى الرغم من أسلوب الدعابة الذي تميزت به كتاباتك وكتابات سجيمان (الدكتور عادل) إلا إنني ألمح بين السطور كم تطفح كتاباتكما بالأدب الرصين. سؤآلك عن الأنهار وما إذا كانت تجيد فن العشق ، وحديثك عن القاش وكيف أن أنفاس كسلا تتعمق في كل رشفة هو حديث إنسان يحب بلاده حتى الثمالة. إن حب الأوطان هو في الأصل عشق يجمع في ذراته فسيفساء من كل لون: حب إنسانه‘ وحب التاريخ الذي هو صنيعة الإنسان والتباهي به..وأيضاً حب الطبيعة. وبمناسبة القاش ‘ فإن هذا النهر الفتي ما زرته إلا واحتلب من وجداني قصيدة تستعصي علي الكتابة حتى الآن. ولعل لحظة الغروب في "ود شريفي" منظر خلاب لا يمكنني نسيانه أبداً.
وعلى الرغم من التزامي الحاد بانتمائي إلى المليون ميل مربع دون تمييز ، وعلى الرغم من جهل إخوة لنا في الشمال الجغرافي أن بعض غرب السودان يقع في حضن النيل في مسيرته من فيكتوريا قبل توغله في الشمال إلا إن ذكر النهر كونه عاشقاً (وهذا تعبير راق من لدنك) يجعل طفولتي التي قضيت ردحا منها في بحر العرب أو نهر كير River Kiir كمااسمه التاريخي لمن لا يعرفون، يجعل حنيني إلى طفولتي في ربوعه بعضا من عشب أخضر يحتل مساحة واسعة من الذاكرة.
أرحب بعودتك مرة أخرى أيها الصديق..وتحياتي عبرك لبورداب الخرطوم الذين ما فتئوا شامة على خد هذا المنبر
|
Post: #73
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-31-2005, 03:10 AM
Parent: #58
استاذي فضيلي جماع
أنت الوحيد الذي تقول لي ياجميل
ولو سمعتك أمي ستستغرب كثيراً
وأتذكر أنني عندما كنت بالمرحلة الابتدائية
كنت أكره أي ولد وسيم بالمدرسة لدرجة غير عادية
وكنت أحمل لهم عداوة شرسة جداً
أذكر أنني تشاجرت مع أحدهم ويدعى الفاتح
كان وسيماً جداً والأدهى والأمر أن المدرسين دائماً يصدقونه
بدأ الولد يبكي على طريقة بكاء الجميلين
وبالتأكيد لو ذهب واشتكاني للمدير فإن طابوراً آخر سيقام لي لامحالة
حينها تفـتـقـت لي فكرة بأن اشتكيه قبل أن يذهب هو للمدير
وكان المدير ساخراً جداً
فأتيت اليه كالحمل الوديع وقلت له
أستاذ أستاذ 00 الفاتح قال لي بحبك يا جميل !!!!!!
طبعا كل المكتب انفقع بالضحك
فرد المدير قائلاً :
عليك الله عامل وشك الشين دا 00 انت أمك ذاتا حصل قالت ليك أحبك ياجميل ؟؟
ولنرجع لبحر العرب
هذا النهر الرائع الذي يعتصر في أعماقه كل بساطة أهل كردفان
بيني وبين الأنهار قصص حب وعشق لاتـنـتـه
كان ومازال أهل والدتي يعيشون بجوار النيل الأزرق
وكنت صغيراً عندما أأتي لحبوبتي المكرمشة كنت أغافلها وأجري لأستحم في النيل
وكنت أخلع ملابسي المهترئة وأجري عارياً وسط القرية وحتى اطرافها
كنت اشعر بخلاصة الحرية تجري في دمي وقتها
وعندما علمت الحبوبة بذلك تصدق أنها ربطتني بحبل مع كراع العنقريب لمدة يوم كامل
ومن يومها وأنا أكرهها حتى ماتت فقد رأيت الناس يبكون عليها كثيراً
بينما كنت في قمة النشوة
لا أدري لماذا يستنكر الناس أن تجري عارياً حتى وأنت طفل
بينما الله يخلقنا عراة ونذهب اليه ونحن عراة أيضاً ؟؟؟!!!!
|
Post: #72
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-31-2005, 03:08 AM
Parent: #56
حمزاوي
كيفك يا مان
شووووووووف 00 المنبر لو كله خليتو رجال ياها الضلمة حاصلة
فالمرأة المبدعة هي التي تضيء المنبر بقلمها وعينيها وأنفاسها
وتضفي على البورد مزيداً من النكهة والجمال
|
Post: #61
Title: Re: أعود اليكم بعد غياب طويل 00 فهل تقبلوني ؟؟؟
Author: falcon
Date: 08-30-2005, 05:22 AM
Parent: #1
اباحراز
لكن مابالغت عديل كدة
انا كنت في السودان و ما اشوفك؟
كان علي الاقل نهديكم انت وست النفر اغنية من اذاعة مانقو او خرطوم أف أم
سلامة العودة للخرمة
|
Post: #62
Title: Re: أعود اليكم بعد غياب طويل 00 فهل تقبلوني ؟؟؟
Author: ابو جهينة
Date: 08-30-2005, 05:50 AM
الأخ العزيز أبوحراز
عودا حميدا مع تحايا ماكنة
سعدت جدا برؤيتك في الخرطوم في اللقاء الكبير ..
Quote: وكان فتحي البحيري للأسف يجلس بجواري
فعندما أنظر لوجه هذه البوردابية المشرق وأنظر لفتحي البحيري
أكبر الله ثلاث مرات على طريقة الجماعة
وأقول سبحان الله 00 هذا ملح أجاج وذاك عذب فرات !!!! |
|
Post: #64
Title: Re: أعود اليكم بعد غياب طويل 00 فهل تقبلوني ؟؟؟
Author: Ali Alhalawi
Date: 08-30-2005, 06:07 AM
Parent: #62
أبو حراز
حمد الله على سلامتك .. سررنا لعودتك فقد إفتقدنا قلمك المرح
|
Post: #67
Title: Re: أعود اليكم بعد غياب طويل 00 فهل تقبلوني ؟؟؟
Author: newbie
Date: 08-30-2005, 08:57 AM
Parent: #64
| Quote: أحبكم من الوريد الى الوريد |
والله تحيتك حارة خلاس
|
Post: #69
Title: Re: أعود اليكم بعد غياب طويل 00 فهل تقبلوني ؟؟؟
Author: مهيرة
Date: 08-30-2005, 09:43 AM
Parent: #67
Quote: تقوم جارية منك صوووووووووووووووووف
لمن استفسرت من الموضوع
ذكروا انو أغلب السودانيين بيراهقوا بعد سن الأربعين |
اب حراز
قول النصيحة:
جارية منك... ولا جارية عليك!!!
حقيقى فقدنا نكهتك المميزة فى البورد
وبالمناسبة بنفتش لى ممثل للمغتربين فى الطائف وما بنلقى زيك
ناوين نرفع قضية دستورية ضد ضرائب المغتربين
** مساهماتكم: لرفع قضية دستورية ضد قانون ضرائب المغتربين **
أوعى تقول لى : أشاور ست النفر وأرد عليكم!!
ألف مرحب ، والعود أحمد
تحياتى
|
Post: #77
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-31-2005, 03:18 AM
Parent: #69
مهيرة الرائعة
وأنا قد فقدتكم كثيراً
وفقدت قلمك المناضل الجريء
وفقدت الشرق الأوسط التي تاتينا هناك في الرمق الأخير
نبصم معك بالعشرة على كل مطالب المغتربين
عملت معهم مشكلة كبيرة في جهاز العاملين بالخارج فرع مدني
فقد كانت اجراءاتهم سريعة جدا
ولكن بحثت لمدة ساعتين عن موقع الجهاز ولم أجده الا بعد صعوبة
فقد انتقل من مكانه الأول بينما اللوحات الارشادية كلها تشير للموقع القديم
وحتى اللوحات بالمبنى القديم مازالت قائمة
ولم يكتبوا انه انتقل لموقع آخر
كتبت مرة مقالاً يسمى { مثلث برمودا} بصحيفة عكاظ كان يتحدث عن جهاز المغتربين وباب شريف وقنصلية السودان بجدة وتطرقت فيه لهذه المشكلة
كمان بالمرة مادام الحكاية فيها قضايا دستورية عاوزين موضوع الأراضي
وكذلك الشيء الأهم { زواج جماعي للمغتربين } على طريقة السكوت الجماعي
بالنسبة لست النفر فإنني استشيرها في أي شيء الا شيء له علاقة بالقروش فهنا لكم دينكم وليا دين !!!!
قال يشاور ست النفر قال
|
Post: #76
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-31-2005, 03:16 AM
Parent: #67
newbie
لكن الشوق اليكم يفوق تحيتنا حرارة
لك التحية
|
Post: #75
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-31-2005, 03:14 AM
Parent: #62
أبوجهينة
وأنا كذلك سعدت جداً برؤيتك
وسعدت باللقاء الجميل الذي جمعنا في ذلك اليوم المشرق حقاً
طبعاً حمزة سليمان لم يتعرف علي وأوشكت ان اجضمه
ولكنه تدارك الموقف في اللحظات الأخيرة
كان لقاءا جميلاً ولحظات يتمنى الإنسان أن تتكرر
وكم كان بودي أن تكون ست النفر حاضرة يومها
الا أن ظروفها الصحية حالت دون ذلك
التحية لك دائماً
|
Post: #74
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-31-2005, 03:12 AM
أخي فالكون
لم لا التقيك
أن تلقي أحداً من سودانيز فهذا شيء جميل له نكهة خاصة
لكن حينما تلتقيه بالسودان فهذه هي الروعة تمشي على قدمين
أذكر أنني دخلت لمقهى أنترنت بالسوق العربي
طبعاً من حولي نووووووووووور
ومن خلفي نوووووووووووور
ومن أمامي نووووووووووووور
نساء في غاية الروعة والجمال
تركت واحدة جهازها وخرجت لترد على الموبايل الذي لا أعرف أنا كيف أفتحه
فقد كان من النوع الغريب والعجيب جداً
بينما كان شعرها المسترسل يتثاءب عند خصرها
خرجت ولم تعد
وجاء آخر وجلس في المقعد 00
وأول شيء بدأ يتصفح موقع سودانيز أون لاين
لم نتعرف على بعضنا
ولكن تملكتنا الدهشة الأثنان معاً عندما عرفت أنه عاصم الحزين وعندما عرف هو أنني ابوحراز 00
|
Post: #68
Title: Re: أعود اليكم بعد غياب طويل 00 فهل تقبلوني ؟؟؟
Author: ShiningStar
Date: 08-30-2005, 09:21 AM
Parent: #1
البورد حتما يحتاجك...
حمد لله علي السلامه و تحياتنا لي ست النفر...
شوق...
|
Post: #78
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 08-31-2005, 03:20 AM
Parent: #68
النجمة المضيئة في كل الفصول والمواسم
لك التحية على اهتمامك ولك التحية على الكاراكتير المعبر جداً
لقد فقدناكم وفقدنا كتاباتكم الرائعة
كلما ارى اسمك اتذكر تماضر شيخ الدين
فقد كانت تكتب عنك عذب الكلام وأجمله
لك التحية ولكل المغتربين بأمريكا
|
Post: #79
Title: Re: أعود اليكم بعد غياب طويل 00 فهل تقبلوني ؟؟؟
Author: Khaalaleyaal
Date: 08-31-2005, 07:08 AM
Parent: #1
والله الف مرحب
قال تقبلوني قال
|
Post: #80
Title: Re: أعود اليكم بعد غياب طويل 00 فهل تقبلوني ؟؟؟
Author: ابوحراز
Date: 09-02-2005, 11:34 PM
Parent: #79
Khaalaleyaal
لك التحية والتقدير
اها ان شاء الله مقبولين
كم أنا سعيد باللقاء بكم مرة أخرى
وأتمنى أن يكون المنبر واحة للجميع
|
|