Post: #1
Title: غنيوة للخرطوم
Author: THE RAIN
Date: 03-31-2004, 01:31 PM
كتبت فى ذات التاريخ والخرطوم حبلى بالثورة، ولم يتفتق الوعد بالخصب حينها
وتحية لذكرى الإنتفاضة الغالية
================================================
لما حزنِك يبقى إسمِك
لما إسمِك يبقى نحنا
ببقى دمنا طوق نجاتِك
خرطومنا يا زينا وسمحنا
جاكى فرح النيل يلمِك
مدا إيدو
بشرت فيك الشمس
شالت الغيمات وجاتِك
تحلف الأيام وحاتِك
يا وجيهك
يا نداوتك
مافى غيرك
ويا حلاتِك
كنا جنب عينيك نقيّل
يكتب العاشق نشيدو
كنا فى ريدك نحمّل
همنا الطامح وريدو
ولسه وش الخوف بتاوق
شفنا ليلك لما حزنه
وجانا مارق
وضى صباحك
دسا فرحو
عدا فات وعد المشارق
ولسه وش الخوف بتاوق
لو فِرِحنا
تزعل البسمة وتفارق
تتملى الكلمات مواجع
والنهار ينسانا عيدو
ولسه وش الخوف بتاوق
لو جرِحنا
البتقت شتلاته
فوق عود المشانق
جانا راجع
تانى نرجع لى عيونك
نبدا مشوارك نعيدو
ولسه وش الخوف بتاوق
لو جرِحنا
المنصلب فوق البيارق
جانا راجع
كل غنيه وكل نمه
كل مُنيه وكل كلمه
تبقى شارع
فى رباكى
محتشد بالريد ومارق
وكل زول يحضن شهيدو
لا حزن يغشانا تانى
ولا تباكى
نبقى ناسك
نيلك الرويان نقالدو
ونملا كاسك
الأسى الطافح نعاندو
ونلقى ناسك
كل زول يحضن شهيدو
زول يسالمو
وزول يطايبو
وزول يريدو
ولسه نحلف بى حياتك
يا نداوتك
ويا حلاتك
31 مارس 85م
|
Post: #2
Title: Re: غنيوة للخرطوم
Author: جورج بنيوتي
Date: 03-31-2004, 03:40 PM
Parent: #1
أبا ذر :
... ولسه وش الخوف بتاوق.(2004)
لك الله ياخرطوم الفيل ويا.. ذيل الأرنب..
تاريخ غريب ياخي... تبقى كلمة الحب والوفا لامن تحين لحظة
جماع فايتة الكلام..
شكرا: يتجدد فيا حبها كلما زرت .. تتبلور سنبلة من أمل.
|
Post: #3
Title: Re: غنيوة للخرطوم
Author: THE RAIN
Date: 04-01-2004, 07:02 AM
Parent: #1
شكرا يا جورج على الزيارة الجميلة دائما
والخرطوم لسه بتبكى وخائفة
ونحن لسه منتظرين وما خائفين
أبوذر
|
Post: #4
Title: Re: غنيوة للخرطوم
Author: sympatico
Date: 04-01-2004, 07:09 AM
Parent: #3
الاخ المبدع THE RAIN
نص جميييييييييييييييييل
لكأنك كتبته ليغنى
حقا ما اشبه الليلة بالبارحة
واردد معك
Quote: كنا جنب عينيك نقيّل
يكتب العاشق نشيدو
كنا فى ريدك نحمّل
همنا الطامح وريدو
|
|
Post: #9
Title: Re: غنيوة للخرطوم
Author: THE RAIN
Date: 04-01-2004, 06:22 PM
Parent: #4
العزيز
Sympatico
تحياتى يا زول يا أصيل وجميل
حضورك فى حد ذاته أغنية
تموسق نضارة الحروف وتدندن بها اللحظة نشوانه بى طلتك المفرحة دائما
أبوذر
|
Post: #5
Title: Re: غنيوة للخرطوم
Author: Soumeta
Date: 04-01-2004, 10:29 AM
Parent: #1
يا سلام عليك يا رين،،ده عمل راي جداً،،
تاني في؟
|
Post: #10
Title: Re: غنيوة للخرطوم
Author: THE RAIN
Date: 04-01-2004, 09:19 PM
Parent: #5
Soumeta
شكرا كتير وتقدير أكتر على الإطراء الجميل
وفى كتير تانى
مع الود وعذب التحية
أبوذر
|
Post: #6
Title: Re: غنيوة للخرطوم
Author: الجندرية
Date: 04-01-2004, 10:40 AM
Parent: #1
وهنا موجة اخرى
|
Post: #7
Title: Re: غنيوة للخرطوم
Author: خالد الحاج
Date: 04-01-2004, 10:50 AM
Parent: #6
هي أغنية يا أباذر
هي أغنية..
(مشروق) أنا بالشوق الفيك
بالحب بالوجد الساكن وجدانك
ما تحرمنا منك ومن غناك
|
Post: #13
Title: Re: غنيوة للخرطوم
Author: THE RAIN
Date: 04-02-2004, 07:38 PM
Parent: #7
خالد
الزول الساطع الوليف
أنا والله المشروق بى ريدتك
تحية سامقة زيك ليك
وتحية خضراء وبيضاء زى طيبتك
وتحية برضه لى ديك الأيام ووعدها لينا الضاع فى زحمة الأسى الفينا
لكن برضه ولسه مصرين، حنمشى لحدى نهاية السكة، لحدى حضن الضوء الهناك، ما زال بلوح لينا
وحنمشى حتما
أبوذر
|
Post: #12
Title: Re: غنيوة للخرطوم
Author: THE RAIN
Date: 04-02-2004, 08:29 AM
Parent: #6
أمانى
كيف الأحوال
لسه بنحلم نلملم كل البنفسج الشارد
وين ما فات حنجيبه ونخته قريب من بركة الفرح
وتحية بنفسجية ليك وللخرطوم
دمتِ
أبوذر
|
Post: #8
Title: Re: غنيوة للخرطوم
Author: خضر حسين خليل
Date: 04-01-2004, 01:30 PM
Parent: #1
ابوزر
ابا زر
سلام ومبروك واي حاجه تانيه
الشاي في النار
يازول الشاي
الونسه بتمسخ من غيرك
(ازهري محمد علي )
ياريتك تفرز ياريتك
كم صبروعشم استنيتك
(حميد)
ياابوز واصل سيرك واصل واصل
|
Post: #14
Title: Re: غنيوة للخرطوم
Author: THE RAIN
Date: 04-03-2004, 06:35 AM
Parent: #8
العزيز خضر
كيفك يا راجل يا اصالة
وليك مدة ما بنت، ونحن أكيد فى اشتياق لى شوفتك يا حبيبنا وين إنت
تسلم على الجيه الحلوة وبرضه على توقيعك الأحلى
أبوذر
|
Post: #11
Title: Re: غنيوة للخرطوم
Author: Raja
Date: 04-02-2004, 03:14 AM
Parent: #1
أبو ذر الراقي..
اسمح لي ان أهدي كلماتك النظم الى الخرطوم المدينة التي عنت لنا الكثير.. وما زالت..
أليست هي العقبة الكؤود في خصام أهل الحكم الآن..؟
وكل ثورة وهي بألف صمود..
|
Post: #15
Title: Re: غنيوة للخرطوم
Author: THE RAIN
Date: 04-03-2004, 06:37 AM
Parent: #11
العزيزة رجاء
الأرقى والأسمى
وإنتى أسمحى لى أهديها ليك إنتى
وللخرطوم كل الرحيق وكل البرتقال برضه
وسلمتى يا زولة يا نبيلة
أبوذر
|
Post: #16
Title: Re: غنيوة للخرطوم
Author: حبيب نورة
Date: 04-03-2004, 06:46 AM
Parent: #11
كل البنات
امونة يا الخرتوم
معاي ساعة افتح الكراس
معاي ساعة الدرس بي الليل
|
Post: #18
Title: Re: غنيوة للخرطوم
Author: THE RAIN
Date: 04-03-2004, 05:29 PM
Parent: #16
حبيب نورة الحبيب
تسلم إنت وعركى الشامخ
ولنا خرطومنا ولهم خرطومهم
سعدت انشاء الله يا ذوق
أبوذر
|
Post: #17
Title: Re: غنيوة للخرطوم
Author: بدرالدين شنا
Date: 04-03-2004, 08:08 AM
Parent: #1
من مطر الخرطوم لي مطار الخرطوم
طبعاً نحن الخرطوم دي لمن كنا صغار كان بحممونا بيها (يقولوا لينا كان ما إستحميت ما بنسوقك الخرطوم)
وهسع بعد الغربة عشان تمشي الخرطوم لازم تستحمى وتغتسل من كل الضرائب والمساهمات
غنوا معانا غنوة الريد والمطر
أحبك يا المطر
|
Post: #19
Title: Re: غنيوة للخرطوم
Author: THE RAIN
Date: 04-03-2004, 08:22 PM
Parent: #1
بدر الدين
قمر الدين
يا إكتمال الود فى ليلة أربعطاشر
الخرطوم مكان، والخرطوم وجدان، الخرطوم الأهل والحبان
الذكريات والأمسيات
تعرف يا بدر يمكن أصله ما يكون فى مدينة فى العالم، حاضننها نهرين غير الخرطوم
والأكيد انه مافى مدينة حاضنة ريدتنا زى الخرطوم
وأحبك أكتر يا بدر
أبوذر
|
Post: #20
Title: Re: غنيوة للخرطوم
Author: KOSTA
Date: 04-04-2004, 09:53 PM
Parent: #19
اباذر
الخرطوم :
ياضفة الفرح المراهق ما سقوك شرابنا العذب الطهور
قال عزيزنا خالد الصادق عنها :
ايا الخرطوم!
يا بؤرة البخل الشحيح
آتيك نازف الوجدان،
مهدود الكيان،
مشوى لحم الخاطر،
كيما استريح
خذوا جوبا
خذوا امدرمان
خذوا كل الحسان
و لكن دعوا لى " احسان " !!
عشنا الانتفاضة لحظة بلحظة ... و كأن قصيدتك الرائعة هذه تعيدنا اليها بكل فيض نبضاتها .... اثثمرت الانتفاضة مولودآ للحرية ، فقضت " الانتلجنسيا " و " التكنوقراط " عليه فى المهد.... و منذ تلك اللحيظات امتدت معاناتنا حتى اللحظة ، و يا عالم الى متى ستمتد
لك الله ايها الوطن الذى يقتاته بنيه
|
Post: #21
Title: Re: غنيوة للخرطوم
Author: Alia awadelkareem
Date: 04-04-2004, 10:02 PM
Parent: #20
Quote: تانى نرجع لى عيونك
نبدا مشوارك نعيدو
|
سلام الرب ايها الماطر
ياريت نبؤتك تصدق فينا
ونبدا مشوار الاماني
الهاربة من زولا بعاني
مع حبي
|
Post: #24
Title: Re: غنيوة للخرطوم
Author: THE RAIN
Date: 04-05-2004, 09:17 AM
Parent: #21
العزيزة عالية
سامية الحضور
وعالية المعنى
وما باليد سوى الأمنيات، والأمل مقيم فينا، وحتما سنعود ذات فرح للعشق الوطن
والمعزة ليك
|
Post: #23
Title: Re: غنيوة للخرطوم
Author: THE RAIN
Date: 04-05-2004, 09:15 AM
Parent: #20
كوستا العزيز الصديق
أشرقت الشموس وجادت بذهب وهجك وفضة كلامك
وآلاف المراحب بعودتك البهية الندية
والإنتفاضة الموؤدة، لا تزال تئن فى قبرها، ما قبرها سوى أرواحنا نحن
دمت يا جميل
|
Post: #22
Title: Re: غنيوة للخرطوم
Author: bushra suleiman
Date: 04-04-2004, 11:30 PM
Parent: #1
Quote:
تانى نرجع لى عيونك
نبدا مشوارك نعيدو |
يسمع منك رب الكون يامطر ياروعة
|
Post: #25
Title: Re: غنيوة للخرطوم
Author: THE RAIN
Date: 04-05-2004, 09:20 AM
Parent: #22
بشرى
شاعرنا البديع
انشاء الله كلنا حنتلاقى هناك
ونغنى غنيوات العودة والفرح الحقيقى
وحتى ذلك الوعد/الحلم، أهديك المودة وكل طعم الوطن
|
Post: #26
Title: Re: غنيوة للخرطوم
Author: soma
Date: 04-05-2004, 11:02 AM
Parent: #25
المطر الغزير بى برده وجماله ..
المطر يا كريم فى فصل العمر ..
انت فصلك مميز بالطبيعه الخلابه .. وانت طبعك مميز بالخصال السمحه ..
كلماتك معبره وجميله وعميقة المعانى .. واحساسك مرهف للغاية .. تسلم كتير يا شفيف.. ونشكرك على اهداءك لنا هذا النص المميز..
وكما ذكرت فى ردك للبدرى السمح
( يمكن أصله ما يكون فى مدينة فى العالم، حاضننها نهرين غير الخرطوم)..
فعلا كلامك كان فى الصميم .. واليك يا المطر اهدى وزوارك تلك الابيات ..اتمنى ان تنال اعجابكم.. ونتمنى العوده قريبا والخرطوم وكل البلد الحنون غنى بخيرو الوفير وحبه الكثير .. ودمتم ..
.. ** عشان نرجع **
عشان نرجع نتحكر فى الواطه ونتربع ......
نحسب الفات من الايام نعد اصبع فوق اصبع ....
نخت العشره جمب العشرة نعد نجمع ....
نقول للداير الرجعه صمدنا خلاص وما بنخضع ...
ونقول للتائه مع الدنيا كفايه طمع ....
عشان نرجع نخر ساجدين نخر نركع ...
نسبح ديمه فى الرحمن وبى ايدينا نتضرع ...
نتوسد ليلنا صبر نتحزم نضم ايدينا نتشجع ...
بعد نرجع نشوف القمره يوم تطلع ..
نجوم ساطعات لقاء عشاق لعب شفع
ضفاف النيل والخضره جمال الخالق الابدع..
حبوبة تحجينا حكاوى السمحه من بلدى تتحلى بالصفات اجمع
وعن والدهميم وكريم يقوم باكريه يحش يزرع
وود حبوبه ديمه جسورلا يوم خاف ولا اتزعزع ..
وعن فارس دوام حارس لا دبابة لا مدفع ..
وبعد ارجع اكون سواح فى بلدى اشوف الكنت بيه بسمع ...
شرقنا سواكن الشامخه جمال سنكات ومصوع ..
وفى ضفاف القاش اقيف ارتاح وجبال توتيل هناك اروع ..
وسط بلدى جزيرة الخير عطاها وفير لا بتكل ولا بتقنع ..
وفى الخرطوم لقاء النيل زى عاشقين متعانقين من المنبع ..
شمال الفن من مروى منبع التاريخ والمرتع ..
حكاويهم شعر منسوج فى العايش والودع ..
غربنا جمال وراحة بال نطوف ونشوف ونستمتع ..
جنوبنا الحاضر الماضى بى خيراتو جاد ونفع
وبعد أرجع اعانق بلدى بى لهفه عين تفرح وعين تدمع ..
عين تفرح وعين تدمع ....
عين تفرح وعين تدمع .....
|
Post: #27
Title: Re: غنيوة للخرطوم
Author: THE RAIN
Date: 04-05-2004, 05:05 PM
Parent: #1
العزيزة سوما
بدءا، دعينا نحتفى ونبتهج ونشعل الدواخل كرنفالا، بالقصيدة الملحمة التى جاد بها ندى وكرم قلمك المبهر والصادق
ولك كل التقدير والإعزاز على تشريفك لنا، وإضاءة جنبات الساحة بعذب الشعر وجميله
وخالص المنى بما تتمنين
|
|