Post: #1
Title: إعادة (1)
Author: أبوذر بابكر
Date: 08-16-2005, 11:24 PM
Parent: #0
بالإسم الجديد
يا جايه من عمق الألق
يا جايه من عمق الألقْ
مرسومة بى لون الصفا
ومسقيه من روح العبقْ
جايه وحِداكِ الأغنيات
شايله فى إيد الخريف
وفى إيدك التانية الوفا
كل الدروب
مرقت تبارك طلتك
تتمعنِك
مندهشه كيف
إنه الفراش إنضمَ ليك
سمّاك حديقة
وفيك سرحْ
وكيف الكلام
شايل حروفه ومشتهيك
سمّاكْ حقيقة
عشان يحاول يكتبك
عنوان فرح
وكيف الشمس
نِسَت الغروب
لِبست خُصل ألقِك طِرَح
بدل الشفق
يا جايه من عمق الألق
جايه ومعاك الأمسيات
نشوانه بى معنى الحضور
ونتقاسم اللحظات هدايا
شويه ريد
وشويه عيد
شويه زهرات للفريق
وشوية غنوات للصبايا
وكل ألوان البريق
تشعل تفاصيل الحكايه
تعلن صباحك
ونشوة الريد الدفَق
يا جايه من عمق الألق
يا جايه زى لحناً رزين
ممدود على وجع الوتر
موسق خطوايك بالحنين
يا طلتك
ضحكة نجيمه بعيدة عاشقه
وغمزة فى وجنة قمر
رعشة رذاذ جوه الغيوم
يا طلتك
شبَال مزخرف بالنجوم
يا طلتك
إشراق سنا
وإيقاع مدوزن فى نسق
يا جاية من عمق الألق
يا مارقه من ضو القصيدة
وطالعه من زهو النشيد
نشوان مقام الريده
فى زحمة غناى
طربان مبلل بى شذاكِ
ودمعة الفرح العنيد
روّضْتّى حزن الليل معاى
جيتك وطن
خليت اساى
ومعاكى خلانى الشجن
جيتك وطن
فُتَّ المواجع و الرهق
يا جايه من عمق الألق
|
Post: #2
Title: Re: إعادة (1)
Author: ودقاسم
Date: 08-16-2005, 11:46 PM
Parent: #1
والله كلام يا أبا ذر ...
ألق ، جمال ، تفتح أزاهير ،،
نغم
طنابير ترن
أعياد تمشي بين الناس
وفرح غامر
وفيض دفاق ،،،
من يغني لنا هذه الأغنية الملحّنة ؟؟؟
|
Post: #3
Title: Re: إعادة (1)
Author: أبوذر بابكر
Date: 08-17-2005, 07:02 AM
Parent: #2
العزيز
ودقاسم
ود وتحايا وتقدير
ده من أوائل النصوص المنشورة فى المنبر بالعامية
وفكرت إنه أعمل ريفرشمنت لكل النصوص القديمة، تحت الإسم الجديد
كلى إمتنان ليك يا ود قاسم على كلماتك المبهجة فعلا
ولا عدمنا حضورك الجميل
|
Post: #4
Title: Re: إعادة (1)
Author: أبوذر بابكر
Date: 08-17-2005, 12:51 PM
Parent: #1
إعادة
للمارقة من ضو القصيدة
|
Post: #5
Title: Re: إعادة (1)
Author: altahir_2
Date: 08-17-2005, 02:38 PM
Parent: #1
كالعادة مبدع وفنان يا ابوذر . بالمناسبة انا انتهيت من زمن من تلحين مشـــــدوه بس ما عارف اسمعك ليها كيف؟؟
|
Post: #6
Title: Re: إعادة (1)
Author: أبوذر بابكر
Date: 08-18-2005, 03:25 AM
Parent: #5
العزيز
ضياء
كيف الأحوال ومشتاقين والله
| Quote: بالمناسبة انا انتهيت من زمن من تلحين مشـــــدوه بس ما عارف اسمعك ليها كيف؟؟ |
أخبار حلوه جدا، تعرف أنا قلت يمكن الزول ده مزحوم و "مشدوه" زينا فى الدنيا العجيبة دى
وما لقى الوقت عشان يتعامل مع النص
تعرف برضه أخونا "علاء سنهورى" كان عنده فكره يلحن نص إسمه "يا يت لو باكر أمس"
وما سمعت منه أى خبر
ونأمل نسمع منه زى الأخبار الحلوه دى
يا ريت والله يا ضياء لو تلقى طريقة عشان تسمعنا اللحن
أخوك طبعا صفر كبير وأبلد زول فى أمور التقنية دى
والمحبة كلها والتقدير ليك دائما
|
Post: #8
Title: Re: إعادة (1)
Author: معتصم دفع الله
Date: 08-18-2005, 04:29 AM
Parent: #6
أبوذر المطر ..
يا جايي من عمق الألق ..
دوماً تتحفنا بالروائع ..
مزيد من الإبداع ..
ومزيد من التألق ..
محبتي ..
|
Post: #10
Title: Re: إعادة (1)
Author: أبوذر بابكر
Date: 08-18-2005, 12:10 PM
Parent: #8
العزيز
معتصم
تحايا ندية ليك
ومحبة اكتر ندى، معاها
وتقدير وإمتنان غزير
للحروف المبهجة
|
Post: #7
Title: Re: إعادة (1)
Author: almohndis
Date: 08-18-2005, 03:57 AM
Parent: #1
اخوانا
ابو ذر
اجزم انى
سمعت هذا النص
عند فنان
ولا عشان هو
ملحن جاهز
لا ادرى ايهم
|
Post: #9
Title: Re: إعادة (1)
Author: عبد المنعم سيد احمد
Date: 08-18-2005, 08:51 AM
Parent: #7
الصديق
ابوذر
تجدنا حيثما وجد الجمال
لكم استمتع دائما بهذا النظم العذب
لك الف وردة ووردة..لتزين هذه الخميلة النضرة
محبتى ايها الراقى
|
Post: #13
Title: Re: إعادة (1)
Author: أبوذر بابكر
Date: 08-19-2005, 11:04 AM
Parent: #9
العزيز
منعم سيد أحمد
كيف الأحوال يا صديقى
لك الشوق مقيما
وعلى يمينه تجلس المحبة
تسبح، وأنا معها
كريم نعماء حضورك فينا
أنت الجمال يا صديقى
كاملا وأخضرا من غير سوء
ومن هذه الورود عميمة الندى
أنظم عقدا ألفى اعدد
وأرده إليك هدية ود وتقدير
سلمت وطبت يا منعم
|
Post: #11
Title: Re: إعادة (1)
Author: أبوذر بابكر
Date: 08-18-2005, 04:07 PM
Parent: #7
العزيز
عثمان المهندس
تحايا كتيره معطره
كدى بالله يا عثمان اتذكر كويس
الشغلانة دى قالو بقى فيها حاجات حلوه جدا
وما يكون الزول ده عايز يجوطنا ساى
Just Kidding
ما أظن يا اباعفان
يمكن المفردات مألوفة ليك
وإنت زول ذواق وسميع
شكرا ليك يا مهندس على الزيارة المفرحة
|
Post: #12
Title: Re: إعادة (1)
Author: عبد المنعم ابراهيم الحاج
Date: 08-18-2005, 04:44 PM
Parent: #11
الرائع ابوذر
اذن هو موسم الاغنيات
زمن تموسق الاحاسيس المرهفة والمرهقة
بعد احتباسات الحزن في صالة القلب
حقيقة ان هذا النص مشحون بالايقاعات
وبطبول هداره تاتينا من خلف آلاف السنوات
لتقيم مهرجانا غابيا احتفاءً بهذا النص
انني اول مرة اقراه ها هنا.
لك المحبة يا حميم
|
Post: #14
Title: Re: إعادة (1)
Author: عبد الحميد البرنس
Date: 08-19-2005, 12:23 PM
Parent: #12
لا تعليق!.
|
Post: #16
Title: Re: إعادة (1)
Author: أبوذر بابكر
Date: 08-20-2005, 03:58 AM
Parent: #14
إزيك يا حميد
القادم يحمل الدفء
حضورا
من أرض يهاب الجمرُ
بردها
حضورك يا صديقى
يشعل المدى، ضوءا
ويدفق الفرحَ
الى ساحتنا التى تشكو
قلته
بل ندرته
تحياتى كاملة العطر لك يا برنس
|
Post: #15
Title: Re: إعادة (1)
Author: أبوذر بابكر
Date: 08-19-2005, 11:13 PM
Parent: #12
العزيز
منعم إبراهيم
كيف حالك يا صديقى البهى
لطالما كانت الأغنيات حقولا
ترتاح فيها وبهاومنهاأجساد الكلام
من لفح حزن الأبجدية المكلومة
المقتولة بغضا وكرها ووأدا للمحبة
المحبة يا منعم
هى كلمة سر الولوج الى عالم الملائكة
وبدونها
سوف نظل نكابد ذات الخطيئة القديمة التى أنزلتناالى الأرض
وسوف لن نرقى ونتأهل لأن نحلم، مجرد الحلم
بأن نكون أنصاف ملائكة
هى الأغنيات إذن
تحيتى لك يا صديقى
ومعها محبة عالية
|
Post: #17
Title: Re: إعادة (1)
Author: bushra suleiman
Date: 08-22-2005, 06:50 AM
Parent: #1
ابوذر...يا امطار من دهشة وعبير
ارمينى بى حرفك..
واطلق فينى نار الجوى
وادينى من برقك..الق
احبك جدا..
|
Post: #18
Title: Re: إعادة (1)
Author: أبوذر بابكر
Date: 08-22-2005, 11:09 PM
Parent: #17
العزيز
بشرى سليمان
السلام عليك يا بشرى السعد ووعد الفرح الدائم
وإنت بتطلق فينا سيل النشوة ودفق البهجة
بيك نزدهى ونبقى أطول من ضلنا
وأحبك جداً جداً
|
Post: #19
Title: Re: إعادة (1)
Author: الرايق
Date: 08-23-2005, 02:08 AM
Parent: #1
أبو ذر سلاااااامات والله العظيم مشتاقين
إزيك يا راجل ووينك إنت؟؟؟؟ بالله أخبارك شنو؟؟ وين أراضيك لسه في جدة، والجديد شنو؟؟؟ بجي ماري بالبورد مرة مرة وما مركز كمان،والليلة مع الصباح دا لمحت إعادة وخشيت قلت أقول سلام : سلام
يا حلاوة شعرك ونصوصك وروعتها ويحليلك يا مبدع
|
Post: #22
Title: Re: إعادة (1)
Author: أبوذر بابكر
Date: 08-23-2005, 08:17 AM
Parent: #19
الرايق
الحى بلاقى والله
كيفك يا زول يا حلو وكيف الدنيا معاك
وأى أرض تحتويك
لسه والله يا على فى هذه المدينة التى لا أحبها
وتبادلنى هى برضه نفس الإحساس
المدن زى البشر
أو على الأقل أنا بتعامل معاها كده
والله يا على غلبنى تب أتآلف معاها
على العموم خلاص
أنا فى هسه فى اللمسات الأخيرة تقريبا
وبعد داك مرقة نمر من شندى
و
ون واى تيكيت
خلينا نشوفك ياخى ونسعد بطيب اللقيا معاك
وما تقطع المرقه
|
Post: #20
Title: Re: إعادة (1)
Author: بدرالدين شنا
Date: 08-23-2005, 03:47 AM
Parent: #1
Quote: كل الدروب
مرقت تبارك طلتك
تتمعنِك
مندهشه كيف
إنه الفراش إنضمَ ليك
سمّاك حديقة
وفيك سرحْ
وكيف الكلام
شايل حروفه ومشتهيك
سمّاكْ حقيقة
عشان يحاول يكتبك
عنوان فرح |
على كيفك بسحروك
أما أنا ففخور بك
|
Post: #21
Title: Re: إعادة (1)
Author: Adam D.El-Asha
Date: 08-23-2005, 05:49 AM
Parent: #20
الأخ اباذر
لك الودهذه هي المرة الثانية التي أقرء لك فيها إحدي النصوص المبهرة والتي شغفت بها وإمتد هذا الشغف عشقا لهذه الروائع متعك الله بالصحة ودمت لنا ذخرا
جايه وحِداكِ الأغنيات
شايله فى إيد الخريف
وفى إيدك التانية الوفا
كل الدروب
مرقت تبارك طلتك
تتمعنِك
مندهشه كيف
إنه الفراش إنضمَ ليك
سمّاك حديقة
وفيك سرحْ
وكيف الكلام
شايل حروفه ومشتهيك
سمّاكْ حقيقة
|
Post: #26
Title: Re: إعادة (1)
Author: أبوذر بابكر
Date: 08-25-2005, 01:55 AM
Parent: #21
العزيز
آدم العشا
تحياتى وإمتنانى العميق لك
وأزداد أنا زهوا وشرفا بلقياك المبهجة
وتزداد سعادتى ونشوتى بكلماتك المفرحة
فلك المعزة والود والتقدير كله
|
Post: #23
Title: Re: إعادة (1)
Author: أبوذر بابكر
Date: 08-23-2005, 11:01 PM
Parent: #20
العزيز
بدر الدين
يا قمرا تشبث بمنتصف شهره
ليكون بدرا ساطع البهاء وعميم الصفاء
معزة لمحبيه ومصطفيه
نحن الذين نفخر ونزهو بك والله يا بدر
إنسانا وفنانا
تهب الدفء والمحبة والجمال
ابقاك الخالق
|
Post: #24
Title: اعادة (1 )
Author: Ahmed Daoud
Date: 08-24-2005, 05:23 AM
Parent: #1
المطر البهى
ما اروعك ... واروع كلماتك
لك كل الامنيات الجميلة
أحمد داود
|
Post: #25
Title: Re: اعادة (1 )
Author: waleedi399
Date: 08-24-2005, 10:25 AM
Parent: #24
Quote: فى زحمة غناى
طربان مبلل بى شذاكِ
ودمعة الفرح العنيد
روّضْتّى حزن الليل معاى
جيتك وطن
خليت اساى
ومعاكى خلانى الشجن
جيتك وطن
فُتَّ المواجع و الرهق
يا جايه من عمق الألق |
المطـر ..
نتنسم عبير دعاشك .. متعك الله بالصحة
افيض علينا بالمزيد،، فالجفاف قاسـي وصعب المراس
يا جاي من عمـق الالـق
جيتـك وطـــن.........
في زحمـة غـناي
خليت اسـاي ومعاك خلانــي الشجـن
خالص ودي واحترامي،،
ولـيـد
|
Post: #28
Title: Re: اعادة (1 )
Author: أبوذر بابكر
Date: 08-26-2005, 02:40 PM
Parent: #25
العزيز
وليد
تحايا معطرة مثل عبق حضورك
وطيبة طيب معناك
وتقديرى كبير وعالٍ لك يا وليد
على حروفك الندية المبهجة
فلك عظيم الود والإعزاز
|
Post: #27
Title: Re: اعادة (1 )
Author: أبوذر بابكر
Date: 08-26-2005, 01:49 AM
Parent: #24
الصديق العزيز
أحمد داود
وأنا أهديك أعذب ما فى الأمنيات
من جمال
أسعد دائما برفقتك العطر
وتحياتى لك والود كله
|
|