استاذتي عفاف تاور: نوبة الجبال في الجيش الشعبي ، ليسوا بمرتزقة ، و انما طلاب حق عادل

اللسـان جبادة البلا يا عفاف تاور:

الأستاذة عفاف تاور كافي ابوراس ، واحدة من بنات جنوب كردفان/جبال النوبة المتميزات..و هي ناشطة في قضية جبال النوبة و قد الفت فيها بعض المؤلفات..و لقد كأفاتها الولاية بان منحتها الفوز في الإنتخابات التي جرت في العام الماضي ..و ان كانت الأستاذة عفاف تاور تنظر لنفسها مؤتمر وطني .. فمن منحوها المنصب من اهلها الغبش ينظرون اليها كواحدة من بنات الولاية النجيبات اللائي دفعت بهن الولاية للدفاع عن مصالح الولاية و قضايا اهلها..و عفاف تعلم جيدا أنها قبل أن تكون مؤتمر وطني و مواطنة سودانية صالحة ، هي في الأساس نوباوية.. لأن القنطور اصله التراب يا اهلنا..!

كبر

و منذ انتهاء الإنتخابات في العام الماضي.. صمت جميع من ذهبوا الى البرلمان السوداني على اكتاف اهل ولاية جنوب كردفان/جبال النوبة..و كم اصابتنا الحسرة و المغسة..و اولادنا و بناتنا الذين و اللائي ارسلناهم و ارسلناهن الى الخرطوم ليتحدثوا باسمنا.. يغطون في النوم العميق و السكوت الأعمق و هم/هن يطبقون المثل الشهير .. ان كان الكلام من فضة.. فالسكوت من ذهب..و اثبتوا جميعا رجالا و نساءا انهم ادوات مطيعة للغاية و بتسمع الكلام و ما تخربش..!

والحقيقة التي يعلمها اولئك النفر.. اننا مهما اختلفنا معهم في امور السياسة ، الإ اننا ننظر لهم/لهن كرصيد يخصنا و يخدم مصالح اهلنا في الولاية..و عليهم ان يعلموا جميعا (رجالا و نساء).. ان ذهابهم الى البرلمان القومي السوداني ليس هو مجرد ذهاب افراد من حزب سياسي منظم و له و امكانياته..و انما ذلك الذهاب هو ذهاب اهل جنوب كردفان/جبال النوبة..و تلك هي ادواتهم التي يصارعون بها في حلبة صراع المصالح و القضايا..و لكن..!


كبر

بعد السكوت الطويل المديد من نواب و نائبات جنوب كردفان/جبال النوبة في البرلمان السوداني.. خرجت علينا استاذتنا و بتنا و صديقتنا عفاف تاور بتصريح تقشعر له الأبدان ..و يعجل بحدوث الفتنة في الفارغة.. فلقد قالت عفاف تاور للصحف السودانية انها تحذر من محاذير كثيرة من بينها خشيتها أن يستغل ابناء و بنات جبال النوبة في الجيش الشعبي من قبل الحركة الشعبية و يصيروا مرتزقة..!!!

و كلمة (سر الليل) في تصريحات عفاف تاور هو مفردة (مرتزقة ) تلك..و كنا نظن أن عفاف تاور القانونية الحصيفة اللبقة .. تعرف جيدا كيف تقدر لحديثها قبل أن تلفظه و هي السياسية البرلمانية.. فاهل جبال النوبة يا عفاف هم السلسلة الفقرية لسودانك الباقي و هم صمام ألأمام للسودان..و لهم مطالب حق و عادلة.. سواءا كانوا في المؤتمر الوطني أو في الحركة الشعبية.. و كان يمكن أن تقولي عنهم اي نعت يروق لناسك بتاعين نخبة المؤسسة النازية في السودان..و لن تكون لنا معك ايتها مشكلة..لكن تصفيهم باان يكونوا مرتزقة.. فهذه و الله العظيم عوجة كبيرة خلاس..!

غايتو يا بنات ابا تاور حيرتونا معاكم بحكاية مرتزقة دي.. العدل و المساواة ، مثلها و مثل أي سوداني و سودانية بيحلم بالتغيير و يخشوا الخرطوم.. تقوم صديقتنا الجميلة نور تاور طاخ تلصق ليهم بند (مرتزقة)..
و انت يا عفاف.. النوبة المساكين قاعدين في دارهم و بيكاتلوا من اجل حقوقهم و نصرة قضاياهم.. برضك طاخ تلصقي ليهم بند (مرتزقة)..؟!!!!


كبر

فلنحاسبهم بادواتهم ، لو يفهمون:

تخاف الأستاذة عفاف تاور ، النائبة البرلمانية عن دوائر جنوب كردفان/جبال النوبة ، على مصير بنات و ابناء جبال النوبة في الجيش الشعبي..و التي تمكنت من حسابهم و جردهم و معرفة عددهم الحقيقي..و قالت انه خمس و خمسين الف مقاتل/ة..و لكن فات على استاذتنا عفاف .. أن الأرقام لا تكذب..و ان هناك طرق للحساب مختلفة تماما..و كنا نتمنى أن تضع لها حساب و تجربها..و ان كانت اختنا و صديقتنا و استاذتنا عفاف تاور.. تؤمن و تقتنع بالأرقام..و صدقها.. فنحن ( ناس جنوب كردفان الغبش و الذين تنعتين بعضهم بالمرتزقة المحتملين) برضك الحساب ما بيغلبنا ..و الأرقام بنعرف نجيبها من مصادرها و نغالط بيها.. مش يا عفاف قلت عددهم خمس و خمسين الف.. و مافي مشكلة تب.. تعالي نشبعك ارقام حتى تقولي الرووب..و تاني ما تجعجعي بلا فهم..!

كبر

نساء المؤتمر الوطني من جنوب كردفان و اللائي فازن في الإنتخابات* الفاتتة.. ثلاثة.. عفاف تاور..و بثينة رحمة جميل و سامية ادم العشا ( و كلهن من بنات الولاية في المؤتمر الوطني)..و لم تتمكن استاذتنا ام دهب كنده كربوس عيسى من التوفق في دخول البرلمان..و دخلت بدلا عنها اختنا ميري جيمس كوكو انجلو عن الحركة الشعبية بجنوب كردفان..

قائمة المؤتمر الوطني ..و هي قائمة اختنا عفاف تاور.. نالت عدد (221152) من الأصوات..و بتقسيم العدد على ثلاثة مرشحات يكون نصيب كل مرشحة من المؤتمر الوطني هو( 73711).. يعني عفاف تاور نصيبها هذا العدد..اما مرشحة الحركة الشعبية لوحدها نالت (80869) صوت..فهل تريد عفاف تاور ان تقول لنا اللائي صوتن لأختنا ميري جيمس من اهالي جنوب كردفان هن ايضا مرتزقة محتملين.. ام هم اهل حق و مطالب عادلة و يعرفون كيف الإنتصار لقضاياهم؟..ام تريد أن تقول لينا عفاف تاور وكتين الاف مرشحة الحركة الشعبية اكتر من الافي.. يبقى انا البس ليكم جبة المركز و اطلعكم مرتزقة و اقول فيكم ما لم يقله مالك في الخمر..!

كبر


* مصدر المعلومات عن الأرقام و المرشحين/المرشحات هو المفوضية القومية للإنتخابات في السودان.




كبر

نحسب بطريقة تانية يا عفاف.. نفس الإنتخابات الودتك الخرطوم محل الطيارة بتقوم و الريس بنوم..و في دواير جنوب كردفان العشرة و قوائم الأحزاب و قوائم المرأة.. شارك اهل جنوب كردفان فيها و قدموا للحركة الشعبية( 267893 ) صوت ..و ده دعم جنوب كردفان/ جبال النوبة للحركة الشعبية في المنطقة..فهل ديل كلهم يا استاذتي برضك احتمال يصيروا مرتزقة؟..و الحركة الشعبية في جنوب كردفان لم تكن فقط مقصورة على اهلنا النوبة.. بل كثر من مرشحيهم ، استوعبت تجربتهم التنوع في الولاية.. فكان فيها البقاري و الفلاتي و البرناوي و البرقاوي و النوباوي..فهل ديل كلهم ح يكونوا في نظرك احتمال يصيروا مرتزقة؟..


نحسب ليك بطريقة تالتة..في نفس الإنتخابات يا استاذة عفاف.. كتير من ناس جنوب كردفان/جبال النوبة عبرت عن رأيها و ادلت باصواتها ضد المؤتمر الوطني..و المرشحين نالوا جملة( 192221 ) صوت..و هي الأصوات التي اختارت ان تدعم المؤتمر الوطني .. فهل هذه الأصوات لأنها رفضت دعم مرشحي/مرشحات المؤتمر الوطني برضك نقول عليهم احتمال يصيروا مرتزقة؟..


كبر

المشورة الشعبية و ما ادراك ما المشورة الشعبية:

من ضمن تصريحات الأستاذة عفاف تاور.. تحذيرها من ان تصاب المشورة الشعبية في جنوب كرفان /جبال النوبة بفيروس المطالبة بالحكم الذاتي أو تقرير المصير..و احتارت عفاف كيف النوبة المشتتين في المدن السودانية خارج الولاية يقدروا يشاركوا في المشورة.. و كلام عفاف كأنها تقول لينا انسوا موضوع المشورة اياها..و ناسية تماما ان المشورة حق دستوري مثل حقها الدستوري الذي جعلها تجلس تحت ظل البرلمان و تجعجع يمين و شمال..!

المشورة الشعبية حق دستوري لأهلنا في جنوب كردفان و هم مخيرين .. داير يتشاوروا في حق تقرير مصير فهذا حقهم.. دايرين يتشاوروا في حكم ذاتي للولاية ده حقهم..دايرين يشطبوا دستور نيفاشا و يسوا دستور جديد .. برضك حقهم..!!

همسة اخيرة لعفاف تاور و غيرها من اهلنا في برلمان السودان: بدل ما تقعدوا تشتمونا بمرتزقة و بطيخ.. سكوا لينا شوارعنا بتاعة الولاية و محطات الكهربة الغشانا بيها المؤتمر الوطني..غبروا ارجلكم قليلا في مطاردة مصالحنا..بدل ما تقعدوا تعيروا فينا بلا فهم..!!


محمد النور كبر..

مواطن اغبش من جنوب كردفان/جبال النوبة.. يعني مشروع (مرتزقة) بفهم اختنا عفاف تاور..لكن نوهائي ما بيبقى جيش شعبي..!!

عن صحيفة الصحافة السودانية:

Quote: «الوطني» يخشى تحول مقاتلي النوبة بالجيش الشعبي لمرتزقة البرلمان: علوية: طالبت القيادية في المؤتمر الوطني بولاية جنوب كردفان عفاف تاور بتلافي الاخطاء التي وقعت فيها المشورة الشعبية بولاية النيل الأزرق بتحويل المشورة لمطالبات بالحكم الذاتي، وحذرت من استخدام حكومة الجنوب لـ 55 ألفا من ابناء جبال النوبة في الجيش الشعبي ضد الشمال. وقالت تاور في تصريحات بالبرلمان امس ان هناك 55 ألفا من ابناء جبال النوبة في الجيش الشعبي ويمثلون مخزونا استراتيجيا لحكومة الجنوب التي يمكن ان تستخدمهم وتستغلهم ضد الشمال في حال عدم وجود جيرة سلسة وحذرت من ان يصبحوا مرتزقة لا سيما وأنهم سيعتبرون اجانب بالجنوب، وشددت على ضرورة بحث اوضاعهم واعادتهم للشمال، قبل ان تصفهم بالغبش. وطالبت تاور بحملات تعبئة بولاية جنوب كردفان لتلافي الخطأ الذي وقعت فيه المشورة بولاية النيل الازرق وقالت ان المشورة في الاخيرة وقعت في خطأ كبير وزادت «يفترض اي شخص صوت لحكم ذاتي او تقرير مصير يسقط صوته»، وقطعت بأن المشورة واضحة لا تعني استفتاءً ولا تقرير مصير ولا حكما ذاتيا. واكدت ان هناك استفهاما كبيرا حول المشورة الشعبية بالولاية لاسيما وان القانون لم يحدد مصير ابناء الولاية في الولايات الاخرى، مشيرة الى 29 ألفا من ابناء الولاية في نهر النيل وعدد مماثل في القضارف وبورتسودان وعدد اكبر في النيل الابيض، وتساءلت عن الكيفية التي سيصوتون بها وشددت على ضرورة ان تجاوب مفوضية المشورة على الاسئلة حول ان كانوا سيفقدون حقهم في التصويت أم سيسجلون في مناطقهم أم تتم لهم عمليات عودة للولاية؟.

كبر

هؤلاء يا ول أبا كبر

الأن هم كمبارس .. أما بعد الأنفصال مرتزقة رأسهم عدييل ..

تحية خالصة لبنات أبا نور تاور وعفاف تاور .. وكل أبناء هذه الأسرة التى أفرزت قيادات فذه سواء فى الجيس أو السياسة


بريمة

كبر سلام
والله ما قصرته واوافيت النصح لاختك بنت ابا تاور كافي
علها تتبين الحق.

شكرا لك.

سبحان الله يا كبر يا اخوي
بين تنوالك وتناول بريمه لنفس الامر؟؟؟
يبدو انه اختنا عفاف تاور ليست الوحيده الراميها جمال
بريمه ده طوالي واقع من الجمل!!(هههههههههه)
مرتزقة جدد أم كمبارس قديم: أبناء النوبة فى الحركة يتحولون إلى حصان طروادة.
نقول يا لطيف بس!

ول ابا بريمة..حبابك
كل سنة و انت طيب با بريمة..

اختنا عفاف تاور رمت ليها سالفة..و ح تتبعها لغاية القبر.. لأنها زولة في موقع عام..و المواطنين البتدافع عن مصالحهم في البرلمان و بتتحدث باسمهم.. لا فرق بينهم البتة.. دي واحدة..

الثانية.. مواطني جنوب كردفان/جبال النوبة ..هم اهلنا.. نوبة..ولا فلاتة..ولا برنو..ولآ برقو..ولا بقارة..يكونوا مؤتمر وطني ياهم اهلنا.. يكونوا حركة شعبية ياهم اهلنا.. يكونوا بعثيين.. ياهم اهلنا.. يكونوا اتحاد اشتراكي ياهم اهلنا.. يكونوا كجور ياهم اهلنا.. يكونوا ميضنة.. ياهم اهلنا.. و نهائي ما بنرضى لزول أو زولة يشتمهم..عفاف تور غلطانة بوصفهم ..و انت غلطان بوصفك..و زيادتك في الردحي..

ثالثا.. تحقيق المصالح العامة و نصرة القضايا .. صحيح بيمر بمنعطفات كتيرة و منعرجات مريرة للغاية..و ممكن تسبب غلـــوطية على كتير من الأفراد.. لكن حقو دايما نعاين للصورة الأكبر..اذا الحركة الشعبية ارتكبت غلط في شخصك و في شخص عفاف تاور.. فده ليس بمبرر بدحض خيار الغالبية..و في البوست المكتوب قبال بوستك هذا جبنا ليكم الأرقام..و ارجعوا عاينوا ليها كويس و ابدوا بعد داك النضمي..حراك الواقع يقول.. الحركة الشعبية في جنوب كردفان يدعمها البقارة و النوبة على قدم المساواة..و ديل اوعى مني و منك..و انتصروا لخيارهم..و حتى لو اختلفنا معهم.. فحقو نعاين ليهم باكبار.. لأنهم سلوا ايدهم و دعموا خيارهم من غير وصاية..!


لو فاكر انت او اختناعفاف تاور أو بقية ابواق مؤسسة النازية السودانية ممكن تشطبوا الحركة الشعبية من الوجود في جنوب كردفان.. احسن تبدوا بينا نحن ناس قريعتي راحت ديل..و صدقني لو بقت في الكلام الشين بنقع قبال الحركة الشعبية ما تسمع بالدوسة*..!

المهم يا ولد ابوك.. نتخلف في امور السياسة لكن كمان ما نشتم اهلنا ساكت..و مرتزقة دي شتيمة كبيرة يا بريمة..ياخي نحن بتاعة احداث 1976 لغاية هسع قاعدة فينا محور..تجوا انتو تاني دمنا و لحمنا تقولوها لينا..طيب التانيين يقولوا لي شنو؟..

اما الأمية..زي ما قالت ليك اختنا تراجي.. النبي الكريم امي..و راعي كمان..يبقى يا صديقي هنا انت متهم بانك ناقص دين..و لو فكيت درب النبي و سيرتو.. يبقى كمان قول لينا..!

التانية يا بريمة.. النوبة القاعد تنعتهم بالأمية ديل مش ياهم المنهم المرحوم يوسف كوه القعدت انت بريمة ده شخصيا في فصولو و علمك لمن عرفت حاجة في الدنيا دي..و المثل بيقول من علمني حرفا صرت له عبدا..فيا صديقي دعك من لغو الحديث.. اختلف ..و ادعم خلافك بالحساب زي ما اختلفنا مع اختنا عفاف تاور..و في الجد اتذكر انو القنطور اصلو تراب..!!


هسع ده.. انت و عفاف تاور.. مش ممكن ببساطة تتبنوا ليكم حملة ايجابية و تطالبوا الدولة السودانية باستيعاب الناس ديل و جعلهم جزء من المجتمع؟..و يعني غالبكم تقيفوا معاهم و تقولوا للحكومة السودانية الناس دي اتمردت لأنو في اسباب جذرية للتمرد..و حقو نقعد تحت في الأرض و نشوف المظالم دي و نحلها عملا بمبدأ سد الذرائع؟..

الحقيقة في الواقع يا بريمة.. ان اكتر من ربع مليون دعموا الحركة الشعبية في جنوب كردفان..و ده واقع يا اخوي لا يجب أن نسعى لمحوه.. لأنه واقع كبير..و يجب أن نستوعبوا صاح..!

كل فعل و ليهو رد فعل مساوي ليهو في المقدار و مضاد ليهو في الإتجاه..و قبل كده محمود حسيب ساق ليهو سبع و خمسين نفر من تالودي و قال ماشي يعمل بيهم انقلاب في الخرطوم.. اها هسع لو الخمس و خمسين الف ديل قاموا منهم تلاتين الف ساكت..و دقشوا الخرطوم.. اختنا عفاف تاور دي تسوي شنو؟..ولا تودي وشها وين؟..


المؤتمر الوطني ورلو صقع و قطرو صفر..فهي شدرة هلكها السوس..و احسن تمسكوا في شدرة الصمود(الشعب/الناس/الأرض)..و هي متل شدرة ام سروج.. لا ارضة ولا هوايل زمان بتاكلها..!!

الفتنة خلوها تجينا من غادي.. لكن من اهلنا.. فحقيقي اشد الظلم ظلم ذوي القربى..!

و دمت يا بريمة..

كبر


* و عشان ما يجي واحد/ة يقهمنا في محلنا ويقول لينا الليلة كبر مركب مكنة حركة شعبية.. بنقول ليكم ايوه كبر مركب مكنة اهلو في جنوب كردفان/جبال النوبة..

تراجي..حبابك يا صديقة

كتر خيرك على المرور من هنا..

الشباب ديل.. لسع من زمن نحن في السودان نهوى اواطانا..و ما دروا أن (اوطانا) مرقتها في ام طرقا عراض..!

اها نسوا شنو عاد.. نقعد نصارع غادي..ولا نقعد نستعدل ناس البيت؟..

تجينا من منو ولا منو؟..

الموضوع بقى فرز كيمان بالباب العديل..و اهلنا ديل بالصبر و الحجة ح نوصل ليهم الرسالة..!

و دمت يا صديقة..

كبر

Quote: مرتزقة دي شتيمة كبيرة يا بريمة..ياخي نحن بتاعة احداث 1976 لغاية هسع قاعدة فينا محور..تجوا انتو تاني دمنا و لحمنا تقولوها لينا..طيب التانيين يقولوا لي شنو؟..

غير التضامُن ما عِندنا ليك يا خوي يا Kabar شيتًا تاااااب أنا أخوك..