Post: #1
Title: سيناريو الغموض
Author: Kabar
Date: 04-24-2003, 10:56 AM
Parent: #0
(1)
واحد..واحدة
***
عندكم غنم؟
ايوه عندنا غنم
عندكم كلب؟
ايوه عندنا كلب
عندكم كديس؟
ايوه عندنا كديس
عندكم زهور؟
ايوه عندنا زهور
لونها أحمر؟
ايوه لونها أحمر
طيب ممكن تقطعي واحدة عشان خاطري؟
الغنم هي البتقطع الزهور
طيب ممكن تشميها؟
الكلاب هي البتشم الزهور
طيب ممكن تلعبي بيها؟
الكدايس هي البتلعب بالزهور
اقول ليك حاجة؟
ايوه
Go to hell
هل علامة استفهام
ستارة
(2)
قاضي..واحد..واحد تاني
***
قاضي.الحاصل شنو بالضبط؟
واحد..عارف يا معلم.كنا انا والفردة ده قاعدين ندق الحنك..قلنا نعمل عشة الفلاتية..قمنا عملنا عبد العظيم حركة عشان نعمل عشة الفلاتية..في طرف الشارع رفرف نحل..الفردة ده قال لي النحل وصل..قلت ليهو النحل فيهو العسل..عمل عبد العظيم حركة في اتجاه النحل..في الأول النحل جفل..اديناها صنه..الفردة ده قال لي نقرا جريدة اخبار اليوم..قلت ليهو انت من زمن الجرايد..الجرايد صقعت يا فردة..جربنا المكنة الحارة..
حق الله بق الله..شيلدق..شيلدق..تب ترب..المكنة شالت..بعد شوية..النحلتين بلعوا الكورة..عشان كده اهو نحن في نظرك يا معلم
قاضي..وانت يا فردة رأيك شنو في كلام الفردة ده؟
واحد تاني..مظبوط يا معلم..كلام زي الأصول
قاضي..طيب ..هل كان عندكم علم ان النحل عندو ابر؟
واحد..واحد تاني..بصوت واحد..عارفين يامعلم
قاضي..طيب ما دام عارفين وكلو تمام ومظبوط كلو واحد فيكم ياخد مية ابرة..يللا اتلحسوا من قدامي
واحد..قال شنو المعلم ده؟
واحد تاني..تشرب الهوا وتفحط
ستارة
ونلتقي
|
Post: #2
Title: Re: سيناريو الغموض
Author: almulaomar
Date: 04-24-2003, 11:40 AM
Parent: #1
أخي كبر
تحياتي
لا أستغرب هذا الكلام من رجل مدهش مثلك ما أنفك يتلاعب بالكلمات إن شئت ليمتعنا بالدهشة أكثر من مرة في المرة الواحدة .
لك تقديري كبر
|
Post: #3
Title: Re: سيناريو الغموض
Author: Elmosley
Date: 04-24-2003, 12:06 PM
Parent: #1
ياكبار والجماعه ديل بعد عملوا عشه الفلاتيه
مالقو زول يعمل ليهم يوسف الموصلي لي بيوتهم؟
|
Post: #4
Title: Re: سيناريو الغموض
Author: almulaomar
Date: 04-24-2003, 12:29 PM
Parent: #3
خطير يا فنان والله. وبرضو عندنك دكتواره في لغة الرندوق برغم طول الزمن وبعد المسافة عن جامعات ومعاهد الشمس المحرقة يا موصلي.
|
Post: #5
Title: Re: سيناريو الغموض
Author: أبكر آدم إسماعيل
Date: 04-27-2003, 03:59 AM
Parent: #4
كبّّر يا خوي
أنا غايتو ما حأقول ليك مبدع
ولا رايع
ولا أي حاجة من ديل
لأنك مش محتاج ليهم خالص
بس قول لي، قالب الهوبة دي كدة مالك؟
تكون متغدي بـ(ملاح كول) ياربي؟؟
ولاّ ناس (حي المطار) جروا ليك سلك طوييييل!؟
بعدين يا حضرة الملا عمر
وموصلي
تخيلوا الجماهير دي!!؛
الكلام دة كله فات فيها ساي!!؛
لحدي هسي 38 واحدة وواحد بس القروا الكلام دة!!؛
غايتو أنا متأكد إنو لا تماضر ولا أبحراز ما من الـ 38 ديل
|
Post: #6
Title: Re: سيناريو الغموض
Author: doma
Date: 04-27-2003, 06:30 AM
Parent: #5
لول يا كبر طبعابتكون قاصد اني اسطح لانك عارف اني بداوم علي قراءتك وحاتك في القاضي والزولين ديك طلعت ذي ما دخلت
|
Post: #7
Title: Re: سيناريو الغموض
Author: أبنوسة
Date: 04-27-2003, 07:48 PM
Parent: #6
آه أخي كبر
شكرا لك
وأنت تنقلنا إلى هامش نجرده حتى من إبداعه، ونتحجب بالدهشة عند نكتشف خطل رؤانا
ومازالت بذاكرتي تلك الشماسية التي تمسك بالفحمة لترسم جسم إنسان لا يستطيع كل طلاب وأساتذة الفنون، وبما تأتى لهم من دراسات في علم التشريح وحركة الظل والضوء
أن يأتوا بمثلها.
يا ترى أين هي الآن
الموصلي
حلوة
أبكر
أختك برضو فقرية
الخالة الحلوة
دوما
واحشاني، الجماعة ديل نتاج زمنا كريه،
ملأه جيل بالأنانية.ه
فطحنهم دون أن يلتفت لهم إلا بقدر ما يكفي لغسل سياراتهم
و جمع قاذوراتهم
|
Post: #8
Title: Re: سيناريو الغموض
Author: Kabar
Date: 04-28-2003, 07:42 PM
Parent: #1
العزيز..مولاي الملا عمر..حبابك يا اصيل
كتر خيرك
صدقني كانت لحظة لا تستطيع العبارات احتوائها..لكنها كانت..وربما غلغلت مسام الصمت فكان هذا البراح المسكون
دمت
كبر
|
Post: #9
Title: Re: سيناريو الغموض
Author: Kabar
Date: 04-28-2003, 07:47 PM
Parent: #1
استاذنا المبدع ..مـوصلي..حبابك
وكتر خيرك ..
لكن اقول ليك جدجد كان عندنا عازفة كنجة ظريف جدا في مدينة الدلنج اسمو حسن حملون..
وليك باقي السناريو..خليك قريب
ودمت
كبر
|
Post: #10
Title: Re: سيناريو الغموض
Author: Kabar
Date: 04-28-2003, 07:52 PM
Parent: #1
سجيلي العزيز..ابكر ادم..حبابك
مدهشة جدا هي طفلة المداين..سيدة القرى
وما بين سبر وسبر..تـمتد أسبارها قصائد لا تنتهي
ليك الود
ودمت
كبر
|
Post: #11
Title: Re: سيناريو الغموض
Author: Kabar
Date: 04-28-2003, 07:57 PM
Parent: #1
العزيزة ..دوما..حبابك
على قول ابنوسة..انتي من زمن جميل..وده من الزمن الجميل
بس حبة مباصرة والحكوة ح تقع ليك من الألف للياء
ودمت
كبر
|
Post: #12
Title: Re: سيناريو الغموض
Author: Kabar
Date: 04-28-2003, 08:01 PM
Parent: #1
العزيزة أبنوسة..حبابك
نعم..ولازالوا هم افصح وادق..ولهم قدرة باهرة في اقتصاد الكلام..
نعم..ولازال شعبنا الحبيب يمارس ضحكه على الـمتطنقعين
ودمت
كبر
|
Post: #13
Title: Re: سيناريو الغموض
Author: Kabar
Date: 04-28-2003, 08:40 PM
Parent: #1
ما تبقى من السيناريو
في يوم تاني كان الفرد قاعدين في كافتيريا في انتظار النحل..مرت ساعة ساعتين تلاتة..الظاهر النحل عمل ليهم شرحبيل..الفرد عملوا محمد مسكين..طق اتذكروا انو عندهم صاحبا ليهم عامل عقد الجلاد..الفردة الأول قال للتاني يللا نعمل عبد العظيم حركة..في محطة المواصلات التاني قال للأول قح القحة الكبيرة..الأول قال للتاني وعزة الخالق انا عامل الكاشف..وانت قاعد تسوي شنو؟التاني قال ليهو انا عامل الدكتور علي شلش..قال خلاص نتطلع اول الشارع..ظهر واحد مبروك راكب حديدة شديدة شدة الحرامي السرق التلفزيون وكت المسلسل..قال ليهم كيف ياشباب..قالوا ليه تمام ..بس عندنا صاحبنا عامل عقد الجلاد والمواصلات قيلت..قال ليهم خلاص انا اعمل ليكم يوسف الموصلي..بس نغشى الطرمبة ديك نكب شوية جاز..في الطرمبة فجأة طبوا عليهم ناس امونة سليمان..قال ليهم يا شباب دقيقة..الفردة قال للفردة التاني..نعمل جاري وانا جارو..التاني قال ليهو انت داقس..واللـه ديل بوبي قارد..من هنا وبيت البعاتي طوالي..الظاهر ناس امونة سليمان سمعوا طرف الوسوسة..قالوا للفرد انتو و صاحبكم ده عاملين فيهادايرين تعملوا مشيل عفلق..وعازين تعملوا للحيط روج كمان؟ يللا قدامنا..قام الفردة التاني قال ليهم يا شباب واللـه الشاب ده عاوز يعمل لينا يوسف الموصلي
ساكت..نحن والله لا عاملين فيها ميشل عفلق ولا محمد ابراهيم نقد ولا حتى حامد بريمة..ناس امونة سليمان سدوا دي بطينة وده بعجينة..وعملوا نايـمين..وبعد شوية قام الفردة الأول قال للتاني..والله ديل عاملين فريد الأطرش..يافردة ما في طريقة الا نعمل تسليمة نسرين..
***
وحتى اللحظة لم تنتهي دقيقة ناس امونة سليمان
|
Post: #14
Title: Re: سيناريو الغموض
Author: zumrawi
Date: 04-28-2003, 08:58 PM
Parent: #1
تمام التمام
|
Post: #15
Title: Re: سيناريو الغموض
Author: Agab Alfaya
Date: 08-29-2003, 07:55 PM
Parent: #1
فوق
|
|