Post: #1
Title: كضاب يا نبي الشوق.. الى دومه..بت قضيم..توما
Author: Kabar
Date: 10-19-2003, 08:33 PM
حاول أبتر من جواك مفاهيم تبرجك الذاتي ، وألبس ليك قناع ظلمة ..ولمن ترحل في دروب الضو..اتذكر انك من تاني ح ترجع لصلب الضلام..
بينساك ثغر النجوم وكتين تضيقو بيهو اسرار النشوة المريبة..بينساك صدق الفراش لمن يمجد ملامح عشقو لارتجاجات اللهب الجموحة..
مداراتك يباب ، وحزنك يا مسيكين جواز الرجوع لغابات الحلم القصية..وذاتك موبـوءة بتقاسيم وجود معناهو السراب..والخطوة تاهت بيك في مرافي الهم السايبة..والعوينات الصدفة بانت في دربك ، حتى هي نشوانة بشكل الرتابة..كيف تقدر تخلق في الناس معاني العشم والحضور في نبض زمن اصلو باكر؟..كيف؟
غنيواتك نشـاز..وصليواتك ترانيم كفر بتزعج كتير ايمان الناس الخانت كلمات الرب..
بتجيك من وين تباريح الخروج ، وحروفك النديانة بتموت في دواير السمع الطرش؟..
اعترافاتك ، كانت بداية اهتزازك وسط مياسم الضجيج..وسط بحيرات الزيف الممدودة لاخر الرؤى..وحنينك كان اسفار كضب بتتلوها الريح لهامة نخل مغرور بقاماتو السراب..حنينك كان قصة الخوف المعذب باوجاع اللقيا..ومن وين بتبداك قيامة الوضوح ونارك بتحرق تفاصيل منامك بالسهر؟..من بيبداك المروق ودمك موسـم بشقى الحزن وملامح لعنة ممدودة في خاطر الزمن..
غناك نشـاز
صـدقني ..غناك نشاز
وصوت وترك ترانيم الوهج القبيل عمر خاطر الارض بالوضوح..
كضـاب يانبي الشـوق..كضاب
كل الدروب النورت بيك ..كانت خطيئة السراب وكتين ضاجع ذاكرة النسيان وجابك في سر اللحظة المنسية سلالة تعب..
كضاب..كضـاب
لو كان وطنك ..كلمة حلوة موسومة في خاطر عيون حلوين..غرقانة في نبع الشروق وتضوي وكتين يعم رؤاك طعم الضـلام..كان وطن..
ولو كان زمنك ، زفة مواعيد منزوعة من نزق الظروف..تريانة بالامل الحنون..مجدولة بالضي السلام ، كان زمن..
وخاطرك النزف بترانيم صدقك في صدر الاماسي المجنونة، الاماسي المخبولة بعرق الزحام وتباريح الطنين ، كان خاطر مضبوح بالوجع..
حداك ذاكرة الزمن المر مقسومة بين شطرين..شطر انك تجي رسالة كضب مبثوثة في جنح الكفر الذليل..وشطر انك تقدر تكون في ذاتك شكل مليون قناع..
كضاب..كضــاب
حاول مارس موتك في عذابات ضناك..او قول مارس خوفك من خطى الليل السدت مناكب المدى بالجور..وحدد ملامحك ..الزمن اللجاي كلو خوف..صدقني كلو خوف..
أقــراها تعابير تفاهتك في مراسيم الطرقات الخاويةوكل مزابل النسيان..و أقراها تعابير سذاجتك في ضحكة العمارات اللي عانقت كتف السـما ونزفت شكل الغموض على دربك قمـامة..
أقراها تقاسيم لونك ..في عيون ما قدرت تدخر ليك غير التردد والتماهي في احترام الواقع البليد..
كضــاب يا نبي الشوق..كضاب
تفاصيل خروجك ، كانت مكتوبة في ذاكرة الخطى منذ الأزل..لكن قيـدك كان عظيم..و حماك حضرة المروق..
سـمح جدا مدار متاهاتك..
سمح جدا تقليدك واحترامك لخوفك..
ماتت فيك يا مسيكين ابتهالات الضحكة الغنا..وضاعت منك بدايات الخروج..
راجع ذاتك ..ومارس جواك حكاية انك تبقى ذات في بحر الرفض..وأرفضــني معاك..
ألفظ وهمك في قلب الخليج..
أبقى دافي في بدايات شتا الحزن اللجاي..
ابقى راسـي في وش العواصف المهزومة برغبة السفر اللعين..
كضـاب يانبي الشوق..قلت ليك كضـــاب
شمسك غارت في حضن الضلام ..واختارت شكل البقاء في جرار الغيب..ودابت في عصر المدينة المسكونة بالكلامات الطنين..
وقمرة خطاك ، اغـواها الرحيل في خاطر الكون السحيق..
و جاتك رايات الشجن ترفرف في كرنفال سلطان جاب شوارع النمل الخفية ووطـاك بحافر السياسة..وخلاك مجدوع في زقاقات الجوع..
كضـاب..كضاب
البرق الحـداك لمع..كان فلاش السراب..و النجم الضاحك خاصرة رؤاك ..كان دبورة تلمع فوق كتف الوهم..
كضـاب يا نبي الشوق..كضاب
ألبس سوادك..
واحترم شكل اختيارك..
خليك صادق في طعم نبضك..
ومارس نداك في جزاير الحلم النائية
قــولني معاك..
و قـول ليها..
يا اميرة الخـوف..مولاك ركع في بساط دمك..وكتب جواك خاطرة نادرة..
قـولني معاك يا نبي الشوق..
و من تاني قول ليها..
مــولاك حزم مزامــير الفرح..وشـقى عصـا الطاعة على صـولجانات الحزن..
وجـاك ..
مرة..
لكـنو..
في ذاتك..
كان..
ســــــرآآآآآآب..
كبر
امدرمان..20 تشـرين اول 1994
|
Post: #2
Title: Re: كضاب يا نبي الشوق.. الى دومه..بت قضيم..توما
Author: Kabar
Date: 10-20-2003, 08:26 PM
Parent: #1
up
|
Post: #3
Title: Re: كضاب يا نبي الشوق.. الى دومه..بت قضيم..توما
Author: HOPEFUL
Date: 10-21-2003, 00:58 AM
Parent: #2
الأخ ابا
قولني معاكم .. وقول ليك .. أنك فوق رائع بحبتين وزياده
وما تقول لزول إني جيت قبال المعازيم
تقول شنو شناة طبع .. في حب الجمال
وشيتك دا جميل .. فوق المحال
تشكرات
|
Post: #4
Title: Re: كضاب يا نبي الشوق.. الى دومه..بت قضيم..توما
Author: Kabar
Date: 10-21-2003, 08:16 AM
Parent: #1
صــديقي..هــوب فل..حبـابك
واللـه انا ما ابا..
شــكرا يا حميـم..واكيد ح نقولك معانا
ودمت
كبر
|
Post: #5
Title: Re: كضاب يا نبي الشوق.. الى دومه..بت قضيم..توما
Author: بت قضيم
Date: 10-21-2003, 10:18 AM
Parent: #1
مازالت الدهشة تأكل لساني فتحيله عاجزا عن شئ إلا التناحة حيال هذا الجمال المبدع
وحتى تزول التناحة اسمح لي أن اصمت واعود بعد حين للتعليق
يخليك يا كبر
|
Post: #6
Title: Re: كضاب يا نبي الشوق.. الى دومه..بت قضيم..توما
Author: doma
Date: 10-22-2003, 08:29 AM
Parent: #5
سجدت طويلا امام المحراب لفني صمت الخشوع يا عاشق الحزن النبيل ما اجملك ايها الصفي الابن كبر ليك ملايين التحايا وكل الحب
|
Post: #7
Title: Re: كضاب يا نبي الشوق.. الى دومه..بت قضيم..توما
Author: Kabar
Date: 10-23-2003, 06:43 AM
Parent: #1
صـــديقتي بت قضيم..حبابك
كتـر خــيرك..ياريت القصـة تـكون عجبتك..والى ان ترجعي..ليك وردتين..وما تبقي من ارتشاح الندي
صــديقتي دومــه..حبابك يا صفية
كتر خيرك على التواصل..اليوم اكملت لكم ما تبقى من الحزن..ليك كل الفرح
ودمتن
كبر
|
|