الــسـلام ـ للسـودانيين فقـط

(1)
واحد ايام ندوة امبو سنة 1989..في المحطة الوسطى الخرطوم..يسـأل الناس عن السلام..
اقترب من احدهم قائلا..رأيك شـنو في السلام؟
رد عليه..السلام اسم من اسماء اللـه الحسنى..

وفي سنة 2003.."بعد اربعطاشر سنة"..وفي نفس المكان..المحطة الوسطى الخرطوم..
واحد بعد جهد جهيد..دخل الحافلة..وبعد ما اتوهط..حاول يعمل فيها ظريف حبتين..سـأل الركاب قائلا.. يا اخوانا السلام ثبت ولا لسه؟
رد عليهو واحد زهجان قائلا..وين مع سحب الغبار دي؟
علق واحد أزهج ..متسائلا..طيب لو غم علينا نعمل شنو؟

(2)

سـألتني واحدة سودانية في بلاد بره قائلة:وهي ندوة امبو دي الحصل فيها شنو؟
اجبتها: في الحقيقة ..كان في جماعة من عندنا..بطيبة اهلنا ..حاولوا يقربوا وجهات النظر مع الحركة الشعبية..
ولمن جـوا راجعين..قام وزير الداخلية بهمة ونشاط خطاهم في السجن ..بعد ان وصفهم بانهم خونة..مارقين..اذيال العمالة..
وبعد شهر قام هو بذات نفسه مشى لناس الحركة..
قاطعتني قائلة: عشان يقرب وجهات النظر اكثر مثلا؟
قلت: اكتر من كده بكتير..شال معاهم البندقية..لأن الظاهر عليهم شيلة البندقية بقت تقيلة عليهم..!!
مطت شفتيها..وزامت باستياء..وصفرت صفارة طـويلة..
ثم قالت:آل الكلاكلة آل

وللحكوة بقية

كل سنة وانتو بخير
كبر

الأخ كبر تحياتي وأسمي التهاني بمناسبة الشهر الكريم

يا أخي نحن بلا المكابرة والمزايدة دي الودانا التوج شنو , تلقي ناس قاعدة تنظر لمن تكون يدهم في الموية وضاربهم الهمبريب ولمن يمسكوا ويضعوا يدهم في النار تبقي ليهم حارة بالحيل . وبعد شوية تلقاهم حولوا مائة وثمانون درجة في موضع آخر . وهنا يثور سؤال المصداقية وحسن النية فيما هم قائلون وفاعلون من موقف إلي آخر . والضحية وطن مدود علي الجمر وإنسان يعاني .



بحيراوي

العزيز كبر...السلام عليكم بقدر يكفينا شر وزير الداخلية و لا دى كمان فيها عمالة؟؟؟
و السلام عليكم سلام لا يثير غيرة رئيس وزراء اى من العهود و هلما جرة
و سلام لا يزج بكبير اخوانه فى الحبس...ليتناه الثعلب الصغير بعد حين عندما وجد الصياد يحول بينه وبين الدجاجات السمينة التى لا يمكنه العيش بدونها برغم ارتفاع نسبة الكلسترول و رحلات العلاج السرية ..بالمناسبة لماذا يخبى زعماؤنا شيبهم و مرضهم ؟؟ اترى ذلك لعلمهم بان عجزهم الفطرى لا يسمح لهم بابداء مظاهر عجز اخرى ؟؟؟

UP

صـديقي البحيراوي..حبابك..لينا طولة..
كتر خيرك..وزي ما قال مثلنا الفصيح..ما بتموت على لونها الا جدادة الوادي..
و قوة العين اكبر ثابت في ثوابت السياسة السودانية..


صـديقي نصــار..حبابك
طبعا اخر الطرائف سعي بعضهم الجاد لحذف قصيدة الثعلب والديك من منهج المرحلة الابتدائية..خصوصا حكاية كذب من ظن يوما ان للثعلب دينا..
اما قصة عامل السن..الغريب لغاية الآن هناك من يغازل الوزارة والامارة بقوله..راعي حرماني وعامل السن..
فقط يا ريتهم يعرفوا اننا بدينا نتذكر بوضوح


صـديقي ..ابو الزفت ..حبابك
كتر خيرك..على رفع البوست..
الغريبة واحد قاعد جنبي ..علق على اسمك..قائلا خلي بالك الزول ده زهجتو الحروف ما تقدر تشيلها..
ودمتم
كبر

العزيز كبر مساء الأرواح المعلقة في فضاء الكون منجذبة

يا أخي والله في الزمن دا . جدادة الوادي زاتها قد لا تموت علي لونها , يعني ممكن تموت ممعوطة ولا غرقانة ليها في زفت ولا طاردة جدادة الحلة وماخدة لونها


بحيراوي

صـديقي البحيرواي..حبابك
واللـه ضحكتني بقصة غرقانة ليها في زفت..
طبعا جدادة الوادي اتعلمت استراجيات كتيرة..لكن ممكن تحصل ليها نفس الاحتمالات..
احد الاصـدقاء علق على تعليقك قائلا..لازمنا تجديد امثالنا لانها ممكن بسهولة يتم تفنيدها..يعني ما بتقدر تصبر على حكاية
الcross-examination
كتر خيرك..
ودمت
كبر

سلمت أخي كبر في المنافي والزيفة

تعرف أمثالنا فعلاً محتاجة لي مواكبة . مرة في الجامعة عندما كان أبو زوايد أقرب لي ناس الجبهة الديمقراطية قبل ما يبدل جلده كأي أبن آدم مع ناس الإنغاذ . رجع بالليل ومعاة بعض أصحابو من الجبهة الديمقراطية للبركس وفي نجيلة داخلية كسلا وجد الجميع إستلحف , بعدين ناس الجبهة الديمقراطية نادوا علي جماعتهم تعال يا فلان نوم بي هنا وتعال إنت نوم بي هنا , إلا أبو زوايد ما لقي لية زول يعبرو قام قال ليهم يا جماعة الما عندها ضيل يحاحي ليها ربها . قام واحد من أصحابو قال لية هو لو ربنا عايز يحاحي ليها كان خلق ليها ضيل , أمشي يا زول جيب مرتبتك وتعال .

ودمت صاحب الجنزير التقيل


بحيراوي

صـديقي البـحيراوي..
واللـه يا زول كـسلا دي منها جـفلة..
واللـه يطـراك بالخـير..وأبـوزوايد قول ليهو أم جركم ما بتآكل خريفين..
الـمواكبة واجب..من سـلة النعال لغاية كرسـي الوزارة..و النـي برجـع للنار..
كتر خيرك
دمت
كبر

.