شراب النوني دواء التفكير .. ويا الحرموني شوفتك

سلام يا حبان
يعلم الله لا حفاء لا جفاء

لكن عالم هو عالم السرائر بالداومة التي وجدت نفسي فيها..المهم ما اشغلكم/ ن بحكاوي وحزاوي على قول اهلنا ناس اليمن. لكن اقول ليكم / ن باختصار .. حالي مع البورد والنت عموماً كانت قبل تلاتة اربعة شهور كدا، بعبر عنها غناء السقيد " ظروف تابا تسمح نغرد سوا " وكنت كلما اسمع الاغنية دي والحصلت عليها ضمن كاسيتات اخرى للسقيد ، يعود فضل حصولي عليها إلى هذا البورد ، اللماني في صاحبي الرسلو وبقية صاحباتي واصحابي الذين تبعثرو في كل وادي .. المهم الحالة اطورت هسي وبقى التصفح زااااااااتو في مشكلة .. ودخلنا في غناء ناس حسن عطية ويا الحرموني شوفتك ..
قبل غيابي القسري .. كنت كلما افتح البورد يطلع لي الاعلان العجيب داك بتاع شراب النوني دواء السرطان والجلطة والكلي والاغرب في الاعلان انه دواء التفكير ، بالمناسبة الاعلان دا مشى وين ؟
كنت في الاول بتغاظ من الدواء السحري البشبه شغل الفكي المستهبل العندو سفلي دا
لكن هسي ، كايسة لي طريقة تلمني في شيخ النوني دا كان يشوف لي دواء لعوارض النت الاتلحتني دي ، وما باين ليها فرج قريب.
وهذا بمثابة اعتذار لكل الناس الفقدت غالي ولا حصل ليها مكروه، وللناس الحصلت ليها مناسبة حلوة . وللناس الشاركت في واحد من بوستاتي المخستكة وكانت منتظرة رد.
سوف اغيب الى ان يجد لي شيخ النوني حل .
لا أعرف كيف سيهبط الحل السحري ..ما اعرفه واحسه طعم الفقد لكل جميل هنا .. الاصدقاء والصديقات القدامى الذي استعدت صلتي بهم / ن بعد انقطاع دام سنين .. العلاقات الجديدة الجميلة التي كونتها هنا .. ما ينشر من مفيد وجديد وجميل وممتع بحق .. سمح لي بجمع مادة كتابين ..
لكن
الله غالب
ودعواتكم / ن
والعفو في العافية

بس اهم حاجة فى الدنيا دى طلتك
طولنا منك شديد يا امانى وليك وحشة.

Quote: كايسة لي طريقة تلمني في شيخ النوني دا كان يشوف لي دواء لعوراض النت الاتلحتني دي ، ما باين ليها فرج قريب

الدوا دا فى الحقيقة باقى ليك مسكت توكيلو انا, بس عايز اعرف

هى المشكلة فى النت ولا فى الكمبيوتر؟؟؟
غايتو اذا كانت فى الاخير , ماعندك مشكلة , نرسل ليك واحد بس عايزين العنوان,
ولا اقول ليك ممكن اوديهو لى بت اهلك جميلة,, اها قصرنا معاك؟
دا كلو عشان تكونى مواصلة بى جاى ونغنى ليك : فرحانة بيك كل النجوم

اها مبسوطة؟

تحياتى الى الشفيف تراث!

ودرفاعة!

ازيك يا بكوري
والله شوق شديد

انت زاااااااااتك غنيَنا ليك : يا المنك طولنا طول

قت لي اخدت توكيل دواء النوني ؟
يعني بقيت مليونير .. انت بس رسل لي كمين اخدر كدي وانسى قزازة الدواء
الباقي بعالجو برااااااااااي

Quote: انا, بس عايز اعرف هى المشكلة فى النت ولا فى الكمبيوتر؟؟؟

المشكلة يا اخوي في الوقت ، زمان كان في مساعدين عشان يوفر ليك وقت
هسي يا كافي البلا اداقس من التكل للغسيل للكوى لقراية الشفع لمناسبات الجيران
وحاجاتي البريدها كلها راحت في حق الله
في ظنك دواء النوني دا ما بشوف لي طريقة ؟
غايتو يا يبقيني المرأة الخارقة اشتغل الشغل كله في ساعتين واجي اقعد في النت
ولا كمان يشوف لي حل في ساعات اليوم

تحياتي لهالة الصغيرة وامها واخوانها
لبت اهلي جميلي

العزيزة اماني

الله يبعد العارضة تعالوا
زيك و الله اتقطعت زمن من المنبر كملت معاها كل الغنا

النوني دا اصلاً بيستخلصوهوا من القات يعني مشكلتكم
محلوله و شويه كدا بكري زاتوا يشحدكم تختوليهوا
ملفات المنبر عندكم

ٍسلامات يا نصار

بركة ربي البعد عوارضك وخلاك تبين ، عقبالنا
قت لي :

Quote: النوني دا اصلاً بيستخلصوهوا من القات

عاد يادوب ما فرجت

بكور اخوي ماسك التوكيل ونحن عرفنا سر الصنعة

امانة ما العوراض اتباعدت كان كدي

فيك الخير يا نصار ودريبك ما ينسد

.

أماني الأستاذة

ناشدتك بي الله

ما تعمليها تاني

و تغيبي الغيبة الغريبة دي

اصلنا لينا كمين يوم بنفتش في

رجـــــــــــاء .

ياخي ما إنتو سودانيزاونلاين .

سلامي لعثمان .



.

Quote: هسي يا كافي البلا اداقس من التكل للغسيل للكوى لقراية الشفع لمناسبات الجيران وحاجاتي البريدها كلها راحت في حق الله

وعثمان قاعد يسوى شنو ؟

اتارينا رحنا ساكت تحت تنوين نون الجندره

حرشتى النسوان علينا واتاريك مهروشه


تحياتى لتراث والصغار
ولكم تحيات الشمل

يا مراحب الاماني ليك طولة وفرقتك كبيييييييييرة

اطيب المنى

العزيزة أماني


نفتقد كتاباتك الجميلة و"البحت" في تراث

اهلنا الغلابة ..

وهسه خلاس لمان شقّيت الليل نصين

اوعي تفوتي ..

وكان المشكلة في مشروب النوني..

احلبي من ضرعات الغيمة..

أو كحلي عين النجمة الساهرة

أكان تديكي وكت ..

شن نفرو البورد من غير الجندر..


..............

حارسين

عبد المنعم

سلامات يا شاعر

شوف جنس سماحة الكلام

Quote: احلبي من ضرعات الغيمة.. أو كحلي عين النجمة الساهرة

ياخ دا كلام جميل شديد
لكن اسويه متين
لما بغسل ولا لما بطبخ ولا لما بكوي ومتين بالضبط

غايتو ربك يفرجها بجاه شيخ النوني وشرابه
وما نفقدك بشينة يا شاعر

عاين بالجد كدا
حاخد (ايزا ـ نهر الكتابة وسلطة الروح)
مع نصوص لاخرين / اخريات في شغل عن غياب المكان الاليف
بعد اذنك طبعاً

محبة واحترام يا شاعر حقاً

استاذنا الطيب

سلامات والف شكر على الترحيب والامنيات
ربنا يسمع منك ويدحر عوارض النت دي
الباقي مقدور عليه

اوسلي ازيك وازي العقاب

يا زول تصدق بالله ؟ اكيد حتسصدق

تراث دا شغال من 8 ـ 2:30 بجي قبلي من الشغل بسخن الغداء اجي القاه في التربيزة
نتغداء هو برجع تاني من 4- 11 مساء ، بجي يلقاني يا اكوي يا اغسل ، يخت العشاء ، وبطبخو كمان.
والخميس والجمعة رغم انشغالاته الكتيرة برة البيت في الجالية وفي شغل السياسية بكوي ليه سبت هدوم كدا .
قصر معاي ولا بالاصح شغل بيتنا؟

الراجل دا بالمقارنة مع احلامنا في مشاركة كاملة للرجل بديه فوق على النجاح حبه ، وبالمقارنة مع الواقع وثقافته الذكورية المركبة ومعقدة دي وبالمقارنة مع اولاد جيلو بما فيهم اخواني اولاد امي وابوي ، يستحق وسام تقدير ، زائد نوط الشجاعة الما عرست بت حلتهم الما جندرية ولا قريبتو ؟ ولا شنو ؟ ( وش ضاحك).
دا الله خلقو لي مخصوص من دعا امي بس
وربي يديه العافية ويفتح عليه محل ما يقبل ياربي.

ازيك يا معاوية وكيفك وكيف احوالك واحوال المعاك ؟

يا ولدي
بلا مناشدة ، يعلم الله ماني محتاجة لي لعزومة
ومشتهية البورد دا شهوة العيان للعافية

لكن نسوي شنو ؟
ادي الله وادي حكمته .

يوصل سلامك لعثمان

كل ما احلم بالمرحومة اعرف انو حتحصل لي حاجة حلوه اليوم التالي


ما اظن يكون في احلي من شوفتك اونلاين .

ــــ



تحيات اكوام .. ولشراب النوني الجابك ..

اماني سلام
والشوق اطنان
من شوفتك طولنا .. والعيد الجاب الناس ما جابك
ايمن تابر

لا تغيبي من هنا..لا تتأخـري في تنفيذ الكتابين..
مشتاقين شـديييييد..
سـلمي ياجميلة علي عثمان كتير...

مني

منوية ست الناس

قالو كنت بعافية شوية ، بعد الشر عليك

الغياب يا بت امي ، قسري ، لا بالخاتر ولا بالايد ، ربك يبعد العوارض ويدحر الافات
والكتابين جاهزين واحد ليه سنتين في اطابير وزارة الثقافة اليمنية ، والتاني لايصة بيه افتش للناشر ، والتالت كان مفروض ناس اتحاد الكتاب اليمنين ينشروه لكن بعد انتخاباتهم الاخيرة غيروو خطط النشر وضيعونا
ربك يسهل بس

تسلمي حبيبة القسا
ويوصل سلامك لتراث ، انت كمان وصلي سلامنا لإسلام واخوانه وامه ، وللغالية آية

ازيك يا ايمن
ومبروك النجاح تاني

شوفت سؤالك في العيد ، يسأل منك الخير الوفير
لكن تقول شنو العين بصيرة ويد الوقت قصيرة
بس العيد شوفتك في اي وقت
تسلم على المرور يابا

ازيك يا تنقو

والشوق مش اكوم
دا بقى دبب عديل بتعرف الدبب ؟!!!
وفي طريقه إلى ان يصبح جبال

Quote: كل ما احلم بالمرحومة اعرف انو حتحصل لي حاجة حلوه اليوم التالي ما اظن يكون في احلي من شوفتك اونلاين

صدقني في ، انت الحلو يفوتك وين؟!! الا يبقى اعمى ساكت .

ليك جبال مودة

والله ليك وحشة شديدة يا جندرية ..


تحياتي ومحبتي ..

سلامات يا معتصم
وما تشوف وحش يارب

طبعاً اكيد انه وحشتكم / ن اشد

ربنا يبعد وحش الزمن والعوارض التانية

محبة واشواق ليك وللمعاك

والله يا الجندريه فاقدنك شدييييييد....
بس نسأل من منو ونخلى منو؟
تحياتى لك ولشلوخك الرائعه

ما يفقدوك بشينة يا mekki

الغايبين / ات كتار فعلاً
ربنا يجمع بالجميع ، ويسهل عليهم /ن

الشلوخ رغم سماحتهم وسماحة ستهن ما بقدر اتسلبط فيهن
ديل حقات خالتك رقية الراقية واديبة الحافظة المديح الحقيبة
ادعو ليها بالعافية وطول العمر يا اخوي ، والف شكر على طلتك

زي لون الفرح

زي طعم السعادة أماني

المملكة الكاملة جمالك

سلام واشواق كتيرة

النبي يا بلقيس متذكرة البوست داك
محمد اخوي حفظه في جهازو ، وطوالي متذكرنك بيه

تسلمي امي انا على الطلة

والفرح ملاقاتكم/ن
ربنا يجعلنا من أهل الفرحة

..
.
يا الحرموني شوفتك .. وصوتك .. وطلتك البي الدنيــا دي كلهـــــا ..
.
.
الاقيك هنـــا تاني ..
الله بيسالك يا ست الكـــل .. تاني سمح شنو في الدنيــا غير كدا؟؟
.
.
منــــــورة ياخ .. منورة.

وانتى قايلة الجابك لينا هنا شنو غير شراب "النونى" البشيلك فى عيونى ..؟

والله ليك وحشة يا أميرة الجندر والجنادر المعاكسة ..

لكن زى ما قالت خالة اسماء صاحبتى "عشان تضوقى ميتة ود الام" تبرى وتستبرى وود امك عمرو طويل لكن القصة وما فيها انه لما اسما دى امها ماتت (الله يرحمها ويغفر ليها) ...خالتها طوالى حاربت راجلها وبدل "عبد الفضيل" بقت تقول ليه "عبد القشير" ...مع انه هو برضو حزين وزعلان على موتة أخت مرتو ...

المهم يوم راقدة برة فى عنقريب بعيد والدنيا فجر ..دق الباب وكان الشافع المرسل ود أخت "عبد القشير" ..قال ليه أمى ماتت ..الراجل قال: الله بكل ألم ..

أول كلمة مرقت منها قالت لى عبد القشيربكل شماتة ووجع: عشان تضوق ميتة ود اللم .. .

وده كله عشان اقول ليك: عشان تضوقوا خدمة البيت دى مرة كيفن ياناس "الدول العربية" متشرشحين فى الشغالات ..وتكتبوا وتعملوا فى البحوث ونحن بى جايى "نبحت" مع غسيل العدة والمراسيل والمسح والطبيخ والشغل كمان ..ومرة مرة ...تربية ...

اصلو يا أخت قلنا ليكم من زمان خدمة البيت الشغل والثقافة ..ديل ما بمشوا مع بعض ، ما صدقتونا ...

المهم اليك الطريقة مرة تانية:

أكتبى بين رخية الحلة ونجضة اللحمة.
أكتبى بين التلفونات بتاعة الصاحبات
أكتبى لما واجب المدرسة يكون "قراية بابين من كتاب اللترتشا"
أكتبى أثناء شراب شاى الصباح وبعد الاولاد يمشوا المدرسة وقبل ما تطلعى للشغل
أكتبى بعد الناس ينوموا وقبل ما جسمك يتخدر وتغلبك الصنقيرة


وألف مرحب بست البنات لى حدهن
وشراب النونى ..دواء التفكير .."ياربى الزول بعد يشربوا بيكون ظاهر شربوا؟ لانى بشوف ناس عندهم أعراض عدم تفكير ...حايمين بى الشبكة العنكبوتية"

تمضورة اخيتي

الجابني انت تحديداً عارفااااااااه يا ست البركات كلها
كتر لينا بس في الدعوات ربنا يبعد العوارض دي

لكن يا بت امي ونديدة اخوي
ميتة ود الام ، انتو الما ضايقنها، حقو نجيبكم ( الدول العربية ) سنة عشان بس تعذرونا

انت قايلة نحن كان نظام الحياة عندنا زي ما عندكم بنكون محتاجين لزول يساعدنا في البيت ؟
انتو عندكم نظافة كل يوم لانه الغبار والوسخ الفي البلد ما بسمح ليك بنظافة ( غرفة المعيشة بس ) ولازم تدعكي البيت من اولو لاخرو مع السلم مسح النوع البقص الضهر داك ؟
ولاعندكم طبيخ وعزابة بتشهو في المفاريك تقعد تسوي في مفروكة الخدرة 3 ساعات ، ما كلو مايكرويف واكل في خمس دقائق بكون جاهز.
شوف عيني ياناس اوروبا وامريكا بصلكم مقطع جاهز من البقالات وملوخيتكم مفرومة ، ما زينا تكوني نضفتيها في ساعة وغسلتيها ونشفتيها بنشاف الغسالة وما نفع لانه البلد مرطبة ،اها تقومي تمرقيها في البلكونة وتنتظريها كمان ساعتين وبعد داك تختي الصينية في نص الأوضة وتقعد تفرمي كرج كرج ساعة ونص ، اثناء دا يجي جاري دا ياماما انتهيت راجعي معاي ، ولا سمعي لي سورة الحجرات ..تقول لي اكتبي لما الواجب لترتشا ، انت قاليهم بقرو وين ؟!سورة الحجرات دي يعلم الله قريناها نحن ممتحنين شهادة ، هسي ناس حمودي ولدي في سنة خامسة بسمعوها ليهم .
يا حليلنا يا تماضر
ما تقارني بين حياتنا وحياتكم
انتو عندكم مكواة اربعة مرات في الاسبوع ؟
ماياهو الفل اتمتك دا تحشرو الهدوم وتطبقوها
عندكم شيل عمدان لبيوت المناسبات ؟
ولا عوازيم غداء ، وشيل اكل للجالية والزاوية
عندكم ناس بجوا بلا مواعيد ساعة الغداء وانتي تكوني جاية من الشغل تلقيهم دخلو قدامك البيت ، والطبيخ البايت في التلاجة يادوب بكفي ، تقوم تجاري جري وشئ من المطعم وشئ تتميها فتة عدس ؟
يا بت امي كان نحن عايشين زي نظامكم دا ..كان غرتنا لصرتنا ، وكان ناس البورد يشكو فينا على الله من كترة الطلة البتمسخ خلق الله
انت بس ادعو لي ربي يملي يدي تاني كل المشاكل دي بلقى ليها دوا
كعب عدم الشئ يا قول ناس امي.
وصفتك دي ممكن اعملها يوم الخميس والجمعة في الجزئية بتاعت الناس النايمة وبرضو ممكن ناخد ما قبل النوم ، لكن في الحال دي نقول لي الجيهة وعبادة الروح مع السلامة( بتعرفي التعبير بتاع فلانة عااااااااابدة روحها )

لووووووووووول

انت يا ود يا ابو لسان حلو

موبايلك دا فيه عقرب؟؟
مالك ما بتهبشو ترسل بيه رسالة كان مافي طريقة اتصال ، حتى في العيد يا علاء ؟!!
لكن نسوي شنو مع الريد العارض دا
عافين ليك واتدلع فينا ساااااااكت ما دام متأكد من مكانك في القلب

قت لي اسمح من كدا شنو ؟
اسمح من كدا اصاقر البورد وانجض ناسو زي زمان مش اطل كل 3 شهور مرة واكون ما قادرة اقرأ 99% من البوستات
ولما اشارك ، المشاركة الملفوحة دا ، اكون قريت البوست بنص بال ونص قلب
ادعو لي اختك ربنا يتم ليها سمحها، وسمح الحبان كلهم / ن

امانى الغالية
تبادل نجيبك ليك النونى مقابل ربطة قات
وتخزينة مع ناس صنعاء



لكن عليك الله النونى دا كان طار بيقدر يوصل للساعة السليمانية

طوااااااالي يا محمد سيد
ابادلك طوالي

القات مصايبه كتيرة ، وهو زااااتو داير ليه وقت عشان تمضع وتخزن وتصل للساعة السليمانية ، لكن النوني دا ما شراب تكتحو بس وتقوم زي سوبر مان على الحاجات كلها ، وكان على التفكير اريتو مانلم فيه ، يعني هسي خلاص التفكير مقطع بعضو عندنا ، ما ترا زي ما قالت تماضر الناس حايمة سااااااااكت في الشبكة العنكبوتية وهي تترتع من شراب النوني .

سلام للبنى والبنيات ومصطفى

جندوره يعني الا اغني ليك لفافات الصبر انا دخنتها !!!
حرام عليك تنسينا كدا وتقطعيني بالمره

دومة يا حبيبة القسا

انا كان قطعتك يقطعني النبي وينفضني من شفاعتو
اناما قطع بي زمني الخائن
والفي القلب باقي يشهد الله

محبة واشواق وسلام لسوزان وسامي وابوهم

عزيزتنا في بلاد العرب العاربة : الجندرية

تحية وألف سلام .

كتب صديقنا الراحل : عمر الطيب الدوش :

زمان كُنا بنَشيل الوُد ونَدِّي الوُد
وفي عينينَا كان يِكبَر حَناناً زاد وُ فَات الحد


أهلاً بالوطن الراحل والكلمة النقية من سويداء القلب .

ازيك يا عبد الله
سلامات وشوق شديد
وافتقاد حقيقي لكتابتك الجميلة
عين السواد الصادتني وبقيت حتى ما اقدر اتصفح
غايتو رضينا بالقسمو لينا الله

شكراً لترحيبك
والود باقي زمان وهسي ولي قدام وانت تقطعت بنا الاسباب

الجندرية سلامنا لك وللأسرة

"أولن" بالتبادي إسمك جا في البوست دا:

أنشودة جميلة بصوت أسماء محمود محمد طه

ثانيا فرحت لعودتك.. وضحكت كثيرا في المقارنة بين الحالة عندكم والحالة هنا في الغرب بينك وبين تماضر..

ياسر

""""عاين بالجد كدا
حاخد (ايزا ـ نهر الكتابة وسلطة الروح)
مع نصوص لاخرين / اخريات في شغل عن غياب المكان الاليف
بعد اذنك طبعاً"""""



العزيزةاماني


لك ماتشائين ..مادام الغربة

الفرقت الناس زي تيراب

قرع مطري ...

ستكون مبحثك القادم

علي الاقل نعرف

خنجره مغروس لغاية وين!!

الحم هيّن بس مايكون

هبش العضم..

لك التوفيق علي مجهوداتك

المبذولة من اجل الانسانية


لك التحية

منعم ابراهيم

.

Quote: الراجل دا بالمقارنة مع احلامنا في مشاركة كاملة للرجل بديه فوق على النجاح حبه ، وبالمقارنة مع الواقع وثقافته الذكورية المركبة ومعقدة دي وبالمقارنة مع اولاد جيلو بما فيهم اخواني اولاد امي وابوي ، يستحق وسام تقدير ، زائد نوط الشجاعة الما عرست بت حلتهم الما جندرية ولا قريبتو ؟ ولا شنو ؟ ( وش ضاحك). دا الله خلقو لي مخصوص من دعا امي بس وربي يديه العافية ويفتح عليه محل ما يقبل ياربي.

والله أنا كلام أسمح من كدا ما قريت

و زول بحب وبيقدّر أكتر من كدا ما لاقيت

الله يديكم العافية

.

Quote: تراث دا شغال من 8 ـ 2:30 بجي قبلي من الشغل بسخن الغداء اجي القاه في التربيزة نتغداء هو برجع تاني من 4- 11 مساء ، بجي يلقاني يا اكوي يا اغسل ، يخت العشاء ، وبطبخو كمان. والخميس والجمعة رغم انشغالاته الكتيرة برة البيت في الجالية وفي شغل السياسية بكوي ليه سبت هدوم كدا . قصر معاي ولا بالاصح شغل بيتنا؟ الراجل دا بالمقارنة مع احلامنا في مشاركة كاملة للرجل بديه فوق على النجاح حبه ، وبالمقارنة مع الواقع وثقافته الذكورية المركبة ومعقدة دي وبالمقارنة مع اولاد جيلو بما فيهم اخواني اولاد امي وابوي ، يستحق وسام تقدير ، زائد نوط الشجاعة الما عرس بت حلتهم الما جندرية ولا قريبتو ؟ ولا شنو ؟ ( وش ضاحك). دا الله خلقو لي مخصوص من دعا امي بس وربي يديه العافية ويفتح عليه محل ما يقبل ياربي.

سبحان الله .. الكلام ده عني انا؟ والله أول مرة اعرف انو الجندرية عندها راي زي ده عني.

***
الجندرية براها قررت تستغنى عن الشغالة.. قالت: ظروفنا صعبة وديوننا كثرت والمائة وخمسين دلاور البتاخدها(الشغالة)، أولى بيها حاجات تانية اهم.. قلت ليها مابنقدر يااماني. لكن هي ركبت راسها. ومن يومها بدا يتراكم فينا الشوق اليكم. وللراحة، وحتى للنوم بما يكفي..
اتمنى ان تكون لي عودة لهذا البوست، فلدى الكثير مما أود قوله هنا.

والله يا عثمان
السويتا رقدت
حرشت علينا النسوان
وبقينا فى عمل اضافى بعد الاضافى


وبعد دا كلو
تعاطفنا معك
وكان الله فى عون من كانت مديرته الجندريه



تحياتى للصغار

اوسلي ما بنصح اي حبيب يكرر تجربتي. واسه كان عندك طريقة عرس بت خالتك ولا بت
جيرانك ولا أي وحدة ما جندرية.

.


أستاذة/ أماني

ما عارف ليه إتزكرتك أمس

و أنا في ماسنجر خاص

و طويل مع صديقة شديدة لي

في أمارة الشارقة إسمها( هالة )

وكنت مصر أناقش معاها قضاياها الخاصة .

الغريبة في الموضوع

( ودا أنا إكتشفتو لاحقاً)

إنها من ( رفاعة )

قد يكون الجنس ولاف

ولا الجندر أنا ما عارف

ياستي أنا بغريها كل التحايا

وليك أيضاً

و لعثمان بقول :

يا سيدي تحايا الرجال

في مجتمعنا الذكوري دا

إنت قلت :

Quote: اتمنى ان تكون لي عودة لهذا البوست، فلدى الكثير مما أود قوله هنا.

أقول ليك حاجة

أنحنا حنجر باب النص ( النفاج )

و نقفلو خالص

عشان النسوان ما يسمعوا

لكن خليني أقول ليك

أنا تجربة زي تجربتك دي

وشرفي عايز أعرفا

ليك و ليها ( أماني ) كل التحايا




.