اهل الخبرة .. كيف يصنع الشبروت ؟

لي 13 سنة بضحي في بيتي بعيد من الاهل
ولا مرة فكرت اعمل الشربوت دا
المرة دي لازم
اها كيف الطريقة
مافي بلح ناشف هنا
العجوة بتنفع ؟
عايزة المواد والطريقة بالتفصيل الممل
بصراحة ما عندي فكرة خالص عنه

وكل سنة وانتم / ن طيبين /ات
والقابلة في منى جمعاً كدا

لوووووووووووووول
السيرة ساي خلتنا نحوص
غلطت في العنوان طبعاً الصحيح شربوت
وغلطت في الصورة الجنب العنوان كنت عايزة اعمل علامة الاستفهام طلعت اليد
عفواً طبعاً الخطأ في العنوان ما بتصلح اوالحقيقة ما بعرف كيف ؟
وربنا يستر لي قدام

الحبيبة اماني..
في شربوت بتاع كركدي.. استني اعمل تلفون لي هدى اختي وافيدك بالتفاصيل..
بتاع البلح تفاصيلو مع الحاجة.. تاتيك قريبا..

وقعوا من أجل الأيام..

رجاء يا سريعة النهمة
شكراً كتيراً
بتاع الكركدي دا اول مرة اسمع بيه
في انتطارك على نار
وبلغي الحاجة وهدى سلامي
وقولي ليهن كل سنة وانتو طيبين يا رب

الجندرية
كل سنه وانتو احبتنا ونهر لامتداد الانسان فينا

قلتى لى شربوت، اها عاد النقول ليك قولة، لو الشربوت ده خمر بيبقى شنو

ده حراممممممممممممممممممممممممممممممممم والليلة لووووووووووووووووول

حقو الواحد يجىء يعيد معاكم مادام فيها { شبروت}

العزيزه اماني اما الشبروت فهو يصنع من
عدة سنتمترات حتي يصر شبرا ويترك لعدة ايام
ليصبح شبروتا
علي غرار الشربوت

هذه وصفة الحاجة للشربوت.. وقالت ليك ما تعمليهو من هسع.. انتظري تلاتة يوم قبل العيد..
الوصفة:
يغلي التمر ويصفي في ماعون تاني ليبرد، اضيفي ماء للبلح المصفى وضعيه مرة تانية في النار ليغلي ، ويصفى الدور التاني ويضاف للدور الأول وتتركيهم يبردو..
بعد ما يبرد تضعي قرفة. قرنجال ومعلقة كبيرة خميرة بيرة "حب".. ويغطى..
3 - 4 يوم.. وعندما تتذوقيه تجديه زي البيبسي يعني فيهو غاز..
لو عايزاهو حلو كبي ليهو سكر أو بيبسي..
أما عن شربوت الكركدي:
ضعي كمية كبيرة من الكركدي مع الماء في النار واتركيه يغلي مدة طويلة..
صفي الكركدي.. ويستحسن ان يكون ثقيلا..
اضيفي له السكر وخميرة البيرة واتركيه لمدة يومين..
اماني..
وبالهنا..
تصدقي ريقي جرى ..
وكل سنة والجميع بألف خير..

جندرية سلام..
ولا يفتي في شربوت وأبا في المدينة..
الوصفة بتاعة الحاجة أم رجاء مظبوطة لكن رجاء نست حاجة مهمة..
الزريعة..ودي نكهة وروح الشربوت..
تضعي خمشة بتاعة عيش (زرة) في شوال وترشي علي موية وتخليه إلي أن يزرع
ينشف بالشمس ثم يسحن (دراش) ويوضع في قماش خفيف مع عصارة التمر كما جاء في وصف الحاجة أم رجاء
الخميرة توضع قبل العيد بيوم..ولو وضعتيها قبل تلاتة أيام يقام عليك حد السكر.

يا رجاء إنتو بتغلوهو؟؟
الللللييييللة و اللليللة دة ما المنكر ذاتو يا بت الأستاذ
نحن بس بنبلو يومين تلاتة و الموية قدر البلح مرتين و مع البهار المذكور إضافة زنجبيل و نعناع و قرفة و قرنفل في قطعة زي بتاعة أبا و لازم يغطوهو بقطعة و إغلاق غير محكم يعني يدوهو فرصة يتنفس {الفرصة الما لقيناها نحن}.
نحن في دار سقط لقط دي مرات خمسة ستة يوم مبلول لوووووول.
بدون خميرة بيرة يا بت الأستاذ
و بدون غليان {نحن ناقصين غليان}
تسلمي
و لا أقول لك
خلللوه
إحشوه
و كل عام وانتو مشربتين و ضاربين لحمة سودانية

Quote: أما عن شربوت الكركدي: ضعي كمية كبيرة من الكركدي مع الماء في النار واتركيه يغلي مدة طويلة.. صفي الكركدي.. ويستحسن ان يكون ثقيلا.. اضيفي له السكر وخميرة البيرة واتركيه لمدة يومين..

مقادير شربوت الكركدي
الكميه المطلوبه : جردل من ماء الكركدي المغلي
نوع السكر: سكر مسحون
كمية السكر: زيادة كمية السكر لا تودي الي اضافة طعم احلي بالعكس تودي الي طعم مر غير مستساغ اذ ان كليو السكر ينتج حوالي 5% كحول

مدة التخمير: تعتمد علي درجة حرارة الغرفة في البلاد البادرة (حيث أعيش الان) اترك الكركدي لمدة اسبوعين في جردل ثم احوله في برميل صغير متين محكم القفل و مصصم لاحتمال الضغط و اتركه لمدة اسبوعين اخرين.
عمل الشربوت كالطبخ يحتاج لمهارة و انتباه و اواني مناسبه
و كل سنة و انتو طيبين

لجندرية..إنت كويسة.. والله حصل ليك ايتها حاجة...بسم الله تلحقك وتحضرك وتجيبك في محلك...زي ما قالت ليك اشراقة الشربوت دا .لو زاغ كدة والله كدة بي يبقي حاجة تاني خالص....على آخر عمرك كمان عايزة تطشمي...

أم الحيران أترك أم محمد تصف لك كيفية

صناعة الشربوت


المواد المطلوبة


بلح ناشف او عجوة

عرق أحمر

جنزبيل

هبهان

قرفه

حلو مر أو (( زريعة إن وجدت))

خميرة




طريقة العمل

1_ غلى البلح مرة او مرتين فى حلة كبيرة

2- تصفية البلح من الماء

3- اضافة البهارات المذكورة اعلاه الى موية البلح المصفى

وهو ساخن فى حالة جردل كبير

تضع 2 ملعقة كبيرة زنجبيل و ملعقة كبيرة عرق أحمر

و 3ملاعق هبهان وكمية من القرفة هذا ويفضل ان تكون


هذه البهارات غير مسحونة اما اذا كانت مسحونة فتربط

فى قطعة قماش وتوضع وتقلل كمية الهبهان

والمذكور اعلاه يتم قبل يومين من العيد

وليلة العيد من بدرى تضيف الى الشربوت الحلو مر

مع 2 ملعقة صغيرة خميرة



اما استعماله خلال 3 ايام من اضافة الخميرة

وما زاد على ذلك ففيه اقوال ولا يصح استعماله

ابراءا" للذمة

الجندرية لوووول شربوت بوصفة ام رجاء وزريعة ابا الله يستر، بس دقيقة اطبع البوست عشان احضر المواد ويا الخروف جاك بلى ، بس اليوم داك ما نتلاقى في البورد عشان ما يقيف قرون قرون ، ما قرون الخروف قاصد

الجندرية
كدة يا بت طابت؟
ما بتعرفي الشربوت؟
لا و كمان حنكشة بجلاجل و بوست منفصل
لالالالالا
أنا و الله بهذر معاك
غايتو أم بشير عملت فيهو نعناع مرة طلع لذيذ لكن ماااا زي حق أمي.

الجندرية..

الحمد لله اللحقتك قبل ما يغشوك

اها النوريك المواصفات الصحيحه لعمل الشربوت

تجيبي حبتين عجور
ورطل شطه
وخمسه اكياس ليمون

تخلطيهن مع بعض علي خلاطه هااااااديه "يعني من غير ما تعمل صوت"
اهاااا
تشيلي الخليط دا .. وتختيهو في كوره كبيييييره وتكبي عليها شوية دقيق فينو وبالعدم دقيق فتريته .. وتبدى تحركه باستمرار لحدي ما يدك توجعك تقومي تدي تراث يحرك كمان شويه ولما يتعب تراث كمان اعرفي انو الخلطه جاهز ...
تجيبي كوره تانيه تكون برضو كبييييره ... وتكبي عليها ماء 5 لترات .. وتكبي عليها ملعقه فلفل .. ملعقه شمار .. ملعقين ونص ملح .. وما تبقي من توابل

تحركيها جيداً .. ثم كبي الكورتين في جردل متوسط


وبالعافيه
والدعاء ..يوم العيد حراااااام

اذا ما توفرت الزريعه يا جندرية ممكن تستعملي خدعة عزابة...
ترمي في جردل التخمير " نحنا قاعدين نعملو بالجردل "...ترملبك عيش أسمر " خبز بتاع الناس العندهم السكري "....دي ممكن تدي نكهة قريبة للزريعه....و كتري القرفة.

و لو ما عندكم البلح الناشف اما تنشفس العجوة و لا ما تغليها كتير في النار...

في صحة الخروف.!!!

بالسيرة بس صاحبتنا ترنحت وتلعثمت ، وبعدين كيف؟!
كل الوصفات أعلاه ما حا يكون عندها أثر لو ما تم حقنه بنصيه ، ولفض الإشتباك لازم تفصلوا الجرادل حق تراث هو المفروض يحقن ، وده لو هوبتي ناحيته حا تبديها بعشه أم رشيرش ، وتختموها بالليلة ما جه سيد ريدي ما جه ، أو بالندامى.
واحد صاحبي عمل كده وما وسم جردلو ، الولية ضربت وإنبسطت ،قال لي اليوم داك ما خلت غنية ما غنتها ورقصت ليه رقيص العروس رقصة رقصة ، قال لي كانت ممتعة جدآ ، حتى انه تعمد في العيد التاني ان يورطها مرة أخرى.
واحد صاحبنا تالت سمع الحكاية فقام طبقها ، تاني يوم قال لي (الحيوانه سكرته زي سكر أخوها كلو غلاط وشكل)

الجندرية

Quote: مافي بلح ناشف هنا العجوة بتنفع ؟

Quote: والقابلة في منى جمعاً كدا

والله خمجتيها خمج يا جندرية
صديقتنا رجاء

Quote: تصدقي ريقي جرى

تصدقي ما جرتو كلو كلو
غايتو النحاول ولكم ( أجر ) التشجيع !!!

قريبي خالد الحاج

Quote: تضعي خمشة بتاعة عيش (زرة) في شوال وترشي علي موية وتخليه إلي أن يزرع ينشف بالشمس ثم يسحن دراش

يا زول دي ( مريسة ) أديييل كده

ود محجوب
والله شفتا القبة قلتا تحتا فكي هههههههههههه


رحمابي

الغالية اشراقة
نحن في ديك الساعة
لو الشربوت بجيبكم نعملو من غير ضحية
بعدين عليك الله هو فضل شنو في فقة الجماعة ديل ما حرام
طلع السودانيين /ات ديل لا بعرفوا الاسلام لا جو بجنبوا
الله يهدينا ويهديهم
ولهم دينهم ولنا ديننا

**************
فنانا الجميل ابو هديل

لووووووووووووول
حول مقياس الرسم إلى مقياس زمني
السنتمتر = كم يوم ؟

************************

العزيزة رجاء
والغالية ام رجاء

كتر خيركم كتير
بس ما وريتوني مقادير البلح للموية كيف
وفي حالة العجوة كيف ؟ اغليه برضو ؟
بعدين البهارات قدر شنو ؟
يعني بالفنجان ولا المعلقة ؟

وشربوت الكركدي
المقادير كيف ؟

الف شكر يا رجاء
السنة الجاية تشربيه في بيتك متهنية وتفرحي الحاجة بي تيمان كمان
**********

العزيز خالد
والله وصفتك دي تعجيزية
يعني هسي ازرع العيش دا متين وينشف متين مع غيم بلدنا دا ؟

لكن بجربها السنة الجاية
بدس من زريعة رمضان
لوووووووووول الخبرات عندك والله

*******

الطيب ود ابواتي

ناس امي برضو ما بغلوه لكن ما عندي باقي التفاصيل
ما شاء الله عليك اظنك كنت تحت كرعين الحاجة
بعدين ما حنكشة غبى وطشيش سااااااااااااااااااااااي
والفرق كبير .. مرة جيت افتي للناس البيت قلت ليهم قريت انه الزول لو صايم وتعب من العطش ممكن يشرب كباية موية ويواصل اليوم بس يقضيه
أختي عوجت خشمها وقالت لي : ميششششششششش دا ادوكم ليه في اتحاد الكتاب ولا سمعتيه في ندوة إرهاص ؟
في حنكوشة بتعرف تعمل موليتة
ولا بتضفر المصراين ؟
قلت لي ام بشير عملت نعناع
لكن النعناع دا ريحته بتطغى على باقي البهارات
تعرف خليني السنة دي اجرب التقليدي
بعدين السنة الجاية لو ربنا حيانا والموت خلانا
بنجرب ابداعات ام بشير
والف سلام ليها بالله

**********
صديق اخوي
كيفنك

ما تخاف علي اختك شديدة ولضييدة ما بتخليه يزوغ
بعدين في السقط دا يزوغ يمشي وين ما عندو طريقة

***********

ود محجوب
سلاااااااااااام
شايفاك لصقت لي ( ام الحيران دي ) وحيرتني
ما عارفة اوافق عليها من باب البقولوا ليهو سمين يقول آمين ، والتشبه بالصالحين فلاح
ولا اتمسك بـ : الطريق لمن صدق وليس لمن سبق
واعترف اني ما عندي الحبة غير محبة " القوم العزو مريدهم "
امانة شغل الاوراد ما صعب
ربك يعين بدعواتكم بس

ام محمد الله يخليها ما قصرت معاي
بس لو تكمل جميلها وتوريني
نسبة الموية للبلح كم ؟
وبعدين الحلو مرة فكرة كويسة بدل زريعة خالد المافي ليها طريقة
لكن اعمل كيف؟
يعني كم طرقة كدي ؟
واكبهم شخصياً ولا بعد ما اصفيه ولا كيف ؟
والسنة الجاية نشربها جبنة ان شاء الله في منى
****

الغالية عشوشة

بالهنا ان شاء الله
وما تخافي من القرون
جماعة القرون ديل نديهم / ن جك جكين
بنقلبوا / ن رومانسيين / ات وبتاعين غناء وبكى بس

لووووووووووووووووووووول

******

العزيز جمال
جابوا ليك لبن الحمارة ؟
حمد لله على السلامة ياخوي
وصفتك دي برضو بتنفع
ناخد منها للمرارة
واهلنا قالوا مافي شي بضر إلا الكلام المرض
الله يكفينا شره
ما قصرت ما تقصر ايامك
اها نوع الدعاء دا يوم العيد كيف معاك ؟

مانديلا
ما شاء الله
عاد بنات الزمن دا غرتن لي صرتن
العذابة حتى الشربوت بعرفوا

ابو ساندرا

لا الكلام دا بجيب الغلط
احسن كل زول بي جردلو يا اخوي
ويا دار ما دخلك شر

الرحمابي

بري وحات خوتك ما خمجتها
الشربوت السودانيين كان بتنشف ليهم متل الكسرى
كان شالوا منى زاتها

الجندريه
كيفنك
يخيل لي البتاع ده متوفر في السوبرماركت ( اشكال الوان )
بس المشكله بطول التخزين بتحصل فيه بعض التفاعلات ( السعيده )
عشان كده قزازه عمرها اكثر من عشره سنوات ابعدي منها , ولا اسرعي بيها
لاقرب ( شارح ) لاختبار ( الرخصه ) .
تحياتي لكم جميعا .

ابراهيم حمودة
ويييييييين اراضيك
اوعى تكون اشتريت ليك شربوت من السوبرماركت ويكون اكسبير ولا حاجة
ربنا يطمنا عليك
وشكراً على زيارتك
بس ياخوي حق الخواجات نحن ما بخارج معانا
عايزين ( شغل ايديا وحياة عينيا )
عملتو براااااااااي وطلع شربوت بنات علي

ايواااااا


عرفته

الحبيبة أماني...
امي قالت ليك لو عملتي نص كيلة "ربع يعني" الموية لازم تغطيهو عشان يغلى كويس.. وكمان الموية التانية برضو..
بالنسبة للبهارات:
ملية يدك قرفة "بي طولها" يعني ما مسحونة..
وفصين او 3 فصوص قرنجال..
ولو عايزاهو "حراق" كبي "خمشة" بتاعت فلفل أسود بي طولو..
الكركدي ممكن تعمليهو شوية.. يعني كمية شوية عشان تتحكمي فيها..
لووووووووووووووووووووووووووول
الجندرية.. على اليمين لازم امي تعمل لينا شربت في العيد ده..

الحـاجـة الوحيــدة الما فهمتهـا من المداخلات دى كلهـا، هى كلام
رجــاء الأخيـر إنو نص كيلـة تسـاوى ربـع!!
لو أينشتاين زاتو جا ما بقدر يحل المشكلـة الرياضيـة دى، كدى أشرحى لينا يا بت العباسـى، عشــان نستفيــد.

ملحوظـة: أنا عارف نص كيلة يساوى ربع، لكن كيف؟

أبو الريش
انت يا اخوي ما عندك شغلة غير المعاينة والوقوف لي كلامي..؟

Quote: ملحوظـة: أنا عارف نص كيلة يساوى ربع، لكن كيف؟

عقلك في راسك تعرف خلاصك..
لوووووووووووووول

حاولت البحث في الانترنت عن كلمة شربوت عسي و لعل أن نساعدك في ايجاد طريقة علمية حديثة لصناعته ولكن " قوقل " لقاها في موقعين أثنين فقط هما " سودانيز أون لاين " و كتاب " أخبار البلاد و اسرار العباد" و كلمة " شربوت " وردت في ذلك الكتاب علي انها نوع من انواع الطيور و ربما الاسماك .
حينذاك قلت لنفسي لابد أن الكلمة الصحيحة هي " شبروت" و ضربت الكلمة في ماكينة قوقل وكانت النتيجة كمايلي :

لم يفلح بحثك عن الشبروت في إرجاع أية نتائج.
لم يُعثر على أية صفحة تحتوي على الكلمة "الشبروت" .

إليك بعض الاقتراحات لبحث أكثر جدوى:
- احرص على تهجئة الكلمات تهجئةً صحيحة.
- جرّب كلمات مختلفة
- جرب استخدام كلمات أكثر شيوعاً.
- حاول التعبير عن مقصدك بكلمات أقل.

ولذلك اقترح انك تشوفي ليك شايقية نجيضة تشاوريها في الموضوع ده و هم احسن من يصنع الشربوت و لازم تكون من البلد يعني "لكة" .

عيد سعيد وكل سنة وانتو طيبين ز
يللا باي

Quote: ولذلك اقترح انك تشوفي ليك شايقية نجيضة تشاوريها في الموضوع ده و هم احسن من يصنع الشربوت و لازم تكون من البلد يعني "لكة" .

خالد الطيب
نان يا مصيبة هي جندرية شربوت ما قدرت تكتبها ليك تقوم تقول ليها (لكة)
أها دي يا الملكي يا الشايقي. وبالشايفو أنا شربوت يختاك ماهو نعيم

الاخت الجندرية


العمل السبحة يكتب من المسبحين

والماعندو محبة ما عندو الحبة


وحسب تعليمات أم محمد البلح والماء
حسب ما ذكرته الاخت رجاء

أما الحلو مر يوضع بحاله أقل من طرقه شوية






الأخ الرحمابى

أشرب حار وأكتب حار

يأخى ما ذكرنا ما زاد على ثلاثة أيام ده

ما مسؤليتنا


أما يوم ويومين ده أسالنا منو

ولكم الشكر

الجندرية
وصفة الحاجة أم رجاء لا يعلى عليها بس إضافة الخميرة قبل تلاتة يوم من القرطعة بتجيب الغناء والضحك .. إضافتي الوحيدة للوصفة دي تمشي السوبرماركت وتشتري ليك قزازة ماكنة حقت عصير عنب - العنب الأسود - وتضيفيها للشربوت بعد التصفية وتضيفي ليهو كمان عنب بناتي طازج فرش مش الناشف داك بدل الخميرة وبعد تلاتة يوم أطرينا بالخير وإذا كان لابد من الخميرة خلي الجردل بدون خميرة وأضيفي شوية خميرة للكمية الناوية تقدميها لأحبابك قبل ساعات من الاستخدام
وما تنسي القاعدة -هيييي ما القاعدة دييييك - ما أسكر كثيره فقليله حرام . وبالهناء والشفاء

الجندرية...
انا عازماك شربوت في العيد او اقول ليك خليها دعوة مفتوحة لاستمتاع بجك شربوت لذييييييييييييييذ

الشربوت حرام ،
لكن إذا تم تعديله إلى شبروت فأنه يكون مباحا ، وهو مشروب رجالي فقط ، وليس للنساء فيه نصيب ،خاصة اللائي لا يعرفن تأدية رقصة العروس ،
يضر بمرضى القولون العصبي ، ويدفع شاربه إلى مضاعفة نصيبه من لحم الخروف ، فتصيبه التخمة ويهلكه الكلوسترول .
هو اختراع سوداني يتحايل به غير الشاربين في السودان للدخول إلى عالم الشرب والسكر ،

حاولت تجميد الشربوت المعد مسبقا ، ووضعته في الديب فريزر لشهرين لأهديه لصديق ، ولما حاول ذلك الصديق شربه وجد ماءه منفصلا عن بقية مكوناته .
ليه ما يكون في شربوت جاهز للبيع ‘ عشان نتحايل على قوانين سبتمبر ،
يازول إنت شارب حاجة
أبدا والله شارب شربوت بس

يا ناس
عملتوها في الجندرية وقعدتو
الحاصل ليها شنو يا سكرتوها يا ناس الكشة جوها

رجاء

Quote: في شربوت بتاع كركدي..

ده شربوت ولا دردمة


نصيحة بوردية
تبقى للعيد خمسة أيام شدو شربوتكم بعد بكرة وتأكدوا من ربط الخروف جيداً قبل النوم.

وماذا عن الدكاي يا شباب رجاءاً افيدونا (تشديد الكاف ) حيث انه لايهيج القولون ويريح الاعصاب وطعمه حسب ما أذكر ( ايام الصبا) حلو مع حادق وليس فية لزعه الشربوت .

والله ياجماعة تابعت الحاجة دي كويس جداً ، واشكر كل الذين قدموا وصفات واضح انها دقيقة وناتجة عن تجربة حقيقة ، خاصة او منقولة، لكن يحدي الآن ما وريتونا نقطر الحاجة دي كيف عشان تطلع في شكلها النهائي . الوقت ضايق والعيد قرب . ارجو إفادتنا سريعا.

الحيدفع حق الخروف منو فيكم ياعمثمان انت ولا الجندريه؟

العزيز عثمان..
طبعا الموضوع كلو بيكون في قيزان أو حلة كبييييرة ومغطية التلاتة يوم..
لما تجوا تشربو الشربوت طبعا بيتصفى.. وختوهو في التلاجة لما يبرد شوية..
وبالهنا والشفا..
رجــــــــــــــاء

الأحباب أماني وعثمان...
خييير .. عملتو شنو..؟ وأخبار الشربوت شنو..؟
ان شاء الله خير..
انا لما سألت امي عن "الزريعة" الجابها خالد، قالت لي دي بدل الخميرة..
وطبعا مفاجأة الحاجة لينا شربوت "مدنكل" بتاع كركدي.. هسع ضوقتو.. ما حصل ..
وياكبسيبة يا شين.. قال دندرمة قال ..
كل سنة وانتو جميعا بخير..

أها دي يا الملكي يا الشايقي. وبالشايفو أنا شربوت يختاك ماهو نعيم
كدى روقو ... وكان تنادو الخباز فى الاول
الملكى بدأت توصف لكم وصف ساااكت البورد طش ثلاثة يوم منها
تمر الشربوت نحن هناك بنبعدو من بدري
واماتنا بكونو شيايلات همو قدر هم الرجال للضحية
شايفة الجكاكة تتاقش لمن ريقي جرى عديييل
ناس رجاء قالو استعدو
اها يالجندرية الشغلانة مشت معاكى
ولانلحقك بباقتين ثلاثة من عندينا

العزيزة أماني،
ها أنت تخرجين السودان المحزون بداخلنا، ليتجسد فرحاً بعيدٍ، لم نفرح به منذ وقت طويل.
في أيوا، تحدثت عنك كثيراً مع الأخت الحبيبة حنان الأمين عبد الغفار، لحمك ودمك.
وقد سرني أن أعرف أكثر عن شخصك الكريم، وصلتك العميقة بالأخت حنان.
ربما لا تعرفين بأن أخي الحبيب، طيب الذكر، لقمان الأمين عبد الغفار، كان من أقرب أصدقائي من إخوتي الجمهوريين الأشاوس، قبيل رحيله، مما انعكس برداً وسلاماً، على صلتي بجميع آل عمي الآمين عبد الغفار، خالك العظيم عليه الرحمة والرضوان. وقد كنت أيضاً على صلة خاصة بعمي الأمين قبيل وفاته، لأنه كان يحب خصلة أنني غير مجامل فيما أراه الحق، وإن "تهورت" في بعض الأحيان. وكان هو من الإخوان القلائل الذين يشجعونني على المزيد من المناصحة والمنافحة على هدى قاعدة "الطاعة بفكر والمعصية بفكر." ومازلت أشعر بقهقهته، التي يحاول كبتها، في موقف معين شهده لي في منزل الإخوان "أ"، من منازل الإخوان الجمهوريين، حيث كان يقيم عندما يأتي للعاصمة.
لأمر ما، أشعر بأننا كلنا تلاقينا: برزخيينا، الحبيبين عم الأمين، و لقمان، وأختي حنان بدوي، طريدتي، التي توفاها الله منذ زمان طويل وهي بعد طفلة لم تتجاوز العامين، ثم معاصرينا حنان الأمين، و رجاء، وأمها، وكل من ساهم في هذا الخيط، في زفة الفرح هذه، بالعيد القادم.

والعيد القادم ليس إلا عيد تبشير بالسلام في السودان، بعد أن "ضحينا" بأغلى غالٍ فس سبيله، وفي سبيل الإسلام، في يوم 18يناير 1985، ووالينا التضحيات المتتالية منذ ذلك التاريخ، في سنوات التيه.

أما زوجتي الحبيبة أسماء مجذوب، فإنها قد بلت "التمر" على هدي هذا الخيط. وهي تشعر بالامتنان بصورة خاصة لأم رجاء وراوية وهدي، وهي تفيد الناس بخبرتها المديدة في غرس الفرح في النفوس. وكل هذا "الشربوت الأصلي" تناولناه في حديثنا، قبل تنزيل "الشربوت الفرعي" إلى حيز التنفيذ. وأسماء ترجو أن تكون النتيجة، كما تتوقعها ونتوقعها: "عودة سودانيتنا لنا" في أكواب الفرح القادم.

هذه الوسيلة، وسيلة المنبر الحر، وغيرها، مما أتاحته لنا ثورة الاتصال، حقاً تعين على انتزاع الأوطان. فالجندرية تسأل من اليمن، وأم راوية تجيب من القاهرة، وأسماء مجذوب تنفذ الوصفة في شارلوت، كاولينا الشمالية، بالولايات المتحدة، حيث تغشانا بعض جليد لم يكن يتغشانا مثله من قبل.

ويل لحواجز الدولة القطرية، ومرحباً بالعولمة "الشربوتية" هذه، وويل لسارقي الأوطان.

أبعد كل هذا يظن المتهوسوون أنهم يستطيعون السيطرة علي أفكارنا وأقوالنا وأفعالنا؟
ألا ساء ما يطنون! ألا ساء ما يحكمون!

أخي وصديقي وأستاذي د. حيدر..
كل عام وأنت والأسرة الكريمة بخير.. أعاده الله عليكم وعلينا جميعا بالخير والستر والسعادة والصحة..
آمييين..
ألف هنا بشربوت الغالية أسماء مجذوب.. مع امنيات ان نستطيع حقا ان نجتمع كلنا أهل اليمن والقاهرة وشارلوت وجميع انحاء المنبر الوطن..
كل عام والجندرية صاحبة البوست "اللمة" وأسرتها العزيزة بألف خير..
وكل عام وجميع الزملاء الكرام بالمنبر الحر بخير..

آمييييييييييييين. من فمك ولباب السماء يا رجاء.

ياجماعة كتر خيركم . الشربوت خلاص عملاناه ونجض .
والعيد باقي ليه يوم واحد ولي اسه ما في واحد قال لينا نقطروا كيف كيف نصل لمرحلتوا الأخيرة .

الأخت الجندرية

الجماعة ما قصروا وصفوه ليك بالحتة ..
حتى أنا رأسي دائخ الآن ..
كل عام وجميع أفراد الأسرة الكريمة بخير ..
وكل المتداخلين والبورداب بالف خير ..

اقعى الدكاى احسن
ولنا معلقات نحن ابناء النوبة فى فن صناعته
القرقودة مع بصيص من الخميرة قليله مشهى و كثيره مسكر

Quote: الملكى بدأت توصف لكم وصف ساااكت البورد طش ثلاثة يوم منها تمر الشربوت نحن هناك بنبعدو من بدري واماتنا بكونو شيايلات همو قدر هم الرجال للضحية شايفة الجكاكة تتاقش لمن ريقي جرى عديييل ناس رجاء قالو استعدو اها يالجندرية الشغلانة مشت معاكى ولانلحقك بباقتين ثلاثة من عندينا -------------------------------------------------------------------------------- آه ياغبش ماعندي ليكم غير نغيم .. برجوه ينفض لغبار زمن القسا .. الكتاحة يهد عرجون نخل صبر الغلابة الطال .. يحت يخرت تباريح الاسى الممدودة فوق نور الدغش

والله يا رجاء انت زولة بريئة
تراث يقول ليك نقطرو كيف عشان يبقى فى شكلو النهائى
تقولى يصفو وفى التلاجة وبالهنا والشف
يا طيقيشة
تحياتى للحاجة علوية
وسارة الابت البورد

الحبان
تشربوا / ن الحلو متهنين / ات في الوطن الديمقراطي وثري
عملنا خلاصة للوصفات كلها وطلع شربوت عينة
برجع ليكم / ن تاني بالتفصيل
وكل سنة وانتم / ن طيبين / ات

الجندرية اماني

حمدالله علي السلامة و كل عام و انتي بالف خير .

الحكاية شنو و الله شفقتونا لا انتي و لاعثمان ما ظهرتوا في العيد .

عملتو كركدي و للا بلح .

طريقة الشمالية
زريعة فيتريتة مضاف ليها عيش احمر شوية تطحن وتضاف ليها البهارات ( كسبرة ، قرفة ، شوية فلفل اسود) ويضاف ليها خمار طبيعي (خمارة عجين وليس خميرة) يخمر الكل لمدة يومين مع إحكام القفل بقطعة قماش ويحرك جيداً عند الخلط (بمكرار)

البلح الجاوي الناشف (ليس الحلو من غير عجوة) يغسل بالماء الحار وينظف ثم يضاف إليه ماء ساخن جديد نقي (نقاع) ويضاف له الحرجل والمحريب ويترك لمدة يومين مع إحكام القفل بالكامل مع قليل من الملح

بعد مرور اليومين يتم خلط الجميع وتترك الخلطة لمدة ثلاثة أيام مع إحكام القفل بقطعة قماش في مكان عتمة
تصفى الخلطة بعد ثلاثة أيام بمصفى كبير الفتحات بعد التحريك الجيد (بمكرار)
يترك المصفى لمدة يومين بدون تحريك

شربوتنا ولا بيبسي جيرانا
بس اوكم من الترنح الجماعة قالو الترنح جريمة