Post: #1
Title: ابو الجعران النمساوى وحكايات يومية مع الصغار
Author: Ishraga Mustafa
Date: 06-10-2007, 01:14 PM
كثيرا مافكرت اكتب بعض المعايشات اليومية التى تحدث بينى وبين أطفالى، ملاحظات وحكاوى بحاول مرات كتيرة اقراها بصوت عالى وترجعنى كتير الى زمن طفولتى البتزكرو منها. كتبت زمان بعض الزكريات منذ شهق فرحى بولدى الكبير واصل المولود فى 19 فبراير 1999.
قلت الليلة اكتب بعض من مشاهدات اليوم اليادابو بدأ ، ممكن الكتابة تدى تقولو ليهم حاجة لمن يكبرو، كتير كنت بسأل امى حليمة/ حبوبتى من ابى اللى ربتنى عن طفولتى وشقاوتى، واصل سألنى قبال ايام اسئلة كتيييييرة وبدأت مرافى آخر العنقود المولودة فى التاسع من فبراير 2002 عن شكلها لمن كانت فى بطنى.
قلت اكتب اليوميات دى واشارك فيها الامهات باعتبارهن اكثر التصاقا بالاطفال وبالتاكيد الاباء، ممكن مشاهداتنا دى لاطفالنا تقرب لينا بعض الحاجات الماكنا بنشوفها كويس او مغبشة، باعتبار انو اطفالنا ديل جيل تانى ليهو رؤيته واحلامه وطريقة تفكيرو. أها بسم الله ابدأ
التاسع من يونيو.. تنبهنى مرافىء لدعوة عيد ميلاد أبى ذو الاربعة اعوام، يعنى مفروض امشى معاها تشترى الهدية، وعشان انا عارفة ممكن تشرينى هدية تقطع قلب الميزانية المحدودة بتفاوض معاها من البيت
نشترى ليهو لعبة صغيرة يامرافىء لانو هو صغير
لا ياماما هو ماصغير، اربعة سنين، بس انا اكبر، تقولها بفخر ومعاها غميضة عيون
طبعا انا بقول بالعربى السودانى وهى ترد بالالمانى الفيناوى مع بعض المفردات بالعربى
انتهينا من موضوع الهدية، نشترى البوم صغير وكتاب قصص عشان تقراه امه ليهو لمن يجىء ينوم.. زى لارا ياماما فى الفيم الماشيناه فى العيد..
العاشر من يوينو.. منيت نفسى بنومة طويلة شوية، بالله واصل صحى تمانية صباحا..
ماما.. الليلة عيد ميلاد آرين
بس انت ماقلت لى من بدرى وماشفت الدعوة
ياماما دعانى امس، ممكن امشى؟
لمن اصحى نتفاهم.. رديت ونومة الصباح اللذيذة ديك قربت تنقطع وانا ماسكة فيها وقلبى يقول ياولدى الله يهديك خلينى انوم شوية
الظاهر واصل عرف انو ممكن اعصلج فى انو يمشى لعدة اسباب اهمها البرنامج كلو والخطة حاتلتخبط، خاصة انو الليلة الاحد والمحلات مقفلة ومافى طريقة لشراء هدية..
انتبه لصمتى وفى محاولة لاغرائى بالموافقة يقول :
Sein Vater ist Muslim
ويعنى بذلك انو ابو صديقه مسلم، عرفت انها حيلة ذكية منو لاقناعى لانو ماحصل ربطنا شكل هذه العلاقات سوى بينهم كاطفال او بينا كناس كبار بمعاير الدين رغم انو فى حدود واضحة فيما يخص مثلا اكل لحم الخنزير وهو شىء مسلم بيهو من خلال الحوارات وحصة الدين الاسلامى فى المدرسة النمساوية.
طيب والهدية...
عندى ياماما، بهديى ليهو كتاب انا قريتو ومامحتاج ليهو..
بس دى هدية من صاحبك دانى ، جابو ليك فى عيد ميلادك الفات..
لا هو حسع ماصاحبى ..
اقتنعت والامر لله...
بدأت مراحل الاعداد.. مرافىء ماعاوزه الفستنان اللى اخترتو ليها...
Nein Mami Ich mag das Kleid nicht
هى لاتحب الفستان اللى انا اخترتو وعاوزة لبسة تانية مامكوية.. يامثبت العقل، بس يابتى حكمت فى اللبسة دى؟
انتهينا من تفاصيل التسريح وبعد تحديد التسريحة العاوزاها، مرات هى تقول وانا بعمل الفى رأسى لانو ماممكن شعرها الغزير ده اعملها شعرة واحدة وفى الوقت الضيق ده وام الطفل المحتفى به تنتظرنا ليذهبوا جميعا لمكان الاحتفال..
تحركنا من البيت، خطوات وتقف مرافىء... تحلف بدينها وايمانها الاتشيل ابوالجعران النمساوى للوليد المحتفى به.. بس نحنا اشترينا هدية وماممكن تشيلى ليك حشرة..
لا ياماما دى {ماهشرة} دى كيفا نص عربى ونص المانى، والله قصة يا ابوالجعران..
لكن هو ما ابوالجعران، مسكين زى حقنا داك لكن صغير وملون، بحب الرشاقة..
اخدنا ابوالجعران ودخلناه فى كيس الهدية..
صمت....
خطوات وبدينا نتونس.. حكت لى عن الطفل المحتفى به..
Seine Mama ist auch nicht von hier
يابت الذين هاجروا.. مانحنا برضو مامن هنا..
وترد محتجة.. لا انا من فيينا وانتوا من السودان..
السخانة والوقت بقى ضيق.. خلاص نمشى بسرعة...
مسافة وصوت العصافير فى فيينا المشجرة زى الجنة...
Oh Mami, armer Vogel, er sucht nach seiner Mutter
وتعنى بذلك: عصفور مسكين بفتش عن امه..
رديت بالعربى قلتى شنو يامرافىء..
همامه ياماما.. همامة مسكين.. {حمامة}
كتمت ضحكتى عشان ماندخل فى موضوع تانى بيحصل كتير لمن اضحك وتكشر ببراءة
Es ist nicht lustig
ليس هناك مايدعو للضحك...
سكت واسرعت بيها الخطى قبال ماتقول لى يالله نساعد العصفور المسكين ده عشان يلقى امه..
والدة الطفل تنتظر، نحى بعضنا بحواجز والاطفال تتشابك ايديهم ويبدأون اللعب
مرافىء تودعنى وانا اتمنى لها وقتا طيبا مع اصحابها وصحباتها
نواصل.. مع واصل
|
Post: #2
Title: Re: ابو الجعران النمساوى وحكايات يومية مع الصغار
Author: Ishraga Mustafa
Date: 06-10-2007, 05:03 PM
Parent: #1
مازالت قصة الجعرايين مستمرة، مرافىء استمتعت بيومها وحكت ماخلت حاجة
طلعت لعبت شوية وجاتنى راجعة بطلب غريب، عاوزة ليها كورة صغيره
ليه؟
عشان تلقط فيهم الجعاريين النمساوية؟ الخوف ماتقول عاوزه تنومهم جنبها..
حكاية واصل عاوزه ليها روقه مع برنامجه وحوراته النهارية معاي قبل مايمشى لعيد ميلاد صاحبو
واواصل
|
Post: #3
Title: Re: ابو الجعران النمساوى وحكايات يومية مع الصغار
Author: خدر
Date: 06-10-2007, 05:32 PM
Parent: #2
Quote: بس دى هدية من صاحبك دانى ، جابو ليك فى عيد ميلادك الفات..
لا هو حسع ماصاحبى .. |
منطق برضو يا اشراقة لكن 
واصلي بلاهي انا متابع و مستمتع
|
Post: #4
Title: Re: ابو الجعران النمساوى وحكايات يومية مع الصغار
Author: Ishraga Mustafa
Date: 06-10-2007, 07:43 PM
Parent: #3
خليك بهنا ياخدر عشان تدرب نفسك من حسع
مرافىء جابت جعارينها وختوهم فى صندوق مفتح، هى فرحانه بيهم وانا بالى فى ابوالجعران بتاعنا داك
واصل رجع من احتفال صاحبو وتعبان كلمتين تلاتة قال لينا احلام سعيدة
اها انت حسع والعيال وبارعة احلام سعيدة لبكرة بواصل
|
Post: #5
Title: Re: ابو الجعران النمساوى وحكايات يومية مع الصغار
Author: abubakr
Date: 06-10-2007, 07:50 PM
Parent: #1
خدر انت بجاي
اها انا مطمئن يااشراقة طالما خدر هنا
واصلي اصلو حكاوي الصغار دي المحتاجيين ليها هسع لانو ما فيها كضب
|
Post: #6
Title: Re: ابو الجعران النمساوى وحكايات يومية مع الصغار
Author: Ishraga Mustafa
Date: 06-11-2007, 06:18 PM
Parent: #5
صدقت والله يا ابوبكر
الصغار لايكذبون، بنكذب نحنا، من راسنا لرجلينا
اهو كويس انو خضر هنا للمتابعة عشان باخدوا كورسات مجانا
وتحية
|
Post: #7
Title: Re: ابو الجعران النمساوى وحكايات يومية مع الصغار
Author: خدر
Date: 06-11-2007, 07:03 PM
Parent: #6
| Quote: اهو كويس انو خضر هنا للمتابعة عشان باخدوا كورسات مجانا |
كشفتي نومتنا
|
|