Post: #1
Title: "بــحــبـــك يابـــلـــد" ادارة :عماد عبدالله واخراج :محمد سني دفع الله
Author: abubakr
Date: 05-09-2007, 12:02 PM
هذا البوست عشان بلدنا
بلدنا بكل الالوان والاشكال
بكل السحنات والالسن
بلدنا الكان " دوا يشفي الوبال" واليوم تمكن منه الوجع
"وعزة في الفؤاد دوا يشفي الوبال "
عزة الشافية مريضة
عزة عايزة ولادا ينهضو يجددو القديم ويخلو الخيال
عزة لا كايسة فلوسكم ولا حتي ارواحكم
عايزة بس كايسة حبكم
"بحبك يابلد" كلمتيين بس من كل اركان الدنيا باية لغة واي لسان سوداني حتنعش عزة وروحا ابسماح حيسري كالسيال
بس باعلي الاصوات وبكان ما انت/ي قاعد/ة يرتفع البوح " بحبك يابلد"
|
Post: #2
Title: Re: "بــحــبـــك يابـــلـــد" ادارة :عماد عبدالله واخراج :محمد سني دفع الله
Author: غادة عبدالعزيز خالد
Date: 05-09-2007, 12:09 PM
Parent: #1
لو بعدنا و لو قربنا
لو بكينا و لو فرحنا
لو عبسنا أوضحكنا
.
.
بنحبك يا بلد
شكرا أخي أبوبكر
غادة
|
Post: #3
Title: Re: "بــحــبـــك يابـــلـــد" ادارة :عماد عبدالله واخراج :محمد سني دفع الله
Author: طلال عفيفي
Date: 05-09-2007, 12:16 PM
Parent: #2
أمرنا لله ، يعني نقول شنو بس !
بحبك يا بلد ..
( حسب المواصفات المذكورة أعلاه )
|
Post: #4
Title: Re: "بــحــبـــك يابـــلـــد" ادارة :عماد عبدالله واخراج :محمد سني دفع الله
Author: الطيب شيقوق
Date: 05-09-2007, 03:27 PM
Parent: #3
Quote: هذا البوست عشان بلدنا
بلدنا بكل الالوان والاشكال
بكل السحنات والالسن
بلدنا الكان " دوا يشفي الوبال" واليوم تمكن منه الوجع
"وعزة في الفؤاد دوا يشفي الوبال "
عزة الشافية مريضة
عزة عايزة ولادا ينهضو يجددو القديم ويخلو الخيال
عزة لا كايسة فلوسكم ولا حتي ارواحكم
عايزة بس كايسة حبكم
"بحبك يابلد" كلمتيين بس من كل اركان الدنيا باية لغة واي لسان سوداني حتنعش عزة وروحا ابسماح حيسري كالسيال |
حب شنو يا رطاني انت ليك عشرين سنة ماشفتها تقول تحبها - قال احبها قال - انت بس تاكلوا من سنام حب الخليل وتنوموا
|
Post: #5
Title: Re: "بــحــبـــك يابـــلـــد" ادارة :عماد عبدالله واخراج :محمد سني دفع الله
Author: محمد سنى دفع الله
Date: 05-09-2007, 03:50 PM
Parent: #4
البلد لو بعدنا منها مية سنة
البلد لو نفونا منها الفين سنة
بتكون في الفؤاد
اصلو بلدي
دايما وابدا
بين عقلي وقلبي
بــحــبــك يا بــلـد
|
Post: #6
Title: Re: "بــحــبـــك يابـــلـــد" ادارة :عماد عبدالله واخراج :محمد سني دفع الله
Author: nourelhadi awad
Date: 05-09-2007, 04:05 PM
Parent: #1
أنفع أكون فني خشبة؟
|
Post: #7
Title: Re: "بــحــبـــك يابـــلـــد" ادارة :عماد عبدالله واخراج :محمد سني دفع الله
Author: Emad Abdulla
Date: 05-09-2007, 09:09 PM
Parent: #6
مش قلت ليك يا السني ...
صدّقْتَ هسه ؟؟؟؟
قلت ليك مافي فايدة ..
شايف يا أبوبكر ..!!!
دي بلد ملعونة و الحمدلله ..
مفردة ( حب ) عندها مربوطة بالخراعة و المياصة .. أو بالميت جلكسات كضابة .
ربونا كده ( مادة التربية الوطنية في المدارس زمان كان بيستلف حصتها مدرس الرياضيات .. و كذلك مادة الفنون ,,,, نعمة من كريم ) .
عايز تحب البلد دي لازم تختار كوم نضالي من كيمان الأوكازيون الوطني الكبير ..
تحب البلد يعني تكون في كوم منها و تسب سنسفيل اليمين المتعفن الجبهجي الكيزاني القميء ..
أو تختار الكوم التاني و تلعن خاش اليسار التقدمي البايظ الملحد الضلالي ..
عايز تحب البلد دي وجه طاقة الحب ( العيب ) دي , و حولها لطاقة كراهية ضد الآخر ..
عشان تثبت إنك بتحبها أكتر منو هو إبن الـ .......
أخلق أعداء من مافي و خليهم يكونو بيكرهو البلد دي , و أديهم على راسهم بالأسلحة الكنزتها من بازارات النضال الملونة , تقوم طوالي تثبت إنك إنت بس البتحبها بدون ما تقول ليها كده مباشرة بطريقة الأفلام المصرية القديمة دي .
حب ساكت كده لله و الرسول بيكون حركات ناس يا ما عندها موضوع أو عالم فاضية .. أو مدعية و .. بس .
ح تتمسخر بيك الناس لو الله قدرك و نغزتك البلد المسجمة دي نغزة صغيرة كده , و اتوجعت ليها ..
يطلعوك عوير و ريالتك سلسيون و كمان بتاع حركات ..
– حكمة الله – زي ما كتبوا المرو بي هنا ..
و ممكن واحد زي الطيب أخونا ده يطلعك زول عايش عالة على حس الخليل يا أبوبكر ..
نور الهادي عايز يشارك في ( المسرحية ) .. !!!
حتى طلال .. عبر و هو بيبتسم ؟؟!!!!
أمرقوا من الطاعون يا سني و أبوبكر ..
ملعون أبوكي بلد .
|
Post: #8
Title: Re: "بــحــبـــك يابـــلـــد" ادارة :عماد عبدالله واخراج :محمد سني دفع الله
Author: abubakr
Date: 05-10-2007, 03:05 AM
Parent: #1
ياعماد
حب من غير واسطة
حب مباشر
لاسياسة لاجهة لاناصية بس مباشر
بينك وبين البلد
البلد ما عايزة كتير نحن العايزين
بس عايزين من غير تمن
وهي اصلا بتدي من غير تمن الا الحب
عايزه حب بس
والغريبة الناس بقت عايزة تمن الحب
هو الحب عندو تمن؟
انا غايتو "بحبك يا بلد"
وانا بعيد بحبك وانا عندك بحبك
وعارف انك ما بتستجدي حب اولادك
هم المحتاجيين يحبوكي
كان ما حبوكي هم الخسرانيين
هسع ياعماد
ما نحن الناس السودانيين الخسرانيين
يوم تحتضن ارض البلد اجسادنا ما بتسال عن احزابنا واللا جهتنا واللا لونا
|
Post: #9
Title: Re: "بــحــبـــك يابـــلـــد" ادارة :عماد عبدالله واخراج :محمد سني دفع الله
Author: عواطف ادريس اسماعيل
Date: 05-10-2007, 05:06 AM
Parent: #8
أبوبكر !!!
بلادي وإن جارت علي عزيزة ,,,
وأهلي وإن ضنوا علي كرام ,,,
|
Post: #10
Title: Re: "بــحــبـــك يابـــلـــد" ادارة :عماد عبدالله واخراج :محمد سني دفع الله
Author: بدر الدين الأمير
Date: 05-10-2007, 12:30 PM
Parent: #9
أبوبكر العجمى فصيح الجمال ومشيده
شكرا على هذه السجادة العجمية
وصاحبك السنى دفع الله دنقلاوى جزيرة اضاع رطانته
ولم يزل يبحث عنها فى دهاليز المسارح .... والسرحان ...
أما صاحبك التانى عماد عبدالله دنقلاوى خرطوم اضاع رطانته ومازال
يبحث عنها بين ريشة عجم الالوان ... والرطانة بالشعر ....
لكن كبيرهم أبوبكر كان أكثر سريالية منهم هرب برطانته
الى الخليج العربى ( الفارسى سابقا)
وهناك حلب العمر وهو يشيدها عمارات سوامق
وهو الآن يغنى مع حميد ومصطفى:
جاى ليك يانورة غيمة
تملأ ماعونك خريف
....
....
لا العمارات السوامق
لا الاسامى الأجنبية
تمحى من عينى ملامحك
تنهدات : الكلام لأمل دنقل
( بحبها برقة وبعنف وعلى إستحياء)
|
Post: #11
Title: Re: "بــحــبـــك يابـــلـــد" ادارة :عماد عبدالله واخراج :محمد سني دفع الله
Author: طلال عفيفي
Date: 05-10-2007, 01:06 PM
Parent: #10
عماد ، على رسلك ..
مالك فاير كده ؟
أي نعم ملعون أبوها بلد ، لكن مافي مانع نحبها ؛
يعني يا عمدة دي أول حاجة ملعونة نحبها ؟
جات على دي !
|
Post: #12
Title: Re: "بــحــبـــك يابـــلـــد" ادارة :عماد عبدالله واخراج :محمد سني دفع الله
Author: Emad Abdulla
Date: 05-10-2007, 02:49 PM
Parent: #11
هو كان ما ساكت ..
يحبو ليها شنو ؟؟
وللا ينعلوها زاتو لشنو ؟
ما فاير يا طلال ..
بس فترتَ .
أنا و طارق الأمين في القفلة مثل هاتين ( و أشار بسبابته و الأوسط ) .
معليش ..
عديها يا صاحبي .
|
Post: #13
Title: Re: "بــحــبـــك يابـــلـــد" ادارة :عماد عبدالله واخراج :محمد سني دفع الله
Author: Soumeta
Date: 05-10-2007, 03:42 PM
Parent: #1
Quote: العلينا ح نسوي،،
وطن عاجبنا بنقوي،،
نمتن ساسو و نعلي،،
لا ما بنتخلي عنو
ولا البجرح ناسو بنخلي،،
نحن عشمنا نديكم و طن جد جد،،
عرض البحر و السماء و امتداد الارض،،
صفق غاباتو يتجدد،،
نلم اشتاتو نتوحد،،
نبعد الشر،،
نطرد الشر،،
نفر توب الطمأنينة و نغطيكم،،
كما الحضن البدفيكم،،
حمام السلم يرك فيكم،،
كما الحب البدفيكم،،
حمام السلم يرك فيكم،،
و بكرة تحت بيارقكم،،
نمش من ساحة لي ساحة،،
ولا الهمة بتفارقكم،،
أيادي العزة لواحة،،
أيادي العزة لواحة،، |
و بأعلي الصوت،،
بنحبك يا بلد،،
شكراً العزيز ابوبكر،،
لجهر صوت الحب،،
|
Post: #14
Title: Re: "بــحــبـــك يابـــلـــد" ادارة :عماد عبدالله واخراج :محمد سني دفع الله
Author: abubakr
Date: 05-10-2007, 04:11 PM
Parent: #1
Quote: لو بعدنا و لو قربنا
لو بكينا و لو فرحنا
لو عبسنا أوضحكنا |
.
دي ياغادة بلدنا وما في للحب من غيرا سيرة
بنحبك يا بلد
|
Post: #15
Title: Re: "بــحــبـــك يابـــلـــد" ادارة :عماد عبدالله واخراج :محمد سني دفع الله
Author: abubakr
Date: 05-10-2007, 04:12 PM
Parent: #1
| Quote: أمرنا لله ، يعني نقول شنو بس ! |
ياطلة ..ما قاعديين احنا علي قلبها ومستحملانا
بحبك يابلد
|
Post: #16
Title: Re: "بــحــبـــك يابـــلـــد" ادارة :عماد عبدالله واخراج :محمد سني دفع الله
Author: abubakr
Date: 05-10-2007, 04:14 PM
Parent: #1
| Quote: حب شنو يا رطاني انت ليك عشرين سنة ماشفتها تقول تحبها |
يالعرريب دة حب ما فيهو عداد بشان تقيس بيهو بعدك عنو او قربك منو
بحبك يابلد
|
Post: #17
Title: Re: "بــحــبـــك يابـــلـــد" ادارة :عماد عبدالله واخراج :محمد سني دفع الله
Author: abubakr
Date: 05-10-2007, 04:16 PM
Parent: #1
ياسني يا جميل
ماهي البلد
بحبك يابلد
|
Post: #18
Title: Re: "بــحــبـــك يابـــلـــد" ادارة :عماد عبدالله واخراج :محمد سني دفع الله
Author: abubakr
Date: 05-10-2007, 04:18 PM
Parent: #1
| Quote: أنفع أكون فني خشبة؟ |
يابعمة بيضا وقلب ابيض
الخشبة كلها ليك
بحبك يابلد
|
Post: #19
Title: Re: "بــحــبـــك يابـــلـــد" ادارة :عماد عبدالله واخراج :محمد سني دفع الله
Author: abubakr
Date: 05-10-2007, 04:19 PM
Parent: #1
| Quote: بلادي وإن جارت علي عزيزة ,,, |
ياعواطف
هي ما جارت علينا لكن عيالا جارو عليها
بحبك يابلد
|
Post: #20
Title: Re: "بــحــبـــك يابـــلـــد" ادارة :عماد عبدالله واخراج :محمد سني دفع الله
Author: abubakr
Date: 05-10-2007, 04:24 PM
Parent: #1
| Quote: أبوبكر العجمى فصيح الجمال ومشيده |
الامير ود الامير
شن نحن ان شيدنا دنيا غير البلد؟
عايزين بلدنا في قلوبنا مشيدة
بحبك يا بلد
|
Post: #21
Title: Re: "بــحــبـــك يابـــلـــد" ادارة :عماد عبدالله واخراج :محمد سني دفع الله
Author: abubakr
Date: 05-10-2007, 04:26 PM
Parent: #1
Quote: و بأعلي الصوت،،
بنحبك يا بلد،، |
بتنا السمحة سوميتا
بلدنا " فرحانة بيك"
بحبك يابلد
|
Post: #22
Title: Re: "بــحــبـــك يابـــلـــد" ادارة :عماد عبدالله واخراج :محمد سني دفع الله
Author: sanaa gaffer
Date: 05-10-2007, 04:46 PM
Parent: #1
| Quote: " ومنعول ابوكي بلد " |
ليه كدة يا عماد ؟؟عليك الله البلد دي ما كفاية اللعنة الحالة بيها ...
تعرف ما باقدر الومك ... لانو كلنا بتمر علينا لحظات بنصب عليها كل لعنات الدنيا ... بنحس اننا بنكرهها ...
بنحس انها ظلمتنا وطردتنا وشردتنا ... بنحس انها اتخلت عننا وباعتنا بالرخيص ...
خلتنا مذلولوين ... تعبانين وزهجانين وقرفانين ...
لكن عليك الله لمن تروق اقعد كدة وشوف بلدنا دي سمحة كيف ...
ما سمحة شوارع وبيوت ...
ما سمحة حكومة ولا حكام ...
سمحة لمن المطرة تصب رشاش حنين .. يبل ا
وتجيك ريحة دعاش مع نسمة ترد الروح ...
سمحة لمن جيرانك يدخلوا من الصباح يقالدوا ويسالموا ويقعدوا في ضل الضحى حوالين شاي ولا قهوة ولا حتى ونسة ساكت ...
سمحة لمن تكون عطشان في عز الهجيرة ... فجاة تلاقي قدامك زير فيهو يافطة صغيرة مكتوب عليها سبيل على روح فلان ولا فلانة ...
تشرب وتقرا الفاتحة او حتى تقول الله يرحمهم ...
سمحة لمن يجي البكا والناس تتشايل وتخت الكشف ... الفطور من بيت فلان والغدا جابوهو ناس علان ...
الخيمة حفروا ليها اولاد الحلة ... رشوا ا
ورصوا الكراسي وقعدوا عشان يعزوا بعض ...
سمحة لمن يجي العرس ... الحلة كلها تفرح معاك .. وتغني معاك .. وترقص معاك ...
صينية الفطور .. السكسكانية والشعيرية والفطير ... ملاح التقلية والنعيمية والروب ... اللحمة والمرارة ...
سمحة عشان فيها ناس لسة محتفظة بانسانيها ... بتقيف مع التعبان وبتساعد المحتاج وبتنجد المريض ...
صدقني ما حالمة ولا خيالية ...
عارفة انو فيها العفن اشكال والوان ... فيها الكعب وفيها التعب ... فيها الجوع وفيها المرض ...
لكن لسة باقول ليها " باحبك يا بلد "
وحاستنى يوم ترجع تقيف وسط البلاد احسن بلد ... واجمل بلد ...
شكرا ابوبكر ...
|
Post: #23
Title: Re: "بــحــبـــك يابـــلـــد" ادارة :عماد عبدالله واخراج :محمد سني دفع الله
Author: bushra suleiman
Date: 05-10-2007, 06:37 PM
Parent: #1
(..عزّه مانسيت .. ولا سليت )**
......
وكلما أقول شعر ،
يجينى - عزّه - فيكى بيت.
مُكمّلة الخصال ..
والجمال ..
والدلال ،
ومالقيت .. بديل عنِّّك ،
ولا لغير حُسنك ، سعيت..
عزه..
ما أنا الابيت هواكى ،
أو لغير مداكى ارتأيت.
ولا رحلت عن سماكى ..
أو ترجّلت خطاى عن حماكى .. وانثنيت
ولا تكسّرت رماحى غير فداكى ،
أو تنكّست راياتى .. وانكفيت
وما تلوّنت دواخلى ،
أو تمرّدت مشاعرى .. الا من رؤاكِ ،
يا مليحة الزمان والمكان والدُنا،
وموكب الخيالِ .. والكمالِ
والوصالِ
والسنا..
وما نأيت ..
ولا غربت عن مشارف المنى ،
وما سهيت..
لكنى بس لقيت ،
هواكى اغلى ما عرفت
أو كتبت
(
)
أو غنيت.
من قصيدة الشاعر الكبير خليل فرح /عزة
|
Post: #24
Title: Re: "بــحــبـــك يابـــلـــد" ادارة :عماد عبدالله واخراج :محمد سني دفع الله
Author: abubakr
Date: 05-10-2007, 06:44 PM
Parent: #1
سنوية
| Quote: صدقني ما حالمة ولا خيالية ... |
مصدقك
بحبك يابلد
|
Post: #25
Title: Re: "بــحــبـــك يابـــلـــد" ادارة :عماد عبدالله واخراج :محمد سني دفع الله
Author: abubakr
Date: 05-10-2007, 06:46 PM
Parent: #1
بشري شفوقة بن خالتي
Quote: يا مليحة الزمان والمكان والدُنا،
وموكب الخيالِ .. والكمالِ
والوصالِ
والسنا.. |
بحبك يا بلد
|
Post: #26
Title: Re: "بــحــبـــك يابـــلـــد" ادارة :عماد عبدالله واخراج :محمد سني دفع الله
Author: abubakr
Date: 05-10-2007, 07:04 PM
Parent: #1
Quote:
بلادي
لأول مرة ........
أحسّ بأني حرٌ ... وأن بلادي حُره
وأن القيود التي عذبتني وأدمت يديا
ألقت سلاسلها الصدئات لدى قدميا
وأن بلاد الكنوز .... بلاد الكنوز الغنية
بلادي
ستفتح أبوابها للضياء
لتغرس قطره
فتحصد أجيالنا ألف قطرة
إذا الفجر مدّ الجناحا
وألقى على الشاطئين الوشاحا
فحتى الأجنّة
سمعت أغاريدها في الدجنّه
تظلّ إلى غدها مطمئنه
وحتى أنين سواقي تلك التي عذبت مسمعيا
أضحى غناءً .. غناءٌ يصافحني في العشيّه
وحتى كهول القرى المقعدون
تندّت عيونهم بالأغاني الشجيه
بلادى أنا .. يا بلاد الكنوز الغنية
تفتحت مثل انطلاق العبير تحدّر من شفةٍ برعميه
كلؤلؤةٍ ساحلية
كأجنحة الطيب رفّت مع النسمات الندية
لأول مرة
أحس بأني حر ..وأن بلادي حُره
وأن سمائي حرّه
فلا طير فيها غريب يناوئ نجمي
ولا طيف غيم
وأن الطريق الذي رصفناه يوما جماجم
سنغسله بالعبير ونفرشه بالبراعم
وشدو الحمائم
اذا الفجر مدّ الجناحا
بلادي أنا .. يا بلاد الكنوز الغنية
تمد يداَ من قلب النجوم ..بيضاء مثل صفاء الطويّه
إلى كلّ شعبٍ مضى صاعداً إلى النبع بين الجبال العتيّه
فأغرودة من بلاد الجنوب تعانق أغرودة آسيويه
فتحنا النوافذ يا فجرُ فانثر ضفائرك البيض والسوسنية
وبعثر على عتبات الطريق أغاريدك الحلوة الشاعرية
محي الدين فارس |
|
Post: #27
Title: Re: "بــحــبـــك يابـــلـــد" ادارة :عماد عبدالله واخراج :محمد سني دفع الله
Author: Emad Abdulla
Date: 05-10-2007, 11:13 PM
Parent: #26
(الإصحاح الثالث)
قلتُ: فليكن الحبُ في الأرض .. لكنه لم يكن!
قلتُ: فليذهب النهرُُ في البحرُِ ، والبحرُ في السحبِِ ..
والسحبُ في الجدبِِ ، والجدبُُ في الخصبِِ ..
ينبتُ خبزاً ليسندَ قلب الجياعِ ..
وعشباًً لماشيةِ الأرضِ ..
ظلاً لمن يتغربُ في صحراء الشجنْْ .
ورأيتُُ ابن آدم ينصبُ أسواره حول مزرعةِ الله ..
يبتاعُ من حوله حرساً..
ويبيعُ لإخوته الخبز والماء ..
يحتلبُ البقراتِ العجافَ لتُعطى اللبنْ .
* * *
قلتُُ فليكن الحب في الأرض ، لكنه لم يكنْ .
أصبح الحبُ ملكاً لمن يملكون الثمن !
.. .. .. .. ..
ورأى الربُّ ذلك غير حسنْْ . **
ـــــــــــــ
** الإصحاح الثالث - أمل دنقل .
|
Post: #28
Title: Re: "بــحــبـــك يابـــلـــد" ادارة :عماد عبدالله واخراج :محمد سني دفع الله
Author: Emad Abdulla
Date: 05-10-2007, 11:42 PM
Parent: #27
أعتذر يا أبوبكر ..
و أسألك أن تطول بالك عليّ ..
طلال .. رفقا يا صاحبي ..
حراق روح ..
و مغسة تشق .
و لسوميتا .. البنية المفرحة .
سامحي يأسنا و القنوط .
لسناء جعفر .. هي دوائر اليأس من قرب الفرج يا سناء ..
معذرة منكم ..
ــــ
في البدء كنتُ رجلا .. وامرأة .. وشجرةْ .
كنتُُ أباً وابنا.. وروحاً قُدُسُا.
كنتُ الصباحَ .. والمسا..
والحدقة الثابتة المدورةْ .
… … …
وكان عرشي حجراًًً على ضفاف النهرْ ..
وكانت الشياهُ .. ترعى ..
وكان النحلُ حول الزهرُ ..
يطنُّّ والإوزُّ يطفو في بحيرة السكونْ ،
والحياة ..
تنبضُُ - كالطاحونة البعيدة !
حين رأيتُ أن كل ما أراهْ
لا ينقذُ القلبَ من الملل !
|
Post: #29
Title: Re: "بــحــبـــك يابـــلـــد" ادارة :عماد عبدالله واخراج :محمد سني دفع الله
Author: الطيب شيقوق
Date: 05-11-2007, 06:35 AM
Parent: #28
| Quote: يالعرريب دة حب ما فيهو عداد بشان تقيس بيهو بعدك عنو او قربك منو |
بالشواهد والتضحيات يا بكوريييييي
وبحبك يا بلد كماااااان
|
Post: #30
Title: Re: "بــحــبـــك يابـــلـــد" ادارة :عماد عبدالله واخراج :محمد سني دفع الله
Author: محمد سنى دفع الله
Date: 05-11-2007, 08:50 AM
Parent: #29
اهو افرح يابكوووووري
شيقوق جا في الخط
كم في الخط امانة عليك
ما حب ساكن كل عضاك
وجاري في الوريد
نيل ساقينا الدهر كلو
وكلنا اولادو
جعلي وشايقي
وزاندي
ايش فايداني
غير خلت اخوي
عاداني
إكفي النيل
أبونا
والجنس
ســـــــودانـــــي
وبحبك يابلد
|
Post: #31
Title: Re: "بــحــبـــك يابـــلـــد" ادارة :عماد عبدالله واخراج :محمد سني دفع الله
Author: abubakr
Date: 05-11-2007, 09:53 AM
Parent: #1
تعرفو يا حباب ..معاي في الشغل بريطانيين من اقسام اربع واحيانا يجي ويلش يبقو خمسة بتغالتو في الكورة حيث كل قسم عندو فريقو وكمان ينكتو في بعض ولو اتنين من قسم واحد بقو براهم اسمعهم يقطعو في الباقيين من الاقسام التانية لكن جنس تضامن ضد كل الاجناس الباقية فما كفاية علاقتك تكون كويسة مع واحد منهم لازم كلهم ..مرة قت للاسكتلندي بلدكم سمحة مالكم والانجليز ونضمن المابعجبكم قال لي "لندن غنية ..عندهم فلوس .. مصلحتنا عايزة كدة ".. اها مصلحتنا وين يا خلق الله كان اتقسمنا اكتر من القسمة النحنا مغصوبيين عليها ؟؟؟ حكامنا بتاعيين مصالح تخصهم وبيستمتعو لما يشوفنا متخاصميين لانو مصالحهم بس هي الحتزدهر ونحن بنتشاكل (اها بالنسبة ليهم كل الناس الما معاهم اعداء او ضد وبالتالي شكلناوصراعاتنا بالنسبة ليهم يعني "اشغل الاعداء بانفسهم " )
اها نحب البلد اولا عشان مصالحنا وبعدين الباقي هين مايهم رطان واللا عرريب
|
Post: #32
Title: Re: "بــحــبـــك يابـــلـــد" ادارة :عماد عبدالله واخراج :محمد سني دفع الله
Author: Mohamed Abdelmotalib Hassan
Date: 05-11-2007, 10:40 AM
Parent: #31
ممكن أحب معاكم؟؟
|
Post: #33
Title: Re: "بــحــبـــك يابـــلـــد" ادارة :عماد عبدالله واخراج :محمد سني دفع الله
Author: علوبه
Date: 05-11-2007, 12:09 PM
Parent: #1
بحبك ............. مغصوب عليك !!!
بحبك ............. وخايف عليك !!!
بحبك ............. زى حبى ليك !!!
|
|