مـا يجيـــنا زول يطالبنــا بي مسـامحـة نـاذر الخليــفة و لاّ يقول عفـي الله عمـا سـلف

.

إلي الذي توقع أن نفتح بوست جديد

لهذه القضية ، أهو دا البوست الجديد

و زي ما قال خالد ماسا ( الرهيفة التنقد ) .


و زولكم دا شوفوا ليكم طريقة تانية جملوهوا بيها .

و لكل الذين يبررون فعلة هذا السخيف

هو عمل العملو دا مع سبق الإصرار و الترصد

و الأدلة علي كدا كتيرة منها :

1/ إذا كان فعلاً هو حريص علي المال العام

و علي مصلحة وعلاج عزيزتنا غادة نوري

ليه صبر الوكت دا كلو ؟؟

2/ لماذا اختار تحديداً ان يورد هرطقاته هذه في

هذا التوقيت - قبل يوم من مواعيد سفر غادة ؟؟

3/ ما علاقة هذا كله بعدم دعوته للإجتماع الذي ذكره

وهو أصلاً معمول لي موضوع تاني ( وليد دارفور ) و الذي

إبتدر به بوسته الذي إنقلب عليه ؟؟؟

و عشان ازيدكم انو هو كان مترصد حملة باب الأمل

هاكم أقروا الكلام الكتبو هو بي يدو و خلوهوا يجي ينكرو كمان

إلي المدعو " eyes of liberty " .. والســــاقطون لا يسقــطون ....





أهو دا بوستيهو المنفصل

لكن كان هو سيد الجوبيك

عالم مقرف

كرفس يا شريف ما تهتموا للايام ...ظروف وتعدي...انتو الدهب وباقي الناس نحاس...

.

و لو أصلاً أنحن بنقبل المساومة

في شرفنا و نزاهتنا ،

يبقي من الأول تصدينا لي المشروع دا كان غلط

و كان يجو ناس تانين أشرف مننا يستلموا الموضوع دا .

فبالله عليكم ما يجينا زول يقول الزول دا غلط و سامحوهو

هو أصلاً مالو كان ؟؟؟؟



عالم مقرف

العزيز معاوية

ممكن اتناقش معاك حول الموضوع ؟؟؟

اسعد

يبدو فعلا أن إعتذاري قد أعطاكم شعورا بالتفوق وأغراكم أن بإستطاعتكم نهش لحمي وإغتيالي كدأبكم دائما يا كرفس ..

وأنا لها ..

Quote: يبدو فعلا أن إعتذاري قد أعطاكم شعورا بالتفوق وأغراكم أن بإستطاعتكم نهش لحمي وإغتيالي كدأبكم دائما يا كرفس

لا يا ناذر.. ما أعطى الشعور بالتفوق وأغرانا على متابعة الحقيقة هو تصرفك الغلط وإتهامك لجميع شباب الأمل بالسرقة والتستر و(لهف) التبرعات.. ووضح في النهاية إنو الحكاية (قولات) ما قدرتا تثبتها لغاية اللحظة.

إعتذارك ده ما دخل ذمة اي واحد من الوجهتو ليهم.

ولسة سادر في البتعمل فيه.. ما حيحلك ولا يحل المشكل

زي ما نصحك الحكماء في كمين بوست كده.. احسن تقعد مع نفسك شويتين.

مافي زول عايز ينهش لحمك ولا يغتالك.. لأنه ما كل الناس بتفكر بطريقتك.. ورمي التهم بدون دليل من أكبر الكبائر في ميدان النشر والرأي العام.

هل الناس دي فتحت بوستات لإغتيالك (كما أدعيت) من الباب للطاق ولا إنت البديت؟؟ وكان حلوووو على قلبك وقتها.

العزيز معاوية كرفس

يقال ان في الحروب او الضحايا هي الحقيقة،، يبقي المسألة ما صراع و تعانف يتجاوز الحقيقة. ثقتي و اعتقد ثقة الاغلبية في شباب حماية الامل لا تهزها الشكوك.. اتمني أن يكون التركيز علي ابراز الحقيقة بكل السبل المتاحة.. انتم و ناذر يمكنكم الالتقاء مرة اخري و مناقشة الموضوع بهدوء حفاظاً علي الحقيقة و رد الاعتبار لمن وقع عليهم ظلم فادح مثل طعنة قاسية لاعز ما يملكون في امانتهم و تجردهم و همتهم العالية التي سخروها في عمل انساني و اخوي سامي..

العزيز ناذر
حتي هذه اللحظة الاطراف الظاهر للعامة من الصورة ليست في صالحك لذا تجدهم يختلفون معك كلٍ باسلوبه،، و انت اعترفت بانك بادرت بالخطأ بجرح لغافلين يأتمنوا عندك شرفهم و خلقهم و امانتهم و نتيجة لذلك تفور النفوس المظلومة و تأكد أننا مع حرصنا علي استبيان الحقيقة لن نسمح او نشارك في اي حملة تستهدفك و تسعي لاغتيالك معنوياً في هذه الساحة،، ضع نفسك في مكان من وقع عليهم الحيف و افعل ما كنت طالبه من ظالمك المفترض..

خوالص تحياتى معاوية كرفس

هنالك عدم وضوح منكم ومن طرف الحبيب ناذر
بامكانكم اخراج انفسكم من الموضوع باسرع ما امكن
لقد اشار الاخ ناذر بان هنالك من ارسل حوالة
باسم شخص معين وهو رفض الافصاح عن المرسل والمرسل اليه
لو عندكم علم بالموضوع زكر ذلك ولو ما عندكم علم بالموضوع
ارجو نفى ذلك لانو لغاية لحظتكم دى لا نفيتو ولا حتى قمتم بتاكيد ذلك
اتركو ناذر وردو انتو هل هنالك معاملة بالشكل ده ولا مافى؟؟؟؟؟؟
هل هنالك من ارسل وانتم لم تستلمو ولا لا الاجابة على السوال ده بتحل الاشكال كلو

خوالص محبتى
وليد الطيب قسم السيد

Quote: أخوي إتوقع زي ما إنت عايز دا كلو ما بيغطي عورة صاحبكم الشغالين من قبيل تغطغطوا فيها دي لأنها كبيرة شديد و ما بتنستر ليكم بالساهل أحسن ليكم أخجلوا بس . و كمان ما أخيب ظنك يا منعم ولا Nasser Mousa أنا من دربي دا ماشي أفتح بوست جديد أها خمو و صرو و لموهو مع الصراهو صاحبكم داك . عالم مقرف

الاخ كرفس

المعاك ده ناصر موسى
اولا انا قلت ما صدقناها في ناذر
ولا حا نصدق فيكم انتو اي كلمة
وده اعتراف مني ليكم للدور الرايع الذي لعبتوه في قضية غادة وكنتم كالنجوم وابهى قلبلا
وايضا انا احترم واقدر جدا الاخ ناذر لله فلله
والله لا بعرفكم انتو ولا بعرفو هو

ناصر موسى

كتب الاخ نصار

Quote: يقال ان في الحروب او الضحايا هي الحقيقة،، يبقي المسألة ما صراع و تعانف يتجاوز الحقيقة. ثقتي و اعتقد ثقة الاغلبية في شباب حماية الامل لا تهزها الشكوك.. اتمني أن يكون التركيز علي ابراز الحقيقة بكل السبل المتاحة.. انتم و ناذر يمكنكم الالتقاء مرة اخري و مناقشة الموضوع بهدوء حفاظاً علي الحقيقة و رد الاعتبار لمن وقع عليهم ظلم فادح مثل طعنة قاسية لاعز ما يملكون في امانتهم و تجردهم و همتهم العالية التي سخروها في عمل انساني و اخوي سامي.. العزيز ناذر حتي هذه اللحظة الاطراف الظاهر للعامة من الصورة ليست في صالحك لذا تجدهم يختلفون معك كلٍ باسلوبه،، و انت اعترفت بانك بادرت بالخطأ بجرح لغافلين يأتمنوا عندك شرفهم و خلقهم و امانتهم و نتيجة لذلك تفور النفوس المظلومة و تأكد أننا مع حرصنا علي استبيان الحقيقة لن نسمح او نشارك في اي حملة تستهدفك و تسعي لاغتيالك معنوياً في هذه الساحة،، ضع نفسك في مكان من وقع عليهم الحيف و افعل ما كنت طالبه من ظالمك المفترض..

أثمن علي كلام الاخ نصار. ...
مادام الاخ نازر فشل.في أثبات أتهاماته ومس شرف وأمانة الاخوة المعنيين
مادام الامر كذلك فعلي تلك الكوكبة أن تواصل مسارها وأهدافها
وأرجو الايقعوا فرائس للاحباط وأن يفت في عضضهم...كل من يتصدي للعمل
العام عرضة للتشكيك والاقاويل.....وعلي الاخ نازر أن لايكابر وأن يعلن
أعتذاره الواضح الصريح لمن تضرروا منه.....الاعتذار" مر" وخصوصا في
ظل هجوم وحصار من كل جانب....أعتذر وأرضي ضميرك فالخطاء
هذا.ليس نهاية الدنيا...... علينا الاخذ بأيدي من تصدوا للمهمة النبيلة
وبيد نازر حتي يعتذر ويخرج من وهدته...
كمال

Quote: يبدو فعلا أن إعتذاري قد أعطاكم شعورا بالتفوق وأغراكم أن بإستطاعتكم نهش لحمي وإغتيالي كدأبكم دائما يا كرفس .. وأنا لها ..

معاويه وشباب الأمل الرائعين
الزيكم ما بعاين لطرهات الحمقى والمرضى من امثال ناذر او غيرهم
انتو اتحملتو مسئولية عمل نبيل بي شجاعه وتجرد ، يتم البديتوهو وترجع غاده بالسلامه والعندو دليل على البيقولو اليجيبو ولا المساله بعد كده بي عرف بلدنا بتبقى شغل مشاطات وحاجات تانيه لا داعي لذكرها هنا وده عمرو ما بكسر عزيمه لانو نتن زي البصدر منهم .
ابقوا بخير كلكم وليكم الانحناء واحد واحد
ليكم احترامي وتقديري وامتناني لانك اكبر واعظم من كل ما يحاك

عارف يا كرفس كان جبتوا ناذر دا غنى ليكم في الحفلة ماكان حقد عليكم كدا.
كان تخلوهو يغني ليهو إن شاء الله مقطع واحد بس.



وياناذر أنا زمان قلت ليك بطل مباراة الكيزان دي.
لكن كلام الشماشة ما بيتسمع.

.

للتوثيق

ولكل المتداخلين بجيكم راجع بعدين ، بس أروق شوية .





عالم مقرف

الله العظيم كلكم من ناذر لي ناس الامل لي البورداب الشتر

مسختوا العمل كله وطممتوا بطن المعروف بين الناس
ما قادرين تصبروا علي الانتصار لانفسكم لحدي ما الموضوع الاهم الاجتمعتوا عليهو وكنتوا علي قلب واحد ..يتم وتجيكم بشائره؟
ياخي ما اعتقد ان غادة تاذت من المرض بقدر ما تاذت من البيحصل هنا دا؟؟؟

العزيز معاوية

متابعين ...........

كسر الخواطر دين


بقدر العملتوه فى موضوع غادة ربنا يوفقكم

هو الزمن دا فى زول بقدر يساعد ليه زول

العملتوه كان عمل جميل والله

واصلو ماتشتغلو بالفارغة

.


لكل المتداخلين هنا و في البوستات التانية

نحن لامن قلنا ما بنقبل اعتزار ناذر و ما بنسامحوا

و ما يجينا زول يقول لينا ياخي الزول ما إعتزر ليكم

تاني دايرين شنو - زي مافي ناس قالوا كدا

لمان اتخزنا الموقف دا ما كنا مندفعين خلف غضب أعمي

بقدر ما كنا نري أن الموضوع مقسوم لي جزئين اساسيين :

الأول موضوع الاتهام و خيانة الأمانة

ودا أصلاً هو ما مهم عندنا لأننا بنعرف نفسنا كويس

و كل الإتعامل معانا بيعرفنا برضو كويس

بدليل كل الكلام الاتكتب من بداية الحملة

و لغاية اللحظة دي .

الجزء التاني و هو المهم و النحن مركزين عليهو

سبق الإصرار و الترصد

ودا أشرنا له بثلاثة أسئلة في البوست دا و البوستات

التانية:

Quote: 1/ إذا كان فعلاً هو حريص علي المال العام و علي مصلحة وعلاج عزيزتنا غادة نوري ليه صبر الوكت دا كلو ؟؟ 2/ لماذا اختار تحديداً ان يورد هرطقاته هذه في هذا التوقيت - قبل يوم من مواعيد سفر غادة ؟؟ 3/ ما علاقة هذا كله بعدم دعوته للإجتماع الذي ذكره وهو أصلاً معمول لي موضوع تاني ( وليد دارفور ) و الذي إبتدر به بوسته الذي إنقلب عليه ؟؟؟

و نزيد عليها سؤال رابع كمان :

4/ ما هي الأسباب الخلتو ينسحب من بداية الحملة

طالما هو أصلاً حريص علي المال العام و علي عمل الخير

و علي علاج غادة نوري بهذه الدرجة


حأجي لي قدام اتوسع في الأسئلة دي


و يبقي بننا الود
م.كرفس

.

في البداية نخلص من الجزئية الآولي

عشان ما نجي و نرجع ليها تاني

وهي موضوع الإتـهام نفسو .

إذا فرضنا جدلاً بأن هناك إختلاس و عدم أمانة

من أحد الأعضاء أو مجموعة منهم

1/ هل هذا ينعكس علي كل مجموعة شباب الأمل ؟؟؟

سؤآل واجب الإجابة عليه

2/ وهل هذا يعطي الحق لكائن من كان إنو يعمم في الإتهامات

لتطال كل الأعضاء ؟؟؟

3/ و لماذا التعميم من أصله طالما هو عندو معلومة مؤكدة

عن شخص محدد إختلس مبلغ محدد مرسل من شخص آخر محدد ؟؟

4/ لقد أمهلنا فترة 24 ساعة لنأتيه بكشف حساب و إلا أنه

سوف يأتي بكل المعلومات العندو ، طيب لغاية اللحظة مرت أكثر

من 72 ساعة وين الأدلة و وين الإتهام من أصلو ؟؟؟

5/ لماذا لم يستجيب لطلب كل العضوية في المنبر بأن يكتب

ما عنده من معلومات ؟؟؟

6/ إذا كان لديه أدلة وبينات علي تجاوز محدد ، و بنفس الحق الذي

خول له فتح ذلك البوست - حفاظاً علي المال العام - كيف يرضي لنفسه

- وهو الحريص علي المال العام و الممتلك لمعلومة تجاوز محدد - بأن

يعتزر عن الإتيان بهذه المعلومة وهو الحريص علي المال العام ، أين

الحق العم هنا ؟؟؟


دي كلها أسئلة واجبة الإجابة منه ومن كل من أتي و قال عفي الله عمّا سلف ..

لي قدام نمشي لموضوعنا الأساسي أو الجزئية التانية

ودي
م.كرفس

الموضوع ده بقى ما جايب حقو

واصبح شكله قبيح جدا

حقو تتخطوا المسألة دي

وتنصرفوا الى ما يفنع الناس وغادة نوري راشدين

يا كرفس إنت قلت هنــا:

Quote: مـا يجيـــنا زول يطالبنــا بي مسـامحـة نـاذر الخليــفة و لاّ يقول عفـي الله عمـا سـلف

طيـب ورينــا هل إنــت و لا غيرك أحســن من الآتــي :

قال اللّه تعالى: {‏إن الله لا يغفر أن يشرك به ويغفر ما دون ذلك لمن يشاء}‏ النساء:‏ ‏48،

قوله تعالى: "يا عبادي الذين أسرفوا على أنفسهم لا تقنطوا من رحمة الله، إن الله يغفر الذنوب جميعاً" و طبعــاً إلا الشــرك بــه...

و أقــرأ هنـا سيــد البشــريــة الرسول (ص) قال لأهـل قريــش شنــو:

فقال لهم عليه الصلاة والسلام: ((ماذا تظنوني أني فاعل بكم: قالوا: أخ كريم وابن أخ كريم. قال: لا تثريب عليكم اليوم ..اذهبوا فأنتم الطلقاء)).

يا أخــي أعرض عن هــذا و إربأ بنفسـك ... بكرة قد تحتاج العفو من أضعف خلق الله أو قد تكون في موقف و في حوجة إلى عفو من زول بعيـد ... أو ... أو ... أو ...

أســأل الله أن يهــدئ نفوس الجميــع... و ربنا يوفقكــم...

معاوية انت بتنتصر لي نفسك. فكر في الموضوع في لحظت صفا و راجع كلام اخونا هيثم و هدئ نفسك.

.

الأعزاء / Haytham Abdulaziz و Alfarwq

أشكر لكم نصحكم

و أتفق معكم بأن عنوان هذا البوست لم يكن موفقاً

ولو كان نظام المنبر يسمح بأن تعدل عناوين البوستات

لعدلته .

كذلك لاحظت ان جزء من مداخلاتي الأولي في هذا البوست

و البوستات الأخري المتعلقة بالقضية كانت إنفعالية

و خصوصاً عبارة ( لن أغفر لك إلي يوم الدين )

و لن اسعي لتبرير ذلك الإنفعال .

مرة أخري أشكر لكم هذا التنبيه .

لكن :

تظل وجهة نظري قائمة

أن ناذر فعل الذي فعله مع سبق الإصرار والترصد

و قد أبرزتها في شكل أسئلة موجهة لناذر

و التي لم يسعي نهائياً في الرد عليها

و هذا ما لم ينتبه له معظم المتداخلون

بل سعي لخلط الأطراف و الأوراق و التعنت كذلك

حين رد علي ّ عاليه بالعبارة :

Quote: يبدو فعلا أن إعتذاري قد أعطاكم شعورا بالتفوق وأغراكم أن بإستطاعتكم نهش لحمي وإغتيالي كدأبكم دائما يا كرفس .. وأنا لها ..

و أظن واضح جداً الي ماذا يلمح ناذر في هذه العبارة .


__________________________________________________________

عموماً اتوقف هنا من الكتابة بهذا البوست

- بإعتبار أنني عرضت قضيتي كاملة ولن أزيد- إلي

أن يرد ناذر علي هذه الأسئلة .

و إن لم يفعل فلن أدخل هنا مرة أخري


ودي
م.كرفس




و

Quote: الأعزاء / Haytham Abdulaziz و Alfarwq أشكر لكم نصحكم و أتفق معكم بأن عنوان هذا البوست لم يكن موفقاً ولو كان نظام المنبر يسمح بأن تعدل عناوين البوستات لعدلته . كذلك لاحظت ان جزء من مداخلاتي الأولي في هذا البوست و البوستات الأخري المتعلقة بالقضية كانت إنفعالية و خصوصاً عبارة ( لن أغفر لك إلي يوم الدين ) و لن اسعي لتبرير ذلك الإنفعال . مرة أخري أشكر لكم هذا التنبيه .

العزيز كرفس عسـاك طيب

أولاً آسف للرد المتأخر ... لكن زي مال قال الأخ العزيز Alfarwq أدناه:

Quote: معاوية نشكرك جدا للاستجابة و مراجعة النفس ... ده يدل على اصالة معدنك و نفسك الطيبة. اهم شئ انكم تتجاوز المطب ده و تنجزوا العمل الخير البديتو .. اتذكروا انو المشوار لسع طويل و انشاء الله لم ربنا يشفي الاخت غادة الناس ممكن تقعد و تتحاسب بهداوة و اخوة. و نتعلم من العمل القمتوا بيه ده باعتبر انه نواة لاعمل خيرية كثير تقابلنا لقدام. اشكرك مجددا للاستجابة و اسال الله ان يجزيك عنا و عن غادة كل خير

فعلاً مشكور للإستجابة و كان قصدي أن أنبهك بأنك يمكنك أن تُدين و تتطالب برد كرامتك بطريقة بعيدة عن أن تقسم بالله أو .. أو ... و خصوصاً زي ما ذكرت إنت إنو العنوان كان صارخ و مزعج.. لكن مجرد أنا ما شعرت إنو كلامك أعظم من كلام الله و الرسول أحببت أن أنبهك ... و الحمدلله لقد أدركت أنت ذلك .. فلك كل الشكر و التقدير ... و ربنا يوفقكم جميعاً لأعمال الخير .. و ربنا يشفي غادة نوري و يردها سالمة إلى أهلها... و وفقكم الله و سدد خطاكم...

مـــودتي...

معاوية نشكرك جدا للاستجابة و مراجعة النفس ... ده يدل على اصالة معدنك و نفسك الطيبة.

اهم شئ انكم تتجاوز المطب ده و تنجزوا العمل الخير البديتو .. اتذكروا انو المشوار لسع طويل و انشاء الله لم ربنا يشفي الاخت غادة الناس ممكن تقعد و تتحاسب بهداوة و اخوة. و نتعلم من العمل القمتوا بيه ده باعتبر انه نواة لاعمل خيرية كثير تقابلنا لقدام.

اشكرك مجددا للاستجابة و اسال الله ان يجزيك عنا و عن غادة كل خير.