معتز قريش. من منفذ فنك

تعرف يا معتز بدور افتح معاك باب فنك وأحقق في وقفتك الوراء مصطفي دي، ومن زمن ما لاقي زمن يدفع لي حق فتح البوست وخلو رجل الفكرة .الفكرة محصورة في وقفتك الوراء الاستاذ دي من ناحيتك كـ إسلامي وبرضو من ناحية مصطفي كيساري .
تعرف، أعترف ليك، انا اتخزلت في اسطورة مصطفي سيد احمد من خلال اختياروا عناصر الفرقة وكنت بفتكر المفردة واللحن والحنجرة والآلة والماسك الآلة عاملين هارموني، ماسكين خصر الغنية وراقصين عشرة بلدي. ده أنا.!!
أها إنت؟ فلسفتك شنو للوقفة الوراء الاستاذ؟
المنطق بقول اما أنك تحيا صراع إثر هذه الخطيئة. أو ( أو تفتح شهية الشيطان) عندك فلسفة للقعدة وراء الاستاذ . وللاستاذ برضو فلسفة لقبولك .
أما الحكاية تكون عادية بفهم مصطفي عايز بتاع اوكورديون، وانا بتاع اوكورديون . لااا دي بتخليني امرق تمثال مصطفى من الدولاب اقرم منو يد.
لو تتكرم وتحكي عن رؤيتك ورؤية الاستاذ، ياريت بهدوء.
شكراً
مع وعد بالعودة

Quote: الفكرة محصورة في وقفتك الوراء الاستاذ دي من ناحيتك كـ إسلامي وبرضو من ناحية مصطفي كيساري .

شكرا يا عزيزى على الاستجواب الظريف

بداية يجب أن نحدد معنى كلمة اسلامي
حسب مفهومك لها عند فتح هذا البوست
لوضع قاعدة مشتركة للحوار

شكراً للهدوء ..

استفسارك رغم عاديته إلا أنه هام ..

الاستجواب بقدر أنه موجه لك الا انه بشكل ما، من خلاله استجوب الاستاذ الراحل (ده طبعاً إذا اتفقنا علي تسمية استجواب) فمصطفى يعنيني جداً.
الاسلامية المقصودة هي (الفكر) الذي ينهى الوقوف خلف الاستاذ مصطفى، الفنان أولاً/ اليساري ثانياً/ الحامل لرؤية تقدمية ترجمها غناء ثالثاً/ وساهمت انت معه في ترجمتها.
من خلال طرحك في البورد، الايدلوجية التي تتبناها سلفية وبما ان الغالبية في البورد وصفوك بالتناقض وأنا اعتبرها تهمة كسلانة ليست بمقدورها التمطي في صباح مصطفى.
بعض المدارس الاسلامية المتسامحة - أحيانا- تجيز الموسيقى بمقدار جوازها السرقة لحظة مجاعة، وتتفنن في تدليل (وتدليل دي من دلال مش دليل) ذلك بالغناء في مدح الرسول.
عنونت السؤال (بمنفذ) لتجاوز تهمة التناقض الي حوش التنفيس (يعني) أنا افترض انك فتحت منفد في جدار السلفية و وقفت فيه خلف مصطفي. إذن شنو الادوات الاستخدمتها في فتح الفتحة دي؟

سؤال عرضي..!! وهل كان مصطفي سيد احمد يساري..!!؟ هل هي مثل يسارية (حميد) ؟؟
اي محاولة استحواذ اليسار السوداني علي اصواتهم والاستئثار بها علي خلفية انهم يخاطبون الغلابة؟؟

Quote: سؤال عرضي..!! وهل كان مصطفي سيد احمد يساري..!!؟ هل هي مثل يسارية (حميد) ؟؟ اي محاولة استحواذ اليسار السوداني علي اصواتهم والاستئثار بها علي خلفية انهم يخاطبون الغلابة؟؟

الأخ اساسي كنت سآتي إلى هذا السؤال ولكنك استعجلت قليلا
خليك قريب .

الاخ أساسي:

نعم كان يساري. حتى اسأل معتز ده زاتو.

يعني معتز يميني؟ عشان دقنو دي؟ الزول يكون زول الله والرسول يا متوكل تفتنو في رقبتو..وتخلوه يتنتح في دقنو بي يديه الاتنين...معتز دا بيكون زيو وزي اي فنان او عازف...تلاقيه بيعزف اورقن
واكورديون...وصفارة وبيز جيتار...وناس اليمين ديل بيكونو مسردبين في يمينهم واركان نقاشهم وجوامعهم وعرباتهم...وبعدين في الزمن دا في يمين بالجد بالجد بفرّط في يمينو بي الدوحة.

معتز:
شميت ريحة غلاط في الدرب (ربنا يكضب الشينة)، مصطفى سوداني وطني آآي و يساري كمان (يعني ح يكون شنو؟ كوز لو مؤاخذة!!)، لو يساري بتجيب غلاط وتوحلنا في طينة لكة أصرف عنها نظر (مؤقتاً) مؤقتاً رغم انو تاريخ مصطفى منذ علاقته البعيدة بالجبهة الديمقراطية، ومشاركته في كورال الحزب الشيوعي وسيرته الاخيرة من خلال الحوارات التي اجريت معه، وبرنامجه الفني المتكامل الذي شاركت فيه يا معتز بتمد اصبعا السبابي في عين غلاطك وتقول ليك يساري يازول. قول الراحل مصطفى كان فنان، فنان صاحب رؤية وكان ما اخاف الكضب أقول رؤية علمانية والعياذب لله. و(برضو) رؤيته العلمانية دي (مؤقتاً) اصرف عنها نظر وخلينا في الركن بتاع فنان. والاستفهام عن ادواتك ياهو ياهو؟
المايك معاك.

شكرا على الرد وسآتيك واحدة واحدة

Quote: شكراً للهدوء ..

صدقني أنا هادئ بطبعي ويمكنك سؤال من هم حولي

Quote: الاسلامية المقصودة هي (الفكر) الذي ينهى الوقوف خلف الاستاذ مصطفى، الفنان أولاً/ اليساري ثانياً/ الحامل لرؤية تقدمية ترجمها غناء ثالثاً/ وساهمت انت معه في ترجمتها.

الاسلامية عندي ليس فكرا (مجردا) إنما عقيدة وكل من قال لا إله إلا الله محمد رسول الله فهو مسلم ، إذن هو اسلامي الفكر ـ أما كون الاسلامية هي نقيض للتقدمية فهذه رؤية من يرون أنهم بلا اسلاميتهم تقدميون وغيرهم تأخريون أو ظلاميون أو سلفيون وهذا انتقاص منهم للإسلام .
واذا صح تعريفك وسلمنا به جدلا ـ فوقوفي خلف الأستاذ مصطفى ينفي تأخريتي ولا اقول اسلاميتي .
لأنني ارى نفسي والأستاذ سواء في اسلاميتنا .

Quote: من خلال طرحك في البورد، الايدلوجية التي تتبناها سلفية وبما ان الغالبية في البورد وصفوك بالتناقض وأنا اعتبرها تهمة كسلانة ليست بمقدورها التمطي في صباح مصطفى.

بناء على ما سبق فان تهمة السلفية (ان كانت تهمة) بوقوفي خلف الأستاذ وتنفيذ أعماله التي وصفتها انت بالتقدمية واليسارية (وهذا سنعود اليه) قد انتفت . وحسب مارايته من طرحي فقد انتفت أيضا صفة (التقدمية) واذا انتفت الصفتان انتفى معهما التناقض .
إذن علينا البحث عن صفة ثالثة غير هاتين الصفتين .

Quote: بعض المدارس الاسلامية المتسامحة - أحيانا- تجيز الموسيقى بمقدار جوازها السرقة لحظة مجاعة، وتتفنن في تدليل (وتدليل دي من دلال مش دليل) ذلك بالغناء في مدح الرسول.

هذا بحث آخر يمكن مناقشته في عنوان منفصل (هل الموسيقى حلال أم حرام أم مكروهة أم مباحةأم تجوز عند الضرورة أم ....... الخ ) حيث أن موضوع مثل هذا يحتاج الى علم شرعي ومعرفة باقوال العلماء وترجيحاتها والخلاف فيها كبير . وأنا على استعداد تام لمناقشتها.

Quote: عنونت السؤال (بمنفذ) لتجاوز تهمة التناقض الي حوش التنفيس (يعني) أنا افترض انك فتحت منفد في جدار السلفية و وقفت فيه خلف مصطفي. إذن شنو الادوات الاستخدمتها في فتح الفتحة دي؟

هنا انت افترضت سلفيتي أو ثبتها واشكرك على تجاوز تهمة التناقض وكذلك افترضت يسارية مصطفى أو ثبتها وهذا موضع نقاشنا بعد ردك على هذه المداخلة .

Quote: الاخ أساسي: نعم كان يساري. حتى اسأل معتز ده زاتو.

أرجو ايضا التكرم بشرح مفهوم يساري عندك حتى استطيع الإجابة على السؤال .

اتعاقبت مداخلاتنا، الدنيا هنا وش صباح، أجيك بكرة.
يضحك نهارك

Quote: معتز: شميت ريحة غلاط في الدرب (ربنا يكضب الشينة)، مصطفى سوداني وطني آآي و يساري كمان (يعني ح يكون شنو؟ كوز لو مؤاخذة!!)، لو يساري بتجيب غلاط وتوحلنا في طينة لكة أصرف عنها نظر (مؤقتاً) مؤقتاً رغم انو تاريخ مصطفى منذ علاقته البعيدة بالجبهة الديمقراطية، ومشاركته في كورال الحزب الشيوعي وسيرته الاخيرة من خلال الحوارات التي اجريت معه، وبرنامجه الفني المتكامل الذي شاركت فيه يا معتز بتمد اصبعا السبابي في عين غلاطك وتقول ليك يساري يازول. قول الراحل مصطفى كان فنان، فنان صاحب رؤية وكان ما اخاف الكضب أقول رؤية علمانية والعياذب لله. و(برضو) رؤيته العلمانية دي (مؤقتاً) اصرف عنها نظر وخلينا في الركن بتاع فنان. والاستفهام عن ادواتك ياهو ياهو؟ المايك معاك.

مش اتفقنا انو الحوار يكون بهدؤ ـ شميت ريحة توتر (ربنا يكضب الشينة)

لا يمكن بأي حال من الأحوال التغاضي عن يسارية مصطفى سيد أحمد لأنها أساس البوست
سبحان الله أنت تستجوبني كوني اسلامي وقفت خلف مصطفي سيد أحمد اليساري وتطلب صرف
النظر عن أهم بند في النقاش ؟؟؟

ردا لجميلك عليّ فإني أنفي عنك التناقض .

سؤال مكرر ـ ماهو مفهوم اليسارية عندك الذي حمكت من خلاله على المرحوم مصطفى سيد أحمد .

معتز: إزيك. أبداً وحاتك مافي توتر. معاك لوح تلج. حوًل:
ياكن بس يا معتز الغلاط ده كيفنو، نحن بنتكلم عن مصطفى سيد احمد أهمً فنان في تاريح السودان الطويل، يعني مو زولاً مغموراً، بنعرف سيرتو من تاريخ ميلادو لي اسم امو وزوجتو واولادو وربطة بشكيرو ومزاج حنجرتو، المشكلة مافي مصطفي اليساري، والاستحواذ النضم عنو اساسي ماهو مشلكة اليسار، دي عرجة في الحركة الثقافية الهيلت السودان كلها، السودان شنو ده العالم كلو كان كدي، العالم كلو ملًك مفاتيحو لليسار، يعني الشعر مثلاً في السودان كان متحرك بي كراعو الشمال ، أيوه حميد يساري والقدال يساري ومحجوب شريف يساري. الرواية العالمية كلها كان حايمة برجلها الشمال، دي مرحلة تاريخية ما تقدر تلغيها.
اشكرك انك رفست عني شبهة التناقض لاني طلبت (مؤقتا) نتجاوز سيرة اليسار لصالح الحوار:ً

ايوة كدي شفت الروقة سمحة كيفن

يلا قول لي اليسارية عندك معناها شنو ؟

عشان نواصل .

معليش أصلي كنت بعيد من النت
كنت في حفل تدشين كتاب الخاتم عدلان
(ما المنفى وما هو الوطن)
معزوم بدعوة رسمية من الحقيين
وكمان بصفتي عضو في سودانيز أون لاين
الشريك الرئيسي في الحفل
أها رأيك شنو ؟ نواصل ؟؟؟؟

Yaa Mutaz

I’m sorry no access to Arabic, will be back soon later.
My remarks are:
You surrounding the post instate you driving into the point,
You need to avoid the idea of (I’m) leftist, deal with me as neutral.
Finally you could say: I’m sorry I don’t like to response, (you still have this chance). This much better –comparing- with long –empty- conversation or an argument.

Thanx Mutaz

متوكل يا حبيب

Quote: I’m sorry no access to Arabic, will be back soon later. My remarks are:

سوريك معاك ـ لما يكون عندك أكسس عربي ارجع لي
أصلوا أنا ثقافتي سلفية ـ عربي يعني
ما بفهم في الأجنبي بتاعكم دا

Quote: You surrounding the post instate you driving into the point,

هل مطالبتي بتعريف منك عن معنى يساري فيها أي نوع من الإلتفاف على النقطة الرئيسية
في النقاش ؟
مضمون البوست هو ببساطة(سلفي واقف ورا يساري بنفذ في عمل يساري يختلف مع ايدولوجيته السلفية
أنا أرى أن هذه النقطة هي لب الموضوع .

Quote: You need to avoid the idea of (I’m) leftist, deal with me as neutral.

وأنا أتعامل معك على هذا الأساس لأنني لا أعرف معنى يساري بالنسبة ليك هي شنو ؟
عشان كدا لغاية الآن أنا مصنفك أكتر من عادي وحتى لو كنت يساري دا ما بغيّر في موضوع النقاش
وأنا أفضّل أن تكون يساري حتى تتحدث عن الموضوع عن علم .

Quote: Finally you could say: I’m sorry I don’t like to response, (you still have this chance). This much better –comparing- with long –empty- conversation or an argument.

اذا كنت لا أريد الرد ليس هناك شئ يجبرني ولكنك عندما أتيت بهدؤ للنقاش استجبت لك
وحسب علمي البسيط أن اي نقاش أو مناظرة يجب أن يكون لها قاعدة اساسية يحتكم اليها
الطرفان لذلك احببت تثبيت بعض الثوابت .
وأيضا أعتقد أن من يفتح موضوع للنقاش يجب أن يتحلى بطول البال والنفس الطويل
خصوصا اذا كان الأمر يتعلق بالعقيدة ـ وهذا مربط الفرس .

اذن جملتك الأخيرة هذه أنا أعيدها لك بحزافيرها
Finally you could say: I’m sorry I don’t like to response, (you still have this chance). This much better –comparing- with long –empty conversation- or an argument.

اعتقد ان هنالك كلمة أنسب من كلمة empty في هذا الموضع ..

Mutaaz, salam
don't worry about this post,

thank you for been nice

Quote: Mutaaz, salam don't worry about this post, thank you for been nice

ليه كدا بس
انت زعلت ولا شنو ؟؟؟