Post: #1
Title: مدارات الذهــــــــــــــول ( 2 ) قصيدة بالعامية السودانية
Author: أحمد النور منزول
Date: 04-19-2007, 12:43 PM
مدارات الذهول (2)
بدونك كيف يكون إشراق
تزور دنيا البشر فرحةْ
وكيف في الروض يقوقي الريد
وأشواقي المولهة بيك
تصوغ الشوق عقود ياسمين
وترسم بالشعر لوحةْ
بدونك ..
لا الأمل ببسم
ولا زهر القلوب بصحى
بدونك لا الصباح بختال
على روعة سهول النيل
ولا شالت نُوار دوحةْ
بدونك يا شقا المشتاق
أماسي اللُقيا ما هَزَّت
شبابيلا
غصون الفرحة ما مالت
على نيلا
ولا ضوت ربوع مشتاق
وزفّت لي ديار سعدك
عرايس نور بتتمايس
قناديلا
بدونك
كل أفق بنسد
مدارات الذهول تمتد
نخوض حرقة صباباتك
وفي الأحزان نفوت الحد
نقاسي وما بنلاقي سماح
وما بنبسط أكُف مُدَّاح
ولا بنستجدي فيكِ أحد
نسرِّج مِن سناك سيلنا
ومِن نار الهيام خَيْلنا
تكوني عذاب ملامحنا
تكوني قمرنا وشليلنا
نجيك .. زي أنَّةْ
زي مِحنه
ولا بنركع ولا بنتهد
بنشمخ زي نخيلاتك
نلوكُ في المرة والآهةْ
لِحين تكبر شتيلاتك
نلاقيك في دموع النيل
وفي أسف القُرى الفاتِك
عفاف عصفورة مغتصبة
حبيسة تغني للهاتك
براءة حِلة مسفوكة
ذبيحةْ بتسأل السافك
بدونك كيف يكون إشراق
ووين رحمة إلهنا ترِك
ويصبح للعُمر معنى
بدونك كيف يكون إشراق
وكيف نحيا ..
ونكون .. نحنا
نيالا
|
|