تابع مباراتي المريخ والهلال لحظة بلحظة ...

سلام،

لعشاق الكورة وفريقي القمة ...

ممكن تتابعو تفاصيل المباراتين أول بأول عبر الموقع ده

المريخ مهزوم حتي الآن بهدف وحيد، والشوط الأول إنتهي للتو...

مباراة الهلال ستبدأ بعد حوالي ٨ دقائق - يعني الساعة السادسة بتوقيت السودان

شكرا ياخالد عذا موقع ممتاز جدا ولطيف

الموصلي الفنان ..

يديك العافية علي التعليق المشجع، ولا شكر علي واجب ..

علي فكرة يا جماعة، الصفحة يتم تحديثها كل شوية بالتفاصيل. يعني ما عليك إلا إنك تخليها مفتوحة وتديها طلة كل دقيقتين تلاتة ...

مشكور كتييير اخوى خالد

غلى الموقع الرائع
وبفضلك انا متابع المباراه الان فى شوطها التانى من خلال الموقع
لانو الاذاعه ما شغاله فى النت .. ماعارف منى والا منها

ولك الشكر يارائع ونتمنى الفوز للمريخ وللهلال

سلام يا علي،

ويا سيدي لا شكر علي واجب. الفضل لله ثم لأصحاب الموقع ده لأنهم عملو خدمة كبيرة للسودانيين بالخارج ..

وزي ما قلت، إن شاء الله الفريقين يشرفونا ويفرحونا ..

إنتهت مباراة المريخ بهزيمته بهدف دون مقابل. النتيجة ليست سيئة ويسهل تعويضها في أمدرمان بقليل من التركيز ...

الهلال متأخر بهدف جاء في آخر دقائق الشوط الأول ..

لا تزال هناك فرصة للتعويض في الشوط الثاني ..

١٢ دقيقة من الشوط الثاني لمباراة الهلال والنتيجة كما هي ..

الدقيقة ٢٦ والنتيجة كما هي ..

أها يا جماعة، أنا ماشي مشوار ..

حظ سعيد للهلال في ما تبقي من الشوط الثاني ..

ناساروا يسجل الهدف الثاني!

ناساروا يسجل الهدف الثالث
"شلعوها الفلاتة" ولا شنو

أنهى الحكم المباراة بفوز الفريق النيجري بثلاثية نظيفة، وناس الهلال قالوا
الأرضية سيئة
الجو سخن
الحكم ضدنا
الشمس والقمر طالعة
الهوا ضدنا
هيثم مصطفى مافي
الإرهاق
نحن عالميين المفروض نلعب في اوروبا
الفندق والإقامة غير جيدة
الجمهور خمسة ألف بس

لا تحلموا بعالم سعيد ... فبعد كل انتصار جميل احباط جديد
لا الهلال ولا المريخ بقادرين على تخطى هذه المرحلة من البطولة


ولا السودان حيتأهل لغانا


ما تقول لى انت زول محبط و متشائم !!! انا زول واقى بس

Quote: تحلموا بعالم سعيد

غايتو نحنا حلمنا وجبنا كم كاس للوطن، الباقي على الجماعة..
لكن ممكن يحلموا بي (تصنيف).

سلام يا راكوبة،

شايفك ما قصرت وواصلت المشوار ..

لكن مبالغة ..

أسيب الكورة واحد - صفر ألقاها إنتهت تلاتة!

علي كل هارد لك للهلال وإن شاء الله يقدروا يعوضوها في إمدرمان

لكن شلعوها الفلاتة دي قلبت فيها هوبة!

خالد
والله كراعي (خدرا) زي علم نيجيريا!
بس فتحت البوست بتاعك وهاك يا أقوان!
حتى بعد الكورة انتهت فتحت البوست برضو سمعت قوون!
العالمي راح في حق الله وأب عين واحدة عملها فيهم، لو كان عندو عينين كان عمل شنو
والهلال قادر على التعويض في الزريبة!

غايتو يا مأمون نحن غير نتفاءل نعمل شنو ..

علي كل في أمل طالما بقينا يجيب مدربين معروفين ومحترفين (ما بطالين)

بعدين كل الإنجازات الكبيرة بتبتدي بحلم ..

بس المهم الناس تؤمن بإمكانية تحقيقه وتبذل كل البتقدر عليهو عشان يتحقق ...

لكن لقيت الأمة دي بتحب الهلال والمريخ حب!

البوست إتشاف أكتر من ٧٠٠ مرة في أقل من ٧ ساعات!

يا راكوبة ياخي بالراحة شوية ..

عارف الخوف من شنو؟

إنو أولمبي الشلف يغلب المريخ في أمدرمان - لا قدّر الله ..

عشان كده الشماتة ما كويسة

والله ياخالد كان هزمنا حنقول النيجيري بتاعهم عندو "عينين"
جماعتك قالوا لاعب بعين واحدة جهجهم خلي لاعب تامي (نور وموية)