القطار في الاغنية السودانية

قطار الشوق
القطار المر
يالشلتو رجعويالقطار
القطر الشالك انت يتكسر حتة
وكميات وكميات من القاطرات في الاغنية السودانية
هل القطار هو ملهم كثير من الشعراء في السودان
ولنبداء بركوب كل قطار لنري الي اين سنصل

ولنبداء بقطار الشوق وهو القطر السوداني الوحيد الذي وصل المحطة الاخيره عطبرة
اغية قطار الشوق من اشهر الاغاني السودانية واكثرها انتشارا بصوت البلابل وانامل بشير عباس ولنسمع راي الاخوة الموسقين في اغينية قطار الشوق وايضا الاخوة الشعراء

صباح النور عليك يا محمد ومالك تثير كوامنى ولى مع السكة الحديد اشجان والقطار واغنياته ولدى فصل كامل فى كتاب عن ذلك لكنى ابادر بقطار الشوق وهى اغنية اول ما سمعتها من صديقتى زينب الحويرص ( نسايم عطبرة الحلوة تهدينا وترسينا نقابل فيها ناس طيبين فراقم كان بنسينا)المهم سانقل لك بعضا مما كتبت ، كان والدى ناظر محطة الابيض ، نصحو على صوت القطار وننام على هدهداته ونسافر على ظهره ونغنى (الشيخ سلامة سلامة ) فى القطار المر لود القرشى ، والقطار المر فيهو مر حبيبى

القطار موجود في اغاني البنات يكثرة لماذا؟

الله يديكم العافية .. انا ود سكة حديد ...زي سلمي .. من محطة الي محطة .. "صفر" وصفارة القطر ما واحدة .. كل قطر صفارتو شكل .. المشترك براهو والاكسبريس براهو والبضاعة براهو والمناورة كمان براهو ....
وانا في مقتبل العمر ودون مراجعة لدرس الجغرافيا وصلت الخليج بكان ما انا في لشغل قت برجع بعدو في ظرف سنة سنتيين ولكن ياها القعدة .. اهم ما في صبري الطويل هو انني عندما اتيت هنا دهشت اندهاشا عظيما لانهم ما عندهم قطر ...وانتظرت القطر ثلاثيين سنو والان قاعديين يبنو سكة القطر بس فوق ما زي حقنا عايز ليهو عربة دريسه لما القضبان تطلع من الشريط ....
قطرنا كان عالم .. ما يهم في الرابعة او الثالثة او الثانية او الاولي او النوم او الاستناتوروالبوفيه او عربية الفرملة والبوستة وحتي عربية السواقيين ..

في محطة زي جبل دود او جبل بيوت ما في غير قطية الناظر والمحولجي ومكتب الناظر والمحولجي وفي الليل المشترك يجي فوووووك .. حكاية ... لكن في عطبرة زحمة قطارات وصفافيير ما تدييك الدرب وحديد كتير وبسكليتات كتيرة وقطار الشوق ....

بكري شكرا لمرورك بالقطارالمر

السكة حديد وجدان الانسان السودانى
ارتبطت السكة الحديد بوجدان الانسان السودانى ايما ارتباط ، فكانت هى منفذالفرح الذى يبتغيه ، حين يكل من العناء فانه يطلب اجازة ، وهذه الاجازة مرتبطة بالسفر والسفر من ثم مرتبط بالسكة الحديد ، والسكة حديد يعنى ان يتعارف الناس فى القطار اسوة باى قطار فى العالم كانما كل القطارات على موعد مع التعارف ففى كل انحاء العالم تجد الناس يتعارفون ، خذ عندك قطار الشرق الذى كان مكانا للجريمة التى كتبتها اجاثا كريستى ، ليس مجانا بل عن سابق معرفة وترتيب مسبق ، لكن فى السودان الامر يختلف عما هو لدى اجاثا كريستى ، حيث هنالم تدخل الحضارة الى ذلك النفق المظلم ، ما زالت الاشياء تحركها القبيلة والدوافع يحركها التعارف لمجرد التعارف لا للقتل او غيره ، المهم ان القطار فى السودان استولى على جزء كبير من وجدان الناس منذ ان دخل الى السودان فى اواخر القرن قبل الماضى مع حملة كتشنر التى غزا بها السودان ، فهل لولا غزو كتشنر للسودان معنى ذلك اننا لم نكن لنشهد السكة الحديد ؟ مجرد سؤال
الاغنية السودانية وعلاقتها بالقطار الغناء لدينا مرتبط وكثيرا بالاحداث او المواقف ، وفى ما خص القطار فاننا واجدون ان الغناء قدم الكثير للقطار منذ الازل وحتى الان بلا توقف ، وجدان كامل لاناس عشقوا القطار واحبوه كثيرا خلق لهم معادلات حياة تختلف عن كل ما عداها ففى القطار كم تغزل الشعراء ، لا يهم ان تكون الرحلة تعيسة او حبيبة لكنها بالقطار سو ى احيانا نجد انهم يلعنونه لكنه ما يزال مع ذلك يحرك كثيرا من الدواخل تجاهه لانه الاكثر صناعة للعلاقات الاجتماعية بين الركاب مهما كانت درجاتهم الاجتماعية او مقاعدهم فى الدرجة الاولى او الرابعة انه القطار وكفى يتحرك الآن القطار المحبوب يقف على حافة الرصيف ( مستنى)لكنه حانق على القطار رغم انه يحبه فى داخله
من بف نفسك يالقطار
ورزيم صدرك قلبى طار وين الحبيب؟
انت شلتو جيبو يالقطار
وتستمر الاغنية ماخذة من القطار موقفا حادا لكنه الحبيب الذى لا يمكن ان (ينفات )فهو قطار الشوق لكنه مفرق( الحبان)
القطار فرقنا
آه حزنا ملكنا
باتصالنا الروحى برانا نحنا برعنا
الوداع ياحبيبى وربى ليك يصون
الفارقت ما لقيتا
الليلة وين يا روحى
يا له من قطار ويالها من فرقة تتصل عبر الروح لكنه القطار
فى الرصيف مستنى ولى ثوانى بهاتى
السلامة سلامة
يا ليل سلامة سلامة سلامة
وهو القطار المرّ ( فيهو مر ّ حبيبى ) لكنه حين ينتوى السفر فان الوسيط الروحي هو القطار فى تلك الايام من منتصف الستينات او السبعينات وقبلهاايام القرشى فى الخمسينات لكنه
القطر القطر نويت السفر
هكذا يصيح فيناالفنان سيد خليفة بروحه المرحة ليذكرنا ان القطار هو الوسيط الانجع فى السفر لانه يستخدم صيغة التاكيد اللفظى ( القطر القطر )او هو حامل من حاملات الاشواق بين الناس خاصة الذين يعشقون الحياة وبعضهم البعض
قطار الشوق متين ترحل ترسينا
نزور بلدا حنان اهلا
ترسى هناك ترسينا
وهنا مربط الفرس مكان بعينه وزمان مفتوح على الحبيب
نقابل فيها ناس طيبين
فراقن كان ببكينا
يا قطار الشوق متين توصل
حبيبنا هناك راجينا
متين تحضن عويناتو لامتين يرجع يحيينا
والقطار الذى كان معجزة القرن التاسع عشر والذى حول مجرى التاريخ فى كثير من الدول والامصار فعل نفس الامر فى السودان الذى ليس هو بمعزل عن مجريات الاحداث فى العالم دخل الى حيز القصيدة الشعرية فكانت ( قطار الغرب ) للشاعر محمد المكى البراهيم والغنائية من خلال عوض الكريم القرشى وغيره من الشعراء ، دخل الى المسرح فكان رهينا بعبد الله على ابراهيم فى خالدته ( السكة حديد قربت الماسافات .. وكثيرا ) ثم انه فى الاذاعة خلال المسلسل الخالد الذى كتبه الشاعر والمسرحى النابه هاشم صديق ( قطر الهم ) وتلك صفة اتسم بها القطار فى السنوات الاخيرة من السبعينات و الثمانينات حين بدا العد التنازلى للسكة حديد
لكن تبقى السكة الحديد احد مكوناتنا الاجتماعية حيث ما زالت الاواصر منعقدة لابناء تلك المحطات منذ عشرات الاعوام فمنذ ان كنا فى محطة القضارف مانزال نذكر حتى اليوم بعض جيراننا وهم يفعلون ، نلتقى عنوة وصدفة سواء فى الابيض او فى الخرطوم لكننا نلتقى وبيننا يمتد سماط الحديث الشهى عن السكة الحديد واهلنا الطيبين من الاباء والامهات والاصدقاء والمعارف
الخرطوم 2005

سلمي ياسلامه السلامه السلامه يبدو ان البوست حرك كميات من قطارات الاشواق التي ترابط في دواخلك شكرا للمرور

أيوة يا محمد الامين خليك في مواضيع زي دي .. قطار و عجلة و طيارة ..
و بلاش مواضيع تهدد حياتك ...

و ... إن شاءالله قطر عجيب ......
.
.

محمدسليمان ماتخاف قطر عجيب مابفوتك لو فاتك في التونسية بتلحقك

وهذه من أغنية أعجبتني في سبعينات القرن الماضي
لاأدري من تغنى بها، لكنه في الغالب ومع كل الإحترام
أحد البكاسي الذين ملأوا الساحة حينها واختفوا كما
ظهروا في لمح البصر.ورحم الله الرائع أبو داؤود.
جاء فيها..
القطر قام خلاني ألفين سلام يامسافر

فارقنا ماودع وخلانا نتوجع

لارد لينا سلام ولاقال بتين برجع.

ثم حكاية اخرى مع القطار
كانوا رهطا من أبناء جلدتنا في العراق الجريح خلال
السبعينات أيضا.قطنوا في أحد أركان حي العامرية
ببغداد.كلمااجتمعوا ذات سهر في مساءات عاصمة الرشيد
تمثلوا أبا نواس وهو يعب كاسات المدامة علنا علي
شط دجلة الحاني، فيسكر السمار في غياب ا لخمار وتتصاعد
أبخرة عرق (مسيح)إلى يوافيخهم.يغالبهم الشوق ويضنيهم
الحنين إلى ضقاف النيلين ومراقد (عزاتهم) فيصدحون
لكبد الليل البغدادي أنيناوشجى..
القطار المر فيهو مر حبيبي
ياريت علي ما مر يا الشلت محبوبي.
لم يكونوا يستحضرون غير هذا البيت اليتيم من رائعة
الشفيع طيب الله ثراه.
جارهم العراقي كان رجلا طيبا.لكن حياته تمضي كدقات
الساعة.ليس له كثير ارتباطات أوكبير علاقات بجيرانه
سيما هؤلاء العزاب الأغراب. علاقته بهم لم يكن ينقصها
الإحترام الذي تحده التحايا لاأكثر ولاأقل.
في كل ليلةوبعد أن ترتوي النفوس برحيق العنب والتمور
وتتراقص الرؤوس بتواتر الكؤوس ترتفع عقيرة جماعتنا
بصوت واحد في مختلف الطبقات..
القطار ال..
استمر الحال شهورا حتى طفح الكيل بالجار العراقي المهذب
ليقتحم في الهجيع الأول من الليل دار جيرانه العزاب
صائحا في غضب..
ياشباب هوستونا..يا قطار؟ يا بطيخّ؟ انتم ماتستحون؟
يعني بالواضح كده ..قطر شنو وزفت شنو؟
سقا الله أيام بغداد الأثيرة فلي فيها ذكريات بطعم المنى.
والتحية للراوى الأخ الحبيب /علي أحمد حمدان ومصطفى
أبو الدرش وعم عبده ومحمد حسن الباشا وقاسم وشيخون
وأستاذي بكري خليل.ولكم جميعا المحبة والتحايا.

اختي الفاضلة
يا ريت تقولي لينا من بف نفسك يا القطار كلمات و الحان منو و تقريبا متى ولدت
المعلومة التي عندي انها من اشعار المرحوم عبدالقادر ابراهيم تلودي و قد زرت منزله في الثمانينات بامدرمان لانني كنت ابحث عن قصائده التي كتبها عندما كان في مدينة غيل باوزير مدرسا في حضرموت في الاربعينات تقريبا
تقبلي تحياتي
نزار غانم - اليمن

..
.
انا شخصياً اموت اعجاباً بقطار الغرب
رائعة محمد المكى ابراهيم
..
تجيبوها ولا يفتح الله

______________________

كانت سويعات مرت علينا
ما انت بدر الكون يا باهى نورنا
دى فى ياتو قطر ؟؟

.... غـنـي المـرحـوم ابراهـيم عـوض:

قــطـاره اتـحـرك شـويـة شــويـة
وانامـن بعـيـد شـفتـو لـوح لـــي
بـكـت عـيـنيـه، وبكـت عيـنـــــي
يـااللـه مـتيــن رحـمـاك عـــلي?.

---------------------------------------

مـثل سـودانـي: " قـطـر عــجـيـب يـودي يـودي مـايجـيـــب".

---------------------------------------

نحـنا سـكــان حـلفاالـقـديـمـة عـندما يغادر احـدآ مـنا بالقطار الـي الخـرطوم نقـول عـن هـذاالـمسافـر انه " مـسافـر للسـودان"!!!.

------------------------------------------------------------

لك التحية الاخ محمد في تحيتك للقطار مكمن التواصل ، وتوارد خواطر الشعراء
في القطار ، حتي اغنيات البنات كما تسمي اخذ القطار نصيبه ولكن بصورة اخري
مثل : القطر الشال معاوية يتكسر زاوية ... زاوية وين الحبيب
والقطر الشالك انت ...يتكسر حتة حتة وين الحبيب
وحتي في الاغنيات باللعات السودانية الاخري لها نصيب في اغنياتهم
والقطار له وقعه في المجتمع السوداني ، وشكل علاقات اجتماعية بين السودانيين
ولعل النكات التي اطلقت علي اهلنا النوبيون عن القطار كثيرة وهو بفعل القطار
ولكن الباحثين السودانيين لم يكتبوا تلك الصلة الحميمة التي شكلها القطار
وهذه دعوة نقاش بداتها يا محمد ولنستمر حول هذه الصنعة ودورها في مجتمعنا من اغنيات
وعلاقات اجتماعية

ولكن الباحثين السودانيين لم يكتبوا تلك الصلة الحميمة التي شكلها القطار
ياريت نسمع راي الاخوة الباحثين عن هذة العلاقة الجميلة

الاخ محمد تشكر على الموضوع الجميل
ارتباط القطار بالاغنية السودانية نتاج طبيعي للواقع المعيشي فالقطار احتل مرتبة متقدمة في
وسائل السفر الداخلي لفترات طويلة وبين المدن الرئيسية بالسودان
وكذلك هو من اسباب فراق الاحبة والاصحاب


والقدماء وصفوا الناقة .....................

زنقار

معاوية ..


الغنية ما شغالة ...

لكن الخلل الظاهر في المنبر ما منك ..

ما لقيت ولا غنية واحدة شغالة ..

حتى الميديا فيها مشاكل ..

زي حصانك القلبو وقف بدل ما كان جاري ..

ناذر الاغنية شغالة لكن مس كول بس

تشكر اخ محمد الامين اولا علي الاغنيه وربنا يرحم زنقار

ياسايق القطار قوم بينا لي بنت الشمال ودينا

حرك قوم سريع ياخينا المريود هناك راجينا ....

الفنان زكي عبدالكريم متعه الله بالعافيه ...

قطارو حلا ياناس قطارو حلا ترك لعمري الالام والمذله ..رحم الله ابوداؤد

معاوية اخوي ضحكتني الديزل ده خلي القمرات وراه ...


تسلموا كتير ,,

ناذر ياريت ترفع اغنية القطار المر

الأخ محمد الامين

الأخ الكريم ناذر

الإخوة الأفاضل

هل يمكن ان يتكرم احدكم ويتحفنا بصورة للمغني زنقار ؟

أتمنى رؤية هذه الشخصية ولكم الشكر الجزيل .


صنفرة على قولة ناذر :

أخي الكريم ناذر

أود ان اعتذر منك على كتبتها من قبل في حقكم وندمت عليهافيما بعد لما تبين لي كريم خلقكم ولطفكم ورحابة صدركم واتمنى ان ازور السودان قريباً لكي أتشرف بمعرفتكم أكثر.

لك تحياتي وتقديري

Quote: هل يمكن ان يتكرم احدكم ويتحفنا بصورة للمغني زنقار ؟ أتمنى رؤية هذه الشخصية ولكم الشكر الجزيل .

زنقار

صور مباااااااااااااااااااالغة لكن

القطار المر

سائق القطار