Post: #1
Title: خيــيمة الحــردلو - العمارات
Author: Ahlalawad
Date: 09-03-2002, 01:28 PM
Parent: #0
هذه الخيمة بشكلها الحالي كانت منصوبة في الموقع الآخر .. وحيث أنها تجمع نفرا كريما من الموهوبين وددنا أن نعيد نصبها هنا لمزيد من المتعة والفائدة . ولعلها مواصلة لما كان قد بدأه الأستاذ حمزة سليمان في بوسته المتفرد دعوة للدوبيت :
هذه بداية ومشاركة متواضعة من العبد الفقير
الليلة الخيمة اصبح ليها ضل وفروع يجوك جنياتا في الحين نمهم مسموع يسووا القوق يطبقو النمة ستين نوع يزيدو الشوق عليه الحزمو المبروع
الكلام ليك يا المنطط عينيك
|
Post: #2
Title: Re: خيــيمة الحــردلو - العمارات
Author: يازولyazoalيازول
Date: 09-03-2002, 01:40 PM
Parent: #1
الليلة النسيم جاب لى خبر دغشية قالو الخيمة نقلت فى جهات منشية بجوها شباب ظراف سندوتشاتهم محشية ياكلوا فى الحمام والضلعة بعد الشية
مرحب بالحردلو فى العمارات
|
Post: #3
Title: Re: خيــيمة الحــردلو - العمارات
Author: taha
Date: 09-03-2002, 02:19 PM
Parent: #1
عووووووووووووووك اناس والله ده ياهو النضم العديل ..حرم الواحد دابه لقاله بكانا يرتاح فيه ..دحين آناس خلوني الننجم وبعدين النضم ملحوق ..المويه آناس
|
Post: #4
Title: Re: خيــيمة الحــردلو - العمارات
Author: Ahlalawad
Date: 09-03-2002, 02:23 PM
Parent: #1
تحيات طيبة للاستاذ يازول شكرا على النضمم المعسول وخلينا نشوف المزيد من هذا العسل
طه الضرس .. حبابك استريح الموية والقهوة في رجاك ونحن في رجاك ولي حد ما تجي قال: أبعدنا الزمان من اللهيجو بشيقنا عاودنا السهر والنوم بقى مو رفيقنا يامتين نلاقيهو المنشف ريقنا ناخد بيعة من كف إيدو نحيي طريقنا
|
Post: #5
Title: Re: خيــيمة الحــردلو - العمارات
Author: Yassir Mahgoub
Date: 09-03-2002, 02:36 PM
Parent: #1
يا أهل العوض مشكور نداك لا نعدموا بس وديتنا لي بلدا ملولوا رطموا جاكسون دوبى ناس مقريت يترجموا نضموا و عقب أقين بليس هاردلو شقن عضموا
|
Post: #6
Title: Re: خيــيمة الحــردلو - العمارات
Author: Ahlalawad
Date: 09-03-2002, 02:54 PM
Parent: #1
الاستاذ ياسر لك الشكر والتحية والقطع اللخدر البتسوي فيه دا ما بنقدر عليه ياكين نديك من المدخور من حق الناس الليلة البرق من عصرو عمت الفجة مافي مضارى غير قرة وصقيعة ولجة في شان الزنازين والسجون والحجة ما بنتخلى يالصديق مرابيت قجة
|
Post: #7
Title: Re: خيــيمة الحــردلو - العمارات
Author: Yassir Mahgoub
Date: 09-03-2002, 02:59 PM
Parent: #1
الخبر البجي الصديق مقفل جوه حالف ما بقيف دونو إن بقيت في هوه ساعة الحاره تب ما بنسى شرط الخوه كباس للدهم عند البقول يا مروه
|
Post: #143
Title: Re: خيــيمة الحــردلو - العمارات
Author: الجندرية
Date: 12-23-2002, 09:26 AM
Parent: #7
ابشر يا ياسر والله لو كنت في البالتوك كت ختفت المايك وزغرته
|
Post: #8
Title: Re: خيــيمة الحــردلو - العمارات
Author: ALZOLZATOO
Date: 09-03-2002, 04:03 PM
Parent: #1
ياناس الخيم انا تب معاكم اصلو البورد الهناك والبي هنا اصلو مابتفصلو مدو السلوك والناس وراك يتصلو والزول البجدع للناس الما بتحصلو اها دايرين اب لسان ولا طوالي اقوم انصلو
ههههههههه يكه والله اول مره اكتب حاجه في خمس دقايق زاتوووووووووو
|
Post: #9
Title: Re: خيــيمة الحــردلو - العمارات
Author: singawi
Date: 09-03-2002, 04:18 PM
Parent: #1
خيمة الحار حبابـك زينة في المنشية بيـك اتشرفـت دار بكري صافي النية سائـل ربـي يحميكي وتكوني هنيـة ويكيفيك شر هناي ما نلقى فيكي عشية
أهل العوض لك الود
|
Post: #10
Title: Re: خيــيمة الحــردلو - العمارات
Author: Elkhawad
Date: 09-03-2002, 04:34 PM
Parent: #9
قالولنا الرحول للدارو في المنشيه اهل البلد اهل المراح والجيه ان بقت الديار دار بكري هي المعنيه ضابحين السمينه ام جنيات متكيه ناكل شيه حد من صباح لي عشيه
|
Post: #11
Title: Re: خيــيمة الحــردلو - العمارات
Author: Yassir Mahgoub
Date: 09-03-2002, 06:53 PM
Parent: #1
يا رب العباد عبدك تصلح أمورو و عيشنا يا من عايش الوطواط علي صنقورو ألكان جانا يا سنجاوي سوى أمورو نرحل في الصقيعه البوردي ما بندورو
|
Post: #12
Title: Re: خيــيمة الحــردلو - العمارات
Author: singawi
Date: 09-03-2002, 09:26 PM
Parent: #1
يارب العبـاد عـبـدك تنــور دربـو ومن قاموسو تحـذف شـرو ما يبادربو إلا ان جانـا يا خـلانـي واعلن حربـو نندهـ شيخنا يا ابو يوسف تمسكو تكربو
الأخ ياسر لك ودي
|
Post: #13
Title: Re: خيــيمة الحــردلو - العمارات
Author: Ahlalawad
Date: 09-04-2002, 06:26 AM
Parent: #1
الاستاذ ياسر محجوب لك التحية على هذا الابداع نحن في انتظار المزيد
الاخ الزول زاتووو انت ولسانك مرحبابك طرق اللسان وهات من آخر الجراب
الاخ سنجاوي حمدلة على الشوفة ومشتاقين أرجو أن نرى بقية المبدعين
جرحا فى عالجتو وابى ما يبرا جاب لى الطشاش والتانى عدم الخبرة اضوق الصحة لمتين والمنوسر يبرا من الخلا عندى الواسعة زي فم ابرة
|
Post: #14
Title: Re: خيــيمة الحــردلو - العمارات
Author: Al-Masafaa
Date: 09-04-2002, 07:16 AM
Parent: #13
مو نمر الشجر حاشاة كل و حاشا فرتاق للهمايل الفي العتامير طاشة ذو عفة و ثبات كرما معاه بشاشة و تشهد دار جعل يوم حريقة الباشا
|
Post: #15
Title: Re: خيــيمة الحــردلو - العمارات
Author: Shinteer
Date: 09-04-2002, 07:26 AM
Parent: #1
سلام يا اهلنا .. كيب حالكم كلكم .. إت وينك يا اهل العوض
|
Post: #17
Title: Re: خيــيمة الحــردلو - العمارات
Author: قرشـــو
Date: 09-04-2002, 07:39 AM
Parent: #15
اهل العوض لك التحية ومشتاقين والله
سلام ناس الخيمة ام غناياً حافل سلام يا اولاد بلدنا من الصعيد للسافل لمة رجال تلم الكبير والجاهل ان شاء الله معاكم نلقى لينا مداخل
|
Post: #16
Title: Re: خيــيمة الحــردلو - العمارات
Author: Ahlalawad
Date: 09-04-2002, 07:38 AM
Parent: #1
الاخ الخواض صح لسانك والله انا بيني وبينك في البداية كنت مفكر افتح الفرع في المنشية لي بعدين اتذكرت البوليس قلنا اخير العمارات بلدا ناعمة وهواها بارد
الاخ شنتير مالك بتزازي بي غادي قول اطربنا خلينا نسمع نمك
الاخ المسافة ، لك التحية وهاك من القديم
أبو كفة العلي الحركة البقوم متسرع واب حاجباً متل شوك الكتر متزرع الفارس الصميم الـ بالنصر متدرع وحوض الكوثر الفوقو البخات بتكرع
الاستاذ قرشو ، نحن المشتاقين بالجد وسعداء بمشاركتك وفي رجاك
|
Post: #18
Title: Re: خيــيمة الحــردلو - العمارات
Author: Al-Masafaa
Date: 09-04-2002, 08:07 AM
Parent: #16
شدولو الاغر انا منايا ليه ما تور البقر انا منايا ليه يا ود النقر انا منايا لية الدود النتر انا منايا ليه
|
Post: #19
Title: Re: خيــيمة الحــردلو - العمارات
Author: Shinteer
Date: 09-04-2002, 08:27 AM
Parent: #1
انا بزازي يا اهل العوض .. افو افو .. اها جيتك
ترعى و ناسي شوشيتك طوالة و عامرة تارك حجة الكاجرالها خيشة و دامرة يومنا الننوي لي التحت النهيدات ضامرة هبابة و لقت نار الصنوبر جامرة
|
Post: #20
Title: Re: خيــيمة الحــردلو - العمارات
Author: 7abib_alkul
Date: 09-04-2002, 11:20 AM
Parent: #19
جاعن بنات العز شبعا بنات الجوع اتقلع المؤتد وأتؤتد المقلوع ورجع المقدم واتقدم المرجوع
|
Post: #21
Title: Re: خيــيمة الحــردلو - العمارات
Author: taha
Date: 09-04-2002, 11:46 AM
Parent: #1
الزينين جميع بلا فرز ..كيف حالكم نعلكم طيبين وهاكم دي ********************
كيفن أهنا واعيش وانا صبري أمسى مودع سببي الرُخرُخ المن قام صغير متفدِع جنيت وجِني جنَّ وحالي أصلو مبدِع أهج شقيش شن فاضلي تاني اجدِع
**************
|
Post: #22
Title: Re: خيــيمة الحــردلو - العمارات
Author: قرشـــو
Date: 09-04-2002, 03:16 PM
Parent: #21
طه اخوى الكلام عندك والله
يا سلام يا اهل العوض
غايتو انا مستمع درجة اولى ودائما تلقانى ازازى اشوق اخر المشاركات تسلموا كلكم
|
Post: #23
Title: Re: خيــيمة الحــردلو - العمارات
Author: Yassir Mahgoub
Date: 09-04-2002, 03:45 PM
Parent: #1
قادر ربنا و جنبنا شر و مصايب و من ناس الإداره صدر قرارا صايب وكتين رقنا يا سنجاوي دلي الرايب ندرج الشوح علي القول الجميل الطايب
|
Post: #24
Title: Re: خيــيمة الحــردلو - العمارات
Author: يازولyazoalيازول
Date: 09-04-2002, 03:56 PM
Parent: #23
يا ياسر حبابك من الإدارة سلام ما شفت المشاكل جابو لينا كلام بكرى يجهز المنبر ويزيدو نظام وناسن تخربو الوطواط بدورلو ظلام
|
Post: #25
Title: Re: خيــيمة الحــردلو - العمارات
Author: Yassir Mahgoub
Date: 09-04-2002, 04:19 PM
Parent: #1
عقبان الشمس جات الوطاويط طشن جات الهامله و السعيات عموم إتمشن من صب الطريف الفي البوادي إترشن تعظيم يالإداره سلام نفوسنا أتفشن
|
Post: #26
Title: Re: خيــيمة الحــردلو - العمارات
Author: يازولyazoalيازول
Date: 09-04-2002, 04:37 PM
Parent: #25
ود محجوب يمين جبت الكلام موزون ودى المحرية فيك يا البى الضهب موزون ومن لبن السعية حرم تجيب ماعون تشرب انت والجنيات وتروى بطون ما أصلوا الإدارة القالوا زى شمشون تناصر الحق تقاوم ابليسهم الملعون
|
Post: #27
Title: Re: خيــيمة الحــردلو - العمارات
Author: singawi
Date: 09-04-2002, 11:30 PM
Parent: #1
الحبيب أهل العوض لك الود مشكور على خيمة المنشية تبارك الله عامرة ونايرة والجديد شديد وهاك بليلة مباشر
يعجبني الكريم من جلدو يكرم ضيفـو ويعجبني الحليم يطـول حبالو بكيفـو ويعجبني الحكيم بحـراً ممهد قيـفـو وللفايت الحـدود أحمر مسلط سيفـو
ود محجوب أخوي الدنيا ما دار راحـة يوم تديـك نسيـم ويوماً عجاج كتاحة ويوم توريك رجال أصلاً كريم وفصاحة ويوم أشباه رجال جهلاً سياجو بجاحـة
يازول الحبـيب الليلـة جـبـت كـلام أنعـش فكري خلى خيالي حـوم وهـام بكري يجهـز المنبـر ويزيـدو نظـام وناساً تخربـو الوطواط بدورلو ضـلام
|
Post: #28
Title: Re: خيــيمة الحــردلو - العمارات
Author: Elkhawad
Date: 09-04-2002, 11:38 PM
Parent: #27
سنجاوي اخوي نضمك سمح بالحيل كلامك في الورق زي سباق الخيل قول وكـتر في النم الجميل ياها المحريه فيك يازول بلاد النيل
|
Post: #29
Title: Re: خيــيمة الحــردلو - العمارات
Author: Shinteer
Date: 09-05-2002, 04:07 AM
Parent: #1
أهل العوض .. اين أنت يا عزيزي المزازي؟ لماذا هذه المزازاة بالطوالة؟ ما تبقى داخل آعشاي
|
Post: #31
Title: Re: خيــيمة الحــردلو - العمارات
Author: Al-Masafaa
Date: 09-05-2002, 07:15 AM
Parent: #29
السودان وطنا و تب شبر ما بندي الا مراكب العدو فوق دمانا تعدي حافظين للجميل و قلوبنا ما بتصدي ابشر يا هشام قراركم مريح و مندي
|
Post: #30
Title: Re: خيــيمة الحــردلو - العمارات
Author: singawi
Date: 09-05-2002, 07:09 AM
Parent: #1
الأخ هناي اعتذر عن تلميحاتي الواضحة فما كنت أعلم شهد الله انك عاجز عن الرد وااااا أسفااااااااي
|
Post: #32
Title: Re: خيــيمة الحــردلو - العمارات
Author: Shinteer
Date: 09-05-2002, 07:37 AM
Parent: #30
وينك يا سنجاوي .. كيف حالك ياخي؟ هناي ده اوعى أكون أنا بس؟ إن شاء الله ما اكون
|
Post: #33
Title: Re: خيــيمة الحــردلو - العمارات
Author: Al-Masafaa
Date: 09-05-2002, 08:22 AM
Parent: #32
يا ريح الصبا الجيتينا من ابو سالف و كيف سبيل فراق زولا عابد و خالف الخلاني فوق نيران جهنم تالف بالحيل فراق الزول بعد ما يوالف
|
Post: #34
Title: Re: خيــيمة الحــردلو - العمارات
Author: DEEK_ALJIN
Date: 09-05-2002, 08:40 AM
Parent: #33
سلام اهلنا سلام من ديكن المجنون
زولا كلامو كتير ولسانو تب مسنون
بس زول الله ساكت طيبا شديد وحنون
دايرلو فرقه معاكم فى داركم المامون
ديكو
|
Post: #35
Title: Re: خيــيمة الحــردلو - العمارات
Author: يازولyazoalيازول
Date: 09-05-2002, 08:51 AM
Parent: #34
ديك الجن حبابك الليلة جاتنا بشارة وبى رغم الزعل من شيتن اسمو إدارة بنحييك ونفرح بى طلتك فى الحارة وعارفنك سمح نية واخو الأخوان وزول حارة
|
Post: #36
Title: Re: خيــيمة الحــردلو - العمارات
Author: Shinteer
Date: 09-05-2002, 08:53 AM
Parent: #1
مرحب ديكنا جيت لينا آلبخات أقدامك نختك تاج على راسنا و نقيف خدامك نفرش ليك حريرنا و ننستر في طعامك و أكان داير تجكس ده الجداد قدامك
أها قصرنا معاك؟ ابقى داخل آبوي .. و اعزل ليك جدادة كان عندك رغبة
|
Post: #37
Title: Re: خيــيمة الحــردلو - العمارات
Author: يازولyazoalيازول
Date: 09-05-2002, 09:02 AM
Parent: #36
يا شانتير أخوى الديك بدورلو جدادة حت لو كان منتف ريشا باقية جرادة أصلو الديك زعل لا حولا ليه لا ارادة قال فاصلين صحابو الدنيا يوت سدادة
|
Post: #38
Title: Re: خيــيمة الحــردلو - العمارات
Author: DEEK_ALJIN
Date: 09-05-2002, 09:11 AM
Parent: #37
الزول يازول سيد الفهم والقول خجلتونا تب وياهو الفبكم مامول كرمكم الفياض غرقنا لى ها الحول شانتير حبابك وتجكسك مقبول جدادتك المطلقه وليداتها ماله الهول ده طرفى منها واتنازلت ليك يازول
ديكو
|
Post: #39
Title: Re: خيــيمة الحــردلو - العمارات
Author: يازولyazoalيازول
Date: 09-05-2002, 09:17 AM
Parent: #38
يا ديكنا الحبيب سيب الجداده حداك وأنا عندى الأرانب والحقة والتمباك واعزل ليك جدادة سمينة نقتا كاك كاك أحسن من عزوبيتك ونفوسنا ديمة فداك
|
Post: #40
Title: Re: خيــيمة الحــردلو - العمارات
Author: DEEK_ALJIN
Date: 09-05-2002, 09:18 AM
Parent: #37
انا مازعلت يازول ولا اتغيرته ولاهم صحابى ولا اتلاقينا فى حته الا قلت حق عشان ابرى الجته وخايف على رقيبتى تجزوها بالكسكته
ديكو
|
Post: #42
Title: Re: خيــيمة الحــردلو - العمارات
Author: يازولyazoalيازول
Date: 09-05-2002, 09:25 AM
Parent: #40
تسلم رقبتك وانا رقبتى ديمة فداك كترت الكلام والكورة فى مرماك رفدناهم عشان تنظف ملاعبنا ونهز لى شباك دخل قونك القون فاضى وانا الهامباك
|
Post: #41
Title: Re: خيــيمة الحــردلو - العمارات
Author: taha
Date: 09-05-2002, 09:20 AM
Parent: #1
الحبان رواد الخيمة جميع كيف حالكم..نعلكم طيبين
اهل العوض عووك آزول بقى عليك المثل البقول البيت محروس وستو تكوس ورينا بكان نجعت آزول الله يجازي محنك.
ياسر محجوب السنجاوي قرشو يازول يازول
والله زي مابيقول اهل العوض انتو شغلكم ختري خلاس ..والله تب ما بتجادعوا..والله شغلكم نضيف ليكم التحيه..وهاكم دي من عمكم ود شوراني
************************
ياتمرة كريمه القاد سبيط عرجونك ديسك كابي خمره وصندليه دهــونك يقلق ويفقد الحيا والعقل مسـجــونك مهووس بيك وذنبي عليك بقيت مرهونك
*****************
|
Post: #43
Title: Re: خيــيمة الحــردلو - العمارات
Author: Shinteer
Date: 09-05-2002, 09:32 AM
Parent: #1
يازول زز يازول
ضحكتني ياخي .. الله يجازي محنك .. الديك ملينا ليه سدرو جداد .. خليه يكرب تكتو و يتحزم
أخوكم شنتير .. و ليس شانتير
|
Post: #44
Title: Re: خيــيمة الحــردلو - العمارات
Author: DEEK_ALJIN
Date: 09-05-2002, 09:40 AM
Parent: #43
قتلك من زمان يازول كلامى كتير سن القوانين ده كلاما كبير وخطير قلبنا الصفحه عشان الرقاب ماتطير والجنيات ان شاء الله يلحقو حمام شنتير تسلم لينا زولا دايمن حكيم وقدير
|
Post: #45
Title: Re: خيــيمة الحــردلو - العمارات
Author: يازولyazoalيازول
Date: 09-05-2002, 09:46 AM
Parent: #43
يا ديكنا الظريف كرب تكتك واتحزم من شنتير جداد بى سدرو ليك متلزم وأرقد عافية عوعى وصحى كل متأزم ومنى هدية ليك من مكة موية زمزم
|
Post: #46
Title: Re: خيــيمة الحــردلو - العمارات
Author: Ahlalawad
Date: 09-05-2002, 10:02 AM
Parent: #1
آخوانا .. سلام عليكم
والله أوضعتم تخاجلنا .. الشي البتسووا فيهو دا شي يفرح .. أنا طبعا ما بقدر على القطع اللخدر دا .. ياكين بجيب ليكم من الحافظو من الناس ..
طه وشنتير .. البيت محروس حرسة مجيهة .. كتر خيركم وكتر خير الاخوان سنجاوي ، الخواض ، يازول ، المسافة وحبيب الكل .. والخيمة للجميع،مشاركة الجميع .. أشكر الاعزاء يا زول وشنتير والخواض الذين ملأوا الخيمة لامن قالت بس وأصبحت مفتوحة أربعة وعشرين ساعة بهذا الادب الراقي وفوق ذاك كله رحبوا بالضيوف الذين أصبحوا شركاء أصليين .. كالاستاذ ديك الجن والاستاذ قرشو والشاعر الصنديد ياسر محجوب .
الله يديكم العافية ونسمع ونستمتع بفنكم الرائع ..
في الخيمة القديمة كنا نركز على المحفوظ من الدوبيت في أغراضه المتنوعة ، ألبل ، البنات ، الكرم والشجاعة وغيرها .. لاكين انتو أضفتوا شيء جديد وهو انتاجكم الشخصي من القطع اللخدر . الله يزيدكم من نعيمو .. أما أنا فهاكم في الابل :
رفاعة الربة قافاها البليب متدلي زي الفاقد الاطفال بقيت متبلي المربوعة قامتو وبالردف متعلي ذكروا غيابو من غيرو الانس ما بسلي
|
Post: #47
Title: Re: خيــيمة الحــردلو - العمارات
Author: يازولyazoalيازول
Date: 09-05-2002, 10:18 AM
Parent: #46
أهلا العوض حبابك حباب الزين
علا أخونا سنجاوى الظاهر عليه مغبون بالحيل
عليك الله أسعلو شوفو لينا مالو عشان يفش غبينتو وغبينتنا كمان
|
Post: #49
Title: Re: خيــيمة الحــردلو - العمارات
Author: DEEK_ALJIN
Date: 09-05-2002, 10:42 AM
Parent: #47
يازول ياخوى وقت الدوام شتت بكلامى معاك والله غبينتى اتفشت طلعت الكلام واضح ماهو مغتغت صفيت النفوس من الشوايب نضفت قوم امرق خلاس .. جهز عشاك امفتفت ناس ابحراز واساسى مابخلوك اكان الناس دى الليله ما اتعشت
|
Post: #51
Title: Re: خيــيمة الحــردلو - العمارات
Author: يازولyazoalيازول
Date: 09-05-2002, 11:19 AM
Parent: #49
عشا ام فتفت بدرور كمان معاها كوارع كمونية ساخنة والشطة فيها تضارع ناكل بى هناك فعل حاضر ماهو مضارع ياريتك تشاطرنا العشا وبعد الأكل نتصارع
|
Post: #48
Title: Re: خيــيمة الحــردلو - العمارات
Author: Ahlalawad
Date: 09-05-2002, 10:37 AM
Parent: #1
الاخ يازول هذا السنجاوي أب نضما يداوي مو زعلان ، لاكيين .. غالبة عليه الحنية ، باقي بريد البنات
خلني أديك ليهو شوية من البنات
يامن خلقتني وخلقت الصيدة في مرعاها حلحل روحي من حبل الشقاوة كفاها قدر ما اتذكر من خدود اطرها اتب من نومي واتلافى الهبوب أختاها
|
Post: #50
Title: Re: خيــيمة الحــردلو - العمارات
Author: Ahlalawad
Date: 09-05-2002, 11:03 AM
Parent: #1
ديك الجن
كيف حالك آعشاي ياخ ما تعزمونا معاكم .. جدادكم دا تضربوهو براااكم ، أكلو ان شاالله ينفعكم لاكين ياخوي الجداد اليومين دي مطلعين فيه اشاعة قوية خاصة بالنسبة للناس الماشين يعرسوا انا شختيا مكجنو خاصة الجداد الميت بتاع كنتاكي
|
Post: #52
Title: Re: خيــيمة الحــردلو - العمارات
Author: taha
Date: 09-05-2002, 11:40 AM
Parent: #1
اهل العوض خبر شنو آزول الجبتو في الجداد ..والله دا كلاما بجيبلو مشاكل...دحين ناس ديك الجن ويازول ديل يمشو وين...انت سمعت نكتة الديك البلع الداهية الاسمة الفياقرا..عاد يا اخوي دي مابتتقال هنا باقي الادارة اليومين دي قالوا سمها فاير يمرقنا منهم ودحسونه..وهاك دي
*************
مانـــــــي الفاسد ال بي الكِضبْ بِتنبّــــىّ
ســــــــارح بى العــــُروض لي جارتي ما بدبّى
ياستــــــار من نضم الخشوم والسِبـــــــــــّة
انا اخــــــــو الزينة عند حل الرفيق والضّبـــّة
******************
|
Post: #53
Title: Re: خيــيمة الحــردلو - العمارات
Author: Ahlalawad
Date: 09-05-2002, 12:00 PM
Parent: #1
طه ،، وينك آ عيسي ،، ماك طيب
الديك البلغ الفايغرا ما سمعت بيه لاكين سمعت بالديك الشجدو صاحب مزرعة الدواجن .. في النهاية رجعو لي سيدو وقال ليه .. باقي نومي تقيل شوية .
اها قال ليك :
ماني ربيب بيوت بعقب بحل الصرة وماني الخاين الـ بتبدك آ حرة بختر ديمة في وسط الهجايم برة داخرو ضراعي لي يوما حديدو مشرة
ناس قدر الله قاعدين في البيوت ما بخترو ومن كبيها وكشف الحريم ما بفترو اخير اختر براي اسد الرضيمة بنترو صاحبي ان زل ما بفشابو سرو بسترو
|
Post: #54
Title: Re: خيــيمة الحــردلو - العمارات
Author: Yassir Mahgoub
Date: 09-05-2002, 12:48 PM
Parent: #1
الأخوان عموم من أهل النم و الغنا نرجع للمحفوظ و المدخور من كلام أهلنا السمح بالحيل
بينك وبين بلود العندو فوقنا حقوق جاك صياً فسيح واطاتو فيها شقوق علي سكر نبات الفي العلب مدقوق قماري الجالسه خليتن يسون قوق
|
Post: #55
Title: Re: خيــيمة الحــردلو - العمارات
Author: taha
Date: 09-05-2002, 12:54 PM
Parent: #1
ود محجوب ..هلا هلا والله ياهو ده النضم.....وامسك دي
***************
الليلــــــة الغول بــــــــــــدا لو جفيــــــــــــــل
نقــــــرة قيد والله خوفــــــــــــاً من دمـــــــاس الليل
الزول البراطمــــــو محبّكــــــــــات بالنـــــــــــــيل
خلّا جــــــــــرايده واحدة تدوبـــــــــي واحدة تكيــــل
****************
|
Post: #56
Title: Re: خيــيمة الحــردلو - العمارات
Author: Yassir Mahgoub
Date: 09-05-2002, 01:11 PM
Parent: #1
هلا هلا يا طه تميت كيفنا بغول ود ضحويه و هاك من العاقب ود موسى
بسم الله يا عالم سراير العامه شديت كوري فوق تيسي أبحجامةً جامه من هفت لي ست ريدي أم نفايلاً تامه بقيت نفسي من كل اللذايذ طامه
|
Post: #57
Title: Re: خيــيمة الحــردلو - العمارات
Author: taha
Date: 09-05-2002, 02:25 PM
Parent: #1
يا سلام ياود محجوب نضما سمح بالحيل...وهاك المسدار ده من عمك عبدالله ود شوراني
***************
غاب نجـــــــم النَطِح والحر علينا إشتدَ ضَيـقـْنـا وقِصــــر لَيلُو ونهـــارُوْ إمتدَّ نَظِرة المنـــــُّو للقانون بِقيـــت إتحدَّى فتحـــت عنــدي منطقـــة الغُنا الإنســَدَّ
*****************
|
Post: #58
Title: Re: خيــيمة الحــردلو - العمارات
Author: singawi
Date: 09-05-2002, 06:51 PM
Parent: #1
الخواض أخـوي إت من زمان عاجبني درشك مو خمج زينـة وغناك بطربني أجـر النمة يا قمـري الفروع جاوبني وين القاهو سيد عمري البيهدم ويبني
وين القاهو حاكم بي عذابي غرامـو وين القاهو طاعم زي وجيهو كلامو وين ألقاهو ناعم صافي دافي سلامو شاغل بالي سهران والعـوازل نامو
|
Post: #59
Title: Re: خيــيمة الحــردلو - العمارات
Author: Al-Masafaa
Date: 09-06-2002, 08:47 AM
Parent: #58
ما مابين علي زولا عمل ارباحو و ما بننكر علي ذي همة عالي نجاحة لكن نحن ضد يبلع وطن تمساحة و الجاهل الصغير يصبح لحم في ملاحة
|
Post: #60
Title: Re: خيــيمة الحــردلو - العمارات
Author: taha
Date: 09-06-2002, 09:20 AM
Parent: #1
السنجاوي المسافه الحبان جميع *****
المسافة نضمك حق مابدورلو دليل كان سمعوه ناس عمر كان بلدنا ذيه مافي مثيل وما كان جاتنا المشاكل والشفا انضرب بالليل ولا الناس اتشتت ذي بيوتا كسحه السيل يا رب العباد تنجينا من شر ذي ديل يضحك النيل ويرقص التوتيل
*********
|
Post: #61
Title: Re: خيــيمة الحــردلو - العمارات
Author: Yassir Mahgoub
Date: 09-06-2002, 12:31 PM
Parent: #1
أح واغلبي يا الخواض و رقة حالي ببكي و أدوبي يا سنجاوي فوق الخالي من جرع البنوني الطعمو رايق و حالي وادعني و رجع لاهي بشبابو و خالي
|
Post: #62
Title: Re: خيــيمة الحــردلو - العمارات
Author: singawi
Date: 09-06-2002, 04:47 PM
Parent: #1
العزيز شنتير
حشاك من حال هناي درشك دقاقة وناعم عقب يا جنى .. عقب
العزيز طـه حبابك أخوي شغلك كتر .. اتوصى وكتر من ود شوراني إلا خطك صغرو شوية .. بساعدنا في الطباعة والتوثيق للخيمة
الحبيب يازول الغبينة اتفشت اصلي ما بحمل الهبشة بدون سبب وبحاول اتعلم الصبر إلا الطبع بيغلب التطبع عشان كدا مرة مرة الفي القلب بيظهر على اللسان وبظهوره على اللسان بتفشى ويسلم الصدر
أهل العوض يازول روق المنقة وخت الكورة في الأرض ودردقها بشيييييييش مالك عايز تجيب لينا الهبوب والكتاحة أصلو الانجليز حوالينا والإيد بقت ملوية قال بريد البنات قال ما الغنا دا .. دا ما كلام شعراء سااااااااااي البنوت لا بريدن ولا مكسر فيهن ولا بعجبني كلامن الطاعم وناعم وجمالن البرمي في الشوك دا لا شفتو ولا بعرفو إلا جميل قال:
يقولون جاهد ياجميل بغزوة .... وأي جهاد غيرهن أريـد لكل حديـث بينهن بشاشـة .... وكل قتيـل بينهن شهيـد
الله يدينا الشهادة والعمل الصالح دي فيها حاجة دي
والسنجاوي قال
مولاي يا كريـم ارحمني غيـر حالي نسيني الأسرني عبيـر نغيمو الحالي النشف دموعي ودمعـو ما سحـالي ريدو ربيع حياتي وسر شقاي الحالي
|
Post: #63
Title: Re: خيــيمة الحــردلو - العمارات
Author: Ahlalawad
Date: 09-07-2002, 08:48 AM
Parent: #1
عمار الخيمة سلام دام عزكم .. والله مالين السمع والشوف الله يكتر من أمثالكم سنجاوي .. ياسر محجوب - طه - المسافة الخواض وبقية الجنيات
أها .. كنا في درب المعايش
طبعا انا ماعندي قدرة زي نضمكم البتسووا فيه دا لاكين الشاعر القديم قال
صغيران نرعى البهم يا ليت أننا إلى اليوم لم نكبر ولم يكبر البهم
أها
دايرين كل واحد يسويلنا شيتن يجاري بيه كلام الشاعر دا .. دوبيت سوداني قطع أخدر
|
Post: #64
Title: Re: خيــيمة الحــردلو - العمارات
Author: Al-Masafaa
Date: 09-07-2002, 09:09 AM
Parent: #63
الليلة العديل و الزين اليلة العديلة صافية ليك بياضاء
|
Post: #65
Title: Re: خيــيمة الحــردلو - العمارات
Author: taha
Date: 09-07-2002, 11:36 AM
Parent: #1
الحبان جميع ...سلام بلا فرز
السنجاوي ود محجوب المسافه اهل العوض الخواض يازول يازول ديك الجن وبقية زوار الخيمة الكرام
************
السنجاوي آخوي كيفنك ..ومشتاقين كتير والله ..قلت لي شغلك كتر ..كتر خيرك آزول هو شن جاب لي جاب ..والله نحن حيران في شياختكم وزي غناك ونضمك حرم حبه منو مابنقدر عليها ..علا ترانا بنداقش مره نصيب وميه نخيب ..الجنيات ناس المسافه وود محجوب النضم عندهم وود محجوب ده بالخصوص ما بتجادع تب .. يديك الصحة والعافية يا جنى الزينين. ********** اهل العوض ..انت بتغطس وين يا مقطوع الطاري ..والله محنتنا تب ..الله من خلقني ما شفتلي زولا ينجع ويخلي الناس في بيته ..اظهر آزول والله نسويلنا فيك غنوة تلحقك اماتي القبيل...اها رايك شنو ***********
|
Post: #66
Title: Re: خيــيمة الحــردلو - العمارات
Author: Ahlalawad
Date: 09-07-2002, 11:51 AM
Parent: #1
طه الضرس آزول أكبر ها شن قدرني على زعلك أنا قت لك قفاي أعوج الحكاية فيها أكل عيش وقطع رزق باقي علينا حكم الانجليز والليد بقت ملوية ترا كل ما نلقى ليها هبرة بنظهر
أها ما قلت لي .. رايك شنو في البيت الفوق دا .. بتاع البهم؟
|
Post: #67
Title: Re: خيــيمة الحــردلو - العمارات
Author: singawi
Date: 09-08-2002, 05:52 PM
Parent: #1
أهل العوض
الشي الجبتو دا بيت واحد ولكنه مليان معاني عجيبة خلاص وهموم الدنيا الفي رويسي دا اليومين ديل سدت علي باب الغنا الواسع لكن عجبتني الفكرة .. عشان كدي هاك دي على علاتها
من قومـة الجهل أنـا والحمامة نقوقـي أكرف في الدعاش هاني ومعاي معشوقي كبـرت فارقتنـي وحلقـت بـي فوقـي ياريت لا كبـرنا ولا انكويـت بي شوقي
|
Post: #68
Title: Re: خيــيمة الحــردلو - العمارات
Author: WAD ELGAALI#4
Date: 09-08-2002, 06:32 PM
Parent: #67
آناس سلام والله كلامكن حلو بلحيل أهل العوض والله آجنا الخيمة الفاهمه عندك والجنوى ديل والله ماخلولن شيتا ناقص علا نحن والله إلا نساهم بحق الرجال ويا قولك جنس القطع اللخدر دا ما بنقدر عليهو ياكين كمان ما بنقدر نفوت ساكت أخوك يا ريّة أخوك وقت الخيول يدبكن
اخوك يا ريّة أخوك وقت الرماح يشبكن
أخوك جبل الثبات وقت القواسى يتحبكن
كم بكيت وكــم قشيت دمـوع الببكن
|
Post: #69
Title: Re: خيــيمة الحــردلو - العمارات
Author: Yassir Mahgoub
Date: 09-09-2002, 06:37 PM
Parent: #1
يا سنجاوي نشهدلك نضم و براعه فصلت الحرير الماهو بوبلين باعه في الظبي أب رشيرشا زي ثواني الساعه سام روحي و نفر ضيع تلات أرباعه
يا حليل الصبى و تومتي المسك فواحه في عشيب الأرض سايقين بهمنا مراحه كبرت فارقتني و أعدمتني الراحه و ربعنن البهم عاد لحقن أمات طه
|
Post: #167
Title: Re: خيــيمة الحــردلو - العمارات
Author: almulaomar
Date: 12-25-2002, 08:17 AM
Parent: #69
الأساتذة الكرام أشهد الله أنكم رائعون مبدعون
|
Post: #70
Title: Re: خيــيمة الحــردلو - العمارات
Author: Yassir Mahgoub
Date: 09-09-2002, 07:34 PM
Parent: #1
ياللأخوان عموم و خسوسا أهل العوض
مالكم هملتوا الخيمه لامن شالته السفايه لا ورا أها النرفعها ليكم بي قول ود ضحويه السمح
قمنا مشرقين ديك البقيت بتوايق لجت بت عمر سرفن دموع المايق قام بينا الضرير ما بروق ملقلق ضايق دارج الشوح علي الكسب الوراهو طبايق
سيدك وارك الغلبه و مشي الكرعين نبت فد مره يا ساحر الغروب من وين يا الغول بت عمر ننظر جبينها متين مالك يالضرير فارق صباح أم زين
|
Post: #71
Title: Re: خيــيمة الحــردلو - العمارات
Author: Ahlalawad
Date: 09-10-2002, 06:46 AM
Parent: #1
الاخ ياسر محجوب يسلم فمك والله نضمك شي يخوف .. دا نجر مختلف وشغل معلمين الله يحفظك أنا أخشى أن بقية عمار الخيمة خافوا من هذا المستوى الرفيع الذي ظهر به شعرك ، وبالفعل أعرف واحد شاعر صنديد ومبدع حقيقي قال إنه من شدة اعجابه بشعرك تردد في المشاركة إلى جانبك فلك التحية
أما عني فقد حصلت حاجة غريبة أمس .. طول اليوم كنت أحاول الدخول ولسبب ما كنت لا أستطيع الدخول إلى المنتدى إلا عن طريق المسنجر . واليوم انحلت بحمد الله وجهود الاخوان في الادارة
وسأعود إن شاء الله
أبيض ما انتر مسك الدرب واتناحى تقول مكتوب لو آيات النجيع في الراحة يجدع باع ويسرق نفسو بي بالراحة مخلفوفتو بتجض مثل الكمنجة صياحا
|
Post: #72
Title: Re: خيــيمة الحــردلو - العمارات
Author: Al-Masafaa
Date: 09-10-2002, 06:55 AM
Parent: #71
نحن اللي عروضنا لئام و جبارين و يغلبنا الصبر يا الملكة صبارين سودانية نحن و ميسنا ماها قريبة قول لعزولنا حاذر ما بتلقي فينا طريقة
سمح الخبر جابوا هوي الليلة ديل اخواني ما اتلوموا
|
Post: #73
Title: Re: خيــيمة الحــردلو - العمارات
Author: DEEK_ALJIN
Date: 09-10-2002, 07:35 AM
Parent: #72
اهل العوض نور ديارو الليله انفك ساجورو وكرامتو بليله اهلا بيك حبابك والدار عمار بى سيده ود محجوب تب ماقصر اتحزم وشال الشيله يازول يازول ..تعاليا النقولك قوله
ديكو
|
Post: #76
Title: Re: خيــيمة الحــردلو - العمارات
Author: nazar hussien
Date: 09-10-2002, 09:58 AM
Parent: #73
اهل العوض وكل الحبان آ ناس نضمكم ده ختري خلاص
سنجاوي وود المحجوب كلامكم ما بنزاد كلو كلو لكن نحاول غايتو نسوي شنو
البهم القبيل كنا بنسوقو ونسرح ونفرح بي وراهو نغني شوقنا ونشرح نبني بويتنا طين وللواطة نملا ونمسح يا ريت قرنو لا قام لا رسمنا اتكتح
كم مثلت تاجوج وانا ود محلق مسرح وكم تاتينا زي مفطوم يقوم ويترنح وقت ما فرهد العود والبهم بقي يطرح تفيت للزمان ما اتعلم يجمع ويطرح
|
Post: #74
Title: Re: خيــيمة الحــردلو - العمارات
Author: Shinteer
Date: 09-10-2002, 09:21 AM
Parent: #1
يا اهل ا لعوض .. قطع شك كلامك القلتو عن الزول المعحب بي ياسر محجوب قاصدني بيه انا .. و كلامك صاح انا الزول هذا الاسمو ياسر ود محجوب غايتو ختيتلو الصحة .. بقيت بجي بتاوق بس اشوفو كتب شنو .. و عيك بكب الزوغة لي مراحي
البارح بالحيل اتظكرتك يا اهل العوض .. لانك بتسعل مني .. إن شاء الله ما سعلت منك شينة
هنا في الفرقة دي انا داير اهديلك مسدار اسمو اهل العوض .. عربون صداقة و خوة في الله و في ام زور الصاديدت ماسكة الخلا المتقفر .. و خلي اي زول يرمي عوده
بسم الله
يا اهل العوض من قلبي ليك سلامي عارفك كان كبس همي بتقيف قدامي سعالك مني جدد لي جرحاً دامي جرح الابعدوا و ريدهن سكن في عضامي
أكان الدنيا يا اهل العوض بتطاوع شن نزلني من ضهر البزيم و بباوع فارقت البطانة و قشها المتناوع نفسي اتقفّلت غير قوت بقنّب اتاوع
يا اهل العوض بعد المسافة الفارق خلا لقانا مستعصي و بدور له خوارق طريتني البطانة و حر سمومها الحارق و طريتني الحنين و كتين يشيل لها بارق
|
Post: #75
Title: Re: خيــيمة الحــردلو - العمارات
Author: Ahlalawad
Date: 09-10-2002, 09:45 AM
Parent: #1
حباب الذكرو حاضر ديمة ماهو مغيب حباب شيخ العرب شنتير نعلك طيب البعد الحصل بيناتنا وسمو كعيب بدور اسمع غناك ان شا الله تبقى قريب
بعد حصل القرب والفنقة ديك اتدانت والحاسوب نضم هرجي الحروف يتقانت وفد سلقة بتجيب خبر الحروف إن بانت نسو نضمي الترك في الحين يجيك في بكانك
آزول ها .. بحرك بعيد أنا ما بباريك ، تودرنا ساكت
لاكين هاك دي من جقلة فيها وسمكم :
جقلة كناجها فرسانها السمان درقكن في بحر الهلاك طايعين غصب غرقكن ود شنتير كتير فوق نارا كفى درقكن علب نار كدوسو وفي الرضيمة حرقكن
ويوما بي لقيط حنتوت معاه شري يوم عانية البروق مجموعة شاقة الصي جقلة معزة ام جمراً مولع حي الموت فوقكا لا اقول ليك ولا تقول لي
|
Post: #77
Title: Re: خيــيمة الحــردلو - العمارات
Author: Ahlalawad
Date: 09-10-2002, 11:22 AM
Parent: #1
الاخ سنجاوي .. ونضمك صح يداوي
المعذرة الشديدة لسببين أولاً أمس كما يعمل الكثيرون كان عندي مشكلة في الوصول إلى المنتدى ثانيا أنا فعلا شفت قطعك الاخدر في بيت البنية والبهم ولم أشا أن أرد لأني ليس لي المقدرة على مجاراة هذا الابداع وفعلا لم يكن لدي شي للمجادعة ولكن عجبي البيت وأردت أن تشتركوا في المجاراة
أعتذر مرة أخرى وأطلب من عمار الخيمة أن يدخلو أجاويد حتى نصلح ما حصل من خراب إن وجد
ورغم عجزي عن النظم المجيه أهديك هذه
سنجاوي العزيز نرجوك تسامح ترضى ما بنحمل عتابك ندمنا ليك صار فرضا نفسك عالية معروف العفو فيك فرضا قرضك للشعر قرض المنافسين قرضا
|
Post: #79
Title: Re: خيــيمة الحــردلو - العمارات
Author: wadazza
Date: 09-10-2002, 11:28 AM
Parent: #77
شرد مطر الدغش من شقةمقفولة باراها النعاس لامن قعد بى طولا حباسة النفس اتكرفت من قولا طار عصفور برق ينقر عيون مغسولة يابت الشدر ليلك قصب، مشغولة زحى ضرا الحديث خلي لى كلمة أقولا
تحياتى ودعزة
|
Post: #78
Title: Re: خيــيمة الحــردلو - العمارات
Author: Ahlalawad
Date: 09-10-2002, 11:24 AM
Parent: #1
الاخ العزيز نزار
أولا مرحب بيك في هذه الخيمة الوهيطة شكرا على الاستجابة لمجاراة البيت وكما أسلفت للأخ سنجاوي لم أستطع أن أجاري هذا البيت لكني اكتفيت بعرضه عليكم واستمتع بردودكم بهذا النظم العجيب تحية لك وشكرا
|
Post: #80
Title: Re: خيــيمة الحــردلو - العمارات
Author: Ahlalawad
Date: 09-10-2002, 11:36 AM
Parent: #1
العزيز ود عزة
هذه نمة مجروحة .. في شي من علقم الغربة الله يلمنا .. ويلم كل غريب
|
Post: #81
Title: Re: خيــيمة الحــردلو - العمارات
Author: singawi
Date: 09-10-2002, 02:25 PM
Parent: #1
الحبيب أهل العوض
يازول دا من كرمك وطيب نفسك واحساسك المرهف الله لا جاب الزعل نحن أخوان سماح المابتخبر زعل هترشتي ديك كانت لأني ظنيت انك ما شفت مساهمتي وقصدت الفت نظرك ليها دي كل الحكاية وانت يازول ما عندك عوجة تب وغناي بالحيل .. ما تتردد وارمي لي قدام
الحبيب نذار حبابك ألف نورت خيمة العمارات ما تبخل علينا والي التطريب غرد أنا منك قريب ياحمـام
|
Post: #82
Title: Re: خيــيمة الحــردلو - العمارات
Author: nazar hussien
Date: 09-10-2002, 03:22 PM
Parent: #81
الشيوخ سنجاوي واهل العوض
حبابكم الوف وشكرا لترحيبكم
اهل العوض المره الجاية اختارلك بيتا ساهل يا ود ابوي
الكلام الجبتو ده ملان خلاس خللنا فرقة النشارك
مسعولين من الخير شيخ العرب الخيمة مو خابرها
غايتو مريت بي زولا لافح توبو ومن بعيد النضم ياهو بيقولولو طه يبقا لي ياهو زاتو عل مالو غير اسمو دحين انبقيت مو في افزعو
الخيمة دي هنا همبريبها يضارب
|
Post: #83
Title: Re: خيــيمة الحــردلو - العمارات
Author: Yassir Mahgoub
Date: 09-10-2002, 03:47 PM
Parent: #1
الأحباب من أهل الخيمه ناس الكلام السمح و الله الخيمه عامره بكل جميل ولطيف من المساهمات من أهل العوض و يا زول وطه و الزول زاتو و الخواض و سنجاوي و قرشو و المسافه وشنتير و حبيب الكل و ديك الجن و ود الجعلي و نزار حسين و ود عزه
يعني ما شاء الله فيهم الحافظ الجميل من الكلام و فيهم الشعراء الصناديد و فيهم البقطع الكلام الظريف و الطريف
أما سنجاوي و أهل العوض و شنتير و الخواض و نزار فهم أسياد الكلام و زايدين معاهو في التواضع و اللطف..... كلامكم سمح بالحيل و الواحد و الله يتشرف يكون جليسكم في هذه الخيمه الجامعه و ينهل من جمال كلامكم الصافي الأصيل و دمدتم و دام هناكم و صفاكم يا أهل النم و الغنا..... و هاكم من القطع و كلام ود محجوب في بنوتنا السمحات
طبق القيد علي في جلدي علَّم وحزَّ و شال قلبي و قفل سوالو طبله ورزّه وكت بالشوف أبيت كان في غميضة الهزه يكفيني النسيم جاب من دعاشك رذَّه
أرُقصي و سوي فوق الداره قوم العايمه و ما شبهك عوينات أم نفور الحايمه سدرك جوز طبنجي و بي رصاصك قايمه هنضب يا قلب خش الحراسه الدايمه
يا الظابطيه سجلي للبلاغ الآتي في شويفع الظبا المن دابو قام بيتاتي شال نومي و هجم بي جيش خيولو عواتي عسكر في الضمير، قال لي براك الخاتي
يا خلاني شيشكم من شفاك المولى ما جنيت حكم في أمري حاكم الدوله بي سطوة جمالو و لحظوا صاحب الصوله صاب قلبي و صبيب دماعي حاكى الشوله
أها أبقوا عافيه و أدونا الإذن في غياب كم يوم في شان المعايش علا كان لقيت فرقه بجيكم و أبقى عشره يا أهل العوض على الخيمه
|
Post: #84
Title: Re: خيــيمة الحــردلو - العمارات
Author: nazar hussien
Date: 09-10-2002, 04:40 PM
Parent: #83
ود محجوب عجبني قطعك بلحيل وانا مستعجل خلاس
نحاول معاك كلمتين تلاتة اكان نحرضك زود
ود محجوب اخوي فحل الشعر والقافية اجدع زيدنا نم اسرع قوافيك شافية اب قيدا متني وتسفي فوقو السافية مطعون جوه قلبو وسلبو منو العافية
|
Post: #85
Title: Re: خيــيمة الحــردلو - العمارات
Author: Shinteer
Date: 09-11-2002, 02:50 AM
Parent: #1
أهل العوض .. الكلام ده جبتو من وين
جقلة كناجها فرسانها السمان درقكن في بحر الهلاك طايعين غصب غرقكن ود شنتير كتير فوق نارا كفى درقكن علب نار كدوسو وفي الرضيمة حرقكن
بالحيل الكلام فوقو وسمنا .. لكين بس القالو منو ياربي الكلام ده .. اصلو بكون يوسف البنا قطعاً شك
لكين عمي الفرجوني قال لو واحدة آخرا
رون سهم ام كنيش لفن البقير في سراع و نوق شنتير على الشدر اب سياقة رتاع سجع قمري الرشاش في لجة الفراع و اتنفض الغنيم جافل من التراع
نزار حســــــين !!!! إت نعل ماك
نزار ود دار جعل دعت الرضيمة الوح بتقووا بو فرسان النحاس القح في القانون ضليع و العز تيابو لفحا من هنولولو صيحة المستجير بسمحا
أكان اياك زولي ده .. اها انا اياني صاحبك شيخ العرب .. و الخيمة البيهناك يدك جيرانها ما بعجبوا
اها سووا سووا آناس
|
Post: #86
Title: Re: خيــيمة الحــردلو - العمارات
Author: Ahlalawad
Date: 09-11-2002, 06:33 AM
Parent: #1
حبيبنا سنجاوي .. ياخ قومت نفسنا ، عليك أمان الله حسبتك زعلت تب .. كتر خيرك ودا أصلك الكريم ، يا كريم النفس والقول .
نزار .. آزول إت كان كدي ما نزار الجعلي!! هللا هللا .. وشيخنا شيخ العرب ما إياهو شنتير .. إت ماك سامع نضمو المجيه دا ..
الاخ ياسر محجوب ،، آزول ها الله يزيدك في نعيمو ويديم عليك العافية .. لاكين .. أنا واحد من الناس ما بنلعب معاك .. البتسوي فيه دا .. الزينا نحن كان هبشو بيزيدو موية .. لاكين بقابلك بي شيخي شيخ العرب ، شنتير والجعلي نزار .. ديل قدرك .
شيخي وشيخ العرب شنتير .. إياها جقلة ذاااتها بتاعة يوسف .. ياخ عمك الفرجوني دا أنا طالب منو كلمات قالن في واحد صاحبن لي حساس (د. محمد عبد الله الريح) ما جاب لي طاريهن لي درب الساعة .
أها هاك من جقلة تاني :
يا جقلة العقيدك بكّر قارسك ديمة في بلد العدو بيتوكّر ناس بقرة وغنم انا عندي مابتتشكّر لبنك في طب للماسكو مرض السكر
يا جقلة التمونك غالية ناس منك غنوا وصبحت جيوب ناس خالية ديمة عليك في الروح العزيزة مبالية يا الشنقا الغرابية ام سراة عالية
معليش على الغلتة في البيت الفوقاني ، عدلناها وبقت شنتير
أسمع .. ياسر محجوب دا لو ماهو شايقي أنا شايف فيه نفس ود شوراني ، وللا النظر ضعف يا ربي
|
Post: #87
Title: Re: خيــيمة الحــردلو - العمارات
Author: nazar hussien
Date: 09-11-2002, 07:14 AM
Parent: #86
شيخنا وشيخ العربان لا حدها ياني زاتي
ويسعل منك الخير
ووالله حقيقة مشتاقين لي زمن بفتش عليك اتاريك ضارب الكنادش بي جاي في خيمة العمارات
ومغير اسمك لي شنتير لكن تب بلا شيخ العرب ما عندنا ليك نديهة
وفي الظانو شنتير ده جدا ليك لكن ما حا نقوليك غير شيخ العرب عشان ما تتلخبت الكيمان ولانك فعلا شيخ عرب
اهل العوض يا زول ودمحجوب ده نحن ماني ندادتو الزول كلامو قارح بلحيل وقطعو مطارق غايتو نحن بنحرضو ليك
هسع غاتس وبقلعلكم قريب في الحجره بي نضما كتر
اها يا اهل العوض
تهليييييييييييل >لا اله الا الله
تجدني عاشق حتي الثمالة لكلام التجاني لذلك تحريضي سيكون
وانت يا من ذقت طعم الهوي من سحر عينيه ومن خده عيناك هاتان وقد صبغتا من كبرياء الحسن او مجده عيناك هاتان وما فيهما من هادىء السحر ومحتده كمضمر سرا ومن بينه مغالق الكون ولم يبده
يا صحو دنياي واحلامها ورقة العابد في زهده مثالية الحسن وآلاءه وبر ما سلف من وعده تعال يا لوعة قلبي وما تحرجت كفاك من وأده نستقبل الروحي من حبنا ونبعث الموؤود من لحده
|
Post: #88
Title: Re: خيــيمة الحــردلو - العمارات
Author: Al-Masafaa
Date: 09-11-2002, 07:47 AM
Parent: #87
الليل نحن جدودنا أظهر من علم بينين و نحن قلوبنا في الفولاذ حديد ما بلين الليلة نحن الفي الكرم نيرانا تب ما خبت و نحن في الخيانة رياحنا تب ما هبت
|
Post: #89
Title: Re: خيــيمة الحــردلو - العمارات
Author: Shinteer
Date: 09-11-2002, 08:49 AM
Parent: #1
كلام مجيقن .. و بدور منك الأمان يا عزيزنا ياسر بن محجوب .. و عليك من جعل محمد نبي ما تزعل مني
يا اهل العوض .. كان زمان معانا واحد دفعتنا في الجامعة .. و هو زول غليد و مفتل و دشن .. و بعد ده اسمو حاتم (إن شاء الله ما يكون في زول بعرفو هنا) .. بعدين أنا قدر ما اشوفو و اقارن بينو و بين اسمو بتخيلو زي التكنو مدخلنو في علبة صلصة .. شتان ما بين الاسم و الجسم
هسع دي لقيت ياسر محجوب .. محجوب دي حسب معرفتي بديها الشوايقة عديل و الشوايقة شعرهن مختلف عن الشعر اللتم ده .. و ياسر دي سوف تتشظى بفعل الكلام الغلاد البقول فيه ده .. يعني و الله احترت مرة واحدة .. و قلت الزول ده علا يكون متضاري بالاسم ده .. لكين تب غناه و اسمو مابيات يمشن لي سوا
إت بتقول لي فيه نفس ود شوراني .. أنا بقول فيه نفس كل شي .. و نبرة كل زولاً قاصع ================== أهل العوض .. قلت لي النضم ده نضم يوسف؟ شكيتو على ود أب ناجمة .. الزول جاب ود شنتير ذاتو .. يا سلام يا سلام .. ده كلام تاني و بدور لو روقة و تبهلة ========== نزار .. اها شوف أنا ما قبضتك؟ إت تاريك تتلبد متغتي لك باسماً آخر؟ و تتسحب متل قط الهويد و الصي .. أنا و الله غيرت اسمي داك .. و لزمت عقابي .. ود شنتير ارحم لي لاني اياني ذاتو .. ترب سيد الدبساء الراسها خلال
الدبساء الراسها خلال شايلابي الليل لا الشهلال تترز مابية المقبال بتسو قدلة بت رحّال
و بت رحّال هذه امرأة من بني أسد .. و في رواية أخرى .. وهكذا
|
Post: #90
Title: Re: خيــيمة الحــردلو - العمارات
Author: nazar hussien
Date: 09-11-2002, 10:07 AM
Parent: #89
شيخ العرب وليد ود شنتير سيد\ الدبساء حبابك
هل هل هل بتقدل زي بت رحال
اها ده فوق الدبساء
الدبسا الكاسره لجامها بتقدل متل الحمامة ما بسرجوها العجامه وتربها لا يوم القيامه
|
Post: #91
Title: Re: خيــيمة الحــردلو - العمارات
Author: Ahlalawad
Date: 09-11-2002, 01:06 PM
Parent: #1
الاخ نزار .. لك تحياتي وشكري على أبيات التجاني . فشعر التجاني شعر مميز .. قرأت مرة لكاتب مصري هو رجاء النقاش قال إنه يعرف شاعراً مصريا كان صديقا للشاعر التجاني خلاصة القصة أن التجاني حين قدم لمصر في آخر زيارة له أعطى ذلك الصديق المصري مخطوطة ديوان للتجاني فما كان من الشاعر (الصديق) المصري بعد أن علم بوفاة التجاني إلا أن طبع الديوان بإسمه !! هذا كلام مصري عن مصري ، إلا أنه لم يذكر اسم ذلك الشاعر .
شيخي ود شنتير .. عندي النص الكامل لجقلة كما سمعتها من يوسف عبد الله البنا ، كان داير قول لي ايميلك بي وين وتصلك في الحزة والحين .. اتذكرت قصة ايميلك الفقايتو مرقت مع الرسالة الرسلها ليك الهمباتي ، الله يجازي محنك .. اليوم داك أنا قلت والله أنا لو في محل أهل الحلة ديك إلا أخت شخت احمر تحت كلمة فقاية دي وأقول ليك حسن ملافضك . معانا عوايل
|
Post: #92
Title: Re: خيــيمة الحــردلو - العمارات
Author: Shinteer
Date: 09-11-2002, 02:04 PM
Parent: #1
Dear Ahal Al-Awad, Nazar Al-ja'ali, Yasir Mahjoob, Sinjawi. I am now using a computer with no Arabic softwrare. Honestly, you are the only pals I find comfort in reading their postings. I believe that we are all spiritually connected. So, I will hereunder write my regular e-mail address hoping that you will give me you phone nnumbers when you send me an e-mail.
my regular e-mail is: [email protected]
I want to be in a real contact with you, not just a hit-and-run-like communication.
By the way, I have some other names in sudan.net, for bad and good communication.. But with my people, like you, I would love to be as honest as I was born.
END.
Special to Ahal Al-Awad
صغيران نرعى البهم يا ليت أننا إلى اليوم لم نكبر ولم يكبر البهم
bleive me, I didn't notice that you posted such a lyric. I saw many of those guys I love responding in a similar tone ... then I discovered that you set a challenge with that Jameel Butha'ina poetry you posted. Any way, I didn't notice that and I promise you, I will respond tomorrow in a way that will make every one perplexed.
I need your e-mails ... phones ... anything that connects me wth yuou all . You are my treasure.
Please write to me.
Akhookum Ila ma shaa Allah
Wad Shinteer
|
Post: #93
Title: Re: خيــيمة الحــردلو - العمارات
Author: 7abib_alkul
Date: 09-11-2002, 02:28 PM
Parent: #92
البارح سجع ساجع القماري النوح
اتذكر زمن جهلي وشبابي الروح
بقين دورا ستاتي العطارهن فوح وايامهن مطرهن شوح
|
Post: #94
Title: Re: خيــيمة الحــردلو - العمارات
Author: 7abib_alkul
Date: 09-11-2002, 02:28 PM
Parent: #92
البارح سجع ساجع القماري النوح
اتذكر زمن جهلي وشبابي الروح
بقين دورا ستاتي العطارهن فوح وايامهن مطرهن شوح
|
Post: #95
Title: Re: خيــيمة الحــردلو - العمارات
Author: Shinteer
Date: 09-12-2002, 02:40 AM
Parent: #1
Up .. surface
|
Post: #97
Title: Re: خيــيمة الحــردلو - العمارات
Author: nazar hussien
Date: 09-12-2002, 07:37 AM
Parent: #95
شيخنا وشيخ العرب لا حدها ود شنتير المو تاجر حمير كيفنك آ الدخري
قريت كلامك البي الرطانة وقلت القلوب شواهد لكن عليك الله كان الهمباتي اتحول معانا بي جاي الخيمة دي ما بتكون تكنها منصوبة في الجنة
خيمة الحاردلو البي غادي دي انا لي منها الليلة دورين وناوي ازورها لما ارجع السودان قريب
هسع داير اضرب الكنادش دي اكان جلدنا ينطلق شوية
الصديق ودشنتير
انا شخصيا معجب جدا بكتاباتك ونمك وجابوديك وبعتبرك قائد رسن الخيمة والتواصل معاك شرف رسمي بس الدنيا الساقية دي نسويلها شنو قدر ما تقول نتفرغ شوية للناس الاصيلين الزيك وزي كل رواد الخيمة العرفتهم هنا واصبحت كاني اعرفهم من سنين
هسي اهل العوض ده ان لاقاني ونضم بغباني واللا الهمباتي واللا ود محجوب واللا سنجاوي
الناس ديل كلهم ان لاقيتم من كلمتين بفرزم من رفاقتم مع اني ما شفتهم
شوف الساقية ساقية وتورها ارقو يقودا نتدفابا نار الشاي دوام موقوده آمال الترابلة البيك بقت معقودة تظهر زي عروس في الداره لابسة عقوده
من الارض قام فرهد شمارك وشب بالمحصول جميع الناس بقت تتنبأ البنضورة شالت فوق فريعا الحبة من الموية عيشك لا عطش لا غب
واكيد بنتواصل
It will not be a hit and run relationship it is more deep and it has to be.
بس اعذرني جدا هذه الايام دي مشغول مشغولية شديده جدا وماشي السودان وحالتي بالبلاء
|
Post: #137
Title: Re: خيــيمة الحــردلو - العمارات
Author: الجندرية
Date: 12-22-2002, 11:30 AM
UP
|
Post: #96
Title: Re: خيــيمة الحــردلو - العمارات
Author: Dafi
Date: 09-12-2002, 06:31 AM
Parent: #1
الاهل الكرام في الباديه والحضريه جاكم دافي شادي خيل قصايدو طويه ادروب الولوف خاتي الغلط والنيه ويقول سلام عروب بالفصحي والعاميه
البورد اللطيف آخر جمال ولذاذه من طيب ناسو يسكر لا طشم لا قزازه خلي ابو العيال في الشاشه برطع وزازا والحاجه السارحه يحرق في الحلل بوتاجازا
البورد اللطيف فايض نضار ولطافه حمام من كل نوع قاريات فهم وثقافه الا الحظ مكاجر دافي الوجيه وقيافه متين يا ربي تجمع بي ناس غدي وسلافه
|
Post: #98
Title: Re: خيــيمة الحــردلو - العمارات
Author: Shinteer
Date: 09-12-2002, 07:55 AM
Parent: #1
الله عليك يا نزار .. و الله كلامك طيب خلاس .. يمرق الفلايت ... غايتو الهمباتي ده لازم نجرو بيجاي .. لكين كبوش قال ولوف و ما بقدر افارق الخيمة القديمة
مش السودان ملك آبوي؟ نعل عافية؟
|
Post: #99
Title: Re: خيــيمة الحــردلو - العمارات
Author: Shinteer
Date: 09-12-2002, 08:08 AM
Parent: #1
شوف الغبا ده عليك النبي .. كتابتي كلها غلط
يا نزار ماش السودان مالك آبوي؟ نعل عافية؟
|
Post: #100
Title: Re: خيــيمة الحــردلو - العمارات
Author: nazar hussien
Date: 09-12-2002, 10:33 AM
Parent: #99
شيخ العرب
كيف حالك يا اخوي
والله ماشي السودان اجازه بس ما في عوجة تب
ماشي اشم لي هوايا نضيف واشبع كسره وارجع
باقي مطولين من الاهل بلحيل وبيني وبينك ماشي اشوف الطرطشة البقولو فيها الناس في البوردات دي
بجيبلك خبرها تب
والقط لي غنايا كتير
المره دي شاقي البطانة من تالا الابيار والدوانكي وشايلا لا القضارف بي الخلا ساكت
|
Post: #101
Title: Re: خيــيمة الحــردلو - العمارات
Author: Ahlalawad
Date: 09-12-2002, 10:41 AM
Parent: #1
حبيبنا نزار وهدناك العديلة قدامك ووراك إن شاالله نشوفك وانت طيب بعد عودتك وأن تلقى الأهل كلهم تامين ولامين أها - أنا كنت داير أقول ليك أنا أفضل زيارة السودان للناس اللي زيك بين شهر اكتوبر وفبراير الدنيا بتكون رايقة ومافي شيتن يضايقك لا زحمة مغتربين ولا قرارات جديدة تتبختر في المليون ميل دي عليييي كيفك والجو زاتو ظريف والأرايل ولوفة
لاكين .. بي عافيتك كان نويت
|
Post: #102
Title: Re: خيــيمة الحــردلو - العمارات
Author: nazar hussien
Date: 09-12-2002, 11:08 AM
Parent: #101
تسلم يا اهل العوض
طبعا في السودان جهاتنا ديك ما اظنو الكمبيوترات ديل وصلنها واكان وصلنها الا يكونو بشغلوهن بالبطارية غايتو ده وكت خليتم هسع ما بعرفم البقي عليهم شنو
لكن المتاكد منها بجيكم راجع بي نضما كتير بلحيل
ها زول الناس ناجعة في الخليات دي بي كترة نضم ما لاقي تدوين كاغلب حاجاتنا السمحة في السودان
ابقو عشره علي شيخنا شيخ العرب ود شنتير واصلوه الزول ده فيه فايده عظيمة خلاس ما تخلوه للوحده وجري في الليل
والهمباتي ده جروه لي الخيمة دي بعد يكمل عسلو
|
Post: #103
Title: Re: خيــيمة الحــردلو - العمارات
Author: Dafi
Date: 09-12-2002, 03:09 PM
Parent: #1
اهل العوض!!!!! شايفكم ما اشتغلتو خالس خالس باقي الشغله ..اعجمي فافتح له..ولا خيمتكم خاصه!!!؟ مافي مشكله انا بكره بعزم ..البجاوي ..ودقنه..وباكاش..نفتح لينا ..قطيه بي غادي..وبكلم باقي الرطانه ..كل واحد يفتح خيمه..لي اهلو...رطانه ساااااااااااااااااااي اصلها الشغله ماشه علي كدي.. كل قرد يطلع جبلو..زي ما قال المرحوم صلاح مرحب بيك ..ساي مافي!!!!!!!!؟؟؟؟؟؟؟؟؟
بهظر يا اخوانا والله بهظر![](http://www.sudanaforum.com/db/smilies/smile.gif)
|
Post: #104
Title: Re: خيــيمة الحــردلو - العمارات
Author: Yassir Mahgoub
Date: 09-12-2002, 04:00 PM
Parent: #1
مرحب بيك يا دافي نيابة عن الجميع إتفضل يا زول و نهديك كلام جميل من الشاعر المبدع حسن سالم عشان تروق و تنجم
قال لي السويجع الغرام ألزمني حملاً لا أطيقو من التقل زممني بي سيم العاشقين السابقين أوسمني لا خلاني عشت و لا كتلني عدمني
الأخ الفاضل شنتير…… و الله نحن نتشرف بي معرفتك و كلامك يدل على كرمك و أخلاقك السودانيه الأصيله…… و جايينك بي درب أب نقيب السموهو الإيميل يا شيخ العرب
|
Post: #105
Title: Re: خيــيمة الحــردلو - العمارات
Author: Shinteer
Date: 09-13-2002, 03:35 AM
Parent: #1
أولاً بالتبادي .. يا عزيزنا الدافي .. إن شاء الله طيب
ترحيب مغربل و صافي من الخيمة لي اخونا المسمّى الدافي دي دارك ملك في شنو الزعل يا كافي أياك سيدها ماك زولاً بدور عوافي
الشكر موصول للأخ العزيز اهل العوض الذي لبعني بايميل ظريف و معاه هدية تفتح النفس .. شكراً عقب يا اهل العوض
ود محجوب .. ماك طيب آعيسي .. يعني بتبشرني بالايميل و تنقرع؟ ما ترسل مالك .. يعني بتاكل لك في بيتزا .. ايديك الاتنين مشغولات؟
نزار .. و الله انا برضي طولت من السودان . و كل ما اتذكره بديها جكة لا غادي .. غايتو كان مشيت جيهة السباغ اقع الخلا .. في ناس بيغادي علي الطلاق كان لاقيتهن اياك الماك راجع تاني
|
Post: #106
Title: Re: خيــيمة الحــردلو - العمارات
Author: Dafi
Date: 09-13-2002, 04:59 AM
Parent: #1
شنتير الصديق حالي العلي ما خافي ضيق فوق ضيق وغم غربه وعذابا كافي ايه يسند قفاي غير ايد صديقا وافي تبرد نار حشاي قولة حبابو الدافي
ود محجوب حبابك طيب صلات ومحنه فوق ادبك حويت علما يزيدك رنه شاحد الحي دوام بي قربكم اتهني في الدنيا ام قدود وعقب رياض الجنه
|
Post: #107
Title: Re: خيــيمة الحــردلو - العمارات
Author: Shinteer
Date: 09-13-2002, 05:09 AM
Parent: #1
بسم الله الرحمن الرحيم ... ده شغل شنو ده؟ إت كت وين الزمن ده كلو؟ اها من هنا و غادي أوعى نشوف تزازي بيغادي .. دايرن نسلمك راية الخيمة
|
Post: #108
Title: Re: خيــيمة الحــردلو - العمارات
Author: Shinteer
Date: 09-13-2002, 07:49 AM
Parent: #1
Above the Crown .. and Her Majesty ... go up
|
Post: #109
Title: Re: خيــيمة الحــردلو - العمارات
Author: singawi
Date: 09-13-2002, 08:02 AM
Parent: #1
مرحب حباب دافي أب كلاماً دافي أب ضميرا صافي يازول انت سيد بيت تب سلامك سلامنا وكلامك كلامنا
أبقى لي جوة .. واخلف رجل فوق رجل وورينا بضاعتك
الحبيب شنتير
من يوم نشرت عنوانك وانا مشرك ليك في المسنجر في دار الهوت ميل .. صحيح ما قدمت ليك طلب إضافة .. كنت بدور أجيك غاير واشوفك بتعرفني أم لا تاني شيء الخيمة دي غالية بالحيل وعفريتك دي ما عاجباني .. تاني كان حبيت تعفرت الخيمة ما تكتب عفريتة أو ابقي لا فوق .. لكن شوف لينا حاجة كدي من بيت الكلاوي وارسلها كان منك ولا من عمك الفرجوني وبالمناسبة عمك انا رسلت ليهو رسالة عبر المنسجر ادعوهو لتشريفنا في الخمية .. عليك الله مجهودك معانا .. الخيمة دي كلنا أخوان فيها لكن بندورلنا كبير .. يبقى شيخنا ويمسكنا الدرب
تحياتي
|
Post: #110
Title: Re: خيــيمة الحــردلو - العمارات
Author: Dafi
Date: 09-13-2002, 08:05 AM
Parent: #1
شنتير ود ابوي صاحب المعالي وقامه في حالي ومقالي..الدنيا ماشي كلاما الغربه اليباس سكة عذاب وندامه ضاع في سراب سنينها عشم الوصول بسلامه
|
Post: #111
Title: Re: خيــيمة الحــردلو - العمارات
Author: Shinteer
Date: 09-13-2002, 08:23 AM
Parent: #1
يا سنجاوي .. و الله انا ياخي مرات بجي بلقى الخيمة حتلت في اخر البورد و بقول اديها دفرة .. لكين وصيتك سمحة .. تاني بسندها بي شعباً غلاد
و بعدين لي شنو ما بتلمني على ناسك الفي المسنجر ده؟ و الله انا كتبت عنواني الالكتروني ده هنا عشانكم .. و لا هسع ما جاتني رسالة الا من اهل العوض .. اها إن شاء يوم نتلاقى في سرج المسنجر
العم الفرجوني قال الكمبيوتر بتاعه لكزو ولدو بوظ فيه حاجة .. و اللاخ بكري ابوبكر حيصلحو ليه قريب ان شاء الله و بعد داك ببقالنا راس قايدة
الاخ الظريف الدافي .. و الله بارك الله فيك ياخي على كلامك السمح ده .. كتر منه
|
Post: #112
Title: Re: خيــيمة الحــردلو - العمارات
Author: Shinteer
Date: 09-13-2002, 08:25 AM
Parent: #1
بسم الله .. يا سنجاوي الايام دي ما بعرف الحاصل علي شنو .. اصلو ما حصل كتبت لي حاجة و ما طلع فيها خطأ مطبعي
تصليح
اها إن شاء يوم نتلاقى فوق سرج المسنجر
|
Post: #113
Title: Re: خيــيمة الحــردلو - العمارات
Author: Shinteer
Date: 09-14-2002, 04:28 AM
Parent: #1
أها يا سنجاوي .. سماعاً لوصيتك
زاكية مسكة اللبع الدمير بي هوبتو قبلي مفككة العاقب صلاتو و توبتو هجيني عليها حاكى الـ بالكواتل لوبتو ولا اوبو لبة عناف الجبد منهوبتو
الفرجوني
|
Post: #114
Title: Re: خيــيمة الحــردلو - العمارات
Author: Ahlalawad
Date: 09-14-2002, 06:37 AM
Parent: #1
متلوم كتير يا دافي باطن وظاهر ما مقصودة يا الصنديد وأدبك ظاهر دهج الدنيا والردحي الدوام متظاهر دا السلب الصبر مني وبقيت ما ظاهر
الاستاذ ياسر محجوب .. أولا حمدلة على السلامة ونرجو أن تسمح لنا فقد قطعنا فيك أنا وأخوي شنتير .. وطبعا نطمع في كرمك والمزيد من الأدب الرفيع الذي تتحفنا به وهو شرف لهذه الخيمة وروادها .
ود شنتير .. شكيت محنك على الله .. برد عليك في الايميل .. طبعا نحن ما عندنا خدمة يوم الخميس والجمعة .. لكن برضو كتبت ليك الايميل يوم الخميس . شنو ليك . طبعا في البيت الجماعة ما بدونا طريقة نطربق بي راحتنا .
سنجاوي أب نضما يداوي .. حبابك آ بوي .. وأثني على اقتراحك ونطالب شيخ العرب باستجلاب أوتاد جديدة . (أنا باخد المقاولة) من هسع
نحن في شوق شديد لسماع الاستاذ الفرجوني .. ولو في طريق نتشرك لو كمبيوتر انا من عندي خمسطاشر قرش في الحزة دي .
كنا قد طرحنا بيت الشعر المشهور لجميل الذي يقول فيه
صغيران نرعى البهم يا ليت أننا إلي اليوم لم نكبر ولم يكبر البهم
وطلبنا من الشباب مجاراته بالقطع اللخدر .. فتجاوب مشكورين الاستاذ ياسر محجوب والاستاذ سنجاوب .. الرجل الذي زعل .
نعيد طرحه الآن كطلب شيخي وشيخ العرب شنتير
|
Post: #115
Title: Re: خيــيمة الحــردلو - العمارات
Author: rummana
Date: 09-14-2002, 09:32 AM
Parent: #114
يا أهل العوض وشيوخ العرب والرطانة سلام
يا هلا بخيمة الحادلو في ديار البكرييين طبعا أنا في الغالب في الخيم دي بكون زي الأطرش في الزفة بس حبيت برضو أقوي قلبي وأشارك معاكم بكلام من كراس غيري ..قال ايه...قال الشايقية زمن المهدية كانو بقولوا كده وأنا طبعا زي سطحت في بعض الكلام
الليل أب سدر ابكنه يا اخواته ولدا في قدير مابشوف ذاته ود محمود حليل نقل القديم فاته سيد سرج الدهب والفضه قهواته يا حليله اب سدر قمر العشا الموهلال للضيفان يكفي والبواطي اشكال درفون خالك انت الما معاك مثال عمه اب راي صبير وجده الملك كمبال جنيات الكنابلة البردو في ام دعكاب بتدخلو الصفوف اليوم قمركم غاب
|
Post: #116
Title: Re: خيــيمة الحــردلو - العمارات
Author: Ahlalawad
Date: 09-14-2002, 11:43 AM
Parent: #1
أهلا بالاستاذة رمانة .. هذا تشريف عظيم ، نشكرك على المشاركة ، ورغم إنك لم تحددي الحتة اللي زي مسطحة فيها ، فأنا أقول (وبالله التوفيق) أغلب الظن أنها مناحة قالتها قريبة لهذا البطل ود محمود . نفل طبعا معروفة وهي تفيد الزيادة ، والدرفون هو الطفل اليافع وهي كلمة اختصت بها جهة معينة في السودان الغربي ، ويقول المثل هناك (ماتاخد ام الدرفون لو كان مدفون) . البواطي لا أعرفها لعها آنية ، والله أعلم لذلك أجدني أقرأها كما يلي مع الاعتذار مقدما :
الليلة(بدل الليل) أب سدر ابكنه يا اخواته ولدا في قدير مابشوف ذاته ود محمود حليل نفل (بدل نقل) القديم فاته سيد سرج الدهب والفضه قهواته يا حليله اب سدر قمر العشا الموهلال للضيفان يكفي والبواطي اشكال درفون خالك انت الما معاك مثال عمه اب راي صبير وجده الملك كمبال جنيات الكنابلة البردو في ام دعكاب بتدخلو الصفوف اليوم قمركم غاب
|
Post: #117
Title: Re: خيــيمة الحــردلو - العمارات
Author: Shinteer
Date: 09-14-2002, 01:36 PM
Parent: #1
الاخت الزينة رمانة .. كلامك جميل و الله و يبدو أنك تختزنين الكثير من مثله
عزيزي اهل العوض .. البواطي جمع باطية .. و هي إناء .. اما شكله فممكن أن يخبرك به اخونا سنجاوي .. أما أنا فساعطيك بيان بالشعر المحفوظ
أديتو العيش بالباطية كان تقوى جريدتو العاتية على الما نضمت خاتية بتجدع متل الفاتية
تاني الاخ أهل العوض .. نرجع لي بيتك الضيق ده و دايرنا نحشر فيه اربعة بيوت من الشعر الدرشي
صغيران نرعى البهم يا ليت أننا إلي اليوم لم نكبر ولم يكبر البهم
بسم الله يا مهون القواسي
جهالاً كنا أنا و تومتي و سغار في عمرنا سارحين بي بهمنا و ما في من حاجرنا نلعب مانا قايلين الزمن بغدرنا اريت يا تومتي لا كبر البهم لا كبرنا
شنو ليك .. لاكين وحاتك إت تعبني تعب .. تعب عدوك
|
Post: #118
Title: Re: خيــيمة الحــردلو - العمارات
Author: Ahlalawad
Date: 09-14-2002, 02:05 PM
Parent: #1
الاخ شنتير شكيتك على النجرك ات سايب بتجيب النضم الحلو دا من ياتو دلو والله فعلا حالي وطعمو حادق وبالنسبة للوسم فالجنس رفاعة والعمودية مسلمية ونتلاقى في ضهورن كان الله هون ومرواحنا قرب وبعدين الباطية دي أنا غتست مني وين في الساعة ديك؟
|
Post: #119
Title: Re: خيــيمة الحــردلو - العمارات
Author: Shinteer
Date: 09-15-2002, 05:33 AM
Parent: #1
الله .. رفاعة جيهة المناقل؟ الوداكن هناك شنو؟ .. و الله انا كت قايل رفاعة كلهن ضاربين الدنادر .. و الخريف بنشغوا مصبحين .. خسوساً ناس ود أب جن و عرب الليم و الحمدة و عرباناً جيهة الطلحة المشرمة
بالمناسبة دي في مسدار أب قلب ناجرو الفرجوني فوق اهلك رفاعة و ترحالهم الى اعماق البطانة في زمان ما .. والمسدار ده أنا عندي من زمااان حفضتو و نسيتو لكين كان نحت مخي و بحت في كوم الشرطان المباريني محل ما امش ده .. بلقاه ليك تب
هسع بتظكرو طشاش طشاش لكين في واحدات كدي النرمتيهن ليك
سدر الديش قلع جدعن جمالو الباع و ناس اب شترة قطرانهن سرف نباع حور الليم عقيدتن ختّ فوق نجاع و دوّر مرنع البلد اب سحاباً ماع
جرس العطفة ببكي بطبّق النقرات و ايدي الفايقة بتنسّف سيورها شتات منّاك للطبق يا رفاعة ضعنك فات و الجاب الخبر نازيلن ابو دميعات
غايتو كان قعدت ليه بتظكرو و الله اعلم
|
Post: #120
Title: Re: خيــيمة الحــردلو - العمارات
Author: Shinteer
Date: 09-15-2002, 05:38 AM
Parent: #1
تصحيح يا اهل العوض في الغنوة التانية .. في غلطة مطبعية
جرس العطفة ببكي بطبّق النقرات و ايدي الفايقة بتنسّف سيورها شتات منّاك للطبق يا رفاعة ضعنك فات و الجاب الخبر نازلين ابو دميعات
|
Post: #121
Title: Re: خيــيمة الحــردلو - العمارات
Author: Ahlalawad
Date: 09-16-2002, 08:42 AM
Parent: #1
الحبان جميع .. تحيات
الاخ العزيز شنتير .. امس كان عندنا بطالة . دحين عاين في المربع دا .. أنا شايف فيه فزرة لاكين برضو عاجبني .
مزروع في الشتا وساقينو بالبابور ممورق صندلية وبالخمر ممطور ضي العين أذاه في الفواد مسطور وخيط البسمة يشلع زي شعاع النور
ويا ودشنتير هاك في رفاعة
رفاعة الربة قافا البليب متدلي زي الفاقد الاطفال بقيت متبلي المربوعة قامتو وبالردف متعلي ذكرو غيابو من غيرو الانس مابسلي
|
Post: #122
Title: Re: خيــيمة الحــردلو - العمارات
Author: Yassir Mahgoub
Date: 09-16-2002, 05:05 PM
Parent: #1
الحبان عموم... و الخيمه دي تاني غتست...أها ختيت فوقك هام مرده أب شراياً كوم.. نرفعه بي قول سيدها زاتو الحار
يا سخلة عشيب الأرض قِمح قناصك و يا ثمرة حدايق يانْ شِرِق مصّاصِك محيّاك جّزع الكبِد و الفؤاد رصاصك بليتي بغيّْ جديد يا نفسِ كيفَ خلاصِك
يا شيخ العرب ود شنتير و الله غلبتنا تب في بيت أهل العوض... و كمان إنتا و أهل العوض أديتونا من علمكم ماشاء الله بحركم واسع صعيد و سافل.. و كمان نرحب بالضيفه رمانه و كلامه السمح..
يا نزار.... دحين آ خوي كلامك الختيتو هول التجاني ده ما بنقدر و لا بنهابش فوقو.... غايتو زي ده إلا يدقو شيخ العرب شنتير ولا يجيبلنا سيد القول و الفراسه الفرجوني
|
Post: #123
Title: Re: خيــيمة الحــردلو - العمارات
Author: Ahlalawad
Date: 09-17-2002, 07:24 AM
Parent: #1
الاستاذ ياسر مجحوب .. سعداء بمشاركاتك المتفردة شيخ العرب ود شنتير وعد بتبديل أوتاد الخيمة ونحن في رجاه هذه من قديم الهمباتة: الليل أمسى والنعسان جرايدو يدحن كبس الهم علي السلّط قلوبن وحن كضم الجرة سحار الغروب اتمحن نعود سلمانة يا عمر الظروف إن صحن
الأخ نزار في آخر مشاركة قال إنه مسافر إجازة . نتمنى له سفرا سعيدا وعودا حميدا . ولك التحية
|
Post: #124
Title: Re: خيــيمة الحــردلو - العمارات
Author: singawi
Date: 09-18-2002, 02:53 PM
Parent: #1
العزيزة الغالية رمانة
حبابك عشرة بزيارتك بيتنا نور ما تنقطعي
أهل الدار بشوف خيمتنا غطست وبتدورلها عفريتة
هاكم العفريتة السنجاوية دي
الليلة الحـروف لاوتنـي هـدت حيلي عاصية عديل أبت ترسم تعاستي وويلي قالـت ما بتـروح للحسنو جنن جيـلي شان جافي وبخيل في دربو ضـلّ دليلي
الليلة القصيد فـي صدري عالي هديرو شن صحاهو غيـر جدياً شديـد نفيرو بعد ظنيت نسيت جرحي الغريق عويرو غافلني ونـزف سيلاً يـدوي شخيـرو
بعد ظنيـت نسيت الليلة شـن ذكرني وشن طراني لي جرحي الزمان عورني كل ما أقـول شفيت من السنين كدرني ينـزف من جديـد لا طبت لا ودرنـي
|
Post: #125
Title: Re: خيــيمة الحــردلو - العمارات
Author: يازولyazoalيازول
Date: 09-18-2002, 03:06 PM
Parent: #124
ما شفت الجروح زادت على يا أسامة طرانى الشليخ فى خدو باقى علامة تمشى على مهل وكل العسل فى كلامه شايلة البرتكان وبالعين تصيب بسهاما كتلتنى الشويفعونة والروح بقت تتسامى فى حب المكبرتة واللون تقول شمامه
looooooooooooooooooool
|
Post: #126
Title: Re: خيــيمة الحــردلو - العمارات
Author: singawi
Date: 09-18-2002, 03:20 PM
Parent: #1
يازول الفظيع للنجر السريع
مبدع يا هش
والله حللك البتعملها القطر قام دي كان قلت بسم الله وسبكتها على نار هادئة البجري وراك مايلحقك
تحياتي
|
Post: #127
Title: Re: خيــيمة الحــردلو - العمارات
Author: nazar hussien
Date: 09-20-2002, 08:56 PM
Parent: #126
يا الفي الجحر الصلوتية جاتك
يا ودشنتير وسنجاوي والهمباتي واهل العوض وودمحجوب
يا ناس الحاصل عليكم شنو ضربكم الصقط والزيف ارفعو بطاطينكم دي وامرقو لا برة
تعاليلو عديل يا امدرعة ليش راراية وما بقدر احاحيك واسيلي جناية
|
Post: #128
Title: Re: خيــيمة الحــردلو - العمارات
Author: singawi
Date: 09-20-2002, 10:13 PM
Parent: #1
الحبيب نزار لك الود الحبان مهملين الخيمة في طلب المعاش أها بعد ما يجونا صادين سالمين غانمين بندور منهم الفيها النصيب وهاك بليلة مباشر
الليلة الغـرام حكـم علي سلطانـو ذكرني الحبيـب وشواني بـي نيرانو وين الشال قليبي وساقني في حيرانو واشوقي الشديد لي ضمتو وهمسانو مجبور المعاش حتـم علي هجرانـو
الليل الطويـل زاد الفـراق تعذيـبـو وجمـر الشوق يحرق في حشاي ليهبو وين الشال قليبي وخلى عنـدي قليبو ما بنسى ان نسيـت ليلة فراقنا نحيبو معليش يا ام أخوك الحر بيرضى نصيبو
|
Post: #129
Title: Re: خيــيمة الحــردلو - العمارات
Author: nazar hussien
Date: 09-21-2002, 10:00 AM
Parent: #128
يا سنجاوي
خليه الغرام ساكن قليبي وباني وراكز شعبتو في كبتي داير يهراني قدر ما اقول ازورو طبيبي شان يحجاني القي مسافتي بيني وبينو بعدت تاني
انا في الغرام غاتس يمين بي هدومي افج الموية واتنفس اخاف من يومي
واكاتل الموجة دافرة وقابضة في حلقومي دحين سنجاوي باقيلك بفز بي عومي؟؟؟؟
كبدتي كتبت هكذا لداعي الوزن وهي تنطق بالعامية هكذا طبعا الشرح ده ما ليك يا سنجاوي ولا لشيخ العرب ولا لاهل العوض
|
Post: #130
Title: Re: خيــيمة الحــردلو - العمارات
Author: دباش
Date: 09-21-2002, 07:14 PM
Parent: #1
up
|
Post: #131
Title: Re: خيــيمة الحــردلو - العمارات
Author: Ahlalawad
Date: 09-22-2002, 07:55 AM
Parent: #1
الاخوة الكرام في الخيمة :
الاستاذ ياسر محجوب ، سنجاوي ، نزار الجعلي ، يازول يازول ، دباش والغائب ودشنتير المو تاجر حمير . تحياتي وشكرا على الأوتاد التي تثبتون بها الخيمة كل ما صفى فوقها موج . كنت بعيدا عن الكمبيوتر في الأيام الماضية . لكم التحية وهاكم من سيد الخيمة (الحردلو) زاتو كما قال الاستاذ ياسر محجوب ، دا يا سنجاوي لعجزنا عن مجاراة نظمك النضيد:
في يوم الجمع بالحيل رطببها عوالي ماخدة النورة فوق الصفصفو الغربالي إن ثبتت سيادتك للشباب إجمالي تحكيبهاالدول لاعن سراية الوالي
ود شنتير لديه بعض الظروف حكاها لي تبعده عن المشاركة في هذه الأيام نتمنى أن تزول تلك الظروف سريعا ويعود لإمتاعنا بالدرر التي يختزنها وينثرها بعفوية ، دون تكلف
إن تلق يوما على علاته هرم تلقى السماحة والندى خلقا
وسلامتكم
|
Post: #132
Title: خيــيمة الحــردلو - العمارات
Author: abas
Date: 09-22-2002, 12:11 PM
Parent: #1
الليييييييييييل
الناس في العروض ما تقيسه بي تيبانه ما يغرك لباسهم والعروض عريانه
ديل حراس رزق ذي التكنو امانه زي ابل الرحيل شايله السقي وعطشانه
ابشرو بي الخير
|
Post: #133
Title: Re: خيــيمة الحــردلو - العمارات
Author: Ahlalawad
Date: 09-22-2002, 12:23 PM
Parent: #1
شكرا يا عباس ، أبشر بالخير
الما بانيك ولا صارف عليك موجود حربو معاك زي خنق الحبل في العود الأرزاق مقسمة والعمر معدود والهوا عند كريما بابو مو مسدود
|
Post: #134
Title: Re: خيــيمة الحــردلو - العمارات
Author: singawi
Date: 10-04-2002, 01:16 PM
Parent: #133
أنا المجنون وسـر جني البجنن شوقو أنا الكاتلني شـوق ليماً معسل ضوقو كل منـاي أشوفو وأطفي ناري بريقو حلالـو يعيقني يامولاي يـوم ماتعيقو
سافر شال منامي وشـن بلاهو منامي وكان صادتني غفوة بشوفو في أحلامي قربو سبب سعادتي وبعدو سر آلامـي يا مولاي سألتـك زيـدو مـن أيامي
سألتك ربـي تجمع كل حبيب بي حبيبو وتحفظ عُشو من عين الحسود ما تصيبو وترحـم قلبو من شوقاً يـدوي لهيبـو وتجمـع شملي بالشايـل قليبي تجيـبو
|
Post: #135
Title: Re: خيــيمة الحــردلو - العمارات
Author: taha
Date: 10-29-2002, 03:59 PM
Parent: #134
up
|
Post: #136
Title: Re: خيــيمة الحــردلو - العمارات
Author: Ahlalawad
Date: 12-22-2002, 07:59 AM
Parent: #1
طازج شيخ العرب - الفرجوني الحقوق محفوظة للصديق
أب قنفة العني الضل الملانة مماهلو فقرك دير و دومك فوق قلايدك باهلو على الما قالوا حظك في المجالس جاهلو الصي سادرو كلو و دوسو وكرو و ساهلو
|
Post: #138
Title: Re: خيــيمة الحــردلو - العمارات
Author: alsara
Date: 12-22-2002, 01:49 PM
Parent: #136
و الله يا أهلي فرحني و سر بالي شوفة خيمتكم بيجاي هواكم بارد و نضمكم موزون الله يديكم العافية
|
Post: #139
Title: Re: خيــيمة الحــردلو - العمارات
Author: nazar hussien
Date: 12-22-2002, 02:56 PM
Parent: #138
سيد الخيمة اهل العوض
وين الباقين ودالمحجوب وسنجاوي وودالحافظ والهمباتي ودافي انشاء الله قلعة الخيمة تجيبهم لينا راجعين سالمين وغانمين بركة سيدي الحسن جد المرغنية
اما شيخ العرب برمي ليها غنية من زمن الخيمة القديمة
يا شيخ العرب نمك عقولنا فتحها للصوت والنحاس ليلة الخلوق تتنحي
راكزين في جزيرة والبطان فد صفحة
وعينا علي العبيليجة البترمي طرحها
نزار
|
Post: #140
Title: Re: خيــيمة الحــردلو - العمارات
Author: Ahlalawad
Date: 12-23-2002, 06:48 AM
Parent: #1
نزار الفنان : كتر خيرك وحمدلة على السلامة .. وهاك على لسان شيخ العرب
أدرع َنفّـر الغنم المـراحهـن ليلة عقب أب دوم والوادي الزَرَاعتو قليلة علي السمحة الغلب توصيف سماحّا خليلا درويشا سمع نوبات وشال تهليلة
|
Post: #141
Title: Re: خيــيمة الحــردلو - العمارات
Author: nazar hussien
Date: 12-23-2002, 07:08 AM
Parent: #140
اهل العوض حبابك
طالما قلت علي لسان شيخ العرب اها انا كمان بديك واحدة سمعتها منو وانت عارف انا كل يوم بلاقيه في الماسنجر لاكن الزول ما برمش تب اليوم كلو موجود بس ما بيرد,
عين الفرقة دمعك وشلي واسخيلو حاكي الوابل اللاقا النهار بي ليلو بعد رحل العشاري وقلبي حاربو دليلو سهرك لازمك نايح السقد آنسيلو
الزول بيكون غاتسلو في سحابتن زرقها زي ناقة الكنانه ام ريش تقرجن وتبكي ويبكو عليها ناس العيش طعنها البرد وقالت ها العذاب فوق ايش رمت مقدافهاقلست
وترعت واحمتو المرقة
ده الظانو في بالي
نزار
|
Post: #144
Title: Re: خيــيمة الحــردلو - العمارات
Author: الجندرية
Date: 12-23-2002, 09:32 AM
Parent: #140
والله بندور تاني نسمع نمة شيخ العرب الخاتية القول
|
Post: #142
Title: Re: خيــيمة الحــردلو - العمارات
Author: Ahlalawad
Date: 12-23-2002, 07:20 AM
Parent: #1
نزار .. البارح كان معاي وكنا في سيرتك (قطعنا فيك) وهاك منو كذالكا :
يا قلع الهماييب ليك ألف سلامنا حليل وكتن قبيل أيام سكون ناس آمنة زمان توتال فريقن وقبلت متيامنة كان بتخلى ضاقت حلقت أقدامنا
ياخ الزول دا ختري خلاس والله التقول مراضعلوا ديوان
|
Post: #145
Title: Re: خيــيمة الحــردلو - العمارات
Author: Ahlalawad
Date: 12-24-2002, 06:34 AM
Parent: #1
نحن في انتظار شيخ العرب
|
Post: #146
Title: Re: خيــيمة الحــردلو - العمارات
Author: nazar hussien
Date: 12-24-2002, 08:10 AM
Parent: #145
اهل العوض هاك دي من شيخ العرب
غردتو تجول لا صرتو شال بهم ام خدود في فرتو بعدل عوجة الدرب بي ترتو وينقض مسيرة الراس بي حرتو
الزول سكو جيبو هنا ما تخليه ينطلق
|
Post: #148
Title: Re: خيــيمة الحــردلو - العمارات
Author: الجندرية
Date: 12-24-2002, 08:46 AM
Parent: #146
والجنيات صباحكم زين والله الزول ان فلت منكم تبقى عوجة
|
Post: #147
Title: Re: خيــيمة الحــردلو - العمارات
Author: Ahlalawad
Date: 12-24-2002, 08:33 AM
Parent: #1
نزار في واحدة من الغنوات ديل غايتو بتور عليه وجع الضرس
وبرضو نديه من هذا الجراب
أمرار في الكدوس وأمرار سجارة أعلب أمرار في خلا وأمرار بهيمة أسلّب كم رابع جنين فوق الدرق بتلب ولي الجاييني راسي ومنو ماني مجلب
|
Post: #149
Title: Re: خيــيمة الحــردلو - العمارات
Author: Ahlalawad
Date: 12-24-2002, 08:59 AM
Parent: #1
الجندرية إيدك معانا كان وقع في عينك دودريه علينا جاي
كـومر وانضروب قبطي وستايرو مشمع
بعد الاذن
|
Post: #150
Title: Re: خيــيمة الحــردلو - العمارات
Author: nazar hussien
Date: 12-24-2002, 09:40 AM
Parent: #149
اهل العوض والجنادرية حبابكم آلاف
ات ماك خابر البتور ضرس شيخ العرب ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
يا ابعرج القبايل كلهن زهدنك وما بياخدك بشر في المولي كبر ظنك بي نقع البطانة مفنك ===== يبقي الليلة نايرات الخدود طرينك
ود ارباب عليوك نيلو زرقن اقلب الشد علي الدوماتو عرقن جناك الزاع مفاقر وطش شرقا براهو ينوح علي الميع المترقن
وبرضو غيرت الكلمة الاولي في البيت الاخير كان شيخ العرب يجي ناطي ويقول شي
|
Post: #151
Title: Re: خيــيمة الحــردلو - العمارات
Author: Shinteer
Date: 12-25-2002, 03:30 AM
Parent: #1
up up
|
Post: #152
Title: Re: خيــيمة الحــردلو - العمارات
Author: Ahlalawad
Date: 12-25-2002, 06:10 AM
Parent: #1
سميناها رضينا ، وبرضو حمدلة على السلامة
بعيدة بلودك آ المتل المزرقن فمك وأحلى من الروايح ومن عبيرهن شمك قت لي قلبي ها المجروح بمتر دمك وابشر بي نظرة الشوفتو بتفرج همك
أحمد عبدالله البنا
|
Post: #153
Title: Re: خيــيمة الحــردلو - العمارات
Author: Shinteer
Date: 12-25-2002, 06:28 AM
Parent: #1
ود الحوري شاف قلع النواصل جرّف السوط منّو زي عادي المحيرة اتغرّف يا ود العنانيف أب قفاياً سرّف وا سهرك على الـ لفسلنا ما بتحرّف
يوسف ود عب شبيش
و شكراً على المدودرا دي
|
Post: #154
Title: Re: خيــيمة الحــردلو - العمارات
Author: Ahlalawad
Date: 12-25-2002, 06:42 AM
Parent: #1
من نفس النبع الصافي
ها الظبي العلي قفر البطانة مردك ذكرك بالعفاف في قلوبنا عمّ ودّك ديسك قولّو كرّ في المتاني مهدّك طرفك قولّو آذيت القلوب بي حدّك
|
Post: #155
Title: Re: خيــيمة الحــردلو - العمارات
Author: Shinteer
Date: 12-25-2002, 06:48 AM
Parent: #1
تقيل الختوة تاتاي المشيهو توحَّل أدعج طرفو رمّاشو الطبيعتو مكحّل البسماه براق العشا الـ اترحّل يا دريس جسمي من ازمات غرامو اتنحّل
|
Post: #156
Title: Re: خيــيمة الحــردلو - العمارات
Author: Ahlalawad
Date: 12-25-2002, 07:03 AM
Parent: #1
من نفس المغترف
شتلاً ضير سواقيهو وهباب ما فرّك ريدو سلب يقيني وعمري منو مدرّك يا ظبياً تبع نيل المهاوي مجرّك الله براهو يتلافى القلوب من شرّك
|
Post: #157
Title: Re: خيــيمة الحــردلو - العمارات
Author: Shinteer
Date: 12-25-2002, 07:08 AM
Parent: #1
ها البرق البتلعب صح و رايق درك اسقي الريدو في صفحة ضميري اتمرك دامن رف بي سهم البطاين فرك قول لي قلبي عاد ليك التقربن و حرك
|
Post: #158
Title: Re: خيــيمة الحــردلو - العمارات
Author: Ahlalawad
Date: 12-25-2002, 07:11 AM
Parent: #1
شكيتك على الله قومت نفسنا
صغى لي قولي سمّاعو الرقيق اتحرًك نفى شنشولو وانفقل المعز ومعرّك قال لي ونفّ جنحيو الرقد واتعرك كفي صميم وعندي هميم فعالاً يسرك
|
Post: #159
Title: Re: خيــيمة الحــردلو - العمارات
Author: Shinteer
Date: 12-25-2002, 07:19 AM
Parent: #1
صغى لي قولي سمّاعو الرقيق اتحرًك نفى شنشولو وانفقل المعز ومعرّك قال لي ونفّ جنحيو الرقد واتعرك كفي صميم وعندي هميم فعالاً يسرك
تصحيح .. من وحيح صوت المديح .. الله حي دايم نصيح
انصقل المعز و معرك جنحيو الربد
انتهى
شوف داك السباغ العدّو زاكي شرابو ما بنغشاهو يا اب سرجاً نبح كرابو رد السنة لي اب صرة و عزاز نورابو اهل المرجلة البتزابوا فوق اغرابو
|
Post: #161
Title: Re: خيــيمة الحــردلو - العمارات
Author: nazar hussien
Date: 12-25-2002, 07:33 AM
Parent: #159
شيخ العرب ودشنتير واهل العوض
جيبونا كم شخلوب علي الوسم ده الاتنين ما بتتصاقعو تب
شيخ العرب الناس امس ضايرتهم ليك من فراشهم لا مديرهم وحرم لامن سوولي لجنة عشان يعرفو الشغل دا راح وين وهسع جابو لي خبر قالو اصلن
دوبو دوبو آ عرب واملو كدوسكم بالدوبيت الكلام ده حرم يتور شعرة الجلد
|
Post: #160
Title: Re: خيــيمة الحــردلو - العمارات
Author: Ahlalawad
Date: 12-25-2002, 07:27 AM
Parent: #1
ما هو دا المقصود زاااتو يا حبيب نحن بنغليك كدي عشان نستفزك عشان تنثر من تلك الدرر ونعتذر لك وللفرجوني
|
Post: #165
Title: Re: خيــيمة الحــردلو - العمارات
Author: الجندرية
Date: 12-25-2002, 07:53 AM
Parent: #160
الجنيات الله يصبحكم بالخير كان غيرتو ريقى ولون صباحي زيدونا يزيدكم الله من فضله
|
Post: #162
Title: Re: خيــيمة الحــردلو - العمارات
Author: Ahlalawad
Date: 12-25-2002, 07:39 AM
Parent: #1
نزار والله ات تركة صلاح غايتو ، منكن جفلة إت وصاحبك
مرق مخلوفتو مما شافا حيلو اتشمك قت لو سلمت يا المتل المناظر دمك طايع وراسي مو كبوري هاش واتزمك قت لو ادنيلي شبال درعتي مزمّك
|
Post: #163
Title: Re: خيــيمة الحــردلو - العمارات
Author: Shinteer
Date: 12-25-2002, 07:40 AM
Parent: #1
وووووو نزار .. ها زول الناس ضايرتهن؟ كابسهن يكابسهن شريف اهلو في الريف .. انا و الله فقري وقعت من الخرمة
عقب الدندر الغيبة و منوّي شروق و ركز العقبو حر فوق جد ابو البرقوق خليت الوراك ساف الوطا و محروق كب آخر ايدك آآلحوري الجلب مشروق
|
Post: #164
Title: Re: خيــيمة الحــردلو - العمارات
Author: Shinteer
Date: 12-25-2002, 07:42 AM
Parent: #1
تصحيييييييح دستوووووووور يا حاج نزار
عقب الدندر الغيبة و منوّي شروق و ركز العقبو حر فوق جد ابو البرقوق خليت الوراك ساف الوطا و محروق كب آخر ايدك آآلحوري الجلب مسروق
|
Post: #166
Title: Re: خيــيمة الحــردلو - العمارات
Author: Ahlalawad
Date: 12-25-2002, 07:55 AM
Parent: #1
الجندرية صباحك خير عليك بشنتير فهو شاية هذه التاية
|
Post: #168
Title: Re: خيــيمة الحــردلو - العمارات
Author: Ahlalawad
Date: 12-25-2002, 09:08 AM
Parent: #1
الملا عمر سويت لينا وجع فقرة لحدي ما لقيت مشاركتك ألف مرحب بيك - مكانك صدر الخيمة
|
Post: #169
Title: Re: خيــيمة الحــردلو - العمارات
Author: AlRa7mabi
Date: 12-25-2002, 10:20 AM
Parent: #1
هاهاهاها
أهل العوض
الملا عمر جننك ، يا خي دا مدوخ العالم كلو ات تكوسلك في بوست وست النضمي دا كلو
ما عايز اقول ليك الخيمة دي مظللاني قدر شنو
سووا .. سووا
ما تقيفوا طب
|
Post: #171
Title: Re: خيــيمة الحــردلو - العمارات
Author: الجندرية
Date: 12-25-2002, 10:33 AM
Parent: #169
الشي دي خيمة ولا متاهة قدرت مالستَ ما لقيت مشاركة الملا عمر دحين هي في ياتو جناح عليكم الله عينو ليكم دليل في الخمية دي
|
Post: #170
Title: Re: خيــيمة الحــردلو - العمارات
Author: Shinteer
Date: 12-25-2002, 10:31 AM
Parent: #1
يا اهل العوض و الرحمابي .. اوعى تقولوا لي انتو شايفين مشاركة الملا عمر؟ و الله العظيم انا لسع بزازي ليها و مالاقيها. وين ياخواننا كلام الملا عمر ده؟ انا عيني طششن وللا شنو؟
فرشوت غبّر السبعات و طلق الفوف و جاب لي قلبي وحّاحة و زلازل خوف عيني يا العوض حرمني من الشوف و انقطع الوداد من القناها أب روف
|
Post: #172
Title: Re: خيــيمة الحــردلو - العمارات
Author: Ahlalawad
Date: 12-25-2002, 10:58 AM
Parent: #1
شنتير والجندرية مشاركة الملا في الصفحة التانية يعني يكون ملا كيف
وهنا لابد من الاذن
ريد الردتو يا حسن الفكي وجافاني فيه هلاكي وأسباب الدوا العافاني ما دام زولي بالطبع السمح صافاني مالي تاني في الواددني والجافاني
|
Post: #173
Title: Re: خيــيمة الحــردلو - العمارات
Author: Shinteer
Date: 12-25-2002, 11:01 AM
Parent: #1
الحمد لله يا الجندرية انك ما قادرة تلقى مشاركة الملا عمر .. عشان ما اكون انا بس الما شايفها. انتي عارفة انو الملا عمر ده يكون اصلاً غير موجود .. يكون في تورا بورا ياربي؟ الناس دي طفشت وين؟ يا اهل العوض و نزار .. و الجندرية لميتوا فيني جريتوني جر .. و انا انفتحت كل مسامات راسي .. و مطاميره العتيقة .. فاين انتم؟ الله
البارح و اول البارح في المنام تخربنا واقفين ديدبان جناً كبيــــــر راكبنا لا في من قريب لا من بجي يطايبنا اصبع ضوّة في عين الفكي البحجبنا
اصبع ضوة ده شنو يا سيدي الحسن؟
|
Post: #175
Title: Re: خيــيمة الحــردلو - العمارات
Author: الجندرية
Date: 12-25-2002, 11:06 AM
Parent: #173
هاجنى هه ات العشق حماك تشوف التاني والتالي نحن قاعدين في باب الخيمة ومطرطقين اطنينا كدي ادنا من مطاميرك
|
Post: #174
Title: Re: خيــيمة الحــردلو - العمارات
Author: Ahlalawad
Date: 12-25-2002, 11:06 AM
Parent: #1
شنتير بالراحة علي الفكي ضريتو ضرر شديد
من إذنك في النمة الفاتت دي ، يكون السماح
|
Post: #176
Title: Re: خيــيمة الحــردلو - العمارات
Author: Ahlalawad
Date: 12-25-2002, 11:09 AM
Parent: #1
البارح صبيب برق السواري قبلهن صقطو الجابو موجات القلب حولهن الإتسربقن قبل السبية قبلهن سفكن دمنا وجرًح ضميرنا شللهن
|
Post: #177
Title: Re: خيــيمة الحــردلو - العمارات
Author: Shinteer
Date: 12-25-2002, 11:49 AM
Parent: #1
يا سلام يا اهل العوض .. والله انت الكلام الكبار ده بتجيبو من مين ماني عارف .. ياخي و الله اريت اكان الزول ما عرفك زاتو .. زي ما قال شاعرنا المتهرب محمد سعيد العباسي
الوادي الغزير شقلو و غديرو مسرّف يا ريت كان قبيل بيهو الزمان ما عرّف الضيب الـ على راس القلوع بتكرّف
البيت الرابع بجيبوا ليكم بعد ما اشوف حلة العدس دي ما تكون حرقت
|
Post: #178
Title: Re: خيــيمة الحــردلو - العمارات
Author: الجندرية
Date: 12-25-2002, 11:54 AM
Parent: #177
فسراع آ شانتير تمها موية وتعال بندور ناخد الزوادة قبال ما نقوم
|
Post: #179
Title: Re: خيــيمة الحــردلو - العمارات
Author: Ahlalawad
Date: 12-25-2002, 12:03 PM
Parent: #1
شنتير اتو أظنكن لسة واقفين ديدبان ياخ بتاعة قلع المهاييب وين ما قلت بتمها لينا
بعدين ياخ عندي بيتين من طرفة داير تترجمن لينا دوبيت
|
Post: #180
Title: Re: خيــيمة الحــردلو - العمارات
Author: Shinteer
Date: 12-25-2002, 01:39 PM
Parent: #1
يا قلع الهماييب ليك الف سلامنا حليل وكتاً قبيل ايام سكون ناس آمنة زمان توتال فريقا و نزلتا المتيامنة كان بتضل لي ضاقت حلّقت اقدامنا
و الشغلانة الفووووق دييك ريد الردتو يا حسن الفكي و كافاني
يا اهل العوض .. و ليس جافاني
|
Post: #181
Title: Re: خيــيمة الحــردلو - العمارات
Author: Ahlalawad
Date: 12-25-2002, 01:47 PM
Parent: #1
أها اللله يبارك فيك .. بس تم أجرك وجيب المربع الباقي ،
يا قلع المهاييب البدت متيامنة كم غنالها كان شيخ العرب قدامنا
أنا غايتو ، التقول أنشق
وبيتين طرفة : هوم ويرك
كأن حدوج المالكية غدوة ** خلايا سفين بالنواصف من دد عدولية أو من سفين ابن يامن ** يجور بها الملاح طورا ويهتدي يشق حباب الماء حيزومها بها ** كما قسم الترب المفايل باليد
خل البيتين الأولين دا للشرح بس ، أنجر لينا في التالت .. الله يخدر ضراعك
|
Post: #182
Title: Re: خيــيمة الحــردلو - العمارات
Author: Shinteer
Date: 12-25-2002, 02:08 PM
Parent: #1
ياخوي طرفة بن العبد . و خاله المتلمس صاحب الصحيفة .. ديل ناس يعز علي المساس بما نسجوا . و ما تخلينا نبوظ كلام زي ده
|
Post: #183
Title: Re: خيــيمة الحــردلو - العمارات
Author: nazar hussien
Date: 12-25-2002, 02:54 PM
Parent: #182
شيخ العرب ودشنتير
الناس عليك امان الله ضايرتهم مضاير حجازي ابليس بس والطرد بيصلك قريب ما ضاع تب ورقمو تراهو ده 4329 شرحو لي شرح طويل فيه اجازة وماركة ووزن وجمارك وفحص وكتبوني ورق مالو حد
المهم في الموضوع عندي الورق البككهم بيه اكان اتلخلخو وما جابو ليك في بطن بابك
اهل العوض ما تقيف من الدوبيت لامن افضي بالي ده شوية واجيكم
|
Post: #184
Title: Re: خيــيمة الحــردلو - العمارات
Author: Shinteer
Date: 12-26-2002, 11:05 AM
Parent: #1
الورق البككهم بيه اكان اتلخلخو وما جابو ليك في بطن بابك
هاهاهاااااا و الله يا نزار المفردات الاوردتها دي قدر ما حاولت اقاوم الضحك بعد قراءتها .. عجزت عجزت .. و مازلت اضحك .. ياخي و الله الطرد ده انا اتمنى ما يصل زاتو عشان يخليك تهترش كدي
ياخي و الله اديك واحدة من عمي عبدالله ود أرباب .. قالها عن سنة ستين التي كسدت فيها المواسم و ساد الجفاف كل مراتع الاهل في البطانة العزاها الله .. اها قال في وصف تلك السنة القوية
ستين مثلت ستة الزمان بحكوبا ستين شالت العيش و الغباش و اللوبا ستين جاتنا عريانة و نست مركوبا ستين حر سمومها يحرّق الراكوبة
و في واحدة تانية و الله اسمح من دي .. بس عاجبني جزء منها بقول
ستين رافعة ايدها و راكبة ليها حصان
رحم الله ود ارباب و الحقني به
|
Post: #185
Title: Re: خيــيمة الحــردلو - العمارات
Author: Ahlalawad
Date: 12-26-2002, 11:17 AM
Parent: #1
آناس أنا ما سعيد عديييل كدي ..نزار .. لا حول .. طردك دا في لبا الرقطا وللا شنو .
شنتير .. جننت ستين جن ..
ونحن بنغلط وات عليك التصليح :
ها المتقدر الفي الضرعة زايد مدّك في النفارة خالك وفيها عمك وجدك قول لي قلبنا المتهلك ألزم حدك أرماحو بتصيبك وسيف عيونو بحدك
|
Post: #186
Title: Re: خيــيمة الحــردلو - العمارات
Author: Shinteer
Date: 12-26-2002, 11:24 AM
Parent: #1
زي ما سيدها نجرها يا عمي أهل العوض هاهاهاهاااااااا ... و يا ابو الشيخ عقب عادن ليالي سهرنا
|
Post: #187
Title: Re: خيــيمة الحــردلو - العمارات
Author: Ahlalawad
Date: 12-26-2002, 11:31 AM
Parent: #1
يا الفي سبعة زايد في السماح فوق ندك لا عبدلة يسطع ضاوي نايـر خـدك ذوقك عالي ، حالي مع البخاطبك ردك وجسمـاً ليك رطيباً مـنو فوح ندك
|
Post: #188
Title: Re: خيــيمة الحــردلو - العمارات
Author: Shinteer
Date: 12-26-2002, 11:46 AM
Parent: #1
يا زول انت مريض يا اهل العوض .. شوف ليك حكيم ياخي!! الله .. انت شغال شنو؟ نسعل الله السلامة
اديك واحدة من اب قدم الله يرحمه .. شيخ الهواوير .. ياخي الناس السمحة كلها ماتت .. و انا طاش
أكان حنيتي ما بتنلامي ضايقة النشغي في النعم البقوم قدامي القش الربيعك فيه صيد و نعامي ما قام اصلو .. بخلن بو المحول آم شامي
و المعني واضح وضوح الشخلوب فوق الشدق
|
Post: #189
Title: Re: خيــيمة الحــردلو - العمارات
Author: Ahlalawad
Date: 12-26-2002, 11:57 AM
Parent: #1
بخلن بو المحول ... المحول البخيلات ديل ما جابن الصديق
|
Post: #190
Title: Re: خيــيمة الحــردلو - العمارات
Author: Shinteer
Date: 12-26-2002, 12:03 PM
Parent: #1
محول شنو البجيبن الصديق؟ الصدسق بجينو سنين الرخا
ياخوي إت الجنى نزار وين ختر؟
|
Post: #191
Title: Re: خيــيمة الحــردلو - العمارات
Author: Ahlalawad
Date: 12-26-2002, 12:07 PM
Parent: #1
نزار يمكن يكون مكرمس إت في نزار ، التانيين وين سنجاوي ياسر محجوب طه الباقيين كلهن
|
Post: #192
Title: Re: خيــيمة الحــردلو - العمارات
Author: Shinteer
Date: 12-26-2002, 12:10 PM
Parent: #1
سنجاوي ده معتكف
|
Post: #193
Title: Re: خيــيمة الحــردلو - العمارات
Author: alsara
Date: 12-26-2002, 01:56 PM
Parent: #192
أنا غايتو و لا زعلانة ..البزعلني شنو؟؟ ياها الرماضة السيحت ودكي و لا أبو الفرار الشق راسي وقفت في الباب لامن نشفت قولة يا السارة أتناولي ليك موية من القربة ديك مافي ؟؟
و و الله ما زعلانة... طنشوتي و تاني جيت ما ميتة قلب و الله .. الا عاجبني نضميكم
تسلموا كلكم من كل شر علقوا ليكم بخور تيمان في باب خيمتكم لا يطقوكم عين
مسئولين من الخير ..وين الزول النضام ود محجوب سنجاوي أب كلاما يداوي ترا عرفنا قصته البركة في شيخ العرب قت لي معتكف؟؟
|
Post: #194
Title: Re: خيــيمة الحــردلو - العمارات
Author: Elkhawad
Date: 12-26-2002, 05:27 PM
Parent: #193
سلام جاكم آناااااس هوي عوفي وماكم طيبين الزول مطول منك بالحيل ولي نضمكم ده
اها هاكم اسمعو الحديث سمح كيف من عمنا ود الرضي
السبب البخليني اكتب وامحـــــــي فوسيب التري القامت في طينه قمحيه معلوم يانديم لو شفت خياله بلمحــــه زال حزنك طرب سافر خطوتك سمحـــه
|
Post: #195
Title: Re: خيــيمة الحــردلو - العمارات
Author: عبدالقادر الكتيابي
Date: 12-26-2002, 06:45 PM
Parent: #1
بسم الله وشيلو معاي صــــــلا وتسليم علي اللوصافو في القرآن رؤوف ورحيم وامابعـــدو ـ مني سـلام دعاش ونسيم على الفي الخيمة جملتهم رجال وحريم
ود محجوب وناس شنتير وزول يازول وناس ود عازه والزول زاتو سمح القول وديك الجن وطه العاقل المعقول وسنجاوي الرصين دوبيتو دوم معدول
وود الجيلي ما اتحكر على لاب توبو والخواض اذا الماوس لعب في عبو ناس قرشو ودباش ونزار ويات مين هبو والملا وحبيب الكل وكل من حبو وحت هل العوض سلامي يردو مصبو
وناس الجندرية ـ السـارة والرمانة رجحن في الفهم ـ زادنو زوق ورزانة ضــون خيمة الحاردلو لى فرســانه في شنو القعدة غيرهن والخيم شن شانه؟
|
Post: #196
Title: Re: خيــيمة الحــردلو - العمارات
Author: Elkhawad
Date: 12-26-2002, 06:54 PM
Parent: #195
شيخي الكتيابي بي نضمو فات القول ان نقعد جميع من يومنا لي دا الحول مابنقدر نجبادو ونزيد في القول ده ماهولو الكلام ان بالعرض والطول
|
Post: #198
Title: Re: خيــيمة الحــردلو - العمارات
Author: alsara
Date: 12-26-2002, 07:02 PM
Parent: #195
سلام ود الشيوخ أهل النحاس أب شنة ناظم للقصيد خلانا أتمحنا يكرم في الضيوف من غير رياء أو منة يحفظك الله يا كتيابي دوم تتهنى
أستاذ يا أستاذ
|
Post: #197
Title: Re: خيــيمة الحــردلو - العمارات
Author: singawi
Date: 12-26-2002, 06:54 PM
Parent: #1
يسأل منكم خيـر الزمـان وسرورو ويغفل عنكم غـدرو ومكامـن جورو سائل المولى يبسط في طريقكم نورو ويعتق عبده من سجناً غشوم مأمورو
سجناً خالي من شبك الحديد شباكو من السور المعلى مكهربات أسلاكو تحتو الدابي فاير سمو حارس أملاكو لزومو الخنقة والبهرب بلاقي هلاكو
تحياتـي
|
Post: #199
Title: Re: خيــيمة الحــردلو - العمارات
Author: alsara
Date: 12-26-2002, 07:06 PM
Parent: #197
سنجاوي أب كلاما يداوي الخواض أبوي أزيكم
|
Post: #200
Title: Re: خيــيمة الحــردلو - العمارات
Author: singawi
Date: 12-26-2002, 07:35 PM
Parent: #1
حباب قدورة سيـد القول وفارس خيلو حباب دخرينا زار خيمتنا شاعـر جيلو مكانـك صهـوة القمـر البنـور ليلو وصـدر الخيمة من رؤياك يضج تهليلو
تحياتي
|
Post: #201
Title: Re: خيــيمة الحــردلو - العمارات
Author: singawi
Date: 12-26-2002, 07:56 PM
Parent: #1
سلامك بت أبوي يا السارة أثلج صدري اريتك طيبة يا ام سيرين نديدتي وقدري كيفها خطيبتي لـو بكاية بسرع أجـري اجلب ليها دومًا كـدو يسـري ويمـري
|
Post: #202
Title: Re: خيــيمة الحــردلو - العمارات
Author: ba7ar
Date: 12-26-2002, 09:13 PM
Parent: #1
يا جماعة الخيمة والله فشيتوني وفي نفس الوكت رجعتو لي الم الذكري النبيل سلام يارايعين
يا البورد العجيب يا للتلوب حواي ناس اهل العوض اللنميم سواي فتحتو الجروح والحسرة من تالاي والجمرة البتحرق بكتويبا براي
|
Post: #203
Title: Re: خيــيمة الحــردلو - العمارات
Author: alsara
Date: 12-26-2002, 10:18 PM
Parent: #202
حباب سنجاوي ات نسبك بشرف قدري عله البت خواجيتن مسننة بدري قت ليها الهميم ود سنجة زولا دغري جاييك بالعديل و الزين في شان تنستري
أنقر قالت لي شنو؟
|
Post: #204
Title: Re: خيــيمة الحــردلو - العمارات
Author: singawi
Date: 12-27-2002, 01:55 PM
Parent: #1
دكتورة سـرورة أظنها قالت
صحيح زول دغري إلا ملولوات سيقانو مالي بعاشـر اللـوري الحليلو زمـانو مكينتو مبوشـة وعادمو انتشر دخانـو لساتكو مرقعة ومساعدو حاضن أحزانو
يمة المتلي تركب في الحديـد ألمانـي شبحاً ود شبح ناعـم مكنـدش هانـي ولو جلت خـلاص لكزس أصيل ياباني والهكـر القـديـم خليتـو للتابـانـي
|
Post: #205
Title: Re: خيــيمة الحــردلو - العمارات
Author: Ahlalawad
Date: 12-28-2002, 09:36 AM
Parent: #1
اللوم القاسي .. نعتذر للدكتور السارة وللأخ العزيز بحر .. والشكر الجزيل للأهل الفن الراقي الشاعر الكبير عبد القادر الكتيابي والخواض وسنجاوي . كلم جميعاً كل الود ونرجو المعذرة ، لم ننس لكن التقصير حاصل . وتحية لكل من فاتنا ذكرهم ونتعشم طلتهم :
هجين سرجو الطويل غاربو وجناحو انفـجّ جبتو حناسة ، بركتً الضمـر وانقـجّ عقلتو الشافي نفـاي القفـاري اللجـة دربو شيـوم علي السمحـة ام عشوقاً عـجّ
|
Post: #206
Title: Re: خيــيمة الحــردلو - العمارات
Author: nazar hussien
Date: 12-28-2002, 03:07 PM
Parent: #205
اهل العوض والصديق
ها ناس والله فاتني جنس نضم سنجاوي والكتيابي زاتو سيد اللسم كدي خلوني اللقرا الفاتني ده كلو وارجعلكم
اهل العوض والله يا اخوي ماني مكرمس تب لكن متكرفس من نزلة شديده
وقبل ما الزم عنقريبي اقول انشاء الله النزلة عن عدوكم
والف مرحب بكل الناس الراقين الدخلو الخيمة وانشاء الله تكون دار عامره بيهم
سنجاوي وينك انت تغتس وتقلع
يا الصديييييييييييييييييييييييييييييييييييييييييييييييييييييق
حرم خات الككه في بالي؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
|
Post: #207
Title: Re: خيــيمة الحــردلو - العمارات
Author: gessan
Date: 12-30-2002, 12:30 PM
Parent: #1
ناس الخيمة ..السلام جاكم جت
وبرضو معاكم أنا
دخلتا الخيمة ..عاينتا جاي وجاي صنقعتا دنقرتا.. قريت الكلامات كلها
ما شاء الله عامرين ..
اها من هنا وجاي انا زولكم تب
كان مشاغل الدنيا تدينا طريقة
تقعدوا عافية قيسان
|
Post: #208
Title: Re: خيــيمة الحــردلو - العمارات
Author: Ahlalawad
Date: 12-30-2002, 12:48 PM
Parent: #1
نزار الفنان إت برية من الحمى والنيران وات برية من المرض البجو الجيران ياموسى واخوك ويا هجو اب قران تشيلو الحمى غااادي وتبعدا النيران
قيسان ، مكنة نيسان حبابك ونعتذر - العتب على النظر لكنك ملء المسع والبصر
|
Post: #209
Title: Re: خيــيمة الحــردلو - العمارات
Author: singawi
Date: 12-30-2002, 05:10 PM
Parent: #1
نزار
حبابك ألف بلا بلف ياناس انتو والله البتغطسو وتلبدو بالشهور الخيمة دي بعد كدي أنا بطويها وأخليكم في الصقيعة
قيسـان
حبابك يا الحيبيب نورت الخيمـة الجابك يجيب الهمباتي وكبوش والعقد الفريد في انتظار مشاركاتك
أهل العوض
شوف ياسيد الخيمة أنا مزازاتك بالحلال دي ما عاجباني الخيمة دي يا كافي البلاء وحايد المحن لا شامين فيها ريحة بن ولا قربة لبن ولا كفتيرة شاي ولا تقابة تهدي الساري والضهبان الشي دا بخل – حاشاك – ولا عشان خيمة عمارات طيب الآيس كريم ويييييييينو
شيخ العرب ود شنتير
انت آضراعي بتختر لما أظهر أنا حساسية يعني ولا الحاصل شنو
ود محجـووووووووووووب
الشوق بحر اريتك تبقى طيب انت أنا البي كله هيـن
وهاكم السنجاوية دي
لون المنقة لونـك إلا ريقك أحلـى وخد القمرة خـدك إلا عينـك كحلى جيدالريم ولكن في مشيتك وحلـى نارك في الضلوع حراقة لكن تحلـى
|
Post: #210
Title: Re: خيــيمة الحــردلو - العمارات
Author: Ahlalawad
Date: 12-31-2002, 06:22 AM
Parent: #1
غايتو يا السنجاوي ، ما بسألك .. ونبدا بأبياتك السنجاوية وفي الحتة دي زي داير أقول ليك نشفت ريق البنية .
أما عن الآيسكريم فرسلنا الولد يجيبوا بس انت أبقى داخل ، وما في داعي تخلي نعلاتك برة . إنت ونعالك في حدق العينين مشالك والعز يتبختر مشالك ، توبك وغطاك وشالك .
وهاك دي من طرف شيخ العرب شنتير :
تيسو البجـر رسن المـريد ويمغاهو بالغ قلبـو والمغسول عقب طغاهـو ربـو الخالقو من سود العيون وقاهو حـنّ وقـجّ فـرّق وبعدو وشـغاهو
تحية للرحمابي تحية للذين لم تكتحل أعيننا برؤيتهم ويشنف آذاننا نمهم : الهمباتي و كبوش وبقية العقد النضيد
|
Post: #211
Title: Re: خيــيمة الحــردلو - العمارات
Author: وضاح
Date: 12-31-2002, 07:58 AM
Parent: #210
up
|
Post: #212
Title: Re: خيــيمة الحــردلو - العمارات
Author: الجندرية
Date: 12-31-2002, 11:24 AM
Parent: #210
سنجاوي اب كلاماً ايدوي على راي دكتوره السارة والله عاد نمك طاعم بالحليل بس نحن بانقدر على جنس دا بنسوى الجبنة والشاي وات دوبي وهادي القعدة
|
Post: #213
Title: Re: خيــيمة الحــردلو - العمارات
Author: Ahlalawad
Date: 12-31-2002, 11:48 AM
Parent: #1
من الخيمة القديمة
كزيم عكة النحل الفراقو جرحني وين ما اطراه يعمل واضحا يفضحني الدمر كتابي ومن صلاتى سنحني لا فكاني طبت ولا كتل ريحني
|
Post: #214
Title: Re: خيــيمة الحــردلو - العمارات
Author: gessan
Date: 12-31-2002, 02:18 PM
Parent: #1
سلام جاكم أهل العوض .. زي ما سنجاوي سعلك..قلتا لي الخيمة دي يعني في ضل العمارات ؟؟ يعني ضل الضحى جاييها وضل الضهر جاييها..والله حكايتا كيف؟؟؟ نحنا ناساً بندور نعرف مشهادنا وين ..ومشهاد رواحلنا .. وهاك قول خير:
مرق طالب الدروس متدرّج أوقد فيا نيراناً جوة القلوب بتسرج يا الله الكريم بالحالة العلي تفرّج حظي أصبح جارّي الجوكرين ومعرّج *****
قطع شك ..سنواصل
تقعدوا عافية
|
Post: #215
Title: Re: خيــيمة الحــردلو - العمارات
Author: nazar hussien
Date: 12-31-2002, 02:36 PM
Parent: #214
حبابكم وحباب كل الجنيات والبنيات الوردو الخيمة وكل سنة وانتو بخير وصحة وعافية وربنا يحقق جميع الاماني
يا قيسان
حظك جاري الجوكرين ومعرج
هو يا اخي الحظ مسكك الجوكرين في ايدك يبقي التعريجة دي كياشة ساكت
|
Post: #216
Title: Re: خيــيمة الحــردلو - العمارات
Author: gessan
Date: 12-31-2002, 02:49 PM
Parent: #1
نزار السلام جاك
علي الطلاق الواو من الواو الضكر في الكشتينة مابعرفو لاكين دي الغنوة زي ما وقعت في اضاني ..
بعدين ياخي انتا ماسك في حظي مالك ؟؟ ما تمسك في الطالب الدروس ده؟؟ ما ياهو الخلا الغناي كيشة
خالص تحياتي
وتقعدوا عافية قيسان
|
Post: #217
Title: Re: خيــيمة الحــردلو - العمارات
Author: Ahlalawad
Date: 01-01-2003, 06:31 AM
Parent: #1
كل عام وأنتم بخير جميعا ان شاالله تكون بقيت طيب عشان تبدا السنة وانت في قمة الصحة والنشاط قيسان ، ما تزعل - قبل كدا في واحد قال
بيجينا الـدرت ، وكلنا بتساوى كعبة الانقطاعة بعد العرق ما ناوى البحـرق مسرتو نقـول عليه براوة والجيب خاااالي والدقلاشة دايرة حلاوة
|
Post: #218
Title: Re: خيــيمة الحــردلو - العمارات
Author: nazar hussien
Date: 01-01-2003, 12:02 PM
Parent: #217
اهل العوض ودشنتير يا الصدييييييييييييييييق, وضاح الرحمابي الخواض السارة بحر قيسان الجندرية الكتيابي
كل سنة وانتم جميعا بالف خير وعافية مجتمعين بكل الود والصفاء ونقاء السراير
طيبين ومبسوطين بسطا ان دنقرتو يتدفق منكم فايض البسط
قيسان اخوي
خلاص قشيناها في طالب الدروس
شيخ العرب وين يا المشيك توحًًل
تقيل الخطوة تاتاي المشيه توحل والله الكلام دا عاجبني عجب شديد وخاسة مسعلة الشدة والفتح علي الحاء في كلمة توحل بدل الضم
كبيرنا الكتيابي
نشكرك علي تحيتك واطلالتك العزيزة التي نامل ان تتواصل
ود الجيلي ما اتحكر علي لاب توبو والخواض اذا الماوس لعب في عبو
حصل يا كتيابي سمعت بي مجاراة بين شاعرينا عتيق ومحمود حسين ببخت الرضا فالابيات الفوق دي ذكرتني بيها
وكل سنة والجميع بخير وعافية
|
Post: #219
Title: Re: خيــيمة الحــردلو - العمارات
Author: Ahlalawad
Date: 01-01-2003, 12:10 PM
Parent: #1
نزار كل سنة وانت والجميع بخير هاك من الخيمة القديمة
الكمساري صفر والتـرام اتحـرك طار بيهن تركني على القضيب اتعرك بهواهن هواهن جوة قلبي اتحرك غابن مـنـي يالكمساري الله يضرك
|
Post: #220
Title: Re: خيــيمة الحــردلو - العمارات
Author: nazar hussien
Date: 01-02-2003, 08:37 AM
Parent: #219
اهل العوض
خلينا ننجر علي بيوتك الفوق
بسم الله يا معين
بعد ما ساقن التومات وراهن حرك
اطش ملبوش واغرف من عجاجو اتبرك
بين جنى وغبارك يا الترام تتحرك
عندك قلبي شيلو مع طويك وفرك
|
Post: #221
Title: Re: خيــيمة الحــردلو - العمارات
Author: عبدالقادر الكتيابي
Date: 01-02-2003, 09:07 AM
Parent: #1
sentimental والأعزاء أهل الخيمة ـ تأملوا معي روعة هذه الصورة التي التقطتها شاعرية ود شوراني عن قرب لمشهد فيه من الوجدانيات و التذوق ما فيه ـ فقد كان الانجليز يفرضون حظر التجول في مناطق الهنباتة ابتداء من الساعة الواحدة بعد منتصف الليل وهذا ما كان يعرف قديما في الدامر وأبودليق بـ ( غفر الساعه واحد ) وقد حكى لنا عبد الله ود شوراني رحمه الله أنه كانت له حبيبة تستضيف التجار العابرين في ما يشبه المطاعم الشعبية والمقاهي داخل البيوت وهي عادة لا تزال قائمة في بعض الطرق السفرية ومراكز التسوق النائية ـ قال إنه أناخ بعيره بعيدا وأكمل الطريق إليها مشيا ـ وهذا من تحوطاتهم المتبعة عادة ـ وكعادتها شرعت في تهيئة المجلس بالبخور والطعام والقهوة ومن يخدمونه احتفالا بمقدم الرجل الكريم ـ فانسجم الشاعر في مزاج القهوة ولم ينتبه إلا بعد الساعة الواحدة ـ فهم بالخروج لولا أنها تضرعت له أن لا يخرج خوفا عليه ـ فقضى ليلته هناك وأصبح يدندن بهذا المقطع :ـ
غفر الساعة واحد حام وانا لقيت هوِّي فوق الرمشــو يجرح ونار خديده تكوي الخــــلاني ما بنـلام قـدر ما اسـوي خمـد النور فضـل براق بســيمو يضوي
طبعا القافية واو مشددة مكسورة والياء وبعض المفردات القليلة تم تناقلها بين رواة مختلفين كما أن التسجيلات الصوتية لود شوراني قام هو في بعضها بتبديل كلمتين أو ثلاث ربما بسبب النسيان أو التنقيح ـ فما أرق وأحلى وأعذب هذا الشعر ! ـ
كتيابي
|
Post: #222
Title: Re: خيــيمة الحــردلو - العمارات
Author: AlRa7mabi
Date: 01-02-2003, 10:13 AM
Parent: #1
أهل الخيمة سلام
والله قلت ألحق ، السنجاوي دا مالو نفسو حار كدا ، الزول أحلقوهو قبل ما يطوى الخيمة ويخلينا في الصقيعة.
بعدين اشوف قصة أخوى أهل العوض دا ، شوف بيتك التاني دا شن فيهو
من نفس المغترف
شتلاً ضير سواقيهو وهباب ما فرّك ريدو سلب يقيني وعمري منو مدرّك يا ظبياً تبع نيل المهاوي مجرّك الله براهو يتلافى القلوب من شرّك
أهل العوض
ريدو سلب – يقيني – وعمري منو مدرك
الزول دا ما قرب إمرق من ملة محمد
بس لحق رقبتو وقال : الله براهو يتلافى القلوب من شرك
عندى والله كلاما عجبني زمان لكن نسيتو ، وبدوركن تجيبهوا لي هنا تاني ، لابد معاكم واحداً حافظوا ….. …. من كُتر الدلا تنشاف عويرة عويرة ..
الكلام دا تماتو كيفين ؟
رحمابي
|
Post: #223
Title: Re: خيــيمة الحــردلو - العمارات
Author: gessan
Date: 01-02-2003, 10:23 AM
Parent: #1
وكت الليل برد جاني البفوح نسامو لاقرب الدغش متغطي في هدامو نحنا الخمسة ديل ولمحنا عيل أقدامو اتنين فوّضو وتلاتة سجدو وقامو
نزار..وأهل العوض ..قطع شك مافي زعل ..الزعل يجي وين للنم السمح ده..وللجميع التحية..وهاكم تاني
مشتول القرير السيدو فارق زرعو غفرو الحارسو قال يا عاشقين إنقرعو العينو كحلة وعودو منصوب فرعو رباع اللخ وتاتاي القدل بي درعو
وتقعدوا عااافية
قيسان
|
Post: #224
Title: Re: خيــيمة الحــردلو - العمارات
Author: الجندرية
Date: 01-02-2003, 10:28 AM
Parent: #223
الجنيات الله يديكم الفي مرادكم والله اتكرفت شميم البطانة لمن زكمتي راحت زيدونا يزيدكم الله من فضلوا قيسان ما قت لي ات ولدنا ولا واحدن تاني حبابك في كل الاحوال
|
Post: #225
Title: Re: خيــيمة الحــردلو - العمارات
Author: nazar hussien
Date: 01-02-2003, 10:49 AM
Parent: #224
حر عنافي نسل اماتو قاطع الشك جدو الابيض السابق خيول المك الرمي الحجيل من النزيلة انفك بعيد يا اربد الشرق المجارب السك
|
Post: #226
Title: Re: خيــيمة الحــردلو - العمارات
Author: Ahlalawad
Date: 01-02-2003, 11:08 AM
Parent: #1
الاحباب جميعاً ، تحياتي وشكري بلا حدود .
نزار ... لا حول ... دا نجر دا و لا قطع مصنع .. عندك قلبي شيلو مع طويك وفرك .. صح لسانك
الاستاذ الكبير الكتيابي .. أولا نحن سعداء بمشاركتك وتواضعك للجلوس معنا في هذه الخيمة ، التي وصفها السنجاوي بخلوها من القهوة والزنجبيل والهيل . كما قال أحدهم
ياريت كان بقيت تحت الصويل ضليل أو عنبر عزيز او هبهان او هيل
فعلا الهمباتة كما هي قوية وشاقة طبيعة كسبهم تماما كانت أشعارهم ، فلك من ذلك هذا المربع :
آه واغلبي من زولا جمالو ملوكي والحاس بيهو من تالاك يضوقو عدوكي أمن (إما أن) أرضى بي الذلة واتركو لهوكي وامن نطلع القلعة وجبال السوكي
أديبنا الرحمابي ، تحية لك . بالنسبة للمربع الذي ذكرت فأرجو أن أجده لك فهو لأحد شعراء الحقيبة وفي أغلب الظن لود الرضي .
الاستاذة الجندرية .. نحن في حرج شديد من هذا الكرم بترددك على خيمتنا .. لك التحية .. وان شا الله الشباب يجيبوا ما يرقى لذوقك الرفيع .
قيسان ، الآن مكنة هينو ونيسان : لك التحية وابشر بالخير .
تحية مرة تانية لنزار الفنان
|
Post: #227
Title: Re: خيــيمة الحــردلو - العمارات
Author: عبدالقادر الكتيابي
Date: 01-02-2003, 02:19 PM
Parent: #1
أخوي اهل العوض مشكوور وماني مقاطع ان رديت على ردك قبــل لا تـَّـــَـــــابع لي شرف الدخول للخيــــمة ـ مان متواضع خيمتــكم شرف ـ لي كل عيـن بتَّـَّـــــابع
كتيابي
|
Post: #228
Title: Re: خيــيمة الحــردلو - العمارات
Author: singawi
Date: 01-02-2003, 03:12 PM
Parent: #1
الجندرية يعجبك السمح والزين وياسلام عليك .. الجبنة والشاي ديل ما بنزين النم يعدلن الرأس ومخمخن الكيف شرفتي الخيمة
الرحمابي القومة ليك .. شغلك نضيف بالحيل
وهاكم السنجاوية دي
ما ظنيت أعيش بعد الفـراق يا بنيـة وما ظنيت أعيش بعـدك دقيقة هنيـة وكتين العـذاب صار لي حياتي سجية شن بعملبو عمـراً كـل سنينه شكية
|
Post: #229
Title: Re: خيــيمة الحــردلو - العمارات
Author: gessan
Date: 01-03-2003, 10:25 AM
Parent: #1
الليلة الجمل من حيسو جابلي هدير تل جريدو وجاب خبو الطوال وعديل بت البجرد السبحة وبقيم الليل من تالاها يا الحبان منامي قليل
الجندرية ..سلامين .."ولدنا"دي فهمتك قاصدة منو..لكن في الحالتين ياني ولدكم ..وهاك دي من نسام البطانة
سمحت ومن شنات الصيفة لونا اندسا وجبّالك لبس من الخدار واتكسى يا المردا التليني مع الجمال في الرسا فوقك زرقن الرزمي السحابو اتمسى **** اتخلفلها البطحاني والعبادي ونفضنو المتل جبب أم صريمة يدادي نحنا ترانا للشابورة ديمة نحادي عنز الشاي مراقبة من غرامة القاضي
قالوا ده الصادق اب آمنة بعد ما بقى زول حواشات في حلفا..كان بالو هنااااك في البطانة..والسربة البلا حدود ..ولا غرامة
تحياتي للجميع
تقعدوا عافية
قيسان
|
Post: #230
Title: Re: خيــيمة الحــردلو - العمارات
Author: Ahlalawad
Date: 01-04-2003, 07:25 AM
Parent: #1
الاحباب جميعا ، تحية لكم . تحية للاستاذ الكتيابي وأكرر سعداء بمشاركاتك .
السنجاوي ، وأنا أيضا أتساءل : شن تعمل بو عمراً باقي كله شكية؟ الله يخفف عليك .
نزار : أرجو أن تواصل في هذه الأبيات : أظنها هي الأبيات التي سألت عنها الصديق في الخيمة القديمة .... نايبك كك .. وهكذا .
قيسان : تحية لك على هذا الغزير الهاطل .
جمالاُ غير كلف حكمه رحيم وجليل وجيهك دارة القمر البضوي الليل ياريت كان بقيت تحت الصويل ضليّل أو عنبر عزيز أو زعفران او هيل
|
Post: #231
Title: Re: خيــيمة الحــردلو - العمارات
Author: الجندرية
Date: 01-04-2003, 09:05 AM
Parent: #230
جنيات الخيمة سلام كان لدي اعتقاد ان العرب يتعاملون مع النساء بنظرية "شاوروهن وخالفوهن " ولكن فاجأني موسى ود جلي عند اعتمد على شمة اخته لاكمال المشاورات حول قرار الحرب مع الشكرية واعتمد ذلك الراي ولم يتجاهله عليكم الله العندو الكلام دي انزلوا كامل
"هديك شمة كان تتم الشورى "
مع تحياتي
|
Post: #232
Title: Re: خيــيمة الحــردلو - العمارات
Author: nazar hussien
Date: 01-04-2003, 09:47 AM
Parent: #231
الجندرية الرائعة
مسرحية المك نمر للعبادي فيها كمان كم شورة زي دي
فبعد ان دار الحوار بين شيخ العرب / الشكري وطه البطحاني
ما تجو يلا نشوف علي طريقة زكيا زكريا
شيخ العرب يمين بالله غير الغاية مالي مبيت
طه يا شيخ العرب امرك بشوفو حقارة وما جابتك مره الجابتك بس غارة وقرناك كتير نفسك ابيتو وقارة خبرك هذا ما بدورلو دق نقارة
واحد مع شيخ العرب قال لي طه واسمو علي
قبلك في اللجج يا طه راحو انهدو بتتجاسر علي شيخ العرب بتهدو زولكم مو عاقل آ كبار اخير تهدو بي عنادو الفريق خايف يسبب هدو
طبعا شيخ العلرب في القصة جائي طالب ايد ريا الهي خطيبة وبنت عم طه وشيخ العرب عارف الحقيقة دي
طه لي علي زول شيخ العرب القال الكلام الفوق
انا المالح الكارب خريفي وصيفي والمتلك تبيع ما اظن يطول فوق قيفي كان ما الليلة في بيتي وبعدك ضيفي في الشى السمعتو برد عليك بي سيفي
شيخ العرب قال ليهم
كفا يا بطاحين فيكم اتغشينا كرمكم جانا طامح رخسة واتعشينا بعد الشي السمعتو تاني كان ما مشينا خايف في اجتماعنا تقع وقايعا شينة
اها طيب في وداعة الله عقب بيناتنا ما في علاقة وات يا طه اتشفيت شبعت شلاقة امرت الشر سعيت دليتو بي معلاقة اها نحن وانت بعد الليلة يوم نتلاقا
الخ الحوار وبدوا البطاحين يحنسو في ضيفن شيخ العرب ويقترحولو في الحلول غير ريا
واحد من البطاحين واسمو عبدالله قال لي شيخ العرب
سمح ارجانا يمكن طه نحن نجبرو شيخ العرب الزول في الرقاد شقو البريحو بخبرو والزول البليد بي ايدو بحفر قبرو اها عاد بنسوي عوسنا وطه يلزم صبرو
طه
سوي الدايرو وكتر الكلام خليه والشر القصدتو معاي ابقي عليه طير اصل السما حتي القمر دليه يوم نتلاقي كل واحد بعرف الليه
هنا طه قام مارق من الجماعة
لحقو واحد من جماعتو اسمو احمد بدا ينصح فيه عشان يتراجع ويتنازل من ريا ابنة عمو لي شيخ العرب
الي ان قال
انا عندي العرب بي ريا اخير نفداها
وجاهو عبدالله بنفس الراي
وديل
هم كبارو وقت غلب فيه حيلة قالو
نشاور ريا امكن ريا مي دايرك
طه صدقوا القالو خربانه البلد بي كباره اهديك ريا سئلوها واعرفو اخباره من غير السفر ما عندي تاني دباره نحن وانتو بي دي الحاله ما بنتبارى
وفعلا شاوروا ريا ورفضت وسافرت مع ابن عمها الي المتمة الي المك نمر سيد النحاس الجض جيتو علي حملة غيرو ما بتنفض
معليش بديت من بعيد عشان الصورة توضح هذه المشورة الصعبة بين قبائل وحقن دماء وكفتين غير متوازنتين ومصير مجهول وخذلان وحب وجاه وبرضو شاوروا ريا
صدقو القالو
|
Post: #233
Title: Re: خيــيمة الحــردلو - العمارات
Author: nazar hussien
Date: 01-04-2003, 10:02 AM
Parent: #232
وسمعوا شورتها
|
Post: #234
Title: Re: خيــيمة الحــردلو - العمارات
Author: الجندرية
Date: 01-04-2003, 11:04 AM
Parent: #233
نزار اشكرك يمكن مشاروة ريا هنا جاية لأنه الموضوع اصلاً عرس وخطوبة ويخصها ودي موجودة لكن الغريب في امر ود جلي ان الأمر لم يكن له علاقة بالاجتماعيات الموضوع كان حرب في حرب واصل في نفس الاتجاه لوسمحت ارغب في معرفة المزيد وهدم افكاري القديمة تشكر مرة ثانية
|
Post: #235
Title: Re: خيــيمة الحــردلو - العمارات
Author: Ahlalawad
Date: 01-04-2003, 11:47 AM
Parent: #1
نزار حتى في هذه المسرحية ، في نهايتها تقوم شمة زوجة المك نمر وابن أخ القتيل حمد بلم الشمل وذلك بمبادرتها بإرسال ود النعيسان إلى والدها لمعالجة الأمر
الأبيات كتيرة وطويلة
|
Post: #236
Title: Re: خيــيمة الحــردلو - العمارات
Author: Shinteer
Date: 01-04-2003, 12:56 PM
Parent: #1
ها ناس سلام عليكم جميع. مسكنا منكم الشديد القوي
يا اهل العووووووض .. ماك طيب؟ و الله جيت داخل صدفة بس و لقيتك كاتب الكلام الفوق ده و شميت فيه ريحة استفزاز .. اها و انا استجيب لاستفزازك ده
الكلام المجيقن
تيسو البجـر رسن المـريد ويمغاهو بالغ قلبـو والمغسول عقب طغاهـو ربـو الخالقو من سود العيون وقاهو حـنّ وقـجّ فـرّق وبعدو وشـغاهو
الكلام المنضوم
التيس البجر عاصي المريد و يمغاه دالع قلبو و المغسول عقب تغاه ربو الخالقو من سود العيون وقاه حنّا و قجّا فرّقو قعّدو و شغّاه
يا سنجاوي .. و الله حكايتك حكاية .. أنا قانص ليك ليل و نهار .. و أنت تقوم تغفلنا و تجي طوفة كدي و ترمي فوقنا اللوم؟ الله .. و ين المسنجر و الهترشة؟ و الله مشتهي لي هترشة معاك
التحية لكل الاخوة .. و استاذنا عبد القادر الكتيابي أحييك تحية صامتة فهي ابلغ عندي من كلمات محكوم عليها بالغرق في بحرك
التحية للانسان الانسان الخواض .. و الدكتورة السارة .. و قيسان .. و بحر اب بحراً تنير .. و في النهاية يا نزااااااار الناس ككهن و لكّهن .. لكها يا كريم صبح نداها سخانة .. الشي ده ما وصل .. دحين ولّع الدكنابة و اضرب الزاقر انا بشيل القاضي الاطرش ده و بلحقك تب فوق جملاً أصهب
الاسمو راح علي .. ارجو المعذرة .. على الطلاق انا بكتب و جاكّي
|
Post: #237
Title: Re: خيــيمة الحــردلو - العمارات
Author: Ahlalawad
Date: 01-04-2003, 01:21 PM
Parent: #1
شنتير - شيخنا وشيخ العرب أولا حمدلة بالشوفة ومليح الشفناك طيب وإن شاالله تكون لسة موجود عشان تتم لينا دي
الكلام المجيقن
رفع سرجو ولشغ سوطو وجبد مخلوفتو إنّب وانحقص جملي الرقاق ضرعاتو شبه الفي العقد شتي ومرية وطاطو الباقي عليك امان الله ان قريب في الفاتو الباقي عليك يا الماك تاجر حمير
|
Post: #238
Title: Re: خيــيمة الحــردلو - العمارات
Author: Shinteer
Date: 01-04-2003, 01:31 PM
Parent: #1
اهاهاهاها و الله يا اهل العوض .. بقيت لي زي الصهيب .. قدر ما اقول ابرد اضاني تقوم تزن لي فيها. اها آبوي إت فلّخ و انا ببربح ليك .. يعني نظام شقيق و كتل
رفع(رفعت) سرجو و لشغ طوُفو و جبدلو قشاطو و اللب و الحقب جملي الوشاك ضرعاتو شبه الفي العقد شتّى و مرية وطاتو قصدي هجومو بالمتل السفينة وهاطو
ابقى غافية
|
Post: #239
Title: Re: خيــيمة الحــردلو - العمارات
Author: Ahlalawad
Date: 01-04-2003, 01:40 PM
Parent: #1
إت بتعرف الشقيق والكتل؟ أكيد بتعرف كذلك عمل الآرساية
أها كتر خيرك .. أفدتنا أفادك الله
صيدح سرجي ها المهلة الوسادة مشـدّك بينك وبينو عتموراً خلاهـو بهـدك سرجـك لاعبو غاليلي دواير وقـدّك آ القنجر من الحركة ام زوايل ردك
تقيل الختوة تاتاي المشيهو اتوحل والله شي طاعم خلاس ختري عدييل
|
Post: #240
Title: Re: خيــيمة الحــردلو - العمارات
Author: Shinteer
Date: 01-04-2003, 02:06 PM
Parent: #1
صيدح سرجي ها المهلة الوسادة مشـدّك بينك وبينو عتموراً خلاهـو بهـدك سرجـك لاعبو غاليلي دواير وقـدّك آ القنجر من الحركة ام زوايل ردك
صيدح سرجي ها المهل الوسادة مشدك بينك و بينو عتموراً خلاهو بهدك سرجك لاعبو غانيلي الجوالس و قدك آ القنجر من الحركة أم زوايل ردك
|
Post: #241
Title: Re: خيــيمة الحــردلو - العمارات
Author: nazar hussien
Date: 01-04-2003, 02:59 PM
Parent: #240
تسلمي يا الجندرية
موضوع ريا هنا ما كان موضوع عرس وخطوبة وبس
موضوع حمرة عين وقلع وقبيلة
لانو شيخ العرب ايقن ان ريا فات فيها الفوات لي طه هدا قبالك
ففي داعي يصر علي رايه لو الموضوع ما ابعد من كده
وبنلقي بعدين في المسرحية
الشوره الذكرها اهل العوض برضو شورة امراة واخذ بها
|
Post: #242
Title: Re: خيــيمة الحــردلو - العمارات
Author: garjah
Date: 01-04-2003, 03:42 PM
Parent: #241
اهل العوض بكتب ليك اخوي من بلدا فيها يمة وفيها يابا وفيها الطيبة كتيرة والفرح جابا بكتب ليك اخوي من نفس رغم الحزن شابا والزمن رغم طيبتو حالف لاحلامايابا بكتب ليك كليمات فرحانة من بواقي فرحة لسة في جوايا هابا
ولسة رغم ما صابا ومهما الحبيب اباها برضو في حبكم كابة
بكتب ليك اخوي مشتااااق بكتب ليك اخوي محتاااج
لنبع الطيبة وطيبة الطيبة ولقا الحبيبة الابى ينضاق
|
Post: #243
Title: Re: خيــيمة الحــردلو - العمارات
Author: gessan
Date: 01-04-2003, 05:18 PM
Parent: #1
أهل الخيمة ..سلام
يوماً بي مجالس أمات عروض بنفرّق ويوماً نحنا في العقبة اللهوبة بحرّق يا مسيكة البدف من الدميرة مشرّق برضيك بي ردايفاّ قلبي ليهن جرّق
*** من زمن الخليفة الحال بقت مرهونة وعضام شبابنا راقدات في المشانق شونة بالقيد والسجن يا احمودة ما بيهدونا نحنا أخوان بريريبة الجزو..الدرفونة
وتقعدوا عافية قيسان
|
Post: #244
Title: Re: خيــيمة الحــردلو - العمارات
Author: AlRa7mabi
Date: 01-05-2003, 07:14 AM
Parent: #1
أهل الخيمة
جيتكم بي كلام الشريف زين العابدين الهندي ، أوربت سودانية كل مرة بديكم منها مقطع مقطعين ..
وببدأ بي أهل العوض ، أهل الجزيرة القال فيها
مبسوطة ومحكّرة لا هُبك لا تبوب وقطنك زي لتيب الحقنة خاطي عيوب معلاق منتني ولوزاً عفى ومكروب وتيلته طويلة زي خيط الحرير في التوب ** دواوينك مفتحة لي الضيوف مفروشة وحلالك مجندرة لا وسخ لا كوشة شاربة الهمبريب بي الساريات مرشوشة والعجب الأماسي تقول ليالي الروشة
بقول للسنجاوي
أعقب سنجة طوف بي الدالي والمذموم روح لى القرابين والسماسم كوم شوف كُرمك شرف قال لي الردوك ما تلوم أنسى الفاتت أيامك بجيهن يوم
|
Post: #245
Title: Re: خيــيمة الحــردلو - العمارات
Author: Ahlalawad
Date: 01-05-2003, 09:07 AM
Parent: #1
الاخ قرجة .. تحية لك وشكرا على الكلمات الرقيقة المليئة بالحزن ، ليه كل الحزن؟ ليه كل العذاب .. خفف الله عليك .
الأديب الرحمابي شكراً لكلمات الشريف ، وفي انتظار اكمالها .
الأخ قيسان مكنة هينو ونيسان ..
يوما في بسط عند المقسمة نومنا ويوم نتغطى من لفح السموم بي هدومنا يوم بنوجب العملة ونجيبا لزومنا نحن إن خفنا يا خلي ام رشوم بتلومنا .
|
Post: #246
Title: Re: خيــيمة الحــردلو - العمارات
Author: nazar hussien
Date: 01-05-2003, 02:55 PM
Parent: #245
يا اهل العوض
ليلتا كربتيت وليلتا عشانا ربيت وليلتا نمضع التابا وعليها نبيت
عفوا ما بعرف اكتب التنوين ولا باقيها
|
Post: #247
Title: Re: خيــيمة الحــردلو - العمارات
Author: Ahlalawad
Date: 01-06-2003, 06:14 AM
Parent: #1
نزار بمناسبة الربيت والكربتيت أها - فتيل الصندلية الرسلتو للراجل إن شاالله يكون وصلو ويكون فك العمة
|
Post: #248
Title: Re: خيــيمة الحــردلو - العمارات
Author: nazar hussien
Date: 01-06-2003, 07:20 AM
Parent: #247
اهل العوض
تحية الصباح
من سيد عبد العزيز الايام دي انا معلق في شعر سيد عبد العزيز وبحاول اسمع كل اغاني الحقيبة واكتب منها قدر ما الله سمعني
غصبا عنك يلفت نظرك مهما تحاول وتاخذ حذرك تصبح عاشق غصبا عنك
ان يوم في العمر الحظ نصرك وفي نعيم حسنه اتمتع بصرك تصبح اسعد ابناء عصرك وتملا عيون كل من بصرك
ايوة الصديق البارح كان معاي علي الماسينجر وكنا نتلاوي في بعض بيوت الشعر الحقيبي وهي كمان لسيد
اما الامانة وصلتو تب
|
Post: #249
Title: Re: خيــيمة الحــردلو - العمارات
Author: Ahlalawad
Date: 01-06-2003, 08:02 AM
Parent: #1
جمدلة على سلام الراس طبعا دي زي ما انت عارف آخر أغنية غناها الكاشف وتم تسجيلها وهو جالس على كرسي وكانت الأغنية الوحيدة التي تم تسجيلها فيديو في التلفزيون حيث كان التسجيل قبلها إما صوت فقط أو صورة فقط طبعا من أشهر أغنيات سيد أغنيةأنة المجروح وفيها بيت لم يغنه سرور وهو ناقم على الأيام مع إني طبعي صفوح فقال سرور : مين قال أنا طبعي صفوح
غايتو انا ما بعرف ، لاكين ما قادر أشبع من المربع الجابو شنتير دا
فقرك دير ودومك في قلايدك باهلو
|
Post: #250
Title: Re: خيــيمة الحــردلو - العمارات
Author: Shinteer
Date: 01-06-2003, 08:19 AM
Parent: #1
الاخوان نزار و اهل العوض .. ان شاء الله بسط
و الله يا اهل العوض .. انا زاتي الغنوة شدة ما مالية راسي علي الطلاق ما مخلية فيه نفس .. زي ما قال ود جماع:و شكرك مقشط راسي. غايتو غنوة تخينة زيها كدي الله تعلم يقدر واحد ينجرها .. لانها بتخنق
أب قنفة العني الميع الملانة مماهلو فقرتـك دير و دومك فوق قلايدك باهلو على الما قالوا حظك في المجالس جاهلو الصي سادرو كلو - و ودسو - وكرو و ساهلو
|
Post: #251
Title: Re: خيــيمة الحــردلو - العمارات
Author: الجندرية
Date: 01-06-2003, 08:26 AM
Parent: #250
والله تبارك الله
|
Post: #252
Title: Re: خيــيمة الحــردلو - العمارات
Author: Ahlalawad
Date: 01-06-2003, 08:28 AM
Parent: #1
شنتير أسمح لي أستغير تعبيرك المشهور غنوة تمرق الوقيعة من العين
أها : دا من القديييم
السنة هادي المسور في ضريس يا اب دومة نباعة فوق الله وعلي ضراعك نسوي بتاعة لي فرتوت بننقد ناقة اب دلاعة انا رضي با الماها مرمية ورذال اطباعا
|
Post: #253
Title: Re: خيــيمة الحــردلو - العمارات
Author: Shinteer
Date: 01-06-2003, 08:40 AM
Parent: #1
يا فلاتي دار هوسة المسوّي الكاينة ناجع و جلدو مالي الخوف و عينو معاينة قالع و فكك الحسكة ام حديدةً صاينة قاصد الزولها واحد - مي أم رباعة الخاينة
تصبحون على خير .. أنا متراوح
|
Post: #254
Title: Re: خيــيمة الحــردلو - العمارات
Author: gessan
Date: 01-06-2003, 10:21 PM
Parent: #1
سلام جاكم قاعدين في خلانا متونسين برانا فوقك تقيل يا مطرق الخيدرانة (من أغاني ما يعرف بالجابودي..عند بعض اهل البطانة..والغنوة تكون ثلاثية..)
الجندرية..بخصوص موضوعك عن المرأة وشورتها عند أهل .. الدوبيت هؤلاء.. لابد لنا مما ذكره بعض المهتمين بامر التراث أنه عند الرجوع للتراث ودراسته وبالتالي إستلهامه في الاعمال الادبية والفنية..لابد لنا من عملية "أختيار" للذي يتوافق مع حاضرنا وبالتالي مستقبلنا..لأن ليس كل التراث صالحاً لتاريخنا الحاضر.. فعلى نفس هذا المنوال لو تتبعنا مثلاً المرأة عند أهل البطانة سابقاً"مثال"..لوجدناها وخاصة عند الزواج الذي هي جزء أساسي فيه لا تستشار ..وغالبا ما يكون الزوج هو ابن عمها "غطاء القدح"..!!
و نسبة لطبيعة الترحال والتنقل ..فهي بلا تعليم .."ربما تغير الحال بعد قيام قرى التوطين في مشروع حلفا.."..فالمرأة في مجتمع اهل الدوبيت "إذا جازت التسمية".. لا أعتقد انها كانت تستشار كون رايها يمكن الأخذ به ..ربما في حالات نادرة.." فحتى في حالة"شغبة زولة المرغوماب"..فهي كانت حكامة أو "محرضة" على القتال "والذي في حقيقته بين قبائل..وربما ابناء عمومة"كمان"..وذلك بغنائها المعروف".. كذلك في مناشدتها لولدها بان يترك التفرغ للدين والعبادة"أريت يا حسين ماني أمك وإتا ماك ولدي".. وعليه أن يكر ويفر كما كل الرجال..وبالطبع نجحت في ذلك .. "جدعناك يا لوح وكسرنا يا دواية.."
إذن يا الجنادرية تراثناالشعبي والدوبيت جزء منه..مليء ربما بالمفاهيم التي تغيرت أو التي لا تصلح لزماننا الحاضر وبالتالي لا نتفق معها..فمثلاً عند طرح السؤال : فيمن كان يتغزل شعراء البطانة..خاصة وان الغناي عيب عليه إن تغزل في بنات قبيلته كيف لا وهو "المامون علي بنوت فريقو.."..أو اي من القبائل التي تقاسمه "السوالف"..أو المشاركات الإجتماعية؟؟؟ فالغزل كان في "الجواري" ..فمجالسهن معروفة ..وقد شهدت معظم ما قيل في الغزل..فلو نظرنا لهذا الموضوع لوجدنا ان فكرة الجواري هذه ..هي اساس المشكل السوداني الماثل الآن.. !!!؟؟!! علي أي حال هذه رؤيتي ..عندما توقفت عند نقطة إعتقادك في "العرب" ومشاورتهم للمرأة كي يخالفوها.. والله شنو؟؟؟؟؟؟
وكت الليل برد والفقرا قاموا يصلو السادر سدر واهل الخدار إتدلو أنا حارس لي جدياً ما مرق من ضلو خشمي يابس ..ريقي البحر ما ببلو
تقعدوا عافية
قيسان
|
Post: #262
Title: Re: خيــيمة الحــردلو - العمارات
Author: الجندرية
Date: 01-16-2003, 06:42 AM
Parent: #254
UP
|
Post: #255
Title: Re: خيــيمة الحــردلو - العمارات
Author: Ahlalawad
Date: 01-07-2003, 06:31 AM
Parent: #1
استمعت البارح إلى جزء من لقاء قصير مع الأمين البنا وقال فيه كلام طاعم خلاس ، من ضمنه مسدار اسمه القمرية ، أقتطف منه الأبيات المذكورة أدناه . وفي ختام اللقاء تم تقديم مسدار آخر على طريقة المجادعة بين الأمين البنا والجقر ...
يا قميرية نغمات الغرام زيديهن سوي القوق ونغماتك عقب رديهن على الغنى والسواويل القفر وديهن ليه سلامي والشوق بام جناح وديهن
أنزلي فوق فرع قبل الفريق يا نايحة وكتري في الطنين مثل الحوارة الرايحة مربوعة بنات لينة ورطيبة ومايحة قوليلها السلام ليك يام مسيرة سايحة
قول ليها العشوق تعبان أذاه مطول وكل الشافو أصبح في العليه متهول عشان عينيك مباري وبالقفار متجول لكن لا الممات من عهدو ما متمحول
قدر ما شاف برق في القبلة يشلع وجّ يتقافى المنام من عينه ياخد لجة نيران الجحيم بات في الفراش منفجة دكتور الغرام مع أهله عامل حجة
|
Post: #256
Title: Re: خيــيمة الحــردلو - العمارات
Author: AlRa7mabi
Date: 01-08-2003, 05:49 AM
Parent: #1
.. أهل العوض ، بلحيل شفت اللمين البنا والجقر سووا عمايل ، لكن باقي لي البنية المذيعة كانت مخلوعة وما فاهمة التكتح
نواصل في الأوبريت
أمانة عليك بطانة أب سن بتسني الكاعة يوم اكلت كباد ساكت رخم وضباعة يوم محمود وناس عوض الكريم سمساعة واقفين في الشمش دايرين اغطوا شعاعه في ضحوة عجاج وسيوفهم اللماعة ياكلن في التراقي واقطعن في ضراعة ** يا المعزوزة بي دمانا وعضام أبواتنا عارفنك مقريفة لي شراب قهواتنا زغرتي يا أم شيوم خلى الندق محساتنا ونحاسب عقاب الجاتنا والما جاتنا
رحمابي
|
Post: #257
Title: Re: خيــيمة الحــردلو - العمارات
Author: Shinteer
Date: 01-10-2003, 10:56 AM
Parent: #1
You tooooooo, wake up.
|
Post: #258
Title: Re: خيــيمة الحــردلو - العمارات
Author: gessan
Date: 01-10-2003, 07:32 PM
Parent: #1
سلام جاكم
مطلوق من بهاسات الدرت والصيف إتورم قفاهو ومن فوق بقالو عريف أعجل تُرو من الشارعو ببرا القيف ببطح راسو وبرعى القٍدة بالماحنيف
**** حكيم الصحة قاليّ تاني ما تسعلني وحسسك جُوة داخل في الكبد متبني تبّن ..لقيت مرضك كتيير محّني أسبابو البقول..حي المشاط حرّقني
أها بي عدلكم ..ولا قدام
تقعدوا عافية قيسان
|
Post: #259
Title: Re: خيــيمة الحــردلو - العمارات
Author: الجندرية
Date: 01-14-2003, 06:26 AM
Parent: #258
الأخ قيسان ما ذكرته هنا كان هو اساس فكرتي السابقة ولكن عند سماعي لدوبيت منسوب لموسى ود جلي عن استشارت شمة اخته في اتخاذ قرار الحرب مع الشكرية انتقاماً لمقتل ناقته اهتزت قناعاتي السابقة وقفزت الاسئلة الى رأسي هل كانت حالة خاصة ؟ أي انه من شدة معزته ومحبته لتلك الأخت كان يستشيرها في أمور كهذي وأن هذه المعزة كانت شائعة ومعروفة حتى ان زعيم الشكرية قال بانه سيذيقه العار والمذلة ويشمت بشمة على حد قوله " كان اشمت شمة دي العاجبالو " بقى ان اقول ليس كل الغزل والتشبب كان بالجواري فهناك كثير من النم يؤكد انه كان في عربيات فلم يكن الرق عندنا جاري الإ في العنصر الزنجي " وجهك دارة القمرة " ليس كناية عن استدارة الوجه فقط بل عن اللون الفاتح ايضاً او ما يطلق عليه عرب السودان باللون الأصفر ( التبري أو القحمي او الخمري ) ولايمكن ان يكون المقصود بها جارية او سرية .
|
Post: #260
Title: Re: خيــيمة الحــردلو - العمارات
Author: sentimental
Date: 01-14-2003, 06:34 AM
Parent: #1
وروروروروروروروروروروروروروووووووووووووووووووووووووووو يا شنتير واهل العوض والفنقة والطنبور وام حمد وسونيل وورورورورورورورورورو مساديركم تخلى الكور يعيط وووووووووووووووووووووووووووووووووووووووووووووووووووووواىىىىىىىى
غشيت اولاد نمير بدى التحية فتقنا الشد هناك ساعة شوية حسارات أم قبيل زادن عليى فلانة الفى البنات سالكة وصبية
وشنكتشنكتشنكتشنكت شنكتاتتتتتتتتتت
نم نموا والله تنموا
|
Post: #261
Title: Re: خيــيمة الحــردلو - العمارات
Author: Ahlalawad
Date: 01-14-2003, 06:38 AM
Parent: #1
سنتي منتي ال تحياتنا لك بالشوالات
اها :
تقاي المفلخ شلتو في مشهادك جوط واتجوجا يا هسع بعيد مشوارك قال لي الهسال كان ترخي منه يسارك بوريك أدعج النقعة الفتق نوسارك
حياك الله
|
Post: #263
Title: Re: خيــيمة الحــردلو - العمارات
Author: Shinteer
Date: 01-16-2003, 12:54 PM
Parent: #1
باركة هنا ليه؟ قومي يللا فوق .. للعلا
معم السلامة
|
|