أحسن الأولاد ولا البنات؟

سلام أهل الحلة
دي رسالة وصلتني بالبريد كدي شوفوها

احسن الاولاد ولا احسن البنات؟...احسن البنات

،تقولو متحايد تقولو منحاد برضو احسن البنات

،انا اكتر زول بعرف البنات واكتر زول حبيت وتشوكشتا على نطاق جميع المعاهد العليا والجامعات

،اتشوكشتا في الدنيا دي كترة مرات

،شواكيش في نص الراس بي ورة وبي الجنبات لحدي ما عملن لي جلحات

...دة كلو بي سبب البنات،لكن برضو بعزهم وبقدرهم،واكان دايرات رموشي ديل بقلعهم وابقى بدون عيون واحوم في الشارع زي الشحات

ما بشحد رجال الا هن...لكن كمان بي صراحة البنات كترن،كترن والمشكلة ماشات زايدات

،المغتربين نقلو فيهم لمن فترو وانتو يا البنات ماشات زايدات

،فرزو ليهم عيشتهم في المواصلات ماشات زايدات

،ادوهم عشرة كراسي ماشات زايدات،تاني زادوهم خمسة ماشات زايدات

،ادوهم الكراسي الورة السواقين نقو جابوهم قدام راجعات،سوو ليهم العرس الجماعي في الاستادات

،بقو يعرسو ليك فيهم بالميات لي درجة انو داك ما يفرز مرتو يسوق مرة داك ما فيها اي حاجة،في النهاية كلهن مسلمات ومتحجبات وماشات

،جامعة الخرطوم نصينهم كتار بناتو ماشات،بنات الفرع الله يرحمو نصينهم كتار بناتو ماشات

،بنات الاسلامية من كترتهم فصلوهن من الاولاد وماشات،كلية الاحفاد اقسم بالله ديل غفيرهم زاتو بنات............

بيت ناس بطة ياخ دة اتملى بنات لمن قال كفى لي درجة انو ابوهن قسمن لي مجموعات ستة،كل مجموعة فيها دستة،اها يوم لتة عتر وقام حرامي عليهم نطة،الحرامي لي شقاوتو كان شاب وجيه حبة...بس خشة ما خشة صحت ليهو منو و كراااح قفلت الباب على الحرامي وقالت ليهو وين انتا الليلة ما وقعتا،ضربت صفارة الصفارة صحت ليك باقي المجموعات الستة واتلمن ليك بطة واخواتها في الحرامي دة من كلو حتة وشبكنو ليك:ايي سمح انتا وعسل انتا،ايي سمح انتا وعسل انتا،،الحرامي قال ليهم يا بنات ما تهظرن يلا دقوني سريع عشان انا اتأخرتا...قالو ليهو نحنا الليلة اكان فكيناك وبي حلاتك دي نجيت وسلمتا اقل شي تكون مارق من بيتنا دة وانتا خطبتا..الحرامي قنب يدردق في الوطة..يا بنات قدرن موقفي،انا حرامي ما ساكت جيت سرقتا،وبعدين انا والله بالجد عرستا،،صحت امهن من النوم قالت ليهو ومالو يا ولدي ما تعرس تاني في واحد قتلتو عرسة؟...............

عمك عبد الجليل والله دة عندو 13 بت فرشو عديل،بارن كلهن اخر حاجة شالهم في دفار وداهم وكالة دقاش للتدليل وكتب ليك اعلان في الجرايد بي البونت العريض:يعلن عمك عبدالجليل منكود صابر جدا عن عرضه 13 بت على النحو التالي بالتفصيل: خمسة بحالة جيدة ،خمسة سكند هاند،وتلاتة بيكب دبل كبينة خردة ولا في زول جاهو...اخر حاجة وداهن جنب الجامع الكبير وبقي يكورك في الماشين والجايين:علينا جاي بي خمسة،اي واحدة بي خمسة،شغلة ما شغلتنا بي خمسة،لكن الظروف جبرتنا بي خمسة،موظفات بي خمسة،طالبات بي خمسة،خريجات بي خمسة،ماشات موضات بي خمسة،متحجبات ديل ما لي البيع).........

والزيادة انطبقت ليك سلبا على الاغاني والامثلة كلها،يعني عندك المثل بتاع وراْ كل رجل عظيم امرأة دة مثل قديم ومشهور لكن في زمنا دة بقى وراء كل رجل مسكين كمية من النساوين،واذا مسكتا الاغاني حدث ولا حرج..اسع غنية يا الله يا الله عريس دي ما شحدة عدييييل....

ونذكر مأساة الاغنية الشهيرة والتي نجد امثال العنف والتسلط والتي راح ضحية احداثها الموسفة جدا حمادة دة...والله حمادة دة حنان ساكة ليك من الكلاكلة لي امبدة،تكورك بي اعلى ما عندها من صوت:ما بسيبو حمادة دة،ما بسيبو حمادة دة..سبتها ليك عسكري الحركة يا بت ما بتسيبيهو مالك؟ما بسيبو شال قلبي في ايدو،دة ما قلع..تقول لي بتريدو؟؟وتجي حوة تغني على وجه الملآ :حمادة انا ادقو دقة انا اقطع لحمو انا حتة حتة...تدقو دقة؟وين الرقة؟وين الانوثة وين الاستلطاف؟دة ما السبب الخلا ابو عركي يصرخ وااااااااااااااااااي بخاف بخاف بخاف..........

كترن...عمك حمدتو مرتو تشيل وتلد ليهو في البنات،سمى فاطمة سمى لمياء سمى شاهيناز كمل اسامي البنات..جابت ليهو تاني ستة تومات قال ليها يا ولية انتي كديسة؟اسميهن ليك شنو؟انقر ما سماهن الكلاكلات!!!!

اها يوما داك برم شنبو وترك فات مرتو،قال ليها يا ولية كدي جيبي ليك بت تاني وابقي ارجل مني في البيت دة،قفل الباب وطلع على كدة،بي جاي المرة تاني ولدت تاني جابت ليهو بت،ولما جا غشتو ليك قالت ليهو هاا يا راجل بت شنو الجبتها جبتا لي ولد..عمك حمدتو ما صدق مشا السوق ختف ليك خروف جابو وسمى ليك البت الله جابو..ابوها بي جاي مصدق وامها تشيل وتدسدس والله جابو ماشا كبيرة،وابوها يشيل ويودي ليك فيها لي الحلاقين يحلقو ليها في الصلع والله جابو ماشا كبيرة،ويودوها ليك لي الترزية يقطعو ليها في البناطلين والجلاليب والله جابو ماشا كبيرة،ودخلها ليك مدرسة الاولاد والاولاد ديك ما صدقو جنس حركات والله جابو ماشا كبيرة،وبقى عمك حمدتو كل ما يجي راجع لي مرتو يقول ليها والله يا مرة انا حركات الولد دة مااااااااااااااااا عاجباني...وهي البت زاتا بينا وبين نفسها بين مصدقة وما مصدقة قالت كلام ابوي دة النمشيهو امكن الولاد الزمن الحايمين ديل كلهم كدة...............

لكن الحقيقة لمن نقولها حسرة بتملانا،البنات ما كترن ولا كترتن مازيانا...كملنا نحنا كيف ما بنكمل وفي نار مولعة في البلد بتحرق توقد في جنيات حشانا..خلو البنات قاعدات يطبطبن في الارض بي حنانا والارض تطبطب في البنيات والدموع ماليانا

بعد كلامك الكتير ده برضو الاولاد احسن

ـــــــــــــــــ
وفي مثل يقول
البنات اجمل الكائنات
،،،،،
بس ما قال احسن!!!!

ـــــــ

ـ
النيلي

اجاوب على السؤال

من رائى ـ الاولاد

نيسان2002
لك التحية

الاخت ام در
دمتي

شكرا على المداخلة

يا جماعة القصة شنو كلكم اولاد كويسين وكده
لكن انا شايف المسالة نسبية

ولكم التحية

كلهم حلوين بس البنات احلى واحسن

تحياتى غدى

يا اخت انا اقولك الاولاد احسن
........ليه؟
لانوا الاولاد بتحملوا كل حاجه
وهم شباب المستقبل
وفي مثل يقول

لو صلح الشباب صـلحت الاجيال

يعني الاولاد هم عليهم كل حاجه
والبنات محلهم البيت وبس
ــــــــــــــــــــــــ
النيلي2002
[email protected]
[email protected]

وقيل الام مدرسه اذا اعدتتها........... اعددت شعب طيب الاعراق


تحياتى غدى

يا زول رسالتك دي عن البنات ولا عن البورة؟
لو عن البورة آدي الله وآدي حكمتو
وكان لي ولادة البنات الامهات يقولوا ليك ام البنات بتاخد اولاد الناس جاهزين الواحدة تربي الولد وتكبرو وتعلمو واول ما يشم نفسو ويسوي ليهو مرة و وليدات بعداك الا تستعوض الله فيهو
صدقني في حالات كتيرة البيسويهو راجل البت ولدها الولدتو ما بيسويهو ليها وكل زول بسببو وعشان عين تكرم الف عين

I think both genders are suffering what you call bora. Young men are financially unable to build matrimonial homes so they are bayreen in other words. Young women are doing all they can to attract the attention of men so they could volunterily come and knock the door..but is anyone listening?

الاخ بوش والله ابداع عديل كده والله من الضحك نسيت السؤال انا اقول ليك الاولاد والبنات على السواء وكلهم نعمه من الله ولا نقدر نستغنى عن الاثنين

العزيزة
غدى

نيسان2002

دعاش

بكاش

لكم الشكر على المداخلة
زي قلته سابقا حكاية الافضلية دي نسبية
اما كلام الاخت دعاش عن البورة والله دي بقت مشكلة اجتماعية
لكن بنفس القدر في رجال برضو بايرين لكن نظرة المجتمع السوداني للرجال فيهو شئ من الانحياز بمعني الفرق شنو بين رجل وصل عمرو 40 سنة وما اتزوج وبنت وصلت 40 وما اتزوجت في نظري كلهم بايرين
الله يقدرنا عشان نعمل العلينا
وبعدين لامن الواحد يقول يتزوج 4 عشان يحل المشكلة تقول عليهو الحاج متولي
شكلو كده دايرين زي مئة الف حاج متولي في السودان لوووووووووول وقتها ما تلقى بيت حايمة في الشارع

لكم التحية وآسف للاطالة

No diference they are both good if they get the attention and good upbringing.