Post: #1
Title: الشــــــــــــــــــول
Author: waleed500
Date: 05-02-2002, 04:30 PM
Parent: #0
عند المشرع القدامى
وفوق قيف ود عمر ومربط الدوامى
ود المك وقف ازكر و يعاين
والنيل متل سيفا للعروض صائن
شوف الكرده والعشر والصفصاف كيف باين
اتلفت يمين و شمال وبقيت اصيح واقول
الشول اضبح ليك بقره ولاتور
الشول اضبح ليك بقره ولاتور
يا ناس الشول ابى ما يرد ابى ما يقول تور تور تور
ود المك وقف مزهول
الشول يا ناس رحل مع السمحين والزينين
الشول ساب الضفاف والطين
الشول حالف ستين يمين تانى ما يبين
وسالت على خد الولد دمعه وفى الحلق عبره
وفى الفواد حسره على زمن الصفاء والوفره
حليل اللمه والصفقة واللعبه والسره
حليل الحمره والحميض حليل المقد والدفره
حليل الباجه والغابه حليل الهجليجه والسدرة
حليل ام بق بق والسبروق
صوت السقده والرزه الجايه بقوق
حليل ابو خريس والبهم والواسوق
حليل الحجره والكونيه يا الرفاعى البى ما يروق
حليل سرمه حليل الشمه حليل حاج ملود وابو النجا والسوق
حليل ود التاى سديد الراى حليل الضامر ود رزيق والقمارى البسوى القوق
حليل الكده والضقل والجنوى ديل فوق ديل
حليل ام ماوديعه ادينى وديعه شيلى وديعه حليل شليل
حليل طاب معناك بلى ما جاك يكف شينتك مليح بلحيل
فخرنا اسامى قفرنا الدقناوى والترير هنومه ودابى الليل
حليل الدرت والفليله والقرقار
والقفر والتقه والحقنه ملانه عدار
حليل الطيوب والطنوب حليل الدوبايه والمسدار
حليل الشوره والمطمورة حليل فضاوة البال
حليل خاله
ست الزمام خاله
خالك منو خاله
خالى الامام خاله
وره وقدام خاله
ست الدفيس خاله
مشيه ورقيص خاله
سوى الترير خاله
حليل الارباب ود حماد وجيب الدار
نبكيك يا زمن حزنانين عليك ضايقين المر
على زمن المحنه الفات وحالنا البقى ما بيسر
يبكوك الشيوخ والسبحه والابريق
يبكوك الجنيات والصفقه والكوريق
يبكنك الخالات والعمات وحسنات الفريق
سلام كتير يا اهلنا لنيل بلدنا وقمرنا
سلام لطين الجروف سلام لبترولنا واملنا
سلام للسمحه شمس الفريق سلام للسلام وفى بلدنا
وانشاء الله السلام فى بلدنا انشاء الله السلام فى بلدنا
وليد ال قسم السيد
لندن 24 يناير 95
|
Post: #2
Title: هو أشول ده منو؟
Author: منوت
Date: 05-02-2002, 04:55 PM
Parent: #1
اكب سلامات وتشكرات كتير لأخوك بتاعنا وليد . ومنوت بيسأل إنتكم ، أشول دي منو ؟ ومن وين اسم دي بيجي ؟ لأنو انحنا في جنوب عندنا اسم بتاع أشول ده كتير ..
ممكن ده بيكون موضوع لنقاش ؟ لو سمحتم ...
______________________
ومنقو قل لا عاش من يفصلنا
|
Post: #3
Title: Re: هو أشول ده منو؟
Author: waleed500
Date: 05-02-2002, 05:04 PM
Parent: #2
|
Post: #4
Title: Re: هو أشول ده منو؟
Author: waleed500
Date: 05-02-2002, 05:07 PM
Parent: #2
الاخ منوت
اكب كميه بتاعة سلام لزول راقى وطاعم كتير
وطبعا يا اخ منوت نحن مسقط راسنا من الجزيره من واحده من القرى البتقع على ضفاف النيل
والشول المقصود عندى هنا هو رجع الصدى عندما كنا صغار كنا بنقف على ضفاف النيل وبنصيح الشوال الشول اضبح ليك بقره ولاتور وكان الصدى بيجنا راجع وبيقول تور تور تور وكنا بنظن انو البرد علينا ده هو وحش فى النيل اطلقو عليه جدودنا اسم الشول ده الشول بتاعنا ويا ريت اقدر اعرف الشول بتاع جنوب هو شنو
لك التحيه اخى منو ت وانا فى الانتظار
وطبعا ياخى منوت رجعت بعد فتره طويله لقريتى تلك وحاولت اعيد الماضى مع الشوال و ناديت على الشول لكن الغريبه رفض ما يرد على الصدى رفض يتردد مره اخره والقصه دى اتعبتنى كتير وحاولتا عدة مرات بس النيلين كان قد غير مجراهو بعض الشى والصدى صار ما بيترد وحزنت كتير على الشول
|
Post: #5
Title: Re: هو أشول ده منو؟
Author: wa7shny
Date: 05-02-2002, 05:33 PM
Parent: #4
عزيزي الغالي جدا وليد لك التحية والاحترام وتصوير رائع لايام خلت ولك التحية اخي على شرحك لما جاء فى ماكتبت للاخ العزيز منوت ولك التحية احي منووت ولد جنوبنا ولك التحية اخي الحبيب على ماقدمت تحيااااااات.........واحشني
|
Post: #6
Title: Re: هو أشول ده منو؟
Author: waleed500
Date: 05-02-2002, 05:43 PM
Parent: #5
بشكرك اخى واحشنى الواحشنى دائما
وياريت لو تحكى لينا من زكريات طفولتك
|
Post: #7
Title: Re: هو أشول ده منو؟
Author: EMU إيمو
Date: 05-02-2002, 06:07 PM
Parent: #6
الحبيب وليد
سلام واشتياق
تلك ايام مضت لن تنسى ذكراها
لك التحية على التصوير الرائع
|
Post: #8
Title: Re: الشــــــــــــــــــول
Author: بنت الاحفاد 2001
Date: 05-02-2002, 08:19 PM
Parent: #1
هلا يا وليد
كلام حلو بيخليك تعيش معاهو بكل جوارحك
بس الماضي ما بيعود ابدا
لانو زي ما انت شايل منو زكريات حلوة في ناس بيكونو شايلين منو زكريات سيئة
والله يدي العافية
|
Post: #9
Title: Re: الشــــــــــــــــــول
Author: wa7shny
Date: 05-02-2002, 08:30 PM
Parent: #8
العزيز وليد لك التحية
مع الاسف عزيزي طفولتي كانت سجينة بين جدران الغرفه الاربعة طفولها وواسفاه على طفولتي التي قضيتها جميعا فى بلاد المهجر
طفولتي التي خلت من شول وبقرة وتور وواسفاه على تلك احلى الايام التي خلت حياتي منها و يتفطر القلب وينزف دما حينما اجالس من هم بعمري ويحكون عن طفولتهم وكيف كانت وتجدني ساعتها اتنفس الصعداء لانوا لاتوجد فى ذاكرتي طفولتي فعزوني جميعكم
ولك التحية عزيزي وليد
|
Post: #10
Title: Re: الشــــــــــــــــــول
Author: waleed500
Date: 05-03-2002, 06:30 PM
Parent: #9
الاخ ايمو
تحياتى ومشكور يا غالى
الاخت بنت الاحفاد
لكى التحايا
الاخ واحشنى
قد يكون حلوا لكن الحاضر احلا
|
Post: #11
Title: Re: الشــــــــــــــــــول
Author: wadazza
Date: 05-03-2002, 06:42 PM
Parent: #10
وليد ..البساطة والريف ..نعمة خليك بالله من ساكن القصر وساكن المنشية 
والصور الكتبتها جميلة ..وتحكى عن حلم جميل فى أيام أجمل
تحياتى
ود عزة
|
Post: #12
Title: Re: الشــــــــــــــــــول
Author: waleed500
Date: 05-03-2002, 06:47 PM
Parent: #11
لك حبى ود عزه
وجمعه مباركه ويا ليت نعرف حاجه عن طفولتك
على ما يبدو لى انها كانت طفوله حلوه وشكلك كنت مشاغب شديد
ولا ما كده؟؟؟
|
Post: #13
Title: Re: الشــــــــــــــــــول
Author: wadazza
Date: 05-03-2002, 06:56 PM
Parent: #12
وليد أنا لسه طفل
بمعنى المحافظة على معطيات تلك الطفولةومقوماتها ومناحى التربية والصبر فيها على الكفاف وقد تحدثت عن ذلك كثيرا فى البورد
تحياتى
ودعزة
|
Post: #14
Title: تشكرات و سلامات يا جماعه
Author: منوت
Date: 05-03-2002, 07:39 PM
Parent: #1
إنتكم بيسأل عن دلاله بتاع اسم (أشول) في جنوب يا وليد .. زي ما إنتكم بيقول في زمن بتاع (براءه) وبنادي (أشول) .. نحنا كمان في جنوب في زمن براءه بتاعنا (المستمر) ما بينادي نيل بس ، لكن بيسمي ناسات حي بروح بتاعو كل يوم وكل ساعه .. يا اشول تعال .. يا صدى بتاع جمال تعال.. يا كل غزلاان وجدادات بتاع وادي تعال .. يا (ود عازه) تعال .. يا (يار) تعال ، ويار دي هو (تور بتاع دينكا أبيض .. ويا زمن بتاع حب تعال ... ويا ناسات هلوين تعال ...
و (مهما هم تأخروا فإنهم يأتون .. من درب وددكونه أو من جبل الرجاف .. فإنهم يأتون ... يأتون في كلامنا .. في أعين الغالين من أمواتنا .. فإنهم يأتون ...
ولكن ... وين بيمشي )حراز ) لما مطر ينول (سيل) ؟
_______________
و منقو قل لا عاش من يفصلنا
|
Post: #15
Title: Re: تشكرات و سلامات يا جماعه
Author: gazalalmasalma
Date: 05-03-2002, 07:47 PM
Parent: #14
شكرا وليد على البوست الجميل وشايف أكوى منوت قابض جو بتاع زمن جميل..
يكب ليمونات وسلامات زى بحر زراف ورجاف..
تحياتى وودى
غزال
|
Post: #17
Title: Re: تشكرات و سلامات يا جماعه
Author: waleed500
Date: 05-03-2002, 08:00 PM
Parent: #15
اختى الغزاله كيف حالك
اخونا منوت كتب ومنتظرين نعرف حاجه عن طفولتك انتى
|
Post: #16
Title: Re: تشكرات و سلامات يا جماعه
Author: waleed500
Date: 05-03-2002, 07:55 PM
Parent: #14
لك الشكراخى منوت على التوضيح
وطبعا الشول عند حبوبتنا شى اخر
عندنا الحبوبات بيسمن السجاره البرنجيه بنت الشول
يعنى كان عادى الحبوبه ترسلك الدكان وتقول ليك جيب لى بنت الشول
|
Post: #18
Title: Re: تشكرات و سلامات يا جماعه
Author: rummana
Date: 05-03-2002, 08:23 PM
Parent: #16
وليد500
مساء الخيرات
كلامك حلو يا وليد وذكرياتك أحلى
ويا بختك قضيت ايام من طفولتك في القرى والمدن الصغيرة
لان بساطة الحياة فيها بتتناسب مع بساطة الطفولة نفسها عشان كدة بنتذكرها اكثر والفرح اللي بتجيبه معاها ذكراها اكبر
يلا حجينا كمان زيادة
|
Post: #19
Title: Re: تشكرات و سلامات يا جماعه
Author: waleed500
Date: 05-03-2002, 08:45 PM
Parent: #18
تحياتى ايتها الرمانه العجيبه
بى الفعل حياة القرى حلوه كتير
وايام الطفوله فيها احلا اتخيلى نفسك تصحى من النوم
على اصوات العصافير والاغنام والديوك وصدقينى يارمانه
بعمل مقارنه طوالى بين حياة المدن والريف بجد الاخيره اجمل واحلى
على ما يبدو لى حياتك كلها قضيتها فى المدن يارمانه
|
Post: #20
Title: Re: تشكرات و سلامات يا جماعه
Author: rummana
Date: 05-03-2002, 09:33 PM
وليد
أنا فعلا قضيت طفولتي في مدينة
لكن كأمدرمانية جزء من عشقي لأمدرمان انها بتجمع بين الاتنين
روح القرية وروح المدينة
وبتذكر فيها من طفولتي أيام الاجازات ولمة الأهل في البيت الكبير يوميا
والاصوات المحببة
والمع قزاز واصلح سراير وسيد السمك وبتاع الخضار
واهم منهم بتاع حلاوة قطن وحلاوة ديك وحلاوة قصب
|
Post: #21
Title: و كيف حياه بتاع غابه
Author: منوت
Date: 05-03-2002, 10:08 PM
Parent: #1
إذا كان خياه بتاع ( فريه9 أحسن مكن حياه بتاع (مدينه) كيف يكون حياه بتاع (غابه) ؟
|
Post: #22
Title: Re: و كيف حياه بتاع غابه
Author: waleed500
Date: 05-03-2002, 11:27 PM
Parent: #21
والمع قزاز واصلح سراير وسيد السمك وبتاع الخضار
واهم منهم بتاع حلاوة قطن وحلاوة ديك وحلاوة قصب
الغاليه رمانه
ياه يا رمانه انتى قديمه بشكل ايام والله
الاخ منوت
حياة الغابه برضو حلوه وبى المناسبه زرتا مدينة جوبا قبل فتره ما بعيده
حاجه صراحه ما بتتوصف جمال وطبيعه غير عاديه ونتمنا انو السلام يعم مناطق
الجنوب لو حصل الناس بيتركو السياحه فى لبنان ومصر وكينيا وبتوجهو لجنوبنا الحبيب
|
Post: #23
Title: Re: الشــــــــــــــــــول
Author: OmDur
Date: 05-04-2002, 01:49 AM
Parent: #1
كلامك حلو 000 كلام غبش صحى صحى
لكن ياوليد دة موضوع فيه سودنة شديدة يعنى فى جماعة كتيييير سطحوا
وبينى وبينك انا كمان سطحت بى حبتين
نحن ناس عشنا فى المدن لكن اى كلمة سمعناها من كبارنا مافوتناها
وطفولتنا كانت بين شليل والاجهزة اليابانية وكمبلت بالحصا واكواز الصلصة
يعنى بتاعين كلو
وللاسف ياوليد ماضاع الشول براه ، ضاعت معاه حاجات كتيرة
وياريت يسمعك السألناهم بتعرفوا عثمان دقنة؟ ردوا علينا دة صاحب ابوكم !! ولا يسمعك زميل دراسة ، ويومها الشباب كانوا عاملينه ونسة واى شئ قال مابيعرفه ، فى الاخر سألوه ( السفارة السودانية ) فى الخرطوم جنب شنو
قال ليهم صدقونى ياجماعة انا فى السودان مابعرف اى مكان
ولا زى ماجاء فى النكتة ، البت السألوها من العتوت ولما جننوها بالسؤال
جاء ردها بكل براءة : انا مابعرفه هو قال بيعرفنى؟
يااااااحليل النساهم البلاى استيشن ومنتجات سونىو00000 ، وماعايزة اقول الضيعهم
|
Post: #24
Title: Re: الشــــــــــــــــــول
Author: waleed500
Date: 05-04-2002, 04:47 PM
Parent: #23
ولا زى ماجاء فى النكتة ، البت السألوها من العتوت ولما جننوها بالسؤال
جاء ردها بكل براءة : انا مابعرفه هو قال بيعرفنى؟
يااااااحليل النساهم البلاى استيشن ومنتجات سونىو00000 ، وماعايزة اقول الضيعهم
تحياتى امدر
اى والله زمن وزمن عجيب كمان
|
|