طيور الهجرة ..مدني النخلي

طيور الهجرة

مدني النخلي

لمصطفي سيد احمد

منو الورَّاك ملامح الناس

وكت تبقي البلد منفى

وكت برد الصعيد ينزل

واكوس لي نارك ادفي

وكت تنزل دموعي عليك

تبل ريق ريقك الجفَّه

طيور الهجرة ماغنت

ولا لوّن مداك شادي

حليل ولداً عرف نمك

وشرا غناهو في الوادي

نده مطراً سحايبو ملت

وشتت برقو عبادي

وليد الصابره ست الجيل

رقد واقف قصاد النيل

مرق من بين ضفاير البت

حبيبتو اللونا كاكاوي

نهارا شمالي كتاحة

مناخا جنوبي غرباوي

دخل شرق الحلم حفيان

سند ضهراً حناهو الهم

حليلو الكان جميل النم

حليلو البينا خوة دم


النص منقول من منتدى سودانيل

تسلم يا بنبن يا راجل زي الورد ولله

سوف نبقي مثل نجم السعد نحيا بالدواخل ريثما تصفو السماء
وعائدون باسم من نهوي هلالا في سماء
يا كيف تعلم يا امام الجهل انا جالسين علي قلوب الناس محبتنا
ليس ككل القرارات العقيمه والصهيل في العراء
فاحشد حصونك او حصينك والشياه العاهرات
كيما يلدن لك الفجور الجبهوبه
او فل نقل فجر الغباء

يا حبيبنا
ما انت الورد كلو والشمس الوشاحا ورود

ارتبطت عندي هذه القصيدة بالعزيز ( صلاح القنالي ( كجولا ) كان دائمًا ما يحشد بها لاركان الاتحاديين بالجامعة كنت اترك كل ما علي من واجبات واستمع لكل الاركان الذي يتحدث فيها

سوف نبقى مثل نجم السعد نحيا بالدواخل ريثما تصفو السماء
وعائدون بإذن من نهوى هلالا في سماء

الغالي بنوبن
لك التحيه
واسمح لي عزيزي ان احي الاخ العزيز والمناضل صلاح كجول
ذلك الشاب الاسمر طويل القامه الذي عشق السودان الوطن
وصار الوطن همه ومحبوته السمهريه التني يتغني بها
ويسهر في زكرها
وهو يقول : يا وطني يا فرده جناحي التانيه وقت الناس تطير لعالمها

والتحيه لكل المناضلين السودانين في كل انحاء العالم

سلام بن بن سلام
والتحايا لحبيب الكل
والله يا جماعة الحاجات دي بتعمل فينا عمايل
وكلما الواحد يلقى اسم مدني النخلي او مصطفى سيد أحمد
بتعتريهو نزوة ما عادية وبترجعنا لأيام الاهلية
ومنتديات الاستاذ/ مصطفى سيد أحمد هناك
عشان كدة يا جماعة ما تبخلوا علينا بالله بالحاجات دي
وبرضو نحن ما بنبخل أبدا
لكم عظيم شكري وامتناني
نيابة عن محبي الرائعين
مدني ومصطفى
ولكم مني هذه الكلمات لمدني يوسف النخلي
وألحان وغناء مصطفى سيد أحمد

حكايتي مع الأنين
مدني يوسف النخلي

بهاجر ليك وراجع ليك
وما قايل بجينى زمن
حكايتى مع الحنين بطول
بهاجر ليك عشان القاك
مع طلوع الصباح وارتاح
وفى صفو السنين الياما
شلنا من اساها جراح
وذى سواح بفتش ليك
مهما تشيل شراعى رياح
وما قايل بجينى زمن
حكايتى مع الحنين بطول
ولما اجيك دموع الفرحه فى عينيك
تبلل طرفك المشتاق
تنسينى الوداع واحزانو
فى الزمن الصبح فراق
أصلو الما عرف عينيك
ما بعرف الحنين حداق
وما قايل بجينى زمن
حكايتى مع الحنين بطول
منو البقدر على الغربه
يهاجر من حنان عينك
وغيرنا منو البعيشو الهم
وخوفهم برضو كلو عليك
وحاتك هانت الأيام
تسلم للفرح عينيك