Post: #1
Title: السمر الطفولي راجا المشنقة
Author: yasiko
Date: 03-02-2002, 09:32 AM
Parent: #0
يا كافي البلا
يا حايْدَ المِحَنْ
شيشَك . . يا زمن
شيشَك .. يا زمن
**
من كَمِّين سنة
السنة .. فوق سنة
مافيهِن نهار
ما شات .. ليل .. صُرُف
سادَّات في الحَلِق
عشراقات غُصصْ
فالحات في السُّكات .. جِرّيح الغنا .. وقِطّيع العشم
رمَّاضات هجير
منداحرات غُلُب
حلاَّبات سراب
فوق رملاتْ وَهَمْ
زانَّات فوقنا زَنْ
لو ما أخشى ظَنْ
زي مليون سنة
ديل مليون سنة ..آهـ ..يا اْم الحَسَنْ
**
آهـ .. يا اْم الحَسَنْ
البيناتنا دا
زي ما كان أبوي "ودَّ احمد" ..زمان
وامِّي "النِّعمِي"..كان
كُلْ ما جا التَّساب
شالوا من "البحر" أرزاق السنة
وقسَّمُوا كمْ قِموحْ
للجار والبعيد
خَتُّوا على السنة .. فوقا عيدينا ..عيد
وما خلُّوا البحر
آهـ .. يا اْم الحَسَنْ
شال الكان وكان.
**
آهـ .. يا اْم الحَسَنْ
البيناتنا دا
لا محدود مكان
لا محدود زمان
كان شِي كتير خلاص
أرحب من فضا
زي ساعت فراشة .. حامت حول زهرة
أخجلت إحمرارا
قبال ما ترك
زي ساعت يموت .. شافع بالضحك
مليان إنبهار
مسكون بالرضا
البيناتنا دا
زي رجع الصدى
لا انتهى .. لا ابتدا
لا وقع ارتطامو بي حايط المدى
فتت عنفوانو
أو صابو الصدا
البيناتنا دا
رعشة سنبله
طافت فوقا نسمة .. عن شق الصباح .. بلتا بالندى
**
آهـ .. يا ام الحسن
قالوا جناك غرق في بحر "الجريف"
شوف .. معكوسه كيف !!!
زي وش الزمن
السمحين .. مضوا
والزمن السمح
خلولنا الأسف .. والزمن الملح
**
حيرني السؤال
في الزمن الملح
ليه الليل يطول..
لا من يبقى حول
ويسكن في البيوت ؟
وليه ما الشمس تقلب قادوس الإفول
لو فد مره تشرق
وأصلا ما تفوت ؟؟؟
وليه الناس تكوس
في الزمن الملح .. ما تلقى الحكيم ساعت تنجرح؟؟
تشرب في السراب
تاكل في التراب
وتشحد بالفريق في حق الكفن ؟؟
ليه؟وعشان شنو؟
وشان خاطر منو؟
مظلوم الحسين ..
ومظلوم الحسن؟؟
ليه حلو الحديث .. موصوم زندقة؟؟
والسمر الطفولي .. راجا المشنقة؟؟
شيشك.. يا زمن
يا زمن الملح
ما هديتو .. هد ..كتف ام الحسن !!
&&&&
من اشعار الاستاذ السر عثمان الطيب بعنوان الزمن الملح
|
Post: #2
Title: Re: السمر الطفولي راجا المشنقة
Author: رومانسي
Date: 05-19-2002, 06:30 PM
Parent: #1
yasiko
اين انت صديقي
ماذلت ام الحسن تنتظر
وماذال الزمن ملح
سالت بالذي فطرك
ان كنت تري
انت تعود
|
|