|
Re: 22 يوما في الخرطوم ........مذكرات (Re: zola123)
|
زوله واحد إتنين تلاته ،
أتابع بشغف ما يخطه قلمك الوصّاف ، لك الشكر أكمله على هذه المعلومات الموثقة بالصور ..
و دعيني آنستي أسألك سؤالاً محورياً :
ماذا كنتِ تتصورين الوطن بعد هذه الغيبة الطويله ؟
أرجو الإجابة على حسب المشاهد و الأماكن التي زرتيها ( واقعياً ) ..
* كمثال : كيف كان تصورك ل ( بحري ) ، و كيف وجدتيها ؟
واصلي هذا الاجتراح الجميل ..
| |
|
|
|
|
|
|
Re: 22 يوما في الخرطوم ........مذكرات (Re: عبد المنعم سيد احمد)
|
زولا123 قرينا لمن قلتي بس ، وهاأنا أفي بوعدي لك وأعود للكتابة اليك. المهم في خلال زيارتي الاخيرة للسودان لاحظت ظاهرة المس كول عبر الموبايل ، فكثيراً ما يردني مس كول يكاد يصل مئة في اليوم ، كنت أعتقد بانهم يفعلون ذلك لانني مغترب ومافارقا معاي قروش المكالمات فطوالي أتصل بالزول أو الزولة في براءة واضحة. حتى بعد المرات أرقام مابعرفها أقول ياخي يمكن واحد من أصحابي ديل ما عندو موبايل ، لكن أخواني واصدقائي بعد شوية أنتبهوا لذلك وقالوا لي ياخي ما تكترس لموضوع المس كول وترد على أي زول دي ثقافة شائعة هنا وهو مجرد سلام بس تحت التصنيف الأتي : مس كول مرة واحدة يعني صباح الخير كيف حالك مشتاقين ياخ ومذكرنك. مس كول مرتين متتاليتين يعني ياخي مشتاقين لو في رصيد أتصل علينا. مس كول ثلاثة مرات متتابعة يعني أن الأمر مهم جداص ولابد من إتصالك حتى لو ما عندك رصيد. سالتهم طيب مس كول أربعة مرات متتابعة ( ردوا وقالوا دي ألا الجليل الرحيم ) قلت ليهم : شوفوا أن ما فائق أعد مس كولاتكم دي ، العندو رصيد وعاوزني يتصل بي ولو ماعندو بكيفو ( ومنذ ذلك الوقت أنفصلت المس كولات عن موبايلي وقلت بصورة ملحوظة لانني كنت أعني ما أقول( كدى ورينا أنت عملو معاك شنو ؟ ) لك الشكر على السرد الجميل والذكريات الحلوة والصور.
| |
|
|
|
|
|
|
Re: 22 يوما في الخرطوم ........مذكرات (Re: Sidig Rahama Elnour)
|
صديق النور شكرا على العودة الحميدة والمشاركة الجميلة. لا اوافقك في استنكار المس كولات بالمناسبة انا عن نفسي لم يكن لدي مانع في اعادة الاتصال بجميع الارقام في موبايلي حتى واذا وصل الرقم الى 20 ما لاحظته كان استخدام المسجات بكثرة والتي نكسل غالبا في استخدامها هنا لاكن كله مقبول, احنا لاقين الناس الحلوة دي وين, خليهم براحتهم
| |
|
|
|
|
|
|
Re: 22 يوما في الخرطوم ........مذكرات (Re: zola123)
|
دكتورتنا الأمورة
دائما كنت أقول أن الخرطوم ليست مدينة واحدة هي مدن كثيرة آلآف المدن
لأن الناس ذائقتهم مختلفة
رأيت عندك خرطوم جميلة جمال
شكرا للسرد الجميل وللعيون الجميلة التي رأت الخرطوم الجميلة وكتبتها بهذا القلم الجميل
محمد علي الفاضلابي
| |
|
|
|
|
|
|
Re: 22 يوما في الخرطوم ........مذكرات (Re: mohammed alfadla)
|
الزولة
العائدة من السودان ...انتي عارفة لو كتبتي مذكراتك عن السودان وانتي هناك لطلبت منك ان
1/ تجيبي كمية من الدوم وتنزلي فيهن كد.
2/ يكون في جيبك دائما كميات من فول الحاجات والتسالي والقونقليز .
3/ تمشي الموردة وتضربي كمية من السمك وتشربي من موية الزير الفي المطعم .
4/ تفطري بفول في نادي الاطباء.
5/ تتغدي في مطعم البوادي في نمرة اتنين .
6/ تحومي برجليك ولما ترجعي البيت وتعايني لكرعيك تنكري وتحلفي تقولي ديل ما حقاتي .
7/وتمشي لاهلي في بحري وتسلمي عليهم وتقولي ليهم قرجة بسلّّّّم عليكم .
| |
|
|
|
|
|
|
Re: 22 يوما في الخرطوم ........مذكرات (Re: garjah)
|
قرجة ( أبو نورة)
1- الدوم, ما قابلني, ولا باحبه, وبالمناسبة دي تعرف الدوم شنو؟ فاكهة؟ عشان ما لاقية ليه فايدة 2- الفول والتسالي, جبت معاي لاكن مافي جيبي 3- الموردة مربت بيها, والله ما قسم لي أكل فيها سمك, وكنت ناوية على الأقل اصور كم سمكة اشحتفكم بيها ......موية الزير بتباااالغ !! قلت ليك باحوم بقزازة مياه معدنية تقول لي زير؟؟؟ 4- نادي الأطباء مشيته, بس ما أكلت فيه 5- مطعم البوادي ما سمعته بيه, والله ستر ونمرة اتنين دي عرفتها 6- الله يعلم, مش كرعيني ما بقيت اعرفها من الحوامة, حتى وشي باتجنب اعاين في المراية عشان ما تجيني نفسيات من لوني الجديد. 7- عن زيارة الاهل لو عارفة مكانهم كنت عملتها. ما يصير فالك الا طيب, الاجازة الجاية.
| |
|
|
|
|
|
|
Re: 22 يوما في الخرطوم ........مذكرات (Re: zola123)
|
عرس ....كانت مصادفة حضوري لبعض الأعراس العائلية مناسبة سعيدة وفرصة لمقابلة كثير ممن أعرف في مكان واحد. كنت أرى الأمر مسليا جدا حضور كل هذه المراسيم التي تسبق العرس والتي تليه.والكم الهائل من الونسات والمواضيع التي تدور بين الحضور خلالها. لاكن سرعان ما ادركت ان وقت الاجازة يمضي سريعا, فبدأت في الاعتذار عن حضور الكثير. ....في احدهم, كنت اتنقل هنا وهناك , اسلم على هذا ويتم تقديمي لذاك. كنت احرص على تصوير معظم الحضور ممن أعرف ولا أعرف.....جلست لأخذ استراحة , فاذا باحدى السيدات تطلب منى هاتفي النقال لاعطائه لطفلها ذو السنتين لأنه أعجبه, قدمته لها مع حرصي على قفله حتى لا يعبث به الصغير...بعد قليل, اذا بها تعيده طالبة فتحه, لان الطفل فطن و( عايزه منور) ..أغتظت , ومع ذالك فتحته واعطيته لهم مجددا. بعدها بقليل, حضرت احدى السيدات مودعة وتوقفت عندي وقالت: عليكي الله ولدي روحه دايرة تمرق على كاميرا الفيديو حقتك, عليك الله ديها ليه يصور بيها شوية!!! كان الطفل اكبر من الأول بقليل, أعطيته الكاميرا ...وسارعت بعدها بالتهوض خوفا من طلب محرج آخر.
في مساء اليوم التالي لم انتبه واخذت راحتي خالص في اللبس وانا اعتقد ان الساعة 9 مثلا وقت مبكر جدا للذهاب الى عرس. وتوقعت ان العروس ما حتصل الا الساعة 11 وصلنا في العاشرة وبعد قليل من السلام , اذا بالعروس تدخل في موكب مهيب, حقيقة اعتقد ان العروس مستعجلة, فالوقت ما زال مبكرا جدا في نظري. الزفة بالمناسبة كانت على انغام أغنية خليجية, ثم أغنية مصرية ولم يدم استغرابي طويلا حتى حضر الفنان, الحمد لله كان سوداني.غنى يمكن 3 او 4 اربع اغنيات حسيت الناس كلها مستعجلة , وبالفعل لم أكمل ساعة من الزمان حتى انفض السامر, و بعد قليل من التوضيح عرفت ان الحفلات لا تستمر الى ما بعد الساعة 11 مساء. وبالرغم من قصر الوقت تمتعت بوقتي جيدا.
مدخل القصر الجمهوري
نصب تذكاري أمام القصر
الدوائر الحكومية. كان المرور على دائرة ما للحصول على ختم او توقيع أمرا مرهقا. قد نقف في صفوف طويلة, ثم يخبرك الرجل في الشباك ان عليك احضار شيء ناقص, اتناول زجاجة المياه التي لا تفارق حقيبتي, واستعين بالله على مشوار آخر مرهق.حقيقة الكثير من الوقت كان يضيع في السودان في المصالح الحكومية. قد لا أمانع هذا النوع من الطوابير, لاكن ما رأيكم بطابور من 15 شخص على الاقل امام الخزينة مثلا, وبعد ان يمن عليك الله بالصبر الجميل وتصل الى شباك التحصيل, يقول لك الموظف ان موعد الاغلاق قد حان وعليك الحضور غدا. ( مش كان يكلم الناس الفي الصف ؟؟) في وزارة الخارجية كان علي ختم شهادة, قدمتها بعفوية, فاذا بالموظف يطلب توثيق الصورة. مددت يدي من الشباك بالاصل مجددا, ليكرر: الصورة يا أخت !!! هنا احسست بخطأ ما , ولم يحتمل ما بدوت عليه من غباء( في نظره) فصاح: (انتوا) كل أموركم ملخبطة كدة؟؟ طبعا صيغة الجمع بها كثير من المعاني واظنه عنى بها يا اما الحناكيش, يا اما المغتربين. كدي وروني ياتا عشان ما أظلمه مددت الصورة فوثقها وانا في استغرابي, فهذه اول مرة اوثق فيها صورا وليس اصولا للشهادات. جهاز شؤون المغتربين مشوار آخر مزعج. بعد الانتهاء من الروتين المعهود, ذهبت مع الوالد لتفقد قسم الاراضي . كان هناك مجموعة من المغتربين يمرون باعلانات معلقة لاراضي للبيع . ويتحدثون عن سعر تلك الكبير ثم يواصلون السير. اسند والدي ورقة بيد وبدأ ينقل بها تفاصيل الاعلان لافاجأ بعدها بزحام كبير وعدد من الاشخاص يبحثون عن اقلام ليفعلوا المثل . لم أقاوم فضولي فكنت اقاطع استرساله لأسأل قلت له: بابا أبو سعد دي وين ؟( قلتها بفتح السين والعين) قال: أبو سعد ( قالها بكسرهما ) دي تقدري تقولي عليها آخر الدنيا ! قلت: والمساكين ديل قضوا نص عمرهم اغتراب عشان يجوا يشتروا في ابو سعد البتقول عليها دي؟ (ما زلت مصرة على نطقها بالفتحة)
(عدل بواسطة zola123 on 10-10-2004, 07:38 AM)
| |
|
|
|
|
|
|
Re: 22 يوما في الخرطوم ........مذكرات (Re: zola123)
|
العزيزة زولا .. سلامات .. وشكرا على السرد الجميل و الصور المعبرة...
معليش عارفة سلامى is long overdue لكن متابعاك بالكلمة و الصورة و الله .... هنا و فى سودانيات..
سردك و الصور يثيران مشاعر متناقضة عن البلد و أهله .... أشعر بغربة فظيعة هذه الايام ... وأحن حتى لل"حفر" هناك .. ولكن.... لا أدرى العيش فى السودان يتطلب "مقدرات" خاصة .. و أخاف ان أكون قد فقدتها بمرور السنين فى بلادا طيرة عجمى....فأصبحت كالمنبت: لا أرضا قطع .. و لا ظهرا أبقى....
لك كل الحب و الود .
.
| |
|
|
|
|
|
|
Re: 22 يوما في الخرطوم ........مذكرات (Re: Outcast)
|
Quote: فأصبحت كالمنبت: لا أرضا قطع .. و لا ظهرا أبقى |
اوت كاست حاشاكي والله
تعرفي في كثيرين قالوا لي اني لو عشت في السودان فترة اطول حالقاه مختلف وان سعادتي دي حتتبدل بعد فترة, لاني بس جيت في اجازة والناس بتستقبلك بترحاب وشوق كبير ما حاقدر احكم لاكني اشك في هذه النظرية ايه رأيك في اجازة قصيرة تبل الشوق وبعدين احكمي بنفسك انا رأيي انه يتعاش فيه ونص وعشرة وما بالسوء اللي كتير منا شايفينه بيه شكري الجزيل على المتابعة ولك من الود زيه وزيادة كمان
| |
|
|
|
|
|
|
Re: 22 يوما في الخرطوم ........مذكرات (Re: zola123)
|
الحبيبة زولا واحد اتنين تلاتة العسل..
ســـــلام وود قدر حكاويك الجميلة عن البلد..
تعرفي بوستك ده إلا محوًطاهو.. من أول يوم وانا ادخل اقرأ واقول لازم أعلًق.. ما اقدر.. أها الليلة كسرنا "الحوًيطة".. وشجعتني أوت كاست..
طبعا أجمل منظر وأحلى مكان احب امشيهو.. مدخل القصر الجمهوري.. وتعجبني التحية القاعدين يحيوني بيها الحرس.. واختك طبعا عجبتها الحكاية خالص .. وكل ما أجي مارة لازم انزل أعاكس عشان الاقي تحية بالسلاح ..
أها خالي جا يوم الجمعة الصباح وقال لي تعالي عامل ليك مفاجأة.. ما كضبتا.. بسرعة لبست ومشيت معاهو وفرحت شديد لأن الطريق كان عبر القصر.. قلت أسلًم .. اها وقف العربية وقال لي انزلي.. قلت نزول كل مرة.. لقيت ليك اليوم داك اتاريهو ساعة تغيير الحرس.. وبتجري فيهو مراسم غاية في الجمال.. ولاقيت مليون تحية بالسلاح.. وكلًو بالصور..
أوعك تسألني من الصور.. حاقول ليك أمشي بوست "دقنة" ..
حبي..
| |
|
|
|
|
|
|
Re: 22 يوما في الخرطوم ........مذكرات (Re: ابو يسرا)
|
ابو يسرا كل سنة وانت طيب
والله عشان الناس الحلوة الزيكم عندي استعداد احكي للصباح بس ديل 22 يوم فقط
عندي صورة رائعة ليسرا وناجي الزبير, خايفة انزلها يزعل مني اخدوا لي منه الاذن وعندي كميييييييية من صور لقاء البورداب التي لم تنشر الله يسامحه, ما خلا زول بياكل الا وصوره, حتى نفسه
| |
|
|
|
|
|
|
Re: 22 يوما في الخرطوم ........مذكرات (Re: zola123)
|
والله يا جماعة انا البوست ده كنت ناوية( أعرشه) على كدة لاكن كل يوم باتفاجأ بكمية المتابعة والتشجيع الجميل واكيد مبعثه الشوق والحنين للوطن وقد اردت لهذه الصور ان تطفيء ولو قدرا بسيطا منه ولكل هذا الحكي ان يشجع من يزال متخوفا من زيارة الوطن بعد سنوات طوال وقد امتدت فترة الغياب لدى البعض حتى تصل الى 20 سنة !!!!
لمن ينتظر المزيد من الحكي , اتمنى منه الصبر قليلا وليسمح لي بان اغير طريقة السرد حتى لا تصابوا بالملل يعني نوع من الفلاشات عن مواقف واحداث وسانزل ما تبقى لدي من صور حتى وان لم ترتبط لدي بموضوع معين ولمن تزهجوا مني, قولوا لي كفاية وما حازعل
| |
|
|
|
|
|
|
Re: 22 يوما في الخرطوم ........مذكرات (Re: abdalla BABIKER)
|
الابنه زولا شكرا على البوست الرائع , امتعنى وابكانى , وبكى القلب قبل العين . خاصه صور بيت المال لها طعم خاص وكما ذكرت قديماً فان اغلب امدرمان خرج من عباءة بيت المال . ونصف ساكنى الامتداد فى الخرطوم كانوا موظفين بدأوا حياتهم فى بيت المال وبعد الرحول الى الامتداد ( العمارات ) كانت السيارات تنطلق لقضاء الامسيات فى بيت المال . كثير من الاماكن التى اظهرتيها فى الصور لم اتعرف عليها الا بملاحظاتك المكتوبه . يبدو اننا سنحتاج الى دليل عندما نرجع لامدرمان . ارجو ان تدعوا لنا بالرجوع ولو لزياره خاطفه . وربنا يديك العافيه وراحه البال لهذا الجهد اللطيف . لكى التحيه . شوقى ...
| |
|
|
|
|
|
|
Re: 22 يوما في الخرطوم ........مذكرات (Re: shawgi badri)
|
عم شوقي بحاله عندنا ؟وانا باقول البوست ماله نور ما عاش من بكاك والله كل قصدي نسعدك, ويا ريت توفرت لي فرصة للتجوال والتقاط صور اكثر في امدرمان الله يسعدك يزيارة قريبة جدا للسودان عشان مافي حاجة في الدنيا دي تستاهل وعقبال د. متوكل كمان شكرا على الطلة الرائعة
| |
|
|
|
|
|
|
Re: 22 يوما في الخرطوم ........مذكرات (Re: zola123)
|
Quote: فاذا باحدى السيدات تطلب منى هاتفي النقال لاعطائه لطفلها ذو السنتين لأنه أعجبه, قدمته لها مع حرصي على قفله حتى لا يعبث به الصغير...بعد قليل, اذا بها تعيده طالبة فتحه, لان الطفل فطن و( عايزه منور) ..أغتظت , ومع ذالك فتحته واعطيته لهم مجددا. بعدها بقليل, حضرت احدى السيدات مودعة وتوقفت عندي وقالت: عليكي الله ولدي روحه دايرة تمرق على كاميرا الفيديو حقتك, عليك الله ديها ليه يصور بيها شوية!!! كان الطفل اكبر من الأول بقليل, أعطيته الكاميرا ...وسارعت بعدها بالتهوض خوفا من طلب محرج آخر.
|
ههههههههههههههههههههههههههههههههههههههههههههههههه....
الله لا حضرّك عرس من أعراس ناس كدا بعرفهم... تجهزي مفتاح عربيتك لو عندك جنس الاعذار بتاعة تعبان... وتجهزي روحك للمشاوير البتبدا بى ( والله مشوار صغير يا ولدي) وتلقي روحك فى ضنب النملة*
____________________________________________________ ضنب النملة دى الحلة الساكن فيها ناجي الزبير الملك
| |
|
|
|
|
|
|
Re: 22 يوما في الخرطوم ........مذكرات (Re: AnwarKing)
|
أنور كنج
عليك الله محلة ناس ناجي اسمها ضنب النملة؟ والحكمة من ده شنو؟ طبعا ما حاقول اسمها عشان ناجي بيضحك على طريقة نطقي بيقول باشكلها بالفصحى
الحمد لله ما كان عندي عربية الوقت داك, وجات على التلفون والكاميرا نسيت الولد التالت هو كبير يمكن في الثانوي شال مني الكاميرا قال يصور محلة الرجال رجع الفلم نصه بيصور في التربيزات وقزايز البيبسي وغيظي كان كافي لخنقه بعدها رجع الكاميرا وقال : ما تنسي تجيبيها معاكي بكرة في العرس بقت ليهم لعبة !!!
| |
|
|
|
|
|
|
Re: 22 يوما في الخرطوم ........مذكرات (Re: zola123)
|
سلام زولا 123
رمضان كريم وكل سنه وانت طيبة القصص والمشاهد ما بتخلص عن السودان بالرغم من انها بعد مرات
بتكون مريرة لكن فى نفس الوقت جميلة .
بمناسبة الاعراس والعيال والله انا برضو كان فى واحد كدا مجنني
لازم ياخد الكاميرا وعامل فيها ولا كاميرا ارتيست ، وبالمناسبة
اطفال الزمن دا بعرفوا اي حاجة خاصة الموبايلات والكاميرات يعنى
بتعاملوا معاها زي الواحد فاهم وعارف اي حاجة
الاخ انور قلته لى اسمها ضنب النملة والله دي مبالغة
| |
|
|
|
|
|
|
Re: 22 يوما في الخرطوم ........مذكرات (Re: ودالعباسية)
|
ود العباسية كل سنة وانت طيب وصيامك خفيف وافطارك تقيل
شكلها فعلا حكاية الكاميرات والطلبات منتشرة والزول الجاي في اجازة عادة بيحاول يكون ظريف ويرضي الناس وما بيرفض ليهم طلب, ويمكن ده البيخلي الحكاية تطول لو نهت الشافع مثلا وقلت ليه امشي بعيد ولا ابيت تديه الكاميرا , فانت طغيان وخلاص الغربة قستك ورفعت روحك فوق الناس فتاخدها من قصيرها وتدفع الكاميرا كمان للاولاد ديل يكون احسن كما تدفع باقي اغراضك وهدومك وترجع بشنطك فاضية لبلاد الاغتراب ودي حكاية تانية
| |
|
|
|
|
|
|
Re: 22 يوما في الخرطوم ........مذكرات (Re: zola123)
|
القروش كان من المتعب جدا ان أتعود على التعامل بالعملة السودانية أول الأسباب كان ذالك الاختلاف في السعر المنطوق وبين ما هو مكتوب على أوراق العملة. دي بكم يا حاج! 3 ألف جنيه عليك البحث عن ورقة ب 300 دينار ومدها للبائع وما بين حسابك وانتظار البائع’ كنت اخطيء وأمد له ما يقارب 5 أو 6 أضعاف ما طلب كان هناك من يعيد الباقي والكثير لا يفعل. أخي عصام حكى لي عن ماسح الاحذية الذي ترك عدته ولحقه بين الزحام لمسافة طويلة ليعيد له باقى ال 10,000 التي أعطاها له عن سبيل الخطأ......اعجبه أمانته,ابتسم و فشار عليه للاحتفاظ بها. اهترأت حافظة نقودي التي أحبها كثيرا, ولم أكن أفكر يوما ان حافظة نقود يمكنها ان تتمزق من ثقل ما عليها. طبعا , القروش البختها فيها ما كتيرة , لاكن اذا كنت معتادا على التجول ب 500 درهم في محفظتك في الامارات مثلا...فما يقابلها بالعملة السودانية ييحتاج الى محفظتين لملأهما.ولم أفطن لذالك الى باقتراب اجازتي من نهايتها. (الحدايد) العملة المعدنية, مزعجة هي الاخرى وتحتار في طريقة حملها. كنت اضعها جانبا او اتخلص منها حتى لا تثقل المحفظة المهترئة.فاذا بها منقذة جدا في المواصلات وما شابهها حتى لا تنتظر باقى الكمساري.
هذا الأخير قصته قصة. وكنت مصدرا للضحكات وأنا اتعلم كيفية لفت انتباهه للوقوف في المحطة. لا تنفع لو سمحت, لا تنفع يا أخ, لا تنفع اقيف...عليك استخدام صوت معين متعارف عليه (سسسسكك) يتعرف عليه الكمساري بسرعة ليصدر مثلها منبها السائق للوقوف. اذا كنت في المواصلات مع أحد لا أحمل هما بطريقة توقيف السائق, أما اذا ركبت وحدي فأحرص على أعلامه قبل صعودي بالوجهة مسبقا. لا تعجبني عزومة الاصدقاء في الموصلات..وقد تكون بقايا مخلفات حياة جامعية مع أجانب يتبعون نظام: كل واحد يدفع لنفسه. في يوم زيارتي لجامعة الخرطوم, كنت المح الاستغراب في أعينهم عندما أصر على دفع حساب البارد او نصيبي في المواصلات. كان ليطول الى شكلة فاسارع بقبول عزومتهم.
متفرقات .......الشاب الذي يعمل في السوبر ماركت القريب من منزلنا مصر على أننا قادمون من السعودية. ولا أدري بالتحديد مصدر تخمينه هذا. ولم يخف ذالك فكان يصدر تعليقات من آن لاخر تدلل على ذالك. في أول يوم لي في الحي , كنت أبحث عن كروت لشحن الموبايل, فاذا بي ألمح مجموعة تبدو عليها انها بطاقات هاتف معلقة خلفه وأشير عليها,, فيقول: دي ما زي العندكم في السعودية.. ديل للاستخدام من تلفون البيت.. البتفتشي عليها كروت تللموبايل بس.... في يوم آخر كنت أبحث عن دجاج مقطع بالتحديد.. فتح ثلاجته وأشار الى دجاج استغربت ان به صدرين وثلاثة اوراك..ضحكت.....فعقب مجددا: ده ما زي الجداد عندكم في السعودية, الاوراك براها والصدور براها... فاتني قبل مغادرتي أن أذهب لاشرح له أنني لست من السعودية بل من ألامارات . ...سؤال مثل: انتي من وين كان يثير استغرابي, ولم أكن لاتوقعه في بلدي. يبدو أن طريقة تصرفي كان من الواضح جدا أنها لشخص لم يعش في السودان مع كل محاولاتي للتخفيف من هذا .
شارع الزعيم الأزهري (مانفس السوبرماركت)
.....في أحد محلات الوجبات السريعة, دخلت لاطلب زجاجة مياه . فوجدت فتاتين في الصف أمامي ووقفت خلفهما. لأفاجأ بشاب قادم من خلفنا يمد يده عاليا ليطلب شيئا هو الآخر متجاوزا لثلاثتنا...هنا استأت وقمت بقريعه على هذا التصرف الخالي من التهذيب.قلت: أول شي في صف لازم تحترم الناس الجو قبلك, تاني شي انت ولد , لمن تلقى بنات المفروض تديهم دورك, مش تاخد دورهم. الشاب نظر لي وهو مصدوم وصاح: شنووووووو ياااااااااااااخي , ما بس أخدنا الدور منكم!!!! ومن خلفه اعتقد ان الجميع ينظر تجاهي.وسمعت العبارة اياها مجددا: البت دي من وين ؟ ......................... .........................
(عدل بواسطة zola123 on 10-22-2004, 04:57 AM) (عدل بواسطة zola123 on 10-22-2004, 05:00 AM) (عدل بواسطة zola123 on 10-22-2004, 05:14 AM) (عدل بواسطة zola123 on 10-22-2004, 06:37 AM)
| |
|
|
|
|
|
|
Re: 22 يوما في الخرطوم ........مذكرات (Re: zola123)
|
الختام
آن الأوان لمغادرة السودان….فها هي اجازتي تنتهي كنا نحاول البحث عن حجز مؤكد في اليوم الأخير لاجازتي الرسمية فلم نتمكن. لم أمانع في تمديدها يومين آخرين وسط استغراب والدي. فلم يتوقع عدم ممانعتي بالبقاء. وضحك: يعني عجبتك السودان؟؟؟ تردد هذا كثيرا على مسامعي عند عودتي, وكأنما الجميع يترقب انطباعي عن تلك الزيارة التاريخية بعد هذا الغياب الطويل.
خالي مثلا , ينتظر تقريرا وافيا عن الزيارة مستغربا , صديقات والدتي: عجبك السودان بالجد؟ كأنما الجميع توقع تذمري من الزيارة لاكنهم فوجؤوا بحديثي عنها بكل هذا الفرح.
لا أخفي احساسي بالضيق عندما اقترب موعد رحيلي. كنت اراجع الصور في الكاميرا, ومسجات الموبايل وابتسم. فقريبا أعود حيث لا صخب , لا حب, لا طيبة ولا وطن ……
كانت والدتي تلح علينا بالعود سريعا وزاد من قلقها ما تسمعه من أخبار عدم استقرار الأوضاع في الخرطوم وقصص التفتيش والاعتقالات. كنت اطمئنها بالهاتف أن لا شيء يطالنا هنا , نحن في أمان ولا مانع من تمديد مكوثنا يومين آخرين. في مساء هذا اليوم بالتحديد, زارنا مجموعة من الجنود المسلحين لتفتيش المنزل, حمدت الله أن والدتي اتصلت قبلها حتى لا تعرف….لم أكن لابالي حتى اذا حدث انقلاب ولم نستطع العودة كما كانت والدتي تقول….
فكرت كثيرا في انفصالي عن واقع السودان لكل هذه السنوات, عن جهلي للكثير والكثير …….. كن لاصغر طفل في السودان أن يعطيني درسا في التاريخ ويضحك على طريقة نطقي للأسماء السودانية. فكرت جديا بالحياة هناك لفترة من الزمن.. فكرت بحال شريحة كبيرة من أبناء المغتربين بعد عدة سنوات فكرت بابن أخي رامي ذو السنتين, هل سيخترعون مسمى جديدا لابناء الحناكيش يا الهي ؟ تذكرت صديقة الدراسة( برت ايلي) النرويجية, عندما اخبرتني انا تخطط بالقدوم للسودان متطوعة مع منظمة اغاثة ….وأنا اقبع في غرفتي الباردة أتهيب زيارة وطني كل هذه السنين…….
كان اليوم السابق لمغادرتي حافلا , امتلأ المنزل بالزوار المودعين كان عدد اصدقائي المودعين من اعضاء البورد يفوق من زارنا في هذا اليوم كنت المح استغراب أقاربي : من أين لايناس كل هؤلاء الأصدقاء وهي لم تعش هنا من قبل. وحدها ابنة عم لي همست: الناس ديل كلهم بتعرفيهم من وين؟ قلت لها : من الانترنت, سودانيز اونلاين ما سمعتي عنه؟ ردت: معقوول من الانترنت !!! ..كنا نحكي ونضحك ونتسامر كمن نعرف بعضنا لسنوات وكنت اتمنى ان تطول تلك الدقائق اكثر من ذالك.
في الصباح اتجهت الى المطار لاجد دريمز وملكة سبأ هناك لوداعي حاولت تمالك نفسي واخفاء دموعي وهم يسلمون على ومعهم بعض الهدايا…. لاطلقها تتدفق عند صعودي لسلم الطائرة ............................... ……………………أتراني أعود؟
النهاية زولة123 أبوظبي 22أكتوبر 2004
| |
|
|
|
|
|
|
Re: 22 يوما في الخرطوم ........مذكرات (Re: zola123)
|
الانسانه الزوله
الكلام ده اعوج شفتى ليك عيان بقولو لى الدواء انتهى؟
كان تبدى تانى من الاول ,كان تديها كوز, كان ترجعى باقى اليوم ده السودان
اقول ليك كلام على النعمه كان تواصلى ...معقول ده بس( توهدبينا)بالصوره دى وتقولى للناس انتهينا؟ واصلى الله يديك العافيه ملحوظه
ابو يسرا عليك بشرح توهدبينا
| |
|
|
|
|
|
|
Re: 22 يوما في الخرطوم ........مذكرات (Re: zola123)
|
Zola123 Ramdan Kareem
I am with fajrawi, you have to go on, and on and on, this can not finish here, we enjoyed your stories and you made us "narkb wash alsafr le nas alshoghol"
Had you thought of putting it togther as a dairy or a book, just a thought
All the luv Agab
| |
|
|
|
|
|
|
Re: 22 يوما في الخرطوم ........مذكرات (Re: Agab)
|
عجب شكرا على المتابعة الدائمة عارف انت وفجراوي بتحسسوني اني مطربة والحفلة خلصت ولسة الجكهور عايز وصلة قبل ما تمشي اجمع معظم ما أكتب في سودنيز اونلاين في ملفات في جهازي مخافة الضياع من الأرشيف مع شطحات السيرفر
شكرا ليك
| |
|
|
|
|
|
|
Re: 22 يوما في الخرطوم ........مذكرات (Re: zola123)
|
الدكتورة زولة الرائعة جدا
تابعت بشغف .. و إنتظرت نهايات ركضك و ال 22 يومــا .. حتى علمت منك أنها قد إنتهت لا اشك ابدا أنها اضافت الكتير جدا إليك .. و إلينـــا..
شكرا على طريقة ( توثيقك) و سردك الذى أرى من خلاله مشروع كاتبة مش أغلب الدكاترة كتابين و شعراء و ادباء ( إٍشمعنى إنتى لا ) ..
ثم .. و من كم التجاوب و البكاء الصادق كما قرأناه للأستاذ شوقى بدرى أعلاه نجد أن تفاعلا مميزا قد تم بين ما تنزلين من صور مصحوبة بتعليفاتك و شروحاتك .. و بين ذكريات البعض الحلوة و المرة سواء .. كانت فقط محتاجة ( لنفضة الغبار هذه عنها ) ..
كلمات الشكر لن توفيك .. و لكنى فرح لك جدا - كما خالك - و الفرق أنى لن أحرجك بمثل أسئلته .. كنت أقول أنى فرح لك فعلا أن كانت زيارتك برغم قصرها بهذا الثراء المعرفى على الرغم من بعض المقولات التى تصدمك و فى وجهك ( البت دى من وين ) كأنك آتية من كوكب آخر .. بالتاكيد فى المرات القادمة ستتخذين اسباب الوقاية الكافية ( بلغتكم أنتم الدكاترة) من مثل هذه المقولات ..
تستاهلين تقدير ممتاز - بدرجة شرف - على هذا البوست الذى أظهرتى فيه براعتك بكاميراتك التى تنفذ و تعرى الكثير .. و براعتك فى التعليق الذى يشد القارىء ليستبق نهاياته ..
لك من الشكر أجزله و دمتى ..
| |
|
|
|
|
|
|
Re: 22 يوما في الخرطوم ........مذكرات (Re: zola123)
|
أبو مهجة وبشار
شكرا على الكلام الطيب في حقي واعتقد انه لولا تشجيعكم لما تمكنت من اكمالها قد لا تكون بذالك المستوى العالى تقنيا لاكن كنت احس ان هناك يبحثون عن المواضيع التي تحدثت عنها فهناك الكثير ممن يعود بعد زيارة للسودان ليخبرك ان الامور كلها ماشية تمام والناس عايشة وفريق آخر يصدمك ويمعن في ايراد السلبيات الكافية لاثارة خوفك وتهيبك من زيارة ممثالة وهذا الفريق الأخير قد اثر فيي شخصيا وتسبب في الصورة السيئة التي كنت أرسمها للسودان والتي تغيرت كثيرا الى الافضل بعدما زرته تحياتي لمهجة, بشار ووالدتهم
| |
|
|
|
|
|
|
Re: 22 يوما في الخرطوم ........مذكرات (Re: zola123)
|
الأخ الكريم عثمان
اثرت الأشجان بورق البنكنوت السوداني القديم
أنا طبعا من جيل (مايو) وما تعاملت بالعشرة جنيهات الأخيرة التي عليها توقيع طيب الذكر السيد الفيل لكن الوالد يقول أنه عندما قارق توقيع هذا العلم الأوراق النقدية فارقتها قيمتها.
ويقول أن هذه العشرة جنيهات الأقدم كانت تساوي ثلاثين دولاراً.
أضاعوني وأي فتى أضاعو ليوم كريهــة وسـداد ثغــر
والبيت لسان حال الوطــن
تحياتي لك ولدكتورة زولة 123
| |
|
|
|
|
|
|
Re: 22 يوما في الخرطوم ........مذكرات (Re: Nada Amin)
|
زولا أدهشتني قدرتك العجيبة على السرد ، ليس اي سرد ، بل سرد ابداعي يحتشد بكل ما يتطلبه الابداع من تقنيات تجعل العمل السردي عالمًاً مكتملاً ، ومكتظاً بكل ماهو مدهش وآخاذ وقادر على تفجير كل الأحاسيس فيك ، فرحاًُ أو حزناً، اكتئاباً أو سعادة . ولا تكون المحصلة الا سعادة بالغة وانتشاء في حدوده القصوى بمثل هذا الجمال المتركز في اسلوب الكتابة . وتضيفين لكل ذلك آلية جديدة هي الصورة الفتوغرافية فيالها من بدعة بديعة .
| |
|
|
|
|
|
|
Re: 22 يوما في الخرطوم ........مذكرات (Re: zola123)
|
الاستاذ صلاح الباشا سعيدة جدا بتعليقك ومعلوماتك القيمة التي هي عن خبرة طبعا بهذا المجال واود ان افاجئك بمعلومة صغيرة الوالد قابلك في مكتبك حيث كانت له مصلحة هناك ودار بينكم حديث ذكرك حينها بعم خوجلي ابوبكر وما كتبته عنه بعد وفاته بوقت قليل في البورد . قال لي والدي انه ناقشك فيما كتبت وسعدت بمتابعته لما تكتب في سودانيز اونلاين لاكن لم يذكر لك انه والد زولة123 التي تكتب هناك اها مفاجأة حلوة؟ يعني شفت والدي وما شفتني وانشاء الله الاجازة الجاية نتشرف برؤيتكم
| |
|
|
|
|
|
|
Re: 22 يوما في الخرطوم ........مذكرات (Re: zola123)
|
دينق حقيقة لم تتح لي الفرصة لرؤية الكثير في هذه الاجازة القصيرة قد لا تبدو قصيرة للبعض, لاكنها بالكاد اعطتني فكرة عن ما يبدو ليه السودان حقيقة هناك اشياء اهم بكثير من العشوائيات فاتتني رؤيتها وندمت على ذالك تمنياتي ان تزور السودان قريبا وترى بنفسك اذا كان هناك اي تغيير
| |
|
|
|
|
|
|
|