مازلت أرفع حاجب الدهشة ولكن !!!!

مازلت أرفع حاجب الدهشة ولكن !!!!
قالت ليهو ياولد انا جنس الكلام الملون بى لون الدهشة ده مابقدر عليهو ابا يسمع كلامها وقعد يكشح فى تراب الروعة فوق وشها وملأ عيونها بالحروف الدراشة ..والحروف دى دخلت عيون البت الحديقة لحدى مابقت حمراااا ياولد ماتلعب بى اعصاب الكلام ..ما تكورك فى الابجدية ..ماتبشتن حال اللغة وتعذب الناس بى روعة القول الحريق انت ماقادر تفهم انو البت دى ممكن تموت بارتفاع ضغط الفرح فى ليل شفيف ؟ جنب دكان صالح اليمانى قعدت استناك تلاتة سنين ..ابيت تجى ..وابيت تسكت من الكلام الحلوو و.. الصباح الليلة قال للشمس انا حردان وماطالع لو طالعة اطلعى براك ..حنستو ..ابى يرضى يطلع كلو كلو الناس اليوم ده مامشوا الشغل وابوى ماصحى أمير اخوى عشان يمشى الجامعة لانو الشمس لما الصباح ابا يطلع معاها هى زاتها حردت وقعدت تبكى الليل كلو عشان يوم بكرة ماحتحرق وشوش السودانيين وتفش غلها فيهم .. لكن هى شمس السودان دى متغايظة من وشوش السودانيين ليه ياصباح ..؟ الصباح ماعرف يرد هو بس بيرضى يطلع مع الشمس ويخلى ليها الحريق براها .. مرات بتحن على السودان تقوم تحنس المطرة ترش وش السودان بشوية طل ..ونفحة دعاشة ..وبسمة هاشة ..وكلمة باشة الليلة الحزن قال لى يابت انا زهجان داير اطلع من قلبك ده شوية اشم الهوا واجى ولامن فرح قلبى بى فسحة الحزن الكاتم نفسو ..قام الحزن غير رايو وقال ماماشى من القلب ده لامن يموت ..عليك الله شوف الحزن ده وحقارتو ؟ انا كمان حالفة مااخلى قلبى ده يموت بى سبب الحزن المعفن ده .. لو داير يموت بى سبب الفرح ..ممكن ..ولو داير يموووت بى سبب الدهشة من جنون هذا الولد والله امشى الصحة الليلة واحرر ليهو شهادة الوفاة بى نفسى واحضر ليهو الصيوان وصوانى الغداء بتاعة الفراش وانادى ناس الدنيا كلهم يسكلبو ويبكوا على القلب الطيب الذى انتقل الى رحمة مولاه مندهشا ..راقصا من شدة الفرح المهيب !! عارف..انا مرة كنت ماشة جنب الحيطة فى مدينة من المدن العتيقة وفجأة كده طلع على زول ومن غير سبب لقيتو وقف قدامى وحالف الا يرش وشى بى موية نار كان شايلها فى ايدو ..انا وقفت وقلت ليهو ايمكن انت ابتلاء ربنا رسلو لى يلا رش موية النار دى وشوه خلقة الله وامشى شوف حالك .. لكن المسكين جا كده يرفع قزازة موية النار عشان يكبها فى وشى القزازة فلتت من يدو جات على صدرو حرقت قميصو ومن برة القميص وصلت لى جوة القميص والزراير مقفولة وبرضو موية النار حصلت قلبو وحرقتو ليهو حريق فظيع بنسبة مائة فى المائة !! لاحولااااا ..والله برضو زعلت عشان قلبو الاتحرق ..ياربى قلبو ده كان فيهو مساحة للحب والانسانية والجمال ؟ مساكين الناس البيقصدو يحرقو وشوش غيرهم من دون اى اسباب مقنعة ولامعرفة سابقة .. ياربى يكون ربنا ابتلانى بيهو ..ولا واحد من عبيد ربنا حرشو ودفع ليهو يحرق وشى ؟....لكن ليه كده يااااخ دى حكاية قبيحة والله!! يا زولة انتى موش وعدتى روحك تندهشى وتتألمى من غير بكا ؟ يلا امشى اوضتك وابكى من غير دموع ..واندهشى لكن بى تأمل عميييييق وخلى بالك انو الدنيا دى فيها ناس حلويييين زى الولد المدهش المجنون ده !! وبرضو فيها ناس ماتقدرى تعرفى بكرهو الناس ليه ويحبو يشوهو وشوش الخلق بقزايز موية النار اسمع يامدهش لو بكرة الشمس حردت تانى وابت ماتطلع فى رفقة الصباح المسكييين والناس مامشوا الشغل انا مالى اى دعوة عارف ليه ؟ لانى عمرى فى حياتى مابعرف احرش مخلوق خلقو الله يعمل حاجة كعبة ويمنع نور الشمس عن الناس ويضيع على الشعب السودانى يوم عمل كااامل بخمسين الف جنيه !! انت فاهمنى كويس ياحبيب ..اذن لاتجعل حاجب الدهشة مرفوعا هكذا !! --------------------------------------------------------------------------------

[رد على الموضوع] صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]