|
|
 يومـيات .. عريبي في الخرتوم
|
ما عارف ابدأ من وين .. حكايتي طويلة ومتشعبة .. في البداية إترددت أكتب حكايتي .. قلت ناس البندر ديل ما بفهمو كلامى .. لكن قعدتي الطويلة في الخرتوم غيرت ملافظى .. كلامى الكان بشوفوهو زى الألغاز و الرطانة .. بقو يفهموهو .. غايتو بحكي ليكم .. البتفهوهو أفهوهو .. و الما بتفهموهو دا القاسمو ليكم ربنا .. مش الفهم قسم .. عايزني أبدا ليكم حكايتى لمن كنت في الحلة و أكرّها ليكم لحدي جيتي للخرتوم .. ولّ أبدأ من أول يوم دخلت فيهو البندر .. وبـهرتـنى الكهارب بعد ما كنت فاكر أنو رتينة حاج أحمد أقوى نور بعد الشمش .. صحيح قبل كدا جيت الخرتوم كتير .. لكن في مرتين ما بنساهم ابدا .. المرة الأولي قلت أمشى أزور عمي عثمان الشغال في السكة حديد .. لميت قريشاتى الوفرتهن من لقيط القطن .. هـديـماتي ربطهن كويس .. ما كلمت زول .. بالليل اتسرقت ومشيت نمت في اللورى قدام الحلة جنب طاحونة التعاون .. المساعد كان نايم وما حس بى .. إلا في الصباح لمن جا يرفع صفايح الطماطم .. كان عايز يلفها معاي لكنو سكت لمن عرف انو عندى قروش المشوار .. بعد أذان الفجر اللورى إتملا .. شى بهايم .. شى ناس .. شي طماطم و عجور .. ربطت بقجتى في السيخ .. وقريشاتى صريتن كويس في طرف العراقي وأتقعدت في التندا .. شالي كربتو كويس في راسى .. عشان الهوا ما يصن لي اضيناتى .. ما أطوّل عليكم .. وصلنا السوق الشعبى .. فكيت بقجتى ولبست مركوبي .. نطيت من ضهر اللوري زى القرد .. أصلو ركوب اللوارى بعرفو بلحيل .. نفضت هديماتى و قشيت عويناتى من التراب .. اتلفتا جاى جاى و أشوفلك لمة الناس .. ناس و الله فى بكاء العمدة ما شفت قدرهم .. انتو في كترة الناس ولّ كترة العربات .. شي هواستن .. شى بكاسى .. شي زد وايات .. شى باصات .. و شيتا كتير ما قدرت أعرفو .. أتوكلت على الواحد الأحد ولبدت ورا كشك ليمون .. اتلصصت جاي جاي .. ما شفت زول شايفنى .. طلعت صرة قريشاتى .. أصلو ناس البندر عارفهم نشـالين .. مرقت لي ريالين ختيتهم في جيب الساعة .. و ضميت فوقهم يدى .. اتكرعت لي كبايتين ليمون لحدي ما ادشيت .. كميلتي لي صحن الفول قمت ترترب زي اللادغانى عقرب .. الوكت شالنى .. سألت الخلق الحايمة كلها .. مافى فرد نفر فيهم عرف بيت عمي عثمان وين .. أتلفتا يمين شمال .. ما لقيت السكة حديد .. قلت إخير أسإلهم عن السكة حديد .. التكتح ما عرفوها .. قالو لي ياتو سكة حديد البتكوس عليها .. أتراها السكة حديد ما واحدة .. جاتني فكرة في راسى .. أتذكرتا كلام سيف ود العمدة .. قال كان غلبك مكانا في الخرتوم .. اركبلك تكسي .. ناس التكاسى بعرفو كل شى .. هو كان ما بعرف ما كان أدوهو الرخصة .. قالو بسعلوهو عن بيت الوزير فلان .. و المستشفي العلانى .. والداية الفلتكانية .. أول بتاع تكسى جا مارى وقفتو .. أكيد بعرف بيت عمي عثمان .. مش هو موظف كبير قدر الدنيا .. ركبت و إتقنقلت وختيت بقجتى فوق كرعى .. لمن قال لي يا الأخو ماشي ويين .. دنقرت لي تحت عشان ما يقول الزول دا عريبي ساكت و ياكل قريشاتي .. غلدتا حسى و قلت ليهو أنا ماشى بيت عمي عثمان .. لمن قلت ليهو ها زول كييفن ما بتعرف عمي عثمان .. و مال ادوك الرخصة كيف .. نهرنى فرد نهرة لحدى ما كريعاتى رجفن .. عمك عثمان دا رئيس جمهورية .. وزير داخلية .. انا اعرفو ليك كيف .. انزل آآ عربي انزل .. لملمت خلييقاتى و نزلت .. يالا و يا مين حصلت اللورى .. أها دي كانت أول مرة أشوف فيها الخرتوم .. المره التانية الما بنساها برضو .. يوم قبلونى في المدرسـة .. كدى خلوني أشربلى كوز موية وعقب اتم ليكم الحكاية
|
|
 
|
|
|
|
|
|
|
 Re: يومـيات .. عريبي في الخرتوم (Re: abas)
|
المدرسة قالو بتفتح بعد الخريف .. المدير قال الماعندو شهادة ميلاد ما بنقبلو .. شهادتى أكلتها البقرة السنة الفاتت .. قالو ممكن أطلع شهادة تسنين .. ودي عايزالا مشية للخرتوم .. كلام أخش مدراس أصلو ما راكب لى في راسي .. لكن لمن قالو الداهية عايزالا داهية من الخرتوم فرحتا .. أبوي ذاتو قصة المدارس ما راكبالو في رويسو .. داكي العام رفض بالتكطعو رجلي ما تـهوب علي المدرسة .. قال المدرسة بتبوظ الجـنا .. المدارس غير الفقر ما وراها حاجة .. عبد الله ود العمده قالو الجـنا تم التسعة ولازم تدخلو المدارس كان يبقى ليكم أفندى .. أبوى حـرن .. ولو ما كان القالو الكلام دا عبد الله ود العمده .. كان مسكو بسطنو .. الحـله ما فيها فرد راجل ما ضاق بسطونة أبوى .. زول معروف بتاع مشاكل .. لكن لمن تشوف أبوى قاعد مع عمى عثمان .. تقول الزول دا الغنماية بتاكل عشاهو .. الكلام البقولو عمى عثمان .. ابوى يمشيهو زى خيط الدبارة .. داكى المرة .. عمي عثمان جـا لى بكا ناس الدابى .. الدابى عندو ولدو طقتو عقرب .. قبال مايصل الحكيم في الحلة الورانية .. وقع ميت من ضهر حمارتو .. وكتها الناظر قال يجـيبو الوليدات يسجلوهم .. عمي جاب أبوى وقـعّدو في الواطا .. و قالو الجـنا بقي راجل .. ولازم تدخلوهو المدرسة .. ولو هو ما كان ماشى مامورية للدبازين .. كان سـاقـنى معاهـو الخـرتوم و طلع لي الشهادة .. خبر مشييا للخرتوم إنطلق في الحلة .. الناس تجي لي أبوى تقولو كيف تطلق الجنا براهو للخرتوم .. ما بجيك صادى .. يلحقلك أولاد حاج التوم .. الهملو وليداتم وفـزّو يبيعـو العراريق في السوق الشعبي .. ولا يبقالك زي وليد سليمان .. البقى صعلوق يغنى في الأذاعـة .. أها بقو يحسبو .. أولاد فلان وأولاد علان .. أولاد الحلة التحت و الحلة الفوق .. كان تسمع كلامن .. تقول عروبنا كلهم هـجـّو البنـدر .. باقي ليكم أبوى بقدر يكسّر كلام عمى عثمان !! عبد الله ود العمدة زول حكيم و راسى .. لمن بدا يتكلم .. الناس كـلها صـنّت .. التقول صبّت فيها مطرة .. قال بكرة يرسل جواب لي صلاح أخوهو .. يتلقانى يوم اللحـد دور الليله في السوق الشعبى .. صلاح نجيض بلحيل و بخـبر البندر .. ليهو سنتين في الخرتوم بقرا في الجامعة الاسلامية .. في سرى ضحكتا .. قلت الناس دي ما عندها عقل .. ما عارفين انا بخبر الخرتوم زى صلاح .. خفت أقولهم .. يقولو أنا شن الوداني الخرتوم ؟؟!! من العصير بدرى .. شهلونى .. الزوادة ربطوها فى كورية الطلس الكبيرة .. أمي عجنت لى الكسرة بالطماطم .. وكتحت من فوقها شمار .. أصلى بحب الشمار بلحيل .. المحـّتين الجابتن التايه أختى سلقوهن وختوهن فوق الكسرة .. نص العجورة عارضوهو بين الـّمحتين .. لمن عاينتا في الكورة قبال يربطوها ويختوها في المخلايه .. التكني شفتا وش الوليد ود حاج الصافي .. والله وشو الخالق الناطق .. الوليد العوير الخليقة المبدّل .. قبال أذان الفجر ما يقول الله وأكبر .. لقيتنى مفنقل عويناتى .. تترب قمت من العنقريب .. لولحت رقبتى طقيتها .. إتمغيت شديد لحدى ما أتر الكرّاب إتمسح من فهقتى .. ختفتا بقجة هدومى و مخلاية الكسرة و قمت جارى .. أمى نهرتني .. قول بسم الله آ جنا .. العجلة ليك شنو ؟؟ دا يا دووب الأذان الأول .. و البص ما سمعنا بوريهو .. أظنى ما قلت ليكم .. ود السرة ما دقّالو صندوق للورى وسواهو بص .. لمن وصلت قدام الحلة .. لقيت الخلق متلمة .. الأعمي شايل المكسر .. دافرت جاي جاي .. عشان أحصللى كرسى جم الشباك .. رفعتا مخلايتى في السبت و دفرتا بقجتى تحت الكرسى .. تكيت راسى في الكرس القدامى .. ما صحيت إلا في جبل أولى .. ندهت للجنا الببيع الترمس .. اشتريت لى كيسين .. قرضهم و كتحتا فوقن كوز موية .. وسوستا في سرى .. إنتو يا ناس البندر كمان بتبيعو المويه !! عاينت لي قدام .. في الكرسى الورا السواق .. شفتا بنيتا سمحة .. أظنها ركبت من الحلة القدامية .. صريت ليها عينى .. ما إشتغلت بي الشغلة .. قلت يا الدليهة بنات الزمن دا ما بفهمو صـرّة العين !! من شكلها كدا .. باقى لي طالبة في الخرتوم .. أها وأنا بحاول أشوف شعيراتها تحت الطرحة وكتين تندقر .. لقيت نفسى في السوق الشعبى الما بغباهو .. و اشوفلك صلاح ود العمدة هناك واقف يلولح في رويسو الغـليد .. أهـا دي المـرّة التانية المابنسـاها في مشياتى للخـرتوم .. لكـن باقي ليكم كـدري دا ما بعـتب الخرتوم عـقـب .. بس خلونى اخـرت صحـن الفول دا و أجيكم صـادّى
ونـواصـــــــــــــل
| |
|
|
|
|
|
|
|
|
|
Re: يومـيات .. عريبي في الخرتوم (Re: Ali Alhalawi)
|
صـلاح فسّحني بلحيل .. ما خلالو بكان ما وداني ليهو .. سينما بانت .. كلزيوم .. سوق الناقة .. حدايق مايو .. المتحف القومى .. جامعة الخرتوم .. ستديو بابا .. معهد شمبات .. واللة يا الخرتوم أمانه ما جاكى زول .. مو قايلك كبيره زى كرش الفيل .. أقول لكم الفي قلبى .. الحتات دى كلها ما عجبتنى زي ما عجبتنى السينما .. أتارينا كنا مدفونين .. لمن تجينا السينما المتجولة .. تلاقي الحلة كلها .. الكبير شايل الصغير .. متلمين في حـوش المدرسة .. تلقانا متفـّنين فى الأرض ومتلببين عككزنا .. وماسكين بطاطيرنا .. لكن الشفع !! هم شفع نصاح .. ما بخلوك تسمع حاجة .. و العجب لمن يجينا الحاوى .. الزين ود عمّي سـعيد .. قال مناهو يبقى حـاوى .. باقي لـى .. عجبنو بليع الأمواس .. لكن يا ناس الخرتوم .. الراحات مـا عندكم .. الواحد يغطص في الكرسي لي إضنينو .. لمن الفلم يبدأ .. الحتة تبقى صانّة .. البطل تحس بيهو جاييك عديل .. قالولكم أنا ما خـفتا وكتين دجانقو طلع مسدسو و لـمّ في الناس كتل .. تيشن تاشنق .. بقيت اتضارى ورا الكرسي .. صلاح ود العمدة يشيل ويقرص فوقى .. ها وليد ما تخاف .. إت مو راجل .. دا تمثيل ساكت .. باقيلكم دا تمثيل .. شوف عينى .. طقالو واحـد لحدى ما سل عـويناتو .. والدم الجاري دا كمان تمثيل .. هوي يا صلاح .. كان ما متنا ما شقينا المقابر .. لكن طليع شـهادة التسـنين دودرنا دودير .. من الإحصاء لى .. ناس التسجيلات .. لى القسيون الطبى .. الناس دايرين يقيسو لى عمرى .. التكنهن بعرفو أكتر من نفيسة الداية .. لكن والحمد لله .. ما قصـّرو معاى .. سننتين بالتمام والكمال .. نقصوهن من عمري .. لو ما الدكتور كان نجيض بلحيل .. أكان الناظر قالى .. والله ناس التسـع سنوات ما بنقبلن .. الله يعافيك يا صلاح ود العمده .. قبال الشمش ما تغيب .. البص دخل الحـله .. أشوفلك الناس كويمات كويمات متفـنيـن في ضل الطاحونة .. نزلتي من الباص .. وقعو فوقي قيليد .. التكنى جايى من الحج .. تعّبوني بالسؤالات .. صحى بنات البندر مطلوقات الواحدة تمشي في الشارع لا لابسالا توب و لا طرحـه ؟؟ صحي البيوت باننها بيت فوق راس بيت ؟؟ الناس دوشت راسى من السؤالات .. والعجب لمن القمرا طلعت ومشيت ألعب مع رفاقي جنب المطامير .. لا لعبنا شدّت .. ولا الرمة وحباسها .. ولا شـليل .. طلعنا في كوم التراب .. وإتوسدنا الدرّاب .. حكيت ليهم شن حكاوى .. شيتا شفتو وشيتا ما شفتو .. أنا مخّى ما نضيف .. لكن ما صدقونى في حكاية الطوطحانية البتشيلك لا فوق لحدى ما تشوف البحر والخرتوم .. ولمن تنزلبك لا تحت .. نفسك يتخمّ .. قدر ما حلفت ليهم بالشيخ المكاشفى .. قالو انا بضحك عليهم .. وكتين أذان العشا أذن .. إتنفضنا ولملمنا نعلاتنا وقبلنا لي بيوتنا .. بالليل داك النوم غلبنى تب .. أتقلب علي صفحتى وأتذكر يوم بكره .. يا يوم بكره ما تسرع … غنيه سمعتها فى اذاعه امدرمان … البغنيها منو …؟؟ ما بخـبرو .. يوم بكره ده بصبح كيفن؟ ؟…غايتو بس الله يستر
و نواصــــل
| |
|
|
|
|
|
|
|
|
|
Re: يومـيات .. عريبي في الخرتوم (Re: Ali Alhalawi)
|
أتاري شـالتنى نومة .. قمت زى المخلوع .. لقيت أمي مجهزة لي جلابيتي البيضاء العيدتا بيها السنة الفاتت .. مركوبى مسحتو بى باقى الكركار الفي البرطمانية .. أدتني الليفة والصابونة عشان أخش اتكرش .. مليت الجردل من البرميل وشلت الطشت دخلت جوه التكل .. إتكرشتا زين وجيت طالع .. حمام البيت اصلو ما بريدو .. أنا متعود على جلبغـة الترع وحمام الكنارات .. مسكتا الخلال ونكشتا تفـتى .. قبال ما أكمل لبسي .. امي جابت الشاى ومعاهو صحن لقيمات قدر الكترابة .. كفكفتا جلابيتي بدور اتقنقل في الواطه .. أبوى نـهرنـى .. قوم قامـت قيامتك .. بتدور توصخ جلابيتك يا العوير .. جرّيت لي بنبر ومديت كريعاتى الطوال لحدى ما قربت أدفق صحن اللقيمات .. لهطـّا زين .. وكتين عايز امسح يديا بى طرف العراقي .. إتبهتطا .. إكتششفتا نفسى لابس جلابية العيد .. مسحتهن فوق شعيراتى ومسحت الباقي في وشّى .. درعتا شنطة الدمورية فوق كتفى وقبلت علي المدرسة .. زقاقات الفربق كلها بيضا .. مـحل ما تقبل .. تشوف الجنوى مقبلين علي المدرسة لابسين جلابيبن البيض .. عيـّتطا لى النور ود الزين .. النور ود الزين ما بتخبروهو ؟؟ !! أنا وهو كـنّا ما بتنفرق .. لكن الدنيا بت الغلفاء فرقت بيناتنا .. هسع بقي زول مشهور .. يغير ويبدل في العربات .. بني بيتو بالطوب الأحمر .. وحفرلو بير عشان بنياتو ما يردن البير .. هسع بقولولو نور الدين الماحي .. الدين دا جابو من وين .. والله ما عارف .. لكن من يوم ما عرفنا أنو بقى جبهجى .. النور ود حاجة السرة البنعرفو اتمسح من راسنا .. حتي ناس الحلة بقو يندهولو بي نور الدين .. وقالو الما بصوت لى نور الدين في الإنتخابات ما عافيين مـّنو .. النور الكان بلعب معانا التيوة .. بقي يجيبو صورتو في التلفزيون .. عيتطا ليهو .. جانى جارى زي الأبلـه يقش في ريالتو .. النور بخاف منّى موت .. يوم ما كسرتو في زقاق حاج البدوي .. عينو إتكسرت .. أقولو قبل يمين يقبل يمين .. أقولو قبل شمال يقبل شمال .. بقي في صباعى زى الخاتم .. هاي يا النور ود السرّه .. مالو أبوك ما لبسك جلابية تترون .. هسع لو بعت ليك غنماية ولّ عتوت ما كان لبستا زيك زى الجنوى .. النور كان لابسلو جلابية دمورية .. موية الطملة خلّت لونها زى المعـراكة .. أبوهو صعب بلحيل .. التكنو جيبو فيهو عقرب .. النور قلدنى شديد زى المودرنى سنين .. بديت أحكى ليهو عن الشفتو في البندر .. ما حسينا إلا والجرس يدق كلنق كلنق .. محمود ود الصافي ندهلى.. ناس أولي من داكى الجيهة جنب الشفخانة .. كلامو بلحيل صاح .. ألاقيلك كل رفقاتى واقفين صفين .. وقفتا فى الصف الورانى .. مابدور أشوف وجيه الناظر .. الناظر زولا زى العمده … شنبو كبير.. و حسو غليد زى عمى عـثمان .. الناظر والمدرسين إتكلموا و سكتو .. وأنا ما جايب خـبر .. أتاوق لي نسوان الحلة بفرقة السور .. دافرات غنيماتن قدامن .. لأنو الليلة الجنوى كلهم جو المدرسة .. ما أشعر ليك إلا وضهرى ولعت فيهو النيران .. شيواك .. محطنى المدير بى سوط العنج .. حسيت ضهري زى الإتقسم نصين .. وكتين نـهرنـى .. شـنبو زي العايز يطير يقد لي عيونى .. خلي بالك ياولد .. انتا في مدرسة مش في خلوة .. أقيف عديل ومد يدينك .. ديل أضافرين ولّ كناسة .. أمشي أقيف في نص الطابور .. وقفونا أنحنا أكان عشرة أكان تلاتين والله ما عارف .. في اللحـظة دي إتمنيت يجى زول من ناس الحلة يجرنى من وسط الخلق ديل .. ويقول لي البكان دا مو هيلك .. بكانك هناك ورا االغنيمات والبقيرات .. أفتح يديك يا سجم .. فتحنا يدينا و أكلنا خمسة قشطات .. قالو عشان نحن جداد لكن المرة الجاية بنادو إتنين من سنة سادسة يشدونا .. من داك اليوم أضافرينى بقطعن لحدى ما يكبن الدم .. كل مرة بتذكر وصية أبوى .. أصلو أبوي وصانى .. لاتبقى راسا يقطعوك .. ولا تبقى ضنبا يوطوك .. أها بقيت الألفه .. والمابجيب لى فول ولّ تسالى من دغش الرحمن .. بكتبو مهرجل .. النور ود السره قال أنا عملونى الألفه عشان هرجلتى كتيرة .. هلّا هلّا آ النور .. الألفويه دى جبتها بشديدى و لضيضى .. أنا القمر ود الهادى ود حاج الصديق ود المبدل .. أفو والله أنا روشتى كلو كلو ما بخليها .. من زمان خشمى يطقطق زى مكنة السنجر .. وما قلت ليكم أنا إسمى القمر .. أهـا أسـمعونى زين .. أمى بتنادينى بالقمر الضواى .. وأبوى وأخواني بقولولي قمـر .. وعشان دايما بقول أنا الكيك الأكل بلادو فريك .. رفقاتى سمونى الكيك .. أكان بتدورو تندهولى بالقمر ولّ قمر ولّ الكيك قولو البجي علي بالكم بس خلونى النخرط ملاح الروب دا و بجيكم صادى
| |
|
|
|
|
|
|
| |
Abureesh
سجيمان
abas
فيس بوك
تويتر
انستقرام
يوتيوب
بنتيريست