*** مواقف وطرائف ,,, لما رجعوني من بيت البكاء مرتين ***

Quote: بت الجنيد وضيوفك سلام وكل عام وانتم بخير لمن الشغلانية جابت ليها حكاوي هاكم دي . كانت معدات حفر الموتي والكفن بحوزة والدي علية رحمة الله ، فكنت من أوائل من يعرف خبر الموتي بالحي ، والدي كان عاصر علي أنا، وانا ترتيبي الثاني في المنزل بحكم شقيقي الاكبر زول متدين وكان يطلق علية لقب مولانا في الحي ، وانا زول بتاع هجيج ، بكتل ليك حفلات الديم والحله الجديدة عن بكره أبيهن ومن ثم أرجع اتلبد لدخول المنزل ، المهم عندنا صاحبنا أسموا الضيء خالتوا جابوها عيانه من البلد ، تقوم المرا ماتموت الا يوم الخميس ومع مواعيد برنامج عالم السينما ، بلاهي حضرت ليكم في التربيزة باغة زيت عافية الصفراء ديك مليانة موية باردة وبحسب في الثواني لبدء البرنامج ، الباب يدق والدي فتح الباب الضيء بيقول ليهو ياخال خالتي ماتت ، وأنا منتظر برنامج عالم السينما والدي جاب لي الكواريك ومعدات الحفر وقال لي شوف باقي الشباب وعلي مقابر الرميله عدل لحفر القبر ، شلت معدات الحفر أول بيت دقيتوا لود جيرانا جاني فاتح الباب قال لي في شنو يا الدائش قلت ليهوا خالة الضيء ماتت قال لي أمشي وتعال بعد عالم السينما ينتهي وقفل الباب . أنتظرت دقائق وشلت لي طوبة ووقعت ليكم في باب الجيران خبط ، أبوهوا جاني جاري وفتح الباب في شنو ياولدي ؟ قلت ليهوا خالة الضيء ماتت وماشين نحفر القبر ونزار ولدك قال بعد ماينتهي عالم السينما ، كورك ليك في نزار وطلعوا لي وقفل الباب ، نزار زهجاني مني وانا زهجان من الوضع كلوا ومشينا مع بقية الشباب مقابر الرميلة من حسن الحظ لقينا لينا مكان هش و وقعنا فيهوا حفر. باعوضة وريحة مجاري الخرطوم تزكم الانوف ، جهزنا القبر يقوم يجيء الوفد الاول قبل حضور الجثمان ومن ضمنهم شقيقي المتدين ، أول ما نزلوا في واحد شايب دقدق برجلينوا وقال يا أولادي المكان دا مجري سيل. طوالي شقيقي قال لمن المكان دا مجري سيل نلغي فكرة الدفن هنا ونشوف لينا محل تاني نحفر فيهوا ، قبل مايكمل كلاموا جريتوا من يدوا بعيد وقلت ليهوا شوف ياعاطف بطل تنظير نحن ندفن الان وبعد مايجي الخريف أنشاءالله خالة الضيء تصل الرصيرص نحن مالنا آسف للأطالة