*** مواقف وطرائف ,,, لما رجعوني من بيت البكاء مرتين ***

Quote: سماسم بالتوفيق يا جميلة ربنا يسهل امرك ويشرح صدرك ولما تخلصى الامتحان تعالى شوفى المحن نزلت مرة فى اجازة سريعة عندنا قريبات امى شديد ابوهن الله يرحمو اتوفى وطبعا امى الله يرضى عليها ما بتقبل بت اهلها كلو كلو ..انا يا دوب وصلت قالت لى اسمعى تمشى لبنات فلان تعزيهن فى ابوهن والبنات ديل يوم وفاة ابوك ما خلن فرضن ناقص.. قلت ليها حاضر يا حجة بس انا محلهم الفى الحتانة دا ما بعرفه قالت لى خالتك توديك ولما خالتى الله يديها العافية بتريد اللوم ..المهم جننتنى جن لحدى ما طلعنا وفجاة خطر فى بالها نغشى السوق قبل نمشى ليهم ..ربكم رب الخير نلاقى اتنين من بنات الراجل فى السوق قبل ما نصلهم خالتى قالت لى تسلمى عليهن ساكت وتقولى ليهن الله يأجركن فى ابوكن لكن نصل البيت تعزيهن طبعا دى اصلها ما وقعت لى كلو كلو لكن قلت سمح..قابلت البنات وسالمتهن وعزيتهن بالكلمات والحقيقة كان سلامهم بارد اظنهن دايراتنى اتكتح واتنخج فى السوق .عموما وصلنا معاهم البيت وطول المسافة كانت الونسة عادية يعنى اتكلمنا فى السوق وغلاء المعيشة والملايات والتياب واللحمة وكل ما يمس الناس حتى الفحم والغاز وصلنا البيت وانا طبعا موضوع العزاء والبكى طار من راسى وقدر ما استجمعت كل الحزن الفى الدنيا عشان ابكى واتنخج النصيحة لى الله ما قدرت شلت الفاتحة وقدر ما سالمتهن تانى ومسكتهن قووووووووووووى الدمعة ابت خالتى دى وشها بقى بمبى من الزعل المهم ما فضل ليها الا تدينى ام دلدوم اتخارجنا منهم بعد قمت بالواجب والطريق كلو خالتى انتى يا بت مريم جنيتى ولا سعرتى مالك ما بتعرفى البكى؟؟؟هى تهرج وانا اضحك لامن وصلنا البيت