|
|
 خربشات مسرحية (2) لصوص لكن شرفاء بقلم محمد عبد المجيد أمين (براق)
|
06:35 AM Aug, 30 2015
سودانيز اون لاين
محمد عبد المجيد أمين(عمر براق)-الخرطوم-السودان
مكتبتى فى سودانيزاونلاين
بسم الله الرحمن الرحيم
(التيار الكهربائي يعود إلي خشبة المسرح ، فنري نفس المشهد السابق علي ما هو عليه ، إلا أن ما يلفت النظر هذه المرة أن ثلاثة اشخاص مدججين بالسلاح كانوا يقفون وراء الكواليس خلف المجموعة المكممة الأفواه من الرجال والنساء والأطفال ، ويبدو ان إنقطاع التيار الكهربائي جعلهم يظهرون . الرجال الثلاثة يرتبكون لعودة التيار الكهربائي المفاجئ فيخفون اسلحتهم ويتراجعون ليختفوا مرة أخري وراء الكواليس . صف التلاميذ ينفض من أمام أستاذهم وقد إستشاطوا غضبا لمقطع التيار).
فللي : ( لزملاءه ) عليكم الله دي حالة دي .... الناس ليها حق تنبذنا .
قرضمة : ناس السد ديل الله يجازيهم ... كل يوم يدخلونا في إحراج مع
المواطن.
كشحة : (متحسرا) وحالته كنا قاعدين نفاخر بيهو ونعتبرو أكبر إنجاز.
الهمباتي : إنجاز شنو يا عمك.... ما نحنا دفننو سوا !!..
ملقاط : يازول بلا إستهبال .... كل الناس عارفة أنو طلع " ماسورة"
ساي.
هبشة : إلا نحنا .... الجماعة علمونا نصدق إنو" الشينة " هي الصاح.
الهمباتي : دا الجماعة لغفو فيهو جنس لغف .. حرًم كان كت مسئول
معاهم " أهبر" ليك من ده ومن داك.
قرضمة : ( للهمباتي ) أنت يازول ما بتشبع لغف .. ما كفاك اللي هبرته
م الولاية ديك ، واللي قبله ، واللي قبله.
ملقاط : ( معترضا لقرضمة ) مالك ؟... رزق وجايهو لحد عندو ..
وبالقانون.... وبعدين !... إت ذاتك كومك قدر كده؟ .
قرضمة : ( يقرأ المعوذتين في سره ) كان ختيتونا وخليتو النقًة دي؟!.
هبشة : حرًم كان جابوها لي بالدولار...ما أخت يدي في قروش السد
دي... يازول دي كلها ربا .
فللي : واللي حيدفع فوايد القروش الممحوقة دي منو؟؟!!.
كشحة : ( لزميله ) يازول مالنا نحنا ومال الشبك ؟...وحاتك ما بندفع ولا
تعريفة .. نحنا محل ما يختونا ..نخم ساكت ونجنب ف الضُل.
الهمباتي : ( محتجا) حقو يلبوسوها للبرلمان ... هم براهم اللي حللو الربا
كشحة : ياخوانا هووي ... ما تتناقرو .... إنتو خسرانين شنو. لا إنتو لا
البرلمان لا الحكومة حيدفع.
(كشحة يشير إلي حيث الصالة وعندما يدركون مقصده يستبشرون
فرحين ويشيرون بحركات ساخرة لأناس الصالة . في هذه الأثناء
يتنحنح الشيخ بصوت عال فينتبه التلاميذ فيهرولون نحوه )
التلاميذ : ( معا وبصوت واحد وهم يتحلقون من حوله متتظاهرين
الاهتمام به ) ..... كفارة يا شيخنا ....وسلامتك وتبرا من "
الإعتزال" .
الشيخ : ( يحيهم بينما يجلسون حوله في شكل حلقة) ممتنين ومشكورين
لزيارتكم وهاكم قرصة حاررررة في آضانكم ( يقوم بحركة كأنه
يقرص آذانهم من بعيد).. عشان مرة تاني ما تتطاولو علي
شيخكم.
فللي: ( باعتذار ) تقول شنو ياشيخنا .... شلاقة وشقاوة عيال .
قرضمة: نحنا قيلنها لعبة وحياتك.
هبشة : ما سويتوها قبال كده ؟.... أت حبيس وهو رئيس .
كشحة : الزول الخبيث داك اللي نفضك وقعد محلك قال لينا : دايرين
نغش عمو سام ... علشان كدا لازم نقلب الفلم علي وشو
التاني...لزوم المرحلة ... وانت سيد العارفين ...إنو الحرب
خدعة.
ملقاط : ( باعتذار ) مشينا معاهم ياشيخنا .. وإنت براك علمتنا الحليفة ،
وطاعة الأمير وتنفيذ الأوامر؟.
هبشة : ( يقوم بحركة من أصبعيه تدل علي طلب السيولة) والمصلحة ...
فللي : ومسيرة التمكين.
الهمباتي : قلنا حرام المشروع الحضاري يقع.... كان لازم " ننقذه"
قرضمة : ونواصل المسيرة القاصدة ..... لمن نشوف أخرتا.
كشحة : ما معقول يا شيخنا نخرخر في السكة .
الشيخ : ( يتنحنح ) معليش .. خيرا في غيرا... والرجوع للحركة فضيلة
هبشة : (للشيخ ) ما نحنا جينك عشان موضوع الوحدة وكده.
الهمباتي : نفتح الدفاتر ؟
( الشيخ يبلع ريقه بصعوبة ويشهق ).
الشيخ : موية .... موية
(التلاميذ يتوزعون حول مقدمة الخشبة يطلبون الماء)
قرضمة : ( يصيح بصوت عال ) موية موية .... يا إخوانا.
هبشة : شوفو لينا موية بسراع ... ولا زم تكون موية صحة ... شيخنا دا
ما هو هين.
( يسمع صوت من الخارج ).
الصوت : ( يرد ) ياخوي أنت عايش وين ؟نحنا لاقين موية نشرب عشان
نسقيكم موية صحة؟!!.
قرضمة : ( للصوت ) كان مافي موية صحة ... جيب موية من التلاجة.
( صوت شهيق الشيخ يزداد علوا)
فللي: (بقلق لزملاءه) الزول ده ماكل شنو!!..عشراقة دي واللا ابو
الشهيق ؟
ملقاط : ( للصوت) طيب موية م الماسورة مافي ؟.
هبشة : ( للصوت ) عندك كوز ؟ ... كان ما عندك كوز ... هاك كوز
الصوت : ( ينهرهم) كوز في عينك منك له ... الموية قاطعة ليها يومين
يابجم والأزيار والتلاجات فاضية .
الهمباتي : طيب .... جنبك دكان واللا سوبر ماركت ؟
الصوت : شكلكم كده من الجماعة الخاربين الواطا.. روحو ..زي ما
قلعتم حقنا في الدنيا ... ما تلقو نقطة موية في الآخرة.
كشحة : ( للصوت بتهديد واضح ) هيه يازول ..إتأدب ! ...أنت عارف إنت
بتكلم منو ؟.
الصوت : ( باستهزاء) بكلم منو يعني... غردون باشا ؟..عصابة حرامية
ونصابين.
قرضمة : ( للصوت وقد اخرج هاتفه ) لا لا...دا أنت بالغت عديل ... لازم
يجو يأدبوك .
الصوت : لا....أرجاني....... امرق ليك أنا أحسن.
( التلاميذ ينظرون إلي بعضهم وقد تملكهم الرعب فيسرعون
بإغلاق الستار ).
يتبع :3
الدمازين في : 30/08/2015م.
محمد عبد المجيد أمين (براق)
mailto:[email protected]@yahoo.com
أحدث المقالات
- البرلمان السوداني و تخريفه السياسي بقلم بدوي تاجو 08-30-15, 05:02 AM, بدوي تاجو
- أنين بائعة الهوى . . في دولة الحرائر بقلم اكرم محمد زكى 08-30-15, 04:59 AM, اكرم محمد زكى
- إلى كتائب القسام في الحرب القادمة بقلم د. فايز أبو شمالة 08-30-15, 04:57 AM, فايز أبو شمالة
- الزول الوسيم: كاتال في الخلا عقبان كريم في البيت (المقال الخاتم) بقلم عبد الله علي إبراهيم 08-30-15, 01:28 AM, عبدالله علي إبراهيم
- التميزيون الصغار يمتنون على السودان الشمالي بقلم بدوي تاجو 08-30-15, 01:24 AM, بدوي تاجو
- لماذا تظلمون الأطباء (1) بقلم عميد معاش طبيب سيد عبد القادر قنات 08-30-15, 01:23 AM, سيد عبد القادر قنات
- دارفور ليس ملكأ لتجاني سيسي يا أمين حسن عمر بقلم محمد نور عودو 08-30-15, 01:21 AM, محمد نور عودو
- الإنشطارات السيـاجتماعية تهدد مصالح الجميع بقلم نورالدين مدني 08-30-15, 01:19 AM, نور الدين مدني
|
|
  
|
|
|
|
محمد عبد المجيد أمين(عمر براق)
فيس بوك
تويتر
انستقرام
يوتيوب
بنتيريست