|
|
 (قرنتية) ما انتفاضة شعبية
|
بسم الله الرحمن الرحيم
الى شاعرنا الكبير الاستاذ / هاشم صديق
كل كلمة خطها قلمك كانت تغوص فى الاعماق وتشتل الافراح لتوزعها فى دواخلنا .
ولقد قرأت لك قصيدة ( قرنتية ) وكانت معبرة لما يجرى فى السودان ، و رائعة
روعة السودان القديم والذى مازال يسكن الدواخل ويؤمن بالمستقبل الباهر . لذلك
قررت ان ارد على قصيدتك علنى اجد مساحة لهذا المزارع البسيط ، و ربما له اسره
كبيره يربيها من هذه المزرعة والتى كان لزاما عليه ان يدافع عنها وعن مصدر
رزقها .
(قرنتية) ما انتفاضة شعبية
(قرنتية) ما انتفاضة شعبية
ما مرضانة بالسارس
ولا فشلت تجيب الكأس
ولا كابوى جاي من تكساس
قرنتية
باين عليك ضهبانة
جيتى زمن القبلية والجهوية
زمن التهميش والعنجهية العنصرية
قرنتية
كان بس تقولى :-
شايقية
او جعلية
او دنقلاوية
ما كان اعتقلوك جبرية
ولا غدروا بيك المزارعية
ولا وزعت لحمك
المحلات التجارية
وكان عالجوك
فى المانيا الاتحادية
او الاردن الملكية
قرنتية
باين عليك نسيتى
اصدقاء الطفولة
القرد والزراف
وصاحبتنا القميرية
ما فاكره زمان لعب
الطفولة فى العصرية
طفلا صامت الدهرية
قدر الزمن
بقى اهم
زول فى الجمهورية
وكان كتب ليك
وريقة بس
يجيك برسيم من
امريكا اللاتينية
ويوظفوك فى الخارجية
ويبعثوك كندا او امريكا الشمالية
قرنتية
(قرنتية ) ما انتفاضة شعبية
ما مرضانة بالسارس
ولافشلت تجيب الكأس
ولا كابوى جاي من تكساس
قرنتية
ما حكمت الناس بالجور
ولا قفلت سودان مونتور
ولا دمرت اقليم دارفور
ولا حرقت لحاكم بخور
ولا بدلت الدين بالكجور
قرنتية
ماقتلت طلاب العيلفون
ولاغشت الناس بالدقون
ولاسحقت المهمشين بالمنون
ولا كذبها صار
ضرب من الفنون
قرنتية
(قرنتية) ما تبقى عندية
وصلى على الحبيب (ص)
انت اصلوا
ما ودوا ولدك
خدمة الزامية
ولا جاك خبر
ولدك شهيد
وعرس ليه حورية
وزغردة امه ضهرية
قرنتية
ولا جاك شيخ الجماعة
بعد حداشر سنة
يقول :-
ولدك مات فطيس
واكلته البراغيث
ومدفون مع المطاميس
قرنتية
ما تبقى عندية
انت اصلك ما عارفه
الجبهجية
وما جاتك فواتير كمية
ناس الزكاة
وناس الضرائب
اشكال وانواع
مرة شباب الوطن
مره الشريعة
ومره الجهادية
قرنتية
عفوا
انا ما غلطان
ولا بهاجر من السودان
ولا بخاف من اللمان
ولا بكتب استرحام للكيزان
ولامسئول عن دم
قميص عثمان
والله اعلم
كم حزنت كمان كمان
قرنتية
نصر الدين حسين دفع الله
|
|
 
|
|
|
|
فيس بوك
تويتر
انستقرام
يوتيوب
بنتيريست