|
|
|
 Re: ود وبت الجيران.. (Re: عادل جبارة)
|
أنا عارفاه بس مابقول ياواسبه..
عارفاك ماشي تفتشه بالمسنجرات..
اهه ماطلع عادل جباره..
واكيد ما عادل سـمير..
وأؤكـد ليك ما عادل هميم
أوبس...
أوعي من الوزنة الأخيرة دي 
| |
 
|
|
|
|
|
|
|
|
Re: ود وبت الجيران.. (Re: عادل جبارة)
|
Quote: (عدل بواسطة ismeil abbas on 01-03-2007, 04:57 م)
(عدل بواسطة ismeil abbas on 01-03-2007, 04:58 م) |
إسماعيل عباس
عدَّلْت شنو ياالخفيف ؟؟
| |
|
|
|
|
|
|
|
|
|
Re: ود وبت الجيران.. (Re: هاشم أحمد خلف الله)
|
يسعد صباحاتك يا منى ..
هذه أول فاجعه فى حياتى .. وكانت عن بت الجيران !
أمدرمان 1969م .. صبيه كأنها من عالم الأحلام ! أميره أسطوريه هبطت على سماء المدينه .. فنثرت عطرها وعبيرها الخرافى على سماء أمدرمان .. فتغنت على أنغامها الحمامات والعصافير , وزغردت !
ثم ذهبت بلا رجعه .. وتوارت عن الأنظار .. لكنها لم تتوارى عن الأخيله , ولن تغادر !
كانت فى السنه الثالثه إقتصاد جامعة الخرطوم ! بينما كنت فى السنه الأولى وسطى !
هى فى العشرينات وأنا طفل فى الثانيه عشر ! ... وكانت ثمة علاقه بيننا يا منى ! ويا لها من صداقه !
ويا له من حب أزلى إلى حد الوله ! .... تأتى إبتسام من الجامعه كل خميس .. وسرعان ما ترسل إخوتها
أصدقائى الصغار لمناداتى .. ثم تبدأ عطلة الإسبوع الخرافيه المشوبه بذلك الصفاء والنقاء والإخاء
والإخاء الأسطورى .... يالها من أيام يا منى ... معليش أعذرينى .. سأتوقف هنا ولكننى حتماً
سوف أعود لنواصل .....
| |
|
|
|
|
|
|
|
|
|
Re: ود وبت الجيران.. (Re: مامون أحمد إبراهيم)
|
القصة دي منى للوليد البكاي  ..
Quote: يجلس طول الوقت تحت نيمة قرب بابها.. ينتظر ان تخرج
ليتبضع بنظرة تجعل يومه جميلا..حتى فتحت الباب
يوما تطلع اليها منشدها وماخوذا.
نظرت اليه وقالت له: يا هناي النبي كان ما
جريت اشتريت لي كبريتة.! |
من بوست قصص قصيرة
| |
|
|
|
|
|
|
|
|
|
Re: ود وبت الجيران.. (Re: مامون أحمد إبراهيم)
|
Quote: هى فى العشرينات وأنا طفل فى الثانيه عشر ! ... وكانت ثمة علاقه بيننا يا منى ! ويا لها من صداقه !
ويا له من حب أزلى إلى حد الوله ! .... تأتى إبتسام من الجامعه كل خميس .. وسرعان ما ترسل إخوتها
أصدقائى الصغار لمناداتى .. ثم تبدأ عطلة الإسبوع الخرافيه المشوبه بذلك الصفاء والنقاء والإخاء
والإخاء الأسطورى .... يالها من أيام يا منى ... معليش أعذرينى .. سأتوقف هنا ولكننى حتماً
سوف أعود لنواصل ..... |
مشيت وحرمتنا من الحكي الجميل..
ممكن ترجع لينا?
| |
|
|
|
|
|
|
|
|
|
Re: ود وبت الجيران.. (Re: عادل جبارة)
|
| Quote: الحمد لله الذي جعلني من العادلون أو العادلين ما عارف المهم .. ليس العادلات |
الناس الذي سبت دودو دي ما تخلي ليها غلطة تمشي..
خلاص العادلين
| |
|
|
|
|
|
|
|
|
|
Re: ود وبت الجيران.. (Re: bayan)
|
انتي يــا بيـــان بتــغطســي وييييييين وتجــي ناطه كــده ?
ثــم ثانيا I DONT CARE ABOUTاللغة العربية ده موضوع عادل جبارة باعتباره
من العادلـــين أنــا موضوعـــي ما جاوبتي على سـؤالي ليـه ?
هســه أقــوم أشــاكل ? أصــلوا في زولة حنباكــة وشـكالة كـده
عادتــني وبقــيت كــان زول قال لي ازيــك أشاكله . ( وش وخلاس)
أهـا تعالي بعــد بكــره ردي علي المداخلة ومسكنا التايم !!
منــى كيــفك العــدد لســع يحـسسك انــه في غتــاتة وتــردد
وطبــعا كـله من بيــان حســع لــو أخــدت الموضــوع
بـروح ريــاضـية كـنا حســع حنكون في الصـفحة الرابــعة .
وبــرضو راجــين
صــــلاح واســبه
| |
|
|
|
|
|
|
|
|
|
Re: ود وبت الجيران.. (Re: bayan)
|
صاحبي كان متيم ببنت في حينا
قال لي اعمل شنو عشان تحبني واحبها
قلت ليهو اكتب جواب
قام كتبو وشالو ومشى عديل لبيت الزولة دي ... وكان داخلة فيهو حتة رجفة
دق على الباب ... جاتو ليك هي زاتها
إتكبكب شديد وقال ليها
بالله أدي الجواب ده لعماد أخوك
| |
|
|
|
|
|
|
|
|
|
Re: ود وبت الجيران.. (Re: حيدر حسن ميرغني)
|
حيــدر والله دي مبــالغة
والله ضحــكتني واتخيلت الأحــداث بعداك والنتائج
بــس هــل صحــيح حــصــلت يـا حــيدر ولا نكــتة ?
دي ذكرتني بنكتة الراجل الأكــال أبو لقــمة كبيرة وكان بياخد
راحــته في الأكــل وهـو ضــيف عند نـاس والنــور كــان قــاطع
وفجــأة وهــو مـاســك اللقــمة النور ولع قــام قــال لـيهم
ويــنو كــلبكم ?
تحــياتي
صــلاح واســبه
| |
|
|
|
|
|
|
|
|
|
Re: ود وبت الجيران.. (Re: حيدر حسن ميرغني)
|
حــيدر
كنت أنصــار ســنه وتقــول لي الراجل أكتب ليها جــواب
الليلة جبت لي روحك الهوا جماعتك حيجو ناطين ليك حسع (watch)
غــايتو اتخــايل لي كنــت مشــروع أنصار ســنه
انت بس قول كــده وأنــا بدعــمك بقــوة (وش ضاحك)
أبقى طيب
واســبه
| |
|
|
|
|
|
|
|
|
|
Re: ود وبت الجيران.. (Re: Salah Waspa)
|
الأستاذة منى
البوست شيق ويثير في النفس أشجان وأشجان وإن كان الخوف من عواقب البوح في مثل هذه البوستات تجعل الواحد يفكر مرتين في الموضوع
أحببتها في السنة الثالثة متوسط وأحبتني في السنة الثانية ثانوي وتزوجت في الإجازة قبل ما ننزل ثالثة وكانت النتيجة أن توقفت عن الدراسة ستة شهور
سأتوقف هنا وقد أعود ولو ما رجعتا شوفوني وين وأسألوا عني
| |
|
|
|
|
|
|
|
|
|
Re: ود وبت الجيران.. (Re: Salah Waspa)
|
منـــو اللذيذة
مساء الخير ، ، ،،،
كيفنك يا( بنت الجيران ) ، اها شفتي الزول التحت ده عنده جنس قصص مع بنات الجيران ، غايتو كان ما قالها أنا براي بقولها واليحصل يحصل موت موت حياة حياة .    وبيشهد معاي كمان أمير الجمري وعادل جبارة .
| |
|
|
|
|
|
|
|
|
|
Re: ود وبت الجيران.. (Re: عماد محمود علي)
|
| Quote: كيفنك يا( بنت الجيران ) ، اها شفتي الزول التحت ده عنده جنس قصص مع بنات الجيران ، غايتو كان ما قالها أنا براي بقولها واليحصل يحصل موت موت حياة حياة . وبيشهد معاي كمان أمير الجمري وعادل جبارة . |
عمده هاك أضنيني..
يللا حـدثني
| |
|
|
|
|
|
|
|
|
|
Re: ود وبت الجيران.. (Re: حيدر حسن ميرغني)
|
قلت ليهو اكتب جواب
قام كتبو وشالو ومشى عديل لبيت الزولة دي ... وكان داخلة فيهو حتة رجفة
دق على الباب ... جاتو ليك هي زاتها
إتكبكب شديد وقال ليها
بالله أدي الجواب ده لعماد أخوك
صلاح
والله دي حصلت بالجد
خوفي الجماعة هنا يجو يقولو لي ده أنت زاتك
مع إنو أنا كنت الزمن داك أنصار سنة
ياربي?
| |
|
|
|
|
|
|
|
|
|
Re: ود وبت الجيران.. (Re: Muna Khugali)
|
صباح الورد
Quote: دي ذكرتني بنكتة الراجل الأكــال أبو لقــمة كبيرة وكان بياخد
راحــته في الأكــل وهـو ضــيف عند نـاس والنــور كــان قــاطع
وفجــأة وهــو مـاســك اللقــمة النور ولع قــام قــال لـيهم
ويــنو كــلبكم ? |
بمناسبة اللقمة الكبيره..قالوا واحـد سـوداني كان معزوم عند واحـد مصري غـدا..
بعدين السوداني راح شال لقمه كبيرة من صحن الأكل وجواها كان في لحمه..
وبعدين كرر نوع اللقمة دي..
المصري استغرب واتضايق..وقال ليه...
إنت بتسرق اللحمة ليه?
الأكل ده كله إحنا عاملينه علشانك 
ح انا حكيت قصة من قصص ولاد الجيران..وين قصتك?
| |
|
|
|
|
|
|
|
|
|
Re: ود وبت الجيران.. (Re: Salah Waspa)
|
دا سؤال بمليون دولار
لآنه الناس هنا دي كلها بتكون بتسأل سؤال وينو كليكم؟
عشان كدا مافي زول حيكي اي قصة
رعبا وخوفا...
ققررققرقرقرر@ الناس حيقولو دا انا
يا حيدر قلنا وانتهينا
بعدين ايه يعني انصار سنة
ما عنده قلب ديل بالذت قلبهم فيه اربعة غرف..
بان وعليك الامان يا عطبراوي..
شكرا ليكم ضحكتوني الليلة
| |
|
|
|
|
|
|
|
|
|
Re: ود وبت الجيران.. (Re: bayan)
|
Quote: والله دي حصلت بالجد
خوفي الجماعة هنا يجو يقولو لي ده أنت زاتك
مع إنو أنا كنت الزمن داك أنصار سنة
ياربي? |
كل شئي وارد ؟؟؟؟
| |
|
|
|
|
|
|
|
|
|
Re: ود وبت الجيران.. (Re: Salah Waspa)
|
بت الجيران ...
فصل من مسرحية صامتة في حياتنا
أجمل أوقاتي كانت لما تقطع الكهربا في وقت (المسلسلة) - ابوها كان عندو عربية ولما الكهربا تقطع بيطلع بطارية العربية يشغل بيها التلفزيون – حضور المسلسل عندهم كان ليهو لون وطعم ورائحة.
أجمل أيامي – يوم صرف سكر التموين في دكان التعاون – الكلام ده في بداية التمانينات يعني ما تقولوا الزول ده عجوز
أجمل الشهور شهر رمضان لما كنا بنمشي نجيب التلج مع بعض – كانت فرصة تكون فيها عنتر زمانك فتاتيها منتصرا وانت تحمل كيس التلج من وسط الزحام ولسان حالك يقول: عبلة تناديني فالحديد لا يقاويني
اما أيام العيد فكانت عيد فعلا – أيام لا نخاف فيها من عين الرقيب وندخل ونطلع زي ما عايزين
الغريب في الأمر انه كل شيء كان بيتم على الورق - تشتري كتاب أجمل الرسائل من المكتبة وحزمة ورق رسائل ملونة وكل مرة تكتب جواب – الرد كان عبارة عن ابتسامة عريضة لما تلاقيك بعدها – الواحد بينبسط ويمشي يفكر في موضوع الرسالة التانية – ما حصل قلت ليها كلمتين على بعض شفتو الجبن ده كيف.
استمرت الحياة جميلة إلى ان فاجأني يوم اكتشفت فيه انها أصبحت عروس وانا لسه بيدوني مصاريف المدرسة
لكن برضو كانت روحي رياضية عملت كل ما طلب مني من مراسيل في فترة العرس وفي الحفلة كنت مبسوط وقعدت لحدي ما لمينا الكراسي
نقطة – سطر جديد – بنت جيران أخرى
أيام ليتها تعود
| |
|
|
|
|
|
|
|
|
|
Re: ود وبت الجيران.. (Re: Muna Khugali)
|
منى ......... انت حكايتك دي ما صدقتها قولي الحقيقة قاعدة تقرري في الناس وتقرقري من الضحك انا بعدك لما نتي تحكي الصح صح انا ح اقول ليك حكايتي بس ما منتظرك .
احي صديق الموج حسيت انو صديق جد جد كانت حكايتو مضبوطة الايقاع
الدكتورة بيان كلامها نص نص بس صدقت انها اتربت مع الاولاد لأنها مرة كدا شتت لي قلت دي لو بتعرفني اكيد بتديني بونية ولا شلوت معذرة ومحبة يا دكتورة بجد لانك رائعة وأقراء لك بس منتظر بعد الجدادة الحمراء وماليزيا صدق في حب ود الجيران كدي كدا فتش الذاكرة.
الاخ ولد الرجة ود الراحات داك خالد سعيد انا حاسي بيك لأني بحب عطبرة وحبيت في عطبرة برضو بت جيران خالتي الانهي من الاعلاميات المشار اليهن.
تحياتي للجميع ولك ام آية ولروائعك.
| |
|
|
|
|
|
|
|
|
|
Re: ود وبت الجيران.. (Re: الرفاعي عبدالعاطي حجر)
|
| Quote: الاخ ولد الرجة ود الراحات داك خالد سعيد انا حاسي بيك لأني بحب عطبرة وحبيت في عطبرة برضو بت جيران خالتي الانهي من الاعلاميات المشار اليهن. |
الرفاعي بالله دا انت(قلب بيدق بشدة)
اها بمشي واجي عشان واسبة دا احكي ليكم قصة ولد بت اخت جارتنا الرفاعي..
في الدرجة البيتهم جنب الفندق ..
| |
|
|
|
|
|
|
|
|
|
Re: ود وبت الجيران.. (Re: bayan)
|
Quote:
الرفاعي بالله دا انت(قلب بيدق بشدة)
اها بمشي واجي عشان واسبة دا احكي ليكم قصة ولد بت اخت جارتنا الرفاعي..
في الدرجة البيتهم جنب الفندق
----------------
بيــان لكــن ما ســليييتي روحــنا دي
بعــد ده أنا بمشــي أنــوم ياخ الساعة أربعة صباحا
خليتونــا زي الجماعة ال homeless
صــلاح واســبه
| |
|
|
|
|
|
|
|
|
|
Re: ود وبت الجيران.. (Re: د.محمد حسن)
|
Quote: بنت الجيران
كانت اكبر مني في السن
ولها الفضل
فقد علمتني كيف اتذوق طعم فاكهة الجنة
الله يديها العافية |
اها طعمها كيف يا دكتور ؟؟؟
والله شيلو شيلتكم ؟ بت خوجلي دي , قاعدة ليها في راي ؟
| |
|
|
|
|
|
|
|
|
|
Re: ود وبت الجيران.. (Re: د.محمد حسن)
|
والله ماطالبني حليفة زي مابتقول عمتي ست نور!
أنا البوست ده فرحانه بيه لأنكم فيه حلوين شـديد.. وبضحك معاكم زي المجنونه
وزي ليه?!!
عايني يا بيان حركات الجماعة الميل male دي كيف?
الرفاعي أخـوي أكي وفضفض وكمبيوتر البيت عطله الأيام دي ..
وعايني عبدالطيف بس خلانا وفات
والباقين كلهم جو مرة وزغبروا..
ياربي مالهم?
وانت يا حيدر..
في زولي بقي أنصار سنه ويخليها?
ياخ الناس بتمشي الحج لتشهد منافع لها!
ولا لقيت الإلتزام بأربعة ماكفاية?
ولا ياربي الأربعة نجضنك?
| |
|
|
|
|
|
|
|
|
|
Re: ود وبت الجيران.. (Re: Muna Khugali)
|
منى
بعد ناس السعودية اوقفو الكنجالات الحالة بقت صعبة
يازولة ما يقومو يلحقونا التوج
انا كنت بصلي في مسجدهم في الدرجة
وبطلع خايف جدا من عذاب النار عشان كده كتلو قلبي لحدي ما شيبت والجكس بقى يقول لي يا عمو
| |
|
|
|
|
|
|
|
|
|
Re: ود وبت الجيران.. (Re: حيدر حسن ميرغني)
|
الحكاية يا أخوانا بتختلف من منطقة لأخرى
نحن فى امدرمان ما كنا بنحب بنات الجيران , لأنه شبه ممنوع
بالعكس كنا بنخاف عليهم ونوصلهم ونجيبهم من المدارس
بنات الجيران ممكن يكونوا من الاحياء المجاورة ما بعيد يعنى
لأنه بت الجيران دى تعتبر أختك
صحى كنا بنريدهم شديد وبنخاف عليهم وقف .
عايزين نعرف ما يحدث فى مناطق اخرى من العاصمه وخارجها ..
وعايزين برضه نعرف الفترات , وممكن نسميها ببعض الموضات والتقليعات التى لازمت الوقت,
ده لو خايفين تكشفوا اعماركم ..
يعنى أيام الشارلستون والقجه , ولأ أيام تحرمنى منك .. ولأ ايام سنتر الخرطوم
| |
|
|
|
|
|
|
|
|
|
Re: ود وبت الجيران.. (Re: د.محمد حسن)
|
Quote: بنت الجيران
كانت اكبر مني في السن
ولها الفضل
فقد علمتني كيف اتذوق طعم فاكهة الجنة
الله يديها العافية |
سجمممممنا واسبة هجمنا يا دكتور
اجري امسح الكلام دا..
بكرة تلقى منى خوجلي واسبة
ختوه ليك..
الناس دي هنا بتدردق في الناس
عشان الانتخابات قربت..
| |
|
|
|
|
|
|
|
|
|
Re: ود وبت الجيران.. (Re: bayan)
|
الدكتورة الحبيبة بيان
ليك وحشة
من المعروف ان بيل كلينتون في ولايته الاخيرة كان سبب فوزه في الانتخابات ان معظم من صوت له كان من الجنس اللطيف
وعندما فاز بالرئاسة
اهدته رئيسة وزراء تركيا في ذلك الوقت ( السمحة شديييييييييييد) ربطة عنق راقية
عشان كدة انا انشاء الله حانزل انتخابات
ولما افوز حانتظر ربطة العنق
ومودتي
| |
|
|
|
|
|
|
|
|
|
Re: ود وبت الجيران.. (Re: د.محمد حسن)
|
Quote: الدكتورة الحبيبة بيان
ليك وحشة
من المعروف ان بيل كلينتون في ولايته الاخيرة كان سبب فوزه في الانتخابات ان معظم من صوت له
كان من الجنس اللطيف
وعندما فاز بالرئاسة
اهدته رئيسة وزراء تركيا في ذلك الوقت ( السمحة شديييييييييييد) ربطة عنق راقية
عشان كدة انا انشاء الله حانزل انتخابات
ولما افوز حانتظر ربطة العنق |
الكرافتة هاك ليها من أسه..
أقولك كلام...
يي ديل تلاته اختار منهمن ولا شيلن كلهن..
بس الرسول تكملنا كلامك..
انتخلبات شنو البنرجاها..
بيان بس دايرة تخوفك ساكت!
وان كان دايرلك قمصان معاهن برضه في..
بس انت كيف تحكي
| |
|
|
|
|
|
|
|
|
|
Re: ود وبت الجيران.. (Re: bayan)
|
Quote: الرائعة ..منى خوجلى
سلام عليكم
وددت ان لو عشت معكم في هذا الفضاء السايبيرى ..
سالت ابوبكر فرصة المشاركة ولم أوفق .. فما كان منى الا ان اعتصرت حزنى بذلك البعد .. وعشتكم اوف لاين ..
قرأت لك كثيرا ..واخرها بتاع بت الجيران دة.. انا ما عايز احكى ليك بتاعى .. لكن يا منى شكلك كنتى مكسرة في ود جيرانكم حتى النخاع .. وما اتزوجتيهو بعد داك .. والا أنا كضاب.. أقصد والا تحليلى ما مظبوط!!
التحية للمجموعة الرائعة المشاركة معاك.. وان شاء الله لو اتيحت الفرصة سادخل عليكم باسم ابوريم .. وللعلم انا موجود بالسودان كما هو ظاهر من العنوان.. |
عاينو ابو ريم ده ظريف كيف?
دي اول مرة يكتب لي بس مالأخيرة..
مش قلت ليكم فرحانه?
Quote: سجمممممنا واسبة هجمنا يا دكتور
اجري امسح الكلام دا..
بكرة تلقى منى خوجلي واسبة
ختوه ليك..
الناس دي هنا بتدردق في الناس
عشان الانتخابات قربت.. |
بيان ماتخوفي محمـد الحسن ياخ..
الزول عنده حكاوي آآآآآد كـده..
ولازم يحكيها لينا..
| |
|
|
|
|
|
|
|
|
|
Re: ود وبت الجيران.. (Re: Muna Khugali)
|
Quote: وانت يا حيدر..
في زولي بقي أنصار سنه ويخليها? |
منى
بعد ناس السعودية اوقفو الكنجالات الحالة بقت صعبة
يازولة ما يقومو يلحقونا التوج
انا كنت بصلي في مسجدهم في الدرجة
وبطلع خايف جدا من عذاب النار عشان كده كتلو قلبي لحدي ما شيبت والجكس بقى يقول لي يا عمو
| |
|
|
|
|
|
|
|
|
|
Re: ود وبت الجيران.. (Re: Muna Khugali)
|
Quote: سيد الاسم
محبوبى وكتين يبتسم
الدنيا ياناااس تنقسم
الفرحه تملاااها وتزغرد فيها والشوق يرتسم
مرااات اقول اديهو كلمه تزعلو
حبة عذاااب وكلااام عتاااب انا عاارفو مابتحملو
علشان اشوف خده الحرير الدمعه جاارية تبللو
لكنى قباال ابدا بلحظااات اقيف اتاملو
الضحكة واللفته البتااخد من عيونى النوم شهور وتجفلو
وانسى العتاااب الكنت ناوى اقوله وارجع منهزم
الدنيا يانااااس تنقسم
الفرحه تملاها وتزغرد فيها والشوق يرتسم
فى العيون ببنيلو دارين من موده ومن منا
بضمه فى قليبى محبه فياااضه وهنا
ماردت غيره ولاهو راد زولا سواى انا
نظراته كيفن اوصفا دى الفى العيون مدونا
همساااته تحنان القمااارى الراجعه للعش والجنا
وتضوى والليل ينهزم
وكتين يبااالغ ويبتسم
الدنيا يانااس تنقسم
الفرحه تملاها وتزغرد فيها والشوق يرتسم
يوم جانا شااايل خطااانا الكايسنه راح
وشااايل الامل فى عيونه والحب والسماااح
ارتحنا من ماشفناهو والليل استراح
ضحكت نجومه وغنى قمره معانا لعند الصباح
لكن بغير والله برجع منهزم الدنيا ياناس تنقسم
الفرحه تملاااها وتزغرد فيها والشوق يرتسم |
تخيلي يا منى كان اسمها منى .... اه عارف الجماعة فتحوا خشومهم واستنوني لكن عند وعدي بعد منى بحكي ليكم .... وانت يا homeless ده ما تمشي تنوم وصباحاتو بيض .... بالد يا د. بيان سليتي روحنا انا كتابتي الاولى حكت حالتي حينها لكن بعد ده رجعت ليكم ابت البطل.
| |
|
|
|
|
|
|
|
|
|
Re: ود وبت الجيران.. (Re: الرفاعي عبدالعاطي حجر)
|
Quote: أما فيما يخص بت الجيران .. فهاك مما يلى طرف الدولاب ..
تجربتى معها ..أكاد اوصفها بانها ثرة .. حلوة .. مليئة بالمفاجات .. فقد سعدت بان كان لى بنات جيران عدة.. لاقامتى في مناطق مختلفة ومتباينة .. في سنى عمرى الاول .. وفي هذه المحطة .. ساعيش مع احدى بنات جيرانى .. والتى حفلت با مرحلة الثانوى.. كنت التقيها كثيراً دون تستثير في شن المراهقة .. كنت احس انى اعرفها جيدا مما يؤكد جهلى بها .. وهذا ما اثبتته الايام .. كانت تصغرن باعوام ثلاث .. بيضاء البشرة على غير عادة بنات الجيران في الحى.. عدم التفاتى اليها اثار فيها تكلم الانثى التى تبحث عن مكان..والتى تبحث عن انسان .. وعدم التفاتى اليها لم يكن تعاليا .. او غرورا .. ولكنه جهلى بها .. والذى دفعه ادعائى بمعرفتها .. كان يوما جميلا .. ان أخبرتنى أخرى منهن ( بنات الجيران) .. باننى طالب ذكى .. فلما سالت عن السبب قالو .. قالو هو كلامى عن ذلك الموضوع .. وحلى لتلكم المعضلة ..وهذا ما قالته فلانة .. انتبهت ان فلانه تتابعنى بعين لا كعيون الاخريان .. ونظرت اليها من زاوية .. أخرة .. فوجدتها هناك ..
نواصل ..
ابو ريم (ست الحريم)
بكل الود ..
اليك .. عزيزتى منى.. |
| |
|
|
|
|
|
|
|
|
|
Re: ود وبت الجيران.. (Re: Muna Khugali)
|
| Quote: قرأت لك كثيرا ..واخرها بتاع بت الجيران دة.. انا ما عايز احكى ليك بتاعى .. لكن يا منى شكلك كنتى مكسرة في ود جيرانكم حتى النخاع .. وما اتزوجتيهو بعد داك .. والا أنا كضاب.. أقصد والا تحليلى ما مظبوط!! |
ابو ريم سلام والله انت قربت من الحقيقة
هي كانت بتقرا في الخرطوم الثانوية ..وعندها نضارة سوداء تمرق من المدرسة تمشي في دكان عم مريغني في شارع 25 العمارات تشرب ليها قزازة ببسي والجماعة اشربو في الهوى تقرطعها كع كع كع ... وكانت عالمة أن صف رغيف الطابونة دا كلو راجي منها نظرة يا ابوهاشم ولكن كج كج كج تمشي علي البيت ... الزول المكسرة في ماكان ود جيران لكن كان ود اهل وساكن بعيد منهم فظلت تغطي بقلبها عليه وهو بعيد وقصت قلوب المنتظرين في شارع 25 العمارات في الهجيرة خروج بنيات المدرسة
أنا صاح يا منى مو كدي
خالد محجوب
| |
|
|
|
|
|
|
|
|
|
Re: ود وبت الجيران.. (Re: الرفاعي عبدالعاطي حجر)
|
شـوف الرفاعي..
زمان أيام كنت في الإعدادي في الكلية القبطية..كان في ولد من الإمتداد أكبر مني شـوية..
هو مامن الجيران بس من الإمتداد.. كان مشترك في نفس بص المدرسة..
الولد ده واسمحوا لي اسميه "بزفت الطين" كان مضايقني جـدا بحركاته..بعدين كان دمه تقيل
خالص..
مرات بص المدرسة كان بيتعطل..وعمك الخليفة عوض خوجلي بيصادف برضه انه مابيقدر يجي يرجعنا..
يعني كان لازم نرجع لوحدنا او مع زميلاتنا بالمواصلات..
طبعا من المدرسة للمواصلات كان مشوار بتاع ربع ساعة...
في إنتظار بص المدرسة أوأثناء الإنتظار للعربيه ...زفت الطين كان بيتنيل علي عينه يقيف قدام المدرسة يعاين..وطبعا دي كانت حركات اولاد الكلية القبطية بنين وجمال عبـد الناصر..
وفي مره مرتين من المرات.. لما كنا بنمشي نركب فيها المواصلات.. بقي يضايقني بالمشي وراي والمعاكسة..اتضايقت منه شـديد وأول ما وصلنا وسط زحمة لقيتها فرصة قويه اهزئه فيها..
وأوبخه قـدام الناس علي معاكسته مستعملة خطابة ذلك الزمان..
مامكسوف علي دمك تعاكس في بنات الناس..
ماشي ورايا ليه من قبيل انت ماعنـدك أخـوات..
وطبع أفظع شتيمة تكون..
يا أخي امشي ذاكر وانجح بدل العوارة دي..
صـاحبنا اتهجم من موقف الفضح ده قـدام الناس..وقرر ينتقم من بت حلته
تفتكروا ياجماعة يا الراجيين حكايتي عمل شنو?'
أسألوني وبوريكم..
لأنه عمل عملة يستحق فعلا ينادوه بيها زفت الطين
| |
|
|
|
|
|
|
|
|
|
Re: ود وبت الجيران.. (Re: Muna Khugali)
|
منييين ياحسرة؟
الجيران "دا" ما عمّي زاااتو
أبوي حمد.. كما كنا نناديه.
كان يمشي كأنما ينحطّ من صبب
في أرنيق" بيته سوط عنج وسيف وبندقية أبو روحين.
لم يكن يبتسم ...
ولم تكن لديه بنات.
-----------------------
تسلمي يا منى على البوست ... المختلف!
-----------------------
* تقصدي جيرانّـا ولا ممكن يكونوا جيرانـ هم؟
| |
|
|
|
|
|
|
|
|
|
Re: ود وبت الجيران.. (Re: محجوب البيلي)
|
الرائعة منى خوجلي،،،
لك التحيايا
اول مرة الواحد يقدر يعبر عن اعجبابوا بكتاباتك،
كنت ولا ازال من المتابعبن باستمرار لكل كتاباتك واخيراً بعد ما منحنا بكري الجنسية،
والاذن للكتابة قلته بداية كدة الواحد يقول ليكي متابعين
ويشكرك على الكتابات الرائعة وانا لسه واحد من القراء من خارج اعضاء المنبر..
تحية واعجاب
| |
|
|
|
|
|
|
|
|
|
Re: ود وبت الجيران.. (Re: بركات بشير نجار بشير)
|
Quote: بيان ماتخوفي محمـد الحسن ياخ..
الزول عنده حكاوي آآآآآد كـده..
ولازم يحكيها لينا.. |
هاهاهاهاهاهاها
افو افو افو من البخاف يا منى يا حبيبتي؟
لالا يا زولة دا راجل "شداع"
جدا...
لاحظتي انه اولاد عطبرة كتار هنا
يا ربي ليه؟
عشان عندهم جيران كتار..
خالد منسى
ياخي مرة واحدة دقيناك خلاص مسكتها لينا..
يا جامعة خالد دا جاري في الكنبة
يعني انا بت جيران كنبتهم في الفصل..
| |
|
|
|
|
|
|
|
|
|
Re: ود وبت الجيران.. (Re: bayan)
|
Quote: خالد منسى
ياخي مرة واحدة دقيناك خلاص مسكتها لينا..
يا جامعة خالد دا جاري في الكنبة
يعني انا بت جيران كنبتهم في الفصل.. |
وبرضه يابيان هو كان بيبيع البيبسي في الدكان..
يعـد في جغمات البنات لليبيبسي..
الشي شنو خـالد?
إنتي يابيان..
Quote: لاحظتي انه اولاد عطبرة كتار هنا
يا ربي ليه؟
عشان عندهم جيران كتار.. |
صحي أولاد عطبرة كانوا بيدسوا الجوابات في عجل العجلات?
 
| |
|
|
|
|
|
|
|
|
|
Re: ود وبت الجيران.. (Re: Muna Khugali)
|
العجلات دي عنده قصص سمحة
قالو واحد شاف ليك بنات
يلا قام يتلاعب في العجلة يقيف ويقعد ويزح كرعينو من البدال
بس قوم كدي يا والولد انبرش قدام البنيات
قام رفع العجلة بيدينه فوق وقاليهم موش حركة؟
عندي صاحبتي كانت بتحب ولد
اها الولد جاري عجلتو وماشي وراها شوية عشان ما يظهرو ماشين
مع بعض بس اخوها الما يغباها ظهر نهاية الشارع..
اها صاحبتي اتجهجت شديد
بس اخوها جا جاري يا فلانة الولد دا قاعد يشاغل فيك؟
لقت نفسها في محك صعب شديد
لو قالت ما بشاغلها معناها بتتكلم معاه ولو قالت بشاغلها
اخوها كتال كتلة..
قامت سكتت
بس اخوها طيران على الحبيب
قاليه بتشاغل اختي وطاخ بنية انهت تلك العلاقة وقتلتها في ساعتها الى الابد...
وهي بقت تقول لاخوها لاي يا فلان ما تدقو
الزول دا ما قالي حاجة
في ما بعد قالت دا احرج موقف مر بيها في حياتها..
| |
|
|
|
|
|
|
|
|
|
Re: ود وبت الجيران.. (Re: bayan)
|
بيان
عجلات زمانا داك تلقي الواحد كاتب فيها
يا فتاتي
يا احلى من عيني
وحاجات كده
وكنا نردف البنات (اخواتنا وبنات جيرانا) في العجلة لا بوليس ولا جن احمر يوقَفنا
| |
|
|
|
|
|
|
|
|
|
Re: ود وبت الجيران.. (Re: حيدر حسن ميرغني)
|
| Quote: وكنا نردف البنات (اخواتنا وبنات جيرانا) في العجلة لا بوليس ولا جن احمر يوقَفنا |
ايوا
داك ما الحب قبل زمن الكوليرا
انا مرة جاتني ازمة شديدة
اها اخوي عادل ردفني للمسشتفى لانه ما كان في زول..
الدنيا كانت سمحة
| |
|
|
|
|
|
|
|
|
|
Re: ود وبت الجيران.. (Re: حيدر حسن ميرغني)
|
Quote: عجلات زمانا داك تلقي الواحد كاتب فيها
يا فتاتي
يا احلى من عيني
وحاجات كده
وكنا نردف البنات (اخواتنا وبنات جيرانا) في العجلة لا بوليس ولا جن احمر يوقَفنا |
يا حليلكم وحليل أيامكم في أتبرا!
| |
|
|
|
|
|
|
|
|
|
Re: ود وبت الجيران.. (Re: محجوب البيلي)
|
Quote: منييين ياحسرة؟
الجيران "دا" ما عمّي زاااتو
أبوي حمد.. كما كنا نناديه.
كان يمشي كأنما ينحطّ من صبب
في أرنيق" بيته سوط عنج وسيف وبندقية أبو روحين.
لم يكن يبتسم ... |
محجوب البيلي
عارف أنا قلت لزول حب اولاد العم والعمات والأخوال والخالات ..زي حب ود وبت الجيران..وزي
البتحب اخوك ولا أختك..ده طبعا إفتراض!
وبعدين لو علاقة زي دي اتطورت لزواج(طبعا ده افتراض قائم علي الإفتراض الأول)
مابيكون في جديد جه للزول ولا لأسـرته..كيف الكلام ده?
مثلا قول أنا كنت أصغر من أولاد الجيران..
وانا وواحد فيهم حبينا بعض..
فين الجـديد هنا?
مافي نسب جـديد..نعرف فيهو ناس 'جـداد' وحياة جـديده..
حتي الأهل ياهم ذاتهم و نفس الأكل والأصوات ودفرة الباب لما يجوك في الصباح.. ولا حتي ساعة القيالة
ديك لمن تكون زهجان!
وبعدين لو عرسـت كمان من ببت ناس سـكينة..ماتقدر تضرب غنمابتهم لما تجي تدخل وتاكل الزرع..
لأنه ده ممكن يؤدي الي مشكلة كبيرة..بإعتبار انه ده تصرف فيه اهانه.. فالغنماية دي عضو نشط وتمد
الأسرة بمنتجاتها المختلفة ..
يبقي لازم نحترم الغنماية علشان خاطر النسب..
شفتوا كيف?
وبعدين الحباه برضه بتكون مكشوفة علي الآخر.. لا في اسرار ولا حركات صعبه..
وبعدبن لو حبيت تعمل حركات فلهمة كده...يجيك واحـد منهم بقول ليك
علينا احنا?
الله يرحم ايام زمان لما كان وكان..
وبعدين كمان لو الواحدة عايزة تنقص من عمرها 5 ولا 10 سنين عبشان تكون أصغر..ماتقدر..
يقول ليها زوجها ولا أهله..
الكضب شنو انتي مولوده سنة كده ويوم كـده..
طيب مش أحسن زواج الأغراب?
بصراحة زواج الأهل والجيران ممـل خالص!!
وماتتسوا..كله قايم علي افتراض
| |
|
|
|
|
|
|
|
|
|
Re: ود وبت الجيران.. (Re: Muna Khugali)
|
نسانا حبيبنا الما منظور ينسانا
يا حليل الجيرة الما قدر عشانه
ياناس أنا ود الحلة
عاشق وحياة الله
جاري وأنا جارو
ياأحلى جارة
ياأحلي جارة
والنبي وصى على الجار
مليون سلام يابت جاره
| |
|
|
|
|
|
|
|
|
 Re: ود وبت الجيران.. (Re: Muna Khugali)
|
Quote: انا أول مرة احب كان عمري 5 ولا 6 سنوات..وكنت بحب خالي..
وكلمته بحبي لما جه مرة اداني قروش وحلاوة..وكانت لحظة المكاشفة لما سألني عايزة لما تكبري
تعملي شنو..
قلت ليه عايزه أعرسك .. وجريت اتدسيت! |
خجل ام العروس
| |
|
|
|
|
|
|
|
|
|
Re: ود وبت الجيران.. (Re: Muna Khugali)
|
كان فى اتـنيـن فى حلتنا زمان بحبو بعض
كل ما البت تجى ماشة فى الشارع الاولاد
ينادوا ليها بتحت تحت ويقولو يا H آتش
اشارة الى صلاح حبيبا ( بليدين فى الانجليزى ) كمان
عشان كدا بنات الجيران كانو بخافو يحبو ود الجيران
وكمان فى حلتنا زمان كان فى تلاتة شوارع
- شارع البايركس
- شارع وكالات الانباء ( وديل بتاعات خبارات )
- شارع الكريمات ( ديل اخطر بنات ) لو حبيت ليك وحدة
طوالى بتقول ليك عايزة لي علبة ديانا
وا وا وا
| Quote: كـدي الننتظر اولاد وبنات الإمتداد.. |
ديل كمان كان بيجو يحبو فى الصحافة
عندى صاحبى برضو زمان كان كاتب حرف حبيبتو فى السفنجة ( لا موأخذة )
لما سالتو ليه فى السفنجة قال لي عشان لما نكون جاكين سوا واقيف
اتشطف فى مزيرة حبيبتى تشوف الحرف
| |
|
|
|
|
|
|
|
|
|
Re: ود وبت الجيران.. (Re: عبد الدائم سيد أحمد)
|
Quote: وكمان فى حلتنا زمان كان فى تلاتة شوارع
- شارع البايركس
- شارع وكالات الانباء ( وديل بتاعات خبارات )
- شارع الكريمات ( ديل اخطر بنات ) لو حبيت ليك وحدة
طوالى بتقول ليك عايزة لي علبة ديانا |
أسه حلتكم تكون شـوارعها زادت تخصصها ياعبد الدائم سيد أحمد
آخر مره مشيت اجازه كان في شنو جديد?
اليوم داك أولاد الامتداد قالوا اولاد وبنات الصحافة كانوا بيجوا يحبوا في
الإمتداد
Quote: عندى صاحبى برضو زمان كان كاتب حرف حبيبتو فى السفنجة ( لا موأخذة )
لما سالتو ليه فى السفنجة قال لي عشان لما نكون جاكين سوا واقيف
اتشطف فى مزيرة حبيبتى تشوف الحرف |
| |
|
|
|
|
|
|
|
|
|
Re: ود وبت الجيران.. (Re: طارق جبريل)
|
عندنا صاحبنا
حكي قال مرة رسل لبت قاليها تعالي قرب الحفير..
واستخدم كلمة ادوهم ليها في سنة سادسة
اها الجواب دا وقع في يد اخوه الناظر..
قال دقوه لما قرب يموت وحرم الحب
الى الابد..
بعدين قال حبيبتو دي مرة عايز يرسم حاجة يديها
ليها قام رسم ليها كلب لانه كان معجب بكلب عبدالجليل
وقال العجيبة فرحت شديد بالرسمة..
الزول دا عنده اغرب قصص غرامية وكلها قبل سادسة
قبل الجواب القفل قلبو..
انا كنت مندهشة اسع من البوست دا
الدهشة راحت..
| |
|
|
|
|
|
|
|
|
|
Re: ود وبت الجيران.. (Re: Salah Waspa)
|
أوتعلمون ؟؟
أنني شاركتها دهشة التكوين
حين أسقط في يدها
حين أرتعبت
عندما تكور صدرها
وأمتلأ جسمها
وصارت كالإناث
حين تساءلت لماذا لا أستطيع رؤيتك كسابق عهدنا دون تعقيد ؟
أن أخاف إخوتي ؟
وجدتي ؟
وأنت ؟
شاركتها دهشة الحياء عند لمسها
عندما تتلاقي أعيننا
عندما ترى في عيوني نظرة شوق
شاركتها يوم دشنت أنوثتها
وجربت في َ سحرها على الرجال
أوتعلمون ؟؟
أنني كتبت لها أقول :
حبيبتي
بلا سلام
ظننت أنني نسيت
أننا كبرنا
أننا لم نعد هناك بأمدرمان
أناهنا بالدوحة
أنتِ هناك بأمستردام
وأنني خسرت مرتين
أنت
وأم درمان
أنت خسرت مرة واحدة فقط
أنا
ولم تخسري أماً
فأم درمان
أمٌُ
كأم إستردام
الدوحة لم تكن يوما أماً لأحد
حبيبتي
أخطأت الظن
حين ظننت وجودك فقاعة
قد تترك أثراً قد تذهب
كدبيب النمل
كشخشة الأوراق
كالأثر على الرمل
قد ألحظه
قد لا أفعل
قد يمحي
أخطات الظن
فوجودك أعياد
قد تمضي اليوم وننساها
لكن حتماً تأتي
أخطأت الظن
فالعام شهورٌ إثني عشر
أخراها أنت
| |
|
|
|
|
|
|
|
|
|
Re: ود وبت الجيران.. (Re: كمال علي الزين)
|
(!)
يرفع النداء ..
كل يوم .. يؤذن المؤذن ...
نتناول إفطارنا ... هناك ..
وجبة .. عادية ..
إعتدنا على تناولها .. كل يوم .. كل عام ... كلما ..
جاء .. هذا الساحر ..
رمضان ..
أمسياته .. ليست ..
كأمسيات .. غيره من ألأشهر ..
جمالها هناك ..
بقلب أمدرمان ..
يجعلنا .. نتمناه .. كل أيام العام ..
فنجان القهوة .. الذي أدمناه ..
نشربه ..
ونحن مستلقون كعادتنا .. على بساط ..
فوق مسطبة عالية ...
قريبة من شباكها .. الذي .. يطل على الشارع ..
تسمع ضحكاتنا ..
وقفشاتنا ..
ومشاحناتنا ..
نظل هكذا ..
حتى ..
نذهب للتراويح ..
ثم نعود ..
نملأ .. كؤوسنا ..
وفناجنينا ..
وهي ..
لا تبارح مكانها ..
عند الشباك ..
ثلاثون يوماً ...
رمضان .. وسوزان ..أمدرمان .... وفنجان .. ..
تطل على بعدها ..
بضحكتها المجلجلة ..
....
لتذكرني دائماً ...
أنها .. لم تصنع القهوة ..
نشربها ..
دائماً ..
متوهمون أنها ..
صناعة .. سوزانية ...
الآن ..
رمضان .. جاء كعادته ... كل عام ..
وأمدرمان .. مازالت .. لا تبارح ..
مكانها .. بين النيل ...,
وحمد النيل ...
والقهوة ..
لا زالت تعطر أزقتها ..
وحواريها ..
المسطبة .. لا تمل فرشها .. وبساطها ..
الشباك ..
لا يزال مفتوحاً ...
لكنها ..
لم تعد هناك ..
وكذلك ..
أنا ...
| |
|
|
|
|
|
|
|
|
|
Re: ود وبت الجيران.. (Re: كمال علي الزين)
|
( 3 )
هي الآن ..
في مكان آخر ..
مع رجل آخر ..
ورمضان أيضاً ..
هنالك ..
تختلف ..
مواقيته ..
فجره ..
غروبه ..
وجلسات قهوته ..
...
....
لا أدري ..
لماذا ندمن رائحة ..
الأوراق القديمة ..
تجذبنا رائحتها ..
وتتلاعب أحرفها ..
أمام أعيننا ..
تتمثل ..
بشر اً ..
سويا..
...
أحبها ..
لا أنكر ..
هي بقلبي ..
جرحاً ..
وفرحاً ..
وألتياعاً ..
..
شوقي إليها ..
يتأجج ..
كلما أقبل رمضان ..
فعبقها ..
من عبقه ..
وطهر أيامه ..
من طهر هذا ..
الذي كان بيننا ..
حباً ..
ماعرفنا ..
غيره ..
وداً ..
لا ينقطع ..
| |
|
|
|
|
|
|
|
|
|
Re: ود وبت الجيران.. (Re: خالد علي محجوب المنسي)
|
(4)
رمضان ..
ينقضي ..
تعود أيامنا كماكانت ..
لكن قلوبنا ..
تظل مترعة ..
بأنفاسها ..
وأنفاسه ..
نشتري ..
كل جديد ..
أمي ..
لا يلذ لها ..
ان تستقبل عيداً ..
دون أن تستعين ..
بها ..
في تركيب ..
ستايرها ..
وفرش أرضيتها ..
أهب دائماً ..
لمساعدتها ...
ننفق أياماً ..
في تركيب هذا ..
وفرش ..
ذاك ..
ربما نتمنى ..
أن نظل هكذا ..
فهي أياماً ..
نكون فيها ..
أكثر قرباً ..
نسترق ..
لحظاتنا ..
نختلس من ..
قبح زماننا ..
ما يطفئ ..
حرماننا ..
عدت ..
ذات عيد ..
طلبوني ..
لتركيب الستاير ..
وفرش ألأرضية ..
أقسمت أنني ..
لا أجيد حتى المساعدة ..
في مثل هذه الأمور ..
ذكروني ..
فما تذكرت ..
فذاك أمر..
فيه ..
فم عذب ..
وخصر نحيل ..
وإبتسامة ..
لا تنسى ..
...
فيما مضى ..
كنت لا أتواني في مساعدة ..
كل شعوب العالم في تركيب ستايرها ..
لكني أشترط ..
دائماً ..
أن أكون ..
مساعد سوزان ...
سوزي ..
لا أفتقد ..
تركيب ستايرنا ..
ولا قص ..
فرش أرضيتنا ..
أفتقد ..
تلك التفاصيل ..
وذلك ..
الذي كان ..
| |
|
|
|
|
|
|
|
|
|
Re: ود وبت الجيران.. (Re: كمال علي الزين)
|
وتغنينا ..
بأغنيات كنا نحسبها ..
( من بيت الكلاوي ) ..
وتداعت بنا الذكرى ..
إلى تلك الأيام ..
حين كانت تغني ..
وأصغي ..
يبدو أنني قد طفح بالكيل ..
مما أعاني ..
فراقاً ولوعةً ...
فصرت أغني ..
حين تسكت ..
بعدها ..
عني ..
أقسى تجاربي ..
قسوة هذه الأيام ..
تتمثل ..
في وحدتي ..
ووحشتي ..
أعزي النفس ..
بأمل اللقاء ..
فقد يجمع الله الشتيتين ..
بعدما ..
يظنان كل الظن أن لا تلاقيا ...
....
لكنني أسأل ..
هل تتمرق في أحضانه ذلك الآخر ..
هل تعطيه ..
ما حلمت أنا .. بأخذه ..
هل ..
هل ..
وهل ..
قتلني ..
ذلك البعد السادس ..
من أبعاد ..
غربتي وغربتها ..
أنا ..
لها ..
وحدها ..
لكنها مازالت ..
بكنف آخر ..
....
أغنيها ..
مأساتي ...
كل ليلة ..
حنيناً ..
دفاقاً ..
ومحبة ..
عزمها لا يلين ...
أنا لها ..
...
وإن عز اللقاء ..
أنا لها ..
وإن هزني الشوق ...
أنا لها ..
غازلنني أخريات ..
محبتها ..
بقلبي ..
لا تزال ..
وشماً ..
لا يزول ..
سوزي ..
هل تتمرغين في أحضانه ..
وأنا ..
هنا ..
فوق لظى ذكرك ..
أتحرق ..
شوقاً ...
ووحشةً ...
....
تلك .. الشفاه .. التي ..
منها ..
ماء الحياة ..
ولا ذلك الجسد الذي ..
منه دف شموسها ..
ولا ذلك الوجه ..
الضياء ..
( إنشا الله ماتنفعوا .. )
| |
|
|
|
|
|
|
|
|
|
Re: ود وبت الجيران.. (Re: كمال علي الزين)
|
سألت كل من له علم ..
هل طلاقها وعودتها ..
إثم ..
أم أن عذابي حلال ..
ثم هل ..
حرام علينا ..
والعمر قصير ..
أن ننعم ...
بوصل المحبين ..
أجابني ..
بعضهم ..
حرام عليكم ياشيخ ..
وشجعني بعضهم ..
وهتف بعضهم ..
هذا هو الحب ..
ولا بلاش ..
...
أمي ..
تتمنى طلاقها ..
وعودتها ..
لي ..
أمها ..
تؤثر الصمت ..
أنا وهي ..
نكتفي بحقنا في أن نحلم ..
ولا نتساءل ..
من أضاعنا ..
أنا ..
ام هي ..
أم ضعفها ..
وحماقتي ..
....
ساعةً ..
أكتشف أن كل هذا ..
لا يهمني ..
..
أهتم فقط ..
لعودتها ..
وعودتي ..
وعودة ..
الليالي ..
الجميلة ..
والصباحات التي ..
أحتسي فيها ..
فنجان الشاي ..
أمامها ..
وهي تلتهم ..
ساندوتشها بنهم ..
وتشرب قارورة الببسي ..
وأنا ..
أتغزل في ..
ماهو ..
حق للغزل ..
أغني ..
(عودة القمرا لي وطن القماري )...
انام على صوتها ..
تتعجلني الرحيل ..
فقد جاء ..
ليسكن لها ..
ولا سكنى لنا ...
اغلق هاتفي وارمي به ...
وأغلق عيناي ..
على حلم ..
العودة ..
المستحيل ..
| |
|
|
|
|
|
|
|
|
|
Re: ود وبت الجيران.. (Re: كمال علي الزين)
|
بت جيرانا:
إن كنت تقرأين ..
إعلمي ..
أنني ..
أحبك ..
...
...
وهذا ..
قدري ..
...
إن كنت تقرأين ..
إعلمي ..
أنني ..
هنا ..
في إنتظارك ..
لا أحيا ..
إلا لك ..
لا أحفل إلا بك ..
لا أعشق إلا أنت ..
هكذا كنت ..
هكذا أظل ...
لابد من سوزي ..
وإن طال السفر ..
.....
وضعنا يدنا على البوست , أنا وبت جيرانا .
| |
|
|
|
|
|
|
|
|
|
Re: ود وبت الجيران.. (Re: كمال علي الزين)
|
وينك اليلة ود الزين?
نعلك الكاتبلها الأشعار السمحة دي ياها سـوزان الدار تجيبها من يوروبا..
وتسوقا الشمالية تسكنا في بيوت الطين?
إن كان سمعت كلامي..
كفاها بيوت أشعارك 
تعال راجع لينا سريع
| |
|
|
|
|
|
|
|
|
|
Re: ود وبت الجيران.. (Re: Muna Khugali)
|
Quote: وينك اليلة ود الزين?
نعلك الكاتبلها الأشعار السمحة دي ياها سـوزان الدار تجيبها من يوروبا..
وتسوقا الشمالية تسكنا في بيوت الطين?
إن كان سمعت كلامي..
كفاها بيوت أشعارك
تعال راجع لينا سريع |
منى خوجلي
تحياتي
هل تصدقي أنها سبقتني إلى العودة ؟؟؟
| |
|
|
|
|
|
|
|
|
|
Re: ود وبت الجيران.. (Re: Muna Khugali)
|
يا صلاح اخوي اولا سلامات مليار للحلوة بنتك وربنا يديها العافية وتعرف انا حسيت بيك نعسان وبديت تخرمج فقلت احسن ننصحك ناس منى ديل يدروخوك بالماضي الجميل داك (والحاضر الأجمل انشاء الله) ويقرروك وبكرة نبقى في حاو وتر عمومآ المسارات تداخلت وناس بيان يقربو للإفصاح يقومو يلبسوها ليك واحدة صاحبتي وصديقتي وبت جيرانا البعيدين عمومآ حكايات صاحبي وصاحبتي دي كترت شايفة ما في زول قال الحقيقة الا اخونا داك بتاع الرايض ود الموج ويتخيل لي كدا الان يكون عقدو ليهو محاكمة منزلية من وزير الداخلية وصاحبك انقطع الله يستر على الباقين والباقيات ... انا طبعآ قلت الاسم وسيد الاسم صح صح هو لكن لو دايرني اطرطشكم جاهز لاكين لو دايرين الحقيقي كاملي خلو منى التحكي وانا مسودتي جاهزي والاقلاه عقب انطلاق بت خوجلي مرة تانية ياصلاح سلامات للأمورة وفدآ فدآ لعيني طفلة داعب عيونها حديقة في الخيال .... والصحو لكم جميعكم ويا منى الشئ ده شكلوا ح يفوت غادي لي بوست المعتصمة نور تاور ....
| |
|
|
|
|
|
|
|
|
|
Re: ود وبت الجيران.. (Re: الرفاعي عبدالعاطي حجر)
|
Quote: صاحبي كان متيم ببنت في حينا
قال لي اعمل شنو عشان تحبني واحبها
قلت ليهو اكتب جواب
قام كتبو وشالو ومشى عديل لبيت الزولة دي ... وكان داخلة فيهو حتة رجفة
دق على الباب ... جاتو ليك هي زاتها
إتكبكب شديد وقال ليها
بالله أدي الجواب ده لعماد أخوك |
العطبراوي / حيد حسن ميرغني ( أنصار سنة تجميع ) ( بالمناسبة إنته أنصار سنة دفعت منو / هشام الفحل ولا كمال حمد ولا شيخ صويلح شخصياً ) ..
تعرف في واحد كبكاب أبوه رسله قال ليهوا أمشي نادي عمك عبد المحمود ..
صاحبك دقه الباب
فتحت الباب بت شديدة ذي زولت صاحبك ..
صاحبنه مسكته الرجفه ..
قال ليها : عبد الموجود محمــود ؟
البت بقت تضحك .. زولك قرب يموت من الرجفه ...
المهم زولك جمع شوية وسأله تاني ( عبد المحمود .. موجود ؟ ) .
قالت ليهــو : موجـــود
صاحبنا قال ليها : أقــــول ليهـــو منــــو ؟
| Quote: الاخ ولد الرجة ود الراحات داك خالد سعيد انا حاسي بيك لأني بحب عطبرة وحبيت في عطبرة برضو بت جيران خالتي الانهي من الاعلاميات المشار اليهن. |
العطبــراوي الرفـــاعي ..
لك التحية ولي عطبرة الجميلة .. وتحية للإعلام .. وتلفزيون عطبرة .. وإذاعة عطبرة .. والبلوتين..
قلته لي من الدرجة .. بت جيرانا يعني ... تخلوا بنات جيرانكم وتجو تزاحمونا في بنات جيرانا ..بنات الراحات .. عشان كده خليتوه يفتروا علينا .
لك التحية مرة أخرى .. ولي عطبرة ألف تحية .
خالد الأرباب
| |
|
|
|
|
|
|
|
|
|
Re: ود وبت الجيران.. (Re: الرفاعي عبدالعاطي حجر)
|
Quote: صاحبي كان متيم ببنت في حينا
قال لي اعمل شنو عشان تحبني واحبها
قلت ليهو اكتب جواب
قام كتبو وشالو ومشى عديل لبيت الزولة دي ... وكان داخلة فيهو حتة رجفة
دق على الباب ... جاتو ليك هي زاتها
إتكبكب شديد وقال ليها
بالله أدي الجواب ده لعماد أخوك |
العطبراوي / حيد حسن ميرغني ( أنصار سنة تجميع ) ( بالمناسبة إنته أنصار سنة دفعت منو / هشام الفحل ولا كمال حمد ولا شيخ صويلح شخصياً ) ..
تعرف في واحد كبكاب أبوه رسله قال ليهوا أمشي نادي عمك عبد المحمود ..
صاحبك دقه الباب
فتحت الباب بت شديدة ذي زولت صاحبك ..
صاحبنه مسكته الرجفه ..
قال ليها : عبد الموجود محمــود ؟
البت بقت تضحك .. زولك قرب يموت من الرجفه ...
المهم زولك جمع شوية وسأله تاني ( عبد المحمود .. موجود ؟ ) .
قالت ليهــو : موجـــود
صاحبنا قال ليها : أقــــول ليهـــو منــــو ؟
| Quote: الاخ ولد الرجة ود الراحات داك خالد سعيد انا حاسي بيك لأني بحب عطبرة وحبيت في عطبرة برضو بت جيران خالتي الانهي من الاعلاميات المشار اليهن. |
العطبــراوي الرفـــاعي ..
لك التحية ولي عطبرة الجميلة .. وتحية للإعلام .. وتلفزيون عطبرة .. وإذاعة عطبرة .. والبلوتين..
قلته لي من الدرجة .. بت جيرانا يعني ... تخلوا بنات جيرانكم وتجو تزاحمونا في بنات جيرانا ..بنات الراحات .. عشان كده خليتوه يفتروا علينا .
لك التحية مرة أخرى .. ولي عطبرة ألف تحية .
خالد الأرباب
| |
|
|
|
|
|
|
|
|
|
Re: ود وبت الجيران.. (Re: Muna Khugali)
|
| Quote: ما في زول قال الحقيقة الا اخونا داك بتاع الرايض ود الموج ويتخيل لي كدا الان يكون عقدو ليهو محاكمة منزلية من وزير الداخلية وصاحبك انقطع الله يستر على الباقين والباقيات ... |
الرفاعى كتر خيرك على شهادتك دى..لكن انا زى البشير والله ثم والله ثم والله زول
بقدر يحاكمنى مافى..فى زول بحاكموه على التاريخ وبعدين انتهى زمن الترويع
ما نحن وصلنا زمن راجل المره ده حلو حلا...انت قايل الاغنية دى لى منو؟ مالينا نحن
هييع ..وانا بعاين للجماعة بتاعين W.H.O ودى اختصار لى
WEAK HUSBAND ORGNIZATIONماتفتكرها لمنظمة الصحة العالمية والمنظمة دى عندنا برئاسة
هاشم خلف الله وامينها العام عادل جبارة وامين مالها اخونا اسماعيل عباس ومقررها علاء
حيمورة وواحدين تانى اسماؤهم تاتى فى الكشف الملحق..سلمت وكلنا راجين بنات الجيران،،
| |
|
|
|
|
|
|
|
|
|
Re: ود وبت الجيران.. (Re: Muna Khugali)
|
| Quote: ما في زول قال الحقيقة الا اخونا داك بتاع الرايض ود الموج ويتخيل لي كدا الان يكون عقدو ليهو محاكمة منزلية من وزير الداخلية وصاحبك انقطع الله يستر على الباقين والباقيات ... |
الرفاعى كتر خيرك على شهادتك دى..لكن انا زى البشير والله ثم والله ثم والله زول
بقدر يحاكمنى مافى..فى زول بحاكموه على التاريخ وبعدين انتهى زمن الترويع
ما نحن وصلنا زمن راجل المره ده حلو حلا...انت قايل الاغنية دى لى منو؟ مالينا نحن
هييع ..وانا بعاين للجماعة بتاعين W.H.O ودى اختصار لى
WEAK HUSBAND ORGNIZATIONماتفتكرها لمنظمة الصحة العالمية والمنظمة دى عندنا برئاسة
هاشم خلف الله وامينها العام عادل جبارة وامين مالها اخونا اسماعيل عباس ومقررها علاء
حيمورة وواحدين تانى اسماؤهم تاتى فى الكشف الملحق..سلمت وكلنا راجين بنات الجيران،،
| |
|
|
|
|
|
|
|
|
|
Re: ود وبت الجيران.. (Re: صديق الموج)
|
Quote: الرفاعى كتر خيرك على شهادتك دى..لكن انا زى البشير والله ثم والله ثم والله زول
بقدر يحاكمنى مافى..فى زول بحاكموه على التاريخ وبعدين انتهى زمن الترويع
ما نحن وصلنا زمن راجل المره ده حلو حلا...انت قايل الاغنية دى لى منو؟ مالينا نحن
هييع ..وانا بعاين للجماعة بتاعين W.H.O ودى اختصار لى
WEAK HUSBAND ORGNIZATIONماتفتكرها لمنظمة الصحة العالمية والمنظمة دى عندنا برئاسة
هاشم خلف الله وامينها العام عادل جبارة وامين مالها اخونا اسماعيل عباس ومقررها علاء
حيمورة وواحدين تانى اسماؤهم تاتى فى الكشف الملحق..سلمت وكلنا راجين بنات الجيران،، |
صديق الموج
في معلومة مهمة نسيتها .. مقر المنظمة الرسمي هو دار رابطة أبناء مدينة الصحافة .. وعليِّ بالطلاق الزي طلاق البشير كلامك صاح !!!
| |
|
|
|
|
|
|
|
|
|
Re: ود وبت الجيران.. (Re: Muna Khugali)
|
منى الخوجلابية
وتدخلين من نقطة ضعفي
( بمووووووووووت في الكرفتات) وعشانك
وعشان الكرفتات نحكي ( وزي ما بقول لبنتي الصغيرة ، مرة واحدة بس ، اصلها بتحب الحكاوي المسلسلة )
كنافي بداية مراهقة نافرة
هي تمت لنا بصلة القربي ، وتسكن غير بعيدة منا، بيننا ما صنع الحداد
حربنا الكلامية مستعر اوارها ، وما في اي امكانية هدنة او تدخل اممي
ذات نهار قائظ ، دخلت بيتهم
نظرت الي وقالت انت؟
وتناولت اقرب ما وصلت اليه يدها واظنه كان مداسا
صوبت نحوي ولكني فاجأتها
اسمعي
انت قايلة ان بجي البيت لي شننو
ما ليك انت
وتوقفت يدها والطلقة في الهواء
ثم قالت: نعن
قلت ليها ايوة
انا بجي عشانك ولو عايزاني تاني ما اجيكم مع السلامة
تدحرج المداس الى مكانه الطبيعي
ونعمت ذلك النهار الصيفي باحلى وابرد كباية ليمون
ومودتي
| |
|
|
|
|
|
|
|
|
|
Re: ود وبت الجيران.. (Re: د.محمد حسن)
|
يسعد صباحاتك يا منى ..
هذه أول فاجعه فى حياتى .. وكانت عن بت الجيران !
أمدرمان 1969م .. صبيه كأنها من عالم الأحلام ! أميره أسطوريه هبطت على سماء المدينه .. فنثرت عطرها وعبيرها الخرافى على سماء أمدرمان .. فتغنت على أنغامها الحمامات والعصافير , وزغردت !
ثم ذهبت بلا رجعه .. وتوارت عن الأنظار .. لكنها لم تتوارى عن الأخيله , ولن تغادر !
كانت فى السنه الثالثه إقتصاد جامعة الخرطوم ! بينما كنت فى السنه الأولى وسطى !
هى فى العشرينات وأنا طفل فى الثانيه عشر ! ... وكانت ثمة علاقه بيننا يا منى ! ويا لها من صداقه !
ويا له من حب أزلى إلى حد الوله ! .... تأتى إبتسام من الجامعه كل خميس .. وسرعان ما ترسل إخوتها
أصدقائى الصغار لمناداتى .. ثم تبدأ عطلة الإسبوع الخرافيه المشوبه بذلك الصفاء والنقاء والإخاء
والإخاء الأسطورى .... يالها من أيام يا منى ... معليش أعذرينى .. سأتوقف هنا ولكننى حتماً
سوف أعود لنواصل .....
لعلك لم تنتبهى يا منى لهذه الحكايه ! ولكننى سأواصل عن إبتسام.. تلك الأميره الأمدرمانيه التى إنسحبت فسحبت معها حقبه كامله من الجمال الخرافى !
| |
|
|
|
|
|
|
|
|
|
Re: ود وبت الجيران.. (Re: مامون أحمد إبراهيم)
|
عييييييييييييك...ياصباح الهنا..
نحنا لا بيهمنا عمر سـنين ولا حب بالعجلات ولا طيران مداسات
نحنا بيهمنا رغم كل الفات حبكانات ود وبت الجيران...
وأنا نفسي أحكي..وزي ماقلتليكم عايزه تشجيع..
وده بيجي من حكاويكم
وانتو بتكتبوا علي سطر وبتفطوا خمسة...
واحـدين منكم قصصم مفتوحة النهايات ومعلقانا في الهوا أو ربما الهـوي
وطارق جبريل تسأله من نفسه يقول ليك الكاشف أخـوي...
أولاد الإمتداد زواغييين..ياربي ليه?
مامون أحمد إبراهيم??
Mabroooook
| |
|
|
|
|
|
|
|
|
|
Re: ود وبت الجيران.. (Re: bayan)
|
Quote: بيان قولي الجد انتو كنتو في
عطبرة متأكدة ? غايتو أنا ما عارف دي دايرة عادل زاتو |
الله كيف امال ناظر عطبرة بنات كان منو..
والبيت الفي الداخلة جنب نادي الوادي داك بيت منو؟
تعرف يا واسبة في جزء من اعداد الممثل في معهد الموسيقى
في حاجة اسمها تكسير شخصية.. اها الزول بقعدوه يعمل اعترافات
ولازم يكون صادق فيها.. ويجاوب على اي سؤال..
يصراحة ووضوح. اها اعترافات خاصة جدا جدا
الغريبة اصلا ما حصل في بت قعدت قالت قصة الحياة السرية ليها..
لكن اولادنا ما قصرو بالتفاضيل المملة..
اسع البوست دا كدا
البنات ما بحكو نخليكم انتو تحكو...
واحد من اصحابي حكى قال لمن عمرهم 15 سنة
هو صديقو كانو بحبو بت واحدة
اها قالو مرة صاحبهم جاب ليهم عروق محبة
قاليهم تقدوها وتختوها في عيونكم اي بت تشوفكم
تقع في حبكم..
اها قالو اليوم داك حامو بالحلة واي بيت يمشو ليه
البنات بهتمو بيهم..
المهم بعد سنوات فكر في الموضوع دا
وقال اذكر انهم كانو استحمو شديد وسرحو شعرهم
ولبسو هدوم سمحة شديد..
وعرف خرافة عرق المحبة الاداهم بس ثقة بنفسهم..
لكن الوجاهة هي السبب..
| |
|
|
|
|
|
|
|
|
 Re: ود وبت الجيران.. (Re: bayan)
|
بيـــان
خــلاص ده يعني آخــر كـــلام ؟
ونحنــــا مســامحينك وبمداخلتك الأخــيرة تكــوني اقتلعتي
مني حقيقة كان من الصعب سردها وماعارف ليه ما كنت قادر
أبداها وهي حكاية اتنين أصحــاب يحبوا ليــهم واحدة ووقتها
كنــا يادوب يادوب والله كانت ايام رائعة و كلنا كنـا في مربوع
واحــد والبنية كانت مبشتنة أولاد الفريق كلهم وأنا وصاحبي
كنا اسلوب التنافس حقنا كان غريب وهو بابداء الشجاعة والقوة
في العركات وعدد العركات وكيفية نتائجها التي سرعان ما تنتشر
ومن ثم تصل الى مسامع ست الحسن والجمال اما الكرت الرابح
والنقاط الزائدة كانت تضاف الى حسابي ليس لعدد العركات ولكن
لامكانيــة وصولي السـهل من على السطح الى منزلهم نسبة لموقعه
المقابل لمنزلنا من الخلف وطبعا الحجة كانت تبادل مجلات سوبرمان
وكتب الألغاز لو يذكرها البعض منكم وكانت لنا أيـــام .
تســـلموا كلكم وخصوصا منى خوجلي والمساحة الورديـة
صـــلاح واســبه
| |
|
|
|
|
|
|
|
|
|
Re: ود وبت الجيران.. (Re: Salah Waspa)
|
Quote: المقابل لمنزلنا من الخلف وطبعا الحجة كانت تبادل مجلات سوبرمان
وكتب الألغاز لو يذكرها البعض منكم وكانت لنا أيـــام . |
الحبيبة دي ما عندها حبوبة؟
زمنا داك الحبوبات هن التفتيحات حارسات الشرف العائلي
اي كتاب طالع ولا نازل بيتفتش..
بت جيرانا ولد جيرانا برسل ليها اللغز وفيه
شختات بالثري هتش لما تجمع الحروف بتكون رسالة...
شوفتا كيف الحاجة ام الاختراع
او تكتب لحبيبة رسالة بالليمون
ورقة فاضية بالمكوة تظهر الرسالة..
زمنا كان زين يا واسبة يا اخوي..
| |
|
|
|
|
|
|
|
|
|
Re: ود وبت الجيران.. (Re: bayan)
|
ولدنا خالد سعيد
الزول الحلو .. صديقي
ده
قريب طارق جبريل
ما شايفو خايف يجيب الشغلة من آخرها ليه؟
بعدين يا حبيب انا قلت انصار سنة عشان نطلع من شرك منى وبيان .. اخوك عنقالي ساكت
الجماعة عاوزين يدردقونا حبة حبة ويمسكونا بيها ليوم الدين .. انت ما عارفهن .. نجيضات تب
لو كنا بنحب ما كنا عرسَنا بنات من بلاد الواق واق
| |
|
|
|
|
|
|
|
|
|
Re: ود وبت الجيران.. (Re: bayan)
|
تنبيه هام يا حـلويين..
أنا أمس بديت أحكي..بتلقوا اول حكاية في الصفحة الأولي تحت الرفاعي..
أصلو بقيت مجهجه أخت المشاركة وين في الصفحتين..علشان كده قلت أحسن تحت كل مشاركة منكم...
يللا صـفقة تشجيعية تاني...
المكلة مافي طريقةأي كذب..أولاد الإمتداد بما فيهم زوج بيان ماليين البورد
| |
|
|
|
|
|
|
|
|
|
Re: ود وبت الجيران.. (Re: Muna Khugali)
|
Quote:
Quote: هشام الفحل
ده
قريب طارق جبريل
|
يا حيدر قريبي شنو
انا خالو طوالي
والله كان منجضنا نجاض
خصوصا لمن نكون ماشين كريمة وطبعا عطبرة محطة مهمة للقطر
اما بت الجيران دي خلوها لي الله ساكت
| |
|
|
|
|
|
|
|
|
|
Re: ود وبت الجيران.. (Re: طارق جبريل)
|
بنت الجيران كنت أكتب لها في اليوم خمسة جوابات اول النهار وفي آخر الليل يستقر رأيي أن أسلمها واحد منهم أصحى الصباح وأبدا أكتب من أول وجديد
في يوم وبعد سهر قررت أن أصارحها بحبي عندماأقابلها في الصباح في الطريق إلى المدرسة إنتظرتها حتى هلت في أول الشارع وتقدمتها بخطوات وعملتا نفسي مشغول بقراءة كتاب كنت أحمله في يدي يعني الود مجتهد وشاطر وبيقرا حتى في الطريق إلى المدرسة . عندما صارت بمحازاتي إلتفت إليها عشان أرمي ليها الكلام رب وأكب الزوغة بادرتني قائلة القراية في الشارع ما بتنفع طيرت الكلام الساهرتا الليل برتب فيهو وقعدتا عشان أتذكرو تاني سنتين حتى إتذكرتو .
الله يجازي محنك يا منى المرة انا شكلي الليلة طبزتها طبزة كبيرة
بنت جيرانا إتزوجها ود عمها المغترب في أبو ظبي ومن اليوم داك أنا بكره المغتربين وكنتا مصر إنو أنا حأمارس سلطتي كإبن عم واتزوج بت عمي بعد ما أتأكد إنو ود جيرانهم بيحبها إنتقاما من لجرحي القديم
| |
|
|
|
|
|
|
|
|
|
Re: ود وبت الجيران.. (Re: Muna Khugali)
|
أختي منى
بت وولد الجيران حكاية واقعية موثقة في السيرة الشعبية العربية
وهي حاصلة في المجتمع السوداني...
لكن أعتقد أن المجتمع السوداني يتميز بظاهرة أخرى وهي بنت العم وبنت الخالة..
والأثنين ربما كانوا أكثر إنتشارا في مجتمعنا الذي كان منغلقا فيما عدا على بنات الأهل
وعشان كده كانت هناك الكثير من قصص الحب بين الولد وبنت العم والبنت وود الخالة...
لكن المشكلة إنها علاقات زي دي داخل رحم الأسرة الممتدة الواحدة خطيرة من عدة نواحي..
يمكن أخطر ما فيها إذا تفركشت ربما تفركش عرى اركان الأسرة وتلقى الأسرة الممتدة الواحدة أنقسمت إلى فسطاطين أحدهما مع البنت وأهلها والثانية مع الولد وأهله..
كما أن من خطورتها أنها كثيرا ما تفقد عنصر السرية وسرعان ما يذاع الخبر..
اللذيذ في هذه العلاقات أنها تكون بصورة ما تحت رقابة وأعين الأهل.. والطريف أن اللقاءات بين \
الحبيايب الأقرباء أنهم يجدون مساحات أرحب للقاء في مختلف المناسبات حتى في الأتراح.. أذكر الكثيرين
مع أبناء العم الأكبر سنا منا أو أبناء الخالة اللذين كانت تربطهم علاقة مع بنات من العائلة كانوا
مثلا تجمعهم البكيات (الوفيات) أكثر من الأفراح.. وأذكر أن المحبوبات كن يعددن الشاي للمعزين
بينما ينتهزها المحبون من العائلة بالدخول والخروج من محل الكفترية لسرادق العزاء.. وهم رغم عدم
مناسبة الجو العام للحب يهميون حبا بالمحبوبة ويسعمونها عبارات الغزل وهن يهببن الشاي..
معليش أنا خرجت عن الموضوع لكن في إعتقادي أن الحب بين الأقرباء (بنات العم وبنات الخالة) أكثر شيوعا وأكثر إمتاعا.. وأكثر محاذير ومخاطر.. ناهيك عن المحاذير الطبية ولا شنو...
وتبقى بنت الجيران هي عنوان الحب في ميعة الصبا الباكر...
مع تحياتي
| |
|
|
|
|
|
|
|
|
|
Re: ود وبت الجيران.. (Re: Kamal Karrar)
|
في الزمن الجميل وانا في الثانوي اهدتني بنت الجيران( حبا)قلم و مشط!!وكانت ردة فعلي عنيفة!!
المهم انني تقبلت الهدية وابن عمي يمزح قائلا الظاهر عليها شعرك (التفة)دة ما عاجبها!وباين انها كانت دايراني اغير ليها ال(look)! التقيتها بعد عقدين من الزمان وزوجها قالت لي (بركة شعرك الكان تفة الراح فيها..)اخوكم بقي صلعة من قدام!! ..وضحكت لان زوجها كان(كوجاك)!!
| |
|
|
|
|
|
|
| |
Muna Khugali
هاشم أحمد خلف الله
مامون أحمد إبراهيم
bayan
Salah Waspa
حيدر حسن ميرغني
عصام دهب
Haytham Abdulaziz
الرفاعي عبدالعاطي حجر
د.محمد حسن
ناجى أحمد البشير
خالد علي محجوب المنسي
محجوب البيلي
بركات بشير نجار بشير
saadeldin abdelrahman
عبد الدائم سيد أحمد
طارق جبريل
Khalid Saeed
صديق الموج
Kamal Karrar
Ahmed El Gasim
فيس بوك
تويتر
انستقرام
يوتيوب
بنتيريست