الغناء الجديد/الشيء الجديد (كلام عن بداية الحقيبة/ شهادة صانعيها في لقاءات مباشرة معهم او مصادر وثقت لهم)
جيمس كري عمل لجنة لدراسة المخيال الشعبي السوداني سنة 1905 اوصت بترقية الفن السوداني بما يواكب المرحلة الجديدة.
سرور دخلني الغرفة قال لي تعال اوريك الغناء الجديد" ديمتري البازار.. حلقة إذاعية 1974 في حضور عبيد عبد الرحمن والعبادي واخرين
" من اللحظة ديك ابتدا تغيير الغناء واول غنية كانت انة المجروح غناها سرور" ديمتري البازار
"كنا بنجتمع في البيوت انا وخليل فرح وأحمد حسين العمرابي ومصطفي بطران، عملنا جمعية وحدة وادي النيل جمعية سرية لما الإنجليز كشفوها رفدونا الاربعة من كلية غردون دا كان سنة 1918 ودي الجمعية اللي انبثقت منها اللواء الابيض لاحقا) ديمتري البازار
"أنا بلقبوني بأبو الفن (أي فن الحقيبة)... ابوي أمه أخت سلاطين باشا، سلاطين باشا جدي وهو الربى ابوي ، ونجت باشا حاكم عام السودان زار ابوي في البيت، هيكسون باشا قال لأبوي تجيب الولد دا الخرطوم يتعلم وشالوني ودخلوني كلية غردون" ديمتري البازار
(هكسون باشا جابني انا واخوك من دنقلا ودخلنا كلية غردون) دميتري البازار
(لما جاء ود رئيس الوزراء تشرشل تبع الديش جابوه لي في المكتب قالوا ليه دا بعرف البلد كلها والمثقفين، وكان جايبين واحد في باب المكتبة براقب) دميتري البازار
"عملنا الاسطوانات في مصر وأتباعت كويس في الخرطوم برغم انو كنا خايفين الناس ما متعودة على الغناء الجديد" ديمتري البازار
"اول حفلة (تجارية) عملناها سنة 1930 الخواجة ابى يدينا تصريح قال لينا السودانيين ما وصلو المستوى دا، انا مشيت للزول الأكبر منو جبت التصريح وجاء مدير الخرطوم بنفسو حضر الحفلة كانت سمحة بس في النهاية حصلت شكلة كسرو الكراسي "الناس قالو دايرين عبد الماحي يغني مش سرور”" ديمتري البازار
"احكي لينا يا دميتري عن الوفود الوديتها مصر" د. محمد عبد الله الريخ ... حلقة إذاعية 1974 في حضور عبيد عبد الرحمن والعبادي واخرين
"أنا وديتهم مصر عشان يتدربو على الغناء الجديد ويسجلو اسطوانات .. خليل وسرور وتانيين" .. ديمتري البازار
"قبل كدا كان في غناء الدوبيت والطمبور وفي واحد تاني اسمه الحومبيي وهو خطوة قدام خطوة وراء وكرير زي الطمبور ومعاه رقصة من البنات وسرور اول زول فكر يغير الغناء دا" دميتري البازار
"العبادي كتب كتاب أستاذ الأغاني، عشان يعلم الناس الغناء الجديد" السر قدور في اغاني وأغاني حلقة خاصة بالعبادي ٢٠٠٩
"العبادي نادا الناس في البيت سنة 1923 لاجتماع هام قال ليهم تعالو نوريكم الغناء الجديد، الشيء الجديد العملناه" السر قدور أغاني وأغاني حلقة العبادي 2009
(سرور كان شغال مكوجي “عندما ألتقيته أول مرة 1914” ) إبراهيم العبادي في لقاء إذاعي مع الطيب صالح
في حفلة بشير الطنابرة رفضو يطنبرو وراء سرور دا كان في حفلة بشير سنة 1919.. المصدر السابق
"لن تستطيع الدخول إلى عالم العاملقة العبادي وخليل فرح الا بعد امتحانات عسيرة.... ولن يغني لك سرور الا بعد اجتياز الامتحان". كتاب الحقيبة نهر الابداع الخالد للطيب ود الرضي
(ودالرضي كان يعمل مع دميتري البازار في المكتبة وعدد من شعراء الحقيبة) المصدر السابق
(سلاطين باشا هو للدخل ابراهيم العبادي المدرسة.. وانا استشرته في المعلومة دي وقال لي صاح انشرها) من كتاب مبارك المغريب و الحقيبة نهر الابداع الخالد
(أبو صلاح درس في المدرسة الأمريكية) مبارك المغربي
(سيد عبد العزيز بتجيه الإصدارات المصرية وبقرا في مكتبة الإمام عبد الرحمن المهدي وكان بيدرس إنجليزي لما مسكني الكاشف) عبيد عبد الرحمن
(انا كنت شغال سواق للمفتش الانجليزي الكبير) الفنان عبد الله الماحي حلقة تلفزيونية عام 1996
(الخواجة أداني خمسين جنيه (كانت كتيرة خالص الزمن داك) وقال لي لمدة سنة ما ارتبط مع زول غيرو ومشيت مصر وعملت الأسطوانة ومعاي الكورس وعبد الله الأمي بالصدفة) المصدر السابق
(سرور كان بغني للجيش في اليونان وليبيا واسمرا لغاية أن توفى سنة 1946 في أسمرا) مبارك المغربي الأغنية السودانية
(سرور بغني وشايل مسدس “الطنابرة لا يحتاجون ذلك”) المصدر السابق
(عبد الله الأمي دق عبد الغفار الطنباري في مدني وقال ليه لو غنيت تاني بكتلك، سرور كان بحرشه) المصدر السابق
(سرور على علاقة بالملك فؤاد) ابنة سرور في لقاء تلفزيوني
(سرور مشى إشتغل سواق سنة 1936 للملك السعودي ومن هناك مشى الحج) المصدر السابق
(المساح كان عندو أصحابه شوام) من وثاقي خاص بالشاعر المساح
(العبادي جاء زار المساح) المصدر السابق
(خليل فرح كان مغرم بالمشوحات الأندلسية) على المك في تقدمة ديوان الخليل
(وقد ألقى حضرة رئيس النادي كلمة ترحيب، وألقى فؤاد بك كلمة شكر، ثم أطربنا مطرب السودان المشهور الحاج «محمد أحمد سرور أفندي» بأغاني سودانية أُعجب بها الحاضرون، وقال فؤاد بك: إن الدكتور محجوب بجواري يهزني مرددًا صدى الأغاني في نفسه، فأطلب إليه أن يعبر لنا عن نشوته. فوقف الدكتور وصال وجال في الأغاني السودانية مؤكدًا أنها كالأغاني الأندلسية ومادحًا المطرب «سرور»، الذي جعلنا نقضي الليلة في سرور.
(٣-٦) نموذج من أغاني السودان٥ التي أنشدها المطرب سرور يا أنة المجروح بالروح حياتك … … … (روح الحب) وفيك يا ليل معنى الجمال مشروح).. البعثة المصرية للسودان 1936
" انا وقفت لونية الحقيبة وعملت للكاشف شي جديد مختلف" عبيد عبد الرحمن في حلقة اذاعية عام 1983 من الدقيقة 2.25 إلى 3 الدقيقة
خلاصة إبتدائية: الغناء الجديد/الشيء الجديد .. حدث عن وعي وخطة وليس أي شيء نابع تلقائياً من شيء سابق له؟!
تعليق: تلك من الفرضيات المعضدة .. أرجو منك ويسرى أحمد بن إدريس ومجدي الجبل المواصلة في تفتيش الأدلة المضادة اليومين دي انا متوعك شوية.
سأراجع هذه الملاحظات اليوم وبرجع ليكم.. لو شدينا حلينا بنقدر نطلع بنتيجة البحث خلال تلاتة شهور بس.. أنا بقيت متفاءل!.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محمد جمال الدين
فيس بوك
تويتر
انستقرام
يوتيوب
بنتيريست