الْنّجْمَة دِيييك شَايفِنها !؟ نجمة بتعاين لي شديد !! عاين هنااااك تالا الشرق والقِبلة جِيهة ود تميم واصْعُد مع بصرك بعيد
النجمة ديك انا بعرِفها كُل ليلة بعد النّاس تنوم زي البِتتكلم معاي مرات بتضحك وتبتسم ولا اظني بتْخيل براي
قالت ليا: إِنت عِرفتني صنْقرت وسط العنْقريب ونزلتْ شِلت إِبريق ابوي غسلت عيني من النعاس ضحكت علي ضحك شديد
قلت ليها: شكلك ما غريب وشِك دا بيشبه وَشْ حبيب زي الْتقول وش أمي قُُبال السفر قُبال تغيب قُبال يودوها الحكيم الا الْشِلوخ ما شايفها
كان وشها اسْمح كتير من كُل نِسوان البلد لمن من البندر تجي بتجيبو الموز في كِيس مرات حلاوة مع القريب
لكن في آخِر مرة ديك مرقتْ بكُرعيها ومشت لكني شفتها يوم رجوعها كان راقدة فوق العنقريب غطوها بي توبها الكِرِب
ما قلت ليك قُبال كِدا شالوها فوق العنقريب قالوا لي ماشه الْجّنة فوق جروا بيها كانوا رجال كُتار لكن لمن جاء العنقريب كان فاضي ما رجعت معاه
انا مرة قمت سالت أبوي قبّل هناك ما رد لي جاوبني ابوى بي دمعته قال لي خلاص الوكت جاء املا الاباريق للصلاة نتغدى شان نمشي الخلاء
وانا خفت خليت السؤال علشان ابوي ما يبكي ساي كان سافرت نص النهار جابوها بالعربية ديك واتلموا فينا خلق كُتار
وكان بيتنا مليان بالضيوف رجال كبار و نسوان كُتار واحدات صغار واحدات كبار واحدات اشوفهن اول مرة حايمات في الفريق
النجمة ذاتها بكت معاي قالت لي خلاص اتغطى نوم باكر بتمشي المدرسة قلت ليها انتي طلعتي كيف سكتت ولا ردت علي
انا اصلي مرة سمعت ابوي بينضم مع ﺭﺍﺟﻞ غريب قال ليهو انا كنت عارف انها بترحل وما بترجى السنة وقال ليهو غابت نجمتها من مدة من قلب السماء
انا امي قالوا مشت بعيد يمكن تكون شفتيها او طلعت معاكم بهناك كان لاقتك قولي ليها انتي مشيتي وين
اتدلي لي اتونسي قالت لي: لا. انا بيتي عالي هناك شديد عاينت تاني محلها كانت صعيد العنقريب وانا ما بحب العنقريب
قالت خلاص ارقد كفاك انا بكره تاني كمان بجيك انا بي النهار بمشي واغيب قالت النهار حق الشمس ونحن النجوم ننجم ننوم وبالليل بنمرق تاني بنضوى للناس الدروب
قلت ليها داير اطلع معاك قالت لي: لا. عاينت شفت العنقريب حق امي مختوت بهناك رقدن عليه نسوان سمان واحدات اهلنا وما اهلنا لمن الحريم اتفرقن كسرن كراع العنقريب جدعوه هناك ما صلحوهو
وانا كل ليل افضل اعاين في السماء وارعى النجوم والناس تنوم واحدين بيشخروا يزعجوا يحموك لو لحظة الغميد
وكل أم بتفقد طفلها تغطيهو بي توبها التقيل عشان السقط ما يمرضه والدنيا كانت زي خريف وكان الهبوب جايانا من جهة الصعيد
وانا راقد اتكرفس براي ولا زول حداي في عنقريب من غير لحاف مرات انوم مراتٍ أخاف مرات انوم بعد العشاء ومرات براي اسهر شديد
وسؤالي شايلو معاي سنين ما لقيت جواب يطفي الحنين اصلوا الحزن صاحبني بدري زمان شديد قُبال اخش المدرسة وبعد سنين ينحسبوا في اصابع اليدين وقبال اتم المدرسة قام تاني جاء والمرة دي قام ساق أبوي وكان باكر العيد السعيد
وسمعت نسوان ينضمن قالن بخيتة سعيدة كانت ميته هينه ولينه في يوما سمح في يوم سعيد واحدات دميعاتن جرن و واحدت ولا هماها شيء  ونفس الكلام الفات سمعتوا من الرجال يوم غاب ابوي رحل بعيد قام تاني قالوا دا يوم بخيت ودا يوم سعيد
ومرات اقول باكر بيجو الا الغياب طول شديد يمكن مع النجمات هناك ويمكن يكون ابعد بعيد
النجمة صاحبتي قالت: اصلو البيرحل ما بيعود وقالت لي ما تسأل كتير دا كلام عليك هسع كبير باكر بتعرف كل شيء
والناس دي كلها في سفر والليلة مازي يوم أمس وكل زول بيجي الميعاد بيمش حتى النجوم حتى الشمس بيجي يوم تغيب وبيجي يوم تمش ويبقى الإله خالق البشر رب العرش
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة