أول رادي شفتو في حياتي دي كان رادي خالي البلولة وكان موهمنا بان الفنانين ديل ناس صغااار بدخلوا جوة السلك حق الرادي المربعات داك وبغنوا وبمرقوا امشوا اهلم وقتها كان عسكري في الجيش اشترى الرادي دا ومعاهو ستة بناطلين وستة اقمصة وجزمة كموش وكانت امنيتي ان اشتري ستة بناطلين وفيهم واحد لبني وستة اقمصة لكن وحاة القعدة دي وما قايل روحي بحيا وبكلكم لحدي هسع تيا دي ما حققت تلك الرغبة وبالكتير بكون عندي تلاتة بناطلين واللبني ما معاهم . وكان يحق لنا نستمع معه لفنانين بالاسم اولهم الفنان ابوعبيدة حسن يا وجعي عليك يا ابوعبيدة أبو عبيدة قال لي حسن ولدي لو ربنا حضرني عرسك بغني ليك فيهو أصلو لو ما الدنيا قاسية . واقترب عرس الدكتور حسن ورحل أبو عبيدة . وسوف يبدأ حفله بصوت ابو عبيدة حسن اصلو لو ما الدنيا قاسية وليبكي من يبكي ولينتحب من ينتحب وليبتهج من يبتهج والغبيان فليرقص . يا الله يا رب صبرك الجميل ورحمتك الواسعة للفنان الانسان ابو عبيدة حسن
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة