محامية وجدت نفسها دون ان تدري قد تعاملت من تظنهم قتلة بالضرورة يصيبها الهلع والخوف مضطربة جدا ومخلوعة ومتوترة دايرة زول تحكى ليهو مافي غير صاحبتها البيفهم من مجريات المحادثة انها محامية . حكت ليها بشكل خاص جدا عن هواجسها واضطرابها للاسف تسرب هذا الحديث للميديا وانتشر بشكل واسع مصادر النشر 2 المحامية المتحدثة او المستلمة والاتنين قانونيات افتراض انو تسرب من المتحدثة بعيد شوية حد الاستحالة تسربه من المستمعة وهو الاقرب
06-04-2021, 00:44 AM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
الكلام خطير جدا والمحامية تحدثت بكل اريحية . حديث صديق لصديق حتي قصة قروش ترحال حكتها لكن كنا نستهجن مثل هذا النشر وهتك الاسرار من الذين قد لايفهمون عاقبة الفعل ولكن ان يتسرب من محامى . هذا هو الاعجب شكلنا بقينا نحب نقل الاسرار وتداولها ايا كانت تلك الاسرار وان لم نجدها نختلقها
06-04-2021, 00:48 AM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
سلامات يا قريبك، طلعت تسجيل تالت على ما يبد بعد هجوم من زملائها، قالت التسجيل كان ونسة بينها وبين زميلتها سألتها عن الحاصل باعتبار علاقتها بالقضية (موكلة عن شقيقة المرحوم في خصومتها معه) فا ردت ليها بتسجيل و قالت ان ابن زميلتها هو من سربه بالخطأ و اعتذر! البغيظ في الموضوع ابدا ما اعتذرت عن تصرفها بل تحاول تبرر ليه بانه حديث خاص ولامت الناس الاتناقلوه!! تخيل
06-04-2021, 00:51 AM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
يعني بالواضح مافي خصوصية ماتقول لي صاحبي ولا صديقى ولا قروب اخوان تفرط .... يضربك الهوا وتنداح وتنضم تلقا كلامك زاتو يجيك راجع من اكتر من مصدر الاسكرين شوت ولا الريكورد اي زول يمسك عدتو عليهو الكلام لو حرقك اكتبو وامسحو ما ترسلو 😅😅😅
06-04-2021, 00:48 AM
عبدالمنعم الطيب حسن عبدالمنعم الطيب حسن
تاريخ التسجيل: 11-15-2012
مجموع المشاركات: 4468
اعتقدت ان المحامية صاحبتا هي التي بدأت السؤال، وكمان يبدو وكأن الحديث تمت تنقيته حيث انه لا يظهر اي صوت للصديقة طوال فترة الكلام الطويلة فبدأت المحامية الطيبة وكانها تحدث نفسها، ... الفلترة حاصلة يا صاحبي تحية يا زول وشوق،،،
06-04-2021, 00:56 AM
عبدالمنعم الطيب حسن عبدالمنعم الطيب حسن
تاريخ التسجيل: 11-15-2012
مجموع المشاركات: 4468
ثم ان خصوصية واسرار الاخرين اذا وصلتك بحكم وظيفتك، فليس من حقك ان تثرثر بها هكذا،، ... مرة في برامج العيد مستضيفين دكتور نساء وتوليد خفف دمو شديد وحكي عند قصص وخصوصيات واسرار مرضاه هكذا على الهواء وهو يضحك والمذيع يضحك قال جاءته سيدة تستشيره هل هنالك امل في الخلفة ام تمشي الحج بالقريشات ديل وضحك وقال قتا ليهو ولادة لسيدة فوق السبعين ماف امشي الحج السنة دي لانو السنة الجاية مش حا تقدري وقرقرقرقر..
بالله دي نكتة .. الورم كتير يا صاحبي ،،
06-04-2021, 00:58 AM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
مرحب ودو تخيل انا ما لايمها ناس اتعاملت معاهم لمدة عشرة يوم وكان ممكن يجوك في بيتك بالليل وتكتشف حسب ظنك انهم ممكن يكونو قتلة . وفي حادث بشع زي دة بتحلج صامولة ومابتكون متماسك وداير تحكي زول . حكاية ود صاحبتها دة طلس ساي زي لامن ترسل حاجة مخجلة في قروب وتجى تعتذر تقول دة ولدي الصغير بلعب بالموبايل انا غايتو متعاطف معاها والله موقف مربك جدا ليها وحديثها واضح تم في اقل يوم من الحادث
06-04-2021, 01:05 AM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
مرحب منعم ليك وحشة ياخ تسجيل واتس دة الزول بكون براهو البتكلم بعدين يا منعم زي مابقول صحبي اصلو هي خزنة ؟ اي زول فينا عندو زول بحكى ليهو لكن معاك في انتهاك للخصوصية عندنا بشكل غريب تنتقى صاحب تحدثو يكون عندو صاحب غيرك يكلمو وهكذا تلقا نفسك قاعد في السهلة اها زي الدكتور دة اكيد جدا لا انا لا انت عرفنا المرضى ديل لكن اكيد المرضى البتكلم عنهم كل الناس الحولهم عرفوهم ديل منو دة طبيب جلف وجاهل ويخلو من حساسية الانسانية والذوق اما المذيع فحدث ولا حرج مافيهم مذيعا تكاد تقول استثناء او مذيعة
06-04-2021, 01:05 AM
Hafiz Bashir Hafiz Bashir
تاريخ التسجيل: 12-04-2004
مجموع المشاركات: 7192
حبابك مولانا كنت عاكي في الفيس في سياسة البلد المامعروف ماشة علي وين ولا جاية من وين انا عارف خصوصية المحامى وموكله كثقافة عامة يفترض تكون كونفدنشيال السر بينهم محمى جدا لكن لكن هل دة يخص حتي لوحكيت لصديق محامى ايضا بقصد النصيحة ولا تخفيف التوتر هسة في الحالة دي منو الطلع؟ الاتنين محاميات منو الفيهن تحمى الخصوصية ؟ ومنو الافشت الخصوصية؟
06-04-2021, 01:17 AM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
اها بعد دة عندك كلام حارقك ولا سر اوعك ترسلو في واتس لي صاحبك ولا صاحبتك تموت بيهو ولو غلبك امشى لي صاحبك عديل ونسو بيهو ماتضرب تلفون امكن يسجلو ناضمو بيهو مباشر ولو مرقو انكرو بس وبعد تنكرو يستحسن ترفع فيهو قضية رد شرف اهو كلو بقا زي المسلسلات المصرية اذا كان ديل ناس القانون زاتو بفتو 😆😅
06-04-2021, 02:38 AM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
Quote: قانون المحاماه لسنة ١٩٨٣م (الماده ٣٠/وتقرأ ...علي المحامي ان يمتنع عن تجريح الخصوم او ذكر الامور الشخصيه التي تسئ اليهم او اتهامهم بما يمس الشرف او السمعه. مالم تستلزم طبيعة الدعوي او ضرورة الدفاع عن مصالح الموكل) وكذلك الماده( ٣٢/ سر المهنه...١- لايجوز للمحامي أفشاء الاسرار التي يقف عليها من موكله او مايكون قد وصل اليه عن طريق مهنته من وقائع او معلومات . ولو بعد إنتهاء وكالته او زوال صفته . مالم يكن ذكرها له قد تم بقصد ارتكاب جريمه) وكذلك الماده (٥٢/الاسباب الموجبه للمحاسبه ١- كل من يخل من المحامين بواجباته او بشرف مهنته او تصرف تصرف يحط من قدرها .او مايمس كرامة المحامين او خالف حكم من احكام هذا القانون. (يحاكم امام مجلس محاسبه ويعاقب عند الادانه.بأحد الجزاءات المنصوص عليها.في الماده ٥٣ ---- وذلك مع عدم المساس بأية أجراءات قد تتخذ ضده بموجب قانون آخر). وكذلك المخالفه (للماده ١٨/من ميثاق أخلاقيات مهنة المحاماه----يجب علي المحامي الحفاظ علي علاقة الثقه المتميزه بينه وبين موكله .والتي يحصل بموجبها المحامي علي أسرار موكله). والماده (٣٠/يمتنع علي المحامي تجريح الخصم بما يمس الشرف والكرامه.) ويجوز ان تقدم ضده شكوي بموجب الماده ٨٤---تحت طائلة الميثاق. (لجنه من ثلاثه من الزملاء تسمي لجنة أخلاقيات المهنة تشكل من مجلس النقابه)
06-04-2021, 03:04 AM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
دة كلام جيد يا ودو ويظل سؤالى قائما هى تحدثت مع محامى آخر عارف نفس القانون وضوابط واخلاقيات المهنة . تحدثت معاهو بصدد شنو اصلا ؟ كزميل قانونى بقصد اخذ النصيحة القانونية او التوجية مثلا ؟ في البال انو في مكاتب محاماة فيها أكتر من محامى يعملون سويا ويتشاركون الرأي فرضيتى دي مستعد اتنازل عنها لو حكت لشخص آخر ما محامى لكن عموما زي ماقلت نحن بنستسهل افشاء المعلومات التى حصلنا عليها بحكم العلاقة الخاصة وامكن ظهرت الخصلة دى مع انتشار النت ومنصات التواصل والمواقع شئ مقاطع فيديو تم تسجيلها في لحظات خاصة جدا جدا لايمكن الحصول عليها الا من صديق ولا ونسة برضو خاصة . واخص بعا مثلا بعض مقاطع الرقص للنساء التى يتضح انها تمت داخلة منزل وسط الصديقات كسلوك نسوى وسببت دمارا للاسر وهتك النسيج الاسري والاجتماعى او بعض الاتصالات المرئية بين شخصين بقينا فضائحين وماعندنا حساسية تجاه الاسرار والثقة المتبادلة انا مثلا لا اعطى تلفون شخص لشخص آخر دون استشارته واتحايل علي الطالب بقول كدى اشوفو ليك عندي ولا مافي امكن ما داير يديهو رقمو رغم سهول الحصول علي رقم اي شخص من خلال بعض البرامج مثلا سودانى عندها خدمة اعرف اسم المتصل . وانا شايفو ما صاح ابدا ليه نحن بنستهين بخصوصية الاخرين ؟ ليه بنتعامل مرات بسبهللية في اخطر الاسرار اهو في السياسة براك شايف كمية الاسرار البتطلع من خلال المعارف والاصدقاء . وتكون اسرار خطيرة ومدمرة لا السياسي حريص عليها ولا البقولها احرص منو عشان كدة اي فضيحة زي دى بكون زعلان من الزول المرقها اصلا .اقصد الفضائح الاخلاقية لا تلك التى تخص امر الوطن
06-04-2021, 03:15 AM
Abureesh Abureesh
تاريخ التسجيل: 09-22-2003
مجموع المشاركات: 30182
أخونا عبدالحفيظ.. سلام أول ما قريت عبارة بهدوء عرفت ان هناك عاصفة جاية.. لم اطلع على الفيديو او التسجيل، ولكن لو فيه ذكر الفساد الحكومى او من المتمكنين فلماذا الدس والسكوت؟
06-04-2021, 03:21 AM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
حبابك ابوالريش لا بل تخص تماسك علاقاتنا الشخصية تقول لي صاحبك عرست بالدس ودة سر يقوم يكلم واحد تالت قبل الواطة تمغرب تلقا نفسك راقد مستشفي في قسم الجراحة والعقد زاتو يفوتك وقد تعجز لاحقا عن ممارسة حياتك الزوجية زاتا 😆😆
06-04-2021, 03:30 AM
Hafiz Bashir Hafiz Bashir
تاريخ التسجيل: 12-04-2004
مجموع المشاركات: 7192
Quote: هى تحدثت مع محامى آخر عارف نفس القانون وضوابط واخلاقيات المهنة . تحدثت معاهو بصدد شنو اصلا ؟ كزميل قانونى بقصد اخذ النصيحة القانونية او التوجية مثلا ؟ في البال انو في مكاتب محاماة فيها أكتر من محامى يعملون سويا ويتشاركون الرأي فرضيتى دي مستعد اتنازل عنها لو حكت لشخص آخر ما محامى
لا يجوز للمحامي يا أبو سن إفشاء أي معلومة تخص موكله ولا حتى لمحامي آخر ما لم يأخذ موافقة الموكل. في حالة التوكيل كان لمكتب محاماة فذلك يعني أن الموكل فد وافق على إعطاء معلوماته لكل المحامين في المكتب وفي هذه الحالة لا يجوز إفشاء معلومات الموكل خارج المكتب.
06-04-2021, 03:49 AM
Hafiz Bashir Hafiz Bashir
تاريخ التسجيل: 12-04-2004
مجموع المشاركات: 7192
مشاركة معلومات الموكل بين محاميه وأي جهة أخرى تحتاج لموافقة مستنيرة من الموكل. مكاتب المحاماة الملتزمة بالمهنية تطلب من الموكل التوقيع بموافقته على نموذج مكتوب يحتوى كل الجهات المخولة بالإطلاع على معلومات الموكل.
06-04-2021, 03:54 AM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
تشكر مولانا يعني نتريث ونشوف المحامية دى منو زاتا . معاها في مكتب واحد ولا من مكتب آخر برضو يا مولانا مثال منعم الفوق داك بوري اننا عندنا خلل حتي للناس العندهم قانون ولوائح . وهم الاطباء والمحامون خلل قد يعرضهم للعقوبة او التأثير في مجال عملهم فما بالك ببقية الناس ياربي في مرض زى دة ؟ التلذذ كون انك جبت معلومة لا يعرفها الناس وطلعتها من جوة ؟ التبرع بالمعلومات دون داعى ؟
06-04-2021, 04:11 AM
Hafiz Bashir Hafiz Bashir
تاريخ التسجيل: 12-04-2004
مجموع المشاركات: 7192
مثال منعم الفوق داك يا أبو سن إذا كان بنفس الطريقة الحكاها منعم دي، ما فيهو إفشاء معلومات. إفشاء المعلومة لازم تكون فيهو إشارة لشخص محدد. الإشارة ممكن تكون مباشرة بذكر الإسم او رقم الجواز او الرقم الوطني او أي سمة لا تتكرر عند أكثر من شخص. وممكن تكون غير مباشرة ولكنها دالة على شخص محدد إذا إجتمعت أكثر من معلومة مع بعض مثل ذكر العمر وعنوان السكن او تاريخ الميلاذ او صفة غير حصرية مثل أن تقول طويل أخدراني. حسيب رواية منعم الدكتور ذكر عمر المريضة فقط وهي معلومة لا تدل على شخص محدد. ولكن ربما تكون طريقة حكاية الدكتور للقصة ليست لائقة بسبب آخر إذا كان فيها إستهزاء بشكاوى المرضى.
06-04-2021, 04:30 AM
Abureesh Abureesh
تاريخ التسجيل: 09-22-2003
مجموع المشاركات: 30182
وهو زاتو فى محامين يا حافظ؟ وأقولها بالفم المليان.. بإستثناء قلة قليلة جدا ديل شرامة لا يستحقون شرف رخصة ممارسة المهنة.. اليزعل يزعل.. يزورون أوراق الأراضى ويزورون أوراق السيارات ولا يرف لهم جفن. وأنا أشهـد على حادثة تزوير شهادة ميلاد من أجل الجنسية.. المحامى جاب نفرين شهدوا بأنهم رأوا السيدة فلانة الفلانية قالت أمام المحامى أنها والدة فلان الفلانى.. والسيدة المذكورة توفيت من عشرين سنة. ديل تقول عليهم محامين؟ معظم المحامين الذى تخرجوا فى زمن الإنقاذ ما عندهم ذمة، وهدفهم المال.. لأن الإنقاذ أعلت من قيم المادة على حساب الأخلاق.. فصرنا نسمع بالتسهيلات (الرشوة سموها تسهيلات) وبالتحليل وبكل شئ يكسر القيم الدينية.
06-04-2021, 06:01 AM
خضر الطيب خضر الطيب
تاريخ التسجيل: 06-24-2004
مجموع المشاركات: 9960
سلام ود اب سن و حبابك جيت اسلم بس و مفتقدنك ما تنقطع انا ما سمعتا تسجيل المحامية لكن سمعتا تسجيلين لصديق الدكتور المغدور و قريت تحليل للفريق عابدين الطاهر
Quote: تحليل الفريق عابدين الطاهر: : - الان بعد ما تسرب من وقائع واضح جدا ان هنالك علاقة بين شقيقة القتيل وابنائها وما حدث … تلفون القتيل ومراجعة اخر محادثات قد يؤدي لترجيح علاقتهم بالجريمة ان وجد اتصال من احدهم متزامنا مع وقت الحادث … وكذلك مراجعة تلفونات المشتبه بهم وهم غالبا من اتصلوا بالقتيل … واقعة وجود البطيخة علي بداية السلم تشير بوضوح ان القتيل وضعها لالقاء التحية علي احد الجناة وهو معروف لديه ووجوده في انتظاره يشير بيقين بانه من اقاربه ومعروف لديه ولدي والدته … يمكن اشتراك آخرين من خارج الاسرة في تكملة هذه الجريمة بمعرفة صاحب المصلحة في الحصول علي مستندات مهمة … الخلافات الحادة التي تأكدت بين القتيل وشقيقته واهتمام ابنائها بهذا الامر وصلت حد ان يقطع احد ابنائها دراسته لمتابعة القضايا التي بينها وبين القتيل خاله ووصول ابنها من لندن ايضا بسبب هذه القضايا يوضح اهمية هذه القضايا وتعقيدها مما تطلب وجودهم بقرب والدتهم … في تسجيل المحامية ظهر واضحا عدم رغبة شقيقته التحدث عما حصل لشقيقها رغم ان الجميع هزته هذه القضية وايضا اظهر التسجيل انزعاج ابنها وعدم اخطاره للمحامية بما حدث لخاله القتيل وهذا امر بالطبع غير طبيعي ثم افادة شقيقة القتيل للمحامية بان ابنها حدثت له هستيريا وهو الان بمنزل جده بابي روف .. والسؤال لماذا حدثت له هستيريا من حادثة مقتل خاله رغم اظهارهم عدم اهتمامهم بما حدث ؟!!! هنا تكمن الشكوك والريبة وتاخذ قيمة اكبر … استطيع ان اقول مبدئيا رجحان تورط شقيقته وابنائها في هذه الحادثة واستعانتهم بآخرين للانتقام من خالهم والحصول علي المستندات التي يبحثون عنها وظل خالهم القتيل طوال تلك الفترة وبموافقة والدته والوقوف في صفه ضد شقيقته وحرمانها من استحقاقاتها من ورثة والدها … مجرد تحليل قد يصدق وقد يخيب ولكن وفقا للمعطيات المتوفرة حتي الان يظل هو الارجح والله اعلم …
06-04-2021, 06:18 AM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
تشكر مولانا للايضاح يا ابوالريش ما بالتعميم دة ياخ في محامين حتى الان يتمسكون بضوابط ولائحة تنظيم مهنة القانون . وفيهم ناس بتبرعوا مجانا لمن لا يملك حق توكيل محامى لكن صابها من صاب غيرها من فساد كمعظم المهن الاخرى وبذات النسبة
06-04-2021, 06:31 AM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
تعليق خارج الموضوع يا قريبك، غض النظر عن انتهاك العلاقة بين المحامي و الموكل و اخلاقيات المهنة وكذا، الزولة دي وناااااسة النوع البحكي ليك ادق التفاصيل الضروري وغير الضروري عن الموضوع ولا تترك شاردة ولا واردة! و مرتبة جدا في الرص حتى لما تاخد تخريمة لموضوع جانبي كانت بترجع للموضوع الرئيس بكل سلاسة و احترافية! هذا هو الشمار كما يجب أن يكون😀
ياخي دة محامي ملتزم شديد :) أنا شفت لي واحد أسماء الشهود وأرقام بطاقاتهم الشخصية مطبوعة جاهزة في الكمبيوتر والمحامي ظبط التوقيع براو .. قال مافي داعي للتعب ياخ
زمان جمب السوق الشعبي مدني في بيت عزابة اسمه بيت الحلافين عندك أي قضية كايس لي شاهد طوالي تمشي البيت تجر أقرب واحد تديهو حقو بيحلف ليك في المحكمة قالوا لما تدق الباب ويفتح ليك واحد منهم ولا بسلم عليك ذاتو بقول ليك: مالو؟ نكر؟!
06-04-2021, 11:42 AM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
هههه اي يادو شمارها مغربل غربلة جد وناعم مشاوير ترحال حسبتها واحدة واحدة حتي الاستلمت قروشها وغنجت بيها وركبت الهايس زاتو . كنت متوقع تذكر قيمة الترحال كم زاتو وكمان بحركة السودانين نصحتهم مايبزعقو قروش امهم ويركبو مواصلات هههه غايتو واضح انها محامية مفلسة وبتلقط في رزقها. قالت ليها امشى اعملي وبديك باقي قروشك اكلت معاها جنبة دي غايتو لو عملت رسالة تانية الحقوني بيها زولة حكاية خلاس
06-04-2021, 11:49 AM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
يا احمد لو اتشدد امورو بتبوظ لازم يسهل الخدمة للزباين يحضر الشهود وممكن يمضى زاتو وغالبا المسايل بتمشي لانو مافيها سرقة واجرام لكن حاليا بتشددو معاك . القصة بقا فيها احتيال شديد وفهلوة تشتري قطعة واطة تغيب منها تغترب ولا حاجة تلقاها مبنية عمارة وزول ساكن فيها باجراءات قانونية صحيحة وانت البايع زاتك تمشي المحكمة احتمال تخلي الاغتراب تساكك فيها يظل الامر كما هو عليه حتى يفصل في القضية اوعا يكون عندك واطقة وتجيب ليك عود وتلصق فيهو لوحة بي اسمك واسم المربع دى قالوا ممكن يبيعوها عشرة باوراق رسمية والفالح الببنى اول سودان واجرك علي الله
06-05-2021, 06:41 PM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
قال ليكم لابد من مضرور شكلنا بعيدين خالص من المهنية هاكم اقرو
بيان من امانة شؤون المهنة بلجنة تسيير نقابة المحامين السودانيين لعل كل الناس وخاصة الزملاء المحامين طالعوا واطلعوا على التسجيل الصوتي الذي بثته إحدى المحاميات والذي اثار كثيرا من التساؤلات حول إفشاء اسرار المهنة ؛ ومن المعلوم فقها وقانونا أن المحامي هو مخزن أسرار موكله والحفيظ عليها ولذلك نص قانون المحاماة على منع افشائها في نص المواد 36 و37 منه ورتب على ذلك جزاءات عند مخالفة هذا القانون أو ميثاق أخلاقيات المهنة وذلك بواسطة لجنة المحاسبة التي تشكلها لجنة قبول المحامين بموجب المادة 58 من قانون المحاماة بعد أن ترفع لجنة شكاوي المحامين توصية بذلك بعد التحقيق الذي تجريه بناءا على شكوى تقدم لها وذلك وفقا لما هو منصوص عليه في لائحة شكاوي المحامين؛ والذي لا خلاف حوله أن الأستاذة الزميلة خالفت القانون وميثاق أخلاقيات المهنة بافشائها لاسرار موكلها لكن من المعلوم قانونا ايضاأن مخالفة القانون اي قانون لابد فيه من شاكي أو مبلغ أو مدعي فمثلاً القانون جرم القتل ولكن لابد من مبلغ أو شاكي للجهات المختصة كما القانون جرم إفشاء أسرار المهنه وايضا لابد من شاكي أو مضرور يتقدم بشكوى لدى لجنة الشكاوى ومن جانبنا نحن في امانة شؤون المهنة بلجنة تسيير نقابة المحامين السودانيين ندين هذا السلوك غير المسؤول من الأستاذة المحامية ومن اي محامي يبدر منه مثل هذا السلوك والحق مكفول لاي متضرر اتخاذ الإجراءات المنصوص عليها قانونا كما يحق للجنة قبول المحامين اتخاذ ما تراه مناسبا وعادلا هذا ما لزم توضيحه شيخ الدين التويم المحامي امين أمانة شؤون المهنة بلجنة تسيير نقابة المحامين السودانيين
06-05-2021, 06:53 PM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
غايتو خالتو منال كمحامية إنتهت وحكمت علي نفسها بالإعدام وتبريرها في التسجيل الأخير أخير كان تسكت أو أقلاها تعتذر بدل تخت اللوم علي ولد توحة اللي نشر التسجيل بالغلط وإعتذر هههه أنا لو في مكان النايلة خالتها والله ما أخلي منال شمارات دي .. شالت حسها هسه دي لو قالو آخر محامية موجودة في البلد البمشي ليها منو؟ وكمان شوف البيان بتاع لجنة تسيير نقابتهم حتي في الصياغة فاشلين بدل يطبق اللائحة في عضو أفشي أسرار موكلهم وبشع بيهم في الأسافير منتظرين (مضرور) يرفع شكوي؟ لكن يا أبو سن نرجع نقول ده حال البلد في كل النواحي والله المستعان.
06-05-2021, 11:34 PM
Kabar Kabar
تاريخ التسجيل: 11-26-2002
مجموع المشاركات: 18537
عبد الحفيظ..حبابك يا صديق وحباب الأصدقاء هنا.. استمعت لتلك الأحاديث ، وهي كارثة تضر بسمعة مهنة المحاماة في السودان وتضع مصداقيتها واخلاقياتها في محك كبير امام الرأي العام. الكارثة الأخرى ، وهي البيان المنسوب الى (أمانة المهنة) بلجنة تسيير نقابة المحامين السودانية. فمن صاغ البيان لم يكلف نفسه أو نفسها للرجوع لنصوص القانون بدقة ، حيث تمت الإشارة الى المادة (36) وعنوانها (التنحي عن الوكالة) والمادة (37) وعنوانها (ما يجب رده عند انتهاء الوكالة) ، والمادة (58) اعلان المحامي. وكلها نصوص لا علاقة لها بواقعة حديث السيدة المحامية. في هذه الواقعة ، المواد المتعلقة بها من قانون المحاماه لسنة 1983 هي المادة (32) وعنوانها (سر المهنة) تحديدا البند (1). والمادة (52) وعنوانها (الأسباب الموجبة للمحاسبة) . والقاعدة (18) من (ميثاق اخلاقيات المهنة) المجاز في 15 فبراير 1982. والجدير بالذكر هذا الميثاق اشارت اليه المادة (52) البند (3) باعتبار ان مخالفته توجب المحاسبة بموجب قانون المحاماه لسنة 1983. المادة (54) من قانون المحاماه لسنة 1983 عنوانها (لجنة الشكاوى) أو (لجنة شكاوى المحاميين) ويراعى في تشكيلها ممثل للسلطة القضائية ، ممثل لوزارة العدل ، وممثل للمحاميين ، والمادة (55) من نفس القانون وضحت اختصاصات لجنة الشكاوى. ولا ادري من اين جاء السادة في (امانه المهنة) بحكاية (لجنة قبول المحاميين). المادة (56) وعنوانها (مجلس المحاسبة) والذي يتكون بناء على توصية من (لجنة الشكاوى) ، والمادة (57) وعنوانها (تشكيل مجلس المحاسبة) ويراعي فيه تمثيل القضاء ، العدل ، المحاماة ، وبشروط معينة كما هي مفصلة في المادة.
(2)
هل حديث المحامية سبب ضرر يستوجب المحاسبة؟ وما هي الأطراف التي لحق بها الضرر ، سواءا بطريقة مباشرة أم غير مباشرة؟ نعم الحديث فيه تسبيب ضرر كبير للأطراف التالية: اولا: موكلي المحامية وهي طرف في قضايا ينظرها القضاء ، وانتشار الحديث في وسائل نشر عامة ، والإحتجاج بان الحديث تم الإدلاء به في جلسة خاصة لا يعفي عن المسئولية. ثانيا: كافة محاميات السودان ، في مختلف انحاء السودان ، لأن الحديث جاء من قبل زميلة محامية ، وان الرأي العام في السودان يتأثر كثيرا بمثل هذه الأحاديث ومصداقيتها لأنها مباشرة من المتحدثة ، مما يؤثر في سمعة المحاميات السودانيات ومصداقيتهن كمؤهلات للقيام بمهنة المحاماة في السودان. ثالثا: محامو السودان ، باعتبار ان هذا حديث يضر بسمعة المهنة ويفقد الناس الثقة في المحاميين. كيف يتم التعامل مع هذا الحدث؟ شكاوى من افراد أو مجموعات الى لجنة الشكاوى في نقابة المحاميين السودانية ، وتقديم التسجيلات والتأكيد على ان سرعة انتشارها في وسائل التواصل الإجتماعي جعل ضررها اكبر.
تحياتي
كبر
06-06-2021, 07:20 AM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
ابو سن السلام عليكم وعلى ضيوفك الكرام ... ياخ وحمدا لله على سلامة العودة طولت الغيبه ياخ ... المحامية غلطانه ثم غلطانه وياخ معقول الوولد ده شال الرسايل دي بدون علم امو وفتح جوالها ورسلا للجميع بدون فرز ياخ ده كلام فطير ولا يدخل عقل اي انسان ... وكان الاولى هي تصمت خيرا من ان تقعد توعظ في الناس وتعمل فيها ما مذنبه ... هذا رايي والسلام ...
انتو وين سمعتو حديث المحامية دي!!؟؟ انا فتشت في اليوتوب وما لقيت شئ.. ممكن تنزلوا لينا حديثها هنا عشان نقدر نشارك معاكم في التعليق ونشوف اذا هي غلطانة ولا مظلومة
06-06-2021, 10:21 AM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
المحامية اسمها بالكامل منو...ذكرت انو اسمها منال....اول خطوة زي ماشهرت و انبهلت و احتقرت الموت و المهنة..نعرف اسمها عشان الناس تتفاداها دي ابسط حقوق الناس اما النواحي القانونية زي ما قال الأستاذ كبر اعتدت على حقوق الموكلة.. و المهنة و الاخلاق...لو اهل مهنتها بهمهم سمعتهم يتخذوا الاجراءات... لم يشفع الموت عندها لتحترم هيبته....
06-09-2021, 05:33 PM
محمد محمد قاضي محمد محمد قاضي
تاريخ التسجيل: 12-23-2014
مجموع المشاركات: 1603
الأستاذ محمد كبر سلامات شوفتك في بوست تاني تذكرت إني كنت عايز أعقب كلامك في شأن المحامية وبيان لجنة تسيير نقابة المحامين السودانية
Quote: كيف يتم التعامل مع هذا الحدث؟ شكاوى من افراد أو مجموعات الى لجنة الشكاوى في نقابة المحاميين السودانية ، وتقديم التسجيلات والتأكيد على ان سرعة انتشارها في وسائل التواصل الإجتماعي جعل ضررها اكبر.
طيب كلامك ده تقريبا جزء من بيان لجنة المحامين علي المضرور اللجوء للقانون- صح؟ إن كانت نقابة المحامين السودانية عندها لائحة داخلية فلماذا لا تطبق مواد اللائحة علي أعضاءها دون أن تنتظر مواطن عادي (مضرور) من أحد أعضاء النقابة ليرفع شكوي للنقابة؟ أنا كمواطن مضرور من محامي أو من طبيب أو مهندس أو نجار أو أي صاحب مهنة طوالي بمشي مركز الشرطة بفتح بلاغ وأتابع القضية من هناك علي حسب طبيعة القضية. تحياتي عبد الحفيظ
06-09-2021, 09:24 PM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
سمعنا بخبر القبض على الشقيقان المتهمان في الجريمة، احدهما كان له علاقة عمل مع الاسرة في السابق، حتى الآن لم تصدر الشرطة ما يوحي بتوجيه التهمة لافراد الاسرة الآخرين و اتمنى ان لا يكون لهم اي علاقة بالجريمة. هل ادركت المحامية الآن فداحة ما فعلت!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عبدالحفيظ ابوسن
محمد البشرى الخضر
عبدالمنعم الطيب حسن
Hafiz Bashir
Abureesh
خضر الطيب
بدر الدين الأمير
محمد محمد قاضي
Kabar
ياسر السر
عمر نملة
فيس بوك
تويتر
انستقرام
يوتيوب
بنتيريست