: والله مهما كان .. مافي أجمل من شعب السودان_ د.علي الكوباني

Quote: حبا وكرامة علي الكوباني والله مهما كان ما في اجمل من شعب السودان..ومهما تكالبت علينا التماسيح والحيتان..ثورتنا مبروكة ومنصورة بإذن الرحمن🤲😍 أمس قاعد بفكر ومدبرس ورغم اني قلت اوقف الكتابة والمفاققة مع الاحباب عشان ما احبط زول معاي...فكرت وقلت هل يا ربي كنت ساذج زي بعض اهلي في السودان…؟ لما اتخيلت انو الحكومة بشقيها السيادي والتنفيذي حيبدوا سياسة التقشف وكريب الاحزمة على البطون من اول ساعة في السلطة.. هل كنت عبيط لما دمعت وانا شايف التعايشي واقف في صف الجوازات في المطار مع المواطنين العاديين ولا مشى صالة رئاسية ولا يحزنون..وقلت خلاص بدينا الطريق الصح..وحنبقى زي الخواجات.. لما عندهم الوزيرة اتفضحت لانها استعملت كرت البنزين بتاع الحكومة في مشوار خاص ورغم انها كانت ناوية ترجع القروش لكنها استقالت بعد ما الناس ما عذروها في (100 يورو بتاعت الشعب)..😲 نعم يا احباب ..اخوكم اتكيف لدرجة العبط لمن الجماعة كلهم ركبوا الحافلة لاداء القسم ..وقلت يا زول خلاص كل السياديين والوزراء حيرجعوا العربات الفارهة لتباع لمصلحة تعمير البنية التحتية الاساسية..وحيطلبوا عربات بسيطة من شركة جياد..ليهم ولضيوفهم (وخلونا من الوهم بتاع الامن والتأمين..نحن عارفين الكفته فيها كم رزه😏)..قلت يا سلاام تكون ضربة بداية لتأهيل بسيط للمستشفيات ومراكز غسيل الكلى..والمدارس الما في الولايات (محل تلاميذنا بقروا تحت الشجر وكلكم شفتوهم وفات اضانكم😏) وغيرو مثل مشروع الجزيرة ودلتا طوكر ودارفور وكردفان والسياحة في الشمالية.. قلت ناس السيادي والحكومة حيعملوا كده عشان يكونوا قدوة للشعب وكل الناس تدي بالتقدر عليهو ..لاننا اصلا حب التكافل والكرم والتعاضد جاري في دمنا وبالفطرة وما مكتسب.. لكن اكتشفت اني كنت اهبل..😰 وبالذات بعد بيان السيادي بخصوص العربات الفارهة ال35 اياها..وقالوا ابطلوا ولغوا المشروع الهايف ده..وانهم ما كنا عارفين واصلا ما قاعد نناقش الحاجات دي ..وده شغل الامين العام للمجلس السيادي..😳 ايي والله..عربات كانت حتكلف الشعب ما يقارب نصف تريليون جنيه بالقديم..والجماعة قالوا ما عارفين ونكروه حطب والسيد الامين العام اتصرف براهو لدرجة انو اختار الشركة الحتستورد العربات..😲 وده العذر الاقبح من الذنب..وهاك عندك للمقارنة من السلف الصالح ..عندما طلب الخليفة العادل امير المؤمنين عمر بن عبد العزيز من امين بيت مال المسلمين راتب شهر مقدم عشان يشتري ملابس لطفلته بعد ان احست بالدونية من الفقر امام بقية الاطفال.😲تخيلوا يا احباب ..الامين العام لبيت مال المسلمين(السيادي) قال ليهو ممكن اديك الراتب المقدم بس تديني مكتوب ضمان انك حتعيش باقي الشهر عشان تستحق الراتب..فخجل امير المؤمنين وندم واعتذر وانصرف(والغريبة ما أقال امين بيت المال..بااالغ يااخ)..وقع ليكم يا احباب ..وزير المالية قال (لا) لرئيس البلاد ..ما قال ليهو حاضر سعادتك ..وراتب مقدم ليه..نوصي نجيب للبنية اجمل الملابس😌..والغريبة(رئيس البلد) اختشى وندم على طلب راتب مقدم (وهو ذاتو ما عندو مال يكسي بيهو بنتو)..عايزكم تتخيلوا معاي الفلم ده لو حصل عندنا..في ال30 سنة الفاتت او هسه ذااتو.. كان امين بيت المال اترفع في (تاتشر)..سوري اقصد في بعير اسود وكان ودوهو لخيمة الاشباح ورصعوه رصيع الجن..ولو محظوظ وامو داعية ليهو ..يمرق من قصة الخوازيق اياها..😰 نعم ..يا احباب تدافعنا بكل الحب للقومة للسودان وتراهو ممكن اي امين عام يقوم يطلب ضعفين ما جلبته القومة من اموال عشان عربات للضيافة والفلم الهندي داك😡 زمان قلت لصديقي قدوم كلب حفار القبور ..قلت ليهو ياااخ ما معقول ..انت بتصرف اي قروش تلقاها في نفس اليوم..وما عندك غير العراقي والسروال وشبشب (تموت تخليه) وترجمة للشباب ..ده شبشب كان بعملوه من اللساتك القديمة بتاعت العربات..وقلت ليهو يا قدوم كلب الجماعة في المقابر قالوا لي لمن تكون منقنق شديد بتمشي تشتري اكل رهيب وتعزم كل عمال المقابر والشماسة وتاني يوم بتكون مفلس (فُلسكاب جد)..قال لي يا دكتور زمان جاني زول تريان الصباح وطلب مني حفر قبر كارب عشان صحبو وجارو اتوفى ..وغمت لي السمينة ومشى..وتصدق القروش الاداني ليها لمن ماسكة فيها الريحة السمحة الكان متعطر بيها..وقال لي بنجيكم مع الجنازة بعد صلاة العصر للدفن ..هل تصدق انو جابوه ميت ودفنوه في نفس القبر الطلبو بعد صلاة العصر بعدما جوه اهلو وطلبوا قبر تاني لأنو الزول اتوفى بعد ما رجع لبيت البكا بتاع صحبو..😰 قال لي مفروض انت تكون عارف يا دكتور انو ما في زول ضامن بكره ولا باقي اليوم ذاتو..وكل ما تلقى فرصة اعمل معروف في البستحقوه فعلا..ياااه يا قدوم كلب ..الاتعلمتو منك في التخصص ما اتعلمتو😭 دحين يا ناس السيادي كلكم حتى العندو دهب ولا غيرو..ويا ناس حمدوك وحكومتو..ابدوا بنفسكم وكونوا قدوة لباقي الشعب..بيعوا كل الهتش بتاع الفارهات وانكربوا واعملوا تقشف جد..اعملوا برامج اقتصادية عاجلة وخلونا من الشحدة ..شجعوا المصدرين واقفلوا البلد من الاستيراد الا الدواء ومدخلات الانتاج..اخدوا مثال من الثورة الصينية..اعلنوا عن الثورة الزراعية والتعليمية وبعدين الصناعية ..شوية شوية ما قلنا طوالي.. وطلعوا الناس تمشي مواقع الانتاج وانتوا قدامهم..انزلوا من البيوت العاجية دي ..لو اتقشفتوا جد الناس بتتحمل معاكم..وبعدين عيب كبير لمن يطلب موظف تمويل لعربات بقريب 500 مليار وكلكم برئيسكم ونائبه وباقي الجماعة تقولوا يطرشنا ويعمينا..😡 لا لا ..ده مال الشعب وانتم حراس عليهو مفروض اي شي يتصدق منكم بالاول يا وكلاء الثوار..وعليكم الله كلكم يا ناس الحكومة لمن الواحد فيكم يركب اللكزيس ويشغل التكييف وقدامو المواتر ..وامكن عندو عربية للبيت ومستلزماتو وكده😉..وحاشية تكلف الشي الفلاني ..اتذكر لمن يضربك البراد ..انو في ناس بتموت عشان مشاكل غسيل الكلى..وانو اقسام الطوارئ في المستشفيات اخير منها الادبخانات في معظم مستشفيات العالم(الله يكرمكم)..اتذكروا انو في ناس بقت ما بتقدر تعاين في وشوش اولادها وزوجاتهم عشان غلبهم يوفروا لقمة العيش البسيطة😭 ..اتذكروا صبر الناس على الصفوف في الافران والموصلات وغيرو عشان دي حكومة الثورة الجابوها..اتذكر يا حمدوك انو عشان (نعبر وننتصر) عايزين خطوة للامام..وجدية وحسم وقوة ما بس رومانسية وكلام شايلو الهواء..😏 # هل ما زلت انا ساذج وعبيط واهبل عشان لسه ما قنعت من الناس الجابتهم الثورة وختتهم قدام وريستهم واستوزرتهم بعد ما ضحى الشهداء الكرام وشباب وشعب السودان النبيل..! ؟ لا ما اظن كده..ولسه الامل كبير وربنا كريم.. # لانو والله مهما كان ما في اجمل من شعب السودان..ومهما تكالبت علينا التماسيح والحيتان..ثورتنا مبروكة ومنصورة بإذن الرحمن🤲😍 #حبا_وكرامة_علي_الكوباني

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
واحتمال التعقيب على المقال، وارد جداً .. كان ال واحد لقي إيدو وُ كِدا...

Quote: طلب الخليفة العادل امير المؤمنين عمر بن عبد العزيز من امين بيت مال المسلمين راتب شهر مقدم عشان يشتري ملابس لطفلته بعد ان احست بالدونية من الفقر امام بقية الاطفال

Quote: دحين زمن الخليفة دا مش قالوا الأموال فاضت لغاية ما اتعدم زول يدوه الزكاة؟

Quote: أمس قاعد بفكر ومدبرس ورغم اني قلت اوقف الكتابة والمفاققة مع الاحباب عشان ما احبط زول معاي...فكرت وقلت هل يا ربي كنت ساذج زي بعض اهلي في السودان…؟ لما اتخيلت انو الحكومة بشقيها السيادي والتنفيذي حيبدوا سياسة التقشف وكريب الاحزمة على البطون من اول ساعة في السلطة.. هل كنت عبيط لما دمعت وانا شايف التعايشي واقف في صف الجوازات في المطار مع المواطنين العاديين ولا مشى صالة رئاسية ولا يحزنون..وقلت خلاص بدينا الطريق الصح..وحنبقى زي الخواجات

Quote: دحين يا ناس السيادي كلكم حتى العندو دهب ولا غيرو..ويا ناس حمدوك وحكومتو..ابدوا بنفسكم وكونوا قدوة لباقي الشعب..بيعوا كل الهتش بتاع الفارهات وانكربوا واعملوا تقشف جد..اعملوا برامج اقتصادية عاجلة وخلونا من الشحدة ..شجعوا المصدرين واقفلوا البلد من الاستيراد الا الدواء ومدخلات الانتاج..اخدوا مثال من الثورة الصينية..اعلنوا عن الثورة الزراعية والتعليمية وبعدين الصناعية ..شوية شوية ما قلنا طوالي.. وطلعوا الناس تمشي مواقع الانتاج وانتوا قدامهم..انزلوا من البيوت العاجية دي ..لو اتقشفتوا جد الناس بتتحمل معاكم..وبعدين عيب كبير لمن يطلب موظف تمويل لعربات بقريب 500 مليار وكلكم برئيسكم ونائبه وباقي الجماعة تقولوا يطرشنا ويعمينا..😡 لا لا ..ده مال الشعب وانتم حراس عليهو مفروض اي شي يتصدق منكم بالاول يا وكلاء الثوار..