كمال ترباس .. كمال ابراهيم سليمان .. او كمال بروزه يختلف الناس و يتفق على شخصه و سلوكه و حتى فنه ... انا لا يهمني سلوك اي فنان طالما يأتينا بالابداع ...
سأل احدهم ترباس .. لماذا تركت الغناء بالرق ... و فضلت الاوركسترا ... فقال ترباس : انا اول من يستمع لنفسه .. و اغني ما يطربني اولاً ..
و عن غروره قال: جوني جماعة و انا كنت عيان بي نزلة شديدة و ما بقدر اغني ... الجماعة قالو لي .. لو ما انت الغنيت العروس قالت ما بتعرس ... رغم اننا قلنا ليها ممكن فلان و فلان و فرتكان ( اسماء كبيرة من الفنانين الشباب وقتها ) فقال ترباس ( ضحكت و قت ليهم ... عروسكم ليها حق الناس القلتوهم ديل كوووولهم لو انا رسلت عمتي دي بتغني احسن منهم ...)
اما الجانب الذي ادهشني ... فكان هناك لقاء تلفزيوني ... و مقابله واجه فيها مقدم البرنامج كمال ترباس بأمر ادهشني فقال المذيع لترباس : كنا في زيارة لي سجن ام درمان و سمعنا اشياء و دايرين نتأكد منك ... فطأطأ ترباس راسه ... و هنا قال المذيع: انا فاجأتك بالكلام و انا متأسف لكن لازم اقول للمشاهدين ... كمال ترباس و اعتقد معه سميرة دنيا ... في كل اسبوع يزورون السجون ... و يسألون عن كل من دخل السجن في تعسر مالي او دين مستحق و يقومان بالتسديد عنه لوجه الله ...
اما ويكيبيديا فكتب الآتي: عُرف ترباس أيضا بأعماله الخيرية كالإنفاق على مصاريف عائلات فقيرة كثيرة وتمويل تعليم المحتاجين من الطلاب والطالبات دون أن تربطهم به أية صلة ورعايته لعدد من دور العجزة والأيتام والجمعيات الخيرية بالسودان
هذا هو كمال ترباس ... بموجباته و سوالبه ...
و لكنه فنان و صاحب صوت تريان ... لا يحتلف عليه احد ...
افتتاحيتي اليوم ... رائعة محمد البشير عتيق ...
في غفلة رقيبي
04-21-2020, 05:13 AM
يحي قباني يحي قباني
تاريخ التسجيل: 08-20-2012
مجموع المشاركات: 18708
في غفلة رقيبي رُحت أزور حبيبي لقيتهُ شوية حاسي و ضاجع في سريره . متوسد وثيره . بين طيات حريرهُ حَييتُه وجلسْتَ . من حُسنُه إختلستَ . في سِحرُه أنغمستَ بحديث ( دبلوماسي) قالى نوري ماسي وأحذر إلتماسي قت ليهو في جمالك سحروك ولّ مالك ؟ صار ياحبيبي لونك .. فاتر زي عيونك قال لي عندي حُمى . وبىَّ الصداع آلمَّ بي أثر إنتكاسي . تعذّر نعاسي . ولي يومين أقاسي قت ليهو و وسامتك . وحلاوة إبتسامتك كفارة وسلامتك والف عزيز كرامتك يالحافظ كرامتك مهما كُنتَ قاسي . او لى عهدي ناسي . ليك يزداد حماسي قال لي انت عاقل مافي لزوم تشاغل وانا في روحي شاغل قت ليهو انت روحي وانت سبب جروحي وانت لشعري مُوحي ياروعة جناسي .. ياحُبي الأساسي . و يالنسيتني ناسي
ركز المفسرون و الذين اتفقوا ان تلك الزياره الشهيرة كانت في العام 1970 ركزوا على نوعية مرض الحبيبة ... فاختلفوا ما بين انفلونزا او غيرها ...
و الاغلب هي الانفلونزا ... و هي غالبا ان كانت حاده ... يرقد مريضها السرير ... و هي التي تجلب الحمى و الصداع ... لا يهم ما هو العذر التي منعته الحبيبة ان يحذر التماسها ...
انا يهمني ان الزيارة كانت مسارقه ... فمن هو الرقيب ؟ هل هم اهلها ؟ ام ناس الحلة .. ام ماذا ؟
الحقيقة ان العم عتيق ... كان في حالة حب عنيفة ... و لا يهمنا شي سوى انه اتحفنا بتلك الكلمات الحنينة ...
للفطن الوسيم عرج يانسيم بلغُه إشتياقي حبي وإعتلاقي روِّح يانسيم أستقبل هلالُه في غُرفُه وظلالُه في ترفه ودلالُه بين ذويه و آله في حكمة ورويِّه في قامته الروية تأمل شوية و اغريهو التحية لو سألك عليّا قولُيه منامُه قلَّ أصلُه شكايته عله و الحب ليس إلاَّ
عتيق قال حاجتين عجيبات هنا ...
الأولي استخدامه لكلمة ( إعتلاق ) و انا تفسيري انها من كلمة ( علق ) و التي ذكرت في القرآن ( خلق الانسان من علق ) و العلق هي قطعة دم يسيرة و لكنها ( تعلق ) و لا تنفك حتى يتكون اجنين ... فاستخدام ( اعتلاقي ) هنا ... يبسط نفسه و يعظم ارتباطه و تعلقه بها ...
اما الحاجة العجيبة التانية : فعتيق وصل بها حد الفلسفة حينما قال : و الحب ليس إلا ... و ترك لنا الخيال ان نتفكر ... الحب ليس إلا .. شنو ؟
04-21-2020, 05:49 AM
يحي قباني يحي قباني
تاريخ التسجيل: 08-20-2012
مجموع المشاركات: 18708
و اتوقف هنا لاترحم على والدي الحبيب و الذي كان يعشق هذه الاغنية و يرددها كثيراً .. كتبها عبد الرحمن الريح و غناها حسن عطية .. و هنا اداء حنين من ترباس .. اهديها لشقيقتي الكبري و التي زارتني هنا ... و كان والدنا قد نوفى قبل زيارتها بأكثر من 15 عاما و قمت بتشغيل الاغنية دون سابق نذار ... فجرت دومعها و ما كنت اظن انها ستتذكر ... رحم الله اباءنا و امهاتنا و اسكنهم فسيح جناته ...
04-21-2020, 03:24 PM
يحي قباني يحي قباني
تاريخ التسجيل: 08-20-2012
مجموع المشاركات: 18708
و في عودة لعمنا عتيق ... نجد ان كرومة قام بتلحين هذه الدرة بطريقة شبه دائرية كما يقول بعض اهل الفن لذلك تجد ان اداءها يعتمد تماما على كيفية تنفيذها من المغني نفسه ... فلو لم يجيدها تظهر و كانها نشيد ... لذلك لم يجيد غناءها سوى ابو الفن و الفنانين عبد العزيز داؤود و الذي لجأ اليه الامبراطور محمد وردي ليعلمه كيف يؤدي رائعة الخليل ما هو عارف قدمو المفارق
و يأتي بعد ابو داؤود كمال ترباس ليجيدها و يستعمرها كما استعمرها ابو داؤود ...
04-21-2020, 04:23 PM
علي عبدالوهاب عثمان علي عبدالوهاب عثمان
تاريخ التسجيل: 01-17-2013
مجموع المشاركات: 12475
Quote: لحبيب الجميل قباني .. جعلت لنا حبس الكورونا سياحة رائعة بعد قراءة تعليقك وايضا كلمات القصائد رجعت اسمع لهذه الاغاني وكأنني بها أول مرة
ترباس صوت جميل ورائع .. هل هو من مواليد امدرمان ؟
حرام .. يا قباني الحبيب .. ده لقاء تلفزيوني شكرا يا جميل
سلام عمك علي يا جميل ... و شكرا على كلماتك و مجاملتك لي ... اسعد دوما بشوفتك ...
نعم مولود في حي السيد المكي ( ود الشيخ اسماعيل الولي ) في وسط امدرمان ... و هو مجاور لحينا ود ارو و بيت المال و عبد الله خليل ... من اشهر مواليد المنطقه الحاج سرور ..
04-21-2020, 04:42 PM
محمد محمد قاضي محمد محمد قاضي
تاريخ التسجيل: 12-23-2014
مجموع المشاركات: 1605
لا ما هو نحن نبقى منطقيين شوية الزول دة تلب بالكروب في الأول حتى لقاهو عيان
Quote: في غفلة رقيبي رُحت أزور حبيبي لقيتهُ شوية حاسي بحديث ( دبلوماسي) قالى نوري ماسي وأحذر إلتماسي مهما كُنتَ قاسي . او لى عهدي ناسي . ليك يزداد حماسي قال لي انت عاقل مافي لزوم تشاغل وانا في روحي شاغل
يعني زول عيان دايرين يلمسوا جبهته عشان يشوفوا مستوى الحمى دق الجرس ليه شنو لو كان الموضوع حمى يا زول هوي البنية دي ختتها ليه عدييييل قالت ليه مافي لزوم تشاغل معناها الراجل دة ما زول كفارة ولا شتين غايتو كان ما الشعر اتطور أقول الشغل دة شحدة :)
___________ ترباس عندي ليه اتنين ما بملهن
التانية رسلت ليك أجمل خطاب لليلة ردك ما وصل زعلانة ولا شنو الحصل! للأسف ما لقيت ليها تسجيل قديم أنا بسمع ترباس من 2014 ولي وراء .. شايفه فقد قوة صوته بعد التاريخ دة بقى ما بقدر على الطلعات العالية .. بتجيه بحة طوالي
Quote: ترباس افضل فنان في الساحة حاليا يعتبر من بين افضل من حملوا لواء الحقيبة بعد الكاشف شكرا يا هندسة على البوست
حيدر يا حلو ...
ترباس فرض نفسه من بدري و طبيعي انه يكون افضل من في الساحة لان البون شاسع مع المرددين الايامات دي ... رغم انه فيهم الجميل جداً ... لكن صعب الوصول الى ترباس ...
04-21-2020, 06:20 PM
ABDALLAH ABDALLAH ABDALLAH ABDALLAH
تاريخ التسجيل: 08-26-2007
مجموع المشاركات: 7628
الحبيب قباني .. قريبي كان من مسئولي امن نميري .. في السبعينات قال النميري فجأة خرج مكتبه بدون سابق خبر وحكى لي انهم تابعوه بسيارات عادية وبزي مدني عادي .. وقال مباشرة ذهب الى وزارة الماليةوالى مكتب وكيل الوزارة .. احدث الضحيح ثم نزل مسرعا الى سيارته والى مكتبه في قاعة الصداقة .. قال ذهبت شخصياً الى مكتب وكيل الوزارة للتحقيق في الموضوع ووجدت هناك كمال ترباس في حالة سيئة وارتباك .. ووكيل الوزارة لم يكن في مكتبه .. في التحقيق ذكر له بأنه أخطأ عندما رد على تلفون وكيل الوزير فكان المتحدث نميري وأنه كان يتوقع مكالمة من أحد أفراد الشلة .. فسأله الرئيس .. انت مين ؟ قال أنا كيمو باعتيار انه من الشلة .. ورد عليه الرئيس .. خلاص انتظرني يا كيمو أنا جاي ولم يتم اي اجراء تجاهه حتى لم يرفع التحقيق وقال انهم اخذوا موضوع حدث عادي وضحك وونسة بل واصبحت صداقة بينهم وحكي لي قريبي هذه القصة .. بعد أن عزلهم عمر محمد الطيب من أمن القصر وامتدت العلاقة بينه وبين ترباس .. ووصف ترباس بأنه انسان طيب ويتكلم بدون تحفظ
وقال كان عادي في تلك الايام ناس الحكومة كانت لهم جلسات مسائية على الشاطي في توتي برفقه فنانين ..
تحياتي الحبيب قباني ما شاء الله ترباس في عز شبابه حفطه الله قريبي قعيد البيت .. حتى الزاكرة مشكلة شفاه الله
لكن يا امتثال مهزلة (هبت ثورة اللنغاز) دي أخرجته من صف العشره المبشرين بالسكن في قلوبنا.. ولو بالإيجار. - هندسه يا قبه، من أندر الأصوات كمال ترباس ، لكن ما بسمعو.. كإنسان ، هو من ألطف الناس وأخو أخوان ومشكلته صراحته لأنه لامن يتكلم بيفكفك جلب الفرامل brake pads طبعا انت بتعرف ناس أمدرمان وبالذات حلة السيد المكي، صريحين لامن تجري منهم. مرات عندو قواسم مشتركه مع وردي ومحمد الأمين وانت عارفا.. أمد الله في عمره. ودا كللللو ما عندو علاقه بالغنا
لكن ما بسمعو..
04-21-2020, 06:56 PM
Ahmed Yassin Ahmed Yassin
تاريخ التسجيل: 01-31-2013
مجموع المشاركات: 5507
الله يرحمك يا ابو يحي ويدخلك الجنة ويرحم جميع موتى المسلمين. ترباس اكتر فنان يعرف حقوق الشعراء والملحنين ودائما يذكر الناس بالخير اي اغنية يؤديها. بيكون ليها رونق مختلف..زي رونق الصبح البديع
04-21-2020, 07:13 PM
يحي قباني يحي قباني
تاريخ التسجيل: 08-20-2012
مجموع المشاركات: 18708
Quote: لا ما هو نحن نبقى منطقيين شوية الزول دة تلب بالكروب في الأول حتى لقاهو عيان
يا احمد يا حبيب ...
انا شفت كلام كبّر ... و حقيقة التأويل مفتوح و مسموح ... انا في نظري ما يفرق الداء كان شنو ... انا الفارق معاي الاستراق و الحب الشديد الخلاهو يجازف و يمشي ... اما نوعية العلاقة ... فلا توجد ( شحده ) على حد قولك ... فالرجل له علاقة بها و علاقه واضحة و ما منعه منها في ذلك اليوم انها مريضة ... فاتحفنا بتلك الدرة ...
04-21-2020, 08:19 PM
يحي قباني يحي قباني
تاريخ التسجيل: 08-20-2012
مجموع المشاركات: 18708
في شعر الحقيبة وصفت المرأة بالجمال و الدلال و الرقه ... و لكن القليل من الشعراء وصفوا مع الرقة قوتها ... فقال سيد عبد العزيز يا طايل الوريد يا أهيف يا اللى خصمه زال فيك منظر يحنن وفيك منظر فارس النزال
اما عمنا العاشق عتيق فقال : وطرفك لحاظة تريع اسدا شجاع و هصور فيك نفرة الغزلان مع جبرة الفرسان فى هيبة المنصور
ياناعس الاجفان انا من صفاك مسحور بالله انت ملاك ؟ ولا من حسان الحور * * * *** تذرف عيونى بحور اقضى الليالى قيام ما بين شوق و هيام ارعى النجم فى سحور و فؤادى اه منحور مقتول بغير سلاح و اقول بكل صراح سببى العيون الحور * * * * * فيك الكمال محصور اكظمت كل حسود و حسنك مقامه يسود على كل جيل فى عصور وطرفك لحاظة تريع اسدا شجاع و هصور فيك نفرة الغزلان مع جبرة الفرسان فى هيبة المنصور * * * * * اهيف رقيق متبور يتهادى تية و دلال مابين غرف وظلال نعمة و ترف و حبور سهمك على مهبور ايه ذنبى غير هواك انا يا جميل بهواك من قلبى ما مجبور * * * * * يا البى العفاف مشهور ندك عبير فياح و قوامك المياح اينع ثمر وزهور بى حبى دمعى جهور انا فى دجاك ياليل نجمك بقالى خليل فارقت نومى دهور * * * * * انا لى زمن ماسور هجرانى ما هماك ياللى قاسى لماك من طول جفاك محسور و حياة خديدك و جيدك و طريفك المكسور انا وصفي ما بيوفيك مهما ابالغ فيك منظومى و المنثور
04-21-2020, 09:12 PM
علي عبدالوهاب عثمان علي عبدالوهاب عثمان
تاريخ التسجيل: 01-17-2013
مجموع المشاركات: 12475
اهيف رقيق متبور يتهادى تية و دلال مابين غرف وظلال نعمة و ترف و حبور
================================
حبيبنا قباني .. فتحت نافذة من الجمال وأنا شخصياً اعشق اي كلام عن امدرمان والحقيبة .. وأقرا واسمع كثيراً بدون ملل .. ألاحظ في الجزء المذكور فوق من القصيدة .. بأن شعراء الحقيبة كانوا يتغزلون في المترفات والمنعمات .. كما كان الشعراء في الجاهلية (نؤوم الضحى )
ومرة سمعت بأن قصيدة (( يا بدور القلعة وجوهرة )) قيلت في بنات عمنا صالح جبريل لأن بيته كان بالطوب الاحمر ويطلق عليه اسم (( القلعة )) لأن عمنا توفيق كان ميسور الحال وحتى قبل رحيله الى امدرمان كان من اثرياء دنقلا ( مقاصر ) كان مترف ولديه اسطبل خيول مع اجداد مولانا الملك زميل المنبر وهم ملوك أرقو
الحبيب قباني .. سبحان الله قبل دقائق وعلى شاشة قناة الخرطوم وفي برنامج سوف يتم بثه خلال شهر رمضان مع ترباس ( اسم البرنامج انت المهم ) حكى الشاعر اسماعيل حاج موسى نكته عن ترباس قال فيها عندما قدم له اسماعيل أغنية ( امي الله يسلمك ) قال له ترباس ضاحكاً ( يا اسماعيل انت تدي لزيدان اغنيات .. وتجيب لي نشيد اطفال )
صدقني يا الحبيب قباني حبس وبوستاتك الجميلة خلانا من ناس أمدرمان
04-21-2020, 10:54 PM
Ahmed Yassin Ahmed Yassin
تاريخ التسجيل: 01-31-2013
مجموع المشاركات: 5507
شوفو ذكاء ترباس دا..بدا بطبلتين وبنقز وكورس...طور الكورس بدل ترديد الكوبليه اصبح داخل في جسم الاغنية وهو اول فنان يعمل كدة ..يغني مقاطع ويسهم في خلق تداخل صوتي.ثم فجاة ترباس عرف بالمعيته ان النوع دا منن الغناء ما حيستمر ولا هو حيرتفع للقمة..مباشرة استغنى عن الكورس اوركسترا حديثة... عاتبه كثير من الفنانين والناس هذا التحول لكنه پصوته وموهبته تربع على القمة غنى باجادة (يانسيم احكي ليه تباريح صبوتي وهيامي) وفي نفس الوقت ( جنا الباباي) و (الغلط منك ما مني)
04-22-2020, 03:18 AM
يحي قباني يحي قباني
تاريخ التسجيل: 08-20-2012
مجموع المشاركات: 18708
سيد عبد العزيز ... اهدانا واحده من اجمل اشعر الحقيبة ... لحنها الحاج سرور و غناها اكثر من فنان ... و لكن ترباس اضافت حنية صوته بعد جديد للاغنية
من حور الجنان أم أنت إنسان الكمال هل أنت الملاك جيت تورى الناس الجمال سبحان من نشاك حسناً فى غاية الكمال يهواك الجنوب واليك ينقاد الشمال وما أظن يحصوا حسنك لو يحصوا عدد الرمال وبايه يقدروك يا ملك ملوك عصر الجمال سلطان بهجتك محروس بجيوش الجلال ويغار من صفا حسنك صفاء ماء الزلال فى مراية خدودك أِشوف تأكيد سحر الحلال وأِشوف فى سما حسنك كل يوم يسطع هلال صفا ماء الجمال فى مجال جمالك راق وجال زى ماء الحياء فى عيون ربات الحجال وما فعل السلاح تفعل عيناك النجال مكسور الطريف كسر قلوب الرجال يا خلاصة المعاني الصار معناك موضع مثال فوق المحسنات حايز لطف وكرم خصال الهة الجمال يعترفوا ليك ماليك مثال تتمنى البدور تقبيل يداك بامتثال يا طايل الوريد يا أهيف يا اللى خصمه زال فيك منظر يحنن وفيك منظر فارس النزال ليك من الغزالة جبين وقاد وعيون غزال الحور من مناصبها لى قدرك تكتب نزال يالغصن الرطيب عاجبنى فيك الإنهداك اللادن قوامك من ملين وذو اعتدال جوهر حسنك الصافى وسيرك طاهرات عدال آيات بينات مافيهن للكافر جدال شاركت الغمام والموج مناظر وارتحال شاركت الظبا فى نفرتن والاكتحال شاركت القلوب فى موضعن على كل حال نفداك بالنفوس وفدا النفوس كان المحال
04-22-2020, 03:42 AM
يحي قباني يحي قباني
تاريخ التسجيل: 08-20-2012
مجموع المشاركات: 18708
ياسلام يا هندسة علي البوست التحفة عتيق دائماً تطلع الكلمات منو معتقة فتصيبنا الدهشة و نردد في صمت لعل كلامك الخمر ديوان العم عتيق كان قبلة لكل اولاد الحي ابروف و الهجرة و كان يرتاده شباب من بيت المال و ودنوباوي. و من حسن الحظ جلست في ذلك الديوان مرات قليله و استمعت منه عليه رحمة الله لأحاديث شيقة و ممتعة و استمعنا منه لقصائد لم تري النور. ترباس فعلاً أجاد في الأداء لانو عندو امكانيات صوتية فريدة و متميزة
Quote: انا يهمني ان الزيارة كانت مسارقه ... فمن هو الرقيب ؟ هل هم اهلها ؟ ام ناس الحلة .. ام ماذا
لعل عتيق تمرد لاحقاً علي الرقيب و قال لا اخشي لوم في هواك لا أخشي زاجر ليلي و نهاري أنا لي حيك بهاجر و في كتاب القصص الحبيبة لأغاني الحقيبة قال الجقر ان الاغنية كُتِبت في احدي جميلات حي العباسية
شكراً عزيزنا
04-22-2020, 03:11 PM
علي عبدالوهاب عثمان علي عبدالوهاب عثمان
تاريخ التسجيل: 01-17-2013
مجموع المشاركات: 12475
محمود فلاح اخذ ترباس من يده واتى به الى عوض جبريل وقال ليهو ياعوض عايزك تسمع ولدنا كمال دا ..صوته جميل خالص. وسمع عوض جبريل الصوت...فلم يفارقه حتى وصلت الاغنيات فوق الخمسين.. ترباس كلن صوت عوض المعبر ....رغم ان عوض ايضا كان مطربا وممثلا في فرقة عثمان حميدة تور الجر..الفنان الشامل ترباس بصدقه وصوته العجيب القوي واحساسه بالكلمة كان يوصل احساس عوض جبريل مرة عوض جبريل وصل البيت ولقى المطرة والسيل هدم بيته ..وبيوت كثيرة في الحي والناس اصبحت في الشارع.. وجد زوجته ملتاعة ومهومة وصامتة لا تتكلم. فكتب: ما تهتمي للايام ظروف وتعدي طبيعة الدنيا زي الموج. كثيرا ما كان ترباس يبكي وهو يؤدي هذه الاغنية. لان فعلا هكذا الدنيا او هي الحياة مثل الموج ...تاخذ وتعطي ...فيها العنف والهدوء.
04-22-2020, 05:29 PM
MOHAMMED ELSHEIKH MOHAMMED ELSHEIKH
تاريخ التسجيل: 03-21-2008
مجموع المشاركات: 11825
Quote: وهو اول فنان يعمل كدة ..يغني مقاطع ويسهم في خلق تداخل صوتي.ثم فجاة ترباس
ولكأن احمد يس بيتحدث عن القامة محمد احمد عوض !
وسلام يا قبة وضيوفه وكامل الاعتراف بفخامة وقوة وجمال صوت الفنان كسلاوي واعتراف اخر باني كنت من محبوبيه ولكن تركته كما تركت الطيب عبد الله بعد ظهور زيدان
04-22-2020, 09:51 PM
يحي قباني يحي قباني
تاريخ التسجيل: 08-20-2012
مجموع المشاركات: 18708
Quote: فنان مهتم بالأعمال الخيرية وينفق على العائلات الفقيرة والطلاب المحتاجين ما عنده سوالب.. وما ضر كمال ترباس ما فعل بعد ذلك...
امتثال يا بتنا ... في زمان شاعر متسكع عاش في مصر مشرد من بلده كتب اجمال اغاني ام كلثوم اسمه بيرم التونسي في واحده منهم قال : الأولة في الغرام والحب شــــــبكوني بنظرة عين والثانية بالامتثال والصــــبر أمروني و أجيبه منين والثالثة من غير معاد راحوا و فاتوني قولولي فين ______________ ما علينا ... ************* الشعب السوداني شعب طيب و مثالي جدا مشكلته انه في غالبية انطباعية يعني سلوك الفنان او اتجاهه السياسي ممكن يقرر ليهم انو الزول ده ما يسمعوهو مثلا...
انا بهمني انه ترباس ده في البطاقة حقته مكتوب المهنة : فنان و هو بديني فن ... نقطة سطر جديد . غير كده ما يفرق بعمل شنو ... حتى اعمال الخير دي ... ما بتعنيني ... البعنيني هو اثرى الفن بي شنو ... خاصة لو سلوكه الشخصي او اتجاهه السياسي ما أثر على الاداء و الفن و الرسالة الفنية ...
04-22-2020, 11:35 PM
ناذر محمد الخليفة ناذر محمد الخليفة
تاريخ التسجيل: 01-28-2005
مجموع المشاركات: 29251
ود قباني لا..لا..لا...با ود قباني الاتجاه السياسي يختلف عن العطف على الفقراء والمساكين...وانا بيهمني الفنان اتجاهه السياسي شنو ،ما دام بيقدم فن يطرب الجمهور ، لكن اذا عرفت انه زول له عواطف وشعور وإحساس تجاه الفقراء والمحتاجين فلا شك أنه سيعلو في نظري ونظر المجتمع كله ...وسعادتي سوف تزيد وانا استمع لمثل هذا الفنان الإنسان... مع وافر التحيات والتقدير
04-23-2020, 07:05 AM
أحمد التجاني ماهل أحمد التجاني ماهل
تاريخ التسجيل: 07-26-2008
مجموع المشاركات: 882
الجميل الأستاذ قباني تحية وتقدير وإحترام وأنت دوما تعمل على التوثيق الذي غاب كثيراً عندنا في السودان ونتيجة لذلك مات موروث غني مع من يحملونه في صدورهم وعقولهم. وكمال ترباس بلا شك فنان وضع بصمته في الغناء والطرب السوداني. وبخصوص أعماله الخيرية زارنا في منطقة الخوي عام 1983 وغنى في ثلاث حفلات وفي كل حفل كان يقول أن متبرع لكم بحفر دونكي كاملا باعتبار المنطقة منطقة عطش وبها مثلث اسمه مثلث العطش في السودان وفرح الناس كثيرا بهذا الكلام ونظموا له رحلة صيد نتج عنها 10 غزلان حية أخذها معه للخرطوم وحتى الآن لم يظهر ولم يوفي بالعهد الذي قطعه بحلفه أمام تجمع أهل الخوي في الحفلات الثلاثة وكنا وقتها أطفال في المدرسة الإبتدائية وصار دونكي ترباس ضربا للمثل بعدم الوفاء بالعهد فيقول لك قائل من أهل المنطقة "لحق/ت دونكي ترباس" وأتمنى أن يصله هذا الكلام لعله يوفي بعهده الذي قطعه ويكون فعلا من أهل الخير قولا وفعلا وليس كتابات في الصحف أو لقاءات في التلفزيون.أحمد
احمد التجاني كيفنك يا اخوي انت كلامك ده حصل عام ١٩٨٣م، يعني قبل حوالى ٣٨سنة ، يعني وقتها الفنان كمال ترباس ذاته كان شافع صغير ، واظنه شالته الهاشمية وهو يرى كرم اهل القرية وحفاوتهم به ووعدهم بحفر ابيار او دونكي للمياه، ولكنه لمن رجع الخرطوم وفي زحمة الخرطوم ومشغولياته الكثيرة والتنافس بين الفنانين لتقديم الجيد والممتاز من الفن الرفيع ربما نسى وعده وكان من المفروض يجي واحد من وجهاء القرية ويذكره بوعده الذي قطعه على نفسه ،،،وجل من لا ينسى،،، ..مع وافر التقدير ، ونسال الله ان يبعد عنكم وباء وبلاء الكرونا وينعم عليكم جميعا بدوام الصحة والعافية
04-23-2020, 08:12 AM
أحمد التجاني ماهل أحمد التجاني ماهل
تاريخ التسجيل: 07-26-2008
مجموع المشاركات: 882
العزيزة إمتثال عبد الله تحية وتقدير وإحترام، لالا كانت في متابعة عبر صديقه وإبن المنطقة الراحل النور الطاهر أبو كلابيش وهو من ضباط الأمن في عهد نميري، وفي العام 2010 زار ترباس أبوظبي ووقتها كنت شغال عمل ميداني وعرفت بوجوده متأخرا وعندما ذهبت للفندق الذي ينزل به الفنان كمال ترباس وجدته غادر للسودان. عموما صدقتي هي الهاشمية ولكنها أصبحت مثلاً في المنطقة أرجو أن يصل هذا المثل للفنان كمال ترباس. أحمد
04-23-2020, 01:46 PM
Ahmed Yassin Ahmed Yassin
تاريخ التسجيل: 01-31-2013
مجموع المشاركات: 5507
Quote: Ø£ØÙ Øولكأن احمد يس بيتحدث عن القامة محمد احمد عوض
بلاشك ان القامة محمدعوض رائد الفن الشعبي ... عارف يا محمدالشيخ كان في واحد في كورس الفنان محمداحمد عوض اسمه عبدالعزيز قسم كان يمتلك صوتين ..رجالي ونسائي ..وكان بشيل ويردد خلف الفنان بصوت ( الطو) نسائي صريح
05-15-2020, 03:00 AM
يحي قباني يحي قباني
تاريخ التسجيل: 08-20-2012
مجموع المشاركات: 18708
Quote: هندسه يا قبه، من أندر الأصوات كمال ترباس ، لكن ما بسمعو.. كإنسان ، هو من ألطف الناس وأخو أخوان ومشكلته صراحته لأنه لامن يتكلم بيفكفك جلب الفرامل brake pads طبعا انت بتعرف ناس أمدرمان وبالذات حلة السيد المكي، صريحين لامن تجري منهم. مرات عندو قواسم مشتركه مع وردي ومحمد الأمين وانت عارفا.. أمد الله في عمره. ودا كللللو ما عندو علاقه بالغنا
لكن ما بسمعو..
و ليه بس محارب ترباس يا مولانا ؟
صوت خرافي و حنية ما عندها شبه ... و طرب لا نهائي ...
غير كده ان شاء الله يقد التعريفه ما عندي معاو مشكلة ...
05-15-2020, 04:55 AM
يحي قباني يحي قباني
تاريخ التسجيل: 08-20-2012
مجموع المشاركات: 18708
برضو تقول لى أغانى وأغانى .. هو فى أغانى أروع من كدا!
وفى شهر رمضا الكريم نسأل الرحمة لوالدكم الباشمهندس إبراهمي محمد سعيد القبانى، فلم يورثك فقط جينات الهندسة .. ولكن معها جينات التذوق للفن الراقى.
ولأختكم الكبرى أطيب التحايا بمناسبة الشهر الكريم وندعو الله سبحانه وتعالى أن ينعم على إبنتها الصغرى الدكتورة بعاجل الشفاء، وبالسلامة لكل الأسرة.
كمال ترباس فيما عاصرناه من حقب زمانية بأمدرمان وحتى بعد الإغتراب، يمثل ظاهرة فنية فريدة، دائماً على قائمة سوق الغناء، بخلاف كل الفنانيين غيره من المبدعيين، أسهمهم فى سوق الغناء تعلو وتهبط رغم قدراتهم التطريبية الممتازة. ربما قبله فيما لم نعاصر تربع على عرش الغناء دوما كلاً من الحاج محمد أحمد سرور، وكرومة.
اطرب له فى قالبه الشعبى بالرق والشيالين، وفى قالبه الحديث أذكر فى جلسات الصف يتغنى الجالسون ببعض ما يغنيه ترباس وإن كان غيره تغنى به:
سيبنى فى عز الجمر أبو لى اللبن دا مبروك عليك الليلة يا نعومة وأغنية غلبنى أتذكرا الآن
ومن روائع ما تغنى صدقنى ما بقدر أعيش و أذكرى أيام صفانا
عييييك .. سلسلة ما بتنتهى
05-15-2020, 11:11 PM
علي عبدالوهاب عثمان علي عبدالوهاب عثمان
تاريخ التسجيل: 01-17-2013
مجموع المشاركات: 12475
الاحباب الكرام .. ترباس ما شاء الله مرتب ومنظم في لبسو والجلسة والعازفين الكورس مبالغة مبالغة .. ترباس رجعنا لأحلى ايام العمر انسان مخلص ووفي يا سلام كلامه عن عوض جبريل مبالغة .. وكمان عن محمود عبدالعزيز .. وغناء ثنائي مع محمود جمال الصوت والاداء والاناقة .. لكن بصراحة الكورس معجزة ..
البرنامج ( انت المهم ) قناة الخرطوم
تحياتي الحبيب قباني .. ترباس آخر المبدعين .. أطال الله عمره
05-16-2020, 04:02 AM
يحي قباني يحي قباني
تاريخ التسجيل: 08-20-2012
مجموع المشاركات: 18708
Quote: الله يرحمك يا ابو يحي ويدخلك الجنة ويرحم جميع موتى المسلمين. ترباس اكتر فنان يعرف حقوق الشعراء والملحنين ودائما يذكر الناس بالخير اي اغنية يؤديها. بيكون ليها رونق مختلف..زي رونق الصبح البديع
الله يرحمه و يحسن مثواه .. كان رجل طروب يا احمد ...
ترباس جد فنان ... و حيظل علامه فارقه ...
05-16-2020, 04:10 AM
يحي قباني يحي قباني
تاريخ التسجيل: 08-20-2012
مجموع المشاركات: 18708
من اسرار الغناء السوداني ان هناك كلمات كثيرة مغناه و الكثيرين لا يعرفون من شاعرها و حتى الشاعر لا يهتم كثيرا بذكر اسمه ... و لكني اخذت على عاتقي و زملائي في المكتبة ان نوثق الكلمة و اللحن سوياً ...
من اكثر الشعراء لا يعرف الكثيرين ما ذا كتب رغم انهم يرونه سنويا هو الشاعر و المسرحي الاستاذ السر قدور ... كتب للكاشف و و ابن البادية و العاقب محمد حسن و صلاح محمد عيسي و غيرهم و غيرهم ... و من اجمل ما كتب ... كلمات غناها كمال ترباس و هي اغنية يانعات الزهور ... او كما عرفنت باسم بسأل عليك ...
بسأل عليك في الروضة يانعات الزهور بسأل عليك بدراً تفوقه جمال و نور خاصمتني لا يوم بتسأل لا بتزور و انا في بعادك جمري حي لو انت ما رديت علي وريني وين قاضي الغرام علشان اروّح اشتكيك يحكم علي
تخيلوا معاي ... الحكم على منو ؟؟؟
نسمع ؟
05-16-2020, 04:21 AM
يحي قباني يحي قباني
تاريخ التسجيل: 08-20-2012
مجموع المشاركات: 18708
Quote: الحبيب قباني .. سبحان الله قبل دقائق وعلى شاشة قناة الخرطوم وفي برنامج سوف يتم بثه خلال شهر رمضان مع ترباس ( اسم البرنامج انت المهم ) حكى الشاعر اسماعيل حاج موسى نكته عن ترباس قال فيها عندما قدم له اسماعيل أغنية ( امي الله يسلمك ) قال له ترباس ضاحكاً ( يا اسماعيل انت تدي لزيدان اغنيات .. وتجيب لي نشيد اطفال )
صدقني يا الحبيب قباني حبس وبوستاتك الجميلة خلانا من ناس أمدرمان
عم علي يا بديع ... سعيد بمتابعتك كما تعلم ... لقيت برنامج "أنت المهم" في يوتيوب حاشوف و اجيك صاد ان شاء الله ..
05-17-2020, 08:54 AM
يحي قباني يحي قباني
تاريخ التسجيل: 08-20-2012
مجموع المشاركات: 18708
برضو تقول لى أغانى وأغانى .. هو فى أغانى أروع من كدا!
وفى شهر رمضا الكريم نسأل الرحمة لوالدكم الباشمهندس إبراهمي محمد سعيد القبانى، فلم يورثك فقط جينات الهندسة .. ولكن معها جينات التذوق للفن الراقى.
ولأختكم الكبرى أطيب التحايا بمناسبة الشهر الكريم وندعو الله سبحانه وتعالى أن ينعم على إبنتها الصغرى الدكتورة بعاجل الشفاء، وبالسلامة لكل الأسرة.
نادر يا حبيب ...
خالك كان رجل يتذوق الفن و يداوم على سماع حقيبة الفن باستمرار ... لا يمر يوم جمعة الا و حقيبة الفن و الراديو يسمعه الكل ... نشأة ود ارو غرست في دواخله حب الفن ... و هي ام درمان كما عرفناها يا بن عمي ... رحم الله والدينا يا نادر ... و اجدادنا و كبارنا في ام در ... اما ترباس ... و نشأة مكي ود عروسه ايضا خلقت منه فنان ... او كما قال هو ان خالد ابو الروس حينما سمعه في الاولية و كان ناظره قال له ( انت غير فنان ما بتبقى اي شي تاني) ..!!!
05-17-2020, 10:50 AM
نادر الفضلى نادر الفضلى
تاريخ التسجيل: 09-19-2006
مجموع المشاركات: 7022
خالك كان رجل يتذوق الفن و يداوم على سماع حقيبة الفن باستمرار ... لا يمر يوم جمعة الا و حقيبة الفن و الراديو يسمعه الكل ... نشأة ود ارو غرست في دواخله حب الفن ... و هي ام درمان كما عرفناها يا بن عمي ... رحم الله والدينا يا نادر ... و اجدادنا و كبارنا في ام در ......
اللهم آآآمييين
يا يحيى ذكرتنى جدنا بابكر القبانى كان مغرماً بغناء الحقيبة ويحفظه مطربين وشعراء وكان نهار الجمعة ساعة برنامج حقيبة الفن فى راديو أمدرمان مستمع مداوم له عندما كنا فى سن الطفولة والمدرسة كنا نطرب للغناء الحديث ، ولا ننتبه للحقيبة ولكن بالمداومة على الإستماع الغير مقصود لها دخلت فى وجداننا وتفجرت بعد حين.
وجات فترة كده بقت فى البيت الكبير لمة كوتشينة يوم الجمعة إستمرت لسنوات طويلة بيتلم فيها شباب الحلة أصحاب خيلانا المامور والدكتور ومعاهم أعمانما وخيلانا عبد الفتاح قبانى وعمر شبر ومبارك أبو الزينة وأنضم إليهم جدنا بابكر قبانى وضيوف آخرين، معظهم رحل للرفيق الأعلى رحمة الله عليهم. وأذكر كان أحد رجال الأمن فى عهد مايو فرض نفسه للحضور كل جمعة يشرب الشاى ويتغدى، ليرفع تقريره الأسبوعى أن الجلسة بريئة وليست إجتماع سياسى ضد النظام.
نحن كان دورنا مراسيل الموية والشاى والفرجة والإستمتاع مرات بتموا بينا الرباعى بيلعبوا زملاء ولكن لا يحبذون مشاركتنا بسبب فارق السن ويتحرجون من لومنا كزملاء، مثلما نتحرج نحن من لومهم ولا يشعر منافيسيهم فى التربيزة بحلاوة الفوز بالعشرة بسبب أن التربيزة مايلة بمشاركة (الناشئين)، عاملي فيها لعيبة كبار.. ونحنا فاكرين روحنا ألعب من بعضهم، فكنا نكتفى التواجد بينهم؟
نستمتع بأحاديثهم وونستهم ومناكفاتهم لبعضهم بتعليقات ساخرة عند فك كرت النزول او الفتوح (كانوا بيلعبو كونكان 14) أو الفوز بالعشرة مثل: يا كيشة .. ويا جنينة وارفة... وبتحلم ساى بالعشرة .. وكل واحد يعبر عنها بطريقته .. ولكن ما حفر فى الذاكرة تعابير بابكر قبانى .. كان يستخدم مفردات الحقيبة ويقول ليك سرور غنى .. وبطران قال .. أذكر منها .. (أترك الأحلام يا جميل أصحى) .. {من جناين الشاطى وقصور الروم .. حى زهرة روما ..) فرسخ فينا ثقافة شعر وغناء فن الحقيبة وإنتبهنا لدرر كنوزه والغريبة هذا هيأنا للإستمتاع أيضاً بفن إبراهيم الكاشف وعثمان حسين وعثمان الشفيع وبادى محمد الطيب ونتفهم ليه ناس أمدرمان بيقولوا كباية شاى عثمان حسين وحتى الآن أحياناً تخرج منهم عفواً فتدرك أن محدثك أمدرمانى
رحمة الله عليهم جميعاً، ونسأل الله طولة العمر وتمام الصحة للأحياء منهم
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
يحي قباني
علي عبدالوهاب عثمان
حيدر حسن ميرغني
محمد محمد قاضي
ABDALLAH ABDALLAH
محمد المرتضى حامد
Ahmed Yassin
Hamid Elsawi
MOHAMMED ELSHEIKH
ناذر محمد الخليفة
أحمد التجاني ماهل
نادر الفضلى
فيس بوك
تويتر
انستقرام
يوتيوب
بنتيريست