♧ ناس عايشة و ناس دايشة £

《 حلبي .. ود أم زقدة 》
قصة طريفة حكاها حلبي متزوج جعلية .شاف نجوم الضهر

▪》زوجتي سعدية من دار جعل *شندي* زولة مجاملة شديد بتحب
تجامل أهلها في الفرح والكره ... وانا نادر جدا ما أمشي معاها لي
فرح ... بس لو في فاتحة طوالي بمشي لازم أقوم بالواجب.

▪》واصلا لو في عرس ولدي محمد وبتي نون بيمشوا مع أمهم
سعدية وأنا بقعد أحرس البيت لأنه الحراميه في الخرطوم بقوا حايمين
الاربعة وعشرين ساعة* قبل يومين سعدية كلمتني عن عرس بت صاحبي النعيم
▪》النعيم صاحبي وراجل كريم وفارس شهم واخو اخوان فكان لازم أمشي أجامله
وأحضر العرس* اها ركبنا الشارع وطلعنا على شندي أنا وزوجتي وولدي وبتي

▪》وصلنا الضهر مع الغدا إتغدينا وضربنا اللحمة والضلع وحلينا بي الكاستر
شربنا شاينا وقهوتنا ... وشوفنا كرم حاتمي في دار جعلفي المساء الدخلة جاء
العريس والعروس والحفلة دورت والناس نزلت الدايرة حسين شندي مهجج
والعجاجه فووووق من الرقيص بعد شوية دخل في غنية عرضة و سيرة!!

▪》بجر القول والشكر لي الباسل بابكر* قلت بس بعد شوية الجماعة ببنزلو
ويتعاورو والبطان بي السوط بيدووور فعلا دقيقة ما تمت الجماعة نزلو وقلعو
والسوط دور صج صج صج صج صج أبشرووو ...اصلا ما بحب أشوف البطان
و كنت مزنوروق قلت بس أتخارج على الحمام قبل ما يجي زول يتعاور و يدخلني
عشان ابشر في الدايرة قمت كده عايز أشاقق براااحة بي طرف الدايرة ما احس
ليك إلا بي زول جهامه شالني فووق زي (ود الطهور) وختاني في نص الدايرة.

▪》شميت ريحة (البلح) فايحة منو ... عرفتو طوالي سكران
قلع لي السديري وقال لي أقلع الجلابية يا حلبي متزوج بتنا وما تنجلد؟
الليلة الله جابك لينا بي كرعيك لينا زمن نفتش ليك جيتنا الليلة يا ابو النسب ...
وقفت في الصف وسمعت النسوان زغردو لي شديد *عشان جديد في الساحة*
لبست (نظارتي) لاني بالليل ما بشوف كويس وعاينته لي سعدية لقيتها بتزغرد
لي ..إتشجعت وقلعت الجلابية وإتحزمت خلاص والسوط نازل في الجماعة صج
صج صجوحسين شندي شغال والبطان مدور*يا بنية جري القدح للأسد الما إنفضح
أبوي مما قام قرح بحر المالح طمح يا بنية جري الكلام للاسد الفي الملم أبوي مما
تب قام أبوي قدحه سبق السلام*

▪》مع حماسة الغنية وزغرودة سعدية وصلني تب العريس *فتاح أب شنب*
وهو من قبيل شغال في الجماعة بي السوط تح ترح تح.لمن قرب مني همست في
( أضانو ) *فتاح* يا ود اخوي ... الله يفتحها عليك محل ما تققبل ... براحه علي
*أنا عندي سكري* ما أقوم إنجرح و السكران الجهامة القبيل ختاني في الدايرة يقول
لي فتاح العريس أمحط الحلبي ... امحطه محط جد ... وريهو المحط ... فشني فيهو
... دقو دق العيش ... وانا مستغرب في الزول السكران المكجني بلا سبب ده !!!و بجاي
حسين شندي شغال *ﻻ ﺑﺰﻋﻞ ﻻ ﺑﻀﻴﻖ ﻭﻻ ﺑﺘﻐﺎﺑﻲ ﺍﻟﺮﻓﻴﻖ ﻳﺴﻠﻢ ﺿﻮ ﺍﻟﻔﺮﻳﻖ ﻳﺸﻴﻞ ﺣﻤﻠﻮ
ﺑﻼ ﻃﺒﻴﻖ* اها فتاح العريس رفع السوط فوووق وأنا اقول في جهري وسري الله حي
وأحي أحي يالطيف ألطف بي وخفف علي ..أول سوط نزل في ضهري صيييي ... اول
حاجة ضهري خدر ... بعد شوية احس بالالم ... وحرقني ليك حريييق ... نار بس ... أحي
يا ضهري أحيييياااا ...نااااار وإنطلقت فيني ... أحي يا لطيف يا مكاشفي القوووووم
*يا فتاح يا أب شنب* ما (تتمغى) فيني ... براحة علي *عندي سكري* عليك الله ما إنجرح
والسوط التاني نزل صج .. يا فتاح *مع السكري عندي ضغط* براحة علي تنفتح معاك محل
ما تقبل يا رب والتالت ده لمن نزل خلاص غلبني أتحمل وكوركت فيهو يا فتاااااااح انا ما
حبيت أكلمك *والله عندي كملن (قلب) وشريان وصمام* ...والبول عصرني أعفيني عليك
الله ... خلاص كتر علي ... وهو ذي الاطرش ... ما جايب خبر ... رفع السوط الرابع قبل
ما ينزلو فيني لحقني *صاحبي النعيم ابو العروس* عرفني إتضايقته وإتجرسته جانا طاير :
كفاهو يا فتاح عمك السر راجل كبير ...الحمدلله الما نزل السوط الرابع ده كنت (بولته) في
سروالي لبست جلابتي بي (القلبه) ... وخليت سديريي وجري على الحمام .. وأسمع ليك
السكران الغتيت داك يضحك ويكورك بي طول حسو: الحلبي إتجرس! ود أم زقده .. تاني
تجي ... قال مناسبنا ... وانا بفكر في نفسي ... يا ربي السكران ده مالو زعلان مني كده؟
.. شغال يكوررك أمحط الحلبي ... تاني تجي شندي ..المهمجيت راجع أفتش نظارتي
وسديريي لقيت النظارة عفصوها وإنكسرت رفعتها(فريم) من غير قزاز الله حي
القعده في الكرسي غلبتني وضهري مولع .. وبقى زي خطوط سكة حديد عطبرة !!

▪》 الحمد لله إنتهت الحفلة ... طوالي سلمت مفتاح العربية ولدي محمد
وقلت ليهو أطلع جري على الخرطوم ما يكون فيها (صبحية) وبطان تاني كمان ..
مع السكران الجهامة ده .. أبوك ياولدي ضهرو إتورم ... والقعده غالباهووقبلت
على سعدية أسمعيني هنا يا سعدية: من يومنا ده تاني أهلك ديل ماااا لازمني .
لا فرح ولا كره ما بجيبني ليهم ... جابت ليها بطان وسوط عنج كماااان!.وده
كله هين ... إنتي يا سعدية أب شنب السكران الحيران الرفعني زي الشافع ده
منو من أهلك يا سعدية؟ قالت وهي تضحك: هي معقول ما عرفته ... ده ما
سماعين كان عايزني زمان أظنو محروق منك😂 ... قلت في سري ..
اريتو كان زمان اخدك ... ياخدو البلاء 😆😆😆
اسرع يا ولد خلينا البيت برااااهو الله يستر ما يكونو (الحرامية)
سرقونا *تبقي علينا في شندي دقونا وفي الخرطوم سرقونا*😢