|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
ذرية بعضها من بعض وادي سيدنا الشيخ محمد الفياض من أحفاد الشيخ الطيب وهو أيضا جد أو عم للراحل ابراهيم ذاالنون كان ينطوي على محبة كبيرة نابعة عن معرفة كبيرة للأستاذ محمود كان صاحب سجادة وله أتباع ومريدين وكان يستقبل الجمهوريين في يبوتاتهم ويطرب لحديثهم أيما طرب* يحكي حفيداه أماني ومحمود بتصرّف جدنا الفياض حكى قال في رؤيا يجيهو النبي صلى الله عليه وسلم ونبي الله الخدر وسيدنا جبريل... قال النبي يقول ليهو ورحكا معنا نوريك صاحب الوكت قال طلع من بيتو وركب خلف جبريل في فرسه ولكنه لم يطق ذلك لأن السرج حسب عبارته كان شوك شوك .. قال أن النبي الكريم ضحك حتى بانت نواجذه من الطريقة التي نزل بها من الفرس وقال له جبريل جالس على السرج ده من سبعين ألف ألف سنة ما نزل منو انت ما قدرت عليهو شوية .. قال مروا به على القباب شرقي النيل وغربيه .. كلما يجي في بقعة يشوف أنوار باهرة ويقول في نفسه دة صاحب الوكت فيتجاوزونها .. قال حتى وصولوا به لمنطقة (وادي سيدنا) فرأى من بعيد نورا يغشي العيون فقيل له دااااك صاحب الوقت ولم يسموهو له ولكنه فهم أن المقصود الأستاذ محمود محمد طه ----- مما حكى - بتصرّف - أماني ومحمود لعبدالله عثمان د. أماني عبداللطيف عمر حسب الله درست بجامعة الخرطوم وبريطانيا وقد أتى ذكرها من قبل شقيقها الباشمهندس محمود عبداللطيف عمر وقد ذكرناه من قبل ==== في خيط Re: الأستاذ محمود محمد طه: النبى والجنرال الكنغولىRe: الأستاذ محمود محمد طه: النبى والجنرال الكنغولى
جآء
دة كلام زول بياخد من الله بلا واسطة!!! دة كلام زول بياخد من الله بلا واسطة!!! دة كلام زول بياخد من الله بلا واسطة!!! دة كلام زول بياخد من الله بلا واسطة!!!
بدري في الخمسينات .. طه الكردي كتب عن انو القرآن مخلوق .. الأستاذ رد عليهو .. شلت الرد دة ومشيت الشيخ الطيب.. لقيت شيخ الفياض* دة راقدلو فوق عنقريب في ضل عصر كدي.. أديتو كتابة الأستاذ.. هو في رقدتو ديك بدأ يقرأ فيهو.. شوية قام على حيلو ولسع باقي جسمو في العنقريب ... شوية وقف على حيلو ولسع ما تم القراية وبدأ يصيح....
دة كلام زول بياخد من الله بلا واسطة!!! دة كلام زول بياخد من الله بلا واسطة!!! دة كلام زول بياخد من الله بلا واسطة!!! دة كلام زول بياخد من الله بلا واسطة!!!
بتصرف مما يحكي الأستاذ عبداللطيف عمر حسب الله لعبدالله عثمان * الشيخ محمد الفياض من أبناء الشيخ الطيب صاحب "البنية" المعروف شمال أم درمان
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
أم درمان في 12/11/1970 بسم الله الرحمن الرحيم الحمد لله وحده، وبعد، فإلى الولي مرشد الأولياء، وهادي الصالحين إلى طريق رب العالمين، من أحيا طريق أبي صالح الجيلي في البلاد، وهدى به إلى سبل السداد.. صاحب علم الظاهر والباطن الشيخ دفع الله بن الشيخ أبي إدريس العركي قدّس الله سره.. السلام عليكم ورحمة الله تعالى وبركاته. ثم إن إبنكم وخليفتكم، حفظه الله، الشيخ عبد الرحيم الشيخ محمد يونس قد طلب إلينا ـ أنا والأخوان ـ في زيارتنا الأخيرة له أن نعود فنمضي ليلة في بقعتكم المباركة فسررنا لهذه الدعوة الكريمة وقررنا، إن شاء الله، تلبيتها ليلة عيد الفطر المبارك نحييها في تلك الأرض التي تمشّي فيها هدى القرآن، والسنة المطهّرة، ولا يزال ببركتكم يتمشّى، وإنّا لنرجو بركة إحياء تلك الليلة عندكم.. ويزيد رجاء قلوبنا أنّا سنكون ضيوفكم حساً ومعنى.. إن ما ندبنا أنفسنا للقيام به، ومنذ حين من الدهر، هو ما ظللت أنت وتلاميذك، وأبناؤك الصالحون تعملون له خلال حيواتكم المباركة.. ونحن نتوخّى، ونجتهد، أن نكون محقّين، فيما نقول، وفيما نعمل، ونجتهد أن تكون نيتنا خالصة لله.. ولا نأمن على أنفسنا الضلال، ولا نأمن عليها أن تكون مدخولة النية، غير مخلصة.. ونحن في دار باطل، وأنتم اليوم في دار حق، فإن علمتم نقصاً في حالنا، من حيث الهداية، أو من حيث الإخلاص، فإنّا نرجو أن تتوجهوا معنا إلى الله تبارك وتعالى، أن يتمم نقصنا ببركة زيارتنا هذه لكم، وهي زيارة لا سمعة فيها، ولا رياء، وإنما نتوخّى فيها وجه الله تبارك، وتعالى.. ثم إننا نتوجه إلى الله تبارك، وتعالى، أن يبعث في نصرة حقنا كل عبد صالح من العرش إلى الفرش.. إننا لنرجو فيوضات البركات بفضل الله، ثم بفضل أنّا سنكون ضيوفكم في تلك الليلة المباركة.. وفي الختام فإني أحمد الله لك، كما حمدته في البدء.. المخلص محمود محمد طه)
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
ظل دار الحزب الجمهوري في شارع الموردة يشهد اكتظاظا لا مثيل له حينما يطل عبدالخالق إبان أزمة حل الحزب الشيوعي السوداني. كان محمود محمد طه، زعيم الجمهوريين الذي لقي على يد الجلاد نفسه ذات المصير، يسبقه حينا و يليه على المنبر أحيانا، و خطباء آخرون من مختلف الاتجاهات السياسية و التنظيمات النقابية. يفيض دار الجمهوريين بالناس و يضيق الشارع بهم أثناء تلك الليالي السياسية.
—- عمر جعفر السوري عن مقال له عن مآثر الإستاذ عبدالخالق محجوب عثمان سكرتير الحزب الشيوعي السوداني الإسبق
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
تقريبا قرأت اي حرف كتبه الجمهوريون او كتبه الأستاذ وكنت حضورا لمحمكة بورسودان وعشت مع الجمهوريين كثيرا من الأزمان ولست هنا بمدافع عنهم ولكني ادفع بمحاولاتي دفاعا عن الفكر الحر . كلام الجمهوريين موجود وكله مبذول ومجانا على النت وممكن تختف الماوس وتجيب لينا من هناك ثم تعلق عليه مش تجيب لينا خطرفات بانقا والركابي والتي لاتختلف عن نقاشات سوق الملجة.
وقال الشاعر: من وجد البحر استقل السواقيا === الباشمهندس محمد الشيخ موسى* 1 أبريل 2018 نقلا عن خيط "بني الأسلام على خمس" ---
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
بتذكر مرة الأستاذ قدامو ورقة فيها أعضاء مجلس قيادة الثورة ... مسك قلم شطبهم كلهم بس خلا نميري وأبوالقاسم بعد فترة ما طويلة فعلا كلهم مشوا الا النميري وابوالقاسم* === بتصرّف مما يحكي د. علي أحمد ابراهيم رحمة * أبو القاسم المذكور هو الرائد أبوالقاسم محمد إبراهيم وقد كان في ذلك المجلس رائد آخر بأسم أبوالقاسم هاشم --- في سلسلة جلسات "الحضرات" وهي مسجلة ذكر الأستاذ محمود في واحدة منهن ما معناه أن رؤساء الدول يتم تعيينهم في الحضرة النبوية --- حكيت في خيط "سبانا" أن قد حكى لي الأخ الأستاذ أزهري بلول* أنه كان يسمع من نافذة منزلهم بالحصاحيصا شيخ خوجلي ينادي في الطرقات فرنسا مسكناها جيكسارد ديستانق، ألمانيا مسكناها هلموت كول ... بريطانيا .... وهكذا قال أزهري فعلا بعد فترة قليلة قامت إنتخابات في تلك الجهات وفاز هؤلاء الناس ولم يكد يسمع بهم أحد قبل أن يفوزوا --- * أزهري محمد أحمد بلول نشأ بالحصاحيصا ودرس الآداب في جامعة الخرطوم وعمل مساعد للتدريس بها وبكلية التربية جامعة الخرطوم ثم هاجر لأمريكا ودرس بجامعتي أوهايو/ أوكسفورد ثم أوهايو/ أثنز ونال درجة الماجستير من كلتيهما يقيم الآن في منطقة واشنطون مع زوجه الأستاذة نجدة أحمد محمد البدوي والأبناء آمنة، محمود وفاطمة حفظهم الله
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
بكرة السبت ٧ ابريل ٢٠١٨ يزور الجمهوريون الحبيب النسيب السيد علي الميرغني قدس الله سره وهي زيارة دورية يقوم بها بعض الجمهوريين في السبت الأول من كل شهر كتب الأستاذ علي العوض عباس* نحكي رواية الأستاذ الباقر الفضل عن زيارة الأستاذ محمود وبعض الإخوان الجمهوريين للسيد علي الميرغني تبركا وتوجها مع الأخ والابن الحبيب محمد يوسف لطفي: قال عندما دخلنا على السيد علي كان بعض خلفاء الختمية يزمجرون احتجاجا على زيارة الراجل الما بصلي للسيد علي.. قال وجدناه في غرفة بسيطة فيها عنقريب وقلة (بضم القاف) ويلبس عراقي .. بعد السلام الأستاذ بقى يحكي ليه عن الفكرة الجمهورية وهو لا يزيد عن القول: ده كله وارد عندنا! قال عندما انتهى الأستاذ السيد علي قال ليهو: لكن الامر ده داير ليهو زولا قلبو في السماء وكرعينو في الواطة! الاستاذ رد عليه إذا الرجل ده اتوجد رأيك شنو؟ قال أ. الباقر: السيد علي طوالي قلد الأستاذ. .. وقلد باقي الإخوان. . خلايفة الختمية فتحوا عيونم كبااار من الدهشة.. وعند خروجنا من السيد علي بقوا يحكوا جلاليبم في جلاليبنا تبركا. . أ. الباقر قال الأستاذ محمود بعد الزيارة قال: السيد علي صاحب ولاية كبييرة خافيها بالنعمة وقال السيد علي صاحب وكته ولو ما حكم الوكت كان بقى صاحب الوكت الأخير!
—- الأستاذ علي العوض عباس اصلا من أحفاد الشيخ سلمان العوضي من منطقة كمير العوضية ونشأ بومدني درس العلوم السياسية بكلية الاقتصاد جامعة الخرطوم وعمل نعيدا بها ثم عمل بعدها في السفارتين اليابانية والهولندية بالخرطوم
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
أبوي وعمي محمد* ما كانو متحورين للمكاشفي لكن من بدري شديد كانو زوارين ليهو ... هم عموما بحبو الصوفية لكن عندهم مكانة خاصة للمكاشفي أول ما بقت جمهوري أبوي* بحضور عمي محمد حكى لي قال هم بدري زاروا الشيخ المكاشفي ... الشيخ المكاشفي قال ليهم كلنا الفقرا والشيوخ الفي المنطقة دي في بداية الخمسينات كنا عارفين السما دي ماشة تنفتح وبنزل منها خير كبيييير .... كلنا دخلنا الخلوات ومشينا الفلوات مترقبنو ودايرنو ...... كووووولنا فاتنا ومشى لمحمود أفندي في رفاعة ---- بتصرّف مما حكى لنا في كمبالا - أوغندا نوفمبر 2015 د. الباقر العفيف مختار بحضور د. علي أحمد ابراهيم رحمة --- والده العفيف مختار ود قريش أصلا من منطقة الرباطاب ونزح باكرا جدا لمنطقة حوش أبكر من أعمال الجزيرة شقيق مختار وأسمه محمد (شهير بالسفاح) وله حلة بأسم حلة السفاح قريبا من الحوش
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
بتذكر مرة عصام دة قال للأستاذ إنو الشاعر محمد عبدالحي راقد في السلاح الطبي ... الأستاذ مشى زارو ومشينا معاهو والد محمد دة أظنو درس مع الأستاذ في غردون ولا بعرفو من وين ما عارف... المهم عمك عبدالحي دة قلد الأستاذ قلدة عجيبة خلاص وسلام حااااار... دخلنا على محمد .. بتذكر أنو ما كان بيقدر ينطق لكن خلجات وجهه تنضح بي فرح ظاهر لزيارة الأستاذ ليهو... الأستاذ قعد جبنو وقال ليهو أنا مبسوط منك يا محمد وصبرك على المرض .... واضح إنو كان متهلل جدا محمد ... بعدها ما عاش كتير ... ---- بتصرّف مما يحكي بروفسير أحمد المصطفى الحسين ... العين ابريل 2018 --- الشاعر الراحل د. محمد عبدالحي كان أستاذا بجامعة الخرطوم وهو صاحب العودة الى سنار وفيها حس صوفي واضح الليلة يستقبلني أهلي الليلة يستقبلني أهلي: خيلٌ تحجل في دائرة النّارِ، وترقص في الأجراس وفي الدِّيباجْ امرأة تفتح باب النَّهر وتدعو من عتمات الجبل الصامت والأحراجْ حرّاس اللغةَ – المملكة الزرقاءْ ذلك يخطر في جلد الفهدِ، * وهذا يسطع في قمصان الماءْ.
الليلة يستقبلني أهلي: أرواح جدودي تخرج من فضَّة أحلام النّهر، ومن ليل الأسماءْ تتقمص أجساد الأطفالْ. تنفخ في رئةِ المدّاحِ وتضرب بالساعد عبر ذراع الطبّالْ.
الليلة يستقبلني أهلي
---- * جلد الفهد يحكي الباشمهندس جبريل محمد الحسن عن الشيخ عبد السيد فيقول: (للشيخ عبد السيد جلابية من جلد النمر موجودة حتى الآن يلبسها الخليفة في حلقات الذكر .. وقال لي الأح أحمد في التلفون أن هناك رواية تقول أنه أتي من النوبة ثم طيبة ثم أبحراز.. وقد ذكرت أنا في متن الحديث أن الأستاذ قال للتومة أنه أتي من بغداد سرقوه رعاة الإبل وجابوه السودان لولايته ..وهذه الرواية غير موجودة عند أبناء الشيخ ..)
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
أنا تخرجت من معهد التربية عام ١٩٦٥ وعملت معلما مع أستاذ جلال عام١٩٦٦ وذات مرة قال لى أستاذ جلال أنا ماشي كوستى للأستاذ فقلت له أنا ماشي معاك فذهبت معه وكانت تلك الزيارة قد سجلت بداية إلتزامي خاصة عندما شعرت بالأستاذ يغطينى فاندهشت ومن تلك اللحظة قررت الإلتزام!!!. --- مما يحكي الأستاذ يوسف* أبو مشيلح لـ د. علي أحمد ابراهيم رحمة الأستاذ يوسف عمل بمدارس ود مدني وخرّج العشرات من الدفع وقضى فترة باليمن السعيد يسكن في حي البيان بود مدني ... يشير للأستاذ سعيد الطيب شايب بـ "مليح الزي" ويقول دائما، وبفخر: أنا أسكن بين مليح الزي وطاحونة الدّي* -- طاحونة الدّي طاحونة مشهورة أيام عهد الطواحين بحي البيان بودمدني وقد علمت أنها تحولت مؤخرا لمخبز
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
أيوا .... الأستاذ بي نفسو جاب السماية وسماها حلية السعدية* --- بتصرّف مما حكت لي الأستاذة علوية حسن سيدأحمد* حليمة حسن سيدأحمد إنتقلت لبارئها الأسبوع الماضي 4 أبريل 2018 حليمة زوج الراحل صلاح حسن محمد وكان بيتهما بالحارة الثانية الثورة مركزا لطباعة منشورات الجمهوريين على الآلة الكاتبة لهما من الأبناء د. محمود وإيمان حفظهما الله ---- * علوية حسن سيداحمد مالك ووالدتها زينب محمد خير مالك والمشهورة بأسم "أم روبة" علوية درست الآداب بجامعة الخرطوم وهي زوج البروفسير أحمد المصطفى الحسين منصور ولهما د. مريم، د. مازن، مروان ومحمود ---- في كتابها "محمود الإنسان" حكت د. بتول مختار أن الأستاذ في طفولته تعرضت قدمه لجرح غائر وأن له عمة أهتمت بتضميد ذلك الجرح حتى ألتئم هي الوالدة زينب محمد خير المذكورة عاليه
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
مشيت معاهو لي مناسبة عندو أهلو أظنها عزاء .... في الطريق الضهر أذن .... كنا جنب جامع .... قال لي أدخل صلي ... قعد إنتظرني برة أنا ماشي عليهو أشوف زول تاني ماشي عليهو ويكورك يا زول إنت ما بتصلي في الجامع مالك؟! ... وصلو قبلي... ما عارف الأستاذ قال ليهو شنو لكن الزول فررررر فات .... --- بتصرّف مما حكى لي الأستاذ هرون حميدان عبدالله* نشأ هرون في قرية المرابيع ود اللبيح وعمل بالتعليم ثم درس بجامعة الخرطوم وعمل بكنانة حتى توفاه الأجل وهو بها تقيم زوجه الأستاذة فايزة محمد الحسن عمر والأبناء محمد، سعيد ووفاء بولاية ميريلاند بأمريكا
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
شيخ خوجلي دة ما كان بيقبل الا طيب ... تتصور في بيوتنا لما يجي الموص دة يختار البتموصو ليهو... ما بيقبل بي أي زول لما كنا معتقلين في كوبر كنا بنجي السلاح الطبي وبنشوف وزراء النميري ديل يرموا ليهو القروش بالآلآف في طرفو يوم شافني وأنا ذاتي استغربت عرفني بقيت جمهوري كيف ... قال لي تعال يا ولد محمود إديني عشرة جنيه... قلت ليهو انت يا شيخ خوجلي يرموا ليك القروش بالآلآف داير مني أن عشرة جنيه تسوي بيها شنو؟! قال ليهو ديك أنا ما بشيل منها قرش ... ديك قروش حرام.. دار منك انت أديتو عشرة جنيه ومشيت ... ----- بتصرّف مما يحكي البروفسير أحمد المصطفى الحسين منصور --- حكى لي د. النور محمد حمد (بتصرّف) كنت يوم في زيارة لواحد من الأخوان في السلاح الطبي ... وأنا نازل من السلم شفت زول من بعيد ملمومين حولو ناس ... ما بعرفو .. نزلت وأديتهم ضهري ... أسمع زول يقول لي ولد محمود محمد طه تعال!! ولد محمود محمد طه تعال!! مشيت ليهو ... عرفت دة شيخ خوجلي لي يوم الليلة مستغرب عرف اني ولد محمود محمد طه كيف؟!
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
ما تشوف معارضة الناس دي للفكرة.... كلام ساي... لما يلاقوا الأستاذ بكونو ناس تاني خالص بي عيني دي شفت ناس دقونهم طالبان بس ... واضح عليهم إنهم أخوان مسلمين ... كننت مع الأستاذ في ممر كدة في مستشفى وبقينا ماشين عليهم والله الدقون دي لما وصلتنا قلدوا الأستاذ جنس قلدي.... سلام حاااار ووويناااك يا أستاذ!!! ووويناك يا محمود!!!! والله مشتاقين ليك!! يا حليل ايامك معانا!! طلعوا فعلا أخوان مسلمين بعرفوا الأستاذ من أتبرا .. ---- بتصرّف مما يحكي بروفسير أحمد المصطفى الحسين منصور
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
عبد الله عثمان كتب: هاشم محمد احمد بلول دفعتي وصديقي جاني يوم قال لي دايرين نعمل لقاء صحفي مع الأستاذ قلت ليهو بنقل رغبتكم دي للاستاذ و دة كان لما الأستاذ طلع من المعتقل وكان في زحمة شديدة كلمت أسماء محمود وكانت هي المسئولة من حركتنا في الجامعة قالت لي يلا نكلم الأستاذ وسط الزحمة الشديدة شعر انو عندنا موضوع فسألنا .... كلمناهو قال لي بكرة ٩ صباحا بكون مناسب معهم بقلة تجربتي جاوبت نعم قال لي خلاص رجعت الجامعة كلمت هاشم بلول فما صدق السرعة دي وسألني اكتر من مرة مستغرب بكرة قلت ليهو نعم انت مستغرب ليه فقال لي ياخ انحنا لينا كم يوم دايرين مقابلة مع مدير مكتب السيد الصادق المهدي لنقابل الصادق مدير مكتبو ذاتو ما قادرين نعمل معاهو مواعيد لحسن الحظ جو في المواعيد --- هاشم محمد أحمد بلول أصلا من مناطق ديم القراي ونشأ بكوستي درس القانون بجامعة الخرطوم وكان وقتها رئيس تحرير مجلة الجامعة المقابلة المعنية موجودة في موقع الفكرة ومسجلة كذلك بالصوت وقد نزلت في أول عدد لمجلة الجامعة بعد إنتفاضة 6 ابريل 1985
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
يوم واقف مع الأستاذ .... الأستاذ قال مؤكد أكبر فكرة تعرّضت للتشويه عبر التاريخ هي فكرتنا دي ---- بتصرّف مما يتذّكر الأستاذ التجاني صديق محمد علي* تجاني من منطقة أم مطالة بالجزيرة ونشأوا في ديم لطفي برفاعة عمل بالتدريس لفترة قليلة ثم ألتحق طيارا بسلاح الطيران وتقاعد برتبة رائد ثم عمل بمعرض الخرطوم الدولي هاجر مع مجيء الأخوان المسلمين للحكم 1989 لمصر ثم أمريكا تكساس ثم أيوا أنتقل للرحاب العلية في أيوا وله بسيدار ربيدز بقعة تُزار أمد الله بالعوافي وأطال الله في أعمار زوجه نوال عوض عبدالله لطفي وأولادها الفاتح، رحاب، محمود والأحفاد
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
موضوع معارضة الناس للأستاذ ده غريب جدا... تتصور حتى بعضهم ينَشيء أبناءه على كدة .... يوم أنا ماشي مع الأستاذ على بيت أمي آمنة .... لاقونا شُفع بدوا يكوركو .... محمود محمد طه!! بقرة نطّاحة ..... تتصور!! واصلنا في مشوارنا .. مافي اي تعليق .... بعد شوية شفنا شاب صغير في كرسي بتاع مقعدين الأستاذ كلمني عن روزفلت وقال لي كان رئيس أمريكي محبوب جدا لدرجة انو الأمريكان دايرين يعدلو الدستور عشان ينتخبوهو لدورة رئاسية تالتة ... أنا طبعا ما قادر أمرق من الجو بتاع الشفّع ديك ... مالهم يا ربي؟!! --- بتصرّف مما حكى لي د. بدرالدين عثمان سليمان قباني ونحن ما بين الصفا والحجون – مكة مدينة يناير 2018
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
في روايته "الأفيال" كتب القاص المصري فتحي غانم (إن ذلك الكهل لو رآه في الشارع بالقاهرة لظن أنه شحاذ، أهذا هو الرجل الذي يتسول نفوس البشر ويطلبها لتتجه معه الى الله في طريقه الذي يقودهم فيه) ... تصدى له كاتب (أسمه غير موجود بالصفحة 5 ولكنه غير جمهوري ويقول أن له تحفظات كثيرة ولكن ما دفعه للكتابة قول الحق)، تصدى هذا الكاتب في صفحة 5 فكتب: (ويبلغ الأستاذ فتحي غانم غاية الإسفاف وعدم الأمانة حين يصف زعيم الجماعة بأنه زريء الهيئة، رث الثياب ..... إن هذا مما لا يليق ولا تعليق لي سوى أن أنبه الى أن قوام حركة الجمهوريين في السودان هم المثقفون ففيهم أساتذة في الجامعة ومحامون وأطباء ومعلمون ورهط من طلاب الجامعات والمعاهد والشباب المتعلم وأن الأستاذ محمود محمد طه تخرّج من الجامعة مهندسا وعمل بالهندسة ردحا من الزمان ........... وهو – كما رأيته – رجل سوداني ربع القامة غامق السمرة ما زال حتى الآن وقد تجاوز الستين يحتفظ بحيوية وخفة في الحركة.....) رد فتحي غانم ردا مقتضبا ينكر فيه أنه يشير لشخص بعينه أو جماعة بعينها وأن "الأفيال" مجرد عمل روائي الخ الخ مع أن الكاتب أورد له العديد من الشواهد التي تدّل بعكس ما ذهب اليه فتحي غانم المصدر "مجلة الوادي"* العدد الرابع أغسطس 1981 --- كانت هذه المجلة قد أنشأت كعمل سوداني – مصري مشترك وذلك عقب إتفاقية التكامل التي وُقعت بين البلدين ولكن سرعان ما تم إيقاف المجلة بعد نشرها مقابلة مع الأستاذ محمود محمد طه!!!
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
في تلك الجلسة التي جرت في المقهى تحت ظلال النيم بين داخليتي دقنة وود عدلان تحدث لي علي (قبل أن يصبح شيخ علي) عن انبهاره بشخصية الأستاذ. حدثني عن تواضعه، وقال لي، في ما قاله لي عنه، إنه يمسك بالإبريق لتلاميذه وهم يغسلون أيديهم عقب الوجبات. انحفر ذلك التوصيف في ذهني، ولعله جعل الأستاذ لدي مميّزًا عن غيره، منذ تلك اللحظة. ومما أذكر أيضًا أن عليًا أخبرني عن تعليق الأستاذ على علم السودان الجديد الذي غيرته حكومة نميري، وحدثني بما قاله الأستاذ عن رمزية ألوانه الجديدة، وعن المثلث الأخضر الرابط بين الألوان الثلاثة المتبقية؛ الأحمر والأبيض، والأسود. وأذكر أنني جادلته في ذلك، وقلت له أن تأويل أيّ رمز يكون دائمًا نسبيًا، وأنه لا توجد قراءة واحدة للرمز. ويمكن أن يجيء شخصٌ آخر ويقرأ دلالات العلم وخطوطه ومساحاته وألوانه بشكل مختلف. أحسست بشي من عدم الارتياح في وجه علي، وربما توهمت ذلك، ومهما يكن من أمر، فقد امتص علي التعليق بأدب الجمهوريين المعهود، وبحالة الانفتاح بيننا التي توطدت منذ الطفولة الباكرة. كان عليٌّ حريصًا، وذلك نبلٌ عهدته فيه قبل أن يصبح جمهوريًّا، على أن يجرني إلى الحضن الجمهوري. وبالفعل، فإن فضل انتمائي للجمهوريين يرجع من بعد الله للأخ علي. فبعد أن تركت حنتوب وذهبت لكلية الفنون، أخبر الأخ علي عني، الأخ الراحل المقيم إبراهيم قرني، الذي كان يسبقني في كلية الفنون بثلاث سنوات. جاء قرني يبحث عني منذ أول يوم وطئت فيه أقدامي كلية الفنون في سبتمبر 1970، ليعرِّفَني بنفسه، ويبدأ التمهيد الطويل الذي قادني إلى بيت الأستاذ في مدينة المهدية. وقد استغرق ذلك التمهيد حوالي العام. من كل ما تقدم، ومما سوف يلي، أردت أن أقول أن لشيخ علي الفضل في مجيئي للحضن الجمهوري. فهذا هو ما أحببت إثباته هنا، قبل أن أتحدث لاحقًا عن "لمة" صلالة؛ ما حولها، وما فوقها وما تحتها، ما ترك أثرًا في نفسي لن ينمحي. --- د. النور محمد حمد 3 سبتمبر 2013 بعد عودته من صلالة في زيارة ألتقى فيه بخدنه د. علي أحمد ابراهيم رحمة
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
بعد زيارته تلك لي في حنتوب، دعاني علي لحضور جلسة في ود مدني. ولعلني ذكرت ذلك في كتابة سابقة، لا أذكر أين ومتى كتبت تلك الكتابة، ولربما أكون قد رويت تلك القصة شفاهيًا فقط، ولم أكتبها كما يُخيل لي. كان حضوري لأول جلسة جمهورية في منزل الأخ الراحل، أحمد عبد الفتاح* في ود مدني. كان يسكن بيتًا حكوميًا، من جنس البيوت الحكومية التي بناها الإنجليز من الطوب الأحمر، وكان البيت يقع شرق موقف الحافلات الممتد في الساحة المستطيلة الواقعة بين سينما الجزيرة، وحتى الجهة الشمالية لمستشفى ود مدني. في تلك الجلسة كان الإخوان يقرأون كتاب "طريق محمد" الذي يبدو أن أحدى طبعاته الجديد قد وصلت بمقدمة جديدة، أو لعلهم كانوا يقرأونه لإعادة التذكير، ولاستنهاض الهمم للعبادة. الشخص الذي كان يقرأ هو الأخ الراحل، طيب الذكر، جلال الدين الهادي، وكان الجزء الذي سمعته من تلك القراءة يتعلق بهيئة صلاة النبي عليه الصلاة والسلام. لم يكن عدد الحضور كبيرًا، ولم أتعرف حين أصبحت جمهوريًا، بعد ثلاث سنوات أو يزيد من تلك الجلسة، على أيٍّ من حضور تلك الجلسة الباكرة سوى على الأخ، قسم الله عبيد*، الذي يبدو أن هيئته وسنه جعلتاه يرسخ في ذهني. أما جلال* فقد رسخ في ذهني لأنني زرته في منزله مع علي بعد تلك الجلسة. === د. النور محمد حمد 3 سبتمبر 2013 بعد عودته من صلالة في زيارة ألتقى فيه بخدنه د. علي أحمد ابراهيم رحمة
* الأستاذ الباشمهندس أحمد عبدالفتاح من قدامى الأخوان الجمهوريين ولعلي أن قد رأيته في كوستى خطفة * الأستاذ قسم الله عبيد فضل جندي من قدامى الأخوان أيضا وقد حظيت بمجالسته في ود مدني كثيرا .... له بقعة تزار بـ "ود بشارة" قريبا من السعيد والجلال
* جلال هو الأستاذ جلال الدين الهادي الطيب إدريس ثاني أكبر الأخوان الجمهوريين بعد الأستاذ سعيد الطيب شايب وله بقعة تزار بـ "ود بشارة"
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
محمد ولدي دة صغييير في بيت الأستاذ جا شايل ليهو زي ورق كدة ولا كتب معاهو وليدات البيت زي كأنهم بوزوعوا في كتب الحملة* يعني الأستاذ كان مسرور للعمل دة... عاين ليهم كدي وقال لكن زمن ناس محمد ديل ما بتكون في حملة تاني ...... === بتصرّف مما تحكي الأستاذة فايزة محمد الحسن عمر إدريس "العبادي" فايزة زوج الأخ الراحل الأستاذ هرون حميدان عبدالله وأم أولادهما محمد، وفاء وسعيد ويقيمون جميعهم بميريلاند أمريكا حفظهم الله --- * حملة الكتاب: جآء ذكرها وبأختصار هي نظام إبتدعه الجمهوريون لعرض كتبهم وفكرتهم مباشرة للجمهور في مكاتبه وشوارعه وبيوته صنو الحملة ما أسموهو بالوفد والوفد هو مجموعة من أخوين أو أكثر تسافر لمختلف الأصقاع لذات الغرض حفلت الحملات والوفود بطرائف* وقصص لا حصر لها ---- يحكي د. علي أحمد ابراهيم رحمة بتصرّف كنا في حملة كتاب في الشمالية .... شايقي كبير في سنو مشلّخ لا ورا عرضت عليه كتاب... سألني دي كتب مسلمين ولا كيفرين (هكذا ينطق كلمة كفار) قلت له كتب مسلمين ... هز رأسه قال لا!!! ما بتلزمنا عجبت له!! أخرج كبريتة من جيبه وقال لي دي شنو؟! قلت ليهو كبريتة!! قال لي صنعوها الكيفرين ولا المسلمين قلت له صنعوها الكيفرين!! قال لي يا ولدي أنا زمان بمشي بالجمل نص يوم عشان أجيبلي جمرة.... هسي الكيفرين ختولي ناري فيييييي جيبي .... كتبك ما بتلزمنا
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
أطلق «محمود» لحيته وأرسل شعر رأسه. وقد صفت نفسه وأوضح لانصاره ان الحزب الجمهوري حزب له رسالة وهي رسالة الاسلام الحق. وان محموداً قد كلف بهذه الرسالة وليس هو رسولا، فرسالة الرسول هي علاقة بين الله والرسول لهدي البشر. ولكن رسالة محمود هي علاقة العبد بالعبد. وطلب منهم ان يقسموا الا يشركوا بالله. وان يؤمنوا به وان يهتدوا بالاسلام ولا يكذبوا ولا يسرقوا، ولا يزنوا، ولا يشربوا الخمر، ولا يرتكبوا فاحشة محبة على ذلك. وقد حدثني حبيبنا المرحوم الشاعر محمد المهدي المجذوب عن هذا الاجتماع الجمهوري. وكان الشاعر حاضراً فيه وكيف انه تنصل عن البيعة واحتفظ بالود.وعاد الاستاذ طه يزور اهله في رفاعة، ولم يحفل بالجمهرة في رفاعة التي اعدت لاستقباله استقبال الابطال الاحرار مقاومي الانجليز. والتمس بتركه في «خلوة» مع النفس والعقل قضى فيها عامين. ورجع الاستاذ الى الخرطوم ليبني الحركة التي عرفها اكثرنا برباطة جأش وصبر، يثير المسائل الشائكة المركزية غير هيَّاب حتى لقي ربه من فوق مشنقة بيد دولة نميري الظالمة === من كتابة للدكتور عبدالله علي إبراهيم
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
الأستاذ بيقول الصوفية السودانيين حققوا قاماتهم بالكرم والمصريين بالعلم --- بتصرّف مما سمعت من عدة مصادر ... قيلت بعبارات مختلفة لكن المعنى واحد منها مثلا "حققوا ولايتهم بالكرم" من قصص ونوادر الوفود حكى لي د. عمر القراي (بتصرف) مشينا وفد للشمالية.. نزلنا في نوري .... بلد الشيخ الجزولي القاضي الشرعي الكنا إنتقدناهو في كتبنا ... يبدو إنو أهلهم ما عاجبهم نقدنا دة .... واحد منهم لمّ فينا نهير شديد وكواريك!! أمرقوا من هنا!! من دايرنكم!! ما دايرين كتبكم!! ما دايرين نسمع .. الخ الخ ... خليتو بعد إنتهى من ثورتو دي وبهدؤ شديد جدا قلت ليهو بالله ديل إنتو الشايقية؟! بالله أنت شايقي؟! تطردوا ضيوفكم بدل تكرموهم وتعزوهم .... كلمتو كلام شديد في الحتة دي فالرجل تغير بصورة غريبة وبدأ يقول لي بلهجة الشايقية أماني يا ولدي أنا ما عِبْ!! (أي أتيت بعيب) ... أماني ياولدي أنا ما خِرِبْ (أي أتيت بالخراب على نفسي وأهلي)...أماني يا ولدي أنا ما أتلومْ (أي جبت اللوم لنفسي) ... الخ الخ فحلّف علينا بعد داك حليفة شديدة نقعد وفرش لينا عنقريب قدام دكانو وأكرمنا ونادى أهلو وجيرانو فكلمناهم ويمكن بعنا كتبنا كلها في قعدتنا ديك ...
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
Quote: أطلق «محمود» لحيته وأرسل شعر رأسه. وقد صفت نفسه وأوضح لانصاره ان الحزب الجمهوري حزب له رسالة وهي رسالة الاسلام الحق |
وصلتني رسالة من الأستاذ سعد عبدالله علي "أبو نورة" من مسقط بسلكنة عمان يقول فيها: مساء الخير. كلام عبد الله علي إبراهيم الذي نشرته اليوم عن إطالة الاستاذ لشعره ولحيته اثناء النضال ضد الاستعمار غير صحيح. ارجو تصحيح راي عبد الله عن ذلك. اما نكوص محمد المهدي المجذوب عن القسم فقد ذكر لي ذلك أستاذ عبد اللطيف. برجع ليك بكرة عن هذا الموضوع. الاستاذ اطال اللحية والشعر في الخلوة في رفاعة بعد خروجه من سجن كوبر. تحياتي التي تعرفها.
فرديت ليهو بأنو غالبا د. عبدالله علي ابراهيم أستند على كتابة محجوب عمر باشري* --- كتب لي د. عبدالله الفكي البشير بالفعل الاستاذ حلق لحيته بعدما خرج من الخلوة وكان لابسا الزِّي الإفرنجي عندما وصل الخرطوم في الاسبوع الاول من اكتوبر 1951 كما اوردت ذلك صحيفة الرأى العام.. --- محجوب عمر باشري ألف كتابا أسمه (من رواد الفكر السوداني) مع أن محجوبا، وبحسن نية، قد قال حديثا كثيرا إيجابيا في حق الأستاذ محمود الا أن الأستاذ محمود كان يفضّل ألو أستوثق محجوب مما أورد قبل أن يكتب فقد كانت تشوب كتابته عن الأستاذ محمود بعض المعلومات الناقصة أو المضافة الخ
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
فنجان البن:ـ أذكر فى أول زيارة لى للأستاذ محمود وفى حجرتة الشريفة ، وقد قدمنى له الأخ الحاج أحمد العوض ، قد كان هناك فنجان بن أمام العم حسن حجاز ، الأستاذ قال الفنجان ده أدوه لى على ، فبهمة عالية أخذ العم حسن الفنجان وقدمه لى ، وكدت أتواري من الخجل و أقول لا ، ولكن الأخ الحاج شعر بأنى قد أرفضه خجلا من رجل فى سن العم حسن فما كان منه إلا أن (قرصنى) فشربت ذلك الفنجان، بعدها تصببت عرقا حتى تبللت العمامة والجلباب وألتصقت ملابسى على وشعرت أنى كالغريق يحاول النجاة من بين الأمواج ، بعدها بقليل شعرت براحة ونسمة باردة وإستقرار داخلى غريب، طبعا لى قدام تأكد لى أن فنجان العم حسن المأذون من الأستاذ هو السر فى إلتزامى. وذلك العرق الماطر ما هو إلا لغسيل ماض كان يحتاج لذلك.
=== الأستاذ علي أحمد الإمام* حاكيا عن أول زيارة له للأستاذ محمود محمد طه --- علي أصلا من قرية كلي في ديار الجعليين عمل محاسبا بالسودان ثم هاجر باكرا لبريطانيا العظمي زوجه الأستاذ منى ذا النون جبارة الطيب من أحفاد الشيخ الطيب ود البشير وأصلا من قرية الشيخ الطيب ونشأوا بالحلة الجديدة الخرطوم ثم الصحافة حفظه الله وإبنهم محمود
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
مما يحكي شيخ علي: د. علي أحمد ابراهيم رحمة هناك قصة سمعتها من الاستاذ عن الشيخ ود اب صالح لا امل تكرارها، عن احد ابياتها ،الذى يقول: لى غيرك ما أگون دنّاع والقصة تقول ان ود اب صالح احد ابكار ود بدر يسكن فى البطانة شرق ود راوة وجنوب ام ضبان وهى منطقة فقيرة، وود اب صالح مسيده فقير فى مرة من المرات اصرن عليه زوجاته يمشى يجيب عيش (ذرة) من مسيد شيخه ود بدر، فوافق على مضض!!! لما وصل ود بدر احتفل بيه وعمل ليه مجلس مديح. ود بدر نادوه لغرض ما فطلع من المجلس لما رجع لم يجد ود اب صالح .سأل منه: قالوا ليه: الزول دا طلع من المجلس، فسأل منو الناس البره. قالوا ليهو: ركب حمارو ومشى. قال: لي ناس المجلس فى زول زعلوا؟ قالو ليهو لا. قال لي المداح انشدتو شنو؟ فقالو ليهو انشدنا شالن زاد طوال الباع سافرن زارن الشفاع. قال للمداح: انتو الطردتوهو قالوا ليهو كيف؟ قال ليهم: لما سمع البيت البقول: لى غيرك ما اكون دناع. والدنعة ان تسأل او ان تشحد بلسان حالك او مقالك غير الله. فشعر انه شطر البيت بعنيه!!! بمعنى انه جا يشحد ود بدر، وده بيعنى انو بيسأل غير الله. ود بدر قام قال: الما بفهم بالتلاويح لا بريح لا بستريح وشيل الجمال العيش ورسلن لى مسيد ود اب صالح فوصلت الجمال المسيد قبل ان يصل ود اب صالح بحماره. بدن النسوان يعوسن فى العصيدة والفرحة سادت المسيد. ولما جا ود اب صالح وشاف الحاصل قال: صحي الما بفهم بالتلاويح لا بريح لا بستريح. .
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
حكى د. أحمد محمد البدوي في كتابه (مسرد النفس المرضية: ظاهرة محمود محمد طه) بتصرف "الجد شعبان" المتخصص في برامج الأطفال حكى لي أنو مرة في أتبرا رافق الأستاذ محمود لحضور ندوة الشيخ الطيب السراج الأدبية قال الشيخ السراج أشترط عليهما للدخول أن يحفظ كل منهما قصيدة من عيون الشعر العربي ولم يكن الجد شعبان حفاظا .. قال قلت له سأحفظ ونأتيك باكر في الغد قال عدنا فألقيت عليه قصيدة فأدخلني قبل أن أكلمها ثم ألقى عليه الأستاذ محمود قصيدة ايضا فأدخله ... قال عن الأستاذ "محمود شخص في غاية الذكاء، وهز رأسه بنشوة إعجاب" --- بتصرف من صفحتي 37 و 38 من الكتاب\ قال أن قد حكى له ذلك في العام 1980
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
(سيلقي الأستاذ م. م. طه* رئيس الحزب الجمهوري محاضرة بعنوان "كيف يخدم العمال قضاياهم" بنادي العمال، في بحري، يوم الثلاثاء 20/7/1954 الساعة السابعة مساء. السكرتير الثقافي عبدالرحمن عز العرب) صحيفة الصراحة 2 يوليو 1954 صفحة 8 --- نقلا عن كتاب د. البدوي المشار اليه *م. م. طه في معظم الكتاب عمد البدوي الى إختصار أسم الأستاذ
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
حدثني الأخ بدر الدين السيمت أول استقراره بالبحرين، في أكتوبر الماضي، أن الأستاذ قال له مرة، وهو يومئذ جمهوري جديد:- (نحن عندنا سعيد. سعيد بحب الناس، وبخدم الناس.. وديل خصلتين قلَّ ما يجتمعوا في واحد.. قد تجد إنسان يحب الناس لكن ما يخدمهم، ودا كتير.. وقد تجد إنسان يخدم الناس لكن ما يحبهم، ودا كتير برضو.. لكن سعيد اجتمعن عنده الاتنين.. محبة الناس، وخدمة الناس.. ولذلك نحن قدمناه). --- جزء من خطاب كتبه الأمير طه اسماعيل أبوقرجة من المنامة لعبدالله عثمان في واشنطون في 21 مارس 2002
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
سلام يا قوم يا باشمهندس محمد الشيخ موسى ما عنيته بـ:
Quote: الفكر المهذب والفكر المهرجلاتي |
كتب عنه د. أحمد محمد البدوي* في كتاب عن الأستاذ محمود محمد طه صدر مؤخرا وتم توزيعه لأول في معرض ابوظبي للكتاب ابريل/مايو 2018 يقول عن الأستاذ محمود: ولكن هذا الرجل المتواضع آسر بملكة الكلام عنده حين يحاضر بذهن حاضر ومتوّقد ورصف منظم لأسس القضية لعله من لوازم عقلية المهندس، ولكن حين يأتي مجادل معقب، وخاصة لو بدا عليه الجنوح الى العداوة والتبخيس، حينها يتحول الأستاذ الى طاقة من البسالة في القول تفضح حجج المجادل وأقواله وتعرّي تناقضه ووهنه خاصة أنه يقف على مصادر مجادليه ولا يكاد أحد من مجادليه يقف على شيء من مصادر محمود ..... أنه مجادل جبار قادر على تدبير الردود المفحمة والمذهلة!! === صفحة 114 مسرد النفس المرضية ظاهرة محمود محمد طه دراسة د. أحمد محمد البدوي دار عزة للنشر والتوزيع - الخرطوم 2018
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
بسم الله الرحمن الرحيم ( حم * والكتاب المبين * انا جعلناه قرآنا عربيا لعلكم تعقلون * وإنه فى أم الكتاب لدينا لعلى حكيم . )
كان ذلك فى عام 1980 ، لا اذكر الشهر او اليوم ، فقد كنت فى غرفة الاستاذ فى يوم جمعة ، وانا فى طريقى الى ودمدنى ـ وكنت أجلس فى الكرسى القريب من سرير الاستاذ ، وكان الاستاذ يصحح فى احد كتب الاخوان ، مستعملا مصحفا صغيرا لمراجعة الآيات ، فعجبت فى نفسى ، وقلت فى خاطرى ، بعد كل هذا التجسيد لمعاني القرآن في نفسه ، وأنه عندي لا يحتاج الى مصحف للمراجعة ، ومع ذلك يستعمل المصحف؟!! وأكبرت فى نفسى اعتباره للشريعة ، وبعد قليل أغلق الاستاذ المصحف ، والتفت ناحيتى ، ماداً الىّ المصحف وهو يقول : المصحف دا هدية ليك ، لكن بى حقو ، لم انتبه من شدة المفاجأة لعبارة ( لكن بى حقو ) ومددت يدى لاستلمه ، فسحبه اليه ، ثم كرر العبارة : لكن بى حقو ، سألت : وحقو شنو ؟ فقال لى : أن تحفظ أكبر عدد من آيات الكتب ، فقلت : نعم ، على أن أعان ، فمنحنى الاعانة ، ومد الىّ الكتاب .. خرجت من الغرفة ، وقد أسعدنى ذلك كثيرا ، وما ان وصلت الى مكان عملى الا وشرعت فى نسخ آيات الكتب ، فى دفتر اشتريته لهذا الغرض ، وقد بدأت بكتاب الرسالة الثانية من الاسلام ، وكنت اكتب الآيات بقلم حبر جاف مداده أخضر ، جاءنى هدية من الأخ جبريل محمد الحسن عند عودته من بعثته فى بريطانيا فى سبتمبر 1980 ..
بعد فترة وجيزة من العمل عدت الى الاستاذ وقد أكملت نسخ آيات كتاب الرسالة الثانية ، واعطيت الدفتر للاستاذ فقال لى وكأنه قد اندهش : ياه .. معقول آيات كتاب الرسالة الثانية بالعدد دا ؟! ثم شرع فى تصفح الدفتر ، وكان يعلق على الآيات المكتوبة ، ومما قاله لى عن حرف ( ما ) الوارد فى بداية الآية ( ما ننسخ من آية ) أو فى بداية الآية ( ما يفعل الله بعذابكم ) الشك من عندى ، قال لى : ( ما ) هنا فاعل ، فاندهشت ، وقال لى أيضا وهو يعلق على الآية ( قل انما حرم ربى الفواحش ، ما ظهر منها وما بطن ، والإثم ، والبغى بغير الحق ، وأن تشركوا بالله ما لم ينزل به سلطانا ، وأن تقولوا على الله ما لاتعلمون ) قرأ فاصلة الآية ( وأن تقولوا على الله ما لا تعلمون ) وقال : فى نهاية الأمر المحرم ياهو دا ( وأن تقولوا على الله مالا تعلمون ) كما أشاتد الاستاذ بطريقتى فى تقليد خط الكتب وقال انها ستساعدك على تجويد الخط أو كما قال ..
مرت الأيام ، وجاءت اعتقالات كوبر عام 1983 م ، وجمعنى مع الأخ حمد النيل عبدالله العركى ، قسم الكرتينة ( أ ) بسجن كوبر ، وكنا فى غرفة واحدة ، فحكى لى الأخ العركى قصة ذلك المصحف ، فقال لى انه قد جاء بالمصحف هدية للاستاذ ، وانه كان حاضرا فى الغرفة الشريفة حين اهداه لى الاستاذ .. === بتصرّف بسيط مما كتب الأستاذ أحمد محمد أحمد البشير وقد ورد ذكره من قبل
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
وأنا صغير كنت عيان رقدوني في مستشفى رفاعة... كانت ممارضاني خالتي فاطنة المكي... أمي آمنة جات تزور مريض بتعرفو... هي بتعرف خالتي دي فجات تزور ولدها الراقد دة برضو .. خالتي قالت لي سلم عليها دي مرة محمود محمد طه... طوالي أنا شبيت وقلت ليها: آآآ!! دة الزول القال أنا صاحب الله .... كنت فرحان .. --- بتصرّف مما يحكي بروفسير أحمد المصطفى الحسين منصور
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
سيدي ووالدي الأستاذ تحية طيبة مباركة لقد وصل اليّ الخطابان فعززا من شعوري بمعية الله تعالى، ثم بمعية أبي الأستاذ الذي رعاني لدى الله بعين لا تغفو، في تلك اللحظات التي طالعني فيها، حسا، مشهد: لا حوّل ولا قوة الا بالله .. وأسمح لي أن أقول الآن فاضت عيناي بالدمع.. لقد بلغني منك ما أمدّني، وأسعدني، وأفرحنى أشد الفرح، وجمع لي في تلك اللحظات ما أحسست أنه حقيقة الوجود، ملكه وملكوته، بصورة لا أملك تفاصيلها ولكنها استغرقتني من جميع أقطاري.. كنت لحظتها أشعر أني أعيش شيئا يشبه ما علمته من حديث أبي الأستاذ عن القرآن من أنه موسيقى علوية... أرجو القبول والرعاية أبنكم المخلص عبداللطيف عمر (بتصرف) --- اليوم 3 مايو 2018 تمر الذكرى السنوية الثالثة لرحيل الأستاذ عبداللطيف عمر حسب الله الى الرحاب السنية ... نفعنا الله واياكم بجاهه العريييييييض
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: Omer Abdalla Omer)
|
آآآآآآآآآمين يا دكتور عمر أخبارك ===
سكناب .. أبوبكر الأمين في ذكرى استشهاد الاستاذ محمود محمد طه
قذف بعض التلاميذ وصغار السن بتحريض من بعض القوى السياسية التقليدية مجموعة من حملة الكتاب الجمهوري بمدينة كوستي في عام 1975 على ما أظن وكان الاخوان الجمهوريون يقومون حينها بحملة كبيرة في المدينة موجهة لمواطنيها أجمعين، كانت الواقعة التي بدت لنا عادية محل اهتمام الاستاذ محمود محمد طه وقد توقف عندها بالتامل ورآها كظاهرة خطيرة تنذر بشر عظيم لأنها متعلقة بالأجيال القادمة ولانها متصلة بالعنف في الحياة الفكرية والسياسية. ومثلما كان شهيد الفكر يلتقط دائماً أول الخيط ويدهشك بمقدار من العمق والتناول غير المسبوق ويطرح كل ذلك في بساطة ومباشرة وسهولة اقترح الجمهوريون عقد ندوة حول هذه الظاهرة وارسلت الدعوات بسرعة للعديد من وجهاء وأعيان ورموز مدينة كوستي وكنت وصديقي فاروق بلول نقضي اجازة بالمدينة وكانت صلتنا بالاخوة الجمهوريين وطيدة ولم ينس الذين حملوا الدعوات أن يضمونا الى قائمة هؤلاء الوجهاء والاعيان. وجلسنا في مقاعد الندوة نستمع الى طرح شامل صارت فيه تلك الواقعة حدثاً جللاً لابد من تلافي عواقبه قبل أن تتخرج على أيدي المحرضين اجيال مشربة بالعداء والعنف ولا تعرف فضيلة المناقشة والحوار. وكنت قد لاحظت أن الشهيد الاستاذ كان وهو يرد على الاسئلة والمداخلات يحرص على ذكر اسم السائل وخطر لي أن هناك من يبعث اليه بورقة يعرفه فيها باسم المتحدث لكني لم أرى مثل تلك الورقة ومضى بي التفكير (الواقعي) الى أن الاستاذ يعرف معظم الحضور بسبب علاقته السابقة بالمنطقة عندما كان يعمل مهندساً في المشاريع الزراعية بالنيل الابيض ولكني أفقت من هذه (الواقعية) عندما ناداني باسمي وهو يرد على سؤالي الذي كان مصاغاً بطريقة تعلمناها في دروس المساجلات الطلابية التي تهدف الى ارباك الخصم لا الى كمال الحجة والمنطق، قلت للاستاذ الشهيد: أنتم الآن تحتجون على بعض الصبية الذين قذفوا الجمهوريين بالحجارة وتغضون الطرف عن أكبر المجازر التي لا عنف أكبر منها عندما علق أنبل الرجال على المشانق من أمثال عبد الخالق محجوب وتؤيدون نظام مايو الذي مارس ذلك العنف... وبهدؤ شديد واطمئنان شامل قال لي كلمات وان كنت لا اتذكر الآن نصها بالضبط إلاّ أنه ذكر ما معناه انني اناقش مسألة مهمة هي ذاتها التي يطرحونها للنقاش حتى لا يكون حسم الخلاف عبر العنف والفرق اننى أتحدث عن الماضي وهم يتحدثون عن المستقبل وأنا أتحدث في السياسة وهم يتحدثون في التربية التي هي عاصم الآجيال الجديدة عن اقتراف تلك الاخطاء وقال كلمات خيّرة في حق الشهيد عبد الخالق وعرفت في لحظة قصيرة ما لو قضيت العمر كله ما عرفته عن مفكر سوداني كان خلاصة أخيرة لصوفية خلاويها موغلة في القرون وبهمة كما قال الشيخ تاج الدين البهاري (تصلح لإقامة الدين).
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: لطفي علي لطفي)
|
أوووووه حفيد أدّاب الفيّلة ذاااااتو الشعبة في رقبتي (يوؤتي بي من بلاد بعيدة) وسعيد أن قد أستمتعتم بهذا فهو منكم وإليكم قال له جبريل عليه السلام منك واليك يا محمد؟؟!! --- ان شاء الله بي جيتك دي،متل جدك ود عبدالصادق، تتبين لينا فيهم متل الطريفي فراق الطريفي لي جملو وكلهم لسان حال الهبروا ملوا
صادو وغسلو
ناكر أهلو
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
مكاشفي وكباشي وسماني أنت في الرئاسة!! وصلتني اليوم رؤيا طيبة لأحد أعضاء هذا المنبر وأستبشرت بها خيرا، وخيرا عميما، فعل أن قد أنفتحت "أبواب الحضرة" هذه الأيام ولعل أن منادٍ ينادي "الا هلموا" وقديما قال الشيخ السماني للأستاذ محمود محمد طه: أعصر خمر وأضرب زمر يأتيك من كل فج زيد وعمرو أنهم يأتون!! من درب "رام الله" ومن منا لا يرومه، أحباب "الرومي" وغيره... أو من جبل "الزيتون" فهو، هو زيتونة لا شرقية، ولا غربية وقد أضاء زيتها الذي كان قد كاد حينها .... --- كتب لي صاحب الرؤيا عليه الرضوان ونفعنا الله بأجداده وبه سلام يا الغوث
امس رأيت روية اني في مسيد الكباشي .... وكل الحضور المنشدين الجمهوريين والاكل حق الجمهوريين والخليفة حق الكباشي فات قالي اقعد مع ناسك دول --- هذه ذكرتني بما حكت لنا الأستاذة فتحية المبارك محمد الحسن (بتصرّف) أبوي ماخد الطريق على الشيخ المكاشفي، معلّق صورتو في أوضتو ومحافظ على أورادو ... محمد أخوي الكبير التزم وبقى لازم الأستاذ... أختنا الكبيرة عواطف خلت المسلمية وبقت تدرس في أم درمان وسكنت في بيت الأستاذ وبقت من ناسو ... أمي* مرة مرة بتزورهم في الثورة... محمد أخوي كان نفسو أبوي يحصل الخير دة ما يفوتو .. أها نحنا في الحالة ديك أبوي يوم من الصباح قام قال لأمي وصفي لي بيت الأستاذ.... تصل جامع الختمية .... كيت كيت كيت... سيد التاكسي من السوق الشعبي قال ليهو بخبرو تب!! قال دقتو للباب الأستاذ فتح ليهو الباب بنفسو وسلّم عليهو بي اسمو* وأصلو ما حصل إتشاوفو ... دي شطبت رأس أبوي شطبة شديدة!! الزول دة عرفني كيف؟! ... لا داخل!! لا داخل!! قالت دخلتو الأستاذ نادى حاجة كلتوم قال ليها أكرمي شيخ المبارك ... قال ليهو كدي قبال تكرموني أنا عندي موضوع لازم أقولو ليك أول.... تاني الأستاذ شطب رأسو ... موضوعك بلغنا بيهو الشيخ المكاشفي... لاحول ولا قوة!! ... لا حول ولا قوة...!! بلغنا بيهو المكاشفي لكن نسمعو منك برضو بعد الإكرام قال جابو ليهو كورة كبيرة بتاعت موص .. قال الله خلقو موص أحلى من دة ما لاقاهو لدرجة إنو، و دة بيت يدخلو لأول مرة، قال قلت للأستاذ قول للمرة العملت الموص دة تجيب لي الحُترب* بتاعو .. قال جابو لي الحُترب ومعلقة قال خرتو ستْ ما خليت فيهو التكتح!! استعدلت وقلت ليهو أشوف يا سيدي اللمنت عليك دربين واحد فيهن منوّر نور شديد والتاني ضلام شديد.. المنوّر دة فيهو ناس ما كتار وفي نهايتو في عمود قالو لينا دة عمود التوحيد ... مشيت فيهو ولي قدام لقيت شيخي الشيخ المكاشفي قلت ليه ديل منو؟ قال لي ديل جماعة محمد ولدك!! أستغربت .. قلت ليهو وأنت معاهم؟! قال أنا معاهم وأنت معاهم لي قدام لاقانا محمود نفسو ولاقانا النبي صلى الله عليه وسلم ومشينا في دربنا .... ---- فتحية المبارك محمد الحسن تقيم حاليا بود مدني مع زوجها الأستاذ دفع الله موسى البدوي لعل هذه الأسرة، أسرة الوالد المبارك محمد الحسن والوالدة آمنة عبدالرحيم أحمد بابكر قالت فتحية أن والدها مكث ثلاثة أيام مع الأستاذ وفي ختامها قدّم دعوة للأستاذ لزيارته في المسلمية... قالت أن الأستاذ لبى الدعوة وأقام ندوة في منزلهم بالمسلمية ثم أقيم بمنزلهم معرضا للقكرة الجمهورية ومما حكته عن ذلك المعرض أن أمرأة مسكينة بالقرية إسمها فاطمة بنت كنين وهي إمرأة أمية وحركتها عاجزة لعطب أصاب رجلها ولكنها مع ذلك كانت تحضر لهذا المعرض وتدخل في أحوال.. قالت فتحية أنهم بعد ذلك ذهبوا لمؤتمر في رفاعة ففوجئوا ببنت كنين هذه، مع عجز حركتها، الظاهر، تلحقهم هناك وتلومهم: ها ناس!! ما بتكلمونا أنتو ماشين!! ها ناس ها!! ..... --- قالت فتحية بعدها في عزاء يخصهم جآءهم للعزاء في المسلمية الأستاذ محمود وأمنا بت الشول وأمنا خديجة بت الشريف (ولعلها ذكرت حاجة كلتوم أيضا) --- • أنت في الرئاسة لطيفة لعلي ذكرتها من قبل ولكن لا بأس من ايرادها ثانية طالما الشيء بالشيء يذكر إبن قام بتحجيج أمه ... أمه عِترَت فقالت: يا الكباشي!! أبنها قال لها ياحجة أنتي هنا في الرئاسة كباشي شنو!!! يلحقونا ويفزعونا
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
طلب السيد عطية مناظرة الأستاذ محمود، فحوله الأستاذ محمود إلى كبير الأخوان الجمهوريين سعيد الطيب شايب ليناظره، لكنه أصر على مناظرة الأستاذ محمود شخصيا، فاستجاب الأستاذ محمود له، واتفق على أن تكون المناظرة بجامعة الخرطوم بتاريخ 21/2/1968م.. فذهب السيد عطية إلى الأخ الجمهوري ذو النون جبارة ليستجمع كتب الأستاذ محمود ليستعد للمناظرة، فنصحه الأستاذ ذو النون بألا يعتمد على ما ورد في هذه الكتب وحدها، ولفت انتباهه إلى أن الأستاذ محمود يمكن أن يفاجأه بكلام جديد لم يرد في الكتب حتى الآن.. ثم انتظر الطلاب المناظرة في التاريخ المحدد في الإعلان بالصحف اليومية، لكن توفي السيد علي الميرغني في ذات التاريخ فألغيت المناظرة بسبب هذا الحدث الكبير.. لم يحدد موعد جديد لإقامة المناظرة، وفيما بعد، ظهر السيد عطية كشاهد بالرأي ضد الأستاذ محمود في محكمة الردة في نوفمبر 1968م.. --- مجتزأ من مقال للدكتور محمد محمد الأمين عبدالرازق في الرد على الإذاعي صديق أيوب
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
كتب حاتم الياس في 21 أبريل 2018 في منبر (السودان للجميع) (سأل محمود محمد طه عبدالخالق (حسب افادة محدثي الذى كان حاضراً) ماذا أعطتك الصلاة فقال له عبدالخالق الذى كان يطفي سجارته على صينية طعام فارغة أمامه فمنزل محمود لم يكن به معد لأحتياجات المدخنين فكان عبدالخالق يستخدم الصينية التى أمامه المزينه بصور فواكه ملونة قال عبدالخالق أعطتني الصلاة...قدرة التحمل فى المعتقلات ..كانت تعينني على الحبس . عبدالخالق كان يزور محمود محمد طه فى منزلهم بالحارة الأولى بشكل متكرر محدثي الذي عاصر تلك الفترة قال لي ان ثمة صداقة عميقة جمعت بين الرجلين وهو مازال يذكر سؤالاً وجهه محمود لعبدالخالق ما الأخلاق عندكم؟ فرد عبدالخالق هى السلوك فقال محمود لعبدالخالق أن الأخلاق عندنا نحن الجمهوريين هي (حسن التصرف فى الحرية الفردية المطلقة) وقال لي أيضاً أن محمود محمد طه كان يصف عبدالخالق بالذكاء الشديد وفي ذلك الحوار قال محمود محمد طه أن دكتاتورية الطبقة الحزب الواحد هى مرحلية لكن النظرية الماركسية فى حد زاتها هي نظرية ممتازة. ........... لكننى فقط أسأل ترى هل فكر عبدالخالق ولو للحظة فى عبور مقابر أحمد شرفي والذهاب نحو الحارة الأولى للأحتماء هناك ....حيث منزل محمود محمد طه) إنتهي النص Sudanforall.org
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
لأنه لا توجد صدفة ، فقد التقينا أنا والأخ أبوعبيدة محمد سعيد فى قلب الخرطوم ، ثم اجتمعنا تحت ظل شجرة نيم وست شاى ، وأصبحنا كما قال الشاعر الصهيونى فى المزمور( على أنهار بابل هناك جلسنا ـ بكينا أيضا عندما تذكرنا صهيون -على الصفاف فى وسطها علقتا أعوادنا ) وما لم يقله الشاعر الصهيونى ولم يدركه ولا يفهمه ، اننا شربنا الشاى والقهوة ، وبعدييييييييين اتونسنا ، الونسة واحدة مافى غيرها ، الموضوع ! حكى أبوعبيدة ان الاستاذ قال عن اقناع الناس بالفكرة انو البشرية دى ما بتقتنع ليك حتى ولو كنت انت مصحف ناطق ، تقتنع ليك بس لمن تكون مصحف فى اللحم والدم .. وبعدييييين برضو حكى أبوعبيدة عن اختيار الاستاذ للأخوان من وسط السودانيين ( زى قصة الأوتاد ) قال الاستاذ ، ناخد واحد ، ونخلّى عشرة ، ناخد واحد ونخلى عشرة .. وبعديييييين قال أبوعبيدة انو حضر الاستاذ وهو يقول لعبد الجبار المبارك : انت آآآآآآآآآآآآآآآآآآ آخر من يستفيد من الأمر دا ! === ترويحة عرفانية مع الأستاذ أحمد محمد أحمد البشير
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
فقد حضرت نقاش لعبدالجبار مع الأستاذ سأله الأستاذ في مستهله عن الغرض من زيارته!! فقال عبدالجبار إنه جاي ليرجع كلام الأستاذ لأسياده ويخلي الأستاذ قاعد في السهلة ساي (طب ما عندك شيء)!! الأستاذ سأله: أسيادو منُنْ؟؟ قال: النابلسي، وابن عربي، و...!! الأستاذ قال له: وإنت ديل عندك اعتراض عليهم يا شيخ عبدالجبار؟؟ قال له: لا!! الأستاذ سأله: طيب إذا ما عندك اعتراض عليهم، معترض علي أنا في شنو؟ قال له: لأنك إنت نسبت كلامن لي نفسك!! قال له: يعني إنت ما عندك اعتراض علي الكلام، عندك اعتراض علي أنا؟؟ قال: أيوه، انت نسبت الكلام لي نفسك!! فقال له: شوف يا شيخ عبدالجبار: الكلام الجبتو أنا جديد، ما سبقني عليهو حد!! قال له: كتار سبقوك!! قال له: مين قال بوحدة الوجود؟؟ قال له: بس دا الكلام الفارغ الجبتو إنت!! فقال ليه الأستاذ: لكن انتوا يا شيخ عبدالجبار ما قاعدين تقولوا بيهو؟ قال له: نحن منو؟؟ قال له: السمانية!! قال له: وين؟ الاستاذ قال له: إن تكن بالله قايم، لم تكن، بل أنت هو!! قال له: دا النابلسي!! قال: لكن انتوا ما قاعدين تنشدوهو يا شيخ عبدالجبار؟؟ فسكت!!
في اللحظة دي جابو الإكرام، وكان عصير.. الاستاذ شال الكباية من الصينية ومداها ليهو.. فقال له: باليمين!! الأستاذ وضع الكباية راجعة، وقال له: أنا ما عندي يمين وشمال، يا شيخ عبدالجبار، أفتكر قدُر دي حقو تكون انت عارفها!! فسكت مرة أخرى!!
ثم قال: على كل حال نحن طلاب حق!! الأستاذ قال له: عمرك ما كنت في يوم طالب حق، يا شيخ عبدالجبار!! === صورة قليمة للأخ الأستاذ ابراهيم عبدالنبي عن زيارة الشيخ عبدالجبار المبارك للأستاذ محمود محمد طه
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
كنت صغيرة... يمكن كان عمري 14 سنة بس... فجأة لقيت الناس الفي البيت كلهم طلعوا للحركة وغيرو... فضلت بس أمي الرب جود وأنا مع الأستاذ خفت وفرحت ... قلت هسي لو جو ضيوف للأستاذ البيخدمهم منو؟! فرحت شديد... فعلا بعد شوية جو ضيوف... الأستاذ جا داخل جوة ليكرمهم... أنا بغسل ليهو في الكبابي وهو قطّع الليمون ومصروا شافني غسلت معلقة صغيرة في الماسورة ... بصورة لطيييييفة قال لي معلقة صغيييرة زي دي يغسلوها بي موية قدُر دة!!! شال الليمون ووداهو للضيوف فرحت شديد === بتصرّف مما تحكي الأستاذة كوثر محمد خير حمد بطران كوثر أصلا من منطقة الرباطاب ... نشأت بكسلا ودرست بأم درمان ثم تنقلت مع زوجها د. الطيب أحمد النعيم وأولادهما لبريطانيا ثم الخليج
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
الشاعرة العارفة من دامت في حضرة الأستاذ محمود محمد طه --- عضو هذا المنبر الأستاذ محمد عثمان الحاج كتب تعليقا على شريط فيديو (يتعذّر علي رفعه ولكنه متواجد في الشبكة وفي خيط الأستاذ محمد عثمان الحاج): من تعليقه ((وأتت النفحات من أم عيدان بسيرة واحدة من العارفات اللاتي يندر وجودهن، سيرة تهتدي بها الأرواح وتتواجد بها القلوب، بعض من مناقب العارفة الشاعرة السيدة من دامت وحكايتها العجيبة مع الأستاذ الشهيد محمود محمد طه (بعد الدقيقة التاسعة عشرة): === الكتابة من الشريط: "مرة الاستاذ محمود محمد طه فى زيارة للشيخ السماني قال يجيبو ليهو شُعَّار يشوف نفس البقعة جابوا ليه المقدم بلال (طبعا الكلام عنه بيطول لكن ما مجالنا هسع) وبعض المقاديم وجابولو الشاعرة مندامت لمن بذكر كلام بقولو الاستاذ محمود بعد زمن طويل والناس ديل كلهم فاتوا الآخرة بيقول انو لما جيت الشيخ السماني طلبت أشوف نَفَس البقعة ورموزها جابوا لي مندامت والمقدم بلال يصيح صيحة الشعار البنقولها فى الحلقة بتاعت الذكر يصيح بلال والناس كتار كانوا موجودين لكن خصص ديل قال يصيح بلال تبكي مندامت، تقصِّد مندامت يبكي بلال بعدين الاستاذ محمود قال ليها: يا مندامت، قدام الحشد ده كله، انا داير أخاويك! قالت ليهو: بعد أكلم أبوي. فعلا قال ليها: سمح كلمي ابوك وانتظرها....الناس.. مشت لأبوها السماني قالت ليهو: يابا أنا الراجل الجبتوني ليهو هسع قال لي أنا داير أخاويك وقلت ليهو بعد أكلم أبوي قال ليها: يا مندامت أذنت ليك. وقبل ده أخاويك دي قالها ليها جدنا الأستاذ القطب العارف الكامل الشيخ قريب الله بن الشيخ ابي صالح.." الأستاذ محمود... قال.. كتير جدا يقول لي تجيب لينا مندامت.. سقتها ليه.. فكان.. احتفلوا بيها الأخوان الجمهوريين إحتفال عظيم.. وحتى إنه لمن سمح ليها بالسفر من أمدرمان.. ما سافرت طوالي.. أخدوها أخوان الحصاحيصا الحصايحيصا.. واخدوها أخوان مدني لمدني.. وحتى تحكي ليك لمن وصلت البص الماشي الحاج عبدالله... تصف الناس... كبار الجمهوريين في مدني.. زي أمثال الأستاذ سعيد الطيب شايب في مدني وأمثاله بالصورة زي دي.. وقفوا معاها في مدني عند البص إلى أن قام البص لما كان الموقف شمال المستشفى في مدني... يا سلام.. ياااخييي مندامت مرة غريبة جدا جدا.. ياخي.. روحانية عالية.. مرة غير عادية.. كانت..... ---
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
من لقاء للطاهر حسن التوم مع د. الزبير أحمد الحسن (رئيس الحركة الإسلامية ووزير سابق) س: ممكن تقول شنو لصالح الجمهوريين من خلال الجامعة؟ ج: والله حاجتين رئيسيات معلمين رئيسيات: الولاء الشديد لي محمود (هنا تظهر على الشاشة صورة الاستاذ محمود) يطابق نظرة الصوفية المريد للشيخ بطريقة 100% والتانية: سعة البال والأفق فى الحوار كانوا أوسع صدوراً مننا فى الرأي والرأي الآخر مع أنهم يعني فى الجدل أحيانا يكون الكلام حقهم حتى الغير المنطقي يكرروهو ويصبروا عليهو ويقولوهو يعني حتى قالوا النار فى النهاية بتزول ويقوم محلها جرجير شجر جرجير بدافعوا عن الحكاية دي وبس صبر شديد يعني فمثابرتهم على الحوار وصبرهم كان مثال فعلا للمحاورين وكانوا اوسع مننا صدوراً فى الحوار. س: شفت محمود؟ ج: إلا فى ندوة عامة استمعتلو وهو موجود لكن ما قابلته مقابلة ثنائية. س: كيف كنت بتشوفو وهو متحدث وكده بتعاين ليهو كيف انت الزبير فى الوكت داك الشاب؟ ج: والله طبعاً ما..يعني ما الزبير الشاب الوكت داك قارئ عنه أنه هو زول آآآ.. س: يعني كنت ما داير تسمع منه أي حاجة باعتبار الصورة الفي ذهنك ولا كنت بمنطق الحجاج والجدل داير تسمعه اكتر ج:قريت واستمعت ليهو لكن القضايا الرئيسية والأساسية بالنسبة ليهو هو يعني انه أشبه بالنبي كده يعني أشبه بإدعاء النبوة فى الرسالة التانية دي كانت فى حاجات كثيرة جداً كانت بالنسبة لينا حاجة رئيسية وأساسية يعني (تظهر فى الشاشة صورة غلاف كتاب الرسالة الثانية من الإسلام) ما بتخلي الزول بعد داك.. س: (مقاطعاً) بعاين ليهو من زاوية الزهد الخاص.. ج: الزهد الخاص والأدب والصبر على الناس يعني سمت المشايخ بتاع التواضع والبساطة والتبسط والزهد وطبعا دي ميزة عند كل شيوخنا الصوفية بتلاحظ عليهم البساطة والصبر على الناس. س: تفتكر محمود صوفي؟ ج: آآآ
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
الأستاذ حكى لينا قصة الشيخ المقابلي قال الشيخ المقابلي قفل بابو عليهو وقال كان عندي رزق يجيني في محلي كان ما عندي ما عندي خلاس قال عشان كدة النسوان بقولن يرزقني الرزق المقابلي ورا بابو —- بتصرف مما يحكي د. علي احمد ابراهيم رحمة (شيخ علي) الشيخ المقابلي حفيد الشيخ ادريس ود الارباب وله بقعة تزار بالعيلفون
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
١٩ مايو ٢٠١٨ تورخ مرور ٦٧ عاما على وصية الأستاذ محمود محمد طه : اليوم يوافق19 مايو وصية الاستاذ محمود محمد طه
سم الله الرحمن الرحيم 1- هذه وصيتي و وكيلي علي تنفيذها زوجتي بعد الله. 2- تسدد الديون أعلاه و إذا لم يعرف يوسف الحلواني و بائع الفحم والحلاق يتصدق بما لهم علي الفقراء باسمهم و التسديد من نصيبي من مال السلوم. 3- ينظر في ما علي من حساب من شركائي بمقتضى فواتير من عبد الكريم عبد الرحمن "حساب خصوصي باسمي" و هو حوالي 36 جنيها. 4- ينظر في أستجرار المكتب من شراكة السلوم و ما يخصني منه يدفع و ابراهيم الأسد مسئول عن الارشاد لذلك. 5- يعطي شيخ لطفي مبلغ 300 جنيه تعويضا له عما صرفه علي وعلي أولادي. 6- تعطي الرب جود مبلغ 50 جنيها. 7- ما يبقي يكون لزوجتي و أولادي وزوجتي هي خليفتي عليهم بعد الله. 8- لا يفرش علي ولا يتصدق ولا أكفن في جديد و لا يناح علي و لا يجعل علي قبري أي علامة ويباشر غسلي زوجتي. محمود محمد طه السبت 13/شعبان/1370 هـ الموافق 19مايو/1951م
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
مرة الأستاذ كان عندو حركة في ود مدني ... ناس طلب* ديل يطلعوا من مكاتبهم في الخرطوم بعد الضهر يركبوا لي ود مدني... يشاركو في الحركة لغاية نص الليل وطوالي على الشارع يركبوا القندرانات توصلهم وش الصبح لشغلهم في الخرطوم وتاني بكرة يرجعو ود مدني --- بتصرّف مما يحكي د. علي أحمد ابراهيم رحمة (شيخ علي)
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
مرة في أمر من الجامعة* بوديني رفاعة ... ما قدرت أصلو في الثورة ... ضربت ليهو تلفون من الجامعة .... محمود هنا سألني من حركتنا في الجامعة وبعد داك بلغتو إني ماشي رفاعة فأذن لي ---- بتصرّف مما يحكي الباشمهندس عبدالحليم حسن العوض* حليم درس برفاعة الثانوية وألتزم منذ ذلك الحين ثم درس الهندسة الكهربائية بجامعة الخرطوم عمل بمشروع الجزيرة بركات ثم بقطاع البترول - هجليج زوجه الأستاذة نجلاء يوسف لطفي عبدالله ولهما من الأبناء محمود، أحمد، آن والصغيرة فاطمة حفظهم الله تقيم الأسرة بأمريكا ويقضي حليم وقته بين هجليج وأمريكا
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
الصخرتين ديل فعلا موجودات في المقرن* جنب المنتزه العائلي ... في السبعينات الأستاذ قال لينا ديل الصخرتين الإلتقوا عندهم سدينا موسى عليه السلام ونبي الله الخدر --- بتصرّف مما يحكي الأستاذ خلف الله عبود الشريف خلف أصلا من منطقة كريمة ونشأ بعطبرة ... بدأ دراسة الإقتصاد بجامعة الخرطوم وكان في اتحاد الطلاب وقتها وشارك في رقصة "العجكو" الشهيرة تحوّل بعدها لدراسة الفنون وهو من كبار التشكيليين السودانيين الآن ... عمل بمجلة الصبيان ثم المدارس وسلطنة عمان يقيم الآن مع زوجه الأستاذة جواهر عبدالرحيم الحسن بالكلاكلة ولهما من الأبناء عبود ومحمود حفظهم الله --- المقرن: أول إجتماع لإنشاء الحزب الجمهوري تم في المقرن أربعينات القرن الماضي
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
الأستاذ حكى القصة برضو قريب من الحكاها ود ضيف الله في الطبقات انو الناس في جيهة دنقلا الغدار شعروا انو البحر دافي... الشيخ عووضة القارح قال ليهم إنو الشيخ حسن ود بليل في أحوال دخل البحر في مورا* حكى لى المرحوم أحمد خدر /من اهالى حمور قصة زيارته للاستاذ في أواخر السبعينات قال الأستاذ سألو من الشيخ العجيمي فأستغرب قريبي أحمد خدر إنو هو فهمو إنو الفكرة الجمهورية ضد الطائفية وفي ذهنو ديل طائفية قال الأستاذ كلمو إنو نحنا ضد الطائفية لكن ما ضد التصوّف .. الصوفية هم الحفظو لينا ديننا --- بتصرّف مما يحكي الأستاذ الصحفي عبدالله الشيخ مورا قرية في شمال السودان تجاور قرية الركابية وبها مزار الشيخ حسن ود بليل جد الأستاذ محمود (من فرع مالك) أشتهر في الركابية الشيخ صالح فضل بتلاوته للقرآن وتدريسه له وقد ذكرت في خيط "سبانا" أن الأستاذ تحدّث عن طلاوة صوته فقال لما شيخ صالح فضل يتلو القرآن البهايم البتصقع الجرة بتخلي صقع الجرة
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
كان الطعام فى السجن حلالا كما قرر الاستاذ ، ولذلك كانت العبادة سهلة وميسرة ، وكانت الرؤى طيبة ، وكثيرة ، وأذكر اننى رأيت موكبا للنبى عليه الصلاة والسلام ، يمر داخل السجن وفى القسم الذى نحن فيه ، مارا من الغرب الى الشرق ، فقذف لى ببرتقالة ، فأخذتها ، وقلت : لكن أنا ما باكل برتقال ! فالتفت قائلا اهكذا ‘ فانتبهت لغفلتي والتهمت البرتقالة بقشرها .. ورايته مرة اخري هو ، وهو يتوضأ ، وتحدث معى ، وكانت صورته صورة الآخ حمد النيل العركى ، حتى صلعة العركى وشعره الخفيف وكانت صورته واضحة ومشرقة . احتفل العركى بالرؤيا ايما احتفال ، وكان نصيبى منه هدية لطيفة ومروحنة روحنة الأخ العركى ، تجمعنى بالأخ العركى علاقة حميمة وقد رأيت فى رؤيا بأننا قد قدمنا سويا من العراق ، تحفنا حالة من الإخاء مدهشة ، ولا بأس من الاستطراد لأقول بأنه وفى رؤيا أخرى رأيت نفسى والعركى معتقلين فى أحد الأقسام ، والاستاذ معتقل فى قسم مجاور وبيننا وبين معتقله ممر كبير كان باب الاستاذ يفتح عليه كما يفتح بابنا عليه ايضا ، فخرجنا من بابنا لزيارة الاستاذ ووقفنا فى الممر حتى يفتح باب الاستاذ ، ولكن العسكرى لم يفتحه ، وأعادنا الى القسم واغلق الباب علينا ، فإذا بنا نسمع باب الاستاذ يفتح وشعرنا بالاستاذ وقد خرج الى الممر ، ولكن بابنا كان مغلقا ، فعاد الاستاذ الى قسمه ، فقام العسكرى بفتح بابنا فخرجنا ، فلم نجد الاستاذ لأن بابه كان مغلقا ، وهكذ استمرت الحكاية ، نخرج فلا نجده ويخرج فلا يجدنا ، حتى حانت فرصة فخرجنا ، ولحظتها وجدنا باب الاستاذ مفتوحا ورأيناه جالسا بالدخل فهرعنا اليه ولكن العسكرى منعنا من الدخول ، فاحتج الاستاذ طالبا السماح لنا بالدخول فقال العسكرى للاستاذ يا استاذ ممنوع الدخول .. يا استاذ سلِم ( من التسليم بالأمر ) فقال له الاستاذ : أنا فى أولادى ما بسلم ! --- من ذكريات الأستاذ أحمد محمد أحمد البشير عن "أيام الله" في كوبر وذكرهم بأيام الله
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
ده موضوع شيخ خوجلي يا لطفي ... المسألة ... الحدث كان في مؤتمر كوستي الممتد لمدني ورفاعة والحصاحيصا....
أبوي كان عندو معارضة شديدة بدت تخف ... مرّ علينا في رفاعة فأنا دعيتو يجي يلاقي الأستاذ فقال ح يمشي الجزيرة ويجي بعد يومين فقلت ليهو بعد يومين بنكون في الحصاحيصا فقال بجي وفعلا جا وحضر الجلسة الكانت في بيت الأخ أحمد سليمان*
أنا كان في بالي يلاقي شيخ خوجلي هناك، وأبوي عندو عقيدة في شيخ خوجلي، فقلت شيخ خوجلي لمعرفتو بالفكرة ممكن يكسر معارضة ابوي للفكرة ويدلو عليها ..
شيخ خوجلي أول ما شاف أبوي قال ليهو: أبشر!! ابشر!! ....
لما لاقيت أبوي قال لي والله الليلة شيخ خوجلي قال جنس كلاما في أستاذكم ده!! شيتاً أفرزوا وشيتاً ما أفرزوا!! قلت ليهو قال شنو؟ قال قال ليهو الناس بعملوا الجوامع وبعملوا كدة وكدة ...لكن ده (ويقصد الأستاذ) طريقتو برا "براهو" .. دة بحر الدميرة .... دة لا إله إلا الله كلها نازلة فيهو!! دة ودأبنآدم الأصيل (ابن آدم) ... قال ليهو دة لم يلد ولم يولد ...
بعد داك أبوي بات في بيت الأخوان في الحصاحيصا وفي الصباح لما لاقيتو قال لي والله يا ولدي فعلا زي ما قالوا عيسى يجي يفتي في القرآن بخلاف!!
بتصرف مما حكى في شريط مسجل الباشمهندس فتح الرحمن عبدالقادر بابكر
فتح من قرية كريعات ودرس الهندسة بجامعة الخرطوم (كان أول الشهادة السودانية حينها) ثم أبتعث لبريطانيا وعمل بجامعة السودان ثم عربسات في تونس ويشغل الآن منصبا رفيعا في وكالة الفضاء الكندية ... فتح متزوج من الأستاذة هنادي كندورة
•أحمد سليمان دفع السيد المحامي – أصلا من دويم ود حاج وكان محاميا بالحصاحيصا وترافع عن الأستاذ محمود في عدد من القضايا ... أحمد سليمان متزوج من الأستاذة نعمات المبارك محمد الحسن ولهما محمود وفاطمة حفظهم الله جميعا ونفعنا بجاههم العريض
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
اول مرة ازور الاستاذ كان مع مصطفى اخوي، وكنا ماشين بيت المال لأهلنا.. في الطريق قلت لى مصطفى: نفسي اشوف الاستاذ.. فاتحمس مصطفى وقال لي: نمشى طوالي الثورة.. فقلت ليهو: توبي ملون، بخجل.. قال لي: ولايهمك، انت ما التزمتى.. فمشينا ووجدنا الاستاذ فى الصالون.. بعد سلم على سألني: دخلت ياتو كلية؟ قلت: علوم.. قال لي: (ابوكم من المحسنين.. احسن ليكم.. ترككم متعلمين.. الامريكان بقولو، خير ورثة تتركها لى اولادك، ان تتركهم متعلمين.) === مما تتذكر الأستاذة فاطمة محمد صالح محمد خير فاطمة أصلا من الحجير مركز مروي ونشأت ودرست بكوستي ثم كلية العلوم جامعة الخرطوم شقيقها الباشمهندس مصطفى ممن قدموا باكرا على سوح الأستاذ ثم تبعته جل العائلة بإحسان فاطمة زوج الأستاذ محمد مجذوب فضيل ولهما ميسر، د. محمود ورابعة حفظهم الله يسكنون الخرطوم شرق الآن Education is the best inheritance that a parent can give to his/her children
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
كنا جلوسا مع الاستاذ في حجرته وقت الضحى. تطرق المجلس للوهابية , فسأله احدهم : يا استاذ الوهابية ديل بنتهو؟ فأجابه الاستاذ : مؤكد بنتهو. " ثم علت وجه الاستاذ إبتسامة. فواصل قائلا : اما الأخوان المسلمين, فهم الدجال البكتلوهو الجمهوريين. " —- مما يتذكر د. المبارك الصديق السعيد
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
كنا بنحرّص شديد نمرق مع الأستاذ لما يكون مقدّم زول برة البيت ... في المشوار دة الأستاذ بيكون يقول ليك في كلام دّقااااق كدة ممتع بشكل!! --- بتصرّف مما حكى بروفسير عبدالله النعيم كنا في زيارة له أبريل 2018 وهو ضيف في الشارقة مع زميل دراسته المستشار حسن مصطفى وأصر على تقديمنا في حر لاهب .. --- أتذّكر زائر أجنبي زار الأستاذ محمود وسأله بعض الأسئلة وقام عبدالله النعيم بالترجمة ... بعد إنتهاء الزيارة همّ الأستاذ بالخروج لتوديع الزائر وأصر الزائر على استبقاء الأستاذ فقال له الأستاذ لا بد من توديعكم ... قالها بالإنجليزية وكنت مستغربا من استخدام الـ gerund وكان seeing you off
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
عندما أطلق سراح الأستاذ الجمهوريين عام ١٩٨٤، وكان قبله بأيام قد تم إطلاق سراح الصادق المهدى، وتم نشر خبر إطلاق سراحه فى الجرايد، ولم يتم إعلان إطلاق سراح الحمهوريين، اخذنا الأستاذ، فى مفاجأة، و فى مجموعة محدودة، لاقامة حلقة ذكر فى وسط الخرطوم، قرب المحطة الاسطى، ووقف الأستاذ فى منتصف الحلقة، واستمر الذكر داويا، قرابة الساعة، وعندما رجعنا قال الأستاذ بهذا اعلنا إطلاق سراحنا بانفسنا. --- بتصرّف مما يحكي الباشمهندس أبوبكر بشير الخليفة طه
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
اذكر في يوم نادانى ابوي الاستاذ وقال لي تعال اركب معانا نحن ماشين مقابر البكري وفعلا ركبت بجانب الاستاذ في المقعد الخلفي وكان يقود السياره العم فضل بجانبه عم حسن الحجاز ووصلنا مقابر البكري وحضرنا صلاة الجنازه ودفن والد الاخ ابراهيم مكى ولاحظت الاستاذ في ثالث الصفوف لصلاة الجنازة --- مما يتذّكر الأخ صديق علي صديق
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
من أخوانا الإنتقلوا بدري بتذّكر الأخ محمد صالح عطا الله* ... إنتقل إفتكر في الخليج وبتذّكر الأستاذ ومجموعة من الأخوان مشوا استقبلوا الجثمان في مطار الخرطوم برضو بتذكر أخونا أحمد عبدالعزيز وهو من أهل شيخ سليمان حمد (ناس مورا) ودّفن في كوستي --- بتصرّف مما يتذكر الأستاذ أحمد محمد الحسن عمر --- محمد صالح عطا الله أصلا من منطقة القرير ونشأ بكوستي دّفن بالقرير مركز مروي
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
في 26 ابريل 2007 كتب الباشمهندس عمر يوسف تم تشيع جثمان العم العزيز عبد الله الفكي صباح اليوم فى تمام الساعة التاسعة صباحا الى مقابر ودمدنى وقد شارك فى تشيعه عدد غفير من الاخوان الجمهوريين و الاهل و اهل ودمدنى لقد عمل الاخ عبد الله الفكى فى عدة اماكن بالسودان و لكنه احب ودمدنى و استقر بها حتى مثواه الاخير كان للفقيد عدة مواهب منها انه كان لاعب كرة قدم شهير و يعشق و يحب اغانى الحقيبة و هو صديق لمعظم فنانيها الكبار امثال الفنان سرور و قد روى لى مرة انه كان يقود دراجته من ودمدنى ال امدرمان ليزور الاستاد محمود و بقية الاخوان و يعود الى مدنى فى نفس الاسبوع ولايشعر باي تعب زايد
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
كنت في حياتي لاهياً ومفرطاً في جانب الله ، ولكن عندما تزوجت في العام 1977م في اليوم السابع من الشهر السابع ، اردت ان استقيم ، واسلك طريق الرشاد والصلاح ، وشمرت عن ساعد الجد وبدأت حياتي الجديدة، سالكا طريق الله الذى كنت اعتقده حينئذ من صيام وصلاة وتهجد ، وقيام ليل ونوافل واعمال البر والتقوى والاحسان وصلة القربى ونصرة للضعيف والمظلوم ، وكل مكارم الاخلاق التى كنت اعتقد جازماً بانها تؤدي للنجاة . وفي مرة من المرات كنت مهموماً ومغموماً، والدنيا مظلمة في وجهي، بسبب عدم اليقين ، وظللت لمدة كبيرة من الايام اتخبط يميناً ويساراً معتقدا بان الدين الصحيح مرة مع الاخوان المسلمين ، ومرة مع غيرهم من الإتجاهات ، ولكني طيلة الفترة لم انتمي لاي منهم حتى فتح الله علي بالمعرفة وهي :-
رايت الرسول الكريم صلى الله عليه وسلم ، في منامي ويامر بان اُنقذ قائلاً " انقذوه "، وفي المنام ارى اني قد ذبحت الخوف، وانتصرت عليه، في شكل طائر كريه الصورة ، ذبحته ذبحاً حتى صرخ صرخة داوية ، قمت على اثرها من النوم فرحاً خفيفاً غيرخائف ، ومسروراً سروراً عظيماً ، واحب ان اؤكد بانني رايت الرسول الكريم فى شخص الأستاذ محمود محمد طه ، وكنت في ذلك الزمان لا أعرفه، الا من خلال الراى العام ، وصورته في وسائل الاعلام المختلفة وتحديداً صورته التي في كتاب الجمهوريين الكيد السياسي والمحكمة المهزلة ، لابساً جلابية وعمامة بيضاء بيضاويتين، ومبتسم ابتسامة ، مشرقة ، وقد تبين لي ذلك كله في سنوات لاحقة عندما بدأت اطلع على الافكار الجمهورية ، وكانت هذه الرؤيا في يوم 15 / 10 / 1977م . --- نقلا عن كراسة الراحل المقيم محمد عامر بابكر الراحل محمد عامر من أبناء الدويم وعمل بمحالج الحصاحيصا انتقل الي الرفيق الأعلى صباح الجمعة 4 يناير 2005م
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
ألأحد 3 يونيو 2018 (18 رمضان 1439 هـ) أنتقل للرحاب العلية العم الأستاذ ابراهيم عبدالهادي أبوعيدة بقرية الهجيليج (مرتع صبا الأستاذ) كتب عنه الأستاذ عوض الهادي النور آدم (بتصرّف) كان نسيج وحدّه، متفردا بصمامة فكر وحنكة جعلت الكثيرون يلجأون اليه، وكان عوّج درب ... في مجتمع محافظ، منتصف ستينات القرن الماضي، كان يأخذ أبنته للإحتفالات العامة وللسينما في رفاعة، كان ذلك مدار استغرابنا ولكنه، مع ذلك، كان مدعاة لإعجابنا وفخرنا كان حكما لكرة القدم أشتهر ببراعته في ذلك بالمنطقة وغير ذلك كثير... لكل ذلك، ولغير ذلك، لم نستغرب عندما شببنا عن الطوق أن أدركنا أنه من تلاميذ الأستاذ محمود محمود طه .... علمنا فيما بعد أنه وعمي الأستاذ حسن بشير كانا يذهبان بالدواب من الهجيليج لرفاعة لحضور محاضرات الأستاذ والعودة في نفس الليلة... ---- في يوم الأحد 26/9/1982م، وقفة عرفة لحج عام 1402 هـ كتب الأستاذ محمود خطابا للأستاذ خالد الحاج عبدالمحمود وللعم الأستاذ ابراهيم عبدالهادي أبو عيدة:
إني أعتز وأفخر بإنتسابي إليكم، وأذكر، بكل الخير، نشأتي بينكم، وبين آبائكم، وأجدادكم، منذ طفولتي الباكرة، ولذلك، فما في الدنيا خير الا أبغيه لكم وأسعى في توصيله اليكم..
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
قال مشى مع الأستاذ زيارة المستشفى ... لما الغفير فتح ليهم الباب قال ليهو مقدّم محمد علي مالك* قال الأستاذ ظوالي قال ليهو ووووين الميم؟! (مقدم معاش)... --- بتصرّف مما يتذكر د. علي أحمد ابراهيم رحمة (شيخ علي) * محمد علي مالك من ديم لطفي برفاعة درس الآداب بجامعة الخرطوم وعمل معلما للغة الإنجليزية بود مدني الثانوية ثم التحق بجهاز الأمن وعمل قنصلا للسودان بالقاهرة يقيم الآن مع زوجه الأستاذة سامية صديق محمد علي والأبناء محمود، علي وعزة بأيوا سيتي ولاية أيوا - أمريكا
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
أهلنا في الهجيليج دي أشتهروا بالكرم... بعضهم بيوتو أبواب ما فيها!! عمنا شيخ عباس ود السوطري وأشتهر بلقب (خربانه) كان أسطورة في ذلك وتحكي عنه الحكاوى .. أتذكر إنو إنتقل في منتصف السبعينات وأرسل الأستاذ وفدا كبيرا من أم درمان للتعزية فيه --- بتصرّف مما يتذكر الأستاذ العوض الهادي النور آدم عوض من الهجليج درس بجامعة القاهرة الفرع وعمل بكنانة حتى التقاعد
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
علاقتى بالشيخ الطيب قديمة،وهى علاقة لها مايبررها، حيث كانت والدتى تقول لى: شلخناك على سلم الشيخ الطيب.رغم ان سلمى ناقص خط فاصبح H لكن اصبح له دلالة روحية .اذكر انى منذ المرحلة الوسطى كنا نستكشف الخرطوم وامدرمان وبحرى.ففى زيارة لامدرمان وانا فى ثالثة وسطى لعلّه سنة 1966م بينما انا فى زقاق العدنى فى سوق امدرمان وجدت بصا مكتوب عليه الشيخ الطيب،فلم اتردد ،فركبت البص،وزرت الشيخ الطيب ،ورجعت مباشرة، بعد الزيارة .وفى عودتى نزلت ايضا فى السروراب فزرت زميل دراسة لى فى مدرسة ابو عشر الوسطى.... زرت مع الاستاذ والاخوان الشيخ الطيب اكثر من مرة !!!اشهرها اثناء ماتم الوالد والاخ ذا النون جبارة.وقد زرنا مع الاستاذ غار الشيخ الطيب الذى كان يتعبد فيه اعلى الجبل. من الروايات التى سمعتها من الاخ عبد اللطيف. انه فى زيارة له، مع الاستاذ ، للشيح الطيب ، زاروا خليفتة، فاكرموهم بفطور عبارة عن وليمة، فقال الخليفة للاستاذ : الفطور دا كناّ مجهزنه للرئيس عبود لكنه لم ينزل!!! فقال له الاستاذ: نحن اولى به من عبود!!! --- بتصرّف مما يتذكر د. علي أحمد ابراهيم رحمة - (شيخ علي)
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
نعم الفنان ابراهيم عوض كان فلتة في زمانه الشباب كان يقلدو شقة شعره الخ الخ اكتر من واحد من الأخوان قال لي انو لما اتزوج جا دعا الاستاذ لحضور زواجه
—- بتصرف مما يحكي الباشمهندس علي الزبير احمد شميم علي اصلا من متطقة الرباطاب ونشأ بعطبرة درس بمصر وأقام فترة ببريطانيا متزوج من الاستاذة نفيسة علي لطفي
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
حبوبتي زينب بت حِجة (زينب بت بشيرة) الكلمتك عنها، زي ما قتللك قعدتلها فترة مع الأستاذ وواضح انو اتستفت تب .. يبقالي بقى يتمارالا هي صاحي هي نايمي ... الأستاذ!! الأستاذ!! الأستاذ!! محبة عجيبة... كبرت كان حبوبة (نقوللها يمة) ... بقت مرة مرة تنسى كمان ولسانها بقى ينطق الكاف تاء .... يوم تنفيذ الحكم على الأستاذ خفنا عليها قلنا مافي زول يحدثها علا في زولا كٌتر كدي فت دخل علينا كلمها ... وجهها "أمتقع" وشعرنا طوالي بالحاصل!! واحدين مننا قالوا يا ما فهمت الحاصل شنو .. سألوها: يمة!! قال شنو؟! قالتلهم (القالو!! لساني ما بلوتو)* --- بتصرّف مما يحكي د. عبدالرحمن أحمد حجة الوالدة زينب بت حجة هي والدة الأخ الجمهوري عبدالعزيز بادي وجدة عضو هذا البورد هيثم غالي -- * بلوتو أي يلوكو (لا تحب أن تردده لأنها لم تستسيغه)
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
عن أختنا فتحية المبارك..قالت أثناء زيارتها وجلوسها مع الأستاذ في حجيرته المباركة ..كان يحرك في مؤشر الراديو ..ووجد الفنان إبراهيم عوض يغني في أغنية (يا غائب عن عيني مع أنك في قلبي)وترك الأغنية شغالة وكان ينظر لجميع الموجودين في الغرفة..وبعدها كان يردد في هذا البيت الذي يقول (يا غائب عن عيني مع أنك في قلبي ) وقال: دي هسة ما ياها الذات الإلهية —- مما حكت نجدة المبارك محمد الحسن عن شقيقتها فتحية المبارك
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
أستاذ سعيد حكى لي قال زرنا شيخ فلان كدي (ذكره ونسيته) .. قال كان يحب الأستاذ والأستاذ يحبو ويوصينا بزيارتو... بعد ما أكرمنا جاب لينا البروش والأباريق وقال أها ديل البروش والأباريق إن درتو تقوموا صلوا الليل تقوموا علا أنحنا ترا مانا عارفين الخير في السكون ولا في الحركة .. ---- بتصرّف مما يحكي د. مصطفى الجيلي عمر مصطفى
| |
|
|
|
|
|
|
Re: الأستاذ محمود محمد طه: لـ: د. محمد عثمان ال� (Re: عبدالله عثمان)
|
في واحدة من محاضرات الأستاذ المسجلة والتي كنت استمع لها ، ذكر الاستاذ المثل التالي: " الراكب ما بجيب خبر اللقروب" —- مما كتب د. صلاح أحمد محمد البدوي صلاح نشأ بالحصاحيص ودرس الطب بجامعة الخرطوم وألمانيا عمل بالسودان وسلطنة عمان والأمارات متزوج من الأستاذه رباب عبدالله التوم محمد حمزة ولهما محمود وسارة ومثاني ومحمد وآن حفظهم الله
| |
|
|
|
|
|
|
|