القبائل المتواجدة في شرق السودان بني عامر ، هدندوة ، حباب ، شكرية ، جميلاب ، رشايدة ، هوسة ، لحويين ، جعليين ، شوايقة .. ليهم وجود في إرتريا وناضلو فيها نضال حقيقي ضد العدو .. الفرق بين القبائل دي في قبائل تملك أرض في إرتريا وفي السودان وفي قبائل موجودة بالعشرة في إرتريا ، كمان في قبائل تملك أرض في شرق السودان وعايشة بالعشرة في إرتريا .. البني عامر والحباب في السودان عندهم ارتباط قوي بي إرتريا و الارتباط ده ناتج عن الحس بالمسؤولية اتجاه شعبهم في إرتريا وده الخلاهم يدافعوا عن شعبهم في إرتريا ويأسسوا ثورة كفاح مسلح عشان يطردو الإحتلال الأثيوبي الكان كل العالم واقف معاه .. وكانت كسلا المدينة السودانية معقل الثوار الإرتريين ، الهدندوة في إرتريا موجودين وعندهم ارض ممتدة بين السودان وارتريا زيهم زي البني عامر والحباب لكن الهدندوة الموجودين في إرتريا ماعندهم ارتباط وجداني بالسودان ، والهدندوة الموجودين في السودان ماعندهم أي ارتباط وجداني بهدندوة إرتريا ، الهدندوة في إرتريا شاركوا في الثورة الارترية كأفراد ؟ الجميلاب وتحديدا اسرة الشيخ علي بيتاي شاركوا في الثورة الارترية ومناطقهم في إرتريا كانت ساحة حرب وعندهم ارتباط وجداني بي إرتريا واعتقد الحاجة دي مربوطة بالدماء السفكت في إرتريا ، الرشايدة شاركو في الثورة الارترية كأفراد ومنهم مبارك مبروك سليم الكان عضو في الجبهة الشعبية بتع أسياس أفورقي ، الرشايدة الموجوديين في إرتريا عندهم ارتباط مع الرشايدة الموجودين في السودان ، لكن الرشايدة الموجودين في السودان ماعندهم ارتباط وجداني بي إرتريا إلا ارتباط التجارة ، نفس الشئ الشكرية واللحويين والهوسا .
السؤال هل الارتباط الوجداني بي إرتريا للبني عامر والحباب والجميلاب في السودان ينتقص من انتمائهم للسودان ؟ الجواب المنطقي لا ؟ والديل البني عامر والحباب الموجودين في السودان ، حاربوا إرتريا لما حاولت تحتل كسلا وقرورة ، والسودان كلو كان شاهد كيف استبسلو في الدفاع عن السودان ؟ ولما الجيش السوداني انسحب وخلا كسلا للحركة الشعبية المدعومة من دولة إرتريا طلعوهم منا البني عامر والحباب بمشاركة أبناء كسلا من القبائل الأخرى ؟
طيب ليه البني عامر والحباب تحديدا هم البيتم التشكيك في هويتهم دون الآخرين ؟ هل لأنهم عندهم ارتباط وجداني بي إرتريا ؟ الجواب لا ! لأنو الجميلاب برضو عندهم ارتباط وجداني بي إرتريا والشيخ سليمان بيتاي قال الكلام ده بصوت عالي في ميدان الجمهورية في كسلا مع ذلك مافي حد شكك في هويته أو هوية الجميلاب ؟
طيب هل لأنو البني عامر والحباب في منهم لاجئيين إرتريين في السودان عشان كده يتم التشكيك في هويتهم ؟ الجواب لا طبعا ؟ لأنو الهدندوة والهوسا في منهم لاجئيين إرتريين في السودان ؟ طيب ليه مايتم التشكيك فيهم !
طيب ليه البني عامر والحباب يتم استهدافهم دون الآخرين في شرق السودان ؟
عشان هم خطر حقيقي على أسياس أفورقي اللي هو امتداد للإحتلال الأثيوبي الخلاهم سابقا يفجرو ثورة كفاح مسلح عشان ينقذو شعبهم في إرتريا ؟
يعني أسياس أفورقي هو المؤجج كل الصراعات الحاصلة في شرق السودان ؟ أيوة هو المؤجج كل الصراعات دي خوفا من البني عامر والحباب ، وهو الداعم لكل الأطراف السياسية المتناحرة في الشرق والمحركهم بالرموت كنترول بمافيها السلطات السودانية في شرق السودان ؟
هل الدولة السودانية على علم بالكلام ده بالطبع هي على علم بالكلام ده ؟ طيب موقفها شنو ؟ موقفها التواطء مع عصابة أسمرا ضد البني عامر والحباب ؟ طيب ليه ؟ لأنو الدولة السودانية للأسف الشديد تعتقد انو البني عامر والحباب في إرتريا لو سيطرو على إرتريا حايكونو خطر على مشروعهم السلطوي ؟
الحل شنو طيب ؟ الحل من وجهة نظر أسياس انو البني عامر والحباب يرضو بالأمر الواقع في إرتريا ويختوه في حالو ويعيشو في السودان وينسو إرتريا سياسيا ؟ والحل من وجهة نظر السلطة السودانية ، انو البني عامر والحباب ينسو إرتريا وماينافسوهم في السلطة السودانية والثروة الاقتصادية ؟
والحل المفروض يكون شنو ؟
الحل انو الناس تقعد مع بعض وتحل مشاكلها بكل ألم أو تبقى أدوات صراع وتنتظر الطوفان الذي سيدمر السودان ، هذه القبائل التي حاربت هيلي سلاسي ومعه امريكا والعالم كله ، ثم منقستو والروس والكوبيين واليابنيين لو اشتعلت نيرانها لن تستطيع الدولة السودانية الهشة أن تطفء نيرانها والنار ستحرق الجميع ولن يكون أسياس المتوهم بمنأى عنها .
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
جعفر وسكة
فيس بوك
تويتر
انستقرام
يوتيوب
بنتيريست