|
|
 Re: يا ود المقدم: تعال نسوق إلبل ونخلي الإغترا (Re: أحمد التجاني ماهل)
|
تحياتي أخي الحبيب دكتور ودماهل وسلاام مطبوق
هذا مبحث جمالي علي عجالة
غنا المزاباه و الدلالات الصوتية
يكتبها عبيد الطيب(ودالمقدم)
مِن فن البوادي الشعبي أو شعرها الشّعبي، يُعجبني
غُنا (المزاباه)،له تضاريس خاصة وبَطر رزين
قال شاعركباشي "مزابيا"رباعته الذين قعدوا بالمدامروكذا السفيه:
المُخباط يجوّد والبَواطـي دفاين
الصَّرْماني تاكُـل والبـّدِينـي تِعاين
قول لي القمبَر العِمِّي وعملها زباين
يومنا النّرْدَا! فوق راسك بنرمي محاين
*وردت(المبجان يكورك والبواطي دفاين)
ومع(المُخباط يجوّد) ندخل ونعرّج علي الدلالات الصوتية،بشقّيها
(الحِسّي والمعنوي)، وهي في رأي الشخصي في غنا البوادي أوفننا الشعبي،أعمق في مدلولها الجمالي والبيئي والتضاريسي والإبداعي
من الصور الجمالية،إذهبوا لِنْدل إجراس الرحيل وهدجي الرعود ورزمي النوق ولود الزُّمبارة،وطنّة البلاس والقوقاي والدوباي والواواي والدّوّاي والداداي....الخ.
(والمخباط يجوّد) هنا صوت جمالي له تضاريس ، تختلف عن جماليات صوت المُخباط في قول عبدالسيد هنا:
(إنقيبك لفح كبروسو والمُخباط
نَهَر زامُلو في القوز الملان خرَّاط)
والمخباط عند الخبيرالمفخرة ودقدَال،هنا صوت جمالي ولكن تضاريسه تختلف جدا:
(عكّينا وعدلنا وعيّط المخباط
طبقنا الدرمسة وسَرْوَتها قُمنا نشاطْ
الدّرب إنشحط وإترخرَخ الربّاط
ؤهِن بتراهمِنْ بينا وخبيرهن عاط
*وردت ايضا (طبقناالمرحلةوسروتها أيضا)
ومادام للشعر صور جمالية، ايضا لفننا الشعبي
(دلالات صوتية)،(حِسيّة ومعنوية)والدلالات الصوتية مرتبطة إرتباطا وثيقا
ب الدلالات الشعورية أوالحِس الشعوري،فرحا أو حزنا أوتفاؤلا أو تشاؤم...الخ(المناسبة بين اللفظ والمعني)
عندما يقول فضل ودزايد، مادحا الدليل أُمحُمَد علي ودحمد ودالنور الدويحي:
(حِسْ تقليّة المو خِميلي في الحاروك
واردة اللّيلي سِهريج ناس حسين مدروك)
ففي (حِس تقليّة ) دلالة صوتية، تختلف عن الدلالة الصوتية في (تقلية) هنا:
(كسّارة الحدود ما تغفري يا سكلابة
دربك بي المحوس شارع اب حمد لي أم بابة
حِس تقليتك الساري الرَّبط دهرابة
وسماح كيرك عريسا زوجو الهوّابة)
وعندما تقول شاعرة غنا الجراري:
(النّعَّاع أبورزيز
برّاقو سوط هزيز )
ففي الربع الأول صوت جمالي وفي الربع الثاني صورة جمالية، وكلّها من تضاريس بيئة الشاعر،وعندما يقول العبقري العاقب:
(وِنْوين العِشا ورزمي الفداير النَعّن (الفرايد)
فهنا رغم لوك الحسرة يوجد صوت جمالي
وكذا شيخنا أحمد ودأبسن:
(الليلة الصعيد إترازمنلُو رعودو)،فهنا صوت جمالي وبه فرح
وعندما يقول رانفي العجيب:
(مرة يسيها لودة ومرة دَق نقّارة) هنا صوت جمالي بتفرد
وعندما يقول عمنا شيخ جامع في مطولته،والتي سنوردها،في أول مداخلة للبوست لأنها من غنا المزاباه وهو موضوع البوست:
(إن جيت من بعيد شَرطْ تسمع الحَاسُوس
ود خير جَمَلُو بتخنَّق تقول مَجَروس
يا راغِي البِعَاتِل لي رفيقو بِكُوس
ويا رَزَمي الحَرَسْهَا إنْقيبها بي الكَبَروس)(هنا دلالات صوتية)
وكما يقول عمدتنا وشيخنا الفرجوني:
(إن شعر البادية شعر غيور لا يرضي بأنصاف الحلول،فإن أنت عرفت كل البادية أنفسح أمامك كلّه وإن أنت جهلت بعض البادية إنغلق أمامك كلّه)
فمثلا هنا في هذا المربوع لايتذوق الدلالات الصوتية،إلا من عاش أوحفر عميقا في غنا البوادي:
(يا اللّخوان هبرنا أم صَيّي
تركنا الدّيمة وقّادة جمرهن حيّي
طلعن في السناف سمعن مسنبيبب في اللّيي
جنُّو مسندات روسهن عككّز ديّي)
*وردت "سنيب في اللّيي"
وموضوع (الدلالات الصوتية) ذكرني أخ عزيز في قروب قبل سنتين عندما أوردت مرابيع عن غنا الجمال منها:
طلقت من درت نامن كِمِل سقَّاطك
ابيت الرَّتْعِى والسَّرَّاح مِحِنْ فى جواطَك
نسَّمْ بي الهياج قلَّقْتْ ؤرَقْ شنَّاطَك
مشيت مِنْصَغِر تبدى وتِفِت فى غِشاطك
"دي تشبه ودالسراج ولا أعرف يقينا" صديقي دكتور شطيطة بقطع شكها
كونيبك كِبر وإتعتَّي
قفاك حنَّنتُو بي الدَّايوق يبس وإنفتَّي
عينك تابعي طرف ألبِل مكان ما شتَّي
ماسِك غفرة الكركون تحُوم ما رُقتي
"ودمضعن الهواري"
الأخ علّق قائلا:(لكن الناس ديل ماذكروا سرعة جمالهم)
فقلت له :ياأخي ماكل جمل للركوب!؟ولاكل جمل للشيوم! إنظر للمعزة والبطروالمتعة، الناس ديل عاجباهن جمال إبلهم،ومبطراهن،
وعندما يقول ودمضعن الهوّاري:
(عينَك تابعة طرف ألبل مَحل ماشتّي
ماسِك غفرة الكركون تِحوم مارقتك)
هنا تضاريس معزّة لايعرفها إلا شاعر مثل ودمضعن،لأنه دليل وسرح بالإبل من هو إنقيب،يختلف عن الشعراء (الغنّوا)
علي الإبل غنا كبار كبار، أي أبدعوا ولكن غناهم يفتقد للعاطفة، ودي موضوع آخر .
وعندما يقول الشاعر:
(بطانك ساج حقابك قَرن في بوَّك
يا سلق السِّموع اللّي المجالقات عوّك)
هنا دلالة صوتية في الرّبع الأخير مدهشة جدا والقرينة(عوّك)،لاحظوا مابين الضمور في (البطان الساج والحقاب القارن) وجوع السلّق
وهو ينادي لسموعه(عوّك) ثم مابين مانستشفه من شيوم الشاعر و"مصاقرته للخلاء، ومجالقة السّلق وبحثه عن الطرائد.
*عندما يقول بدوي:(جمل ألبِل) هنا يقصد الجمل الفحل،وأحيانا من فصاحتهم يقولون:(الجمل) ويقصدون الجمل الفحل ،كما يقول ودبعيبيش:
(أيَّامك ديل تِغادِر في الجمل زي حاقْرو
بنهاك منُّو تَبْرُك ب صعيد واتْناقْرو
سَقَديبْ المعضِّيهو الحِجِل في دَاقْرُو
جاب من دومك الحبر المبالغين فاقرو
وكذا بخيت:
(أيَّامَك ديلا إتّا مع الجمل في حرابا
بنهاك من المعاقِيل تلحق العتَّابا
هجوم في الليل بعد هجع البِحوم ب كلابا
تراهو الصبَّح القيح مِن قماقمو كدابا)
ومن الدلالة الصوتية المعنوية أي المقابل الخارجي لها، قول ودالسميتاوي:
(البنُّوت جفينا كلامْهِن
سَمِح مُرحالنا..عدلَنُّو الكُرت بي زِيامهِن(هنا الدلالة )
يوم الشَّلَّقَن قامَن عديل لي رغامْهِن
سوَّن جضَّة السَّار العريس قِدَّامهِن)
فننا الشعبي أوغنانا الشعبي به ثراء تواصلي عميق مابين الإنسان والحيوان والبيئة بتضاريسها إن مِحول أوخريف،
ولكن الإعلام أفسدها جدا،بل البعض من الشعراء والمغنيين شوّهوها بإضافات،أفقدتها كل (الدلالات الشعورية)
من معزة وعاطفة وبطر رزين ،ودلالات صوتية وهذه "عضم" غنا البوادي،والشاعر المبدّد "بنفزر" هنا وبنفرز في البناء الصوتي.... ماعلينا!!
لأننا نوقن تماما سيخلد الغنا الغنا.
المربوع أعلاه (الفوووق دااااك)
لشاعر كباشي
حفظته عام 1987 من عمنا سعدودالدّومة عليه الرحمة
ومعه:
(محجان الشّدر جقلة أم رقبتَن عنجي
صابون الفقُر يا القُرَّح المنسندي)
وهذا المربوع نسبه للدّومة الآخر،الشهير (بالدومة الأعَور) وكان زول ركّاب ،وأظن (ضربه عود وهو بقطَّر/بقلّب )
أيضا من أم سنطة (أرض الشعراء) علي قول حنفي
وادي مجرور قطعناها وعديل غرّبنا
والكمر المهندس قاشو بي إتكربنا
ضرب أم سيبي أبدا مابِقولو غلبنا
لي الحارة أم صقورا جاجَن إتّالبنا
وهذا المربوع ايضا كان ينم به إدريس ودتاتيبة عليه رحمة الله
وإدريس ود تاتيبة، كان عندما يروي هذا المربوع ومعه أُخريات،يهُز حِجباته بطرا،ويهوم مع تجليّات الزمن الجميل
،ويردّد (كتلت عِيال مجرور) وكثيرا مايردّد قول الشاعرة الكباشية،وهي تحرض أهلها لكسر غارب المفتش الإنجليزي مور:
عَسَاكر مور يا أم فرعة
بقولك شربة وجرعة
الحنَّت مابية القرعة
فوق مُدَّاغتك ترعي
عمنا شيخ جامع والباباي وودالسميتاوي والنورالدّويحي،وموسي ودمحمدودعبدالله وآخرون كثر
لهم في غنا المزاباة تجليّات
ومن (جوالس) عمنا جامع في غنا المزاباه:
أسّاعة وين بَزْرَاية النّورَاب
ناس سالم حِلْيهُن ناس علي الهَاقْنَاب
هسَّاع حَزَّموه الشّول أبو دَعَكَاب؟
ؤ بي قيزان بليل وإتْنَايُو بي أبو جعاب(قوز)
والله إتياسَرو فوق شَقْ جِراب
دَوْ ناس أُم سَرير والإنْدَرِاب
ألطف ياكريم ياربي يا وهّاب
بعد ها الزّحف يجينا السَّاري ابو جَبْجَاب
يقوم الصّيليان ويبقي الخِشين دَبَّاب
ؤنرجع تاني نمشي جِزونا أبو هبَّاب
نشِد السَّرج علي تيس الخَلا الخبَّاب
ويبقي غذانا لبن الحوّي مُو ويكَاب
نخُط التاية جاي أبو قرين ؤجا كوكاب
ؤنبقي رَبَاعة لي مِرحَات أبو حَرَّاب
وأُم بَاعِجْ يلمُّوا أسيادها شيب ؤشباب
ناس بَنقاَل ؤسيد اُم دَامع أبْ بَشْناب
نقعد فوق ضرا التّاية ؤنشك الطَّاب
نشوف آتو البِقُود ؤيسقي الحِمار الغَاب
*الحِمار دي البِطول من بَطيل مِبطّل أي الزول الإبلو مِبطلات ..
ضعاف وهزال ،ودي تضاريس لحالها.....
عبد الوهاب ودالسميتاوي من غنا المزاباه:
أصلو ام باعج الفوت هولها
اعدلو مشيها بي المحلاية ماترتولها
نزلناها في القشه العَكف جادولها
نشارك عَق/كصه في الدار التِّربِّي عجولها
شِرْبن خور دقج قامن عُقَد لا يسارة
سيدْهِن شدَّا تيس حرْدَة الجرايدو كبارة
الجكنيبي التَّعْمس القوز زِملها إتبارا
مابترتع قريب مُضرابها دار بقارة
أنحنا دليلنا مابتطّارق
لفح أبويايا فوق شوشة الخبيبو مزارق
ركّب دورو لي الفجّ السِّحاب وإتدّارق
وعيطتو بتعدل الفكّا المداهيج فارق
دليلنا مو الحَرَس البنات لي الوَرْدِي
لفح أم بُهيا فوق ضهر أب سبيبتَن قَرْدِي
هسّاعة رماها جادول !؟عند زِريدْة البردي(أساعة!)
ولاَّ تكاها مِن كنتوش وعاني التردِي
الباباي الحوارابي الكباشي:
اللّيلي الصّعيد جاب الهَرع موّاع
نزل فوق عاجة سرّب قشّها النفّاع
خريف الغرب ورِبْعة بَلَّة ودشلاّع
فرقت تاني مِنّي ومنّك آ أم لبّاع
يامُحمّد بقيتا اللّيلي ماكاتمام
قّعَدْ تتحبَّا فوق شِق البيوت رمرام !؟
جاليقة العلي جعابها المطرّق زام
مابجفاها من وِلْدوني ليهل عصَام
قول لي مَحمّد ألبِل بهدلن ب شايبو
لفح الكور علي شوشة البصّرج نايبو
بنات اللدرع الشمارتو واصْلِي حقايبو(فاصلي)
مايغشّنَّك! الريدهن نتاج موجايبو
ياجادالله بي الفنقات رقادك سيبو
سوق ألبل محاجين المِستِّي وضيبو
كفل الفي البهايم تيرهولو حليبو
أبَت حاروقة..دارو ونحنا بنلاهيبو!
يازينب مشيكُن فايدة ماجبتوها
خبركن جانا..داركن ب القروش بعتوها
زمنّا الفيها بنربّي الرهيفة عُلُوها
عَرِبك ديل بِحُوسو الزّردة مابنطُّوها
*تيرهولو... الراوي لم يتأكد هل قال:(تيرهولو) أم(تبربولو)
ومن جوالس عمنا موسي ودأُمحُمد ودعبدالله:
يا طير إنْ مشيت بـَديك جّوابْ مكتوبْ
سلـِّم لى بَلـل ومُحمِّد الشبشـوب
الهداييهن رقد من همهُن مغلوبْ
قوم أركب تعال شوف مـرعى ناسْ حـِيدوب
فى القـّش البِحـبـِنو النفوسْ مرغوب
دَشـَرهُن عـَزَّلوهْ ومَسَكْ العـَضاوهْ بلوب
والتيس العليه ( أم زانوقْ) تِعـَلِّى الروب
أصبح عيل يِحشــِّرْ ومنهن مضروب
اصبُر يوم نِجيبهن ليكِ زى الطوبْ
وقلبكْ كان يجيك من أُم جوروه تتوب
ومن مطولات عمنا شيخ جامع تـعجبني مطولة، أوردها الأخ حنفي في مقال قديم :
بقّــاقاً طلع بى الدَّو ابو كتّــار
دى على ود حمد سايق الحنينها كبار
واصبح بى البييّح والصنقّــر فار
بلا الرَّوسى المخشّب ما معاهو وزّار
وديك أم سبعة ها الشقّــت عديل تندار
والدِّكتور براها وقـدّت المُسدار
على تقنور بشوف لجّــاج حَمار وشَقار
دى كرموش مع بت ناقة ود بّـــرار
وود عبدالله فوق (ابوروبه تلّا النار
وبى الدَّبسة ام نخرتَن زرقة أصبح جار
ويامولاى تربِّيلْها الرِّقاق وصغار
محمد موسى يبقالهن دليل وحَدار
وياستّار على ناس كِينقو ياستّار
الولد البِقيم الليل بشيلو سهار
سلف بت أم جرس يادوب لِقالو خَطار
مادام نــوّى بى دُوانه وعِـــنى الدرّار
وعلى ناقة دويح يالسانى جيب مُشكار
وحت ساقنو بارود القبيل صوقار؟
إت ناس سعد الرِّبيع تب أنقو من الدار؟
وبعيد بلدأم خريس حت ماها فى الدوّار؟
شرق الحمرة جنب القبّــة قعدو جوار
يوم الجمعة تلقاهن مع الزّوَار
بِسدْرُو مصبّحين فوق دكّــة ام شوقار
وخاف صادّين على ناس جبره وام نوّار؟
إتُّو لى الناقة أم وتيد مالقيتو لى أخبار؟
نعــل ما اتيامنت بى القاشطه فوق مرمار!
وين باقى النِّعوم وينهن بنى جـرّار؟
ووينهن ناس قِديل أهل العمودها يسار؟
قعدن عيل يحوسَن من دِيار لى ديّار؟
ومَرْعاهن فَضَالى المِعزه والحَمّار؟
وينو أمحمد شوين وينهنّ ناس حقّــار!؟
مسدارهن قريب ما بقدّن المشوار
وفى الدِّكة إن صنطت بتسمع القرقار
يا حنّان ويا حِس كيرهن الهدّار
وأم إتنين تجَقْلِب فاقده ابو شنّأر
وين دار ام بخيت ووينهن اهل كدوار؟
مادين ام عرض وإتوجهو المدمار
ترا الوَحَشى البِفَرطِق قِدّة الكوتار
غبرتوهو بى الشـنّان أبو خرخار!
وياالمامونه ها غناكى الطَّلَعِلى بــزار
لا جيماّ متــكّل ولا بِزِر كُسّــار
خبار ألبل بجن لى الدَّامرى فى الافطار
لاجاهن غزو ولا جوهن الثوّار
ولا كتلن رمم حام فوقهن الصقّــار
حليل زمن المسقّى ولى الفقر كبّار
وحليل زمن البكسرولو الرّباعى هِجار
حليل زمن أب سبيب وياحليل زمان عصّــار
*أنظروا للدلالات الصوتية هنا:
(وفى الدِّكة إن صنطت بتسمع القرقار
يا حنّان ويا حِس كيرهن الهدّار
وأم إتنين تجَقْلِب فاقده ابو شنّار)
بالربعين الأولين دلالات صوتية عجيبة بها سخرية في معزة لأنهم رباعته،ولكنهم لم يسلموا من لسانه،لأنهم قصّروا المسدار،و(حاسُوا) في تخوم الفرقان
وفي الربع الثالث:(أم إتنين تجقلب فاقدة أبو شنّار)
أيضا سخرية بمعزة،وهنا دلالات الصوت ،(تجقلب فاقدة أبوشنار) عن العشب القش،وتحديدا العشب الذي ينبت في مسادير الغرب العفو
وهنا حدّد قش (البِغيل) "أبوشنّار"،وقوله"تجقلب" نفهم من دلالة الصوت كأن الناقة معنوفة عنف من (سدور الغرب) ولأن الشاعر حصيف جدا
وإسلوبه متناغم،المطولة متماسكة في وحدة موضوعها،وهذا مايميز غنا المطولات والجالسة،حتي تخلصه كان موفقا.
الدلالات الصوتية في غنا البوادي هي ،طنيبة بيت جغرافية غنا البوادي،لذا في رأي الشخصي من أراد أن يتعرف علي الشاعر الحق
والشاعر الدّخيل علي بيئة وتضاريس ،(ماعندوبيها علاقة) حكّم ذائقتك جيدا، في الدلالات الصوتية للبيئة بتضاريسها(حيوان وإنسان )
في غنا الشاعر،وكذا الدلالات الشعورية ،فسوف تعرف .
وختاما أهديكم هذا المربوع العجيب لعقال طافر الغنا شيخنا الفرجوني يلخص كل ماكتبناه ومربوع عمدتنا الفرجوني مهداه للمبدع الأستاذ أحمديس:
(إنجمَع السِّحاب مِن جاي ؤجاي واتْساوَقْ
ؤدَنْدَن ؤدَلَّج الشّق الشّهق واتَّاوَقْ
التَّعَّال نَزَل هَضْلَل سبَل واتْرَاوَقْ
نامِت نابِت القَش شَب عليهو وتَاوَقْ)
معزتي لك ولضيوفك
|
|
 
|
|
|
|
|
| العنوان |
الكاتب |
Date |
| يا ود المقدم: تعال نسوق إلبل ونخلي الإغتراب (تيراب السيكراني) | أحمد التجاني ماهل | 10-16-19, 06:31 AM |
| Re: يا ود المقدم: تعال نسوق إلبل ونخلي الإغترا | أحمد التجاني ماهل | 10-20-19, 04:20 AM |
| Re: يا ود المقدم: تعال نسوق إلبل ونخلي الإغترا | محمد عبد الله الحسين | 10-20-19, 05:15 AM |
| Re: يا ود المقدم: تعال نسوق إلبل ونخلي الإغترا | أحمد التجاني ماهل | 11-05-19, 04:44 AM |
| Re: يا ود المقدم: تعال نسوق إلبل ونخلي الإغترا | Kabar | 11-05-19, 05:12 AM |
| Re: يا ود المقدم: تعال نسوق إلبل ونخلي الإغترا | أحمد التجاني ماهل | 11-05-19, 06:04 AM |
| Re: يا ود المقدم: تعال نسوق إلبل ونخلي الإغترا | عبيد الطيب | 11-05-19, 06:30 AM |
| Re: يا ود المقدم: تعال نسوق إلبل ونخلي الإغترا | عبيد الطيب | 11-05-19, 09:44 AM |
| Re: يا ود المقدم: تعال نسوق إلبل ونخلي الإغترا | علي عبدالوهاب عثمان | 11-05-19, 10:02 AM |
| Re: يا ود المقدم: تعال نسوق إلبل ونخلي الإغترا | أحمد التجاني ماهل | 11-06-19, 04:59 AM |
| Re: يا ود المقدم: تعال نسوق إلبل ونخلي الإغترا | أحمد التجاني ماهل | 11-06-19, 04:52 AM |
| Re: يا ود المقدم: تعال نسوق إلبل ونخلي الإغترا | عمر السلمة | 11-05-19, 11:35 AM |
| Re: يا ود المقدم: تعال نسوق إلبل ونخلي الإغترا | أحمد التجاني ماهل | 11-06-19, 05:15 AM |
| Re: يا ود المقدم: تعال نسوق إلبل ونخلي الإغترا | عبيد الطيب | 11-06-19, 05:42 AM |
| Re: يا ود المقدم: تعال نسوق إلبل ونخلي الإغترا | علي عبدالوهاب عثمان | 11-06-19, 07:18 AM |
| Re: يا ود المقدم: تعال نسوق إلبل ونخلي الإغترا | أحمد التجاني ماهل | 11-06-19, 07:32 AM |
| Re: يا ود المقدم: تعال نسوق إلبل ونخلي الإغترا | عبيد الطيب | 11-06-19, 08:23 AM |
| Re: يا ود المقدم: تعال نسوق إلبل ونخلي الإغترا | أحمد التجاني ماهل | 11-10-19, 05:00 AM |
| Re: يا ود المقدم: تعال نسوق إلبل ونخلي الإغترا | عبيد الطيب | 11-10-19, 11:12 AM |
| Re: يا ود المقدم: تعال نسوق إلبل ونخلي الإغترا | Shinteer | 11-16-19, 11:42 PM |
| Re: يا ود المقدم: تعال نسوق إلبل ونخلي الإغترا | عبيد الطيب | 11-17-19, 04:54 AM |
| Re: يا ود المقدم: تعال نسوق إلبل ونخلي الإغترا | أحمد التجاني ماهل | 11-18-19, 07:04 AM |
| Re: يا ود المقدم: تعال نسوق إلبل ونخلي الإغترا | Shinteer | 11-18-19, 10:25 PM |
| Re: يا ود المقدم: تعال نسوق إلبل ونخلي الإغترا | عبيد الطيب | 11-19-19, 05:00 AM |
| Re: يا ود المقدم: تعال نسوق إلبل ونخلي الإغترا | بدرالدين بابكر مصطفى | 11-19-19, 06:36 AM |
| Re: يا ود المقدم: تعال نسوق إلبل ونخلي الإغترا | بدرالدين بابكر مصطفى | 11-19-19, 07:02 AM |
| Re: يا ود المقدم: تعال نسوق إلبل ونخلي الإغترا | عبيد الطيب | 11-19-19, 07:50 AM |
| Re: يا ود المقدم: تعال نسوق إلبل ونخلي الإغترا | بدرالدين بابكر مصطفى | 11-19-19, 09:17 AM |
| Re: يا ود المقدم: تعال نسوق إلبل ونخلي الإغترا | Shinteer | 11-20-19, 10:23 PM |
| Re: يا ود المقدم: تعال نسوق إلبل ونخلي الإغترا | بدرالدين بابكر مصطفى | 11-21-19, 11:35 AM |
| Re: يا ود المقدم: تعال نسوق إلبل ونخلي الإغترا | بدرالدين بابكر مصطفى | 11-21-19, 11:47 AM |
| Re: يا ود المقدم: تعال نسوق إلبل ونخلي الإغترا | Dia | 11-22-19, 09:21 AM |
| Re: يا ود المقدم: تعال نسوق إلبل ونخلي الإغترا | Dia | 11-22-19, 03:54 PM |
| Re: يا ود المقدم: تعال نسوق إلبل ونخلي الإغترا | أحمد التجاني ماهل | 11-24-19, 06:02 AM |
| Re: يا ود المقدم: تعال نسوق إلبل ونخلي الإغترا | أحمد التجاني ماهل | 11-24-19, 05:51 AM |
| Re: يا ود المقدم: تعال نسوق إلبل ونخلي الإغترا | بدرالدين بابكر مصطفى | 11-24-19, 07:15 AM |
| Re: يا ود المقدم: تعال نسوق إلبل ونخلي الإغترا | Shinteer | 11-25-19, 10:27 PM |
| Re: يا ود المقدم: تعال نسوق إلبل ونخلي الإغترا | عبيد الطيب | 11-26-19, 04:21 AM |
| Re: يا ود المقدم: تعال نسوق إلبل ونخلي الإغترا | Yousuf Taha | 11-26-19, 09:56 AM |
| Re: يا ود المقدم: تعال نسوق إلبل ونخلي الإغترا | Shinteer | 11-27-19, 11:21 PM |
| Re: يا ود المقدم: تعال نسوق إلبل ونخلي الإغترا | أحمد التجاني ماهل | 11-28-19, 04:53 AM |
| Re: يا ود المقدم: تعال نسوق إلبل ونخلي الإغترا | Shinteer | 12-02-19, 10:50 PM |
| Re: يا ود المقدم: تعال نسوق إلبل ونخلي الإغترا | عبيد الطيب | 12-03-19, 06:41 AM |
| Re: يا ود المقدم: تعال نسوق إلبل ونخلي الإغترا | Shinteer | 12-28-19, 08:38 PM |
|
تعليقات قراء سودانيزاونلاين دوت كم على هذا الموضوع:
at FaceBook
| |
عبيد الطيب
فيس بوك
تويتر
انستقرام
يوتيوب
بنتيريست