|
Re: مليار ونصف مليار دولار من السعودية والام� (Re: أبو الحسين)
|
حبيبنا أبوالحسين .. تحياتي نعم همنا في الناس الكادحين .. سياسة ، خضوع ، باع ، اشترى ... إلخ ليست ذات أهمية عندي السنة الجديدة القمح السعر التأشير 2500 جنية للشوال الواحد مجزي جداً .. ومغري خاصة عندنا في الشمالية بس أهم الحاجات هذه الدولارات تذهب في مصحلة الغلابي مؤتمرات ، سفر ، ورش تقديم أوراق ... إلخ ( لا لا لا ) المهم : جازولين ، سماد ، تقاوي .. الفول والقمح والشتاء ما شاء الله باقي 20 يوم يدخل شهر ( كيهك ) شهر البرد والزراعة
شكراً أبوحسين حبيبنا دعواتك لهؤلاء الكادحين في ارجاء الوطن هم الحل ولا غيرهم تحياتي دمت الحبيب
| |
|
|
|
|
|
|
Re: مليار ونصف مليار دولار من السعودية والام� (Re: علي عبدالوهاب عثمان)
|
سلامات عمنا واستاذنا علي عبدالوهاب عثمان ( مليار ونصف مليار دولار من السعودية والامارات (وزير المالية قبل قليل) ............................................
ودي تبقي شنو يا ربي؟ هدية؟ سلفية؟ وديعة؟ والسؤال الاهم السعودية والامارات دافعين القروش دي مقابل شنو؟ اسئلة لوزير المالية وان شاءالله نلقي اجابات شفافة وصريحة منو. تحياتي ودمت بخير استاذنا
| |
|
|
|
|
|
|
Re: مليار ونصف مليار دولار من السعودية والام� (Re: محمد نور عودو)
|
والسؤال الاهم السعودية والامارات دافعين القروش دي مقابل شنو؟ اسئلة لوزير المالية وان شاءالله نلقي اجابات شفافة وصريحة منو. تحياتي ودمت بخير استاذنا ======================== حبيبنا محمد .. تحياتي يا جميل ودمت أنت بخير .. تعرف يا الحبيب محمد .. شخصياً أنا ما يهمني أبداً المهم الفلوس تدخل البلد بعد داك حمدوك وبرهان يشوف الشغلة دي حبيبنا الجميل .. المهم يصل الغلابا .. مع أننا ناس ضواحي الدنيا .. لكن أحياناً الامثال العربية نستخدمها برضو عمي احمد يوم كامل رفض يمشي الساقية وأضرب عن العمل وجلس في البيت معاه زبير الدكاي قال للناس (( يا جماعة هوي عز يوم ولا بهدلة سنة ))
نحن كمان عايزين تمويل زراعي .. بعد داك نشوف الفيلم شنو
حبيبنا محمد .. أنا عشان فرحان شديد .. بقيت خطير في الكتابة بالعامية .. بس ما تفتش المؤنث والمذكر ..
شكراً الحبيب محمد .. رزق من الله .. ما علينا بالباقي ..
| |
|
|
|
|
|
|
Re: مليار ونصف مليار دولار من السعودية والام� (Re: محمد نور عودو)
|
Quote: قال وزير المالي السوداني إن بلاده تلقت نصف الدعم البالغ ثلاثة مليارات دولار الذي تعهدت به السعودية والإمارات في أبريل، ومن المتوقع سداد الباقي بنهاية العام المقبل.
واتفقت الدولتان الخليجيتان على تقديم حزمة المساعدة للسودان بعد وقت قصير من الإطاحة بالرئيس السابق عمر البشير، مما يمثل طوق نجاة في موعده بالنسبة لقيادة السودان الجديدة. وقال وزير المالية السوداني إبراهيم البدوي في وقت متأخر أمس الاثنين، إن السعودية والإمارات أودعتا 500 مليون دولار في البنك المركزي السوداني، بينما جرى تسلم ما قيمته مليار دولار من المنتجات البترولية والقمح ومدخلات الإنتاج الزراعي. يأتي ذلك، بعد جولة خليجية شملت السعودية والإمارات قام بها رئيس الوزراء السوداني عبد الله حمدوك ورئيس المجلس السيادي، عبد الفتاح البرهان، على رأس وفد، الأسبوع الماضي، حيث حض الوفد الدولتين الخليجيتين على الاستثمار في السودان. |
المصدر: "رويترز"
سؤالين مهمات 1. ماهو المقابل الذي سيدفعه السودان مقابل هذا الدعم؟ 2. ماهي المصادر والخطط الأخرى لسد العجز المتبقي؟
| |
|
|
|
|
|
|
Re: مليار ونصف مليار دولار من السعودية والام� (Re: Hafiz Bashir)
|
سؤالين مهمات 1. ماهو المقابل الذي سيدفعه السودان مقابل هذا الدعم؟ 2. ماهي المصادر والخطط الأخرى لسد العجز المتبقي؟ ============ مولانا وحبيبنا حافظ .. تحياتي .. أنا أعرف سياسة محاور .. كل واحد يفتش على حليف محور الحبيب مولانا أمريكا بجلالة قدرها تبيع القوة والجيش ..
الحبيب حافظ تحياتي يا جميل .. المهم انفراج الوضع ولو قليلاً في الداخل تخيل طن الطماطم يساوي ثمن 4 طن حديد وطن البصل يساوي 2 طن حديد
كده بس نزرع الشتوي وبعدين نشوف باقي الحاجات
مودتي الحبيب مولانا .. المهم كان الصرف يكون واضح ونعرف محل كل دولار
| |
|
|
|
|
|
|
Re: مليار ونصف مليار دولار من السعودية والام� (Re: علي عبدالوهاب عثمان)
|
اخونا استاذ علي سلامات دي قروش شوية جدا جدا جدا . يا علي يا اخوي غربة السودانيين في السعودية والخدمات القدموها السودانيين للسعودية عبر التاريخ ما عندها حدود . السودان اكتر بلد ساهم في نهضة السعودية والامارات والكويت . السودان هو المعمر الاكبر وهو اصل و فصل قيام البلدان دي .
| |
|
|
|
|
|
|
Re: مليار ونصف مليار دولار من السعودية والام� (Re: Hafiz Bashir)
|
ماهو المقابل الذي سيدفعه السودان مقابل هذا الدعم؟ ماهي المصادر والخطط الأخرى لسد العجز المتبقي؟
==================
الحبيب مولانا .. تحياتي .. الاجابة على سؤالك طبعاً عايزة ناس مختصصين في الاقتصاد نحن علينا نصرف ونبسط بعدين لو في خطأ يحاكموا برهان وحمدوك
معليش الحبيب مولانا اليوم مبسوط وبعدين تدريب على الكتابة بالعامية
| |
|
|
|
|
|
|
Re: مليار ونصف مليار دولار من السعودية والام� (Re: محمد جبره)
|
حبيبنا محمد جيرة .. مودتي .. الحبيب محمد .. سمعت في برنامج اقتصادي في قناة الشروق تقريباً أن على الحبيب حمدوك ( لا بد ان يرفع الدعم عن السلع حتى ينال قرض ) وقال الخبير ان هذا الموضوع صعب .. الخيار الاخر هو ( البحث عن منح مالية ) الظاهر الرجل مجبور على الحكاية .. ما في حل .. ورثة الكيزان الله يخرب يومهم ..
الحصل حصل .. بس كيفية الصرف والأولويات ؟؟
شكراً حبيبنا محمد على المداخلة .. مودتي ..
| |
|
|
|
|
|
|
Re: مليار ونصف مليار دولار من السعودية والام� (Re: محمد جبره)
|
دي قروش شوية جدا جدا جدا . يا علي يا اخوي غربة السودانيين في السعودية والخدمات القدموها السودانيين للسعودية عبر التاريخ ما عندها حدود . السودان اكتر بلد ساهم في نهضة السعودية والامارات والكويت . السودان هو المعمر الاكبر وهو اصل و فصل قيام البلدان دي . ==================== حبيبنا عثمان .. بالنوبية ( اسمان ) تحياتي انت عارف السوداني في الخليج حتى رواتبه قليلة مقارنة بالجنسيات العربية الاخرى ومن نفس المؤهل وحتى المتفوق .. في اللاشعور الخليجي أن السوداني قنوع وطيب ( مليون خط تحت طيب ) .. مهندس طبيب مستشار ... إلخ تجد الجنسيات الأخرى ضعف أو مرة نصف ( راتب السوداني ) نفس الوظيفة المسألة هكذا نمطية ..
واحد من الجماعة طلب من الأمير سيارة .. سأله الأمير عن النوع والموديل .. الكلام ده في عام 1990م ( أخونا قال للأمير .. كرسيدا موديل 80 بس يكون موديل السنة ) مفتكر ( السيارة اسمها موديل 80 ) نفس الشخص في إجازة للزواج منحه الأمير (40 الف ريال ) بعد الزواج في السودان رجع مبلغ ( 16 ألف ريال ) استغرب الامير .. قال ( ده باقي قروشك ) انا صرفت 24 الف ريال
حبيبنا عثمان تحياتي يا جميل .. خليتنا نحكي قصص .. مودتي بوستات جميلة وأتابعها دائماً ..
| |
|
|
|
|
|
|
Re: مليار ونصف مليار دولار من السعودية والام� (Re: Gafar Bashir)
|
ده سؤال ده كمان لو سالت اي زول حايم في الشارع بجاوبوا ليك
=================
حبيبنا جعفر .. مودتي .. نعم الحكاية معروفة .. ولكن المهم الفلوس تدخل البلد بس خايف وزير المالية قال ( توظيف مائة الف شاب لمراقبة السلع ) ؟؟ المبلغ يكون تمويل للزراعة .. وخاصة القمح ..
عندكم مثل جميل بالعربي ( المحتاج غناي ) .. هل هذا صحيح ؟
شكرا الحبيب جعفر .. مداخلاتك توضح أنك شايل هموم الوطن ..
| |
|
|
|
|
|
|
Re: مليار ونصف مليار دولار من السعودية والام� (Re: علي عبدالوهاب عثمان)
|
علي عبدالوهاب عثمان وشركاه حتى لو الدعم الاسعافي وصل الى ترليون ونص دولار سيظل هناك عجز في ميزان المدفوعات. لان الخراب الذي تركه الكيزان او بالاخرى الابالسة ..تركو البلد وهي خاوية على عروشها ولم يقلبوا كفوفهم لانهم لم ينفقوا فيها ولم ولن يتحسروا عليها الا لعنة الله عليهم. نسال الله ان يغنى بلادنا من فضله وان يبعد عن السودان والسودانيين غلبة الدين وقهر الدول
| |
|
|
|
|
|
|
Re: مليار ونصف مليار دولار من السعودية والام� (Re: Ahmed Yassin)
|
حتى لو الدعم الاسعافي وصل الى ترليون ونص دولار سيظل هناك عجز في ميزان المدفوعات. لان الخراب الذي تركه الكيزان او بالاخرى الابالسة ..تركو البلد وهي خاوية على عروشها ولم يقلبوا كفوفهم لانهم لم ينفقوا فيها ولم ولن يتحسروا عليها الا لعنة الله عليهم. نسال الله ان يغنى بلادنا من فضله وان يبعد عن السودان والسودانيين غلبة الدين وقهر الدول ===================== أحمد امبس .. تحياتي حبيبنا .. أنا في الدنيا دي .. أكثر حاجة ما أفهم فيها الفلوس .. أحمد أمبس .. المهم أنا فرحت عشان موسم القمح .. أهلنا محتاجين جازولين وسماد وتقاوي الجماعة سعروا القمح بــ 2500 جنية للشوال .. بس كنت في اتصال في البلد المشكلة الجازولين والسماد وتعرف الموسم شتوي عندنا مهم جداً وإلا المزارع يكون كامل السنة بدون دخل ..
ورثة الكيزان سوف تثقل كاهل الشعب لسنوات طويلة .. الله ينتقم منهم ..
شكراً الحبيب الزول الجميل احمد أمبس ..
| |
|
|
|
|
|
|
Re: مليار ونصف مليار دولار من السعودية والام� (Re: علي عبدالوهاب عثمان)
|
سلامات يا حبيبنا الإمارات صرحت قبل اسبوع تقريبا انها دعمت الحكومة السودانية بمبلغ ٣ مليار دولار لاستكمال التغيير الجماعة سألوا الضولارات مشت وين مافي زول قال بغم.. اسه انا خايف تصريح الإمارات الحديد يكون بأثر رجعي وتبقى علينا البقت على البشير زمان... قالوا البشير سمع في الجريدة تصريح لمحافظ بنك السودان بأنه السعودية حخصصت ٢ مليار دولار لدعم السودان عمك لفح جلابيتو وعلى أقرب طائرة وصل الجماعة وقال لهم القروش وينها؟ وزير المالية الهناك طوالي طلع لايف وقال ليهو صحيح محافظك ده جاب الخبر من تقرير الوزارة بتاعتنا لكن نحن قلنا القروش خصصناها ليكم زمان وانتو بلعتوها وانتهيتوا.. ده مجرد تقرير لما حدس.. المهم عمك تماها عمرة ووليمة ورجع بكم ريال كمصاريف سفر.. نرجع الوديعة، الجماعة ديل زمان أعلنوا ان الكاش منها ٥٠٠ مليون وتم ايداعها بالفعل على دفعتين، اسه يكونوا فكروا في استردادها.. الباقي قالوا شنو؟ قالوا مواد غذائية ومواد بترولية صحي والله.
Quote: في أول مبادرة عربية عقب سقوط نظام الإنقاذ السابق قدمت دولتا السعودية والإمارات مساعدات مشتركة للسودان بما قيمته 3 مليارات دولار. تتضمن حزمة العون المشترك 500 مليون وديعة للبنك المركزي لتقوية الاحتياطي النقدي وإنعاش الجنيه السوداني، على أن يتم صرف باقي المبلغ لتلبية الاحتياجات الملحة للشعب السوداني في نواحي الغذاء والدواء والمشتقات النفطية
التفاصيل هنا: https://www.alnilin.com/13045329.htm[/QUOTEhttps://www.alnilin.com/13045329.htm[/QUOTE] صحي الدولة العميقة غريقة.. وما مستبعد يكون المقصود بالتصريح تجار الدولار.
| |
|
|
|
|
|
|
Re: مليار ونصف مليار دولار من السعودية والام� (Re: عمر التاج)
|
نرجع الوديعة، الجماعة ديل زمان أعلنوا ان الكاش منها ٥٠٠ مليون وتم ايداعها بالفعل على دفعتين، اسه يكونوا فكروا في استردادها.. الباقي قالوا شنو؟ قالوا مواد غذائية ومواد بترولية صحي والله.
==================== الحبيب التاج .. تحياتي يا جميل .. لازم وزير المالية يشرح الأمور للناس وبوضوح كامل زمن التعتيم خلاص ودع .. لا بد من عقد مؤتمر صحفي وشرح الموضوع وأنا افتكرت أن هناك مليار ونصف كاش نزل الخزينة اليوم هكذا الخبر عبر قناة العربية (تصريح وزارة المالية ) يا فرحة ما تمت ..
التاج الحبيب .. الكبر والزهايمر .. فهمني كويس بالله .. تحياتي الحبيب التاج ..
| |
|
|
|
|
|
|
Re: مليار ونصف مليار دولار من السعودية والام� (Re: Gafar Bashir)
|
سلامات جعفر بشير
(ده سؤال ده كمان لو سالت اي زول حايم في الشارع بجاوبوا ليك) ........................................... يمكن كلامك صحيح لكن يااخي انا عايز الجواب من وزير المالية هيمسيلف من يدري يمكن يقول دي مكرمة سايت من الشيوخ والامراء هدية للوفد في ظروف او كلام قريب لكلام المخلوع عمر البشير. حبيت اسمع الاغنية من خشم السيد الوزير تحياتي
| |
|
|
|
|
|
|
Re: مليار ونصف مليار دولار من السعودية والام� (Re: محمد نور عودو)
|
Quote: س خايف وزير المالية قال ( توظيف مائة الف شاب لمراقبة السلع ) ؟؟ |
لو عمل كدا يكون بدأ لينا مشوار جديد وطريق جيد للفشل نريد خفض للترهل الوظيفي بدلا عن توسيع دائرة التوظيف في غير الانتاج الصرف مفروض يكون في دعم الانتاج والانتاجية وفي التدريب والبنية التحتية يوازي ذلك تقليل عدد الولايات والمحافظات وتقليل المناصب الإدارية والصرف الإداري ودعم الانتاج بفتح أبواب التصدير للإنتاج الزراعي عن طريق المزارعين مباشرة من المزرة أو البستان مباشرة وللبواخر وبمناسبة البواخر لابد عمل خطوط بحرية تجارية تنشط العمل التجاري ويتبع ذلك تدريب عمالة بمدعومة بمعينات وآلات للشحن والتفريغ للإستفادة من موانينا البحرية بأقصى درجة وهكذا.
| |
|
|
|
|
|
|
Re: مليار ونصف مليار دولار من السعودية والام� (Re: علي عبدالوهاب عثمان)
|
أي قائد أو ( حكومة ) إذا جاءت للحكم في مرحلة حرجة وصعبة يمكنه استنهاض الاحساس الوطني للشعب .. بإقتراح مشاريع كبيرة ن مشروع قومي ضخم لتحفيز الناس مثال : مليس زيناوي ( سد النهضة ) السيسي : ( توسعة قناة السويس ) مهاتير : والملايين من أشجار زيت النخيل
دائماً المشاريع القومية تحفز المواطنين ويجعلهم يتحملون الضيق النموذج السوداني الوحيد كان تخيل في بداية مايو يمكن جيلنا يذكر المشروع الوطني كان متواضع جداً .. نميري الله يرحمه بدأ بمشروع ( مليون طوبة ) تخيل فقط مليون طوبة لكل السودان هتافات وغناء أناشيد : بأيادي عمل حققنا أمل والرقم وصل مليون طوبة تخيل إذا كان الطوب نادي بزرع 2 مليون شجرة هشاب كانت النتيجة شيء لا يصدق .. حتى أمنياتنا في حدود أقل ( مليون طوبة ) الله يرحمك يا قريبي النميري
انا لو حمدوك كنت أعلن عن مشروع قومي .. لأن الشعب يتوحد ويتحمل الاعباء آخر مثال كان السيسي استطاع أن يحتوي على المعاناة والنقص بمشروع قناة السويس
التحية لكل الاحباب
| |
|
|
|
|
|
|
Re: مليار ونصف مليار دولار من السعودية والام� (Re: أبوبكر عباس)
|
قاعد يكيفني الزول المفلِّس وعندو عزّة نفس
================ الحبيب أبوبكر شرفت البوست .. الوضع يكون مختلف عندما تكون رئيس دولة أو مسئول من جمع هنا لراحة هذا الشعب وإطعام هؤلاء الجوعى ومعالجة المرضى تعطي الأولوية لمسار الحياة والبقاء في هذه الدينا .. وهنا يمكن أن يضحي الفرد من أجل المجموعة أحياناً الانسان يقبل باشياء صعبة من أجل أسرته ويتحمل الكثير .. فما بالك في رئيس الشعب في إنتظاره ( رغيف ، دواء ، كهرباء ، ماء ... إلخ ) وورث تركة ثقيلة من جراء هؤلاء المجرمين واللصوص .. فلا مفر إلا للتكيتك السياسي للحصول على شيء يحد من تلك المسغبة
الحبيب كمال عندما تشتد الرياح تنحني الاشجار .. والنخلة تلك الأم الرؤوم تستسلم للرياح لكي تحفظ أعشاش الطيور شكرا الحبيب كمال على المرور .. وأنت صاحب كتابات رائعة .. دائماً اتابعك ..
| |
|
|
|
|
|
|
Re: مليار ونصف مليار دولار من السعودية والام� (Re: Mahjob Abdalla)
|
تاكلو رغيف و بث ================ حبيبنا محجوب .. تحياتي .. الحبيب محجوب ثقافة الرغيف هي أساس المشكلة اليوم زمان عصيدة وكسرة وقراصة لم يكن استهلاك القمح في السودان بهذه الدرجة الآن اصبح ( رغيف وبس ) والرغيف من الدقيق الفاخر .. واصبح خطر جداً على الصحة العامة نسبة السمنة والسكري والامراض الاخرى ( حسب ما سمعت من اطباء في برنامح تلفزيوني ) في إحدى إجازاتي يومين ثلاثة في العاصمة ثم ضواحي الدنيا يحثت عن الخبز ( البر ) أو المخلوط لم أجد إلا مخبز سوريين في شارع ختم أختى استغربت جداً لنوعية هذا الخبر ..
الخبر الابيض مشكلة كبيرة .. حسب رأي ناس الطب
زمان في الشمالية نزرع القمح ولا نجد حتى زبائن للبيع .. تخيل يا محجوب مثلاً الهنود تحولوا إلى أكل الخبز بدل الأرز كم مليون طن من القمح ؟؟
تحياتي الحبيب محجوب .. شكراً يا جميل
| |
|
|
|
|
|
|
Re: مليار ونصف مليار دولار من السعودية والام� (Re: علي عبدالوهاب عثمان)
|
الهبيب علي عبدالوهاب شكرا ليك كثير. انت دائما بتجيب الكلام كما هو تمام التمام. يا اخي انا كل ما اتكلم عن ضرورة الرجوع الي الكسرة و العصيدة و القراصة, بتداخلو اخوة عزاز و يقولو الكسرة و العصيدة بقت اصعب من الرغيف و كذلك التعليل بأنو ده ساهل. المسكلة الاولي انو ده ما منتج محلي و كلو استيراد و المشكلة الاخرى كما قلت هو الدقيق الابيض (السم) و اهلنا يسمونه (فاخر). انا في قراءتي للوضع دائما بقارن بأخوتنا الاثيوبيين. تصدق يا اخ علي, عندنا في كندا الانجيرا متوفرة و بنلقاها في اى دكان عربي او اثيوبي و مصنوع من نفس دقيق بلدهم و احيانا بتلقي الابيض المصنوع من القمح و غير مرغوب حتي سعرو ارخص. عموما انا شايف انو بالامكان يستوردو مخابز الية لعمل الانجيرا مثل ما يفعله الاثيوبيين و علينا بالتركيز التنمية في المشاريع الزراعية التي يمكنها انتاج الذرة.
| |
|
|
|
|
|
|
Re: مليار ونصف مليار دولار من السعودية والام� (Re: Mahjob Abdalla)
|
حبيبنا الجميل محجوب .. تحياتي .. الاثيوبيين عندهم حب وانتماء لأصولهم متجذرة في اللاشعور يحبوا اشياءهم وخصوصياتهم .. لاحظ منتج الذرة عندنا أكثر من 6 مليون طن تقريبا والناس بالصفوف وبالاف في المخابز والرغيف أصبح في الثلاث وجبات ( دقيق فاخر ) الموضوع صحياً خطير جداً .. ليته كان مثل الرغيف المصري مخلوط ( بالردة) لدينا سلوك قاتل خذ مثلاً : العصير المجفف ( التانك ) الحليب البودرة (أي مكالمة من البلد أرسل لبن بدرة نيدو ) شاي العصر السكر .. في دراسة لخبير ( استخدام الفرد في السودان ما بين 35 -42 كجم في السنة أعلى معدل للسكر الابيض في العالم في الصين الاستهلاك للفرد ( أقل من 7 كيلو )
كل هذه المليارات التي تأتي من الخليج سوف تذهب إلى السكر والقمح والحليب المجفف . والتالي ترتفع نسبة الاصاية بالأمراض وبالتالي نصرف على الدواء
الحبيب محجوب .. سلوكنا معيشي يحتاج إلى تصحيح
| |
|
|
|
|
|
|
Re: مليار ونصف مليار دولار من السعودية والام� (Re: Mahjob Abdalla)
|
Quote: قاعد يكيفني الزول المفلِّس وعندو عزّة نفس |
هههههههههه يا مستنير القصة ما عزة نفس القصة برغماتية الخليجيين شطار في التجارة ودائماً بيدوك بأسعار عالية وما من الساهل تكسب منهم في أي صفقة تدخلها معاهم والتلاتة مليار دولار خلال سنتين ما حتغطي العجز في الميزان التجاري والعجز المتوقع لهذا العام حوالي 3.6 مليار دولار والمتوقع للعام القادم قد يصل إلى خمسة مليار دولار ما لم تتغير سياسة الدولة في الإستيراد والتصدير الدعم السعودي الأماراتي بيغطي حوالي 30% من العجز خلال السنة دي والسنة القادمة كله موجه تجاه سلع إستهلاكية الباقي 70% من العجز وحمدوك لسه ما طرح خطة إقتصادية واضحة.
| |
|
|
|
|
|
|
Re: مليار ونصف مليار دولار من السعودية والام� (Re: Hafiz Bashir)
|
ا مستنير القصة ما عزة نفس القصة برغماتية الخليجيين شطار في التجارة ودائماً بيدوك بأسعار عالية وما من الساهل تكسب منهم في أي صفقة تدخلها معاهم والتلاتة مليار دولار خلال سنتين ما حتغطي العجز في الميزان التجاري والعجز المتوقع لهذا العام حوالي 3.6 مليار دولار والمتوقع للعام القادم قد يصل إلى خمسة مليار دولار ما لم تتغير سياسة الدولة في الإستيراد والتصدير الدعم السعودي الأماراتي بيغطي حوالي 30% من العجز خلال السنة دي والسنة القادمة كله موجه تجاه سلع إستهلاكية الباقي 70% من العجز وحمدوك لسه ما طرح خطة إقتصادية واضحة. ========================== الحبيب مولانا حافظ .. تحياتي .. مداخلة رائعة نعم لا بد من البراغماتية من أجل هؤلاء الكادحين براغماتية وعند أحبابنا الشعية ( التقية ) .. مولانا أرقام تخوف .. لو كده نحن في مشكلة .. الله يعين حمدوك معلومات خطيرة جداً يا مولانا .. لا بد من مواجهة الشعب بهذه الحقائق مباشرة بدون أي تعتيم ( يخرب بيت الكيزان ) كثيرين لا يعلمون عن وضع الحالي للاقتصاد .. حتى المسئولين عبر التلفزيون نفس عبارات الكيزان ( سوف نعمل على .. قمنا بتكوين لجان .. عملنا ورش عمل ... إلخ) هذا الاسلوب لا يصلح لا بد من مواجهة الشعب بالحقائق وعلينا أن نتحمل أو النتيجة هكذا ........
شكراً كثير كثير مولانا .. شرفت البوست شكراً كثير الحبيب مولانا على المعلومات ..
| |
|
|
|
|
|
|
Re: مليار ونصف مليار دولار من السعودية والام� (Re: علي عبدالوهاب عثمان)
|
حبيبنا علي عبد الوهاب والمرور الكريم...
الوديعة أياً كان الهدف من ورائها...
السؤال: المواطن المسكين المنتظر عيشة كريمة في ظل الوضع الجديد بعد الثورة (وكل يوم الدنيا ماشي لي فوق) وحتى الدولار ليهُو يومين جاري فللي لي فوق... سؤالنا... حيستفيد شنو من الودائع الخليجية دي ومن الوعود الأُوروبية؟؟؟!!!
| |
|
|
|
|
|
|
Re: مليار ونصف مليار دولار من السعودية والام� (Re: أبو الحسين)
|
حبيبنا أبو الحسين .. تحياتي .. يا سلام يا جميل .. سؤالك وجيه وهمك على المواطن نعم الحبيب أبوالحسين لا بد من التوضيح شكراً الحبيب أبوالحسين .. همنا المواطن وبس أي تنظير لا ينفع .. والسؤال المهم هو سؤالك
تحياتي يا جميل .. يا رب تخفف على هؤلاء الكادحين
| |
|
|
|
|
|
|
Re: مليار ونصف مليار دولار من السعودية والام� (Re: علي عبدالوهاب عثمان)
|
Quote: نفس الشخص في إجازة للزواج منحه الأمير (40 الف ريال ) بعد الزواج في السودان رجع مبلغ ( 16 ألف ريال ) استغرب الامير .. قال ( ده باقي قروشك ) انا صرفت 24 الف ريال
|
والأمانة لا حدود لها أستاذى على عبدالوهاب من ناحيةٍ أخرى من يرمى طوق النجاة للغريق لإنتشاله من الغرق يُشكر بغض النظر عن مراميه .
| |
|
|
|
|
|
|
Re: مليار ونصف مليار دولار من السعودية والام� (Re: ABDALLAH ABDALLAH)
|
من يرمى طوق النجاة للغريق لإنتشاله من الغرق يُشكر بغض النظر عن مراميه .
=====================
حبيبنا الجميل عبدالله عبدالله .. شرفت البوست .. يا سلام عليك أذكر بوستاتك وكتاباتك كنت صخرة صلية أمام الكيزان ألف مليون مبروك على الفجر الجديد كلامك فوق كلام بليغ .. نعم الحبيب عبدالله .. أهم حاجة معاش هؤلاء الكادحين .. وسوف أكرر على الدوام توفير الجازولين ، والسماد ، والبذور للمزارعين .. شتوي مهم جداً القمح والفول كمان السعر للقمح قبل الانتاج 2500جنيه سيكون حافز للانتاج الوفير المهم توفير المبلغ بعض النظر عن مراميه .. ( كما ذكرت يا جميل )
تحياتي الحبيب عبدالله ..
| |
|
|
|
|
|
|
Re: مليار ونصف مليار دولار من السعودية والام� (Re: علي عبدالوهاب عثمان)
|
Quote: الجدول دا ما عندو معنى! القروش بتاعت الإمارات والسعودية دي منحة هدية ما عندها مقابل تجاري مباشر |
تعرف يا مستنير نحن زمان وفي بداية دروب الإستنارة لما كنا مستنيرين صغار زيك كدا دان دل همنا نزيد عدد اللمبات لكن إكتشفنا في مرحلة لاحقة أن الأهم هو المحافظة على اللمبات الموجودة ومحاولة زيادة قوتها. فشنو؟ يا مستنير عليك بالإجتهاد أكتر في محاولة المحافظة على اللمبات.
الجدول يا عزيزي يوضح العجز في الميزان التجاري والعجز هو الفجوة التي ستذهب المنحة السعودية الأماراتية لتغطيتها الجدول يوضح نوع الصادرات والواردات خلال العشرة سنوات الماضية مما يساعدك في التنبوء بمستقبل الموازنة الفكرة ببساطة يا عزيزي أننا محتاجين لزيادة في مدخولنا (صادرات + منح) من االعملة الصعبة بما يعادل العجز في ميزاننا التجاري او تخفيض واردتنا لنحافظ على الموازنة ونكافح التضخم. المنحة المقدمة من السعودية والإمارات ستغطي حوالي 30% من العجز وهي منحة بلا مقابل مباشر ولكن الدعومات الدولية عادة يكون لها مقابلات غير مباشرة مثل إتفاقيات تجارية او أمنية تصب في مصلحة الدولة المانحة.
عيب المنحة السعودية الأماراتية أنها عبارة عن سمكة والمثل بقول لا تعطني سمكة ولكن علمني الصيد بالتأكيد حكومة حمدوك يمكنها إستبدال السمكة ببعض المعينات للصيد وإذا لم تفعل فالرماد كال حماد.
| |
|
|
|
|
|
|
Re: مليار ونصف مليار دولار من السعودية والام� (Re: Hafiz Bashir)
|
الجدول يا عزيزي يوضح العجز في الميزان التجاري والعجز هو الفجوة التي ستذهب المنحة السعودية الأماراتية لتغطيتها الجدول يوضح نوع الصادرات والواردات خلال العشرة سنوات الماضية مما يساعدك في التنبوء بمستقبل الموازنة الفكرة ببساطة يا عزيزي أننا محتاجين لزيادة في مدخولنا (صادرات + منح) من االعملة الصعبة بما يعادل العجز في ميزاننا التجاري او تخفيض واردتنا لنحافظ على الموازنة ونكافح التضخم. المنحة المقدمة من السعودية والإمارات ستغطي حوالي 30% من العجز وهي منحة بلا مقابل مباشر
======================= مولانا الحبيب .. تحياتي .. مداخلة المستنير كانت مهمة .. لأنها مهدت لكل هذه المعلومات التي كنا نجهلها شكراًَ كثير على الشرح .. كده الواحد بدأ يفهم الموضوع بعمق .. الحبيب مولانا .. لماذا لا يتم شرح هذه الأمور في وسائل الاعلام وخاصة التلفزيون كي لا يعيش الشعب في توقع أكبر من الواقع .. ويكون مهيأ لتقبل أي صدمة ..
شكراًَ مولانا الحبيب .. نورت البوست بمداخلاتك المفيدة
| |
|
|
|
|
|
|
Re: مليار ونصف مليار دولار من السعودية والام� (Re: علي عبدالوهاب عثمان)
|
الصرف البذخي مازال مستمر قبول يومين وأنا أشاهد قناة الشمالية ( دنقلا ) موضوع عجيب : احتفال باليوم العالمي للسياحة ( تأمل كما قال ملاسي ) تأمل في دنقلا احتفال باليوم العالمي للسياحة وهناك هيئة سياحة ورئيسها وتجمع ضخم في قاعة عصائر ومياه غازية .. إلخ وقبله في تلفزيون الخرطوم الاحتفال بيوم المرور العربي المئات من شرطة المرور والسيارات (اهدار للوقت والبنزين ) أنا هنا في السعودية معقل العروبة ما سمعت بهذا اليوم العربي مشكلتنا كبيرة .. المسئولين من أعلى المستويات تجدهم فقط في مناسبات غير انتاجية : بعثة الحج والعمرة بداية العام الدراسي حفل تخريج ورشة عمل ..
| |
|
|
|
|
|
|
Re: مليار ونصف مليار دولار من السعودية والام� (Re: سامر دوشه)
|
الحبيب سامر .. إليو ووو أشري همي فقط في هؤلاء الغلابا والكادحين الكيزان تركوا لينا وضع مزري جداً أنا في تواصل مع البلد بشكل يومي الناس متحمسين لزراعة القمح بس المشكلة الرئيسية في الجازولين أتمنى صرف هذه المبالغ في إنجاح الموسم الشتوي ممكن 70% من مشكلة تتحل
تحياتي الحبيب سامر .. ووو أشري ..
| |
|
|
|
|
|
تعليقات قراء سودانيزاونلاين دوت كم على هذا الموضوع:
at FaceBook
|
| |