|
|
|
 Re: قال كفاءات قال اما انكم مستهبلين بي شكل!! (Re: Osman Mahmoud)
|
كغيري من بين ملايين السودانيين ومع اول حبة وعي ما كان عندي
شغل او مشغلة او حلم او هم وغم غير اسقاط نظام البشير.
العمل بكل طاقة، والتعرض لأسوأ انوع الضغط والحروب النفسية.
التعايش مع خوف دائم من بطش أمن النظام.
التعايش الدائم مع سخرية أقرب الناس ليك سواء في البيت او
الحي او في كل الملمات المعروف فيها رأيك المتكرر بتجريم
النظام وتجريم البشير وكل افراد حكومتو.
والحديث المتكرر والممل بتجريم رموز النظام في الحي بالإستدلال
بالبيت الفخم والسيارة ان لم تكن سيارات، وحتى الظلط العملوا
عملوا عشانو لأنو قبل يتم تعينو الشارع ما كان مسفلت، في الجلسة
وقبل ما تفتح خشمك تلقى النظرات المقيتة الساخرة وانو انت
صاحب الاسطوانة المشروخة والمتكررة.
الكيزان آخر استمتاع عندما يصفك احدهم بالزول البراي، حسي
كلمة البراي دي عندها مصطلحات تانية كتيرة منها الزعاط وغيرو.
تجد في الوعي السياسي العام: بأن البعض يؤمن بضرورة اسقاط
النظام، مع ايمانه التام ايضًا بأن هذا من سابع المستحيلات.
البعض لا يدري مدى السوء الذي يعيش فيه، ولا يساوره خيال
بأنه هنالك حال افضل من هذا الحال الذي يعيش فيه.
البعض انتهازي ولص وسيئ يريد استمرار الحال.
والأغلبية العظمى مخمومة بإسم الدين.
وهنالك قلة تحترق مثلك وتؤمن بأن لحظة التغيير آتية لا ريب
فيها، يعطونك الكثير من الأمل والقوة والدافع.
عادي وانت قاعد في البيت درس العصر او درس بعد المغرب في
الجامع يكون عنك وعن افكارك المضللة، في افضل الأحوال انت
شيوعي، وفي احوال اخرى انت عميل وكافر وملحد.
وعشان ما شايفين عندك أيي مظهر للثراء والنعمة وانت زول
كحيان وفقران ساي وعشان عارفين مهنتك ومصدر دخلك تمامًا
فإنت زول مسكين غشوك الكفار وبتحب الكفار والعلمانية اعداء
الإسلام والسودان.
في اللحظات دي لو مارق من البيت ساي ما تقدر تفهم احساس امك
شنو؟
يكون قاعدة تفكر وانك تستاهل الكلام دا لانك تغرد خارج السرب
ونشاز، ام خايفة صبرك ينتهي وتمشي تعمل مشكلة مع المهوسين ديل.
بس هي ما تحب زول يمشي مع القطيع، لو كررت ساي بالصدفة
كلام هي قالتو استعد للإحراج.
بس تكون خايفاني اتهور،،، يمكن. المهم تدعي الهدوء وتمرق
بدون اندفاع.
.
| |
 
|
|
|
|
|
|
|
|
Re: قال كفاءات قال اما انكم مستهبلين بي شكل!! (Re: Osman Mahmoud)
|
انا بكلمكم عن كفاءتو:-
كفاءتو انو هو من الهامش المهمش تهميش.
كفاءتو انو ما اتحيت ليهو فرصة يتم تعليمو خارج السودان.
كفاءتو انو ما بيعرف الفرص بتاع تكميل التعليم خارج السودان
تجي كيف؟ والناس قاعدين يلقوها كيف؟ ووين؟
وقاعدين يسافروا برا السودان كيف؟
وقاعدين يلقوا العمل في المنظمات والشركات خارج السودان
كيف؟
ما بيعرف عن الحاجات دي لأنو اصلًا مهمش! الفرص دي
عندها ناسها.
خلاص؟
.
| |
|
|
|
|
|
|
|
|
|
Re: قال كفاءات قال اما انكم مستهبلين بي شكل!! (Re: Osman Mahmoud)
|
ايي من الهامش في ناس باعداد كبيرة عندها برامج بتاع
تغيير حقيقي.
بعدين لييه مجلس السيادة والوزراء يكون من الصفوة
التكنوقراط ليييه؟
كدي نمسك أهم القطاعات: وزير الصحة مثلًا انت براك
حا تخت الخطط وتنفذها، ولَّ حا تجيك التقارير من
المستشفيات ومراكز الدراسات وحا تعمل على توفير
الإحتياجات؟
اها دي دايرة تكنوقراط؟
وزير القراية: انت حا تخت المناهج وتشرف على عملية
التعليلم وحا تضع الخطط براك؟
ام الموضوع حا يمر عن طريق جيوش جرارة من
المختصين.؟ دي دايرة ليها كفاءات نادرة حسي؟
وزير المالية انت حا تصرف للناس دي المصاريف يعني.؟
يا اخوانا مافي حاجة اسمها كفاءات نادرة، في حاجة اسمها
متخصصين.
يعني في وزارة الزراعة يكون حتى الموظفين الإداريين
مختصين وخريجي زراعة.
ونفس الشيئ مع كل الوزارات.
بإختصار اذا وجِدت هذه الكفاءات النادرة من الهامش
خير وبركة ..
واذا لم يوجد ارجع للمقدمة لماذا لم يوجد ..
فمن الضروري جدًا يتم الأمر بطريقة الإستحقاق، لكل
اقليم له الحق في التواجد في السُلطة حتى نصل درجة
الدولة البنحلم بيها كلنا، دولة الحرية والكرامة والمواطنة
والمساواة بين كل مكوناتها.
بعد داك نسميها محاصصات جهوية بعد ان نقضي على
الجهوية بالمساواة في الحقوق والواجبات كاملًا، لو اتحققت
العدالة الجهوية براها كدا حا تموت.
فبلاش استهبال وفهلوة مركز.
.
| |
|
|
|
|
|
|
|
|
|
Re: قال كفاءات قال اما انكم مستهبلين بي شكل!! (Re: Osman Mahmoud)
|
لو دايرين شهادة بكالوريوس ولغاية ماجستير كدا من جامعة
كسلا او جامعة الفاشر نجيبها ليكم.
بس ما تركزو مع الماجستير شديد عشان تاني ما تعصروا
علينا كمان.
لاكين عشان تشبكني دا عندو دكتوراه في جامعة شنو
البريطانية والامريكية وعمل في منظمة شنو الأممية..
يا اخوي هوي دا لقى الفرصة دي كيف انا ما بعرف.
.
| |
|
|
|
|
|
|
|
|
|
Re: قال كفاءات قال اما انكم مستهبلين بي شكل!! (Re: Osman Mahmoud)
|
Quote: فمن الضروري جدًا يتم الأمر بطريقة الإستحقاق، لكل
اقليم له الحق في التواجد في السُلطة حتى نصل درجة
الدولة البنحلم بيها كلنا، دولة الحرية والكرامة والمواطنة
والمساواة بين كل مكوناتها.
بعد داك نسميها محاصصات جهوية بعد ان نقضي على
الجهوية بالمساواة في الحقوق والواجبات كاملًا، لو اتحققت
العدالة الجهوية براها كدا حا تموت. |
سلام عثمان محمود
ده زبدة الكلام.
من اول يوم بعد سقوط البشير قلنا من الضرورى اي سوداني يشوف نفسو في الحكومة الانتقالية و عشان ده يحصل لابد من التمثيل الجهوى المتساوى بعيدا عن المحاصصات الحزبية (مدنية و عسكرية) لانو باب الترضيات علي اساس حزبي باب ما في زول عندو القدرة ليهو.
و قلنا انو ما كل سكان اقليم دارفور متمردين فالمجتمع المدني مثله و بقية السودان زاخر بالكفاءات التي يمكن مشاركتها ضمن المجتمع المدني بكامل استحقاقاته.
الذين حملو السلاح ليس لاجل مصالحهم الشخصية بل لاجل ذات هدف التمثيل المتساوى لكل مكونات السودان في السلطة المركزية و لكن عقلية شيطنة الاخرين ما زالت سائدة و كذا راحت الفرصة منا كسودانيين الا يتخلف احد منا في مثل هذا اليوم.
| |
|
|
|
|
|
|
|
|
|
Re: قال كفاءات قال اما انكم مستهبلين بي شكل!! (Re: Osman Mahmoud)
|
تحيات الاخ محجوب عبدالله ونعتذر عن التأخير في الرد والمتابعة.
ولك كل الشكر بالمرور والإضافة.
الطرح الوحيد الذي خلص له المهمومين من ابناء السودان
والذي فيه البديل للنظام هو الطرح الذي يعالج اساس المشكلة
السودانية.
ولا بديل غيره.
والطرح هو ان تُبنى الوحدة على اساس مشاركة كل السودان
في السُلطة الإنتقالية بطريقة أقرب الى الجهوية وليس
المناطقية فقط.
بمعنى أن لايمثل في الحكومة بمكوناتها الثلاث شخص اصوله
من اقليم آخر للإقليم الذي يُقيم فيه حتى لو كان مولود فيه.
واقتراح حق الإنتماء الكامل للإقليم الذي يقيم فيه الإنسان
بعدد السنين سواء كانت ثمانية سنة او غيره، ترجئ مثل هذه
القوانين الى ما بعد دولة المواطنة بعد أن يتمكن السودانيين
من ردم الهوة السحيقة التي تباعد فيما بينهم.
لا ينكر الا مكابر بأن هذه الثورة بدأت بالفعل بتوحيد السودان
وابتدرت الشعارات التي تتغافل الجهوية.
نعم هذه نقطة متقدمة وتبشر بالخير.
ولكن نحتاج لضمان أكبر من مجرد تغافل الجهوية ورفع الشعارات
ان صح التعبير.
نريد خطوات حقيقية في أرض الواقع.
نريد ان يبادر الذين يأخذون السُلطة الحقيقية والفعلية من تلابيبها
بفكها من قبضتهم والتنازل عنها.
نريد منهم بكل وضوح الإعتراف بالفشل والاعتراف بوجود
الآخرين كشركاء حقيقين في الدولة.
وليس بطريقة الإستعراض والإمتنان.
السودان امام ثلاثة خيارات:
الخيار الأول: كما هو الحال الإستمرار على نفس الطريق ومنذ
تأسيس الدولة السودانية بحدودها قبل انفصال الجنوب، مرورًا
بالإستعمار الإنجليزي وحتى بعد الإستقلال في كل حقب
الحكومات المتعاقبة وحتى ملامح حكومة الفترة الإنتقالية هذه.
الخيار الثاني: تغيير هذا النظام.
الخيار الثالث: العودة الى ما قبل الثورة المهدية.
الخيار الأول كما يعلم الكل خلق دولة فاشلة، ولم يعطي مواطنيها
الا الغبن المتزايد حتى ادى الى استقلال الجنوب.
الخيار الثاني خيار التغيير هو ما يحلم به كل الشرفاء الذين
يفضلون وحدة السودان وبناء دولة قوية فيها كل الحقوق التي
من شأنها ستزيل الغبن وعدم الثقة.
في حال لم ننجح في هذا الخيار سيضطر الناس للخيار الثالث.
لأنه لن يصبر احد بعد الآن على دولة المركز الفاشلة.
وفي تقديراتي الشخصية نحن امام مفترق طرق الآن اما التغيير
الحقيقي او ستكون هذه الحكومة الإنتقالية آخر حكومة لما
تبقى من السودان الدولة الواحدة.
.
| |
|
|
|
|
|
|
|
|
|
Re: قال كفاءات قال اما انكم مستهبلين بي شكل!! (Re: Osman Mahmoud)
|
لا يفوتني أن اذكر هنا واحدة من الإجابات الرنانة عندما يقول
احدهم: اها بعد يسقط النظام لو جو وحكموكم المتردين
كيف.؟ في اشارة تخويف.
كان الكثيرون يردون: مالهم ما سودانيين؟ من حقهم يحكموا
السودان.
الآن وبعد نجاح الثورة ظهر مصطلح ما يعرف بالمحاصصات،
ثم سؤال كفاءتو شنو.
الغريبة نفس الناس الكانوا بقولوا خلي المتمردين يحكموا لأنهم
سودانيين وعندهم الحق.
نفس هؤلاء قاعدين يقولوا محاصصات وكفاءتو شنو.!!
.
| |
|
|
|
|
|
|
|
|
|
Re: قال كفاءات قال اما انكم مستهبلين بي شكل!! (Re: Gafar Bashir)
|
في هامش بعد هامش حمدوك وبراهيم البدوي ووزير العدل وصديق تاور ؟
طلع لينا هامش جديد يعني ؟
قصة انو الواحد ما بعرف وين يلقا قبول لي جامعة عالمية او اجنبية دي علاقتا شنو بي مركز
وهامش ؟ الناس الذكرتهم فوق ديل كلهم من هامش الهامش ذاتو وكلهم درسو في جامعات
اجنبية ، تفتكر وصلوا للجامعات دي كيف ؟ اي زول درس جامعة يفترض انو بعرف انو في حاجة اسمها
جامعات اجنبية والجامعات وبعضها بيدي منح مجانية لطلاب من العالم الثالث الخ الخ
واحدة من اسباب انهيار نظام الانقاذ هي انهيار منظومة التعليم بالكامل مثللها مثل باقي قطاعات
الخدمة والتنمية البشرية والاقتصادية ، اعتقد لو فكرنا بي الطريقة دي وجبنا خريجين جامعاتنا بنكون
كضابين او منافقين ، اما ان تعليمنا لم ينهار ، او اننا لسنا حريصين على وضع الرجل المناسب في المكان
المناسب وبالتالي وكمان عايزين نقصي الناس الاتعلمت في جامعات محترمة حقد ساي كده بس ..
نعم كفاءات ادوهم ياخدوا فرصتهم ، ما معقول اصلا من اول شهر عايزينهم يزبطوا اي حاجة
ده مستحيل ..
تحياتي
| |
|
|
|
|
|
|
|
|
|
Re: قال كفاءات قال اما انكم مستهبلين بي شكل!! (Re: Osman Mahmoud)
|
Quote: في هامش بعد هامش حمدوك وبراهيم البدوي ووزير العدل وصديق تاور ؟
طلع لينا هامش جديد يعني ؟
قصة انو الواحد ما بعرف وين يلقا قبول لي جامعة عالمية او اجنبية دي علاقتا شنو بي مركز
وهامش ؟ الناس الذكرتهم فوق ديل كلهم من هامش الهامش ذاتو وكلهم درسو في جامعات
اجنبية ، تفتكر وصلوا للجامعات دي كيف ؟ اي زول درس جامعة يفترض انو بعرف انو في حاجة اسمها
جامعات اجنبية والجامعات وبعضها بيدي منح مجانية لطلاب من العالم الثالث الخ الخ
واحدة من اسباب انهيار نظام الانقاذ هي انهيار منظومة التعليم بالكامل مثللها مثل باقي قطاعات
الخدمة والتنمية البشرية والاقتصادية ، اعتقد لو فكرنا بي الطريقة دي وجبنا خريجين جامعاتنا بنكون
كضابين او منافقين ، اما ان تعليمنا لم ينهار ، او اننا لسنا حريصين على وضع الرجل المناسب في المكان
المناسب وبالتالي وكمان عايزين نقصي الناس الاتعلمت في جامعات محترمة حقد ساي كده بس ..
نعم كفاءات ادوهم ياخدوا فرصتهم ، ما معقول اصلا من اول شهر عايزينهم يزبطوا اي حاجة
ده مستحيل ..
تحياتي |
كيف يعني؟ المنح الدراسية والإبتعاث الخارجي قاعد
يتم بالقرعة يعني؟
مش بتم عن طريق الحكومة؟ ولَّ فهمونا ليهو غلط.
مافي أيي هامش جديد ياهو نفس الهامش الواحد دا.
عبدالله ادريس ما تزعل يا حبيب دا إحساس عميق إتمنى
يكون أوهام والحقائق تكون مختلفة او ذي ما بتقول إنت.
معليش ما تشكيك في إنتماء أيي زول من الحكومة لي
إقليمو.
لكين في حاجة اسمها التركي والمتورك.
زائد مركزية الحكوم بغض النظر عن منو هو الفي المركز
بتوضح انو المشكلة مستمرة.
على فكرة المشكلة أعمق بي كتير وحلها واضح ذي الشمس
الا لمن أبى.
لا.. لا.. التعليم منهار مافي زول يغالطك في دي.
لكن المنهارين ديل وبي انهيارهم دا دايرين يحكمو نفسهم
بي نفسهم، وما بثقوا في أيي شيئ بجي من مركز الانبياء
والأوصياء.. وريني المانع هنا شنو؟
غير انو دايرين يحكموهم بالعافية وكمان جابت ليها فلهوة
كفاءات نادرة.!!
قصة واقعية:-
في واحد من أبعد نقطة في الهامش كمل تعليمو في الخارج
بعدين الاسطورة تقول بقى كوز كبير وسكن الخرتوم وبعد
تعليمو ال في الخارج وهو مسؤول كبير أهلوا قاعدين يموتوا
لي يوم الليلة بالكوليرا والسل ومرات بي ذخيرة حية ومرات
بي عقارب وضبايب.
في الأخير ولو من باب الراجل كلمتو واحدي: حا نكون
حريصين على ان يتموا فترتهم الإنتقالية، وغير كدي
المهم هو وقطع شك ما حا يكونو اسوأ من الكيزان القدام.
مع خالص المودة والإحترام.
.
| |
|
|
|
|
|
|
تعليقات قراء سودانيزاونلاين دوت كم على هذا الموضوع:
at FaceBook
| |
Osman Mahmoud
Mahjob Abdalla
Abdullah Idrees
فيس بوك
تويتر
انستقرام
يوتيوب
بنتيريست