صدقت يا دكتور أحمد الطيب إبراهيم , فالنفسح الطريق أمام الشباب ,,,

Quote: كتب ///// د احمد الطيب ابراهيم استشاري جراحة الكلي والمسالك البولية ///////////_///// ((( مليون سلام وتعظيم للجيل الراكب الرأس وقدروا بشيلوا رئيس رقاص )))).. المقال ده للشباب والشابات الاتولدوا من ١٩٨٩ و ما فوق.... اي زول أكبر من كده يفضل ما يقرأهو... والما فاطر ما يخاطر... يا شباب انا والله بحييكم و بعزكم جدا و كنت دوما بشوف فيكم الخلاص للبلد دي و مستقبلها لأنكم جيتوا في زمن توفر الميديا والمعلومات...زمن ما في دجاااال ممكن يأكل بي راسكم حلاوة ذينا زمان.... ممكن تتخيلوا نحن جينا في زمن الدجل والشعوذة..... واحد صحفي بيحكي في التلفزيون القومي والجرايد ونحن في كلية الطب وعاملين فيها راسطات و مكملين الفهم و الشطارة.... الدجال ده قال (( بينما كان المجاهدون جائعين في احراش الجنوب..جاءتهم غزالة و ارتمت في الأرض وقالت لهم اذبحوني... فذبحوها و وتغدوا بها و واصلوا متحرك الجهاد )) .. ممكن اي طفل توحدي أو متخلف عقليا يصدق اليومين الكلام ده ... __ اتخيلوا زملائنا بعد كم يوم جابوا الساوند سيستم و الموسيقى دورت و هاك يا اناشيد جهادية (( زمرا في الجنة سيقوا إليها جنة الخلد لدينا )) و خرج عدد معتبر من زملائنا للحرب ولم يعودا من الاحراش حتي اليوم...وما زال نفس هذا الدجال يكتب في صحف الإنقاذ وحتي سقوطها..و لم يستشهد واحد من شيوخ الإنقاذ و مات الآلاف من الشباب.... اللهم تقبلهم حسب نواياهم وانت اعلم بالنوايا.... يا اخي: انا متكيف منكم للطيش عشان كده ح اكتب بي لغتكم زاتها... ايوه لغة ((الحل في البل )) و كدااااابه ....لغة الراندوق الدسيسة وما خسيسية... الواحد علي الطلاق لو ما الصلعة خذلتني كان فلفل شعرو معاكم وعاش اللحظة.... طبعا بنطلون السيستم ده انا ما بقدر عليه لانو ناس البلد ح يكتلوني.... ايوة اغتيال عديل... نحن يا شباب لما كنا صغار كان البلبس بنطلون زاتو بنعتبروا ما دغري.... و البنطلون ده كان حدو المدرسة وواعك تلبس معاهو حزام .. طوااالي بيسموك(( كارب صليبو نار الله حارقه قليبو )).. كنا لحدي سن المدرسة بنلبس جلابية بدون لباس أو لباس بدون جلابية.... وما كان في حد بعاين في عورة حد وللا جلابية حد ...شفتوا نحن كنا بسيطين كيف... موش ليهم حق يضحكوا علينا و يكذبوا علينا ويسرقوا مواردنا و يشردوا اخوانا.... كنا والله ما بنعرف النفاق ولا الكذب لما جوا الناس ديل و شفنا الكذب علي اصوله و النفاق يمشي علي الارض في شكل بشر من لحم ودم ... __كان الزول المتدين ده عندنا مكان ثقة ممكن تخلي عنده قروشك وولدك وعرضك لكن لما جونا بقينا نخاف من ناس المتدينين...لأنهم لو لموا فيك بطلعوا ((دينك))... //////////. __ إخوانا في المجلس العسكري والقوات المسلحة .. اولادنا المعتصمين جنب القيادة وانا ذاتي و والدي كنت معتصم معاهم عليكم الله طولوا بالكم عليهم.... لأنهم معاهم حق ما يصدقوكم.... ولا يصدقوني انا ذاتي... الشباب ديل مما اتولدوا اي حاجة في البلد دي لقوها كذبة... وكذبة كبيرة... --'هي لله كذبة... _من أجل الوطن كذبة... -__وشرف المهنة كذبة كبيرة. . __ونعاهدكم ونعاهد الشعب كذبتين تومات كمان.. __الشهداء كذبة و الجهاد كذبة و الوطن الواحد كذبة _ وما جينا عشان نحكمكم كذبة... تلاتين سنة هم بيسمعوا البشير يكذب من يوم اتحرك من هجليج لحدي ما دخل ميوم وقطع مسافة الف خمسمائة ميل ((( 82 كيلومتر ))) سيرا علي الأقدام في تلاتة ايام و لحدي ما تخلي عن حزب المؤتمر و وعد بالوقوف علي مسافة واحدة و بعد أسبوعين رجع للمؤتمر تاااني... __ عمرهم كله بيسمعوا الرئيس يكذب ويقول ليهم (( حصل كذبت عليكم ))ومن حوله يكبرون ويهللون... _ عمرهم كله بيسمعوا ائمة مساجد بعضهم منافقين..أساتذة جامعات وبعضهم غشاشين.. ضابط يدعون انهم أحرارا وهم أبعد من الحرية... موش ليهم حق...ما يصدقونا.. موش ليهم حق يركبوا راسهم ويركبوا فوق راسنا زاتو... عليكم الله ادوهم فرصة يحكموا معاكم وما تقولوا الناس ديل صغار..... الكبار عواااار والله عوااااار... ديل فاهمين اكتر مني ومنكم ومن الصادق المهدي .... الناس ديل فاهمين ومعاهم الله و معاهم غوغل Google اي حاجة جايبين خبرها.... الشباب هم الصنعوا الثورة و الكبار هم السلموا السلطة الإنقاذ و انحنوا تحت اقدامها... __كل الماتوا هم شباب ما في ولا واحد من المسنين اتجرح في مظاهرات وللا اتضرب رصاص... __ الناس العجائز ديل جوا من وين بعد الثورة نجضت... الواحد فيهم يمصمص في شفايفو ذي التقول شارب ليمون.... __ الصادق المهدي جاء صلي بالناس في مسجد الجامعة ...والله لو ما صليت وراء مهران كان قنعت من الجمعة وصليتها ضهر... يا اخي انت موش قلت دي بوخة دخان... موش قلت ما وجع ولادة... الجابك شنو خليهم في بوختهم... //////// و الله ناس دار فور عندهم مثل بيقول (( الرجال دناقر وما كبر عناقر )).... بي لغة ناس الخرطوم يعني الرجال مواقف ... وما بالاحجام والأعمار......الشباب ديل والله كان عندهم دناقر تعجب وتشرف.... ////////// ديل الرجال اما الكنداكات ديل: يا الله من الكنداكات....ديل جمعن اي حاجة كده مع بعض... (((جمال وانوثة و زوق و أدب و وطنية وشجاعة واقدام....)))). يا اخي كنداكة تشيل البمبان وترجعوا لي ناس التاتشر.... كنداكة الرصاص يضرب بدل تصرخ تزعرد.... يا اخي الكنداكات ديل كسرن خلق الله كلهم حتي الخواجات.... أيقونة الثورة دي في نص ساعة كتبوا عنها ناس الجارديان Guardian و CNN و American post..ال سي ان ان .. والأمريكان بوست و كل القنوات الفضائية..... يا أخ العرب ديل قالوا عنها (( ألهة من الزمن القديم ))... يا اخي انا اول مرة اسمع بنت يقولوا عليها آلهة.... عارفة ليه يا روضة الحاج... لانها غنت لشعبها وارثها النوبي ولم تغني ليعرب ابن قحطان...و طلعت في مسرح علي رأس بوكسي حوله ثائرات ولم يكن من أدوات التصوير غير كاميرا موبايل لأحدي الثائرات.... لانها انشدت من أجل اطفالنا في دار فور و جبال النوبة والخرطوم والنيل الازرق و لاهلك في كسلا حيث المرة الأولي التي يقتل فيها استاذ بالخاذوق منذ فجر التاريخ وحتي اليوم....غنت من اجل قتلانا وأطفالنا وليس من أجل قتلي البوسنه وأطفال غزة و فلسطين.... الأخت روضة الحاج لقد قرر الثوار أن يرسلوا لك مرتبك كوزيرة في شكل رصيد من اي شركة تختارين عدا شركة زين وذلك لتفاهة شركة زين وموقفها المخزي من الثورة وخيرا فعلوا عندما قذفوا لها طواقيها اقصد شركة زين ....... قروشك ح تترسل ليك لانه الثوار ما بياكلوا حق وزير عندك مرتب خمسة أيام لازم تستلميهو....وادينا عرض اكتافك....وديك فلسطين وغزة و بني صهيون.. د احمد الطيب ابراهيم استشاري جراحة الكلي والمسالك البولية