|
Re: ظرفاء المنبر (Re: عبدالحفيظ ابوسن)
|
ظرافة فيهو قضامة محببة اقرأ الرد وابتسم ابتسامة واسعة يظن من يراني انني ( فاتح) الواتس ممكن ما اتفق معاهو في ردو لكن تعجبني قدرته علي اكتشاف المفارقة والاشارة لها من خلال رده فيهم ذكاء بلاشك القدرة علي الرؤية المفارقة زاتا ذكاوة !
| |
|
|
|
|
|
|
Re: ظرفاء المنبر (Re: عبدالحفيظ ابوسن)
|
تشكر ابراهيم من ذوقك بس وحياة ديني اتفق معاك ود المدير بكوجنا وبالذات لامن يكونو شغالين زي الشتم 😆 الشتم آلة نقر زي الدلوكة بل هي جنا الدلوكة الاصغر لامن يكونو هو وجلال اقصد ويخش ودو يخلف الدقة بتجوط عديل كدة ودو كبير خبراء الشتوما 😆 الشتوما جمع بعزقة للشتم
| |
|
|
|
|
|
|
Re: ظرفاء المنبر (Re: عبدالحفيظ ابوسن)
|
تصدقو وتآمنوا اول زول في اللستة . واللستة ما مرتبة تصاعديا ولا تنازليا . هو حاتم ابراهيم آي صحي غياظ .. لكن عندو قدرة مذهلة لإكتشاف التناقض والاشارة إليه بقضامة ومساخة لا تخلو من ذكاء متقد مرح آي بغض النظر عن رأي في كلامو متفق او مختلف معاهو واقول في سري آمنتو بي الله !! الحمدلله انني ليس في مكان المردود عليه يتواري لي المردود عليه لو كان قريب كان عض حاتم في عنقرتو بفك جبارتو طوالي احكي ليكم نكتة حقيقية
| |
|
|
|
|
|
|
Re: ظرفاء المنبر (Re: عبدالحفيظ ابوسن)
|
اعمامنا ولا اجدادنا محمد والنتو وعمنا عبدالفتاح عكاشة رحمهم الله كان شياب فوق التسعين والنتو اخدر اللون وغامقه وعبدالفتاح لونو فاتح جدا حتي تحسبه غير سوداني اتشاكلو شكل الشياب ديلك والنتو قال ليهو امشي يا حلبي يا بتاعين القرود عبدالفتاح قال ليهو نعم نحن بتاعين قرود لكن انتو القرود البنلعب بيها والنتو لامن وشو اتغير وعض اصبعو وارغي وازبد احيااااا نحن قرود ياخ انعل ..... يا عبدالقادر امسك ابوك دة لو قمت بطلع دينو ههه القصة دي ونحن اطفال لكن رسخت في ذهني شوف الذكاء اصلو ما نفي ليهو واستخدمها زاتو ضدو لامن وجعتو اها حاتم دة القالو ليهو حلبي😆😆😆
| |
|
|
|
|
|
|
Re: ظرفاء المنبر (Re: عبدالحفيظ ابوسن)
|
Quote: خاصة نمرة تلاتة :) |
اسع احتمال تطلع دا انت زاتك
يا ابراهيم
ود المدير اظرف من مشى على الارض
لكن ما كل الناس بتقدر تستوعب عباراته الساخرة ذات الصبغة البلدية الاصيلة
الصبغة البلدية دي ذكرتني السمنة البلدية .. اللااااااااااااااااااااااه ياخ
| |
|
|
|
|
|
|
Re: ظرفاء المنبر (Re: عبدالحفيظ ابوسن)
|
Quote: تصدقو وتآمنوا اول زول في اللستة . واللستة ما مرتبة تصاعديا ولا تنازليا . |
إذن مرتبة! سمح أنا جيت (الأول) كيفن، محسوبية؟
هههههههه ___ أبوسن إزيك ياخ، عنقرتي فداك، أقرم عدمها الفقرة
| |
|
|
|
|
|
|
Re: ظرفاء المنبر (Re: محمد الأمين موسى)
|
غايتو يا هيثم ذكرتني استاذنا زمان .. زول بارد ومنعزل وما اجتماعي قال عن نفسو انا زول اجتماعي جدا !! بس الناس ما عارفاني !! المدير بجي متلب ساي بي فرارو قبال يفرز !! ومن فوق لي ضهرو بجي متلب جلال 😆
| |
|
|
|
|
|
|
Re: ظرفاء المنبر (Re: عبدالحفيظ ابوسن)
|
اها جنس غلاطك دة يا حاتم نقول ما مرتبة .. تقول مرتبة ولا آ قاصد مرتبة بلغة سودانية قحة تخيل بعد قريت كلامك اكتشفت اني قلت اول واحد في اللستة 😅😅😅 تسلم ياخ لكن اعمل حسابك عنقرتك دي يجيك الاسد الاطرش !! خلي ضربك سرا ونوايط ما تكبع الزول في عضم الشيطان لا يعرف يضحك ولا يبكي
| |
|
|
|
|
|
|
Re: ظرفاء المنبر (Re: عبدالحفيظ ابوسن)
|
Quote: من هسه اكلمك معاوية المدير ما ظريف زول دمو تقيل وبايخ |
ياخ برَكة اللِقيّت نضارتك، ثم كلامك دا أكبر دليل علي أني زول ظريف ؤ دمي خفيف وإنت عارف حا يجيبوني في اللِستة عشان كِدا جيّت جاري تبخسني شِيتاتي يا سغيّل ...
| |
|
|
|
|
|
|
Re: ظرفاء المنبر (Re: عبدالحفيظ ابوسن)
|
ودو و ابوحسين ديل إلا يكونو في مرتبة واحدة . وشرطا يكونو بتداخلو مع بعض يعني لو مسكت اي واحد ما بكونو ظرفين ومرحين ودة ما نبذ ليهم لكن مع بعض ببدعو .. زي العصير اي عصير لامن تخت مكوناتو مع بعض بعمل عصير ظريف وهم دايما علي طرفي نقيض اي واحد برجا التاني عشان يعاكسو مشاكسات فيها الود والالفة وتخلو من سؤ الظن يعني مافيهم زول بطلع من طورو ولا يقول يا تحذفوهو ولا يا تعتذر ون تو مرح بالذات في الردود القصيرة ومافيها اقتباسات طويلة تسل الروح
| |
|
|
|
|
|
|
Re: ظرفاء المنبر (Re: عثمان الأمام)
|
ود المدير شرطن ولازمن يكون منبثق لامن ينبثق بكون ظريف ولازمن تكون اول مداخلاتو بعدها بعك يعني لامن يكون منبثق لوحدو المداخلات بتلخبت سلوكو
| |
|
|
|
|
|
|
Re: ظرفاء المنبر (Re: محمد الأمين موسى)
|
أنا غايتو بأيد معاك muntasir في اللستة لكن حدي معاك هنا .. شايف صاحبك جاء
Quote: سمح أنا جيت (الأول) كيفن، محسوبية؟ |
شيل شيلتك غايتو .. جابت ليها محسوبية كمان
| |
|
|
|
|
|
|
Re: ظرفاء المنبر (Re: عمر أبوعاقلة)
|
نجي لي حيدر اي صحي والله في اللستة منتصر وبكري عباس منتصر يستهلك اقل قدر من الكلمات ويصيب الهدف الساخر المرح منتصر التقول بدفعوهو قروش في الكلمة ابوبكر عباس من الظرفاء ويفسد الظرف احيانا بالشرح وتبرئة الذمة . لو خلوهو عرعر براهو بدون زنقات ببدع
| |
|
|
|
|
|
|
Re: ظرفاء المنبر (Re: Osman Awoda)
|
انت يا محمد البشرى اللستة الكاتبها ود ابوسن شفتها وين؟ هو كاتبها بالحبر السري ولا شنو!!؟؟ بعد نقرا القائمة بتاعة ود ابوسن يمكن ان نعدل او نضيف او ننقص من القائمة، مع وافر التقدير والاحترام والسلام والتحايا النواضر لصاحب البوست وضيوفه الكرام سواء كانوا ظرفاء في القائمة او بره القائمة
| |
|
|
|
|
|
|
Re: ظرفاء المنبر (Re: امتثال عبدالله)
|
الله يسامحك ياخ .... معقول أنا وصلت المرحلة دي ....؟؟؟؟؟ عليه العوض و منو العوض ....!!!!!!!!!!!!!!!
Quote: احمد محمد عمر و حمد لبد و ...... و....... |
ديل أثقل إتنين في المنبر و إنت أولهم و منتصر رابعكم باسط ذراعيه بالوصيد......
| |
|
|
|
|
|
|
Re: ظرفاء المنبر (Re: امتثال عبدالله)
|
احمد محمد عمر لامن يكون شايل المديدة حرقتني ويحمش في النيران يدي الدلوكة عصا والواطة عصا شرطا يكون حجاز حجاز لكن من يهبشوهو بنسي الظرافة كلها ويركب وش الككو
| |
|
|
|
|
|
|
Re: ظرفاء المنبر (Re: حيدر حسن ميرغني)
|
يا فاضلابي جب جب ديل مالم ديل حرقم حرقم وين (للاسف ما سمعت الرد الكهربا قطعت ) ههه يا عووضة اصلي ما بتوب تصدق !! كلمي يا امتثال ودو بقرا قبل يفتح المنبر !!
| |
|
|
|
|
|
|
Re: ظرفاء المنبر (Re: عبدالحفيظ ابوسن)
|
لا يا ابوحسين ياخ حمد دة زول لطيف ودقيق العبارة يبحث دوما عن ان يكون واضحا في العجاجة القايمة . يكتب بحذر جدا . ولا يداعب الا من يثق في حكمه لذا خرج من التصنيف . لأنو الباقين ما بفرزو .برشو بس هههه يا حيدر .. وحياة الخوة داخرك قاصد عشان احمد محمد عمر .. تجاهلت عشان ما اكشف الاجوبة لي الرميان اخوك ما محتاج براهو بقع برة الميدان يجي يشوت .. يشوت ليهو ضقل
| |
|
|
|
|
|
|
Re: ظرفاء المنبر (Re: عبدالحفيظ ابوسن)
|
ياخ برَكة اللِقيّت نضارتك، ثم كلامك دا أكبر دليل علي أني زول ظريف ؤ دمي خفيف وإنت عارف حا يجيبوني في اللِستة عشان كِدا جيّت جاري تبخسني شِيتاتي يا سغيّل ...
والله طالما حاتم جباوهو الاول في الظرافة ودينق (ابيخ انسان في جنوب وشمال السودان والقرن الافريقي) طالما الاتنين ديل بقوا (زرفيين) معانتو انت وباقي الهتش ديل ظرفيين شديد
| |
|
|
|
|
|
|
Re: ظرفاء المنبر (Re: ابراهيم عبد الوهاب)
|
هههه يا ابراهيم طول بالك ياخ ههههه الظرافة القاصدها انا البتخليك تضحك .. كدي عاين ظريف يعني فكه عندنا استاذ في العالي مشهور بالثقالة جدا حتي ارتبطت بإسمه . اسمة كدة س الثقيل لكن صدقني لو حكيت ليك ثقالتو تضحك ضحك جد. لكن المتثاقل عليه بكون منفوخ تيوة بس ولا تامبيرا وبعد مرت السنوات بنحكي قصصو كطرفة يعني مثلا كان مشهور لو خش ما تحاول تخش مرة واحد جا بي وراهو طوالي بعد خش الفصل . ناداهو وقال ليهو جيب حجر يعملو للباب . الزول مشي جاب الحجر وتكل الباب وبقا داخل لي جوة طرقع ليهو بي اصبعو اتلفت عليهو اشرت ليهو بي اصبعو اطلع برة الفصل قرررر انفقع بالضحك وهو مارق محنبق لامن قرب يقع اها دة من زاويتنا طرفة لكن من زاوية زولتنا دة اثقل من ثقيل
| |
|
|
|
|
|
|
Re: ظرفاء المنبر (Re: عبدالحفيظ ابوسن)
|
هههههههههه هو صاح في ناس سغيلين وبتضحك للسغالة بتاعتهم لكن الاتنين المذكورين ما منهم
يعني هسه المستنير دا انا بعتبرو ما ظريف لكن بتضحك من تعليقاتو وخاصة التعليقات البنفخ فيها في نفسو وكذلك امتثال
بوستيك بتاع ميادة سوار الدهب من اظرف البوستات ميادة زاتها لو قرتو بتكون اتدردقت من الضحك
| |
|
|
|
|
|
|
Re: ظرفاء المنبر (Re: السيد المسلمي)
|
يا عثمان الامام اتا بتاع هوا مش قالوا ليك لا تتحدث مع السائق 😈😈 يعني ما شايفني مكنكش في الدركسون وراك شنو يا محمد الامين انتظر ساي يانا كلنا متربصين ههه يا ابوعاقلة وسع زاوية الشوف ولا غير الكي بورد😆
| |
|
|
|
|
|
|
Re: ظرفاء المنبر (Re: عبدالحفيظ ابوسن)
|
كده خليني أركب مكنة الجاحظ: اعلم يا ابا سن إن الظرف ضروبٌ. فهناك ظرف عالم يأتيك به تبارك، وثمة ظرف حالم يأتيك به البيلي، وآخر مسالم تجده عند محمد هارون من بلاد الفرنجة. أما الظرف المحترف فاطلبه في مضارب ودالمدير، والآخر المنحرف فعند المستنير، والظرف المعتكف فلدى ابن الزبير، ورابعهم المنجرف فعند زهير (عندما يحدثك عن عزوبياته وحلله المدنكلة). وإذا بحثت عن ظرف النساء أتتك دينا، وإن فار التنور فأم حازم جون سينا... (كمّل من عندك!)
| |
|
|
|
|
|
|
Re: ظرفاء المنبر (Re: حمد عبد الغفار عمر)
|
اي يا محمد كلو زول ليهو طعم براهو انا قصدت الناس البضحكوني في بيت البكا شنو يا حمد ياخ ياخ قريب 15 سنة بكتب من الموبايل الحصل شنو الحمد لله ارتحت من الكيبات القربت تعمل لي دبرة في اصبعي بقينا نشخت
| |
|
|
|
|
|
|
Re: ظرفاء المنبر (Re: معاوية المدير)
|
مريحو راحة يا مدير مشتري ليهو احدث صيحة في الكفرات والكفر بدلة الموبايل cover حتي بالامارة كفرو بنور لو وقع مني في ايتها مكان مضلم بنشاف 😆😆😆
| |
|
|
|
|
|
|
Re: ظرفاء المنبر (Re: عبدالحفيظ ابوسن)
|
عثمان عووضة يا قلب احب دنقلا وبركاويها
تعرف يا ابوسن الظرف والنكتة البتجي عابرة بتكون صادقة جدا زي حقت منتصر مثلا وهي عايزة مزاج رائق هسه انا لي تلاتة يوم قافلة معاي بفتح المنبر بشوف العناوين بس ما فتحت بوست طيلة الثلاثة يوم إلا البوست المحذوف ومعاه بوست بوستين يا دوبك اليوم مزاجي شوية بدأ يروق تانيا الحذر مطلوب في المزاح وزي ما تفضلت انت الحكم على ما تقول ما مضمون أبدا في بداية دخولنا للمنبر كانوا في ناس لو تداخلت معاهم بس بفتكروك ارتكبت جرم،،،، كييف تداخل معاهم وانت ما بتعرفهم قبل كدا خليك من تمزح معاهم والبعض بفتكر نفسو عالي المقام كتابيا وغير متاح لمن يضعهم في خانة العامة بعدين حكاية ابو حسين ظريف دي ما عارف استندتوا فيها على شنو دا ملاح ويكة بدون بصل لياقة بس ما ليها أي طعم
| |
|
|
|
|
|
|
Re: ظرفاء المنبر (Re: حمد عبد الغفار عمر)
|
Quote: بعدين حكاية ابو حسين ظريف دي ما عارف استندتوا فيها على شنو دا ملاح ويكة بدون بصل لياقة بس ما ليها أي طعم |
بالله هي وجعتك قدر دا .... !!! 😂😂😂😂😂😂
| |
|
|
|
|
|
|
Re: ظرفاء المنبر (Re: osama elkhawad)
|
تعرف يا حاتم، أظرف شخصية على الإطلاق مرّت علي في الأسافير دي؛ هي الدور الذي مثلته أنت في شخصية معروف أبو الحسن، الدور دا في ذلك المنبر كان دور قمة الظرافة والسخرية القاتلة وأديتو بذكاء خارق يا أخي، صورة البروفايل براها استحقيت عليها أوسكار فن الكوميديا الجادّة
أتمنى أن تقرأ هذه المداخلة منفصلة عن أي شيء
| |
|
|
|
|
|
|
Re: ظرفاء المنبر (Re: أبوبكر عباس)
|
آمنتو بي الله يا خواض !! مالك شايل الكلام لأقصي اطرافه الامر لا يعدو كونه مداعبه . لا انكر بعضها يصل حدا قبيحا . ليس بعضها بل نادرا منها
| |
|
|
|
|
|
|
Re: ظرفاء المنبر (Re: عبدالحفيظ ابوسن)
|
أحب أشكر الأكاديمية وأب سن ومن رأوْا فيني ظرافةً وأعترض عن ربطي مع المستنير خوفاً أن أحشر معه وكذلك أن يذكر أبا الحسين ولو عرضاً في هذا (الصياغ) وأتفق مع من قال إن أبوحراز أظرف زول وفِي بند القطامة المحببة الأرشيدوق ملاسي وختاماً التكريم ده مبلغ الرعاية بتاعو كم ولا ملح ساكت هنديك كندا قاعدة
| |
|
|
|
|
|
|
Re: ظرفاء المنبر (Re: عبدالحفيظ ابوسن)
|
صحي يا حمد ومنتصر كدة . بفكها كأنها جملة هامشية !! ولكنها دسمة !! لو قصدت الطرفة بتحس بيها زي الزهور الصناعية ابوحسين و ودو لامن يكونو بتجادعو بتابعهم في صمت . من يقومو علي المط بفقدو النكهة حقتهم تعرف في ناس يتأففون من بعضهم من يظنونهم دونهم و البعض يعسم التعابير ويختار من التراكيب اللغوية مما يجعل حديثه غريبا عليك . اقول ليك زي شنو زي تكون قاعد مع ناس مهنة واحدة وهم بتونسو مع بعض . وتتخلل ونستهم قصصهم العملية التي تعجز عن الامساك بمفرداتها ومراميها . يعني الاحجام ممكن يكون بتعالي الآخر او فقدان شهيتك ورغبتك
| |
|
|
|
|
|
|
Re: ظرفاء المنبر (Re: عبدالحفيظ ابوسن)
|
جمال ودالقوز بعرفو بي ود عكر .. عرفة اسافير من 2008 في منتدي كوستي سيتي . وقد سكن كوستي ولعب في فرقها درجة اولي المهم المنتدي كان اقليمي جدا يخص المدينة وذكرياتها . وانتبهت ل جمال فقد كانت لغته محببة . زول مباشر جدا .. يكتب كأنه يتونس معاك ينتبه للتفاصيل التي تفوت علي الآخرين والمفارقة فيها ومن هنا كانت ظرافته يصطاد ما غاب عن الآخرين ويشير لمفارقته بشكل ساخر ظنه في نفسه انه غير ذلك . ولكنه من الاقلام التي كثيرا ما تدفع البسمة للوجه
| |
|
|
|
|
|
|
Re: ظرفاء المنبر (Re: عبدالحفيظ ابوسن)
|
وأعترض عن ربطي مع المستنير خوفاً أن أحشر معه إطمئن شديد ... المستنير من الذين "يلبسون ثيابا خُضُر من سُندس وإسترق" ما شوفت طاقيته في صلاة العيد حررررم عينك ماتشوف إلا فواكه ... وتشرب من كأس "مزاجها كافورا" ... كمان
| |
|
|
|
|
|
|
Re: ظرفاء المنبر (Re: حيدر حسن ميرغني)
|
اها يا بكري جنس لماضتك دي البتجيب ليك الكلام مش معاوية بن ابي سفيان قال التغافل ثلاثة ارباع الفطنة ؟ اتغافل وسردب مرات حاتم شبكة عنكبوت كما قلت انا قبل كدة . يمتلك دهاء عنكبوت وذاكرة جمل
| |
|
|
|
|
|
|
Re: ظرفاء المنبر (Re: حيدر حسن ميرغني)
|
اها يا بكري جنس لماضتك دي البتجيب ليك الكلام مش معاوية بن ابي سفيان قال التغافل ثلاثة ارباع الفطنة ؟ اتغافل وسردب مرات حاتم شبكة عنكبوت كما قلت انا قبل كدة . يمتلك دهاء عنكبوت وذاكرة جمل
| |
|
|
|
|
|
|
Re: ظرفاء المنبر (Re: عبدالحفيظ ابوسن)
|
انتا يا منتصر فوق عديلك جابتك انتخابات حرة ورأي شخصي آي صحي لايمكن الركون لظرافة ابوحسين .. ياخ بطنب اطناب لامن تفطفط كتابتو احيانا لكن لامن يجادع ودو وهو جاري بكون ظريف حكاية كندا دى نارا ميقودة ما تجيب لينا المشاكل التكريم إلا يقبضوك في يدك اهلنا بقولو الصيت ولا الغنى
| |
|
|
|
|
|
|
Re: ظرفاء المنبر (Re: osama elkhawad)
|
تحياتي خواض مثلي الاسفيري !!؟ لا ياخ مالك سايقني لي طرفي النقيض وجايب الحاجات في الحافة بس . مابين الطرفين ملايين النقاط هو نموذج من نماذج الظرف الذين اوضحت سبب اتياني بهم . اما عن تلك المعركة ذات المداد المدفق بغزارة فقد اعتزلتها حتي لم اعد اقرأها . وكل واحد منكما اخذ منها حظه في اخيه .لا منتصر ولا مهزوم سوي الود
| |
|
|
|
|
|
|
Re: ظرفاء المنبر (Re: عبدالحفيظ ابوسن)
|
Quote: تحياتي خواض مثلي الاسفيري !!؟ |
أعني مثلك الاسفيري في الظرافة في هذا البوست.
وهو مثال لمن يمارسون السادية عبر السخرية من مخالفيهم.
ومن يضحك لسخرية البعض من آخرين، هو أيضا سادي ...
هذه فكرتي الأساسية في مداخلتي الأولى...
مع تقديري ....
| |
|
|
|
|
|
|
Re: ظرفاء المنبر (Re: osama elkhawad)
|
لا خلاف يا خواض السخرية من الآخر مذمومة جدا . اما الرد الساخر علي فكرة ما فيختلف بلاشك . اقلاها في نظري . من الامثلة المشهورة والمستهلكة اننا نضحك علي مقلب جر الكرسي من شخص وهو لا ينتبه لذلك . ان نظرت لها بذات نظرتك يمكن ان اسميها سادية . فهل كل من ضحك سادي ؟ وقس علي ذلك مواقف كثيرة كإنزلاق احدهم في الامطار . الامر في ظني ليس بهذه الحدة هل تعتبر ردود لينين الساخرة والمؤلمة نوع من انواع السادية مثلا؟ وهل حين اقرأها واعجب بها اعتبر سادي ؟
| |
|
|
|
|
|
|
Re: ظرفاء المنبر (Re: عبدالحفيظ ابوسن)
|
من انجازات فرويد الباهرة كما تعلم يا حفيظ ان النكتة والسهو ليس امرا عاديا.
ومن هنا يمكننا إيجاد علاقة بين تحرير مصطفى سعيد لافريقيا برأس عضوه التناسلي،
وبين الانتقام الوقاّفي للشبح من صاحب الشهادة الكرتونية "د. محمد صديق عبدالله" هههههههههههههههههه
هذا انحطاط لا مثيل له ... سخرية من سخرية تفرق....
كل السخرية في سوق امدفسو موجّهة للانتقاص من الخصوم ههههههههههههه
| |
|
|
|
|
|
|
Re: ظرفاء المنبر (Re: osama elkhawad)
|
بوست جلالدونا عن حاتم ومعروف أبو الحسن يا خواص، أعتبره الآن بوست مضر جداً هذا البوست رمى المنبر من قمة عالية جداً وصلها المنبر بفضل حاتم ابراهيم إلى مرحلة المنبر العادي البايخ
أسألوني قولوا لي كيف؟ "قبل أن تفقدوني"
| |
|
|
|
|
|
|
Re: ظرفاء المنبر (Re: أبوبكر عباس)
|
بل كشف حقيقة "الفقاعة" الذي وصل درجة الاسفاف الجنسي مثل "الانتقام الوقّافي" وغيره...
أذهب الى موقعه كلماسوفت،،
فإما أنه محتال كبير، أو عنده "بارانويا" لغوية ؟؟؟
| |
|
|
|
|
|
|
Re: ظرفاء المنبر (Re: osama elkhawad)
|
ريال و راح عندي كم نفر داير اقولهم لكن قالوا كلام الخطوبة يوم الطلاق ما ببقا ف شنو هل نحن قادرين نشوف الردود الساخرة الطريفة غض النظر عن رأينا السالب في توجهات الكاتب الفكرية ؟ الترابي رغم الاختلاف التناحري بيني وبينه اري في قوله احيانا سخرية طريفة . اختلاق الطرفة تحتاج لذكاء وقدرة علي رؤية مخالفة لا يراها الاخرون كما ذكرت سابقا بلاشك يا خواض ان فرويد نبه الناس للعقل الباطن . وجعلهم يقرأون ما يقوله الناس سهوا او دون تفكير عموما اعتقد رؤية الطرافة مربوط بالمحيط والثقافة والذكاء من المتلقي
| |
|
|
|
|
|
|
Re: ظرفاء المنبر (Re: عبدالحفيظ ابوسن)
|
يا قريبك المسالة تعتمد على الزاوية التي تنظر منها او لنقل موقعك من الطرفة و السخرية لو انت موضوعها لو انطبقت السما مع الأرض لن تر فيها طرفة بل سترى تحرّش وقلّة أدب وما شابه, في حين لو خرجت قليلا خارج الدائرة واحتللت موقع القارئ أو المتفرّج نفس ما كنت ستراه قلّة أدب ستراه الآن طرفة وظرافة وذكاء وكذا لذا اتفهّم وقفك وموقف حاتم وموقف الخوّاض واقبلها جميعا في اطار السلوك البشري العادي غير الكامل و المنحاز لإنسانيته بنقصها المعتاد الخواض مثلا يلتقط الإيحاء الجنسي في "الوقّافي"في حين فات عليه جلطة عبد الغني الكبيرة بتاعة "الكلجة" التي رآها الجميع تقريبا في حينها ول يعلّق عليها ! هكذا الحياة وهكذا نحن البشر و الكمال لله وحده
| |
|
|
|
|
|
|
Re: ظرفاء المنبر (Re: محمد البشرى الخضر)
|
Quote: لالالا جلال ياخي دا احسن منو ودالمدير داك بايخ وعامل فيها محمد نعيم سعد |
آمنت بالله ههههههههه يا ابراهومة ياخ دي ما بحشروها وسط المداخلات عشان تروح ساي كدا زي دي تجيبها براها وياحبّذا لو عملت ليها بوست بي رقبته كمان
| |
|
|
|
|
|
|
Re: ظرفاء المنبر (Re: Hassan Makkawi)
|
صحي يا ودو عين الرضا عن كل شنو كدة ما عارف وتعمي ان تر الندي فوقه اكليلا صحي زاويتك ياتا وبرضو هل هدف الطرفة ولا لا وكما قلت اعلاه
Quote: اها دة من زاويتنا طرفة لكن من زاوية زولتنا دة اثقل من ثقيل
| |
|
|
|
|
|
|
Re: ظرفاء المنبر (Re: Hassan Makkawi)
|
Quote: وبين الانتقام الوقاّفي للشبح |
الوقّافي = على الطاير = سريع. الزيارة الوقافي هي التي يرفض فيها الزائر الجلوس بحجة أنه على عجل من أمره... الانتقام الوقافي هو الانتقام السريع الذي لا يكلف المنتقم جهدا كبير (مثلا الإتيان باقتباسات ولكنات وتسطير جداول...) أهناك إطار دلالي مشترك؟ (بيئة هذا الفهم بعض منطاق غرب كردفان).
| |
|
|
|
|
|
|
Re: ظرفاء المنبر (Re: محمد الأمين موسى)
|
غايتو يا محمد الامين بعد آخد ساتر وكدة .. وقافي دي في التراث الذكوري عندها معني جنسي فاحش اقصد عندنا نحن عامة الشعب .. ودلالتها واحدة لو مغالتيني اسأل أي مواطن عابر ساي شرطا ما بتاع محاققة زي ودو من وقافي بطرشها ليك لامن تسدد اضنيك وبرضو يا محمد عندنا مشكلة مع الضمير المستتر التقديرو هو والله يدوك الخمسين في يدك
| |
|
|
|
|
|
|
Re: ظرفاء المنبر (Re: عبدالحفيظ ابوسن)
|
غايتو يا ودأبسن تراثكم الذكوري دا جديد ونحنا ما حضرناه وربما لم يصلنا وقتها (قبل أكثر من ثلاث عقود) في هامشنا، والإيحاء الجنسي لا يمكن أن يرد إلا إذا كان سياق الحديث له علاقة بذلك.
| |
|
|
|
|
|
|
Re: ظرفاء المنبر (Re: محمد الأمين موسى)
|
Quote: والإيحاء الجنسي لا يمكن أن يرد إلا إذا كان سياق الحديث له علاقة بذلك. |
الله عليك يا بروف نفس منطق قولة "زوووط" بتاعة الكورة ! هلكوني فيها هلاك شيوخ المنبر هنا قال معناها جنسي و فاحش وبتاع هيا اولاد الحلال جنس شنو الفي الكورة كمان! الكلام على السياق لكن مين يسمع
| |
|
|
|
|
|
|
Re: ظرفاء المنبر (Re: محمد الأمين موسى)
|
تعرف يا محمد الايحاءات الجنسية ما بتأتي إلا من خلال الونسات .. المباجحة وليس النقاش ايا كان فكري ولا رياضي ولا سياسي ولا غيرو ومن الذين توثقت بينهن عرى المعرفة زمنيا تلاتة عقود دى كم يا محمد ؟ انا غايتو بتحدث منذ ان وصلنا مبلغ ان ننظر للمرأة كأنثي اواخر السبعينات . وظهرت ثقافة التسدير تقول للزول شفتو ؟ وتقصد شيئا او شخصا وارد جدا يسدرك بيها . وفقا لمستوي معرفتك به حتي وقافي زاتي ولا نعتبرك ذلك سؤ ادب او صعلكة وشفتنة كانت من الاشياء التي لم نكن نحاكمها محاكمة اخلاقية صارمة ونضعها علي احد حدي المقياس .. كما نحاكم اليوم الامور بمنظار اخلاقي وعنصري حاد جدا وبل لدرجة البحث المضني عن ذلك والامساك بشبهة مشابهة ولو بعيدة . لم يكن هنالك سؤ ظن بهذا القدر ولا اليوم في الحياة العادية داخل الوطن اظن بالرجوع لكاريكيرات عزالدين ستجد فيها ايحاءات جنسية في بعضها دون حساسية اخلاقية مفرطة
| |
|
|
|
|
|
|
Re: ظرفاء المنبر (Re: معاوية الزبير)
|
كلام عجيب يا ود الزبير! انتو زمان الكورة كنتو بتلعبوها في دار الرياضة ولا ابوصليب اصلو؟ لايمكن ربط الرياضة بالجنس في اي سياق كان! بعدين الالفاظ كألفاظ بريئة من المعاني لكن السياق هو البحكمها, قولة أكل أو حش مثلا مرة تقولها في اي مكان ومرة تستحي من قولها امام الناس السياق يا قريبك
| |
|
|
|
|
|
|
Re: ظرفاء المنبر (Re: محمد البشرى الخضر)
|
يا ودو زووط عندها ايحاء جنسي فاحش . ولي الليلة لا تقال شفاهة منفردة بل معها تمثيلا بحركة اليدين والنصف الاسفل من الجسد وللمصادفة الصباح دة شفتها كدة فريقين اجنبين واحد مغلوب .. ومشجع بكاوي في مشجع وقال ليهو صوتا وتمثيلا زووووط شرطوكم شرط تلاتة مسامير زي السم الجوطة قامت ضربة جزاء وما ضربة الحركة جنسية مافي شك لأي مشاهد من بعيد وداك ما اخدها بحساسية اخلاقية عالية وقبلها منو كمكاواة ف شنو هي معروفة كدة لكنها مقبولة . والهظار بالاحياءات الجنسية منتشر في ثقافة الذكور دون ان يؤخذ ذلك بجدية مادام كان في اطار الهظار . والا فدون ذلك ممكن يحصل موت عديل
| |
|
|
|
|
|
|
Re: ظرفاء المنبر (Re: معاوية الزبير)
|
Quote: نفس منطق قولة "زوووط" بتاعة الكورة ! |
أها دي كمان يا ود البشرى في ثقافتنا - القال عليها ود الزبير - ما ليها أي مدلول غير المدلول الجنسي! أرأيت كيف تختلف الثقافات من منطقة لأخرى ومن جيل لآخر... أها مثلا في حاجة كدة فيها خمسين جاب سيرتها ودأبسن أنا لم أسمع بها من قبل أبدا واحتاج إلى قاموس حتى أعرف من القائل وما المناسبة على قولة الكرمي رحمه الله.
| |
|
|
|
|
|
|
Re: ظرفاء المنبر (Re: معاوية الزبير)
|
و لا زال ود الشري يبحث عن القشة التي ستنقذه من الغرق البروف قال ليك
Quote: (بيئة هذا الفهم بعض منطاق غرب كردفان) |
مالك اتجاهلت دي و جريت لي حتة تانية و الوقافي دي اكد سياقها و بيئتها بي "يد في الخد و يد في القد" غايتو يا الفقر انت تعبان تعب شديد عشان تجمل صورة الخراء و عايز الناس تشم ريحتو على انو فل و ياسمين ....
الوقافي دا معروووووووووف زي معروف ابوالحسن ....
| |
|
|
|
|
|
|
Re: ظرفاء المنبر (Re: ABUHUSSEIN)
|
ولا زال ابوحسين شايل بقجته وعايز يفرش يسترزق في طرف اي ملجة الحديث عام يا شاب وما عن حاتم انت بقيت لا ترى في الدنيا غيره! دي غبينة شنو دي اصلو
يا بروف اها انا بختلف معاك في زوووط ولا احس باي محمول جنسي لها عند استخدامها في سياقات غير في الكوتشينة لو سنفكت واحد او جريته خمسين بتقول ليه زووط بكل اريحية وهو يتقبّلها عادي و الحاضرين! هل هذا يُفهم منه اي محمول جنسي! معقولة بس
| |
|
|
|
|
|
|
Re: ظرفاء المنبر (Re: معاوية الزبير)
|
هههه السياق يا ود الزبير .. السياق ارجع لمثل الأكل و الحش القلتهم فوق وقايس عليهم الغزل وفض العذرية!
بديهي طبعا ومن المعلوم للجميع ولا داع للتذكير ان الجنس لا يمارس أمام الآلاف و في العلن ومنقول على الهواء وبالطبع لا يمارس بالكرة ومع خيوط الشبكة أو الحارس :)
| |
|
|
|
|
|
|
Re: ظرفاء المنبر (Re: محمد البشرى الخضر)
|
Quote: زووط عندها ايحاء جنسي فاحش . ولي الليلة لا تقال شفاهة منفردة بل معها تمثيلا بحركة اليدين والنصف الاسفل من الجسد |
لا لا يا قريبك دا براه - قولة زووط - وداك براه - حركة النصف الاسفل من الجسد . كل واحد براه وعادي بتتقال براها بدون حركات يد او جسد هي زووط اصلها شنو؟ مش تمثيل صوتي لحركة دخول, طيب دخول قون في شبكة هل فيه اي شكل من اشكال الجنس! أفااا
| |
|
|
|
|
|
|
Re: ظرفاء المنبر (Re: عبدالحفيظ ابوسن)
|
انا قلت ليك اصل الكلمة زيّها وزي تووش و زييط و بب و جب وجوووت الطريقة السودانية في تمثيل المؤثرات الصوتية تذكّر قولة الامير الأنصاري بتاعة ندقوكو دق ،نتفوكو تف ، نرجوكو رج ، نربوكو رب ، نشربوكو كررررررر و نبلوعكو زتتتت وتيب !
| |
|
|
|
|
|
|
Re: ظرفاء المنبر (Re: عبدالحفيظ ابوسن)
|
جميل أن نتحاور في الإطار الدلالي المشترك وكيف يختلف الناس من حيث البيئة والزمن.فبالنسبة لمن جايلتهم لا حرج في قول سلمت عليه وقافي أو قضينا الحفلة وقافي (لعدم وجود ما يكفي من الكراسي) وشلنا الفاتحة وقافي... وكنا في المرحلة الثانوية نصنف الطلبة إلى كرشجية (أدبيين) ودايات (علمي أحياء) وأدشنال (تخصص رياضيات)، وكلمة ود البشرى لا نقولها في الكورة أو في الكوتشينة (كلمة محظورة لأقل من تمنطاشر وأكثر من تمنطاشر!)؛ أما عبارة: "حني علي أنا يا تتي" فكانت تحرش جنسي عديل مثل تركشة الطاقية الحمراء وإيماءات أخرى...
| |
|
|
|
|
|
|
Re: ظرفاء المنبر (Re: محمد الأمين موسى)
|
يا ود البشرى انت ما مختلف معانا إنو أصل اللفظ جنسي ونحن ما مختلفين معاك إنو لكل مقام مقال
يا محمد اللمين، وقافي دي قد تكون بدأت كوصف حال عادي ومقبول اجتماعيا لكنها اخدت الإيحاء الجنسي لاحقا.. عكس ظووط تماما، بدأت جنسية ثم أصبحت مقبولة في سياقات جديدة
| |
|
|
|
|
|
|
Re: ظرفاء المنبر (Re: معاوية الزبير)
|
Quote: يا محمد اللمين، وقافي دي قد تكون بدأت كوصف حال عادي ومقبول اجتماعيا لكنها اخدت الإيحاء الجنسي لاحقا.. عكس ظووط تماما، بدأت جنسية ثم أصبحت مقبولة في سياقات جديدة |
الله زدنا علما (آخر عهدي بتتبع هذه السياقات التواصلية كان عام 1984 عندما غادرت إلى بلاد فاس الما وراها ناس وبقيت ثم لـ18 سنة متواصلة).
| |
|
|
|
|
|
|
Re: ظرفاء المنبر (Re: معاوية الزبير)
|
غايتو نحن بنستخدم وقافي دي للزيارات السريعة .. ياخي عليك الله أرح معانا والله زيارة وقافي
زمان قيقراوي نجر ليه مصطلح جميل لتمثيل تعامل السودانيين مع الدلالات الجنسية اسمه استئناس المصطلحات يعني زي كلمة ماسورة تبدأ من نكتة فاحشة الناس كلها عارفاها ثم تصبح كلمة عادية بستخدموها الصحفيين والنسوان في المجتمعات عادي
الجنس دة (الداير يشوفه بشوفه) حتى لو في ضمير زي ما ذكر اب سن فوقه وممكن ببساطة تعتبر ما بين القوسين تسديرة لكن المحك زي ما قال البشرى في السياق .. ما ممكن ناس تكون بتتكلم في موضوع عام وبراك من نفسك كدة تعتبر مصطلح توضيحي زي زووط خدش للحياء أو دلالة على عملية جنسية
| |
|
|
|
|
|
|
Re: ظرفاء المنبر (Re: عبدالحفيظ ابوسن)
|
Quote: الخواض مثلا يلتقط الإيحاء الجنسي في "الوقّافي"في حين فات عليه جلطة عبد الغني الكبيرة بتاعة "الكلجة" التي رآها الجميع تقريبا في حينها ول يعلّق عليها ! |
أنت كدة احترمتو شديد بلا استحقاق مفتي الغازات و(البراعات) دا، فهو من روج ليها هنا، العاجز هذا!
إذا كان هو أستاذ التبذل والانحطاط والفحش بطول تاريخ المنبر الأصفر دا، فطبيعي دي تكون (هواجسه)
إذا دي (مخرجاته الأدبية) في فضاء عام يضم (قارءاته) حتكون أسس تفكيره و (خيالاتو) شنو مخلوق بالخلفية (العقدية) دي؟ كلام زي دا مفروض الناس ما تدي قيمة لصاحبه، وما كنت مضطر أرد لولا أنو حيواصل لحد ما يجبر أبوسن يمنحه لقب (ظريف أيضاً)
دا واحد تبيعة سجـمان ساكت.
____ إذا ساء فعل المرء ساءت ظنونه!
| |
|
|
|
|
|
|
Re: ظرفاء المنبر (Re: حاتم إبراهيم)
|
ظنه في نفسه انه غير ذلك
والله صحي يا أب سن .. انا شايف نفسي سغيل جدا .. خخخخ وشايف مكاني في بوست ود المدير .. بالمناسبة ذاك المنتدى لا يُعوض أبدا .. كان شيء فوق الخيال .. حتى المشاركين ما كان عارفين قيمته قدر شنو .. ولا حتى مدنو قدره وقيمته عشان كده انتهى سريع .. بعدين من قولة تيت لمن جيت فرزتك في كوم براك .. اكتر حاجة كانت عاجباني فيك انك كنت قادر على احتواء .. الزعلان - والمتفلت - والبذيء والجاي للخراب .. اي صنف كنت قادر على احتواءه وتقعيده في مكانه .. كنت خيت شلة ومرق وركازة بيت .. من قل اهتمامك بالمنبر وزهدت فيه راح في دوكه .. بالمناسبه انا متذكر زهدك كان قبل الجوطة ديك .. صحي انا بتذكر ولا تفوتني كثير من المواقف .. أتوقف عندها وأعلق لمن بيني وبينهم ود .. وبعمل أضان جلد للشايفه ما بدورني أو لا ود بيننا .. لكن انت فوق لي ده قادر على التواصل مع الكل .. وبتقدر تفج ليك نفاج بينك وبينه وتخش منه .. سلمت يأخ وده من نباهتك الواضحة جدا .. لانك بتنتبه حتى لردود الأفعال مش الافعال بس .. وقادر تربط بين المواقف .. حتى لو كان الطرف التاني حدث قبل فترة مقدّرة ..
شاكر يا أب سن وجودي في قائمتك ....
| |
|
|
|
|
|
|
Re: ظرفاء المنبر (Re: جمال ود القوز)
|
سلام عبدالحفيظ شكرا على البوست خفيف الظل وعلى مهاره القياده وانت تتجنب المزالق والدقداق وهى مفاجأت متوقعه فى بوستات سودانيزونلين متعدده الاغراض تعجبنى استماتت ود البشرى فى الدفاع عن فكرته رغم دلاله الكلمه فى الثقافه الذكوريه فى معظم السودان بل واقترنت ب الكوره والكتشينه لمكاواه المهزوم إلا أن ود البشرى يصر على القرينه او السياق العام ولعله لايدرى ان المفرده الشهيره تضخمت وملئت حيز فى اللاوعى الذكورى لتتجاوز سياج الجمله إلى صور نمطيه فى ذهن المتلقى فى لا زمن ولا تفكير فيفهم دون عناء انه بلغ غايه الهزيمه هههههه اللغه ودلالتها حقل معرفى ممتع يا ليت اصحاب التخصص والمهتمين يفيدونا اكثر
| |
|
|
|
|
|
|
Re: ظرفاء المنبر (Re: جمال ود القوز)
|
الثنائي أبو حسين وود البشرى .. انا بديهم صوتي انهم أظرف اتنين في المنبر ده .. بينهم حوارات تحت تحت تخليك تتابعها وانت مجبر .. وعشان تقدر تربط الكلام بالمواقف السابقة .. والله مرات الا ترجع الارشيف .. وانا حقيقة مرات بعمل كده ... لمن اكون غايب او فاتني الموقف .. المشار اليه في التلميح .. مابرضى تفوتني الحتة الفيها الطرفه .. تتعب عشان تضحك لكت الضحك يستاهل يتعبو ليهو .. بالذات مع رهق الحياة وجري الشغل المابخلص
ـــــــــــــــــــــــــــــــــــــــــــــــــــــــــــــ لكن ود البشرى بالغ يا أب سن .. في حكاية صوت دخول الكورة للشبكة دي .. خخخخ يا جماعة زول ينادي لينا صاحبي ظريف المنبر .. طلحة عبد الله .. خلي اليجي يشوف حكاية صوت الكورة دي .. ربما نحن علطانين في تقديرنا للصوت ده .. هههههههههه .. أو يققعد لينا ود البشرى ده في علبو .. وهو قادر على ذلك .. خخخخخخخخخخ
| |
|
|
|
|
|
|
| |