|
|
|
 Re: نداء لأحبابنا المهندسين .. أرجو المساعدة .. (Re: علي عبدالوهاب عثمان)
|
مرحبتين أخ علي ...
أنا لست معماري -- ولكني أحذرك من لغة (( السماسرة)) في السودان
مصطلح load bearing يستخدم بصورة (مطاطية) جدا ..... مرة عرض علينا منزل (لودبيرنق) - عبارة عن ((أعمدة وحوائط)) وصبة للطابق الأول - ((الأعمدة قائمة علي ال قريت بيم )) وليس من الأرض الثابتة ....
عموما لايمكن أن يفتيك اٍلا مهندس معماري - بعد فحص المنزل والوقوف علي المواصفات الفنية ...
أتمني لك كل الخير
| |
 
|
|
|
|
|
|
|
|
Re: نداء لأحبابنا المهندسين .. أرجو المساعدة .. (Re: عمار قسم الله)
|
حبيبنا عمار .. شكراً كثير على الاستجابة ..
نحن ناس ضواحي الدنيا .. ناس جالوص وطوب أحمر ..
خبراتي زيرو في العاصمة ..
أريد أن أجمع شوية معلومات كخلفية ..
صدقني الايامات النصب والاحتيال بقت شطارة ومحمدة في الوطن ( أستغفر الله )
شكراً .. على الاستجابة ( الفزع )
مودتي
| |
|
|
|
|
|
|
|
|
|
Re: نداء لأحبابنا المهندسين .. أرجو المساعدة .. (Re: علي عبدالوهاب عثمان)
|
اللود بيرنق مقصود بيه بيت مبنى بدون اعمدة خرسانية وبالتالى يتم تحميل المبنى على الحوائط بدلا عن الاعمدة المسلحة ويتميز بقلة التكلفة مقارنة مع
المسلح ويمكن ان يحمل طابق اضافى فوق الطابق الارضى ويكون سقفه من الخرسانة .الفرق بين المسلح واللود بيرنق فى حدود 20% فقط
ولكن شراء البيوت الجاهزة مغامرة خاصة ان كان البيت تم بناؤه بغرض المتاجرة حيث لا يتم الالتزام بأفضل الممارسات ولا افضل المواد والمواصفات
وبالله التوفيق
| |
|
|
|
|
|
|
|
|
|
Re: نداء لأحبابنا المهندسين .. أرجو المساعدة .. (Re: علي عبدالوهاب عثمان)
|
اللود بيرنق مقصود بيه بيت مبنى بدون اعمدة خرسانية وبالتالى يتم تحميل المبنى على الحوائط بدلا عن الاعمدة المسلحة ويتميز بقلة التكلفة مقارنة مع
المسلح ويمكن ان يحمل طابق اضافى فوق الطابق الارضى ويكون سقفه من الخرسانة .الفرق بين المسلح واللود بيرنق فى حدود 20% فقط
ولكن شراء البيوت الجاهزة مغامرة خاصة ان كان البيت تم بناؤه بغرض المتاجرة حيث لا يتم الالتزام بأفضل الممارسات ولا افضل المواد والمواصفات
وبالله التوفيق
ـــــــــــــــــــــــــــــــــــــــــــــــــــــــــــــــــــــــ
بالإضافة إلى ما ذكر بعاليه
المسلح يمكنك تعديل التفاصيل الداخلية في اى وقت حتى أثناء السكن ،، يعنى لو عاوز تلغى غرفة أو تزيد غرفة أو بناء حمام بين غرفتين أو اى تعديل
يمكنك ذلك بكل سهولة ،، ولكن في اللودبيرنق لا يمكنك ذلك ،، التصميم الذى بنى به خلاص مافى فكاك منو ،، وتانى لو حصل أي شق أو تلف في أحد
الجدران يمكن أن يؤقر ذلك على كل المبنى .
وحسب الوصية الفوق الفرق بيجى فقط في الحديد والأسمنت وهو في حدود 20% فالأفضل لك أن تختارالمسلح
| |
|
|
|
|
|
|
|
|
|
Re: نداء لأحبابنا المهندسين .. أرجو المساعدة .. (Re: Mahir Mohammed Salih)
|
مودتي الحبيب ماهر ..
صدقني يا ماهر عمك علي بس أطرش في الزفة لم أكن ملم
بكل هذه الحقائق .. نصائح ومعلومات مهمة جداً ..
المنظر الخارجي في الموقع اللالكتروني للموزع العقاري حاجة جميلة جداً ..
أشكركم كثير كثير .. لقد بدأت تتكون عندي خلفية ومعلومات
يمكن أنطلق منها .. لأن هذا المجال فيه تماسيح ..
مودتي الحبيب ماهر ..
| |
|
|
|
|
|
|
|
|
|
Re: نداء لأحبابنا المهندسين .. أرجو المساعدة .. (Re: علي عبدالوهاب عثمان)
|
بالتوفيق علي
اهم الاشياء التي يجب مراعاتها في اللود بيرنق
ان يكون عمق الاساسات للارض الثابتة يفضل ان يكون متر ونصف
ان كانت مباني الاساس من الحجر يجب ان تكون بالاسمنت
الحوائطة الحاملة الافضل ان تكون من الاسمنت بدل عن المونة الطين
بعد داك تشوف سعر القطعة وان كان المبني بالمواصفات اعلاه توكل
| |
|
|
|
|
|
|
|
|
Re: نداء لأحبابنا المهندسين .. أرجو المساعدة .. (Re: khaleel)
|
مودتي خليل .. ربنا يحفظ ليك حفيدتنا الحلوة دي ..
شكراً على النصائح القيمة ..
بالمناسبة أنا بطبع اي مداخلة في البوست ..
عشان يكون عندي ملف .. ولكي أستطيع أن أسأل ..
لأن سوق العقار خطر جداً ..
يا سلام كلها ساعات الواحد بقى عندو معلومات في غاية الاهمية ..
جزاكم الله خير ..
حبيبنا خليل .. غلاء شديد في المباني ..
ونحن ناس ضواحي الدنيا ما بعدين من أسوان .. قلت يا زول القاهرة أرخص وأضمن .. ولكن الوطن ..
مواقع العقارت المصرية الشقق أقل من ربع التكلفة في السودان .. برضو نقول الوطن ..
مودتي .. شكراً خليل وقبلاتي للامورة ربنا يخليها ليك ..
| |
|
|
|
|
|
|
|
|
|
Re: نداء لأحبابنا المهندسين .. أرجو المساعدة .. (Re: khaleel)
|
سلامات علي أمبس ..
ما أنت براك أهلنا كلهم بنفس صفاتك دي حتى لو كانوا متعلمين أو مهاجرين أو ترابلة ..
حسب كلامك الفوق البيت البتسأل عنه تحت التشييد وفي منطقة سكنية لا أعلم إن كانت جديدة أم قديمة ..
ملاحظة أختنا بت الحاج مهمة جدا ..
نصيحتي ليك إن كان لا بد من شراء الجاهز خت في أجندتك الملاحظات التالية :
1 ـ أبحث في الأحياء السكنية القديمة وأبعد قدر المستطاع من الخطط السكنية الحديثة والعشوائية ما لم تكم الخطة منفذة بواسطة شركة بناء ..
2 ـ ابحث عن المباني التي بنيت قبل 85 وتحت أسوأ الفروض قبل التسعينات حتى لو كانت طوب ساكت ..
ربنا ييسر ليك لكن مع احترامي انت تأخرت كتير في المسألة دي الظاهر ما كنت عايز العاصمة .
| |
|
|
|
|
|
|
|
|
|
Re: نداء لأحبابنا المهندسين .. أرجو المساعدة .. (Re: محمد على طه الملك)
|
الملك امبس .. كيف حالك ..
تعرف أنا في الاجازة بنت أختى ترافقني في كل المشاوير
لأن الثقافة المدينية مهمة جداً وخاصة في الصفقات عقارية أو تجارية ..
تعرف أنا إتأخرت عشان قصة الوكيل وما وكيل .. لكن ناس إجازة ستة شهور ما عندهم مشكلة
والحكاية لو بقت مجهجهة ( أسوان ) .. أيقونن إقتي ..
فكرة شراء المباني القديمة وتجديدها برضو خيار موجود كما ذكر لي أحد الاخوان ..
أنا ما بحب السكن في المدينة .. ولكن الجامعات وكده ..
سكني فوق الحواشة في البرقيق وأزور الجماعة كل فترة ( إن شاء الله لو في العمر بقية )
مودتي .. أكثر ما أعجبني في هذا البوست حرصنا على البعض .. رب أخ أو اخت لم تلده أمك
شكراً بكري على هذا العالم الجميل .. والايثار ..
صحيح نحن جميلين ..
مودتي
| |
|
|
|
|
|
|
|
|
|
Re: نداء لأحبابنا المهندسين .. أرجو المساعدة .. (Re: سيف الدين محجوب)
|
انظر لحال التعليم والصحة والشوارع والخدمة المدنية
حال البناء في السودان لا يختلف ابدا
نظام الحوائط الحاملة (load bearing walls) نظام ممتاز للبناء
ولكن كحال الي حاجة في السودان يساء الله!
عموما - من اجل الفائدة العامة - مجموعة نصائح كتبتها لمجموعة في الفيس يمكن تفيد.
Quote: نصائح لعامة الناس العايزة تبني
- اهتم بالخرطة جدا جدا جدا جدا وما تخليها على المهندس او المقاول - افهم الخرطة جيدا قبل ما تنتقل لمرحلة اخرى! - اديها حقها من الاهتمام وما تستهون بيها. انتبه لوضع الفرش في الغرف والهول والحمامات والطبخ، راجع توزيع مفاتيح الكهرباء واللمبات والمراوح وضع المكيفات وتهوية واضاءة الغرف المختلفة - استفسر عن اي حاجة حتى مقاسات البلاط .
- لو عايز تبني لودبيرنق اكثر من طابق - ما تبني مونة عادية - ابني مونة حرة.
- ما تستخدم البلوك الاسمنتي (المفرغ) لأي مبنى مسقوف خرسانة - ممكن تستخدمه للتقفيل فقط وليس كحاوائط حاملة.
- عليكم بالاهتمام برش الخرسانة جيدا
- مافي داعي تبني بأعمدة لو ما حتبني أكتر من تلاتة طوابق ( البيوت خاصة).
- اطلب من بتاع الطوب يجيب ليك طوب 20 سم ما طوب 18 سم
- استخدم ردميات (خرسانة ترابية) وعلى طبقات وما تستخدم ناتج الحفر - خاصة داخل المبنى.
- اهتمو برش مباني المونة الحرة والبياض بصورة كويسة
- حاول انو غرفة النوم ابعادها ما تقل عن 4 امتار في 4 امتار وكذلك الهول.
- الحمامات اعملو ليها شبابيك كافية للاضاءة والتهوية ( مثلا 60سم في 60سم) غير فتحة مروحة الشفط. خلو الشمس تضرب جوه وما تخلو الحمامات كئيبة.
- حددو اماكن فتحات المكيفات واتركوها مفتوحة بدل التكسير بعد البناء!
- مواسير صرف مياه الامطار الطالعة من الاسقف والبلكونات بتشوه المبنى بشكل كبير - حاول تعمل ميول واختصر مواسير صرف مياه الامطار اقل ما يمكن ونزلها في الواجهة الجانبية او الخلفية - وكذلك مواسير المياه والصرف الصحي يجب ان تكون مخفية قدر الامكان وما في الواجهة الرئيسية.
- عرض السلم اقل حاجة متر ويا حبذا لو كان 110 - ارتفاع الدرجة ما تزيدوه عن 16 سم وعرضها ما يقل 28 سم - رغم انو الصحيح يكون عرض الدرجة ضعف الارتفاع ( والاسلم 15 للارتفاع و 30 للعرض)
- استخدمو الجرانيت للادراج بدل الرخام - اينعم اغلى شوية - بس بستحمل كتير وما بتكسر بسهولة.
- الديكورات الجبصية الكتيرة والالوان الكتيرة بتزحم المظهر للمبنى حاول تحصر الالوان في لونين بالكتير - اللوان الفاتحة بتفتح النفس وتساهم في نشر الضوء.
العزل المائي للحمامات والسقف حاجة مهمة جدا - لولا المشقة المالك مفروض يقيف فيها بنفسك ويستخدم مواد ممتازة |
| |
|
|
|
|
|
|
|
|
|
Re: نداء لأحبابنا المهندسين .. أرجو المساعدة .. (Re: أيمن محمود)
|
علي أمبس .. سرن اقمندو ..
سرن بيكمندو يا متابعين ..
نظام اللود بيرنق نظام بناء ممتاز ..
لكن نصيحة لا تشتري بيت جاهز لازم تكون واقف بنفسك ..
لان اللود بيرنق أهم شي فيه هو عمق الأساس وترابطه كذلك ..
يعني مثلا الخرطه تتوضع كلها مرة واحدة ويتم تنفيذها مرة واحدة ..
وعمق الأساسات يكون متر ونصف وتحت يترمي حجر جبل صلد ..
بعد كده ياخذ قريت بيم 80 سنتمتر بعد داك تتعمل قصه عالية ,,
أنا غايتو عملتها 7 مداميك خليت البيت كله عالي وربنا يعينك في الردمية ..
يعني حتحتاج لي 15 قلاب ردمية 18 متر .. وميلان للحوش للتصريف ..
وتاني ما حيكون عندك شغله بالمطر وأي مستوى مويه مرتفع ..
ولاتنسى البناء في الطابق الفوق يكون بنفس الخرطة التحت ..
قالوا مش مهم بيم وسط لكن انا عملتو زيادة في ترابط البناء ..
ولاحتفرق وقتها تبني مونة ولا مونة حرة .. والبنيان طوبة ونص ..
ولا انصح بالبلوك بالذات في الطابق الأسفل فوق ربما ..
المهم بياض جيد ومتين وتناسب الرمل والأسمنت فيه زيادة ..
حديد التسليح والأسمنت أبحث وأسأل عن الامتن والأقوى وجيبه مرة واحدة ..
حتى رمل الصبة جيب النوع المخصوص للصبات بالذات التحت ..
ربنا يوفقك ... ولا تشتري جاهز .. الناس بقت صعبة ..
ولا تضع حساب للقروش وانت بتبني وعلى الاطلاق ..
لانها بتروح وتجي لكن البيت بالمواصفات المتينة ليك وللعيال ..
مع تمنياتنا لك بالتوفيق ..
البندر لابد منه يا علي والبجيبك ليهو كتير ..
فلابد من بيت في الخرطوم ..
ولا ننسى ان نشكر ونثمّن وجودك الجميل بالمنتدى ..
وتعليقاتك التي تذكرنا ناسنا الحلوين في البلد ..
والنيل والنخيل حيث الواحد ما بيشيل للدنيا هم ..
تنوم في أي مكان يلاقيك في ( السيوه )..
وتاكل في أي بيت من طرف ..
أأأأيه زمن ...
إلاهي أكي جازيرو ووو امبس ...
| |
|
|
|
|
|
|
|
|
|
Re: نداء لأحبابنا المهندسين .. أرجو المساعدة .. (Re: علي عبدالوهاب عثمان)
|
جمال امبس .. سيرناقمي ..
يا سلام يا جمال .. شكراً لمجهودك ..
دي إستشارات حتى بالفلوس الواحد ما يلقاها ..
عاجز عن الشكر ..
صدقني يا جمال .. كل النصائح والاستشارات عملت منها كتيب صغير
دليل لكل الاخوان والابناء .. ومناقشات الاخوان في هذه الايام هي العودة
كل نهاية اسبوع نقاشات في الجمعية عن البناء والشراء ..
عاجز عن الشكر
مودتي ..
| |
|
|
|
|
|
|
|
|
|
Re: نداء لأحبابنا المهندسين .. أرجو المساعدة .. (Re: علي عبدالوهاب عثمان)
|
مسكافي علي عبد الوهاب عثمان
من بكرة بتعلم الرطانة عشان ترد علينا
Quote: ربنا يوفقك ويسهل ليك بيت الاستقرار نصيحة لوجه الله اياك والجاهز ... اشتري قطعة الارض والأراضي مافي مشتري الان الاسعار نازلة .. واشرف لوحدك على البنيان .. واكرر اياك والجاهز .. في تلاااااعب كتير في مواد البناء ... والسودان ما ياهو السودان الخليتو زمان
|
| |
|
|
|
|
|
|
|
|
|
Re: نداء لأحبابنا المهندسين .. أرجو المساعدة .. (Re: علي عبدالوهاب عثمان)
|
التحية والشكر للاخوان والاخوات على المشاركة والنصائح ..
منزل ( لود بيرنق ) في حي النصر ( ثلاثة ) غرف مع الخدمات المساحة (300) متر
القيمة المطلوبة تساوي ( مليار وستمائة مليون ) جنيه سودني .. تقريباً حوالي ( 400) الف ريال سعودي
ياجماعة أنا عملت مقارنة في السعر والفرق الشاسع في الخدمات والبيئة والبنى التحتية ما بين حي النصر ومدينة جدة
فوجدت : الشقة شمال جدة ثلاث غرف خدمات 300 ألف ريال وعلى الخط السريع أقل .. حسب مكات العقارات ويمكن ارخص كمان
مقارنة مع مصر : أنا أبن عمي من أم مصرية يقول ( هذه القيمة تساوي قمية 4 او 5 شقق ) في حي الفيصل بالقاهرة ( الشقة = 82 الف ريال ) كما اشتراها هو ( رغم الزحمة )
ممكن شقة في الزمالك والباقي ( 600 مليون ) مصاريف مليون في الشهر ( يعني معيشة 50 سنة ) وأنت نايم ..
يا جماعة الحاصل شنو .. ؟؟
مودتي ..
| |
|
|
|
|
|
|
|
|
|
Re: نداء لأحبابنا المهندسين .. أرجو المساعدة .. (Re: علي عبدالوهاب عثمان)
|
الان معظم البناء في السودان ( لود بيرنغ) حيطان حاملة
لابد من مهندس يفحص البناء
ولا بد من التاكد من صاحب البيت ومعرفة تفاصيله اذا كان تاجر عليك الانتباه
لكن اذا بنى لنفسه ولديه ظرف فهذا اقرب للحقيقة ولكو بعد فحص المهندس
معرفة المنطقة وطبيعتها
هناك شركات مضمونة تشتري لك وتبنى وتسلمك بهامش ربح مناسب
اعرف احدهم اكثر من مضمون واثق به تماما اذا لديك وقت للبناء ومبلغك جاهز نحولك له علي مسؤليتى
| |
|
|
|
|
|
|
|
|
|
Re: نداء لأحبابنا المهندسين .. أرجو المساعدة .. (Re: علي عبدالوهاب عثمان)
|
التحية والشكر للاخوان والاخوات على المشاركة والنصائح .. منزل ( لود بيرنق ) في حي النصر ( ثلاثة ) غرف مع الخدمات المساحة (300) متر
القيمة المطلوبة تساوي ( مليار وستمائة مليون ) جنيه سودني .. تقريباً حوالي ( 400) الف ريال سعودي ياجماعة أنا عملت مقارنة في السعر والفرق الشاسع في الخدمات والبيئة والبنى التحتية ما بين حي النصر ومدينة جدة
فوجدت : الشقة شمال جدة ثلاث غرف خدمات 300 ألف ريال وعلى الخط السريع أقل .. حسب مكات العقارات ويمكن ارخص
كمان مقارنة مع مصر : أنا أبن عمي من أم مصرية يقول ( هذه القيمة تساوي قمية 4 او 5 شقق ) في حي الفيصل بالقاهرة ( الشقة = 82 الف ريال ) كما اشتراها هو ( رغم الزحمة )
ممكن شقة في الزمالك والباقي ( 600 مليون ) مصاريف مليون في الشهر ( يعني معيشة 50 سنة ) وأنت نايم .. يا جماعة الحاصل شنو .. ؟؟
==============================
لماذا هذا الغلاء وارتفاع في الاسعار ..
هل لأننا كما قال الراحل على مك ( مدينة من تراب ) ..
ربما لأن ثقافة الجالوص والطوب العادي هي التي كانت الغالبة في البناء في السودان
وأحسب أن عدم وجود عمالة ماهرة في البناء الاسمنتي هو السبب .. لأنني ألاحظ هنا في جدة أن العمالة السودانية غائبة تماماً
في البناء والتشطيب والنجارة .. إلخ فقط تجد لديهم ( شاحنات ، دينات ) تنقل مواد البناء والاسمنت وتجده جالس في كبينة القيادة
مع الجوال وحتى لا يشارك في التحميل والتفريغ .. ليت كل شبابنا من يعملون في بعض الاعمال الهامشية أنخرطوا في مثل هذه النشاطات
الواحد فيهم كان بقى معلم كبير ومقاول في السودان .. العمال المصريين لديهم خبرة عالية جداً وكذلك الباكستان .. في عمل الصبات والبيم
ولياسة والديكورات ... إلخ ، المصري عماد زميلي في المكتب ( محاسب ) يقول : يا عمي سيبك بلا مهندس شوف لك معلم عندو خبرة وخلاص
يا شباب عمكم علي بقى باحث أجتماعي .. أمس في قهوة الهنداوية الشباب رفعوا ضغطي
حسن سائق خاص : ( يا عمي علي إنت عشان بيتك تقعد تقول لينا إشتغلوا أسطوات بدل سائق خاص ) ههههههه
يا عمي نحن جينا هنا عشان نشتغل طيانة لا شنو .. ( بعدين حسن زول خطير ما شاء الله .. لسان وهو فاكهة الجلسات في القهوة )
مودتي .. وأجزل الشكر لهذا الفزع والنفير .. تدوم الاخوة ..
| |
|
|
|
|
|
|
|
|
|
Re: نداء لأحبابنا المهندسين .. أرجو المساعدة .. (Re: عماد الدين الطيب عمر)
|
مودتي الحبيب عماد الدين .. شكراً على هذا الاقتراح الجميل ..
أذكر يا عماد زمان ناس أبوي رحمه الله عليه كانوا يحكوا عن قهوة عماد الدين في القاهرة
رحمهم الله ..
على نظرية مصر لو ما تغنيك تستر حالك ..
كده برجع لأهلي هناك ونتواصل معاهم .. من قسطل لحد بيتنا في البرقيق 3 ساعات ..
عماد الدين الحبيب .. فتحت مجال واسع من الخيارات ..
| |
|
|
|
|
|
|
|
|
|
Re: نداء لأحبابنا المهندسين .. أرجو المساعدة .. (Re: علي عبدالوهاب عثمان)
|
شوفو اللودبيرنق ده جميل كيف.. العايز يشتغل لودبيرنق يشتغل زي ده ولا بلاش
بالاضافة لما ذكر عاليه
من المعروف عن فوائد اللود بيرنق انه فى حالة الزلازل اكثر امانا من الهياكل الخرصانية بسبب احتماله للقوة الافقية و مقاومته لها
يجب فحص التربة اولا لمعرفة البيرنق كباستي و عليه يحدد عمق الاساسات لذلك يجب الاستعانة بمهندس انشائي
| |
|
|
|
|
|
|
|
|
|
Re: نداء لأحبابنا المهندسين .. أرجو المساعدة .. (Re: هشام المجمر)
|
حبيبنا هشام .. روعة ..
البيت ده وين عندنا في السودان .. الطوب الاحمر لا يفقد روعته ..
المشكلة يا هشام التكلفة عالية من غير الارض أقل شيء 300 ألف ريال سعودي
مودتي هشام ..
أخوي هشام أنا مبسوط لأن الناس ما زال فيهم الخير والاخوة
كل واحد يخاطبك كأن الواحد والد أو إبن ..
شكراً سودانيز
بالمناسبة البوست ده مفيد لكثير من الاخوان في الخليح
كتمت .. وموسم العودة إلى الوطن ..
| |
|
|
|
|
|
|
|
|
|
Re: نداء لأحبابنا المهندسين .. أرجو المساعدة .. (Re: علي عبدالوهاب عثمان)
|
اخونا علي عبد الوهاب
اقع اهلك المحس في شرق النيل شغلهم كلو نضيف ودغري ... الزول الاشتريت منو قطعة الارض في حي النصر محسي وااااضح ودغري ... امشي عليهم ما بتجيك عوجة تب ... واياك وتشتري جاهز ... الجاهز بجهز عليك ... وحي النصر جمييييل ومستقبله ممتاز ...
والعارضو اخونا ود المجمر دا الطوب الطابوق من الداخل فاوه فارغ ممكن بمرور الزمن يفرطق .. اقع الطوب الاحمر بتاع الكماين
وربنا يوفقكم
| |
|
|
|
|
|
|
|
|
|
Re: نداء لأحبابنا المهندسين .. أرجو المساعدة .. (Re: خال فاطمة)
|
حبيبنا خال .. فاطمة يا سلام أحفادي ديل ربنا يخليهم ليك .. ما شاء الله ..
نحن ناسنا كلهم في الحاج اليوسف ومناطق حولها ( شرق النيل ) .. حبابهم أهلنا المحس
صدقني عمك علي كان خالي ذهن من اي معلومات لكن أول مرة أعرف فائدة سودانيز
وأمثالكم وكل من شارك في هذا البوست ..
أنا مبسوط جداً .. الاراء والاستشارات التي وجدتها هنا أفضل من الاسئلة التي أوجهها لناس الخرطوم
واهلنا هناك .. الواحد ما عارف مستعجل ولا ما عندو معلومة .. ولكن الحمدلله ..
شكراً كثير .. إن شاء الله البوست يكون مرجعية لكل الاخوان .والابناء
مودتي .. خال فاطمة وسلامي لأحفادي الحلوين ديل ..
| |
|
|
|
|
|
|
|
|
|
Re: نداء لأحبابنا المهندسين .. أرجو المساعدة .. (Re: علي عبدالوهاب عثمان)
|
بوست مفيد....
أستاذ / علي عبد الوهاب ...
أسعار الأراضي في هبوط خاصة شرق النيل ...
أنتظر حتى بعد شهر 7 .... هناك توقع لهبوط أسعار الأراضي....
للسكن أفضل شرق النيل تلقى حي الهدى (10-11- لغاية 14).
وهو موازي للنصر مربع (1)(2) ... أسعاره مناسبة حتى (400 - 450) مليون ....
وأبني بمزاجك التكلفة لا تتجاوز المليار مع قيمة الأرض....
| |
|
|
|
|
|
|
|
|
|
Re: نداء لأحبابنا المهندسين .. أرجو المساعدة .. (Re: ahmedona)
|
أحمدونا حبيبنا .. مودتي ..
يا سلام على المعلومات ..
لكن يا أحمد معقول حاجة ترخص تاني في السودان ..
في ناس تماسيح واصحاب نفوذ .. ما أظن أن هناك عرض وطلب ..
هي مبالغات ..
أحمدونا الحبيب .. جميل رأيك لأنني ما زلت في طور البحث والتقصي ..
لكن بصراحة البوست ده مدرسة عديل .. سودانيز فيه ناس يعرفوا خبايا المواضيع ..
شكراً احمدونا وباقي الاخوان والابناء والاخوات
مودتي .. احمدونا .. يعني ناسنا هنا عندهم اراضي في شرق نقول ليهم يعملوا حسابهم .. ويتابعوا الوضع والاسعار
أهلنا معظمهم في شرق النيل ..
شرق نيل يعني الحاج يوسف ، الفيحاء ، والنصر .. هل حلة كوكو وكوبر كمان شرق النيل ..
| |
|
|
|
|
|
|
|
|
|
Re: نداء لأحبابنا المهندسين .. أرجو المساعدة .. (Re: علي عبدالوهاب عثمان)
|
أستاذ الأجيال المربي الفاضل علي سلا وتحية لأهل قاشا
بوست مفيد جدا بالنسبة لي عندي تجربة مريرة مع البيوت الجاهزة
فأحسن تبعد من الجاهز ولو بقيت علي البنيان أقيف بي نفسك والله ييسر أمورك
بس إنت عندك حواشة في البرقيق وما بين قاشا والبرقيق تعيش متعة الدنيا وراحة
البال مالك ومال العاصمة ... هرتوم منلي ... أو كما قالت والدتي الله يديها العافية
عندنا حواشة علي بعد عشرة دقايق بالعربية من سوق البرقيق معروض للبيع بسعر مغر
ممكن نديك المواصفات في مداخلة تانية لو عند زبون وكتر خيرك
وسلام وتحية لضيوف البوست الكرام
| |
|
|
|
|
|
|
|
|
|
Re: نداء لأحبابنا المهندسين .. أرجو المساعدة .. (Re: محمد محمد قاضي)
|
حبيبنا قادنتود .. سيرناقمي .. يا أخي شكراً كثيراً على هذه العبارات الجميلة ..
الهرتوم بقى إستثمار لازم بيت في الهرتوم .. بعدين الأولاد والجامعات ..
بيت في الهرتوم بقصد الايجار .. عشان تقدر تعيش في البلد كويس ..
بالنسبة للحواشة في البرقيق .. إذا حوشاتكم في مشروع البرقيق ( مليارات على طول )
إذا فوق من مشروع البرقيق ( مشروع مايو على الأقل نص مليار ) بعد عرب البشارية ( 300 -250 مليون )
الأرض في البرقيق غالي جداً داخل الحلة وفي السوق وفي المشروع لأن البرقيق فيها كثافة سكانية ..
ارتقاشا وكرمة والحواشات ( مكتظة ) ..
لازم تأخذ جولة في البلد .. تمشي البرقيق تلقى المحامي عمر على الزين .. ممكن يجيب ليك زبون مريش ..
شخصياً أنا ما بقدر أعيش في العاصمة إطلاقاً لكن للاولاد ومصدر دخل يوماً ما ..
تحياتي قادنتود .. تعرف الوكيل حتى لو أخ ما يجيد الادارة والعمل ...
نحن هنا في الغربة إتعلمنا الكثير في الشركات والاحتكاك مع الاخرين .. بقينا نعرف دراسة الجدوى والتكلفة .. إلخ
مودتي ومليون شكر لسودانيز وكفيلنا بكري ههههه
| |
|
|
|
|
|
|
|
|
|
Re: نداء لأحبابنا المهندسين .. أرجو المساعدة .. (Re: علي عبدالوهاب عثمان)
|
أأأأأألي ... ابونيننقاااا ... سكرفي ...
انا عن تجربة ... اللودبيرنق ... جميل .. وغير مكلف .. وسريع للتسليم ..
وكانت لي قطعة ارض في جبرة البجراوية .. 425 متر
بنيتها لودبيرنق .. 3 شقق في الأرضي و3 شقق في الأول لغرض الاستثمار ..
والتكلفة ما وصلت 500 مليون ... ( هذا الكلام قبل خمسة سنوات تقريبا )
فانا انصحك .. لا تشتري جاهز لا بعد استشارة احد الأقارب المهندسين المختصين
ولربما تكون هناك عيوب بالعقار .. وتخسر مبالغ كبيرة لاصلاحها ...
بحثت لك عن صورة للبيت وهو تحت الانشاء .. ..عشان تتنور .. وربنا يوفقك ..
عالم بطااالــــــــــــــــة ,,
| |
|
|
|
|
|
|
|
|
|
Re: نداء لأحبابنا المهندسين .. أرجو المساعدة .. (Re: محمد مجيدو)
|
ووو مجيدو .. ووو أشري .. مسكاقمي ..
ده شغل جميل .. صحيح تنفيذ العمل يتوقف على المهندس المشرف يكون من الأقربين أحسن
تعرف يا مجيدو أنا مبسوط عشان إستفدت كثير من تجربة الاخوان .. وكمان بالصور ..
طبعاً إعتمادنا بعد الله يكون على ابناءنا في الخرطوم .. لأن ثقافة العاصمة مهمة جداً .. ولازم الواحد يكون خبرة
في التعامل .. لأننا طول حياتنا كنا في جغرافية وحاضنات مغلقة .. تتخيل أنا ما قدرت في إجازتي إستأخر أمجاد
أولاد اختي عملوها نكته في واتساب .. المدينة لازم خبرة ومعايشة .. كم واحد من جماعتنا خسر أموال كبيرة بسبب عدم الخبرة والثقة العمياء
جزاك الله خير مجيدو .. يا زول يا أصيل ..
تجربتك جميلة ومفيدة لأنها مصحوبة بالتكلفة ..
هيروو تيق ووو مجيدو أشري
| |
|
|
|
|
|
|
|
|
|
Re: نداء لأحبابنا المهندسين .. أرجو المساعدة .. (Re: علي عبدالوهاب عثمان)
|
أسعار الأراضي في هبوط خاصة شرق النيل ...
أنتظر حتى بعد شهر 7 .... هناك توقع لهبوط أسعار الأراضي....
====================
حبيبنا أحمدونا .. وينك يا لحبيب ..
نقلت كلامك أعلاه حرفياً لأهلنا في جمعية جدة ..
طلبوا مني إثبات لأن معظم الشباب عندهم أراضي شرق النيل ..
تعال أدينا كلمتين كده عشان نعطيهم حقائق وتكون في صالحهم ..
مودتي أحمدونا الحبيب ..
| |
|
|
|
|
|
|
|
|
|
Re: نداء لأحبابنا المهندسين .. أرجو المساعدة .. (Re: علي عبدالوهاب عثمان)
|
هناك خالات لودبيرنق ممتازة جدا ولكنها نادرة
مثال في ابوسعد جوار جامعة ام درمان الاسلامية
هناك اكثر من بيت طابقين لودبيرنق متعوب عليها كثيرا
وبمواصفات عالية
ووقف عليها اصحابها
ولكن للأسف بيعت بسبب { البرستيج } !!!!
شراء البيت الجاهز في بعض الأحيان قد يكلف نفس سعر الشراء مرة أخرى
وقد تجد نفسك انك محتاج لتغيير الكثير من التفاصيل التي لاتتناسب معك
وكما ذكر لك الأخوان سابقا
فانه من الصعب اجراء التعديلات في اللودبيرنق
وحتى لو تمت التعديلات سيؤدي ذلك لبعض المخاطر
لو في إمكانية شراء قطعة ومن ثم البناء فهذا هو افضل الحلول
مع مراعاة انه في حال البناء واشرافك عليه بنفسك..
لازم تضع في الحسبان دس كمية من حبوب الضغط في جيبك
لاستخدامها عند اللزوم
واللزوم هنا ليس مقرونا بعد الوجبة كما يقول الأطباء
بل يمكن ان يكون ذلك على مدار اليوم
ولو كنت من جيل الخمسينات
ولابس ليك نضارة سميكة غايتو الله يكون في عونك !!!! وش مدردق من الضحك !!!
اقسم بالله مرات من الزهج وشطحات العمال { الواحد يقرب يتعلم يشرب البنقو }
ولكن في النهاية بتشعر بلذة ونشوة
وان بيتك ينمو ويكبر
وتضحياتك الجسام في الغربة وعذاباتك بدات تتحول الى ثمار ناضجة
تحتاج الى { ستة خرفان } كاقل تقدير اثناء مرحلة البناء
حاول ضعها في الميزانية
خروف للساس
خروف لصب القواعد
خروف للصبة الأرضية
خروف للأعمدة
خروف لصبة السقف
خروف بداية حفر السايفون !!!!
وممكن عادي تسمع من ناس الفنيشينق يقولوا ليك وين { الدم } بتاعنا !!!!
هذا مع مراعاة احضار { إمرأة كاربة } من سوق الناقة لتجهيز ماورد اعلاه
اها .. وكان عندك حسنات اخذتها هنا من ناس بن عثيمين وابن القيم
نصها برووح في البنيان من الزهج
حاول ياعمك وانت الظاهر عليك انسان بريء جدا والغنماية تاكل عشاك
وعشان عشاك ما ياكلوه الجماعة اتبع النصائح التالية
قبل كل شيء في حال البناء لابد ان تقف على تجارب الآخرين
ادخل ليك عشرة بيوت اثناء التشييد
حاول تلافي كل الثغرات التي قد تجدها في هذه البيوت
لمن تمشي تشتري المواد اسال وادخل كم محل
ولازم تكون زي لوح الثلج وانت بتسال
لأن بعضهم لايطيق ذلك
حاول ان يكون لك وجهة نظر مع المقاول والمهندس والعمال
فإن ترتكت الأمر لهم فبعضهم يعمل على مزاجه
اترك بصمتك وانفاسك على كل مرحلة من مراحل البناء
ولابد ان تشرك اسرتك الصغيرة معك
ليعرفوا حجم المعاناة
ويقفوا معك ويساعدوك
مع امنياتي لك التوفيق
| |
|
|
|
|
|
|
|
|
|
Re: نداء لأحبابنا المهندسين .. أرجو المساعدة .. (Re: ابوحراز)
|
تحتاج الى { ستة خرفان } كاقل تقدير اثناء مرحلة البناء حاول ضعها في الميزانية
خروف للساس
خروف لصب القواعد
خروف للصبة الأرضية خروف للأعمدة
خروف لصبة السقف
خروف بداية حفر السايفون !!!!
وممكن عادي تسمع من ناس الفنيشينق يقولوا ليك وين { الدم } بتاعنا !!!!
هذا مع مراعاة احضار { إمرأة كاربة } من سوق الناقة لتجهيز ماورد اعلاه اها ..
وكان عندك حسنات اخذتها هنا من ناس بن عثيمين وابن القيم نصها برووح في البنيان من الزهج
حاول ياعمك وانت الظاهر عليك انسان بريء جدا والغنماية تاكل عشاك
وعشان عشاك ما ياكلوه الجماعة
اتبع النصائح التالية قبل كل شيء في حال البناء لابد ان تقف على تجارب الآخرين ادخل ليك عشرة بيوت
اثناء التشييد حاول تلافي كل الثغرات التي قد تجدها في هذه البيوت لمن تمشي تشتري المواد اسال
وادخل كم محل ولازم تكون زي لوح الثلج وانت بتسال لأن بعضهم لايطيق ذلك ..
===========================================
يا سلام حبيبنا أبوحراز .. نصائح اخ عزيز .. وبكل صراحة وتجرد ..
وكأنك لمست همومي .. نعم نحن فوق الخمسين .. وحبوب الضغط كمان ..
صدقني كلامك في الصميم وتطرقت إلى كل شيء في الموضوع ..
وجزى الله هذا المنتدى خيراً .. أن هيأ لنا إخواناً بهذا الحرص والتجرد والصراحة ..
مودتي الحبيب أبوحراز ..
| |
|
|
|
|
|
|
|
|
|
Re: نداء لأحبابنا المهندسين .. أرجو المساعدة .. (Re: علي عبدالوهاب عثمان)
|
سلام اخ علي عبد الوهاب
بعد اخد راي الاخوة هنا
كمان في موقع اسمو عقارات الخرطوم
في الفيس بك ... موقع ممتاز متخصص في
الاراضي البناء التشطيب التصميم ومواد البناء ...... الخ
فيه كمية كبيرة من الختصين والمهندسين واصحاب الخبرات
في مجال البناء والاراضي ... ادخل علية وحا تستفيد جدا جدا
وتحية للقائمين علية المواطن ابو الوفاء ...
| |
|
|
|
|
|
|
|
|
|
Re: نداء لأحبابنا المهندسين .. أرجو المساعدة .. (Re: علي عبدالوهاب عثمان)
|
حبيبنا علي عبد الوهاب عثمان
بعد كلام اخونا ابو حراز تب خفنا عليك وعلى تحويشة العمر والغربة ... يازول اوعك تمشي اي مشروع بناء ولا اي مشروع لوحدك جيب قبيلتك كلها معاك ... ناس السودان تمااااسيح وتماااااسيح موش العشاري تماسيح العشيرناااااوي ...
عشان العشرة بتاعت سودانيزاولاين البتفتخر بيها وبفتخر بيها ... بخلي عمي مهندس ومقاول قديم يساعدك .. عن تجربة في حي النصر وقف لي البيت ما ناقص سيخة ... والحمد لله ... بس الحارث سامحه الله باع الموتور بتاع الموية هههههه
| |
|
|
|
|
|
|
|
|
|
Re: نداء لأحبابنا المهندسين .. أرجو المساعدة .. (Re: خال فاطمة)
|
حبيبنا خال فاطمة .. ما شاء الله ما شاء الله ..
على أحفادي الحلوين .. اللهم احفظهم ووالديهم ..
تعرف حبيبنا خال فاطمة .. أنا حالياً جمعت كمية مهولة من المعلومات
والنصائح .. سوف تكون مفيدة جداً إن شاء الله ..
وشكراً على الدعم الاستشاري ..
وسوف أرجع لأي من الاخوان عند الضرورة ..
مودتي .. خال فاطمة .. كثر الله من أمثالك ..
| |
|
|
|
|
|
|
|
|
|
Re: نداء لأحبابنا المهندسين .. أرجو المساعدة .. (Re: خال فاطمة)
|
توبة يا مولى
بوست ضناقلة صر
تيب يا على أنقي تود ما تبني في دنقلا العورضي وتريحنا
أولا سلام .. سلام لكل الاخوان
أحي اخي علي عبد الوهاب
وأحب أقول ليك غايتو ما في فرق كبير بين اللود بيرنق والأعمدة .. يمكن الفرق تقريبا حوالي اتناشر تلتاشر جنيه
أهم شي الوساع في الطابق الأرضي يا علي عشان تسكن بمزاج
وتعمل ليك شقتين نقاطة فوق ...
والمحل ما مشكلة كل الخرطوم واحد
التراب والموية القاطعة وناس المحلية ...
في الاجازة الفاتت تلاتة يوم اجر الموية بخشمي زي القاعد أجر بنزين في قلب مدينة الطائف
المتر هناك بي 10 مليون
ولمن اتصلت على صحبي قلت ليه ما في تناكر موية للبيع قال لي : انت قايل نفسك في الهنداوية ..
ابني في اي حتة تقدر تشتري فيها
وابني اي حاجة تعمل ضل .. بس فكر تعمل ليك فيه شي استثمار .. دكان .. شقة أو حتى سبيل
مودتي ليك
وأرتن حسبر
| |
|
|
|
|
|
|
|
|
|
Re: نداء لأحبابنا المهندسين .. أرجو المساعدة .. (Re: جمال عبد الناصر محمد)
|
توبة يا مولى بوست ضناقلة صر
تيب يا على أنقي تود ما تبني في دنقلا العورضي وتريحنا
===========================
هوي ووو جمال أمبس ..
إن بنجد إنقيتل ..
صدقني وو جمال في البرقيق عندنا أجمل من دنقلا
ولكن ده كلو عشان الأولاد .. أنا هناك في حواشتي فوق ظلط شريان المحس
على بعد 500 كلم من الخرطوم .. أجمل بقاع الوطن .. للعاصمة زيارات فقط
كان ما نفع كمان مصر راس زي ما كان كبارنا يقولوا ( مصر لوما تغنيك تستر حالك )
من قسطل إلى باب منزلنا في البرقيق ساعتين ونص .. والقاهرة مليانة بني دنقل من أهلنا
جمال أمبس .. بيت الخرطوم لازم حتى الأهل في البلد أول سؤال ما عملت بيت في الخرطوم ؟؟
مودتي جمال امبس .. شكراً على الاضافة ..
| |
|
|
|
|
|
|
|
|
|
Re: نداء لأحبابنا المهندسين .. أرجو المساعدة .. (Re: معتصم الطاهر)
|
حبيبنا معتصم .. مودتي
شكراً على الاهتمام ..
إن شاء الله إذا جعل الله في العمر بقية سوف أكون هناك بين العيدين
للوقوف على الطبيعة .. إذا قدرت أقنع الكفيل لأن إجازتي السنوية لسع
ولا بأس من تزويدي بالرقم
هاتفي في الخاص ..
شكراً كثير إستجابتك للفزع
ناس أصيلين
| |
|
|
|
|
|
|
| |
علي عبدالوهاب عثمان
عمار قسم الله
Abdalla Hussein
Fatima Alhaj
خال فاطمة
khaleel
محمد على طه الملك
سيف الدين محجوب
أيمن محمود
فؤاد إبراهيم
جمال ود القوز
علي الكرار هاشم
هشام المجمر
ahmedona
محمد محمد قاضي
محمد مجيدو
ابوحراز
جمال عبد الناصر محمد
معتصم الطاهر
فيس بوك
تويتر
انستقرام
يوتيوب
بنتيريست