إتفاقية ملزمة لمحمد مختار وحاتم إبراهيم لحسم موضوع الDrone ..

Quote: الخلاصه ان دور كلاكما مكمل للاخر فقط التركيز علي تقبل فكرة الاخر ومحاولة الاستفادة منها

السلام أخ السنوسي

تعرف آفة الابتكار هي المبالغة زي ما قلت ودا مصطلح رقيق جداً من جانبك، لكن كمان كان جيت للجد فالفكرة ما مقبولة كلو كلو. في رأيي المتواضع إنو الآفة القاصدها انت هي الأحلام النرجسية ودي مشكلة مش في الابتكارات بس بل كل مجالات الإبداع في السودان ودا لأنو نحن شعب مجامل وضعيف الشخصية ولا يصلح للقيادة لأنو دائما بنحشر العواطف والعلاقات الشخصية في العمل عشان كدة شغلنا مكلفت، وبنصنع الأصنام وبعدين نجي نشتكي منها نقول قاعدة ساكت وما استفدنا منها وبقت عالة، شايف بوست المرحوم وردي المدور اليومين ديل؟ نفس السيناريو، قبيييييل لو الزول بيوقفوهوا في حدو ويحكموا عليهو بالحق بدون مجاملة ويحددوا ليهو يعمل شنو ما كان وصلنا للوضع دا، أنا يدي ماكلاني لكن شايف ناس الجودية شغالين تش، والله داير خش أتش معاهم، لكن التش حقهم بيختلف عن "التش" بتاعي، حقهم بيغتغت وحقي بيعالج وقتي. أها، أخونا (محمد عبد الله مختار) ودا اسمو الكامل عشان النيران الحريقة دي ما تمشي للزول الخطأ بيبالغ في توقعاتو ومصر يغلفها بتوصيفات علمية وبأرقام استبق فيها حتى الحقائق البسيطة الكان ممكن يعرفها من "غَرفة" واحدة من غوغول "قوقل" ودي أنا أوردتها في البوست الأساسي هنا http://sudaneseonline.com/board/490/msg/%D8%A7%D9%84%D8%B1%D9%88%D8%A8%D9%88%D8%AA-%D8%A7%D9%84%D8%AE%D8%B7%D9%8A%D8%B1-%D9%88%D8%A7%D9%84%D...8%B1-1469028345.html وبدون الدخول في تفاصيل فنية أنا شايف المشروع قائم على حلم وردي باستخدام "فَراشات" بدل الآليات الحقيقية في أقدم نشاط عرفو الانسان، يعني الإرث المعرفي البشري في النشاط دا بالذات ضخم ومتوفر لتبادل الخبرات بطريقة لا تترك مجال للتجريب بدون الاعتماد على ما توفر في التاريخ من معلومات. في أمريكا وروسيا بيستخدموا جرارات لو شفت الواحد من بعيد واقف تقول داك بيت من شدة ما كبير، الأمريكان بيزرعوا القمح في الولايات الشمالية لغاية حدود كندا يبتحركوا في معسكرات الحاصدات دي شهر كامل تاكل في سيقان القمح والجماعة يعبوا وراها، ديل ما وصلوا لحكم العالم بالطريقة الناعمة في إدارة الشأن الزراعي، والسودان ما استثناء سواء كان المطلوب زراعة محاصيل أو محاربة تصحر، برضك فيهو المساحات ضخمة ومستوية. فلما يجي واحد يروج لأنو ممكن يزرع 1000 بذرة في ساعة ويكلمنا عن دقة مفترضة ويكون الجهاز المقترح لعبة ببطاريات تزرع وتنافح الآفات هنا بتكون عندنا معاهو وقفة وندرّجوا بشيش بشيش وبالكلام القالوا ذاتو، ويتضح بعد داك إنو حتى الأساسيات في اللعبة دي ذاتا ما تم احترامها، وطبعاً عملياً ممكن نقول ليهو في نفس الساعة ديك التركتر ممكن يزرع مساحة كم من الأرض وبكم جالون جازولين ويشتغل كم زول وياكل كم بطارية، وهل الرياح بتوقف التركتر زي الفراشة بتاعتك دي وهل وهل، دي كلها أسئلة مشروعة، لأنو الراجل ببساطة تطرق لتنفيذ حقيقي على الأرض وذكر مشاريع بعينها. قبيل لو قال (دا مشروع بحثي) كان جينا اتونسنا معاهو لكن مصر على إنو دا واقع وممكن ينفذوا مباشرة وينقذ العالم الثالث والرابع سوا، أها، الاتفاقية دي عشان يحسمني وبطريقة فيها مواربة، يعني يعيد التجربة الظاهرة في الفيديو (لكن بدون سيلوتيب) ويقول لي أها شفتا طارت! يلا أجري اعتذر في سودانيز! I am a banana فطرحنا عليهو فقط يثبت المواصفات بالأرقام القالها احتج وقال الموضوع داير تصاريح من الطيران المدني وناس الأمن، زي صواريخ ناسا وااااحد، قلنا ماشي، أديناهو المواصفات الدكاكينية "ضربوا رماهو" الفوق دي ناس طين وتراب وزيت راجع وسمكة وفار وشتلة واحدة عشان يجرب عليها، اعتقد fair enough وأهو راجينو، لكن اتفاقية إذعان أنا ما بقبل بيها دت، لو معلومات قاعدين ولو هندسة وحساب حاضرين وكان لكاعة ساكت ياهو شغلنا. _______ آآي أنا معاك كلامي حار، بس للمصلحة العامة، وللأمور الهامة.