|
|
 Re: بيوت من طين . (Re: shaheen shaheen)
|
5
فى عام 2006 عندما كان وباء انفلونزا الطيور يجتاح العالم , كانت هى المرة الاولى التى اتحدث فيها مع
" الشامة " وضربتنى بحجر ضخم على قدمى , شاهدتها قبل ذلك مراراً فى مرورى العابر , لكننى لم اوجه لها حتى تحية
وعندما اعلنت منظمة الصحة العالمية بدايات وباء انفلونزا الخنازير فى عام 2009 , كانت هى المرة الاولى التى اجلس فيها وجهاً لوجه مع " اسعد فضيل " اطرح عليه الاسئلة ولا اجد اجابات مُقنعة
نحيف , ابيض اللون , وصاحب قامة طويلة فى تناسق , حب الشباب على وجهه منحه جاذبية خاصة , وكانت هى المرة الاولى ايضاً التى الحظ فيها نوتة بيضاء ضخمة يحملها بين يديه وعلى الغلاف الخارجى كانت هناك لوحة كبيرة لفراشة مكتوب اسفلها بخط يد انيق وواضح ( كيف تتحول الأساطير الى حقائق ؟ )
- دى قصايد شعر يا استاذ ؟ .
ضحك ضحكته المهذبة
- فى استاذ رياضيات بقدر يكتب شعر ؟ , ده كتاب .. لى مدة طويلة بكتبه وما داير ينتهى .
- عن شنو ؟ .
- عن الزيداب .
كان يجلس على الربوة الاولى التى تفصل قلعة سيدى " زيد " الطينية عن ضريحه الاسمنتى , وجدته كثيراً على هذه الحالة , ظهره للقلعة وعيناه على الضريح , هذه المرة القيت عليه التحية وجلست بجواره على الارض
- ممكن اسألك سؤال بايخ ؟ .
- ممكن .
- انتو ما بتحبونا ؟ .
- احنا منو ؟ .
- أأأ الحلب .
- انتا مش العاص ود حاجة البتول ؟ .
- انا ذاتى , انتا ما عرفتنى يا استاذ ؟ .
- ماشاء الله , الايام بتجرى , انا شايفك كتير لكن قايلك خالد .
- خالد اكبر منى بخمستاشر سنة , هو هسع فى السعودية .
- تمام .. تمام .. انا مشكلتى ما بقيت اقعد كتير فى الزيداب .
- انتا هسع أستاذ فى ياتو مدرسة ؟ .
- فى امدرمان , المؤتمر الثانوية .
- الزيداب بقولوا استاذ ود فضيل زول شاطر شديد فى التدريس .
- شكراً , شكراً .. انتو ناس طيبين شديد .
- بتحبونا ؟ .
- هاهاهاها .. المشكلة فى التاريخ يا العاص .. انتا فى الجامعة ؟ .
- انا بدرس فى الجامعة قانون , ماشى المستوى التانى .
- تمام .. تمام .. ربنا يوفق الجميع , تعرف انا مفروض ارجع البيت اكوى هدومى عشان شغال بكرة الصباح بدرى .
- بلقى عندك يا استاذ مراجع عن انفلونزا الخنازير ؟ , عندى محاضرة الاسبوع الجاى فى النادى عن الموضوع ده .
- والله يا العاص ما اظن الموضوع ده مهم فى الزيداب , شايف فى مواضيع اهم من كده بكتير , لكن كدى بفتش ليك فى الانترنت .
- لا , الموضوع ده ما مهم كيف فى الزيداب ؟ , الكلام ده غلط .
نظر لى فى دهشة وهو ينهض , لم يتعود على اعتراض التلاميذ
- تعرف يا أستاذ اسعد , فيروس الانفلونزا الاسبانية سنة 1918 قتل 100 مليون زول فى العالم , وفيروس انفلونزا هونغ كونغ سنة 1968 قتل مليون انسان .
نظرت فى عيونه لمعرفة تأثير استعراض عضلات معلوماتى , وجدت شبح أبتسامة خفيفة على الشفتين
- حااااضر يا العاص , بجمع ليك معلومات وكمان بحضر المحاضرة بتاعتك فى النادى .
سئلت فى فرح وفخر
- وعد ؟ .
- تمام .. تمام , وعد يا محامى .
مد كف يده اليمنى لى وتصافحنا فى مودة حقيقية , المرة الاولى التى نتصافح فيها .
|
|
 
|
|
|
|
|
| العنوان |
الكاتب |
Date |
| بيوت من طين . | shaheen shaheen | 06-06-16, 06:41 PM |
| Re: بيوت من طين . | shaheen shaheen | 06-17-16, 09:52 PM |
| Re: بيوت من طين . | shaheen shaheen | 06-17-16, 09:53 PM |
| Re: بيوت من طين . | shaheen shaheen | 06-17-16, 09:54 PM |
| Re: بيوت من طين . | shaheen shaheen | 06-17-16, 09:55 PM |
| Re: بيوت من طين . | shaheen shaheen | 06-17-16, 09:56 PM |
| Re: بيوت من طين . | shaheen shaheen | 06-17-16, 09:57 PM |
| Re: بيوت من طين . | shaheen shaheen | 06-17-16, 09:59 PM |
| Re: بيوت من طين . | shaheen shaheen | 06-17-16, 10:00 PM |
| Re: بيوت من طين . | shaheen shaheen | 06-17-16, 10:01 PM |
| Re: بيوت من طين . | shaheen shaheen | 06-17-16, 10:02 PM |
| Re: بيوت من طين . | shaheen shaheen | 06-17-16, 10:03 PM |
| Re: بيوت من طين . | shaheen shaheen | 06-18-16, 03:35 PM |
| Re: بيوت من طين . | shaheen shaheen | 06-19-16, 06:52 AM |
| Re: بيوت من طين . | shaheen shaheen | 06-19-16, 06:53 AM |
| Re: بيوت من طين . | shaheen shaheen | 07-20-16, 06:32 PM |
|
| |
shaheen shaheen
فيس بوك
تويتر
انستقرام
يوتيوب
بنتيريست