صدور الجزء 2 من تأريخ الغناء والموسيقى بالسودان لمعاوية يس !!!!!

Quote: ونؤكد لأخونا أحمد الأمين إننا متابعين ومستمتعين وشاكرين ليهو على المجهود الكبير دا والتناول الجذاب للجزء التاني من موسوعة ولد كردفان معاويه ياسين. كعادة أخونا أحمد الأمين، البداها معانا في عرضو لكتاب "ذكريات مرابع الصبا والشباب" بتاع أخونا أحمد جبرين، أخونا أحمد يستعرض الكتاب بدقة وحرفيه، ويضيف ليهو – من عندو – هوامش تزيد الكتاب قيمه وتربطو بمعارف أخرى خارجه، زي الإشارات لكولردج وفرنسيس دينق مجوك وود ضيف الله وأبو الفرج الأصفهاني وإبن عبد ربه و جمال محمد أحمد والطيب صالح وحتى أنس بن مالك. للأسف ما قريت الجزء الأول من الموسوعه دي، ولا حتى تلخيص ليهو. لكن – كعادة أخونا أحمد الأمين – يديك راس الخيط ولمن تتابعو تلقى نفسك لازم في النهايه تتحصل على كل الكتب المذكوره في الملخص. عملها في ملخص ذكريات أحمد جبرين وباين حيعملها في ملخص موسوعة أخونا معاوية ياسين. غايتو ننتظر الطبعه التانيه منو لو ما لقيناهو في المكتبات. أكيد الواحد خت "حوار الدين والفن" للترابي و"بيت الجاك" للصلحي و"مذكرات أغبش" لعبدالله رجب و"مدينه من تراب" بتاع على المك في القائمه المطلوبه ... الفن تعبير عن وجدان الأمه. والأمم كلها بتكرم وتحتفي بفنانيها زي ما بتحتفي بعلمائها وسياسييها. بريطانيا منحت إلتون جون لقب سير. لكن في بلدنا دي تاريخياً الفن ما كان مقدر. الأغنيه المعروفه من شعر محمد طه القدال بتقول: انت في كل الخواتم والمياتم والنجيمات والعواصم والمغنين المطاليق يعني برضو المغنيين مطاليق. حوه الطقطاقه ذكرت مره إنو أهلها طردوها من البيت وإتلمت مع عشه الفلاتيه ومنى الخير في بيت الكاشف.. لكين ربنا يسر للفن الغنائي والموسيقي السوداني "حواضن" رعته وشذبته وعرضته على السودانيين وعلى العالم الخارجي. أهم الحواضن دي الذكرها المؤلف إذاعات أم درمان وركن السودان و هنا لندن. لكن ما ديل وبس: في شخصيات ليها دور كبير في حفظ ونشر الفن السوداني وأولهم ديمتري البازار الإغريقي الحفظ الكثير من الحقيبه بتسجيلها على نفقته في أسطوانات في مصر. في السودان برضو ظهرت شركات إنتاج سجلت الأغاني في أسطوانات، ومنها "منصفون". بس تسجيل منصفون ما كان كويس وما بيضارع تسجيلات الإذاعه. وأعتقد إنو تسجيل منصفون لأغنية وردي "عذبني" والكان بيبث في الإستراحه في سينما كلوزيوم كان من السوء بدرجة كرهني وردي زاتو ... بس المؤلف المفتون بوردي ما يسمع دي !!!! في ناس برضو إتولوا رعاية الفنانين زي الكاشف في القصه أعلاه وزي ناس عوض دكام. القعدات كانت ثقافه سودانيه منتشره، وعادة تضم كبار الأفنديه. ديل ساهموا بشكل كبير في الإنتاج الفني (شعر وموسيقى وغناء) وإحتضان الفنانين. قعدات دار فوز مثلاً ظهرت فيها عدة أغنيات ومنها تحفة الخليل "ما هو عارف قدمو المفارق". السينما المتجوله التابعه لمصلحة الثقافه الكانت بتعرض الغنا السوداني في جميع قرى السودان ... ويا ما سمعنا فيها الكاشف وأحمد المصطفى ووردي. مجلة هنا أم درمان وكتيبات الأغاني (زي "زهرة الأغاني") الكان بيطبعها ويوزعها موسى السراج وهندي عوض الكريم ... والتسجيلات ... الجيش والبوليس الكانوا بيشاركوا في الإحتفالات والمواكب وزفة العيد والمولد. التجهيزات للحرب العالميه التانيه ساهمت في إنتشار أغاني الحماس والتجهيز المعنوي للجيش والشعب. التلفزيون ومعهد الموسيقى والدراسه في مصر (العاقب – سيد خلبفه – محمديه – إسماعيل عبدالمعين – حمزه علاء الدين ...) ... بعض الأثرياء برضو إحتضنوا الفنانين زي ناس أبوالعلا وأحمد المصطفى وحسن عطيه نجم المجتمع البرجوازي السوداني. وحتى بعض الفنانين إحتضنوا آخرين ووجهوهم، زي تجربة ثنائي العاصمه مع عثمان حسين. العلاقات الإجتماعيه القويه في المجتمع الحضري السوداني برضو ساهمت في خلق الثنائيات (وردي /سماعين حسن – عثمان حسين/بازرعه – أبوداؤد / برعي). وحتى في الوظايف بعض الفنانين لقوا فرص في مؤسسات حكوميه .. مثلاً الإداره المركزيه للكهربا ساعد أحد إدارييها "الموسيقار علاء الدين حمزه" الكثير من الفنانين وأوجد ليهم وظائف فيها. ديل كلهم ساهموا في نشر وتطوير الأغنيه السودانيه. وأرحب بقناة "أنغام" المتخصصه في الموسيقى السودانيه البدت إرسالها التجريبي قريب كدا. وأتحسر على قناة "هارموني" الكانت مركزه على غناء أهل الهامش. الكاتب بيعتبر إنو الفن ما إتطور كثير في الفتره المايويه. أنا شايف إنو – ما دفاع عن مايو – لكن مايو عملت عدد من مهرجانات الثقافه والموسيقى الأنجبت الخالدي وخوجلي عثمان وتاور ومصطفى سيد أحمد ... والدورات المدرسيه. وفي عهدها كنا منفتحين على العالم .... وفرق موسيقيه كتيره زارت السودان ... ومغنيين عرب وأفارقه "مريم ماكيبا" و"فيكي بلين" و"حليمه الصوماليه" و"المايو" و"تلهون" ... وحتى أمريكان جيمي كليف (أم كلثوم جات قبل مايو). في مايو برضو إنتشرت الأغاني الوطنيه وظهر معاها مغنيين وشعراء وموسيقيين ميولهم إشتراكيه. ودا غذا الإتجاهات السياسيه والمضمون الإجتماعي للشعر والأغنيه السودانيه. لو إتكلمنا عن الفن السوداني الظهر في العاصمه والمدن الكبيره، لازم نذكر إنو فن قومي: إقتبس إيقاعات وألحان وسلالم وآلات موسيقيه وأداء وكورس من الشمال والغرب والجنوب والشرق. حتى الآن المارشات العسكريه السودانيه القديمه بسمعها في تلفزيون دولة جنوب السودان ال- حتى الآن – أنا ما قادر أتقبل واقع إنها إنفصلت من سوداني الجوه وجداني. وبرضو فننا السوداني ما إنكمش وتقوقع على ديل: الفن السوداني إقتبس من البحر العارم للفنون خارج السودان. أغاني الخمسينات والستينات فيها إيقاعات زي السامبا والفالس والفوكس تروت. المامبو بتاعة سيد خليفه اصلها أغنيه إيطاليه ... ولسخرية القدر بقت الأغنيه الوحيده البتعبر عن الفن السوداني لدى المصريين وعرب الخليج !!! الفن السوداني إستوعب الأشعار من خارج الحدود. سمعنا هذه الصخره بتاعة الفيصل وغناها العاقب وسمعنا وطن النجوم بتاعة إيليا ابوماضي وغناها أحمد المصطفى والجندول بتاعة على محمود طه الغناها الكابلي وبرضو أمة الأمجاد بتاعة مصطفى عبدالرحمن الأدوها بصوره رايعه الثنائي الوطني وفازت في أحد المهرجانات العربيه بأفضل أغنيه وطنيه. ومن الدوبيت والكرير والصفقه دخل الطار مع المديح وشويه شويه الرق والبنقز والدربكه والمثلث والبيانو والزيلفون مع الحقيبه لغاية ما وصلنا لسودنة العود والماندولين والكمان مع الأغنيه الحديثه، وبعدها الجيتار والبيزجيتار والنحاسيات (***فون وترومبون وكلارنيت البرع فيهو أخونا أميقو) والتشيللو والفلوت والبيكلو والكي برود والدرمز. وحتى شعرنا الغنائي إتطورت مواضيعو وأوزانو وطلعنا من نطاق التغزل في محاسن المحبوبه المحسوسه والشوق وسهر الليل للتغني بالمعاني الكبيره في فترة التحرر الوطني والأفريقي (لن أحيد – يا غريب بلدك – أنا سوداني – عزه في هواك) و التضامن مع نضال الشعوب. المجال دا برع فيهو الكابلي الغنى أنشودة أسيا وأفريقيا بتاعة تاج السر الحسن وأغلى من لؤلؤة بضه القطعها الكابلي في المناضله الجزائريه جميله بوحريد. وبرضو غنى لفلسطين ولمصر الناصريه. وحتى غنانا الشعبي وغنا البنات ما قصر في الإشاره للدول الصديقه زي شباب كوريا .. الفن الموسيقى والغنائي السوداني إمتزج بالشعور والوجدان السوداني ودخل في أخص خصائصنا ومناسباتنا. إختلط بالرقص الجماعي والرقصات الخاصه (زي رقص العروس) والقعدات وإحتفالات الحصاد والأسبار والموسيقى العسكريه العملها تحميس الجنود، وحتى في العلاج (الزار) والكوميديا (منلوجات) والمسرح ... ولوكان عندنا سينما لكان في نصها لأنو فننا دخل السينما العربيه (سيد خليفه وأحمد المصطفى). وبرضو فننا متنوع: حقيبه وطمبور وحديث وجاز وسيمفوني (الماحي إسماعيل) وشعبي (محمد أحمد عوض). في الغالب الغناء مصاحب للموسيقى، لكن برضو عندنا قطع موسيقيه خالصه. مره بشوف في برنامج سياحي عن إندونيسيا في قناه تلفزيونيه إيطاليه، ففوجئت بموسيقى تصويريه مقتبسه من مقطوعه لبرعي محمد دفع الله. وربما كان العكس هو الصحيح. لكن حتى ولو، دا بيؤكد إننا ما متقوقعين. وبرضو النغمات السودانيه بتسمعها اليومين ديل في نغمات الجوالات في دول الخليج. فننا رحب بالثقافات الأخرى وإستوعبها وأدخلها في قوالبو. سمعنا نوتات موسيقى حبشيه وهنديه وخليجيه والريقي والجالوا في غنانا. وحتى برز عندنا شعراء وملحنين ومغنيين أصولهم ما سودانيه، زي عشه الفلاتيه وإسماعيل خورشيد وأبو صلاح والمساح وناجي القدسي وود اليمني وخالد أبو الروس ومسعد حنفي. وأصلو ما ننسى الزول الحفظ لينا تراث الحقيقيه ديمتري البازار .. دا كلو كان في وقت إنفتح فيهو السودان على العالم. في وقت كانت الفرق الفنيه والفنانين بيزوروا السودان من الدول العربيه مصر ولبنان وإثيوبيا والصومال ومريم ماكيبا من جنوب أفريقيا وفيكي بلين والعديد من الفرق الأوربيه البتجي بدعوات من معهد جوته والمراكز الثقافيه: البريطاني والفرنسي والروسي والأمريكي .. والخرطوم مليانه نوادي أجنبيه وصالات (صالة غردون للموسيقى) البتقام فيها الحفلات. هسه واحد من النوادي دي (الكاثوليكي) إنتزعته الشجره الفاسده ووظفتو للحاجات البتعرف هي براها تعملها ... وبرضو الفن السوداني ما إنغلق على نفسو ... بساطة وعذوبة الألحان والأصوات وتنوع الإيقاعات أدت لإنتشارو بكثره في الدول الوجدانها مشابه لوجداننا: إثيوبيا وأريتريا وتشاد وجيبوتي والصومال وكينيا ونيجيريا والكاميرون. يمكن ما إنتشر كتير في الدول العربيه بسبب مسألة الوجدان دي، لكن المصريين "مصروا" بعض غنانا (محمد منير) وستونه المجروس برضو سوقت ليهم بعض فنوننا. سمعت مغنيه سوريه بتغني الأغاني السودانيه القديمه بطريقه رايعه. القناه الموريتانيه أسمع فيها أحياناً أغاني سودانيه .. بس هم معجبين بتومات خيري !!! في أحد الجلسات رحب بي موسيقار سعودي بعزف وغناء "حبيبة عمري" بتاعة الكابلي. وإسماعيل عبدالمعين نقل الموسيقى السودانيه لفرنسا بس ما عارف مقدار النجاح الحققوا هناك. وطبعاً الموسيقار الكبير حمزه علاء الدين ما قصر في نشر الموسيقى والإيقاعات النوبيه في كل مكان درس فيهو: في امريكا واليابان. وعلمت إنو هنالك عدد من المغنيين والمغنيات السودانيين ظهروا في أوربا وأمريكا في العهد دا ... عهد الهروب الكبير من السودان ... ومنهم من غنى بلونية الغرب ومنهم من حافظ على لونيته زي ناس الموصلي هاديه طلسم. ناس وردي وعبدالقادر سالم وحتى ندى القلعه ما قصروا ... حضرت حفله في "ديسكو شعبي" في مدينة بحر دار الإثيوبيه، كل الأغاني البيتناوبوا في ترديدها مغنيات/جرسونات كانت أغاني سودانيه ... بإستثناء كوستي – القيل إنو ظهر فيها فن التم تم – هنالك 3 مدن سودانيه أثرت كثيراً في فن الحضر السوداني من ناحية المغنيين والموسيقيين والعازفين والشعراء، وهي العاصمه و مدني والأبيض. الأبيض ظهرت فيها فرقة فنون كردفان وأسس فيها جمعه جابر أول معهد موسيقي سوداني قبل تأسيس معهد الموسيقى والمسرح الفي العاصمه. الأبيض إحتضنت الشعراء القرشي والأمي والملحنين برعي والفنانين عبدالعزيز محمد داؤود والشفيع ومحمود عبدالعزيز، وديل كلهم من خارجها. ويضاف ليهم شعراءها ناس الكاظم ومريخه وفنانيها ناس ودبارا وموسى أبا وعبدالقادر سالم وفتاح وصديق عباس والعميري وثنائي النغم وموسيقييها ناس حافظ وأميقو ... لاحظت إنو الأربعين الذكرهم المؤلف كلهم من الشعراء. هل إختصر الكاتب الفن السوداني في الشعراء فقط؟ هنالك المغنيين وهم الأساس والملحنين والعازفين والنقاد وجنود كتيره مجهوله بتقيف خلف نجاح الأغنيه. وبرضو مذكور إنو الجزء دا من الموسوعه لا يشمل عثمان حسين وحسن عطيه ووردي وود الأمين وحمد الريح واللحو. ومال حيشمل منو لو تخطى ديل؟ أنا ما قريت الجزء الأول من الموسوعه الغطى الفتره قبل 1940. التاني غطى من 1940 الى 1999. باين إنو الثالت حيغطي كلو الفترة الإنقاذيه التخريبيه. ما عارف الأول كيف، لكن التاني صدر في أكتر من 600 صفحه. أكيد التالت ما محتاج لخمسين صفحه لأنو حيكون كلو مارشات وجلالات عسكريه وتقليد ومغارز ورحلات فنيه (نيجيريا مثلاً) و"نجوم الغد" وكلمات هابطه والكتير من "التمصير" و"التخليج" للأغنيه السودانيه. المغنيين (إسماعيل عبدالمعين رفض تسمية فنانين وفضل عليها صييتين "vocalists") بقوا بتاعين عداد وما بيجتهدوا في الإنتاج والتجويد، التقليد والجاهز اسهل ... رغم إنو الإتوفر ليهم الزمن دا ما كان ناس زمان يحلموا بيهو. كتابة الموسوعات محتاجه لجهد جبار ومساهمات من العديدين. أتمنى إنو الناس العندهم معلومات عن الفن السوداني ما يبخلوا بيها على المؤلف. ومما يحمد للمؤلف فتح الباب أمام الآخرين لإدلاء بدلوهم ورفد الموسوعه دي بالإضافات. وأكيد فعمل زي الموسوعات (وأذكر هنا "موسوعة القبائل والأنساب" بتاعة عون الشريف قاسم) محتاج لمصادر معلومات متنوعه ومساهمات متعدده من حملة التراث دا. ونرجو إنو المصادر دي – زي ناس السر قدور وواحد بروفيسير كدا في الأحفاد ما متذكر إسمو - ما يبخلوا بالمعلومات، ويعتبروا أنفسهم شركاء مع الكاتب في كتابة الموسوعة دي ... عشان فننا دا ما يندثر. وما تدخل عليهو أفرع الشجره الفاسده وتفسده. هسه البوست دا وصل الصفحه التالته ولسه نحنا في الفصل الأول من سته فصول. الله يعين أخونا أحمد الأمين يكمل ملخص باقي الفصول ... ونحنا موعودين بزيادة الإستمتاع. في ختام التعليق دا لازم الواحد يكرر الإشاده والشكر والتقدير للكاتب معاويه ياسين ولأخونا أحمد الأمين على الجهد الكبير البذلوهو في مجال تجميع المواد والكتابه للأول والتلخيص للثاني. وأنا أعلم تماماً إنو التلخيص برضو مهمه شاقه جداً. وبرضو بعتذر لو موضوعي دا طلع شويه من التعقيب على الملخص العملو أخونا أحمد الأمين ولا على الموسوعه زاتها. على إنو الكلام دا كلو أنا شايفو متماشي مع الموضوع. رحم الله جميع الأموات ممن ذكرت وأمد الله في أعمار الأحياء منهم.